TULUN-AN NGA ARTIKULO 5
“Ang Cristo Amo ang Ulo sang Tagsa ka Lalaki”
“Ang Cristo amo ang ulo sang tagsa ka lalaki.”—1 COR. 11:3.
AMBAHANON 12 Si Jehova ang Halangdon nga Dios
ANG BINAGBINAGON SA SINI NGA ARTIKULO *
1. Ano ang mahimo makaimpluwensia sa isa ka lalaki sa iya pagtratar sa iya asawa kag kabataan?
PARA sa imo, ano ang buot silingon nga mangin ulo? Para sa pila ka lalaki, ginsunod nila ang kultura sa ila lugar ukon ang ginahimo sang gindak-an nila nga pamilya sa pagtratar nila sa ila asawa kag kabataan. Talupangda ang ginsiling ni Yanita, nga isa ka sister nga taga-Europe. Nagsiling sia, “Sa amon lugar, manubo gid ang pagtan-aw sang mga tawo sa mga babayi, kag para sa ila, mga suluguon ang mga babayi.” Kag ang isa ka brother nga si Luke, nga taga-United States, nagsiling, “Ginatudluan sang pila ka amay ang ila mga bata nga lalaki nga indi dapat pagsapakon ang ginasiling sang mga babayi kay indi man importante ang ila opinyon.” Pero indi amo sina ang gusto ni Jehova nga pagtratar sang mga bana sa ila asawa. (Ipaanggid ang Marcos 7:13.) Gani, paano mangin maayo nga ulo sang pamilya ang isa ka lalaki?
2. Ano ang dapat mabal-an sang ulo sang pamilya, kag ngaa?
2 Para mangin maayo nga ulo sang pamilya ang isa ka lalaki, dapat niya anay mahangpan ang gusto ni Jehova nga himuon niya. Dapat man niya mabal-an kon ngaa ginhatagan ni Jehova sang awtoridad ang iban, kag kon paano niya mailog ang halimbawa ni Jehova kag ni Jesus. Ngaa dapat niya ini mabal-an? Bangod ginhatagan ni Jehova ang mga ulo sang pamilya sang awtoridad, kag gusto niya nga gamiton nila ini sing husto.—Luc. 12:48b.
ANO ANG BUOT SILINGON NGA MANGIN ULO?
3. Ano ang ginatudlo sa aton sang 1 Corinto 11:3 parte sa pag-organisar ni Jehova sa iya pamilya?
3 Basaha ang 1 Corinto 11:3. Ginapaathag sini nga bersikulo kon paano ginaorganisar ni Jehova ang iya pamilya sa langit kag sa duta. Bangod sia ang ulo, sia ang may pinakamataas nga awtoridad. Ginhatagan ni Jehova sang awtoridad ang iban, pero manabat sila sa iya kon indi husto ang paggamit nila sa sini. (Roma 14:10; Efe. 3:14, 15) Ginhatagan ni Jehova si Jesus sang awtoridad bilang ulo sang kongregasyon, pero manabat si Jesus kay Jehova sa kon paano niya kita ginatratar. (1 Cor. 15:27) Ginhatagan man ni Jehova sang awtoridad ang bana sa iya asawa kag kabataan, pero manabat sia kay Jehova kag kay Jesus sa kon paano niya ginatratar ang iya pamilya.—1 Ped. 3:7.
4. Ano ang awtoridad ni Jehova kag ni Jesus?
4 Bangod si Jehova ang Ulo sang iya pamilya sa langit kag sa duta, may awtoridad sia nga maghimo sang mga pagsulundan para sa iya mga anak kag ipatuman ini. (Isa. 33:22) Si Jesus ang ulo sang Cristianong kongregasyon, gani may awtoridad man sia nga maghimo sang mga pagsulundan kag ipatuman ini.—Gal. 6:2; Col. 1:18-20.
5. Ano ang awtoridad sang ulo sang Cristianong pamilya, kag ano ang limitasyon sang iya awtoridad?
5 Pareho kay Jehova kag kay Jesus, may awtoridad man ang ulo sang Cristianong pamilya nga maghimo sang desisyon para sa iya pamilya. (Roma 7:2; Efe. 6:4) Pero may limitasyon ang iya awtoridad. Halimbawa, kon maghimo sia sang mga pagsulundan, dapat nabase ini sa mga prinsipio nga makita sa Pulong sang Dios. (Hulu. 3:5, 6) Kag wala sia sang awtoridad nga maghimo sang mga pagsulundan sa indi miembro sang iya pamilya. (Roma 14:4) Kag kon magdalagku na ang iya kabataan kag wala na nagaistar sa iya balay, ginatahod gihapon nila sia, pero wala na sia sang awtoridad sa ila.—Mat. 19:5.
NGAA GINHATAGAN NI JEHOVA SANG AWTORIDAD ANG IBAN?
6. Ngaa ginhatagan ni Jehova sang awtoridad ang iban?
6 Ginhatagan ni Jehova sang awtoridad ang iban bangod palangga niya ang iya pamilya. Regalo ini halin sa iya. Bangod sang ginhimo ni Jehova, organisado kag may paghidait ang iya pamilya. (1 Cor. 14:33, 40) Kon indi maathag kon sin-o ang may awtoridad sa pamilya ni Jehova, mangin indi malipayon ang iya pamilya bangod indi sila organisado. Halimbawa, indi sila kabalo kon sin-o ang magahimo sang desisyon kag kon sin-o ang magapatuman sini.
7. Suno sa Efeso 5:25, 28, ano ang gusto ni Jehova nga pagtratar sang mga bana sa ila asawa?
7 Kon para sa kaayuhan ang paghatag sang awtoridad sa lalaki sa pamilya, ngaa madamo nga babayi ang nagabatyag nga ginapintasan sila kag ginakontrol sang ila bana? Bangod wala ginasunod sang madamo nga lalaki ang mga ginapatuman ni Jehova. Sa baylo, ginasunod nila ang mga kustombre sa ila lugar. Mahimo nga nalipay sila kon ginasakit nila ang ila asawa. Halimbawa, mahimo kontrolon sang bana ang iya asawa para ipakita nga mas importante sia ukon pamatud-an sa iban nga matuod sia nga lalaki. Mahimo magpensar sia nga OK lang nga indi sia palangga sang iya asawa. Ang importante sa iya amo nga nahadlok ang iya asawa sa iya. Kag kon mahadlok na ang iya asawa sa iya, mas mahapos na sa iya nga kontrolon ang iya asawa. * Sala gid kon ginapamensar kag ginahimo ini sang mga lalaki. Kay man, wala nila ginarespeto ang mga babayi, kag indi amo ini ang gusto ni Jehova nga himuon nila.—Basaha ang Efeso 5:25, 28.
PAANO MANGIN MAAYO NGA ULO SANG PAMILYA ANG ISA KA LALAKI?
8. Paano mangin maayo nga ulo sang pamilya ang isa ka lalaki?
8 Mangin maayo nga ulo sang pamilya ang isa ka lalaki kon ilugon niya kon paano gingamit ni Jehova kag ni Jesus ang ila awtoridad. Binagbinagon naton ang duha ka kinaiya nga ginpakita ni Jehova kag ni Jesus, kag kon paano ini mapakita sang ulo sang pamilya sa iya asawa kag kabataan.
9. Paano nagpakita si Jehova sang pagkamapainubuson?
9 Pagkamapainubuson. Bisan pa si Jehova ang pinakamaalam nga Persona, ginapamatian niya ang opinyon sang iya mga alagad. (Gen. 18:23, 24, 32) Ginpamangkot man niya sila sang ila mga panugda. (1 Hari 22:19-22) Perpekto si Jehova, pero wala niya ginapahimo sa aton ang indi naton masarangan. Sa baylo, ginabuligan niya ang indi perpekto nga mga tawo nga nagaalagad sa iya nga mangin madinalag-on. (Sal. 113:6, 7) Ginatawag pa gani sang Biblia si Jehova nga “manugbulig.” (Heb. 13:6; Sal. 27:9) Nagsiling si Hari David nga natapos lang niya ang daku nga hilikuton nga ginpahimo sa iya bangod nagpaubos si Jehova para buligan sia.—2 Sam. 22:36.
10. Paano nagpakita si Jesus sang pagkamapainubuson?
10 Binagbinaga ang halimbawa ni Jesus. Bisan pa Ginuo sia kag Agalon sang iya mga disipulo, ginhinawan niya ang ila mga tiil. Ngaa ginpasulat ni Jehova sa Biblia ang ginhimo ni Jesus? Para mangin halimbawa sa tanan, lakip na sa ulo sang pamilya. Si Jesus nagsiling: “Naghatag ako sa inyo sang sulundan, nga ang ginhimo ko sa inyo, dapat man ninyo himuon.” (Juan 13:12-17) Bisan pa may daku nga awtoridad si Jesus, wala niya ginhunahuna nga dapat sia alagdon sang iban. Sa baylo, nag-alagad sia sa iban.—Mat. 20:28.
Mapakita sang ulo sang pamilya nga mapainubuson sia kag palangga niya ang iya pamilya paagi sa pag-obra sang mga ulubrahon sa balay kag pagbulig sa iya pamilya nga mangin suod kay Jehova (Tan-awa ang parapo 11, 13)
11. Ano ang matun-an sang ulo sang pamilya parte sa pagkamapainubuson nga ginpakita ni Jehova kag ni Jesus?
11 Ang matun-an naton. Mapakita sang ulo sang pamilya ang pagkamapainubuson sa madamo nga paagi. Halimbawa, indi niya dapat paghunahunaon nga himuon sang iya asawa kag kabataan ang indi nila masarangan. Dapat man niya pamatian ang opinyon sang iya asawa kag kabataan, bisan pa lain ini sa iya opinyon. Si Marley, nga taga-United States, nagsiling: “Kon kaisa, indi pareho ang amon opinyon sang akon bana. Pero kabalo ’ko nga importante ako sa iya kag ginarespeto niya ako kay ginapamangkot niya ako sang akon opinyon kag ginapamensar niya ini sing maayo antes sia maghimo sang desisyon.” Dugang pa, ang mapainubuson nga bana gusto gid magbulig sa mga ulubrahon sa balay, bisan pa para sa mga tawo sa ila lugar, ini nga mga ulubrahon para lang sa mga babayi. Pero indi ini mahapos. Ngaa? Ang isa ka sister nga si Rachel nagsiling: “Sa amon lugar, kon buligan sang bana ang iya asawa sa pagpanghugas sang pinggan ukon sa pagpaninlo sa balay, mahimo hunahunaon sang ila kaingod ukon mga paryente nga indi sia matuod nga lalaki. Ginahunahuna nila nga wala sia sing kontrol sa iya asawa.” Kon amo sini ang ginahunahuna sang madamo nga tawo sa inyo lugar, dumduma nga ginhinawan ni Jesus ang mga tiil sang iya mga disipulo, bisan pa ginatamod ini sang mga tawo nga ulubrahon sang mga ulipon. Indi importante sa maayo nga ulo sang pamilya kon ano ang ginahunahuna sang iban parte sa iya. Sa baylo, ginatinguhaan niya nga mangin malipayon ang iya asawa kag kabataan. Magluwas sa pagkamapainubuson, ano pa nga kinaiya ang dapat ipakita sang maayo nga ulo sang pamilya?
12. Ano ang ginhimo ni Jehova kag ni Jesus bangod sang ila gugma?
12 Gugma. Ang tanan nga ginahimo ni Jehova ginahimo niya bangod sang iya gugma. (1 Juan 4:7, 8) Ginpakita niya nga palangga niya kita kag gusto niya nga mangin abyan niya kita paagi sa paghatag sa aton sang iya Pulong kag sang iya organisasyon. Ginbuligan man niya kita nga mangin matawhay ang aton panghunahuna bangod ginpasalig niya kita nga palangga niya kita. Kag kamusta naman ang aton materyal nga kinahanglanon? Si Jehova “bugana nga nagahatag sa aton sang tanan nga butang nga aton ginaagom.” (1 Tim. 6:17) Kon makasala kita, ginatadlong niya kita, pero palangga niya kita gihapon. Kag bangod sang gugma ni Jehova, nag-aman sia sing gawad para sa aton. Kag palangga gid kita ni Jesus kay ginhatag niya ang iya kabuhi para sa aton. (Juan 3:16; 15:13) Wala sing makapugong kay Jehova kag kay Jesus nga padayon nga ipakita ang gugma sa mga matutom sa ila.—Juan 13:1; Roma 8:35, 38, 39.
13. Ngaa importante nga ipakita sang ulo sang pamilya nga palangga niya ang iya pamilya? (Tan-awa man ang kahon nga “ Para sa Bag-ong Mag-asawa, Ano ang Dapat Himuon sang Bana Para Respetuhon Sia sang Iya Asawa?”)
13 Ang matun-an naton. Ang tanan nga ginahimo sang ulo sang pamilya dapat ginahimo niya bangod sang iya gugma. Ngaa importante gid ini? Si apostol Juan nagsiling: “Ang isa nga wala nagahigugma sa iya utod [ukon pamilya], nga makita niya, indi makahigugma sa Dios, nga wala niya makita.” (1 Juan 4:11, 20) Kon palangga sang isa ka lalaki ang iya pamilya kag gusto niya ilugon si Jehova kag si Jesus, dapat niya buligan ang iya pamilya nga mangin suod kay Jehova, mangin matawhay ang ila panghunahuna, kag amanan sila sang ila materyal nga kinahanglanon. (1 Tim. 5:8) Dapat niya hanason kag disiplinahon ang iya kabataan. Dapat man sia padayon nga magtuon sa paghimo sang desisyon nga nagadayaw kay Jehova kag makabenepisyo ang iya pamilya. Binagbinagon naton ining mga dapat himuon sang ulo sang pamilya kag hibaluon naton kon paano niya mailog si Jehova kag si Jesus.
ANG DAPAT HIMUON SANG ULO SANG PAMILYA
14. Paano mabuligan sang ulo sang pamilya nga mangin suod kay Jehova ang iya pamilya?
14 Buligan ang iya pamilya nga mangin suod kay Jehova. Ginpakita ni Jesus nga gin-ilog niya ang iya Amay bangod gusto niya buligan ang iya mga sumulunod nga mangin mabakod ang ila pagtuo. (Mat. 5:3, 6; Mar. 6:34) Sing kaanggid, ang pinakaimportante sa isa ka ulo sang pamilya amo ang pagbulig sa iya pamilya nga mangin suod kay Jehova. (Deut. 6:6-9) Ginahimo niya ini paagi sa pagsigurado nga sia kag ang iya pamilya nagabasa kag nagatuon sang Pulong sang Dios, nagatambong sa mga miting, nagabantala sang maayong balita, kag nagapanikasog nga indi maguba ang ila kaangtanan kay Jehova.
15. Paano mapakita sang ulo sang pamilya nga palangga niya ang iya pamilya?
15 Ipabatyag sa iya pamilya nga palangga niya sila. Nagsiling si Jehova nga palangga niya si Jesus kag nabatian ini sang iban. (Mat. 3:17) Ginpakita ni Jesus nga palangga niya ang iya mga sumulunod paagi sa iya mga ginhimo kag ginsiling sa ila. Nagsiling man ang iya mga disipulo nga palangga nila sia. (Juan 15:9, 12, 13; 21:16) Mapakita sang ulo sang pamilya nga palangga niya ang iya asawa kag kabataan paagi sa iya mga ginahimo, pareho sang pagtuon sang Biblia upod sa ila. Dapat man niya isiling sa ila nga palangga niya sila kag importante sila sa iya. Kag kon nagakaigo, ipabati niya sa iban kon ginadayaw niya sila kag ginapasalamatan.—Hulu. 31:28, 29.
Dapat iaman sang ulo sang pamilya ang materyal nga kinahanglanon sang iya pamilya. Kon himuon niya ini, malipay si Jehova sa iya (Tan-awa ang parapo 16)
16. Ano pa ang dapat himuon sang ulo sang pamilya, kag ngaa dapat sia maghalong?
16 Amanan ang iya pamilya sang materyal nga kinahanglanon. Ginsigurado ni Jehova nga maamanan ang mga Israelinhon sang ila kinahanglanon bisan pa ginsilutan sila bangod sang ila indi pagtuman. (Deut. 2:7; 29:5) Subong, ginaamanan man kita ni Jehova sang aton mga kinahanglanon. (Mat. 6:31-33; 7:11) Sing kaanggid, ginpakaon ni Jesus ang mga nagsunod sa iya. (Mat. 14:17-20) Gin-ayo man niya ang mga may balatian. (Mat. 4:24) Dapat iaman sang ulo sang pamilya ang materyal nga kinahanglanon sang iya pamilya. Kon himuon niya ini, malipay si Jehova sa iya. Pero dapat sia maghalong. Indi niya dapat pag-ubuson ang iya tion sa pagtrabaho kay indi na niya mabuligan ang iya pamilya nga mangin suod kay Jehova kag indi na niya mapabatyag ang iya pagpalangga sa ila.
17. Paano kita ginahanas kag ginadisiplina ni Jehova kag ni Jesus?
17 Tudluan kag laygayan ang iya pamilya. Ginahanas kita kag ginadisiplina ni Jehova bangod gusto niya kita buligan. (Heb. 12:7-9) Pareho sa iya Amay, ginhanas ni Jesus ang iya mga sumulunod sa mahigugmaon nga paagi. (Juan 15:14, 15) Prangka sia kon nagalaygay sa iban, pero sa maayo nga paagi. (Mat. 20:24-28) Nahangpan niya nga bangod indi kita perpekto, pirme kita makahimo sang sala.—Mat. 26:41.
18. Ano ang ginadumdom sang maayo nga ulo sang pamilya?
18 Ginadumdom sang ulo sang pamilya nga nagailog kay Jehova kag kay Jesus nga indi perpekto ang iya asawa kag kabataan. Ginalikawan niya nga “magkaakig sing tuman” sa iya asawa ukon kabataan. (Col. 3:19) Sa baylo, ginaaplikar niya ang prinsipio sa Galacia 6:1 kag ginatinguhaan niya nga tadlungon sila “sa espiritu sang kalulo” kay kabalo sia nga indi man sia perpekto. Pareho kay Jesus, kabalo sia nga ang iya halimbawa amo ang pinakamaayo nga paagi nga tudluan ang iya pamilya.—1 Ped. 2:21.
19-20. Paano mailog sang ulo sang pamilya si Jehova kag si Jesus kon nagahimo sang desisyon?
19 Maghimo sang desisyon para sa kaayuhan sang tanan. Ang mga desisyon ni Jehova may maayo gid nga resulta sa iban. Halimbawa, nagdesisyon si Jehova nga magpanuga indi para sa iya kaayuhan, kundi bangod gusto niya nga may kabuhi man kita kag mangin malipayon. Wala sing may nagpilit sa iya nga ihatag ang iya Anak para ibayad sa aton mga sala. Kinabubut-on niya nga ginhimo ini nga sakripisyo para buligan kita. Gin-una man ni Jesus ang kaayuhan sang iban sa mga desisyon nga iya ginhimo. (Roma 15:3) Halimbawa, isa ka bes, kapoy gid si Jesus. Pero gintudluan niya ang mga tawo sa baylo nga magpahuway.—Mar. 6:31-34.
20 Kabalo ang maayo nga ulo sang pamilya nga mabudlay maghimo sang maayo nga desisyon para sa iya pamilya. Gani, ginaserioso gid niya ini nga responsibilidad. Ginalikawan niya nga maghimo sang desisyon nga wala sing maayo nga rason ukon base lang sa iya ginabatyag. Sa baylo, nagapatudlo sia kay Jehova kon paano makahimo sang maayo nga desisyon. * (Hulu. 2:6, 7) Makabulig ini sa iya nga pamensaron indi ang iya kaayuhan, kundi ang kaayuhan sang iban.—Fil. 2:4.
21. Ano ang binagbinagon sa masunod nga artikulo?
21 Ginhatagan ni Jehova sing mabug-at nga responsibilidad ang mga ulo sang pamilya. Gusto niya nga himuon nila ang ila bug-os nga masarangan nga himuon ang ila responsibilidad. Pero kon panikasugan sang isa ka bana nga ilugon ang halimbawa ni Jehova kag ni Jesus, mangin maayo gid sia nga ulo sang pamilya. Kag kon himuon sang asawa ang iya responsibilidad sa pamilya, mangin malipayon gid sia kag ang iya bana. Paano dapat tamdon sang isa ka asawa ang responsibilidad sang iya bana bilang ulo sang pamilya, kag ano nga mga kabudlayan ang posible niya maeksperiensiahan? Sabton ini nga mga pamangkot sa masunod nga artikulo.
AMBAHANON 16 Dayawa si Jehova Tungod sa Iya Anak nga Hinaplas
^ par. 5 Kon mangasawa ang isa ka lalaki, mangin ulo sia sang bag-o nga pamilya. Sa sini nga artikulo, binagbinagon naton kon ano ang buot silingon nga mangin ulo, kon ngaa ginhatagan ni Jehova sini nga awtoridad ang iban, kag kon ano ang matun-an sang mga lalaki sa halimbawa ni Jehova kag ni Jesus. Sa masunod nga artikulo, binagbinagon naton kon ano ang matun-an sang mga bana kag mga asawa sa halimbawa ni Jesus kag sa iban pa nga mabasa sa Biblia. Kag sa ikatlo nga artikulo, binagbinagon naton kon paano dapat gamiton sang mga brother ang ila awtoridad sa kongregasyon.
^ par. 7 Ang ideya nga puede maltratuhon ukon sakiton sang bana ang iya asawa makita kon kaisa sa mga pelikula, teatro, kag mga libro. Gani, mahimo pensaron sang mga tawo nga indi sala nga kontrolon sang bana ang iya asawa.
^ par. 20 Para sa dugang nga impormasyon kon paano maghimo sang maayo nga desisyon, tan-awa ang artikulo nga “Maghimo sang mga Desisyon nga Nagapadungog sa Dios,” sa Abril 15, 2011, nga Ang Lalantawan, p. 13-17.
