ASU AYÉ’É 5
“Nlô ya fam ése ô ne Krist”
“Nlô ya fam ése ô ne Krist.”—1 BEC. 11:3.
JIA 12 A Yéhôva Zambe wongan . . .
ÔBALEBAS *
1. Mam mevé me ne bo na fam é dimine belan éjôé jé?
WO YEN éjôé aya? Befam béziñ ba jô’é na metume ya jal dap mme me kate be avale ba yiane wulu binga bap a bone bap. Yanita, sita ya Europe a jô na: “Bôte ya vôm me too ba yene binga ane alo.” Wônaa Luc, mojañe ya États-Unis, a jô na: “Beésaa béziñ ba ye’ele bobefame bap na minga a nji yiane kobô vôm befam be né.” Ve sake nne Yéhôva a yi na befam be belan éjôé jap nalé. (Fombô’ô fe Marc 7:13.) Nde ñhe, jé é ne volô fam na é bo mbamba nlô ya nda bôt?
2. Jé nlô ya nda bôt wo yiane yem, a amu jé?
2 Fam ja kômbô bo mbamba nlô ya nda bôt ja yiane tu’a yem ésaé Yéhôva a nga ve nye. A yiane fe yem amu jé Yéhôva a nga ve mingum mi bôt éjôé, a aval avé a ne vu Yésus ba Ésaa wé éyoñ a belan éjôé jé. Amu jé fam ése ja yiane yem mam mete? Amu Yéhôva a yi na befam be yeme belan abim éjôé a nga ve be.—Luc 12:48b.
AVAL AVÉ YÉHÔVA A NGA TA’A NDA BÔTE JÉ?
3. Bela’ane 1 Becorinthien 11:3 na ô liti avale Yéhôva a nga ta’a nda bôte jé.
3 Lañe’e 1 Becorinthien 11:3. Éfus éte ja liti avale Yéhôva a nga ta’a nda bôte jé ataté yôp azukui si va. Yéhôva nnye a ne Nlô ya biôm bise, nalé a tinane na teke môt a jôé nye. (Bero. 14:10; Beép. 3:14, 15) Wônaa bôte ki a nga ve abim éjôé éziñ, ba yiane yeme na a véé mise na a yen avale ba belan éjôé éte. (1 Bec. 15:27) Yéhôva a nga telé Yésus nlô ya akônda, ve a kôme fombô avale Yésus a belane mintômba mié. Wônaa, Yéhôva ba Yésus ki ba fombô avale befam ba belan éjôé Zambe a nga ve be nda bôt été.—1 P. 3:7.
4. Éjôé évé Yéhôva ba Yésus be bili?
4 Mbôle Yéhôva nnye a ne Nlô ya biôm bise ya yôp a si, a yiane ve bone bé metiñ, a véé fe mise na a yen nge ba tôñe fo’o metiñe mete. (És. 33:22) Yésus fe a bili na a ve bia metiñ amu nnye a ne nlô ya akônda.—Beg. 6:2; Beco. 1:18-20.
5. Abim éjôé avé minlô ya menda me bôte mi bili?
5 Aval ane Yéhôva ba Yésus, nlô ya nda bôt ñwô wo nyoñe mintyi’an nda bôte jé. (Bero. 7:2; Beép. 6:4) Ve a yiane yeme na éjôé jé é bili minné. Éyoñ ése a nyoñe mintyi’an, a yiane belane Kalate Zambe. (Min. 3:5, 6) A a nji yiane nyoñe mintyi’an éza menda me bôt. (Bero. 14:4) To’o bone bé ba yiane ke ôsu a semé nye éyoñ be nto benya bôtô, a yiane yeme na éyoñ be kôlôya nda jé, a nji beta bi na a jôé be.—Mt. 19:5.
AMU JÉ YÉHÔVA A NGA VE MINGUM MI BÔT ABIM ÉJÔÉ ÉZIÑ?
6. Amu jé Yéhôva a nga ve mingum mi bôt abim éjôé éziñ?
6 Yéhôva a nga ve mingum mi bôt abim éjôé éziñ amu a nye’e bia. Bia yiane yen nta’ane mam ôte ane das. Nta’ane mam ôte wo volô na mam me wulu mvo’é nda bôte Yéhôva. (1 Bec. 14:33, 40) Nge Yéhôva a nji ye bo nta’ane mam ôte, wônaa ébuleganjanga é nga ye bo zañe bebo bisaé bé. Môt ase a nga ye bo aval a yi.
7. Beéphésien 5:25, 28 a liti na Yéhôva a yi na befam be belane binga bap aya?
7 Nge e ne fo’o mvo’é na befam be bi abim éjôé éziñ nda bôt été, amu jé abui binga da tat a mintaé menda meluk? Jam ete da boban amu abui befam da biasé memvinda me Yéhôva a lat a ényiñe ya nda bôt. Ba viane tôñe metume map éyoñ ba belan éjôé jap. Ba bo fe binga bap ayok asu na be wô’ôtane na be ne befam. Befam béziñ ba tibili binga bap asu na be yené bôt été na be nji bo mintetek. Be wô’ô jô na: “To’o minga wom a nye’e ki ma, nge a koo ma woñ, abim ete da yian.” A be ne belane woñ ôte na be jôé binga bap éjôé ékôndé ékôp. * Fam ja tibili minga wé aval ete ja vaa nye éjijin a ésemé ja yiane nye, a ja tebe Yéhôva ngame yat.—Lañe’e Beéphésien 5:25, 28.
JÉ É NE VOLÔ BEFAM NA BE YEME WULU MENDA ME BÔTE MAP?
8. Jé é ne volô befam na be yeme wulu menda me bôte map?
8 Fam é ne bo mbamba nlô ya nda bôt nge ja vu avale Yéhôva ba Yésus ba belan éjôé jap. Bia zu la’ase ve mefulu me Yéhôva ba Yesus mebaé, a yen aval avé minlô ya menda me bôt mi ne vu mefulu mete.
9. Jé ja liti na Yéhôva a ne éjote nyul?
9 Éjote nyul. Yéhôva a ne fek a dañe jôm ése é vee, ve a vô’ôlô bebo bisaé bé. (Met. 18:23, 24, 32) A ve be fane ya ve ôsimesane wop. (1 Bb. 22:19-22) Yéhôva a ne zôsôô ne tiññ, ve a jibi bebo mam abé. A ve fe bone be bôt ngule ya bo nye ésaé avale da yian. (Bs. 113:6, 7) Bible a jô jô na a ne “mvolô” wongan. (Beh. 13:6; Bs. 27:9) Njôô bôte David émien a nga meme na a nga kui na a bo beta ésaé Yéhôva a nga ve nye, fo’o ve amu Yéhôva a ne éjote nyul.—2 Sa. 22:36.
10. Jé ja liti na Yésus a mbe éjote nyul?
10 Yésus fe a mbe éjote nyul. Akusa bo a mbe beyé’é bé Tate, a nga sôbe be mebo. Mia simesane na Yéhôva a nga bo na be tili nkañete ôte Bible amu jé? A mbe asu na a liti bia mbamba éve’ela, e dañedañ minlô ya menda me bôt. Yésus a nga jô na: “Ma te . . . ve mia éve’ela, mia ye bo fe ane ma te bo mia.” (Jean 13:12-17) Yésus a mbe fo’o a bili beta éjôé, ve a mbe ki a yange’e na bôte be saane nye. Nnye a mbe mbe a saane bôte bevok.—Mt. 20:28.
Nlô ya nda bôt wo liti na wo nye’e bibu’a ya nda bôte jé, a na ô ne éjote nyul, éyoñ wo bo bisaé ya nda, a éyoñ wo jalé miñyiane miap ya nsisim (Fombô’ abeñ 11, 13)
11. Aval avé nlô ya nda bôt ô ne vu fulu éjote nyule Yéhôva ba Yésus?
11 Miñye’elan. Abui mam e ne liti na nlô ya nda bôt ô ne éjote nyul. A yiane taté yeme na minga wé a bone bé be’e fe be be’e metyi ya abé ane nye. A yiane vô’ôlô ôsimesane wop, to’o a nji bo tyiñe jia a be. Marley, sita éziñ ya États-Unis, a jô na: “Da kui biyoñ biziñe na bia nnôm wom bi bo teke kui tyiñ, ve ma yeme na nnôme wom a semé ma amu a kôme taté vô’ôlô ôsimesane wom ôsusua na a nyoñe ntyi’an.” Ane ô vaa nalé, fam é ne éjote nyul ja yiane fe bo bisaé ya nda, to’o bôte ya vôm a too be lôô bisaé bite ane bi bi binga. Fam éziñ é ne yene jam ete ayaé. Amu jé? Rachel, sita éziñ, a jô na: “Vôm ma so, nge be yene fam é sôbe’e bisôa nge ke é fimine si, bôte bé sili na ‘Ye nyina a ne fo’o fame nga?’ Bé simesane na minga wé nnye a jôé nye.” Nge nne bôte ba simesane nalé vôm ô too, te vuane na Yésus a nga sôbe beyé’é bé mebo, a to ke na a mbe ésaé belo. Fam ja yeme belan éjôé jé ja jeñe ki na é wume nseñ, ve ja jeñe na bibu’a ya nda bôte jé bi bu’uban a mevak. Ane ô vaa éjote nyul, fulu fé nlô ya nda bôt wo yiane fe bi?
12. Nye’an ô nga tindi Yéhôva ba Yésus na be bo jé?
12 Nye’an. Yéhôva a bo mam mese a nye’an. (1 Jean 4:7, 8) A nga dutu bia ékôane jé a ve fe bia Kalate wé amu a nye’e bia, a amu a yi na bi bo bemvôé bé. A su’u ki ve na a liti bia nye’an, a kate fe bia na a nye’e bia. Wônaa mfa’a ya minsône ki, Yéhôva a ve bia biôm bise ya “va’a bie abui abui.” (1 Tim. 6:17) A foñôsô bia éyoñ bia kop, ve nalé a nji tinane na a nye’e ki fe bia. Nye’an ñwô ô nga tindi nye na a ve ntañ asu bone be bôt. Yésus fe a nye’e bia, jôm ete nje a nga ve ényiñe jé asu dangan. (Jean 3:16; 15:13) Teke jôm éziñ é ne kamane Yéhôva ba Yésus na be nye’e ba bese ba kabetane be.—Jean 13:1; Bero. 8:35, 38, 39.
13. Amu jé nlô ya nda bôt wo yiane liti nda bôte jé nye’an? (Fombô’ô fe nka’ale ô ne nlô ajô na Mame fam é ndeme luk é ne bo asu na minga wé a semé nye.)
13 Miñye’elan. Nlô ya nda bôt wo yiane bo mam mese a nye’an. Amu jé jam ete e ne nya mfi? Nlômane Jean a jô na: “Nyô a ne te nye’e monyañe wé [nge ke ébu’a ya nda bôte jé], nyô a yeneya, nnye a se ngule ya nye’e Zambe, nyô a nji tame yen.” (1 Jean 4:11, 20) Fam ja nyane nda bôte jé a nyô ja kômbô vu Yéhôva ba Yésus, ja toñe je mfa’a ya minsôn a mfa’a ya nsisim, a ja bo na é wô’ôtan nye’an. (1 Tim. 5:8) A yañele bone bé, a foñôsô fe be éyoñ nalé a sili. A jeñe na a nyoñ mintyi’an mii so mvo’é nda bôte jé, a ve Yéhôva duma. Bi tame ñhe zu yen aval a ne bo mam mete mese, a aval a ne vu Yéhôva ba Yésus.
JÉ NLÔ YA NDA BÔTE WO YIANE BO?
14. Aval avé fam é ne volô bibu’a ya nda bôte jé na bi bi ngul élat a Yéhôva?
14 Volô’ô bibu’a ya nda bôte jôé na bi bi ngul élat a Yéhôva. Fo’o ve ane Ésaa wé, Yésus a mbe a yi na beyé’é bé be bi ngul élat a Yéhôva. (Mt. 5:3, 6; Marc 6:34) Aval ete da da, miñyiane ya nsisim mmie nlô ya nda bôt wo telé ôsu. (Dt. 6:6-9) A yiane bo nta’ane mam asu na nda bôte jé é lañ a yé’é Kalate Zambe, é tabe bisulan, é kañete mbamba foé, a na é ba’ale’e ngul élat a Yéhôva.
15. Aval avé fam é ne bo na bibu’a ya nda bôte jé bi wô’ôtan nye’an?
15 Bo’o na bibu’a ya nda bôte jôé bi wô’ôtan nye’an. Yéhôva a mbe a kôme’e kate Mone wé na a nye’e nye. (Mt. 3:17) Yésus fe a mbe a nye’e beyé’é bé, teke ke wô’ô ôsone ya kate be de. (Jean 15:9, 12, 13; 21:16) Jam ete e nga bo na beyé’é bé fe be bo be kate’e nye na ba nye’e nye. Mam nlô ya nda bôte wo bo mme ma liti na a nye’e minga wé a bone bé. A yiane yé’é Bible a be, a yiane fe bo a kate’e be na a nye’e be, a se’e be éyoñ nalé a yian, to’o bôt été.—Min. 31:28, 29.
Fam ja toñe nda bôte jé ja ve Yéhôva nlem avak (Fombô’ abeñ 16)
16. Jé nlô ya nda bôt ô ne beta bo, a ôlam ôvé a yiane sa’ale?
16 Toñe’e nda bôte jôé mfa’a ya minsôn. To’o éyoñ be nga bo nye melo, Yéhôva a nga ke ôsu a ve bone b’Israël jôme ya di a jôme ya nyu. (Dt. 2:7; 29:5) Dene fe, Yéhôva a toñe bebo bisaé bé. (Mt. 6:31-33; 7:11) Yésus fe a nga ve bôte be mbe be tôñe’e nye bidi. (Mt. 14:17-20) A mbe fe a saé’ minkôkon. (Mt. 4:24) Nlô ya nda bôt wo kômbô ve Yéhôva nlem avak wo yiane toñe nda bôte jé. Ve a yiane sa’ale ôlam éziñ. A nji yiane telé asu ésaé dé ôsu aval e ne na teke fe éyoñe ya bo mame ya nsisim, nge ke lôt éyoñ a nda bôte jé.
17. Aval avé Yéhôva ba Yésus ba yañele bia?
17 Yañele’e bibu’a ya nda bôte jôé. Yéhôva a lebe bia amu a nye’e bia, a amu a kômbô volô bia. (Beh. 12:7-9) Yésus fe a nga yañele beyé’é bé a nye’an. (Jean 15:14, 15) A mbe a va’a be ngule melep, ve évôvoé été. (Mt. 20:24-28) A yeme na bi be’e metyi ya abé, a na bi ne bo bikop.—Mt. 26:41
18. Jé nlô ya nda bôt ô nji yiane vuan?
18 Nlô ya nda bôt wo vu Yéhôva ba Yésus wo yeme na bibu’a ya nda bôte jé bi ne kop. Nge jam ete da kui, a ye ke jô minga wé nge ke bone bé bifia bi ne njet. (Beco. 3:19) Ve avale kalate Begalate 6:1 a jô, a yiane lebe be évôvoé été amu a yeme na émiene fe a wô’ô kop. Ane Yésus, a yeme na a yiane liti mbamba éve’ela asu na a yeme yañele nda bôte jé.—1 P. 2:21.
19-20. Aval avé nlô ya nda bôt ô ne vu Yéhôva ba Yésus éyoñ wo nyoñe mintyi’an?
19 Te simesane ve womien éyoñ wo nyoñe mintyi’an. Yéhôva a simesane bôte bevok éyoñ a nyoñe mintyi’an. A nga té ényiñ asu na bia fe bi wô’ôtane mvaé ya nyiñ. Môt éziñ a nji nye yemete na a ve ényiñe Mone wé asu dangan. A nga bo de amu a wô’ô bia mintaé. Yésus fe a mbe a telé’é miñyiane mi bôte bevok ôsu éyoñ a mbe a nyoñe’e mintyi’an. (Bero. 15:3) E nga kui môs éziñe na, a ye’ele nkunda bôt, a to ke na a mbe a te’eya.—Marc 6:31-34.
20 Nlô ya nda bôt wo yeme na e nji bo tyi’ibi ya nyoñe mintyi’an mia nambe ényiñe ya nda bôt. Ajô te, a nji yiane bo fianga éyoñ a nyoñ avale mintyi’an ete. A nji yiane ve’ele nyoñe mintyi’an tu-nlô, nge ke nyoñe mintyi’an miziñ amu a dañe wô’ô ôlun, nge ke amu a dañe wô’ô mvaé. Ve a taté sili Yéhôva fek ôsusua na a nyoñe ntyi’an. * (Min. 2:6, 7) Nalé é volô nye na a dañe jeñe mvaé nda bôte jé, sake mvaé jé émien.—Beph. 2:4.
21. Jé bii yen ayé’é da zu?
21 Yéhôva a nga ve befam beta mbe’e nda bôt, a véé fe mise na a yen nge ba bo ésaé éte avale da yian. Nge beyôm ba bibane na be tôñ éve’ela Yéhôva ba Yésus, be ne yeme wulu menda me bôte map. Ve asu na nda bôt é kôme bu’uban mevak, minga fe a yiane bo abime dé. Aval avé minga a yiane yen éjôé nnôme wé, ve mam mevé me ne ndeñele nye? Bii yalane minsili mite ayé’é da zu.
JIA 16 Kañané Yah amu Mon a jôé
^ É.N. 5 Fam ja bo nlô ya nda bôt éyoñ ja luk. Ayé’é di bia zu kobô ajô éjôé Yéhôva a nga ve mingum mi bôt, amu jé a nga ve be éjôé éte, a avale befam be ne vu Yéhôva ba Yésus éyoñ ba belan éjôé jap. Ayé’é da zu, bii yen aval avé nnôm ba ngal be ne vu éve’ela Yésus a ji bebo bisaé be Yéhôva ya melu mvus. Wônaa ayé’é lale ki, bii yen aval avé befam ba yiane belan éjôé jap akônda.
^ É.N. 7 Abui befilm, bekalate, a bivôé ba liti bingengeñ, ba tindi bôt na be buni na é ne mvo’é na fam é tibili ngal nge ke wo’o nye bibôm.
^ É.N. 20 Asu na ô yem aval ô ne nyoñe mbamba mintyi’an, kele’e lañe nlô ajô ô ne na, “Prenons des décisions qui honorent Dieu,” Nkume mmombô a bete ya Ngone nyini é to melu 15, mbu 2011, af. 13-17.
