OBHEASACHO LEKH 5
“Dor-eka Dadleachem Mostok Krist”
“Dor-eka dadleachem Mostok Krist.”—1 KOR. 11:3.
GIT 12 Great God, Jehovah
KITEM XIKTOLIM *
1. Ek dadlo aplea bail-bhurgeam sangata koso vagta, tem kiteacher adarit asonk xokta?
EKA familint ghov “mostok vo vhoddil” asop, hacho orth kitem mhunn tumkam dista? Thodde dadle aple sonskrutai ani riti-rivaza pormonnem vo tankam koxem vaddoilolem, tea ritin te aplea bail-bhurgeam sangata vagtat. Europe-antli Yanita nanvachi bhoinn mhunntta, “Hanv ravta thoim lok bailank, dadleam poros unnea molachim ani chakram koxim lekhtat.” Ani United States-ant ravpi Luke nanvacho bhav oso mhunntta, “Bailam sangtat tem mhotvachem na dekhun dadleamnim tanchem aikounchi goroz na mhunn thodde bapui aplea putank xikoitat.” Punn eka ghovan aplea baile sangata hea toren vagop Jehovak avddona. (Marku 7:13 sor korat.) Tor ek dadlo aplea familicho boro vhoddil koso zaunk xokta?
2. Eka familichea vhoddilan kitem zannam zavop gorjechem, ani kiteak?
2 Familicho ek boro vhoddil zaunk zai zalear, Jehova eka dadlea koddlean kitem opekxa korta tem tannem somzop gorjechem. Tea bhair, Jehovan odhikarachi manddavoll kiteak kelea ani tannem Jehovachi ani Jezuchi dekh koxi gheunk zata tem zannam zavop gorjechem. Karonn Jehovan familichea vhoddilank thoddo odhikar dila, ani to tannim borea toren uzar kelolo taka zai.—Lukas 12:48b.
ODHIKARACHI MANDDAVOLL MHUNNCHE KITEM?
3. 1 Korintkarank 11:3-a pormonnem, Jehovan aplea familik koxem toren songottit kelea?
3 1 Korintkarank 11:3 vachat. Jehovan sorgar ani prithumer aslolea aplea familik koxem songottit kelam, tem amkam hea versant vachunk melltta. To “mostok” zalolean hea familicher taka sogleam-von chodd odhikar asa. Odhikarachi manddavoll korun tannem thoddo odhikar dusreank-ui dila. Punn tankam aslolo odhikar, te jea toren uzar kortat tacho hixob tannim Jehovak diuncho poddttolo. (Rom. 14:10; Ef. 3:14, 15) Jehovan Jezuk sobhecho mostok mhunn nemla. Tor to sobhechi koxi kallji gheta, tacho tannem Jehovak hixob diunk zai. (1 Kor. 15:27) Toxench, Jehovan eka ghovak, familicho mostok vo vhoddil mhunn nemla. Punn to jea toren aplea famili sangata vagta, tacho hixob tannem Jehovak ani Jezuk diunk zai.—1 Ped. 3:7.
4. Jehova ani Jezuk koslo odhikar asa?
4 Jehova, sorgar ani prithumer aslolea familicho Mostok zal’lean, aplea bhurgeam pasot kaide korunk ani te tim pallttat kai na tem khatri korun gheuncho odhikar taka asa. (Iz. 33:22) Kristi sobhecho mostok Jezu Kristak pasun sobhent asloleam pasot kaide korunk ani tim tem kaide pallttat kai na, tem khatri korcho odhikar asa.—Gal. 6:2; Kol. 1:18-20.
5. (a) Eka familichea vhoddilak koslo odhikar asa? (b) Tannem kel’le kaide kiteacher adarit asonk zai, ani tem konnank lagu zainat?
5 Jehova ani Jezu bhaxen eka familichea vhoddilak pasun aplea famili pasot nirnnoi gheuncho odhikar asa. (Rom. 7:2; Ef. 6:4) Punn tannem to apnnank zai toso cholounk zaina. Udharonnak, to korta te kaide Devachea Utrantlea totvam pormonnem asonk zai. (Mho. 3:5, 6) Ani aplea famili bhair, dusream pasot kaide korunk taka odhikar na. (Rom. 14:4) Tea bhair, tachim bhurgim vhodd zaun dusrea ghora ravonk voitat tednam tim taka resped ditolim tem khorem, punn tachea odhikara khala aschinant.—Mt. 19:5.
ODHIKARACHI MANDDAVOLL KITEAK KELEA?
6. Jehovan odhikarachi manddavoll kiteak kelea?
6 Jehova aplea familicho mog korta dekhun tannem odhikarachi manddavoll kelea ji tachea thaun ek dennem zaun asa. Hea manddavollek lagon, Jehovachea familint soglem xantin ani manddavollin cholonk xokta. (1 Kor. 14:33, 40) Konn-konnacho mostok hem khobor naslolem zalear, Jehovachea familint sogli godd-bodd zata asli, ani familichi khuxalkai pidd’ddear zata asli. Udharonnak, konnem nirnnoi gheunk zai ani tea nirnnoi-a pormonnem korunk konnem fuddakar gheunk zai tem kollchem naslem.
7. Efezkarank 5:25, 28-a pormonnem, ghovamnim aplea baile sangata koxem vaglolem Jehovak zai?
7 Jehovan keloli odhikarachi manddavoll itli bori asa zalear, aiz zaitea bailank aplo ghov aplea sangata krur toren vagta ani hukum choloita mhunn kiteak dista? Karonn zaite dadle famili pasot Devan dil’le dorje pallchea bodlek, te ravtat tea zagea voili sonskrutai ani riti-rivazo pallttat. Tea bhair, te aplea baile sangata vaitt toren vagtat tednam tankam borem dista. Udharonnak, aplea bailecher hukum choloita zalear, lok apleak chodd man ditole ani apunn ek “khoro dadlo” mhunn chintole mhunn eka ghovak disonk puro. To aplea bailek aplo mog korunk dobhav ghalunk xokona, punn to tika bhieopak xokta mhunn to chitunk puro. Tea bhirantek lagon to tika aplea tabeant dovrunk proitn korunk puro. * Hea toren chintat ani vagtat te ghov, aplea bailek resped dinant ani Jehovachea totvam add voitat.—Efezkarank 5:25, 28 vachat.
EK DADLO APLEA FAMILICHO BORO VHODDIL KOSO ZAUNK XOKTA?
8. Ek dadlo familicho boro vhoddil koso zaunk xokta?
8 Jehova ani Jezu aplo odhikar koxem choloitat, tachi dekh gheun ek dadlo aplea familicho boro vhoddil zaunk xokta. Tannim dakhoilolea don gunnancher atam ami dhean dium-ia. Ani he gunn eka familichea vhoddilan aplea bail-bhurgeam sangata vagtana koxe dakhounk zata tem polloum-ia.
9. Jehova khalto asa mhunn amkam koxem kolltta?
9 Khaltikai. Jehova sogleam-von chodd zannvaiecho asa zalear pasun, eka vixoi-acher aple sevok kitem mhunnttat taka to kan dita. (Ut. 18:23, 24, 32) Ek kam koxem korunk zata tea vixim aplea odhikara khala asloleank to vicharta. (1 Raz. 22:19-22) Jehova poripurnn asa. Punn ami jem diunk xokonant tachi to amchea koddlean opekxa korina. Tachea bodlek, oporipurnn munxank apli seva korunk to adar korta. (St. 27:9; 113:6, 7; Heb. 13:6) Jehova khalto asa ani tannem apli modot keli dekhunuch apunn vhodd kam korunk xoklo mhunn Raza Davidan manun ghetle.—2 Sam. 22:36, NW.
10. Jezu khalto aslo mhunn koxem kolltta?
10 Ami Jezuchem udharonn polloum-ia. Aplea xisancho to Somi ani Guruji aslo tori astana, tannem tanche paim dhule. Jehovan hea vixim Bible-ant boroun dovrunk ek karonn kitem? Sogleamnim, khas korun familintlea vhoddilamnim Jezun dakhoilolea khaltikaiechi dekh ghetloli taka zai. Jezun sanglem: “Hanvem tumkam dekh dilea: Hanvem tumkam kelam toxench tumi-i korat.” (Juanv 13:12-17) Jezuk zaito odhikar aslo. Tori astana, dusreank apli seva korunk launchea bodlek tannem dusreanchi seva keli.—Mt. 20:28.
Ek familicho vhoddil, ghorantlim kamam korun ani aplea familik Jehova sangata ixttagot ghott korunk modot korun khaltikai ani mog dakhoita (Peregraf 11, 13 polloiat)
11. Jehova ani Jezuchea udharonna thaun khaltikaie vixim eka familichea vhoddilan kitem xikonk zata?
11 Ami xiktat tim lisanvam. Eka familichea vhoddilachi khaltikai zaitea vattamnim dison ieta. Udharonnak, aplim bail-bhurgim kitem korunk xokonant tachi to opekxa korina. Ani tanchem chintop tachea chintpa poros vegllem asa zalear pasun, tim kitem sangtat taka to kan dita. United States-antlem Marley mhunntta: “Mhojea ghovachem ani mhojem chintop thodde pavtti veg-vegllem asta. Punn nirnnoi gheunchea poilim, to mhojem aikon tea vixim bariksannem chinta tednam hanv taka mhotvachem asa oxem mhaka bhogta.” Tea bhair, jem kam bailen korunk zai mhunn lok chintat tem kam ek khalto ghov korunk toiar asta. Punn, hem korunk sompem aschem na. Kiteak? Rachel nanvachi ek bhoinn mhunntta, “Hanv vaddlolem tea zagear, ghov aplea bailek aidona dhuvunk vo ghor nitoll korunk modot korta zalear to ek ‘dadlo’ nhoi, oxem xezarim ani soirim mhunnttat. Oslea ghovak aplea bailecher tabo na mhunn tim chintat.” Tumchea vattarant lok oxem chintat zalear, Jezuchem udharonn ugddas dovrat. Dusreanche paim dhuvop ek chakrachem kam mhunn lok chintale. Tori punn, Jezun aplea xisanche paim dhule. Tor, familicho vhoddil apunn baile poros mhotvacho mhunn lokank dakhounk sodhina. Tachea bodlek, to aplea bail-bhurgeank khuxal korunk sodhta. Punn khaltikai hea gunna sangata eka familichea vhoddilak anik khoincho gunn asonk zai?
12. Jehovak ani Jezuk amcho mog asa dekhun te amchea pasot kitem kortat?
12 Mog. Jehova jem kitem korta tem soglem korunk mog taka urba dita. (1 Juanv 4:7, 8) To amcho mog korta ani ami tachi ixtt zalolim taka zai mhunn tachea Utrantlean ani tachea songottnnentlean to amkam dakhoita. To amcho mog korta mhunn amkam khatri dita dekhun amcheo bhavnatmik gorzo purnn zatat. Ani Jehova ‘amchea gorzank zai titlem-i bhorpur mapan dita.’ (1 Tim. 6:17) Ami chuki kortat tednam pasun to amcho mog korta ani amkam sudharunk modot korta. To amcho mog korta dekhun, Jezu Krista vorvim tannem amchea pasot soddvonnechi manddavoll kelea. Ani Jezu amcho itlo mog korta, ki tannem amchea pasot aplo jiv dilo. (Juanv 3:16; 15:13) Punn ami Jehovak ani Jezuk visvaxi asat zalear, konnuch ani kitench amkam tanchea moga thaun pois korunk xokchem na.—Juanv 13:1; Rom. 8:35, 38, 39.
13. Eka familichea vhoddilan aplea familicho mog korop kiteak gorjecho? (“ Bailecho Resped Zoddunk Halinch Kazar Zalolea Ghovan Kitem Korunk Zata?” hem boks polloiat.)
13 Ami xiktat tim lisanvam. Familichea vhoddilan aplea famili pasot soglem mogan korunk zai. Oxem korop kiteak itlem gorjechem? Apostl Juanvan sanglem: “Apunn dekhtat tea bhavacho vo bhoinnicho [vo familicho] tim mog korinant zalear, apnnem polleunk na tea Devacho koxim mhonn tim mog kortolim?” (1 Juanv 4:11, 20) Ek familicho vhoddil aplea familicho mog korta ani Jehova ani Jezuchi dekh gheta zalear, to aplea familik Jehova lagim ghott ixttagot bandunk ani tancheo bhavnatmik ani her gorzo purnn korunk vavurtolo. (1 Tim. 5:8) To aplea bhurgeank xikoitolo ani xist ditolo. To sodanch Jehovak manta tosle ani aplea familik faideak poddttat tosle nirnnoi ghetolo. Tor, familichea vhoddilan hem soglem koxem korunk zata ani Jehovachi ani Jezuchi dekh koxi gheunk zata tem polloum-ia.
FAMILICHEA VHODDILAN KITEM KORUNK ZAI
14. Ek familicho vhoddil Jehova sangata aplea familichi ixttagot ghott dovrunk koso modot korta?
14 Jehova sangata aplea familichi ixttagot ghott korunk vavrunk zai. Aplea Bapachi dekh gheun, Jezun Jehova sangata aplea xisanchi ixttagot ghott korunk modot keli. (Mt. 5:3, 6; Marku 6:34) Teach bhaxen, eka familichea vhoddilan Jehova sangata aplea familichi ixttagot ghott korunk sogleam-von chodd mhotv diunk zai. (D.S. 6:6-9) Oxem korunk, to aplea famili sangata Bible vachun tacher obheas korta, mittingek hajir zata, porgottnnent bhag gheta, ani Jehova sangata sodanch ghott ixttagot dovrunk vavurta.
15. Eka familichea vhoddilan aplea familicheo bhavnatmik gorzo purnn korunk ek vatt khoinchi?
15 Aplea familicheo bhavnatmik gorzo purnn korunk zai. Jehovan apunn Jezucho mog korta mhunn dusreanchea mukhar sanglem. (Mt. 3:17) Teach bhaxen, Jezun pasun aplea xisancho mog korta mhunn utramnim ani kornneamnim dakhoilem. Ani tachea xisamnim pasun tacho mog korta mhunn sanglem. (Juanv 15:9, 12, 13; 21:16) Aplea famili sangata Bible obheas ani her kamam korun aplea bail-bhurgeancho mog korta mhunn eka familichea vhoddilan dakhounk zata. Tea bhair, to tancho mog korta ani valor korta mhunn tannem utramnim sangonk zai. Ani sondhi melltta thoim, dusreanchea hujir, tankam xabaski diunk zai.—Mho. 31:28, 29.
Ek familicho vhoddil, aplea familicheo gorzo purnn korta tednam Jehovak tem manvota (Peregraf 16 polloiat)
16. Eka familichea vhoddilan anik kitem korunk zai, ani tannem kitea vixim chotrai dovrunk zai?
16 Aplea familicheo gorzo purnn korunk zai. Aplem Utor pallunk na dekhun Israelitkarank Jehovan xikxa dili tednam pasun tannem tancheo gorzo purnn keleo. (D.S. 2:7; 29:5) To amcheo dor disacheo gorzo pasun purnn korta. (Mt. 6:31-33; 7:11) Teach bhaxen, Jezun aplo pattlav kortoleank jevonn dilem. (Mt. 14:17-20) Ani duentank pasun bore kele. (Mt. 4:24) Ek familicho vhoddil aplea familicheo dor disacheo gorzo purnn korta tednam Jehovak tem manvota. Punn hem korunk tannem itlo vell diunk zaina, ki Jehova sangata aplea familichi ixttagot ghott korunk ani tancheo bhavnatmik gorzo purnn korunk, taka vell mellona.
17. Jehova ani Jezu amkam koxe toren xikoitat ani xist ditat?
17 Aplea familik xikounk zai. Jehova amkam amchea boreak lagon xikoita ani xist dita. (Heb. 12:7-9) Aplea Bapa bhaxen Jezu, aplea odhikara khala asloleank mogan xikoita. (Juanv 15:14, 15) To khor sol’lo pasun doiall ritin dita. (Mt. 20:24-28) Oporipurnn aslolean ami zaite pavtti chuki kortolim mhunn to zannam.—Mt. 26:41.
18. Ek boro familicho vhoddil kitem ugddas dovorta?
18 Jehova ani Jezu bhaxen, ek familicho vhoddil apli bail-bhurgim oporipurnn asat mhunn ugddas dovorta. Tor, to tanchea sangata ‘khoraien vagona.’ (Kol. 3:19) Tachea Bodlek, Galasiekarank 6:1-ant sanglolem totv apnnaun ‘to dulobaien, tankam nitt margar haddunk’ proitn korta. Punn hem kortana apunnui oporipurnn asa mhunn to visrona. Ani Jezu bhaxen, to aplea udharonnantlean xikovop sogleant borim vatt mhunn ugddas dovorta.—1 Ped. 2:21.
19-20. Nirnnoi ghetana, eka familichea vhoddilan Jehovachi ani Jezuchi dekh koxi gheunk zata?
19 Dusream vixim chintun nirnnoi gheunk zai. Jehova sogleank boreak poddtta tosle nirnnoi gheta. Udharonnak, jivit jielolean melltta ti khuxalkai onnbhovunk Jehovan amkam rochleant. Hem tannem aplea faideak lagon korunk na. Tea bhair, amchea patkam pasot aplea Putacho jiv diunk Jehovacher konnench dobhav ghalunk na. Jezun pasun dusreank faideak poddttat tosle nirnnoi ghetle. (Rom. 15:3) Udharonnak, to thoklolo tednam, visov gheunchea bodlek tannem lokanchea eka zomeak xikoilem.—Marku 6:31-34.
20 Famili pasot bore nirnnoi ghevop sompem asona mhunn ek familicho vhoddil ugddas dovorta. Ani hi zobabdari ekdom mhotvachi mhunn to vollkhun gheta. Tor to chintinastana, aplea bhavnancher adarit nirnnoi gheina. Tachea bodlek, bore nirnnoi koxe gheunche tem to Jehova thaun xikta. * (Mho. 2:6, 7) Hea toren to nirnnoi ghetana aplo faido nhoi, punn dusreanchea faidea vixim chint’ta.—Filp. 2:4.
21. Fuddlea lekhant ami kitem xiktolim?
21 Jehovan familichea vhoddilank diloli zobabdari sompi na. Ani tannem hi zobabdari borea toren purnn keloli Jehovak zai. Punn ek ghov Jehovachi ani Jezuchi dekh gheta zalear, to aplea familicho boro vhoddil zatolo. Ani tachi bail apli zobabdari borea toren samballtta zalear, tanchem kazari jivit khuxalkaiechem zatolem. Eke bailek, aplea ghovak aslolea odhikara vixim koxem disonk zai, ani tika koslea oddchonneancho fuddo korcho poddtta? Hea don prosnanche zobab ami fuddlea lekhant polloitolim.
GIT 16 Praise Jah for His Son, the Anointed
^ per. 5 Ek dadlo kazar zata tednam to eka familicho mostok vo vhoddil zata. Hea lekhant, odhikarachi manddavoll mhunnttlear kitem, Jehovan hi manddavoll kiteak kelea, ani dadleamnim Jehova ani Jezu thaun kitem xikonk zata tem ami xiktolim. Dusrea lekhant, eka ghovan ani bailen Jezu thaun ani Bible-antlea her udharonnam thaun kitem xikonk zata tem ami xiktolim. Ani tisrea lekhant, sobhent bhavamnim apleak aslolo odhikar koso uzar korunk zai tem ami xiktolim.
^ per. 7 Eka ghovan aplea baile sangata vaitt toren vagop vo marop pasun chukichem nhoi mhunn thodde pavtti film-amnim, tiatramnim ani pustokamnim dakhoilam. Taka lagon ghovamnim aplea baile sangata vaitt toren vagop sarkem asa mhunn lok chintat.
^ per. 20 Bore nirnnoi koxe gheunk zatat, tea vixim chodd mahiti zai zalear, Abril 15, 2011-achea The Watchtower masikentlo pan 13-17-ant aslolo “Make Decisions That Honor God,” ho lekh polloiat.
