TANE MEKUN 5
“Keriso La He Ne La Nöjei Trahmany”
“Keriso la he ne la nöjei trahmany.”—1 KOR. 11:3.
NYIMA 12 Iehova, Akötresieti Ka Draië
MEKUN KA TRU *
1. Tune kaa la aqane ujë ne la itre xaa trahmany?
AME koi epun, nemene la aliene la hna hape, “troa mus”? Nemene la aqane troa ujë hnei itre ka mus? Ame la itre xaa trahmany, angatr a hetrune la itre nekönatr me hnime la itre föe i angatr, thenge la aqane ini angatr ekö. Öni Yanita, ketre trejine föe qa Europe: “Alanyimu ngöne la nöjeng ka mekun laka, sisitria kö la trahmanyi hune la föe. Nge ame la itre föe, tre, itre hlu.” Ketre, öni Luke qa Etazini: “Itre kem a inine la itre nekö i angatr laka, tha tro kö a wangatrune la mekuna ne la itre föe, nge tha nyipiewekë kö troa drei angatr.” Ngo tha celë kö lai mekuna i Iehova. (Wange ju fe la Mareko 7:13.) Haawe, tune kaa la aqane tro la itre he ne fami a xome hnyawa la hnëqa i angatr?
2. Nemene la nyine troa pane atre hnene la itre he ne fami, nge pine nemen?
2 Maine kola ajane hnene la he ne la fami troa xome hnyawa la hnëqa i angeic, loi e troa pane atre la aja i Iehova göi angeic. Loi e tro angeic a trotrohnine la kepin matre Iehova a hamë musi koi itre xan, memine la aqane tro angeic a xötrethenge la tulu i Iehova me Iesu. Pine nemen? Pine laka, hnei Iehova hna aijijëne la itre he ne fami troa mus nge aja i Nyidrë tro angatr a musi hnyawa.—Luka 12:48b.
ALIENE LA AQANE TROA MUS
3. Nemene la hna ini së göne la itre ka hetre mus ngöne la tusi 1 Korinito 11:3?
3 E jë la 1 Korinito 11:3. Ame ngöne la xötre celë, kola qaja la aqane eköthe Iehova la nöje i Nyidrë e celë fen me e koho hnengödrai. Ame la itre ka trene mus, tre, hetre hnëqa i angatre fe. Sisitria catre kö la musi Iehova, matre Nyidrëti la ka troa amekötine la nöjei nekö i Nyidrë, e celë fen me e koho hnengödrai. (Rom. 14:10; Efe. 3:14, 15) Hnei Nyidrëti hna acili Iesu troa he ne la ekalesia, ngo tro fe Iesu a qaja koi Akötresie la aqane musinë së hnei nyidrë. (1 Kor. 15:27) Hnei Iehova mina fe hna acile la trahmany matre troa he ne la fami. Celë hi matre, tro fe angeic a qaja koi Iehova me Iesu la aqane thupëne angeice la fami angeic.—1 Pet. 3:7.
4. Pine nemene matre meköti tro Iehova me Iesu a mus?
4 Iehova la ketre he ne fami, matre Nyidrëti hmekuje hi la ka ijij troa acile la itre wathebo kowe la itre nekö i Nyidrë, e koho hnengödrai me e celë fen, me upi angatr troa trongën. (Is. 33:22) Ketre tune fe, Iesu la he ne la ekalesia, matre meköti tro nyidrëti a acili wathebo me upe la itre trejin troa trongëne itre ej.—Gal. 6:2; Kol. 1:18-20.
5. Nemene la hnëqa ne la he ne la fami, nge nemene la itre ifego ne la musi angeic?
5 Tui Iehova me Iesu, hnëqa ne la trejine trahmanyi troa axecië mekun thatraqane la föe me itre nekönatr. (Rom. 7:2; Efe. 6:4) Ngo ka hetre ifegone hi la musi angeic. Eje hi, loi e tro angeic a axecië mekun thenge la itre trepene meköti qa hnine la Tusi Hmitrötr. (Ite Edomë 3:5, 6) Angeic a acili wathebo thatraqane hmekuje hi la itre atrene la fami angeic, ngo tha koi itre xane kö. (Rom. 14:4) Ketre, ame la kola tru la itre nekönatr nge nyudreni a tro qa kuhu hnalapa, tha nyudreni hmaca kö fene la musi ne la keme i nyudren. Ame pe, loi e tro palahi nyudreni a metrötrëne la kem.—Mat. 19:5.
KEPIN MATRE IEHOVA A AIJIJË ITRE XAN TROA MUS
6. Pine nemene matre hnei Iehova hna aijijë itre xan troa mus?
6 Hnei Iehova hna aijijë itre xan troa mus ke, tru la ihnimi Nyidrëti kowe la fami Nyidrë. Celë hi ketre ahnahna qaathei Nyidrë. Jëne la itre mus, ijije hi tro sa caas me tingeting ngöne la huliwa. (1 Kor. 14:33, 40) Ketre, maine tha canga mama kö la isa hnëqa së, tro ha gomegome me pë madrine la fami Iehova. Thatre kö së la ka troa axecië mekun nge thatre fe kö së la ka troa xatua itre xan troa trongën.
7. Thenge la Efeso 5:25, 28, aja i Iehova kö tro la itre trahmanyi a musinëne la itre föe i angatr?
7 Maine ketre ahnahna qaathei Akötresieti la troa mus, hnauëne laka, alanyimu la itre föe ka akötre pine la aqane musi ne la itre föi angatr? Pine laka, tha trongëne kö la itre trahmany la itre hna amekötin hnei Iehova. Angatre pe a kuca tune la hnei angatr hna majemin. Ame itre xan, angatr a pi tru nge pëkö ihnimi angatr, matre angatr a qanangazone la itre föe i angatr. Ame itre xaa ijin, itre trahmanyi a thaipiëne la föe i angatr matre troa amamane koi itre xan laka, angeice la “ka mus.” Atre hi angatr laka, thatreine kö troa musinëne la föe troa hnimi angatr, ngo ijije hi tro angatr a axouene me musinëne la föe. * Ngo tha celë kö lai aja i Iehova. Ketre, tha angatre kö lai a metrötrëne la itre föe i angatr.—E jë la Efeso 5:25, 28.
AQANE TROA XOME HNYAWA LA HNËQA NE LA HE NE FAMI
8. Nemene la ka troa xatuane la itre trahmanyi troa xome hnyawa la hnëqa ne la he ne fami?
8 Loi e tro la itre trahmanyi a xomi ini qa ngöne la tulu i Iehova me Iesu, matre xatua angatr troa xome hnyawa la hnëqa ne la he ne fami. Haawe, tro sa ce wang la lue thiina ka mama thei Iehova me Iesu. Tro fe sa ce wang la aqane tro la he ne fami a amamane la lue thiina cili kowe la föe i angeic me itre nekö i nyidro.
9. Nemene la aqane amamane Iehova la hni ne ipië i Nyidrë?
9 Hni ne ipië. Ngacama ka sisitria catre la inamacane i Iehova, ngo Nyidrëti a dreng la itre mekuna ne la itre hlue i Nyidrë. (Gen. 18:23, 24, 32) Iehova a nue angatr troa hane qeje mekun. (1 Ite jo. 22:19-22) Ngacama Akötresieti ka pexeje Iehova, ngo tha Nyidrëti kö a upi së troa pexej. Nyidrëti pe a xatuane la itre hlue i Nyidrë troa mele madrin. (Sal. 113:6, 7) Öni Tusi Hmitrötr ka hape, Iehova la ‘ixatua.’ (Sal. 27:9; Heb. 13:6) Ketre, hnei Dravita joxu hna qaja ka hape, hnene laka, ka hni ne ipië Iehova, matre hnei angeic hna atreine xome hnyawa la itre hnëqa i angeic.—2 Sam. 22:36.
10. Nemene la aqane amamane Iesu la hni ne ipië i nyidrë?
10 Pane mekune jë së la tulu i Iesu. Ngacama nyidrëti la Maseta me Joxu, ngo hnei nyidrëti hna wasine la itre waca ne la itretre drei nyidrë. Pine nemene matre hnei Iehova hna cinyihane lai e hnine la Tusi Hmitrötr? Pine laka, Nyidrëti a ajane troa amamai tulu kowe la itre he ne fami. Öni Iesu: “Eni hi lai a amamai tulu koi nyipunie, matre ame la hnenge hna kuca koi nyipunie, hane jë fe kuca tun.” (Ioane 13:12-17) Ngacama ka draië catre kö la hnëqa i Iesu, ngo tha aja i nyidrëti kö tro la itre xan a nyihlue i nyidrë. Nyidrëti pe la ka huliwa koi itre xan.—Mat. 20:28.
Itre he ne fami a hetre hni ne ipië me ihnim ngöne la angatr a ixatua ngöne la hnalapa me acatrene la lapaunene la fami (Wange ju la paragarafe 11, 13)
11. Tune kaa la aqane tro la he ne fami a nyitipune la hni ka ipië i Iehova me Iesu?
11 Itre ini koi së. Nyimutre la itre aqane tro la he ne fami a amamane la hni ne ipië i angeic. Tha tro kö angeic a mekun laka, tro la föe i angeic me itre nekönatr a pexej. Nge loi e tro angeic a drenge hnyawa la angatr a hane qeje mekun. Öni Marley qa Etazini: “Ame itre xaa ijin, tha ceitu kö la mekunang me föeng. Ngo xecie koi ni laka, nyidrëti a hnimi ni me metrötrë ni ke, qëmekene troa axecië mekun, nyidrëti a pane hnyingëne la mekunang.” Ketre, ame la trahmanyi ka hetre hni ne ipië ke, angeic a hane ixatua ngöne la hnalapa. Tha ka hmaloi kö ke, ame koi itre xan, itre huliwa i föe lai. Öni Rachel: “Ame ngöne la nöjeng, maine tro la trahmanyi a xatuane la föe i angeic troa wasi peleitr me nyidrawane la hnalapa, tro hë itre xan a mekun laka, tha trahmanyi kö angeic nge hna musinë angeic hnei föe.” Maine ceitu hi ngöne la nöje i epun, tha tro kö a thëthëhmine la tulu i Iesu. Hnei nyidrëti hna wasine la itre waca ne la itretre dreng, ngacama hnëqa ne la ketre hlue. Ame kowe la he ne la fami, sisitria catre kö la föe i angeic me itre nekönatr hune la troa pi mama koi itre xan. Nemene la ketre thiina nyine tro la he ne fami a hetreny?
12. Nemene la ka amamane laka, tru la ihnimi Iehova me Iesu koi së?
12 Ihnim. Ame la itre ewekë hna kuca hnei Iehova, tre, hna nyitrepen hnei ihnim. (1 Ioane 4:7, 8) Jëne la Tusi Hmitrötr me organizasio i Iehova, Nyidrëti a xatua së troa acatrene la lapaune së. Ketre, Nyidrëti a amamane la ihnimi Nyidrëti koi së. Nyidrëti fe a “hamën atrune la nöjei ewekë nyine amadrinë së.” (1 Tim. 6:17) Nyipici laka, ame la easa tria, Iehova a haji së, ngo Nyidrëti palahi a hnimi së. Hnene la ihnim matre hnei Iehova hna hamëne la thupene mel. Ketre tui Iesu, tru la ihnimi nyidrëti koi së, matre hnei nyidrëti hna meci pi së. (Ioane 3:16; 15:13) Haawe, pëkö ka atreine troa thepe së qa ngöne la ihnimi Iehova me Iesu.—Ioane 13:1; Rom. 8:35, 38, 39.
13. Pine nemene matre nyipiewekë tro la he ne fami a hnime la föe i angeic me itre nekönatr? (Wange ju fe la hna eköhagen hna hape, “ Aqane Tro La Itre Ka Xötrei Faipoipo a Metrötrëne La Itre Föe i Angatr.”)
13 Itre ini koi së. Loi e tro fe a nyitrepen hnei ihnim la itre hna kuca hnene la he ne fami. Pine nemen? Öni Ioane aposetolo: “Ame la ka tha hnime la trejin me angeic [maine fami], lo hnei angeic hna öhn, thatreine kö troa hnimi Akötresie, lo hna tha öhn.” (1 Ioane 4:11, 20) Ame la trahmanyi ka hnime la fami angeic ke, angeic a nyitipu Iehova me Iesu, me thupë angatr ngöne la nöjei götrane la mel. (1 Tim. 5:8) Angeic a inin me hajine la itre nekö i angeic. Angeice fe a axecië mekune hnyawa thatraqane la fami angeic, nge thenge palahi la aja i Iehova. Haawe, tro sa ce wang la aqane tro la itre he ne fami a nyitipu Iehova me Iesu.
NYINE TROA KUCA HNENE LA ITRE HE NE FAMI
14. Nemene la nyine troa kuca hnene la he ne fami matre troa acatrene la lapaune i angatr?
14 Troa acatrene la lapaunene la fami. Tui Iehova, hnei Iesu palahi hna xatuane la itre ka xötrethenge nyidrë troa acatrene la lapaune i angatr. (Mat. 5:3, 6; Mar. 6:34) Ketre tune la he ne fami, loi e tro angeic a xatuane la itre atrene la fami angeic troa acatrene la lapaune i angatr koi Iehova. (Deu. 6:6-9) Loi e tro angeic a thupëne matre tro angatr a ce e me inine la Tusi Hmitrötr me sine la itre icasikeu me cainöj. E cili, tro hë angatr asë a easenyi catre koi Iehova.
15. Nemene la aqane tro la he ne fami a amamane la ihnimi angeic koi angatr?
15 Troa amamane la ihnimi angeic kowe la fami. Hnei Iehova hna amamane koi nöjei atr la ihnimi Nyidrëti koi Iesu. (Mat. 3:17) Hnei Iesu fe hna amamane la ihnimi nyidrëti kowe la itretre dreng, jëne la itre hnei nyidrëti hna qaja me kuca. Nge hnei angatre fe hna hnimi nyidrë. (Ioane 15:9, 12, 13; 21:16) Ketre tune fe, loi e tro la trahmany a amamane la ihnimi angeic kowe la föe me itre nekönatr, tune la troa ce ini tusi me angatr. Loi e tro fe angeic a qaja me amamane la ihnimi angeic koi angatr qëmeke itre xan.—Ite Edomë 31:28, 29.
Ame la kem a hamëne la ka nyipiewekë kowe la fami, nyidrëti hi lai a amadrinë Iehova (Wange ju la paragarafe 16)
16. Nemene la nyine troa kuca hnene la itre he ne fami, nge nemene la aqane tro angatr a waiewekë hnyawa?
16 Troa thupëne la mele i angatr. Ngacama hnei angetre Isaraela hna tha idrei, ngo hnei Iehova palahi hna hamë angatr la ka nyipiewekë thatraqane la mele i angatr. (Deu. 2:7; 29:5) Ame fe enehila, Nyidrëti a hamëne la ka nyipiewekë kowe la itre hlue i Nyidrë. (Mat. 6:31-33; 7:11) Ketre tune fe, hnei Iesu hna thuane la itre ka drei nyidrë. (Mat. 14:17-20) Hnei nyidrëti fe hna nyinyine la itre sine meci angatr. (Mat. 4:24) Maine itre he ne fami a ajane troa amadrinë Iehova, loi e tro angatr a huliwa thatraqane la fami angatr. Ngo loi e tro angatr a atreine waiewekë hnyawa. Tha tro kö angatr a nue asë la traeme i angatr göne lai. Loi e tro fe angatr ami ijine troa ini tusi memine la fami.
17. Nemene la aqane ini së me haji së hnei Iehova me Iesu?
17 Troa hamë ini. Iehova a ini së me haji së, nge nyine loi koi së. (Heb. 12:7-9) Tui Iehova, Iesu a inine la itre ka lapa fene la musi nyidrë cememine la ihnim. (Ioane 15:14, 15) Ketre, ngacama catre la eamo, ngo hnei Iesu palahi hna hamën cememine la hni ka menyik. (Mat. 20:24-28) Atre hi Iesu laka, tha ka pexeje kö së matre easa tria e itre xaa ijin.—Mat. 26:41.
18. Nemene la nyine troa lapa mekun hnene la he ne fami?
18 Tui Iehova me Iesu, loi e tro la he ne fami a lapa mekun laka, tha ka pexeje kö la föe i angeic me itre nekönatr. Celë hi matre, tha angeice kö a “ngazo thiina” koi nyudren. (Kol. 3:19) Angeice pe a trongëne la hna qaja ngöne Galatia 6:1, me ‘thele troa wenë ameköti nyudren, cememine la hni ka menyik.’ Ketre, atre hi angeic laka, tha ka pexeje kö angeic, matre angeic a hamë ini me amamai tulu, tui Iesu.—1 Pet. 2:21.
19-20. Tune kaa la aqane tro la he ne fami a nyitipu Iehova me Iesu ngöne la angeic a axecië mekun?
19 Troa axecië mekune hnyawa thatraqane la fami. Kola mama ngöne la aqane axecië mekune i Iehova laka, Nyidrëti a wangatrune la itre xan. Tha hnei Nyidrëti kö hna xupe menune la itre atr. Hnei Nyidrëti hna xupi së matre tro sa hane mele madrin tui Nyidrë. Ketre, pëkö ka musinë Iehova troa huujëne la Nekö i Nyidrë. Jëne la mele i Iesu, hnei Iehova hna seng la itre ngazo së. Ketre, hetre eloine koi itre xan la aqane axecië mekune i Iesu. (Rom. 15:3) Ame la ketre ijin, ngacama kucakuca catre Iesu ngo hnei nyidrëti hna inine la ka alanyim.—Mar. 6:31-34.
20 Atre hi la he ne fami laka, loi e tro angeic a inamacan matre troa atreine axecië mekun hnyawa. Tha angeice kö a wangahmalohmaloeëne la hnëqa i angeic, me axecië mekun thenge la sipu inamacane me aliene hni angeic. Angeice pe a thele ixatua thei Iehova. * (Ite Edomë 2:6, 7) Angeic a wangatrune la itre xan, nge pine pë hë la itre sipu aja i angeic.—Fil. 2:4.
21. Nemene la hne së hna troa ce wang ngöne la ketre tane mekun?
21 Hnei Iehova hna ahnithe kowe la itre he ne fami la ketre hnëqa ka tru. Celë hi matre, tro angatr a isa qeje thiinane koi Iehova göne lai hnëqa i angatr. Eje hi, maine tro la trahmanyi a nyitipu Iehova me Iesu, tro hë angeic a xome hnyawa la hnëqa ne he ne fami. Ketre, maine tro la föe a xome hnyawa la hnëqa i angeic, tro ha madrine la fami. Nemene la aqane tro la föe a ujë kowe la föi angeic, nge nemene la itre jol hnei angeic hna cile kow? Tro la ketre tane mekun a sa la lue hnying celë.
NYIMA 16 Atrunyi Iehova Jë Me Siana i Nyidrë
^ Ame la kola faipoipo hnene la trahmany ke, angeice hë la he ne la fami. Ame ngöne la tane mekun celë, tro sa ce wang la aliene la troa mus, memine la kepin matre Iehova a hamë musi koi itre xan. Tro fe sa ce ithanatane la tulu hna hamën hnei Iehova me Iesu kowe la itre he ne la fami. Celë fe hi lai hne së hna troa ce wang ngöne la lue xaa tane mekun. Ame ngöne la hnaaluene tane mekun, tro sa ce wang la itre ini hna troa xom hnene la itre trefën qa ngöne la tulu i Iesu me itre xan e hnine la Tusi Hmitrötr. Nge ame ngöne la hnaakönine tane mekun, tro sa ce wang la aqane troa musi e hnine la ekalesia.
^ Kola mama ngöne la itre film, itre itus, me itre zonal la itre trahmanyi ka qanangazone la itre föe i angatr. Celë hi matre ame koi itre xan, meköt tro la trahmanyi a lepe la föe i angeic.
^ Wange ju la tane mekun, “Prenons des décisions qui honorent Dieu,” ngöne la Ita Ne Thup ne 15 Eiperem 2011, g. 13-17, qene Wiwi.
