1. Ebɛn ndzɛmba na obotum enya nkantando wɔ mbrɛ ɔbarimba bi dze ne tsiryɛ dzi dwuma no do?

SƐ WƆKÃ “tsiryɛ” a, etse ase dɛn? Mbarimba binom wɔ hɔ a wɔma hɔn amambra, hɔn amandze, anaa ebusua a wofi mu no nya mbrɛ wɔnye hɔn yernom nye hɔn mba dzi no do nkantando. Hyɛ asɛm a akyerɛbaa bi a ɔwɔ Europe a wɔfrɛ no Yanita kãe no nsew. Ɔkãa dɛ: “Beebi a metse no, adwen a woedzidzi nkorɔfo hɔn tsir nye dɛ, mbarimba ho hia kyɛn mbaa, na ɔsɛ dɛ wobu mbaa dɛ nkowaa bi.” Onua bi so a ɔwɔ United States a wɔfrɛ no Luke kãa dɛ, “Egyanom binom dze hyɛ hɔn mbabanyin hɔn adwen mu dɛ mbaa nnyi ho kwan dɛ wɔkasa, na no ho nnhia dɛ wɔkyerɛ hɔn adwen wɔ nsɛm ho.” Naaso, nnyɛ dɛm kwan no do na Jehovah pɛ dɛ mbarimba dze hɔn tsiryɛ no dzi dwuma. (Fa toto Mark 7:13 ho.) Ɔnodze, ebɛn kwan do na ɔbarimba bi botum ayɛ ebusua tsir pa?

2. Ebɛnadze na ɔsɛ dɛ ebusua tsir biara hu, na ebɛnadze ntsi a?

² Sɛ ɔbarimba bi botum abɛyɛ ebusua tsir pa a, ɔsɛ dɛ odzi kan tse dza Jehovah hwehwɛ fi no hɔ no ase. Afei so, ɔsɛ dɛ ohu siantsir a Jehovah yɛɛ tsiryɛ ho nhyehyɛɛ no, ne tsitsir no mbrɛ obesi esũasua nhwɛdo pa a Jehovah na Jesus ayɛ no. Ebɛnadze ntsi na no ho hia dɛ ɔbarimba hu dɛm ndzɛmba yi? Osiandɛ, Jehovah ama mbusua tsir tum bi, na ɔhwɛ kwan dɛ wɔdze bedzi dwuma wɔ kwan pa do.​—Luke 12:48b.

3. Ebɛnadze na yesũa fi tsiryɛ ho nhyehyɛɛ a wɔayɛ ho kyerɛwtohɔ wɔ 1 Corinthfo 11:3 no mu?

³ Kenkan 1 Corinthfo 11:3. Dɛm kyerɛwsɛm yi kyerɛkyerɛ mbrɛ Jehovah ahyehyɛ n’ebusua a ɔwɔ sor nye asaase do no mu. Ndzɛmba etsitsir ebien na ɔka bɔ mu yɛ tsiryɛ​—tum nye nkontaabu. Jehovah nye “tsir” no, kyerɛ dɛ, ɔno na tum nyina wɔ no, dɛm ntsi ne mba nyina, dɛ abɔfo anaa nyimpa no, wobobu nkontaa akyerɛ no. (Rom. 14:10; Eph. 3:14, 15) Jehovah  ama Jesus tum wɔ asafo no do, naaso Jesus bobu nkontaa akyerɛ Jehovah wɔ mbrɛ ɔnye hɛn dzi no ho. (1 Cor. 15:27) Jehovah ama okun so tum wɔ ne yer na ne mba do, naaso okun bobu nkontaa akyerɛ Jehovah nye Jesus nyina wɔ mbrɛ ɔnye n’ebusua dzi no ho.​—1 Pet. 3:7.

4. Ebɛn tum na Jehovah nye Jesus wɔ?

⁴ Jehovah na ɔyɛ n’ebusua a ɔwɔ sor nye asaase do no ne Tsir, ntsi ɔwɔ tum dɛ ɔhyehyɛ mbra ma ne mba wɔ mbrɛ ɔsɛ dɛ wɔyɛ hɔn adze ho, na ɔhwɛ hu dɛ wobedzi mbra no do. (Isa. 33:22) Dɛ Christianfo asafo no ne tsir no, Jesus so wɔ ho kwan dɛ ɔhyehyɛ mbra ma asafo no na ɔhwɛ hu dɛ wobedzi mbra a ɔtse dɛm no do.​—Gal. 6:2; Col. 1:18-20.

5. Ebɛn tum na ebusua tsir a ɔyɛ Christiannyi no wɔ, na no tum no kodu hen?

⁵ Dɛ mbrɛ Jehovah na Jesus wɔ tum dɛ wɔhyehyɛ mbra no, dɛmara so na ebusua tsir a ɔyɛ Christiannyi no wɔ tum dɛ osisi gyinae ma n’ebusua. (Rom. 7:2; Eph. 6:4) Naaso, tum a ɔwɔ no wɔ beebi a okodu. Dɛ nhwɛdo no, ɔsɛ dɛ ɔdze mbra a ɔhyehyɛ ma n’ebusua no gyina ngyinadonsɛm a ɔwɔ Nyankopɔn n’Asɛm mu no do. (Mbɛ. 3:5, 6) Afei so, ebusua tsir nnyi ho kwan dɛ ɔbɛhyehyɛ mbra ama hɔn a wɔnnka n’ebusua no ho no. (Rom. 14:4) Bio so, ɔwɔ mu dɛ, sɛ ne mba nyinyin na wofi fie a, wɔbɔkɔ do ada obu edzi akyerɛ no dze, naaso ɔsɛ dɛ ɔkaa dɛ wɔnnda ho ara nnhyɛ ne tsiryɛ ase.​—Matt. 19:5.

6. Ebɛnadze ntsi na Jehovah yɛɛ tsiryɛ ho nhyehyɛɛ no?

⁶ Osian ɔdɔ a Jehovah wɔ ma n’ebusua no ntsi na ɔyɛɛ tsiryɛ ho nhyehyɛɛ no. Dɛm nhyehyɛɛ yi yɛ akyɛdze a ofi no hɔ. Tsiryɛ ho nhyehyɛɛ no ma asomdwee tsena Jehovah n’ebusua mu, na ɔma biribiara kɔ do pɛpɛɛpɛ. (1 Cor. 14:33, 40) Sɛ Jehovah annyɛ tsiryɛ ho nhyehyɛɛ yi a, nkyɛ n’ebusua no bɛyɛ basabasa na worinnya enyigye. Dɛ nhwɛdo no, nkyɛ obiara runnhu obi a ɔsɛ dɛ osisi gyinae nye obi a ɔsɛ dɛ ɔhwɛ ma wɔdze gyinaesi no yɛ edwuma.

7. Dɛ mbrɛ Ephesusfo 5:25, 28 kyerɛ no, aso nna ɔyɛ Jehovah ne pɛ dɛ mbarimba bedzi mbaa do anaa?

⁷ Sɛ tsiryɛ ho nhyehyɛɛ a Nyankopɔn yɛe no yɛ adze papa dze a, ebɛnadze ntsi na ndɛ mbaa piinara tse nka dɛ hɔn kunnom aka hɔn ahyɛ na wodzi hɔn do? Mbrɛ ɔtse nye dɛ, mbarimba piinara mmfa Jehovah ne gyinapɛn ahorow ma ebusua no nnyɛ edwuma, mbom no wɔpaw dɛ wobedzi hɔn amandze nye hɔn amambra ekyir. Bio so, bi a binom yɛ hɔn yernom basabasa dze gyegye hɔn enyi. Dɛ nhwɛdo no, obotum aba dɛ okun bi bedzi ne yer do wɔ kwan a ɔmmfata do dze akyerɛ dɛ ɔsɛ dɛ ɔda obu edzi kyerɛ no, anaa ama nkorɔfo eehu dɛ noara so yɛ “banyin.” Bi a obenya adwen dɛ, orunntum nnhyɛ ne yer ma ɔnndɔ no, naaso obotum ama oeesuro no. Osian suro a ne yer no suro no ntsi, bi a ɔbɛfa dɛm ho kwan no dze ahyɛ no do. * Nsusui nye ndzeyɛɛ a ɔtse dɛm no mmfa enyidzi nye obu a ɔsɛ no mma mbaa, na ɔnye mbrɛ Jehovah pɛ dɛ wɔnye mbaa dzi no nnhyia koraa.​—Kenkan Ephesusfo 5:25, 28.

8. Ebɛn kwan do na ɔbarimba botum ayɛ ebusua tsir pa?

⁸ Sɛ ɔbarimba sũasua kwan a Jehovah nye Jesus dze tum a wɔwɔ no dzi dwuma a, obotum aboa no ma ɔaayɛ ebusua tsir pa. Su ahorow a Jehovah nye Jesus ada no edzi no, hom mma yensusu no mu ebien ho, na yɛnhwɛ  mbrɛ ebusua tsir botum ada dɛm su ebien no edzi ber a ɔnye ne yer na ne mba ridzi no.

9. Ebɛn kwan do na Jehovah da ahobrɛadze edzi?

⁹ Ahobrɛadze. Jehovah nye Nyia onyim nyansa sen obiara; naaso, otsie n’asomfo hɔn adwenkyerɛ. (Gen. 18:23, 24, 32) Ɔmaa kwan ma hɔn a wɔhyɛ no tum ase no kyerɛɛ hɔn adwen. (1 Ahe. 22:19-22) Jehovah dzi mũ, naaso, seseiara dze ɔnnhwɛ kwan dɛ yɛbɛyɛ nyimpa a yedzi mũ. Mbom no, ɔboa nyimpa a wonndzi mũ a wɔsom no no ma osi hɔn yie. (Ndw. 113:6, 7) Nokwasɛm nye dɛ, Bible no mpo kã Jehovah noho asɛm dɛ ɔyɛ “boafo.” (Ndw. 27:9; Heb. 13:6) Ɔhen David bohun dɛ Jehovah n’ahobrɛadze na ɔboaa no ma otumii yɛɛ edwuma kɛse a nna ɔhyɛ ne nsa no.​—2 Sam. 22:36.

10. Ebɛn kwan do na Jesus daa ahobrɛadze edzi?

¹⁰ Hom mma yensusu Jesus no nhwɛdo no ho nhwɛ. Ɔwɔ mu dɛ nna ɔyɛ Ewuradze nye Owura ma n’esuafo no, naaso ɔhohoor hɔn anan ho. Ebɛnadze ntsi na Jehovah maa wɔyɛɛ iyi ho kyerɛwtohɔ wɔ Bible no mu? Ekyingye biara nnyi ho dɛ, Jehovah maa wɔyɛɛ dɛm kyerɛwtohɔ yi ama aayɛ nhwɛdo pa ama mbusua tsir nye obiara. Jesus nankasa kãa dɛ: “Mama hom mfatoho, ama hom so aayɛ dɛ mbrɛ mayɛ hom yi.” (John 13:12-17) Ɔwɔ mu dɛ nna Jesus wɔ tum kɛse dze, naaso ɔannhwɛ kwan dɛ afofor bɔsom no, mbom no ɔsoom afofor.​—Matt. 20:28.

11. Ebɛnadze na ebusua tsir botum esũa efi ahobrɛadze ho nhwɛdo a Jehovah na Jesus ayɛ no mu?

¹¹ Dza yebotum esũa efi mu. Ebusua tsir botum ada ahobrɛadze edzi wɔ akwan ahorow do. Dɛ nhwɛdo no, ɔnnhwɛ kwan dɛ ne yer na ne mba bɛyɛ hɔn adze pɛpɛɛpɛ. Sɛ ne yer na ne mba nnye no nnyɛ adwen mpo a, otsie hɔn adwenkyerɛ. Hɛn akyerɛbaa bi a wɔfrɛ no Marley a ɔwɔ United States kãa dɛ: “Ɔtɔ da a, menye mo kun adwen nnhyia wɔ nsɛm bi ho. Naaso, minyim dɛ n’enyi sɔ me na obu me so, osiandɛ obisa m’adwenkyerɛ na osusu ho yie ansaana oesi gyinae bi.” Iyi da nkyɛn a, fie ndwuma mpo a nkorɔfo bu no dɛ ɔyɛ mbaa edwuma no, okun a ɔbrɛ noho adze no fi ne pɛ mu yɛ ndwuma a ɔtse dɛm. Iyi ne yɛ botum ayɛ dzen. Ebɛnadze ntsi a? Hɛn akyerɛbaa bi a wɔfrɛ no Rachel kãa dɛ: “Beebi a mifi no, sɛ okun boa ne yer ma otwutwuw nkyɛnse mu anaa osiesie fie a, n’ebusuafo nye afofor bɛkã  dɛ ɔyɛ ‘okotobonku.’ Wobenya adwen dɛ onntum nndzi ne yer do.” Sɛ adwen a ɔtse dɛm na nkorɔfo wɔ wɔ beebi a etse no a, kaa dɛ Jesus hohoor n’esuafo no hɔn anan ho; ɔwɔ mu mpo dɛ nna wobu dza ɔyɛe no dɛ ɔyɛ akowaa n’edwuma. Ebusua tsir pa nnyɛ adze a ɔbɛma afofor esusu dɛ ɔwɔ tum anaa no ho hia, mbom no, ɔyɛ adze a ɔbɛma ne yer na ne mba hɔn enyiwa agye. Sɛ ahobrɛadze da nkyɛn a, ebɛn su fofor na no ho hia papaapa dɛ ebusua tsir pa da no edzi?

12. Ebɛnadze na ɔdɔ a Jehovah na Jesus wɔ no ka hɔn ma wɔyɛ?

¹² Ɔdɔ. Ɔdɔ na ɔka Jehovah ma ɔyɛ biribiara. (1 John 4:7, 8) Ɔdɔ ka no ma ɔnam n’Asɛm Bible no nye n’ahyehyɛdze no do dze hɛn sunsum afamu ehiadze ma hɛn. Afei so, ɔdze hɛn nkãtse afamu ehiadze ma hɛn dze nam awerɛhyɛmu a ɔdze ma hɛn dɛ ɔdɔ hɛn no do. Na hɛn honam afamu ehiadze so ɛ? Jehovah na “ɔma hɛn adze nyina pii” ma hɛn enyi gye wɔ asetsena mu. (1 Tim. 6:17) Sɛ yedzi mfomdo a, ɔtsen hɛn na ɔkɔ do ara da ɔdɔ edzi kyerɛ hɛn. Osian ɔdɔ a Jehovah wɔ ma hɛn ntsi na ɔyɛɛ werdam no ho nhyehyɛɛ maa hɛn no. Jesus so dɔ hɛn araa ma ntsi ɔdze no nkwa too hɔ maa hɛn. (John 3:16; 15:13) Ɔdɔ a Jehovah na Jesus wɔ ma hɔn a wodzi hɔn nokwar no, biribiara nnyi hɔ a obotum asɛɛ no.​—John 13:1; Rom. 8:35, 38, 39.

13. Ebɛnadze ntsi na no ho hia dɛ ebusua tsir da ɔdɔ edzi kyerɛ n’ebusua? (Hwɛ adakaba a wɔato dzin “ Ebɛnadze Na Ɔbarimba A Ɔawar Fofor No Botum Ayɛ Ama Ne Yer Eebu No?” no so.)

¹³ Dza yebotum esũa efi mu. Biribiara a ebusua tsir bɛyɛ no, ɔsɛ dɛ ɔdɔ na ɔka no ma ɔyɛ. Ebɛnadze ntsi na iyi ho hia papaapa? Ɔsomafo John dze mbuae no maa dɛ: “Nyia ɔnndɔ no nua [anaa n’ebusua] a ohu no no bɛyɛ dɛn adɔ Nyankopɔn a onnhu no?” (1 John 4:11, 20) Asɛm no ara nye dɛ, ɔbarimba a ɔdɔ n’ebusua na ɔpɛ dɛ osũasua Jehovah nye Jesus no dze n’ebusua no hɔn sunsum afamu, nkãtse afamu, nye honam afamu ehiadze bɛma hɔn. (1 Tim. 5:8) Afei so, ɔdze ntsetsee pa nye ntsẽa a ɔfata bɛma ne mba. Bio so, ɔbɔkɔ do ara esisi gyinae a ɔdze enyimnyamhyɛ bɛbrɛ  Jehovah na n’ebusua no so benya do mfaso. Hom mma yensusu dɛm ahwehwɛdze ahorow yi mu biara ho na yɛnhwɛ mbrɛ ebusua tsir botum esũasua Jehovah nye Jesus.

14. Ebusua tsir besi dɛn dze n’ebusua no hɔn sunsum afamu ehiadze ama hɔn?

¹⁴ Ɔsɛ dɛ ɔdze n’ebusua no hɔn sunsum afamu ehiadze ma hɔn. Nna Jesus pɛ dɛ ɔboa n’ekyirdzifo no ma wonya sunsum afamu edziban a ɔbɛma hɔn gyedzi ayɛ dzen. Ɔyɛɛ dɛm dze sũasuaa n’Egya. (Matt. 5:3, 6; Mark 6:34) Dɛmara na ɔsɛ dɛ ebusua tsir so ma sunsum afamu edziban a ɔdze bɛma n’ebusua no ho hia no kɛse. (Deut. 6:6-9) Akwan ahorow a ebusua tsir fa do dze n’ebusua hɔn sunsum afamu ehiadze ma hɔn nye iyi: ɔhwɛ hu dɛ ɔnye n’ebusua bɔbɔ mu akenkan na woeesũa Nyankopɔn n’Asɛm no, wɔaakɔ asafo nhyiamu ahorow na wɔaakã Ahendzi ho asɛmpa no. Afei so, ɔbɔ mbɔdzen dɛ n’ebusua no bɔkɔ do nye Jehovah enya ebusuabɔ a no mu yɛ dzen.

15. Ebɛn kwan do na ebusua tsir botum dze n’ebusua no hɔn nkãtse afamu ehiadze ama hɔn?

¹⁵ Ɔsɛ dɛ ɔdze n’ebusua no hɔn nkãtse afamu ehiadze ma hɔn. Jehovah kãe ma afofor tsee dɛ ɔdɔ Jesus. (Matt. 3:17) Jesus kãa kyerɛɛ n’ekyirdzifo no mpɛn pii dɛ ɔdɔ hɔn na ɔdze ne ndzeyɛɛ so kyerɛɛ dɛ ɔdɔ hɔn. Iyi maa n’ekyirdzifo no so kãa kyerɛɛ no dɛ wɔdɔ no. (John 15:9, 12, 13; 21:16) Ebusua tsir botum dze ne ndzeyɛɛ akyerɛ dɛ ɔdɔ ne yer na ne mba; bi nye dɛ ɔnye hɔn bɔbɔ mu esũa Bible. Afei so, ɔsɛ dɛ ɔkã kyerɛ hɔn dɛ ɔdɔ hɔn na n’enyi sɔ hɔn, na sɛ no ho ba hia a, ɔkamfo hɔn wɔ afofor enyim.​—Mbɛ. 31:28, 29.

16. Ebɛnadze bio na ebusua tsir botum ayɛ, na ebɛnadze na ɔsɛ dɛ okwetsir?

¹⁶ Ɔsɛ dɛ ɔdze n’ebusua no hɔn honam afamu ehiadze ma hɔn. Jehovah maa Israelfo no hɔn nsa kaa dza nna wohia wɔ hɔn asetsena mu, ber mpo a nna worinya hɔn asoɔdzen ho asotwe no. (Deut. 2:7; 29:5) Ndɛ so, ɔma hɛn dza yehia wɔ hɛn asetsena mu. (Matt. 6:31-33; 7:11) Dɛmara na Jesus so maa hɔn a nna wodzi n’ekyir no edziban. (Matt. 14:17-20) Afei so, hɔn a nna wɔyar no ɔsaa hɔn yarba. (Matt. 4:24) Sɛ ebusua tsir bɔsɔ Jehovah n’enyi a, ɔsɛ dɛ ɔdze n’ebusua no hɔn honam afamu ehiadze ma hɔn. Naaso, biribi wɔ hɔ a ɔsɛ dɛ okwetsir. Ɔnnsɛ dɛ honam afamu edwuma a ɔyɛ dze boa n’ebusua no gye ne ber araa ma ɔdze n’ebusua no hɔn sunsum afamu nye nkãtse afamu ehiadze a ɔsɛ dɛ ɔdze ma hɔn no to nkyɛn.

17. Ebɛn nhwɛdo na Jehovah nye Jesus ayɛ wɔ mbrɛ wɔdze ntsetsee nye ntsẽa ma hɛn no ho?

¹⁷ Ɔsɛ dɛ ɔdze ntsetsee ma. Jehovah pɛ dɛ ɔboa hɛn ntsi ɔtsetse hɛn na ɔtsẽa hɛn so. (Heb. 12:7-9) Jesus yɛ n’adze tse dɛ n’Egya, na ofi ɔdɔ mu dze ntsetsee ma hɔn a wɔhyɛ n’ase no. (John 15:14, 15) Ɔdze afotu a no mu yɛ dzen ma naaso ɔda ayamuyie edzi. (Matt. 20:24-28) Ɔtse ase dɛ yɛyɛ nyimpa a yenndzi mũ na yɛtaa dzi mfom.​—Matt. 26:41.

18. Ebɛnadze na ɔsɛ dɛ ebusua tsir pa ma ɔtsena n’adwen mu?

 ¹⁸ Ɔsɛ dɛ ebusua tsir a osũasua Jehovah nye Jesus no kaa dɛ ne yer na ne mba nndzi mũ. Ɔnnyɛ ne yer na ne mba “yerɛyerɛw” anaa no bo mmfuw hɔn dzendzenndzen. (Col. 3:19) Mbom no, ɔkaa dɛ noara so nndzi mũ ntsi ɔdze ngyinadosɛm a ɔwɔ Galatiafo 6:1 no yɛ edwuma na ɔbɔ mbɔdzen dɛ ɔbɛtsen hɔn “wɔ ɔdwe sunsum mu.” Dɛ mbrɛ Jesus yɛe no, ɔsɛ dɛ ebusua tsir hu dɛ ɔkwan pa a obotum afa do akyerɛkyerɛ n’ebusua no nye dɛ ɔbɛyɛ nhwɛdo pa ama hɔn.​—1 Pet. 2:21.

19-20. Sɛ ɔba no gyinaesi mu a, ebɛnadze na ebusua tsir botum ayɛ dze esũasua Jehovah nye Jesus?

¹⁹ Ɔsɛ dɛ osisi gyinae a n’ebusua no benya do mfaso. Jehovah sisi gyinae a ɔbɛma afofor enya do mfaso. Dɛ nhwɛdo no, nnyɛ mfaso a Jehovah benya wɔ hɛn ho ntsi na ɔmaa hɛn nkwa, mbom no nna ɔpɛ dɛ yɛnye no bɔ mu nya enyigye wɔ asetsena mu. Nna obiara runntum nnhyɛ Jehovah dɛ ɔmfa ne Ba no mbɔ afɔr mma hɛn bɔn. Mbom no, ofii ne pɛ mu dze dɛm afɔrbɔ no mae ama yeenya do mfaso. Jesus so sisii gyinae ma afofor nyaa do mfaso. (Rom. 15:3) Dɛ nhwɛdo no, aber mpo a nna Jesus abrɛ a ɔsɛ dɛ ɔgye n’ahom no, ɔanngye n’ahom na mbom, ɔkyerɛkyerɛɛ nyimpadodow no.​—Mark 6:31-34.

²⁰ Ebusua tsir pa biara nyim dɛ ndzɛmba a ɔyɛ dzen papaapa a ɔbɛyɛ no mu kor nye dɛ, obesisi gyinae a nyansa wɔ mu ama n’ebusua. Dɛm ntsi, ɔfa asodzi a ɔtse dɛm no enyibersɛm. Ɔbɔ mbɔdzen dɛ orinnsisi gyinae biara biara anaa orinngyina mbrɛ osi tse nka wɔ tsebea bi ho no do nnsisi gyinae. Mbom no, ɔma kwan ma Jehovah tsetse no wɔ mbrɛ obesi esisi gyinae pa ho. * (Mbɛ. 2:6, 7) Sɛ ɔyɛ dɛm a, ɔremmfa n’adwen nnsi mfaso a nanko benya wɔ ne gyinaesi mu no do, mbom no, ɔdze besi mfaso a afofor benya efi mu no do.​—Phil. 2:4.

21. Ebɛnadze na yebosusu ho wɔ adzesua a odzi hɔ no mu?

²¹ Jehovah dze dwumadzi bi a ɔyɛ dzen ahyɛ mbusua tsir nsa na ɔhwɛ kwan dɛ wobobu ho nkontaa wɔ mbrɛ wosi dzi ho dwuma no ho. Naaso sɛ okun yer noho sũasua nhwɛdo a Jehovah na Jesus ayɛ no a, ɔbɛyɛ ebusua tsir pa. Sɛ ne yer so dzi n’asodzi ho dwuma yie a, hɔn awar no bɔsɔ twann. Ebɛn kwan do na ɔsɛ dɛ ɔyer bu no kun ne tsiryɛ no, na ebɛn nsɛndzendzen na obotum ehyia wɔ iyi mu? Yebenya dɛm nsɛmbisa yi ho mbuae wɔ adzesua a odzi hɔ no mu.