1. Kisa ki pouvé fè roun wonm désidé kouman i ké itilizé so otorité ?

 LÒ TO ka tandé « otorité », kisa sa lé di pou to ? É dapré to kouman moun-yan divèt itilizé otorité yé gen-an ? Roun ran wonm ka gadé kouman yé lévé ouben yé kiltir pou désidé kouman yé ké fè ké yé madanm épi ké yé timoun. Yanita, roun sò ki ka rété an Éròp, ka di : « Koté mo ka rété-a, roun patché moun sir ki madanm-yan pi bas pasé wonm-yan é ki yé divèt sèrvi yé èsklav. » É Luke, roun frè ki ka rété Ozétazini ka di : « Sèrten papa ka anprann yé garson ki sa madanm-yan ka pansé pa gen pyès valò é a pa pou kouté sa yé ka di. » Mé fason sa moun-yan ka wè otorité-a pa ka alé ké fason Jéova ka wè l’ (gadé Marc 7:13). Atò, kouman roun mouché pouvé anprann divini roun bon chèf pou so fanmi ?

2. Kisa roun chèf fanmi divèt konprann, é poukisa ?

² Pou i sa roun bon chèf pou so fanmi, roun wonm divèt byen savé sa Bondjé lé i fè. I divèt byen konprann osi poukisa Jéova mété sa prensip otorité-a é kouman i pouvé imité èkzanp Jéova ké Jézi. Poukisa sa enpòrtan ? Paské Jéova bay chèf fanmi-ya roun tibi otorité é i lé yé byen sèrvi sa otorité-a (Luc 12:48b).

3. Kisa 1 Corinthiens 11:3 ka anprann nou asou prensip otorité-a ?

³ (Li 1 Corinthiens 11:3.) Annan sa vèrsé-a, nou ka li prensip otorité Jéova mété-a ; i ka montré kouman Jéova òrganizé so fanmi, annan syèl-a ké asou latè-a. Mé zafè otorité-a ka maché ansanm ké rèsponsabilité. A Jéova ki gen pi gran otorité-a, é tout so timoun-yan, ki annan syèl-a ki asou latè-a, gen kont pou randé li  (Rom. 14:10 ; Éph. 3:14, 15). I mété Jézi chèf asou asanblé-a, mé li menm gen kont pou randé l’ asou fason i ka fè ké nou (1 Cor. 15:27). Jéova bay chèf fanmi-ya roun tibi otorité asou yé madanm ké yé timoun, mé mari-ya yé menm gen kont pou randé li ké Jézi asou fason yé ka fè ké yé fanmi (1 Pierre 3:7).

4. Kisa Jéova ké Jézi gen drwa fè ?

⁴ Kou a li ki chèf so fanmi, Jéova gen drwa désidé ki règ tout so pitit-ya divèt swiv, é i gen drwa gadé si yé ka obéyi (Is. 33:22). Menm fason-an, kou i sa chèf asanblé-a, Jézi gen drwa désidé kisa moun-yan annan asanblé-ya divèt fè é kisa yé pa divèt fè, é i gen drwa gadé si yé ka obéyi (Gal. 6:2 ; Col. 1:18-20).

5. Kisa roun chèf fanmi krétyen gen drwa fè, mé kisa i pa pouvé fè ?

⁵ Kou Jéova ké Jézi, roun chèf fanmi krétyen pouvé désidé kisa so madanm ké so timoun divèt fè (Rom. 7:2 ; Éph. 6:4). Mé i pa pouvé fè tousa i lé. Tout désizyon i ké pran divèt alé ké prensip nou ka jwenn annan Paròl Bondjé-a (Prov. 3:5, 6). É i pa gen drwa di sa ki pa annan so fanmi ki règ pou yé swiv (Rom. 14:4). Anplis di sa, lò yé vin gran é yé ja lésé kaz-a, so timoun pa anba so lòpsyon ankò, menm si yé toujou ka rèspèkté l’ (Mat. 19:5).

6. Poukisa Jéova mété prensip otorité-a ?

⁶ Jéova mété prensip otorité-a paské i kontan so fanmi. A roun kado i fè nou. Gras a sa prensip-a, nou pouvé travay ansanm annan lapè é tout bagaj ka fèt byen (1 Cor. 14:33, 40). Si pyès moun pa té savé sa pou i té fè, a té ké rounsèl wélélé annan fanmi Jéova, é pyès moun pa té ké kontan. Parèkzanp, pyès moun pa té ké savé kimoun ki ka pran dèrnyé désizyon-an é kimoun ki ka gadé si moun-yan ka obéyi.

7. Dapré Éphésiens 5:25, 28, ès Jéova té lé mouché-ya chaché koumandé yé madanm kou yé lé ?

⁷ Nou di ki prensip otorité-a, a roun bèl kado Bondjé bay nou. Mé si a sa, poukisa roun patché madanm ka soufri anba otorité yé mari ? A paské roun patché mouché pa ka tchenbé kont di prensip Jéova-ya é yé ka swiv kiltir yé péyi. Détan, yé jis ka malmennen yé madanm pou santi yé kò byen. Parèkzanp, roun mari té ké pouvé chaché koumandé so madanm kou i lé pou bay so kò valò ouben pou montré ròt-ya ki a li ki « chèf ». Pitèt i ka di an so tchò ki, si i pa pouvé fòrsé so madanm kontan l’, pitèt i pouvé fè l’ pè, konsa i ké pouvé koumandé l’ kou i lé b. Mé sa kalité mantalité ké konpòrtman-yan pa ka alé menm menm menm ké sa Jéova lé ; roun mari ki ka pansé konsa é ki ka fè konsa pa ka bay so madanm rèspè i mérité-a (li Éphésiens 5:25, 28).

8. Kouman roun mouché pouvé anprann divini roun bon chèf pou so fanmi ?

⁸ Roun mouché pouvé anprann divini roun bon chèf pou so fanmi si i ka imité  fason Jéova ké Jézi ka itilizé yé otorité. Annou wè dé kalité yé gen, é annou wè kouman roun chèf fanmi pouvé montré i gen sa kalité-ya annan fason i ka fè ké so madanm ké so timoun.

9. Kouman Jéova ka montré so imilité ?

⁹ Imilité-a. I pa gen pyès moun ki gen plis sajès pasé Jéova, pourtan i ka pran tan kouté so sèrvitèr-ya lò yé gen roun bagaj pou di (Gen. 18:23, 24, 32). É i ka lésé sa-ya ki anba so otorité bay li yé lidé asou sèrten bagaj (1 Rois 22:19-22). I parfè, mé i pòkò ka doumandé nou pou nou parfè. I pito ka idé nou pou nou rivé kontinyé adoré li ké tchò kontan (Ps. 113:6, 7). Labib-a ka di ki i ka « sové » nou (Ps. 27:9 ; Héb. 13:6). É rwa David di ki a gras a imilité Jéova ki i té rivé fè tousa i té doumandé li fè (2 Sam. 22:36).

10. Kouman Jézi montré so imilité ?

¹⁰ Sonjé èkzanp Jézi bay nou-a. Menm si i té sa yé Mèt ké yé Sényèr, i lavé pyé so disip-ya. Poukisa Jéova fè moun-yan ékri sa annan so Paròl ? Asiré pa pitèt i té lé bay tout moun, é chèf fanmi-ya osi, roun modèl yé té ké pouvé swiv. Jézi li menm di : « Paské mo montré zòt kouman pou zòt fè, pou zòt osi zòt fè kou mo menm mo fè pou zòt » (Jean 13:12-17). Menm si i té gen bokou otorité, i pa té ka antann moun-yan sèrvi l’. A li ki té ka sèrvi ròt-ya (Mat. 20:28).

11. Kouman roun chèf fanmi pouvé imité èkzanp Jéova ké Jézi ka bay annan zafè imilité-a ?

¹¹ Sa sa ka anprann nou. Roun chèf fanmi pouvé fè plizyèr bagaj pou montré i gen imilité. Parèkzanp, i pa ké doumandé so madanm ni so timoun pou yé parfè. É menm lò yé pa dakò ké li, i ké pran tan kouté sa yé ka pansé. Men sa Marley, roun sò ki ka rété Ozétazini, ka di : « A pa tout tan mo ké mo mari nou dakò. Mé mo savé mo gen valò pou li é i ka rèspèkté mo paské, anvan i pran roun désizyon, i ka doumandé mo sa mo ka pansé é i ka tchenbé kont di sa mo di li. » Anplis di sa, si roun mari gen imilité, i pa ké ronté fè bagaj annan kaz-a menm si, koté i ka rété-a, moun-yan ka di ki a madanm-yan ki pou fè sa. Mé pitèt sa pa ké fasil pou  li. Poukisa ? Roun sò yé ka aplé Rachel ka di : « Annan mo kiltir, si roun mouché ka idé so madanm fè lavésèl ouben nétwayé kaz-a, moun-yan ké di ki a roun gran lèlè. É yé ké di ki i ka lésé so madanm koumandé l’. » Si moun-yan ka pansé konsa koté to ka rété, sonjé ki Jézi lavé pyé so disip menm si a té sèrvitèr-ya ki té gen pou fè sa. Roun bon chèf fanmi pa lé fè moun wè ki i sa roun moun enpòrtan ouben ki i gen pouvwar. Sa i lé a ki so fanmi santi so kò byen. Anplis di imilité, ki ròt kalité roun bon chèf fanmi divèt gen ?

12. Kisa ka montré ki Jéova ké Jézi kontan nou ?

¹² Lanmou-a. Tousa Jéova ka fè, i ka fè l’ paské i kontan nou (1 Jean 4:7, 8). I ka sèrvi so Paròl, Labib-a, ké so òrganizasyon pou montré nou ki i kontan nou é ki i lé nou divini so zanmi. I ka di nou ki i kontan nou, pou idé nou santi nou kò an sékirité. É i ‘ka bay nou san konté tousa nou gen’ pou nou pouvé gen sa nou bézwen pou viv (1 Tim. 6:17). I ka korijé nou lò nou ka fè bagaj ki pa bon, mé i pa ka arété kontan nou. A pas i kontan nou i bay nou ranson-an pou sové nou. É tèlman so Pitit Jézi kontan nou, i bay so lavi pou nou (Jean 3:16 ; 15:13). Anyen pa pouvé anpéché Jéova ké Jézi kontan sa-ya ki fidèl (Jean 13:1 ; Rom. 8:35, 38, 39).

13. Roun chèf fanmi divèt montré i kontan so madanm ké so timoun, poukisa sa enpòrtan ? (gadé osi ankadré-a «  Si to fin maryé, kouman to pouvé ganyen rèspè to madanm ? »).

¹³ Sa sa ka anprann nou. A lanmou ki divèt dèyè tousa roun chèf fanmi ka fè. Poukisa sa enpòrtan ? Men sa apot Jan ka réponn : « Sa-la ki pa kontan so frè [ouben so fanmi], i ka wè, pa pouvé kontan Bondjé, i pa ka wè » (1 Jean 4:11, 20). Roun mouché ki kontan so madanm ké so timoun, é ki lé imité Jéova ké Jézi, ké idé yé pou yé gen roun lanmityé ké Jéova, i ké idé yé santi yé kò an sékirité é i ké bay yé sa yé bézwen pou viv  (1 Tim. 5:8). I ké fòrmé é i ké korijé so timoun. É i ké fè tousa i pouvé pou tout désizyon i ka pran fè Jéova plézi é pou sa désizyon-yan bon osi pou so fanmi. Annou pran tan wè tousa roun chèf fanmi divèt fè é kouman i pouvé imité Jéova ké Jézi.

14. Kouman roun chèf fanmi pouvé idé so fanmi vin pròch ké Jéova ?

¹⁴ Idé so fanmi vin pròch ké Jéova. Kou Jéova, Jézi té ka byen gadé si tout sa ki té anba so otorité té gen tousa yé té bézwen pou yé lafwa rété fò (Mat. 5:3, 6 ; Marc 6:34). Menm fason-an, sa ki divèt pi enpòrtan pou roun chèf fanmi, a idé so fanmi vin pròch ké Jéova (Deut. 6:6-9). A pou sa i divèt fè tousa ki fo pou yé tout annan fanmi-a, li ké étidyé Paròl Bondjé-a, alé annan réinyon-yan, préché bon nouvèl-a é pou yé divini ké rété zanmi Jéova.

15. Kisa roun chèf fanmi pouvé fè pou idé so fanmi santi so kò an sékirité ?

¹⁵ Idé so fanmi santi so kò an sékirité. Jéova pa té pè montré douvan tout moun kouman i té kontan Jézi (Mat. 3:17). Menm fason-an, annan sa i di ké sa i fè, Jézi osi byen montré so disip-ya ki i té kontan yé. É disip-ya montré Jézi ki yé té kontan li osi (Jean 15:9, 12, 13 ; 21:16). Roun chèf fanmi pouvé montré annan sa i ka fè ki i kontan so madanm ké so pitit, parèkzanp lò i ka étidyé Labib-a ké yé. I divèt di yé osi ki i kontan yé é ki yé gen valò pou li, é lò i bon pou fè l’, i divèt félisité yé douvan ròt-ya (Prov. 31:28, 29).

16. Ki ròt bagaj roun chèf fanmi divèt fè, é kisa i divèt panga ?

¹⁶ Bay so fanmi sa i bézwen pou viv. Jéova bay Israyélit-ya sa yé té bézwen pou viv, menm apré i té fin pini yé paské yé té dézobéyi (Deut. 2:7 ; 29:5). É jòdla ankò, i ka bay so sèrvitèr-ya sa yé bézwen pou viv (Mat. 6:31-33 ; 7:11). Menm fason-an, Jézi bay moun-yan ki té ka kouté li, manjé (Mat. 14:17-20). I géri yé osi pou pran swen di yé santé (Mat. 4:24). Pou fè Jéova plézi, roun chèf fanmi divèt bay so madanm ké so timoun sa yé bézwen pou viv. Mé i gen roun bagaj i divèt panga : i pa divèt lésé so travay anpéché li fè sa ki fo pou so fanmi santi so kò an sékirité, é pou idé li vin pròch ké Jéova.

17. Kouman Jéova ké Jézi ka fòrmé nou é ka korijé nou ?

¹⁷ Ansényé ké fòrmé. Si Jéova ka fòrmé nou é ka korijé nou, a pou nou byen (Héb. 12:7-9). Kou so Papa, Jézi ka fòrmé sa-ya ki anba so otorité ké lanmou (Jean 15:14, 15). Détan i ka palé rèd  pou nou, mé i janti ké nou osi (Mat. 20:24-28). I savé ki, kou nou pa parfè, souvan nou ka fè bagaj ki pa bon (Mat. 26:41).

18. Kisa roun bon chèf fanmi divèt sonjé ?

¹⁸ Roun chèf fanmi ki ka imité Jéova ké Jézi, pa ka faché ké so madanm ké so timoun, lò yé ka fè bagaj ki pa bon, pas i ka sonjé yé pa parfè. I pa ‘rèd ké yé’ (Col. 3:19). I ka swiv pito sa ki marké annan Galates 6:1 é i ka fè tousa i pouvé pou ‘ralé yé, mété yé asou bon chimen-an é i ka fè sa ké dousèr’ ; i ka sonjé ki li menm pa parfè. Kou Jézi, i savé ki pi bon fason pou i ansényé, a ké so èkzanp (1 Pierre 2:21).

19-20. Kouman roun chèf fanmi pouvé imité Jéova ké Jézi lò i ka pran roun désizyon ?

¹⁹ Pran désizyon ki bon pou so fanmi. Lò Jéova ka pran roun désizyon, i toujou ka sonjé sa ki bon pou ròt-ya. Parèkzanp, lò i désidé fè moun-yan, a pa pou li i fè sa ; i té lé nou gouté pou wè kouman lavi-a bèl. Pyès moun pa blijé l’ bay so Pitit an sakrifis pou pardonnen nou péché. I fè sa paské i té lé idé nou. Jézi osi té ka pran désizyon ki té bon pou ròt-ya (Rom. 15:3). Parèkzanp, roun jou, pasé i alé pozé so kò, i ansényé roun patché moun (Marc 6:31-34).

²⁰ Roun bon chèf fanmi savé ki i divèt pran désizyon ki saj pou so fanmi. I savé ki a roun gran rèsponsabilité é i pa ka jwé ké sa. I ka éséyé pa pran désizyon konsa, ni dapré sa so lidé ka di li. I pito ka lésé Jéova fòrmé li (Prov. 2:6, 7). A konsa i ka chaché fè sa ki pi bon pou ròt-ya, pa sa ki pi bon pou li c (Phil. 2:4).

21. Kisa nou ké wè annan artik ki ka vin dèyè-a ?

²¹ Jéova bay chèf fanmi-ya roun rèsponsabilité ki pa mòl, é yé gen kont pou randé l’ asou fason yé ka fè sa i ka doumandé yé fè. Mé si roun mari ka fè tousa i pouvé pou swiv èkzanp Jéova ké Jézi, i ké sa roun bon chèf pou so fanmi. É si so madanm li menm ka fè sa Jéova ka doumandé li fè, yé toulédé ké gen tchò kontan. Kouman roun madanm divèt wè otorité so mari gen asou li, é ki problèm i pouvé jwenn ? A sa nou ké wè annan artik ki ka swiv-a.