HOSỌ OPLỌN TỌN 5
“Klisti Wẹ Ota Sunnu Dopodopo Tọn”
“Klisti wẹ ota sunnu dopodopo tọn.”—1 KỌL. 11:3.
OHÀN 12 Jehovah, Jiwheyẹwhe Huhlọnnọ
BLADOPỌ *
1. Etẹlẹ wẹ gán yinuwado pọndohlan he sunnu de tindo gando tatọ́-yinyin go ji?
ETẸWẸ nọ wá ayiha towe mẹ, eyin a sè hogbe lọ “tatọ́-yinyin”? Sunnu delẹ nọ na dotẹnmẹ aṣa kavi whẹndo yetọn nado magbe lehe yé na yinuwa hẹ asi yetọn po ovi yetọn lẹ po do tọn. Doayi nuhe mẹmẹyọnnu de he nọ yin Yanita bo nọ nọ̀ Europe dọ go dọmọ, “To fie n’nọ nọ̀, mẹsusu wẹ kudeji dọ yọnnu lẹ yido hú sunnu lẹ bo dona nọ yin pinpọnhlan di vi-to-mẹ-dè.” Podọ, mẹmẹsunnu de he nọ yin Luke bo nọ nọ̀ États-Unis dọmọ, “Baba delẹ nọ plọn ovi yetọn lẹ dọ nujọnu de ma nọ tlọ́n nùmẹ na yọnnu lẹ, enẹwutu sunnu lẹ ma dona nọ na ayidonugo nue yé dọ lẹ.” Amọ́, pọndohlan enẹlẹ ma do aliho he mẹ Jehovah jlo dọ sunnu lẹ ni nọ yí tatọ́-yinyin yetọn zan te hia. (Yijlẹdo Malku 7:13 go.) Eyin mọ wẹ, nawẹ sunnu de gán plọn nado yin tatọ́ whẹndo tọn dagbe de gbọn?
2. Etẹwẹ tatọ́ whẹndo tọn de dona yọnẹn, podọ etẹwutu?
2 Nado yin tatọ́ whẹndo tọn dagbe de, sunnu de dona mọnukunnujẹ nuhe Jehovah biọ to e si lẹ mẹ whẹ́. E sọ dona yọ́n nuhewutu Jehovah ze tito tatọ́-yinyin tọn dai, podọ na taun tọn lehe e gán hodo apajlẹ Jehovah po Jesu po tọn do. Naegbọn e do yin nujọnu dọ sunnu de ni yọ́n onú ehelẹ? Na Jehovah na tatọ́ whẹndo tọn lẹ aṣẹpipa jẹ obá de mẹ, podọ e nọ donukun dọ yé ni yí i zan ganji.—Luku 12:48b.
ETẸWẸ TATỌ́-YINYIN BẸHẸN?
3. Etẹwẹ nue yin didọ to 1 Kọlintinu lẹ 11:3 mẹ plọn mí gando tatọ́-yinyin go?
3 Hia 1 Kọlintinu lẹ 11:3. Wefọ ehe bayi zẹẹmẹ aliho he mẹ Jehovah bayi tito na whẹndo etọn te tọn to olọn mẹ podọ to aigba ji. Tatọ́-yinyin bẹ onú titengbe awe delẹ hẹn, enẹ wẹ aṣẹpipa po gbedido po. Jehovah wẹ “ota” kavi aṣẹpipa daho hugan lọ, podọ ewọ wẹ vi etọn lẹpo, enẹ wẹ angẹli po gbẹtọvi lẹ po dona dogbè na. (Lom. 14:10; Efe. 3:14, 15) Jehovah ko na aṣẹ Jesu do agun lọ ji, amọ́ Jesu nọ dogbè na Jehovah gando aliho he mẹ e yinuwa hẹ mí te go. (1 Kọl. 15:27) Jehovah ko sọ na aṣẹ asu de do asi etọn po ovi etọn lẹ po ji, amọ́, asu de na dogbè na Jehovah po Jesu po gando aliho he mẹ e nọ yinuwa hẹ whẹndo etọn te go.—1 Pita 3:7.
4. Aṣẹpipa tẹwẹ Jehovah po Jesu po tindo?
4 Taidi Ota whẹndo etọn tọn to olọn mẹ podọ to aigba ji, Jehovah do aṣẹ nado dosẹ́n gando aliho he mẹ ovi etọn lẹ dona nọ yinuwa te go, podọ nado hẹn ẹn diun dọ osẹ́n enẹlẹ yin hihodo. (Isa. 33:22) Taidi ota agun Klistiani tọn, Jesu lọsu do aṣẹ nado ze osẹ́n lẹ dai bosọ hẹn ẹn diun dọ yé yin hihodo.—Gal. 6:2; Kol. 1:18-20.
5. Aṣẹpipa tẹwẹ tatọ́ whẹndo tọn Klistiani de tindo, podọ etẹwẹ yin dogbó etọn lẹ?
5 Taidi Jehovah po Jesu po, tatọ́ whẹndo tọn Klistiani de tindo aṣẹ nado bayi nudide lẹ na whẹndo etọn. (Lom. 7:2; Efe. 6:4) Amọ́, aṣẹpipa etọn do dogbó. Di apajlẹ, osẹ́n etọn lẹ dona nọ sinai do nunọwhinnusẹ́n he tin to Ohó Jiwheyẹwhe tọn mẹ lẹ ji. (Howh. 3:5, 6) Podọ, tatọ́ whẹndo tọn de ma do aṣẹ nado ze osẹ́n lẹ dai na mẹhe ma tin to whẹndo etọn mẹ lẹ. (Lom. 14:4) Humọ, to whenue visunnu etọn po viyọnnu etọn lẹ po ko whẹ́n bo ko tlọ́n whégbè, yé nọ zindonukọn nado to sisi na ẹn, amọ́ yé masọ to tatọ́-yinyin etọn glọ ba.—Mat. 19:5.
NAEGBỌN JEHOVAH DO ZE TITO TATỌ́-YINYIN TỌN DAI?
6. Naegbọn Jehovah ze tito tatọ́-yinyin tọn dai?
6 Jehovah ze tito tatọ́-yinyin tọn dai na owanyi he e tindo na whẹndo etọn wutu. Nunina de wẹ ehe yin sọn e dè. Tito tatọ́-yinyin tọn nọ hẹn ẹn yọnbayi na whẹndo Jehovah tọn nado to jijọho mẹ bosọ to titoji. (1 Kọl. 14:33, 40) Eyin mẹhe do azọngban tatọ́-yinyin tọn ma họnwun, nulẹ ma na yì to aliho kannukannu tọn mẹ to whẹndo Jehovah tọn mẹ, podọ ayajẹ ma na tin. Di apajlẹ, mẹde ma na yọ́n mẹhe dona bayi nudide godo tọn lẹ, podọ mẹhe dona hẹn ẹn diun dọ yè zìn gbọn nudide enẹlẹ ji.
7. Sọgbe hẹ Efesunu lẹ 5:25, 28, be ojlo Jehovah tọn wẹ yindọ sunnu lẹ ni paṣẹ glanglan do yọnnu lẹ ji ya?
7 Eyin tito tatọ́-yinyin tọn he Jiwheyẹwhe zedai yọ́n sọmọ, naegbọn asi susu to egbehe nọ mọdọ asu yetọn nọ yinuwa hẹ yé po kanyinylan po bosọ nọ paṣẹ glanglan do yé ji? Na sunnu susu nọ dovọ́na nujinọtedo Jehovah tọn lẹ gando whẹndo go, bo nọ de nado hodo aṣa lẹdo yetọn tọn lẹ wutu wẹ. Yé gán sọ yinuwa hẹ asi yetọn lẹ po kanyinylan po nado hẹn pekọ wá na ojlo ṣejannabi tọn yetọn lẹ. Di apajlẹ, asu de gán nọ paṣẹ glanglan do asi ẹ ji, na e to tintẹnpọn nado yidogọna sisi mẹdetiti tọn etọn wutu kavi nado dohia mẹdevo lẹ dọ emi yin “sunnu glegbenu.” E gán nọ lẹndọ, emi ma gán hẹn asi emitọn gánnugánnu nado yiwanna emi, amọ́, emi gán hẹn ẹn nado nọ dibuna emi. Podọ, e gán yí obu enẹ zan nado duklunọ deji. * Matin ayihaawe, aliho nulẹnpọn tọn po nuyiwa tọn enẹ po nọ hò gbégbò po sisi he yọnnu lẹ jẹna po yí sọn yé si, podọ e sọ jẹagọdo ojlo Jehovah tọn tlọlọ.—Hia Efesunu lẹ 5:25, 28.
NAWẸ SUNNU DE GÁN PLỌN NADO YIN TATỌ́ WHẸNDO TỌN DAGBE DE GBỌN?
8. Nawẹ sunnu de gán plọn nado yin tatọ́ whẹndo tọn dagbe de gbọn?
8 Sunnu de gán plọn nado yin tatọ́ whẹndo tọn dagbe de, eyin e nọ hodo apajlẹ aliho he mẹ Jehovah po Jesu po nọ yí tatọ́-yinyin yetọn zan te tọn. Lẹnnupọndo awe poun to jẹhẹnu he Jehovah po Jesu po nọ dohia lẹ mẹ ji, bo doayi lehe tatọ́ whẹndo tọn de gán do jẹhẹnu enẹlẹ hia do go whenue e to nuyiwa hẹ asi ẹ po vi ẹ lẹ po.
9. Nawẹ Jehovah nọ do whiwhẹ hia gbọn?
9 Whiwhẹ. Jehovah wẹ yọnnuin hugan to gbẹ̀ lọ mẹ; etomọṣo, e nọ dotoaina linlẹn devizọnwatọ etọn lẹ tọn. (Jen. 18:23, 24, 32) E na dotẹnmẹ mẹhe to aṣẹpipa etọn glọ lẹ nado dọ linlẹn yetọn lẹ. (1 Ahọ. 22:19-22) Jehovah yin mẹpipe, amọ́ todin whẹ́, e ma nọ donukun pipé-yinyin sọn mí si. Kakatimọ, e nọ gọalọna gbẹtọvi mapenọ he to sinsẹ̀n ẹn lẹ nado do kọdetọn dagbe. (Salm. 113:6, 7) Na nugbo tọn, Biblu tlẹ dọ dọ Jehovah yin “alọgọtọ” de. (Salm. 27:9; Heb. 13:6) Ahọlu Davidi yigbe dọ, eyin whiwhẹ Jehovah tọn dẹ́n, emi ma gán wà azọ́n daho he yin didena emi lọ dotana.—2 Sam. 22:36.
10. Nawẹ Jesu do whiwhẹ hia gbọn?
10 Lẹnnupọndo apajlẹ Jesu tọn ji. Dile etlẹ yindọ e yin Oklunọ podọ Ogán devi etọn lẹ tọn, e klọ afọ yetọn. Etẹwẹ yin dopo to whẹwhinwhẹ́n he wutu Jehovah do hẹn ẹn diun dọ kandai ehe tin to Biblu mẹ lẹ mẹ? Ayihaawe ma tin dọ nado ze apajlẹ he họnwun dai na tatọ́ whẹndo tọn lẹ gọna mẹdevo lẹ wutu wẹ. Jesu lọsu dọmọ: “Ohia wẹ yẹn zedai na mì, dọ kẹdẹdile yẹn basi na mì do, mọ wẹ mìlọsu dona nọ basi do ga.” (Joh. 13:12-17) Dile etlẹ yindọ Jesu do aṣẹpipa daho, e ma donukun dọ yè ni yilizọn na emi. Kakatimọ, e yilizọn na mẹdevo lẹ.—Mat. 20:28.
Tatọ́ whẹndo tọn de gán do whiwhẹ po owanyi po hia, eyin e nọ wà whégbè-zọ́n lẹ bosọ nọ penukundo nuhudo gbigbọmẹ tọn whẹndo etọn tọn lẹ go (Pọ́n hukan 11, 13tọ)
11. Etẹwẹ tatọ́ whẹndo tọn dagbe de gán plọn sọn Jehovah po Jesu po dè gando whiwhẹ go?
11 Nue mí plọn. Tatọ́ whẹndo tọn de gán do whiwhẹ hia to aliho susu mẹ. Di apajlẹ, e ma nọ donukun pipé-yinyin sọn asi ẹ po ovi etọn lẹ po si. E nọ dotoaina linlẹn hagbẹ whẹndo etọn tọn lẹ tọn, eyin linlẹn yetọn tlẹ gbọnvona etọn. Marley he nọ nọ̀ États-Unis dọmọ: “To whedelẹnu, yẹn po asu ṣie po nọ do pọndohlan he gbọnvo. Amọ́, n’nọ mọdọ n’họakuẹ to nukun etọn mẹ bọ e sọ nọ na mi sisi, na e nọ kàn linlẹn ṣie biọ bosọ nọ yí sọwhiwhe do lẹnnupọndeji whẹpo do bayi nudide.” Humọ, asu whiwhẹnọ de nọ desọn ojlo mẹ nado wà whégbè-zọ́n lẹ, eyin mẹhe to lẹdo etọn mẹ lẹ tlẹ nọ mọdọ azọ́n yọnnu tọn wẹ. Enẹ gán yin avùnnukundiọsọmẹnu de. Etẹwutu? Mẹmẹyọnnu de he nọ yin Rachel dọmọ, “To fie n’tlọ́n, eyin asu de nọ gọalọna asi ẹ nado klọ́ panu kavi jla whégbè do, kọmẹnu po hẹnnumẹ etọn lẹ po nọ lẹndọ e ma yin ‘sunnu glegbenu.’ Yé gán mọdọ e ma pé asi ẹ ji.” Eyin pọndohlan enẹ gbayipe to fie a nọ nọ̀, flindọ Jesu klọ́ afọ na devi etọn lẹ dile etlẹ yindọ azọ́n enẹ nọ yin pinpọnhlan di afanumẹ-zọ́n de. Nue nọ duahunmẹna tatọ́ whẹndo tọn dagbe de ma yin nukun he mẹlẹ nọ yí do pọ́n ẹn, amọ́ nue e na wà na asi ẹ po vi etọn lẹ po nido do ayajẹ. Gbọnvona whiwhẹ, jẹhẹnu devo tẹwẹ sọ yin dandan na tatọ́ whẹndo tọn dagbe de?
12. Etẹwẹ owanyi whàn Jehovah po Jesu po nado wà?
12 Owanyi. Owanyi wẹ nọ whàn Jehovah nado wà nulẹpo. (1 Joh. 4:7, 8) E nọ penukundo nuhudo gbigbọmẹ tọn mítọn lẹ go po owanyi po gbọn Ohó etọn Biblu po titobasinanu etọn po gblamẹ. E nọ penukundo mí go to numọtolanmẹ-liho bo nọ hẹn mí deji dọ emi yiwanna mí. Bọ etẹwẹ dogbọn nuhudo agbasa tọn mítọn lẹ dali? Jehovah nọ na mí “nuhe mí nọ duvivi etọn lẹpo susugege.” (1 Tim. 6:17) Eyin mí ṣinuwa, e nọ domẹplọnlọ mí go, amọ́ owanyi he e do na mí ma nọ doalọte. Owanyi wẹ whàn Jehovah nado wleawuna ofligọ lọ na mí. Podọ, Jesu yiwanna mí sọmọ bo ze ogbẹ̀ etọn jo do ota mítọn mẹ. (Joh. 3:16; 15:13) Nudepope ma gán sánkanna owanyi he Jehovah po Jesu po do na mẹhe yin nugbonọ na yé lẹ.—Joh. 13:1; Lom. 8:35, 38, 39.
13. Naegbọn e do yin nujọnu dọ tatọ́ whẹndo tọn de ni nọ do owanyi hia whẹndo etọn? (Sọ pọ́n apotin lọ “ Etẹwẹ Sunnu He Ṣẹṣẹ Wlealọ de Dona Wà Nado Jẹna Sisi Asi Ẹ Tọn?”)
13 Nue mí plọn. Nudepope he tatọ́ whẹndo tọn de to wiwà dona nọ sinai do owanyi ji. Naegbọn enẹ do yin nujọnu sọmọ? Apọsteli Johanu gblọn dọ: “Mẹhe ma yiwanna mẹmẹsunnu [kavi whẹndo] etọn he e mọ, ma sọgan yiwanna Jiwheyẹwhe, mẹhe e ma mọ.” (1 Joh. 4:11, 20) Na taun tọn, sunnu he yiwanna whẹndo etọn bo jlo na hodo apajlẹ Jehovah po Jesu po tọn, na nọ penukundo nuhudo whẹndo etọn tọn lẹ go to gbigbọ-liho, to numọtolanmẹ-liho podọ to agbasa-liho. (1 Tim. 5:8) E na nọ plọnnu ovi etọn lẹ bosọ nọ domẹplọnlọ yé go. E nasọ zindonukọn bo to pinplọn nado nọ bayi nudide he na gbògbéna Jehovah bosọ hẹn ale wá na whẹndo etọn lẹ. Mì gbọ mí ni gbadopọnna nubiọtomẹsi ehelẹ dopodopo, bo pọ́n lehe tatọ́ whẹndo tọn de gán hodo apajlẹ Jehovah po Jesu po tọn do.
NUE TATỌ́ WHẸNDO TỌN DE DONA WÀ
14. Nawẹ tatọ́ whẹndo tọn de nọ penukundo nuhudo whẹndo etọn tọn lẹ go to gbigbọ-liho gbọn?
14 Nọ penukundo nuhudo gbigbọmẹ tọn whẹndo etọn tọn lẹ go. Taidi Otọ́ etọn, nue nọ duahunmẹna Jesu wẹ nado hẹn ẹn diun dọ mẹhe to nukunpedomẹgo etọn glọ lẹ nọ dùnú ganji to gbigbọ-liho. (Mat. 5:3, 6; Malku 6:34) Mọdopolọ, nue nọ duahunmẹna tatọ́ whẹndo tọn de hugan wẹ nado hẹn pekọ wá na nuhudo gbigbọmẹ tọn whẹndo etọn tọn lẹ. (Deut. 6:6-9) Nado wà ehe, e nọ hẹn ẹn diun dọ ewọ po whẹndo etọn po nọ hia Ohó Jiwheyẹwhe tọn bo nọ plọn ẹn, nọ yì opli lẹ, nọ lá wẹndagbe lọ, nọ wleawuna haṣinṣan de hẹ Jehovah bosọ hẹn e go.
15. Etẹwẹ yin dopo to aliho he mẹ tatọ́ whẹndo tọn de gán penukundo nuhudo whẹndo etọn tọn lẹ go to numọtolanmẹ-liho te lẹ mẹ?
15 Nọ penukundo nuhudo whẹndo etọn tọn lẹ go to numọtolanmẹ-liho. Jehovah dọ to mẹdevo lẹ nukọn dọ emi yiwanna Jesu. (Mat. 3:17) Jesu do owanyi he e do na hodotọ etọn lẹ hia, gbọn nue e nọ dọ po nue e nọ wà lẹ po dali. Podọ, yelọsu dohia ẹ dọ emi yiwanna ẹn. (Joh. 15:9, 12, 13; 21:16) Tatọ́ whẹndo tọn de gán dohia dọ emi yiwanna asi emitọn po ovi emitọn lẹ po gbọn nue e nọ wà lẹ gblamẹ, taidi Biblu pinplọn hẹ yé. E sọ dona nọ dọna yé dọ emi yiwanna yé, dọ yé họakuẹ na emi bosọ nọ pà yé to mẹdevo lẹ nukọn eyin e biọ domọ.—Howh. 31:28, 29.
Nado hẹn homẹ Jehovah tọn hùn, tatọ́ whẹndo tọn de dona nọ penukundo nuhudo agbasa tọn whẹndo etọn tọn lẹ go (Pọ́n hukan 16tọ)
16. Onú devo tẹwẹ tatọ́ whẹndo tọn de dona wà, podọ nawẹ e gán nọ jlẹkaji gbọn?
16 Nọ penukundo nuhudo agbasa tọn whẹndo etọn tọn lẹ go. Jehovah penukundo nuhudo dandan tọn Islaelivi lẹ tọn go, etlẹ yin to whenue e to tó dọ̀n na yé na tonumase yetọn wutu. (Deut. 2:7; 29:5) E sọ nọ penukundo nuhudo dandan tọn mítọn lẹ go to egbehe. (Mat. 6:31-33; 7:11) Mọdopolọ, Jesu na núdùdù mẹhe hodo e lẹ. (Mat. 14:17-20) E sọ gbọazọ̀nna susu yetọn. (Mat. 4:24) Nado hẹn homẹ Jehovah tọn hùn, tatọ́ whẹndo tọn de dona nọ penukundo nuhudo agbasa tọn whẹndo etọn tọn lẹ go. Amọ́, e dona to jlẹkaji. Azọ́n he e nọ wà nado penukundo nuhudo agbasa tọn whẹndo etọn tọn lẹ go, ma dona nọ duahunmẹna ẹn sọmọ bọ e ma na penugo nado penukundo nuhudo yetọn go to gbigbọ-liho, podọ to numọtolanmẹ-liho dile e jẹ do.
17. Nawẹ Jehovah po Jesu po nọ plọnazọ́n mí bosọ nọ domẹplọnlọ mí go gbọn?
17 Nọ plọnazọ́n mẹ. Jehovah nọ plọnazọ́n mí bo nọ domẹplọnlọ mí go na dagbe mítọn wutu. (Heb. 12:7-9) Taidi Otọ́ etọn, Jesu nọ plọnazọ́n mẹhe to aṣẹpipa etọn glọ lẹ po owanyi po. (Joh. 15:14, 15) E yin nujikudonọ amọ́ bo nọ jọmẹ. (Mat. 20:24-28) E nọ mọnukunnujẹemẹ dọ mapenọ wẹ mí yin bosọ nọ saba ṣinuwa.—Mat. 26:41.
18. Etẹwẹ tatọ́ whẹndo tọn dagbe de dona nọ flin?
18 Tatọ́ whẹndo tọn de he nọ hodo apajlẹ Jehovah po Jesu po tọn nọ flindọ mapenọ wẹ hagbẹ whẹndo etọn tọn lẹ yin. E ma nọ “gblehomẹ sinsinyẹn” do asi ẹ kavi ovi etọn lẹ go. (Kol. 3:19) Kakatimọ, e nọ yí nunọwhinnusẹ́n he to Galatianu lẹ 6:1 mẹ zan, bo nọ dovivẹnu nado gọalọna yé nado bayi vọjlado “to gbigbọ walọmimiọn tọn mẹ,” bosọ nọ flindọ mapenọ wẹ emi lọsu yin ga. Taidi Jesu, e nọ mọnukunnujẹemẹ dọ aliho dagbe hugan nado plọnmẹ wẹ nado ze apajlẹ dai.—1 Pita 2:21.
19, 20. Whenue tatọ́ whẹndo tọn de jlo na bayi nudide lẹ, nawẹ e gán hodo apajlẹ Jehovah po Jesu po tọn gbọn?
19 Ma nọ bayi nudide ṣejannabi tọn lẹ. Jehovah nọ bayi nudide he na hẹn ale wá na mẹdevo lẹ hugan. Di apajlẹ, e bayi dide nado dá ogbẹ̀, e ma yin nado hẹn ale wá na ede, amọ́ nado má ayajẹ gbẹninọ tọn hẹ mí. Mẹde ma hẹn ẹn po huhlọn po nado ze Visunnu etọn jo na ylando mítọn lẹ wutu. E desọn ojlo mẹ bo basi avọ́sinsan enẹ do ota mítọn mẹ. Jesu lọsu bayi nudide lẹ he hẹn ale wá na mẹdevo lẹ jẹnukọn. (Lom. 15:3) Di apajlẹ, e bayi dide nado yí ojlẹ gbọjẹ tọn etọn do sanvọ́ nado plọnnu gbẹtọgun de.—Malku 6:31-34.
20 Tatọ́ whẹndo tọn dagbe de nọ yọnẹn dọ dopo to nue vẹawu hugan he emi dona wà lẹ mẹ wẹ nado bayi nudide nuyọnẹn tọn lẹ na whẹndo emitọn, podọ e nọ ylọ azọngban enẹ dọ nujọnu. E nọ tẹnpọn nado dapana nudide he yè ma lẹnnupọn whẹpo do bayi kavi dehe sinai do numọtolanmẹ etọn ji to ojlẹ enẹ mẹ lẹ. Kakatimọ, e nọ na dotẹnmẹ Jehovah nado plọnazọ́n ẹn. * (Howh. 2:6, 7) Gbọnmọ dali, e na nọ lẹnnupọndo nue na hẹn ale wá na mẹdevo lẹ ji, e ma yin na edetiti.—Flp. 2:4.
21. Etẹ ji wẹ mí na dọhodo to hosọ he bọdego mẹ?
21 Jehovah ko deazọ́n he kàn dẹpẹ biọ de na tatọ́ whẹndo tọn lẹ, podọ yé sọ dona dogbè lehe yé nọ penukundego do tọn na ẹn. Amọ́, eyin asu de dovivẹnu nado hodo apajlẹ Jehovah po Jesu po tọn, e na yin tatọ́ whẹndo tọn dagbe de. Podọ, eyin asi etọn hẹn azọngban etọn di, alọwle yetọn na do ayajẹ. Nukun tẹwẹ asi de dona nọ yí do pọ́n tatọ́-yinyin, podọ nuhahun tẹlẹ wẹ e gán pehẹ? Hosọ he bọdego na na gblọndo kanbiọ enẹlẹ tọn.
OHÀN 16 Mì Pà Jehovah Na Ovi Yiamisisadode Etọn
^ huk. 5 To whenue sunnu de wlealọ, e nọ lẹzun tatọ́ whẹndo yọyọ de tọn. To hosọ ehe mẹ, mí na dọhodo nuhe tatọ́-yinyin zẹẹmẹdo, nuewutu Jehovah do ze e dai, gọna nuhe sunnu lẹ gán plọn sọn apajlẹ Jehovah po Jesu po tọn mẹ ji. To hosọ he bọdego mẹ, mí na gbadopọnna nuhe asu po asi po de gán plọn sọn apajlẹ Jesu po mẹdevo he yin nùdego to Biblu mẹ lẹ po tọn mẹ. Podọ, to hosọ he gbọngodo mẹ, mí na gbadopọnna whẹho tatọ́-yinyin tọn to agun mẹ.
^ huk. 7 Linlẹn lọ dọ e sọgbe dọ sunnu de ni yinuwa hẹ asi ẹ to aliho agọ̀ mẹ bo tlẹ gbleawuna ẹn to agbasa-liho nọ yin didohia to whedelẹnu to sinima lẹ, aihundida lẹ podọ etlẹ yin to owe he nọ do nukiko namẹ lẹ mẹ. Enẹwutu, mẹsusu gán nọ lẹndọ nude ma ylan to e mẹ dọ sunnu de ni duklunọ do asi etọn ji.
^ huk. 20 Na nudọnamẹ dogọ gando lehe yè gán bayi nudide dagbe lẹ do go, pọ́n hosọ lọ “Nọ Basi Nudide He Nọ Gbògbéna Jehovah Lẹ” to Atọ̀họ̀-Nuhihọ́ lọ Tọn 15 avril 2011 tọn mẹ, weda 13-17.
