1. Nama utai ti ulih ngachau chara laki ngintu bini enggau anak?

NAMA reti “kepala”? Sekeda lelaki nitihka adat tauka chara sida dibesaika nentuka chara sida ngintu bini enggau anak. Peratika ku Yanita, seiku menyadi indu ari Eropah, “Ba alai aku diau, orang pechaya sida ke indu baruh agi ari lelaki lalu ngumbai sida baka ulun.” Lalu ku seiku menyadi lelaki ke benama Luke, ke diau ba Amerika Serikat madahka, “Sekeda apai ngajar anak lelaki sida utai ke disebut bala indu enda beguna lalu enda ibuh mendingka penemu sida.” Taja pia, ulah ke baka tu enda sejalai enggau chara Jehovah. (Bandingka Mark 7:13.) Baka ni laki ulih nyadi tuai bilik ti manah?

2. Nama enda tau enda ditemu tuai bilik, lalu nama kebuah?

² Ngambika ulih nyadi tuai bilik ti manah, laki enda tau enda meretika utai ti dikedekaka Jehovah kereja iya. Laki mega patut nemu kebuah Jehovah meri sekeda orang kuasa, lalu baka ni iya ulih neladan Jehovah enggau Jesus. Nama kebuah penemu nya beguna ba laki? Laban Jehovah udah meri laki tanggung pengawa ngintu ruang bilik iya, lalu Jehovah ngarapka sida ulih ngena kuasa sida enggau manah.—Luk. 12:48b.

3. Nitihka 1 Korint 11:3, nama dipelajarka kitai pasal chara Jehovah udah ngatur ruang bilik Iya?

³ Bacha 1 Korint 11:3. Ayat tu nerangka chara Jehovah udah ngatur ruang bilik Iya ba serega sereta ba dunya. Ketegal Iya “Kepala,” Iya bisi kuasa ti nyulut. Lalu semua anak Iya, nyengkaum bala melikat sereta mensia bisi  tanggung pengawa ngena kuasa ke diberi Iya enggau manah. (Rom. 14:10; Eps. 3:14, 15) Jehovah udah meri Jesus kuasa atas eklisia. Taja pia, Jesus deka betanggungjawap ngagai Jehovah pasal chara iya ngintu kitai. (1 Kor. 15:27) Jehovah mega meri laki kuasa nyadi kepala atas bini enggau anak. Tang laki deka betanggungjawap ngagai Jehovah sereta Jesus bekaul enggau chara iya ngintu diri sebilik.—1 Pet. 3:7.

4. Jehovah enggau Jesus bisi hak ngereja nama?

⁴ Ketegal Jehovah “Kepala” ba serega sereta ba dunya, Iya bisi hak ngaga atur ke bala anak Iya lalu nentuka sida ngasika atur Iya. (Isa. 33:22, 23) Jesus, ke nyadi kepala eklisia Kristian mega bisi hak ngaga atur sereta nentuka atur nya dititih.—Gal. 6:2; Kol. 1:18-20.

5. Nama kuasa ke dikembuan tuai bilik, lalu nama tatak iya?

⁵ Baka teladan Jehovah enggau Jesus, tuai bilik Kristian bisi kuasa ngaga pemutus ba ruang bilik iya. (Rom. 7:2; Eps. 6:4) Taja pia, kuasa iya bisi tatak. Ambika chunto, atur ke digaga iya patut bepelasarka prinsip Bup Kudus. (J-lam. 3:5, 6) Lalu tuai bilik nadai kuasa ngaga atur ke orang ti ukai sebagi ari ruang bilik iya. (Rom. 14:4) Pia mega, lebuh anak lelaki enggau anak indu iya udah mansang besai lalu ninggalka rumah, iya ukai agi tuai bilik sida. Taja pia, sida agi bebasaka iya.—Mat. 19:5.

6. Nama kebuah Jehovah numbuhka atur “kepala”?

⁶ Jehovah numbuhka atur “kepala” ketegal pengerindu. Tu endang pemeri ari Iya. Atur ke baka tu ulih nentuka ruang bilik Jehovah bisi atur ti manah sereta pemaik. (1 Kor. 14:33, 40) Enti nadai atur tu, ruang bilik Jehovah deka charut sereta nadai pengaga ati. Ambika chunto, enti nadai atur ba ruang bilik, sida enda nemu sapa ke patut ngaga pemutus sereta bejalaika pemutus nya.

7. Nitihka Epesus 5:25, 28, baka ni Jehovah deka laki ngintu bini iya?

⁷ Enti atur “kepala” ari Petara nya manah, nama kebuah mayuh indu kemayaharitu ngasaika laki sida jai sereta nekan sida? Nya ketegal mayuh lelaki enda kiruhka standard Jehovah pasal pengidup ba ruang bilik lalu milih nitihka gaya pengidup bansa sida. Sida mega engka jai enggau bini ngambika ulih ngemuaska pengingin diri empu. Ambika chunto, seiku laki engka nekan bini iya kena iya ngasaika diri beguna agi tauka kena nunjukka ngagai orang bukai iya ukai lelaki ti lemi. Iya engka berunding, taja pan iya enda ulih mejal bini rinduka iya, tang iya ulih ngasuh bini takutka iya. Lalu iya engka ngena asai takut nya kena bekuasa atas bini iya. * Runding enggau ulah ke baka tu terang amat salah. Sida enda bebasaka bini lalu pengawa sida nya ngelaban peneka Jehovah.—Bacha Epesus 5:25, 28.

8. Baka ni laki ulih nyadi tuai bilik ti manah?

⁸ Laki ulih nyadi tuai bilik ti manah enti iya neladan chara Jehovah sereta Jesus ngena kuasa. Peratika dua iti kualiti ke ditunjukka Jehovah enggau Jesus, lalu peratika baka ni tuai bilik ulih ngayanka kualiti tu lebuh ngintu bini enggau anak.

9. Baka ni Jehovah nunjukka Diri baruh ati?

 ⁹ Baruh ati. Jehovah nya amat bepenemu-dalam. Taja pia, Iya mendingka penemu bala nembiak Iya. (P-kal. 18:23, 24, 32) Iya meri peluang ngagai sida ke dibaruh kuasa Iya madahka penemu diri. (1 Raj. 22:19-22) Jehovah amat sempurna, tang Iya enda ngarapka utai ti lebih ari kitai. Iya nulung mensia ke enda sempurna ulih mujur nyembah Iya. (Mas. 113:6, 7) Bup Kudus indah madahka Jehovah nya “endang penyaup.” (Heb. 13:6; Mas. 27:9) Raja David nemu iya ulih nembuka pengawa ti besai ke diberi ngagai iya ketegal Jehovah baruh ati lalu nulung iya.—2 Sam. 22:36.

10. Baka ni Jesus nunjukka diri baruh ati?

¹⁰ Peratika chunto Jesus. Taja pan iya Tuan ke bala murid iya, iya masu kaki sida. Nama kebuah Jehovah dekaka cherita tu ditulis ba Bup Kudus? Ngambika semua orang, nyengkaum tuai bilik ulih neladan Jesus. Jesus empu madahka: ‘Aku udah meri kita siti teladan, ngambika kita mega ngereja utai ti udah dikereja aku ngagai kita.’ (Jhn. 13:12-17) Taja pan Jesus bisi kuasa ti besai, iya enda ngarapka orang ngintu iya, tang iya deka ngintu orang bukai.—Mat. 20:28.

11. Baka ni tuai bilik neladan Jehovah enggau Jesus lebuh ngayanka pemaruh ati?

¹¹ Utai ke dipelajar kitai. Tuai bilik nunjukka pemaruh ati ngena mayuh chara. Ambika chunto, iya enda ngarapka bini enggau anak iya sempurna. Iya ningaka penemu sida, taja pan sida enda setuju enggau penemu iya. Ku Marley ari Amerika Serikat madah: “Kekadang, aku enggau laki aku enda sama penemu. Tang aku berasai beguna sereta dipebasa laban iya nanya penemu aku lalu berundingka nya sebedau ngaga pemutus.” Pia mega, laki ke baruh ati sanggup ngereja pengawa ba rumah, taja pan orang bukai berunding nya pengawa orang indu. Tu engka tusah. Nama kebuah? Ku seiku menyadi indu ke benama Rachel, “Ba menua aku, enti laki nulung bini masu pinggai tauka meresi rumah, orang ke serimbai endur diau sereta kaban belayan deka ngumbai laki nya lelaki ti lemi. Sida ngumbai bini ke nguasa laki.” Enti tu nyadi ba menua nuan, ingat meh Jesus kala masu kaki bala murid iya, taja pan nya pengawa ulun. Tuai bilik ti manah  deka ngasuh bini enggau anak iya berasai gaga ati, ukai ngasuh orang bukai ngumbai iya bekuasa tauka pama agi. Kelimpah ari baruh ati, nama kualiti bukai ke patut dikembuan tuai bilik?

12. Nama digaga Jehovah enggau Jesus ketegal pengerindu?

¹² Pengerindu. Semua utai ke digaga Jehovah ketegal pengerindu. (1 Jhn. 4:7, 8) Iya ngintu utai ke diguna kitai ba pengarap ngena Bup Kudus sereta gerempung Iya. Iya nulung kitai berasai likun lalu madahka Diri amat rinduka kitai. Lalu baka ni enggau utai ke diguna kitai ninting hari? Jehovah “meri kitai semua utai kena kitai ngelantangka diri.” (1 Tim. 6:17) Lebuh kitai ngereja penyalah, Iya ngemetulka kitai. Tang Iya enda badu rinduka kitai. Ketegal pengerindu, Jehovah nyediaka tebus ke kitai. Jesus mega amat rinduka kitai nyentukka iya sanggup nyerahka nyawa diri ke kitai. (Jhn. 3:16; 15:13) Nadai utai ke ulih nyerara pengerindu Jehovah enggau Jesus ke orang ti taluk ngagai seduai iya.—Jhn. 13:1; Rom. 8:35, 38, 39.

13. Nama kebuah beguna tuai bilik nunjukka pengerindu ngagai ruang bilik iya? (Peda mega kutak “ Baka Ni Lelaki ke Baru Jadi Ngulihka Basa Ari Bini Iya?”)

¹³ Utai ke dipelajar kitai. Semua utai ke digaga tuai bilik patut datai ari pengerindu. Nama kebuah tu beguna? Ku rasul John nyaut: ‘Orang ke enda rinduka menyadi diri [tauka diri sebilik] ke ulih dipeda iya, enda ulih rinduka Petara ke enda dipeda iya.’ (1 Jhn. 4:11, 20) Tuai bilik ke rinduka ruang bilik iya sereta deka neladan Jehovah enggau Jesus nyediaka utai ke diguna diri sebilik iya ba pengarap, emosi enggau utai ke diguna ninting hari. (1 Tim. 5:8) Iya deka ngajar sereta disiplin anak iya. Iya deka terus belajar ngaga pemutus ke meri mulia ngagai Jehovah sereta ke penguntung sida sebilik. Diatu kitai deka berandauka tiap iti pekara tu lalu beratika baka ni tuai bilik ulih neladan Jehovah enggau Jesus.

14. Baka ni tuai bilik nyediaka utai ke diguna diri sebilik ba pengarap?

¹⁴ Nyediaka utai ke diguna diri sebilik ba pengarap. Baka Apai iya, Jesus deka nulung bala murid iya mengkang tegap ba pengarap. (Mat. 5:3, 6; Mrk. 6:34) Sama mega, utai ke patut dikemeratka tuai bilik iya nya nulung diri sebilik semak ngagai Jehovah. (U-dat. 6:6-9) Iya nentuka sida sebilik macha sereta belajarka Bup Kudus, datai gempuru, nginjil sereta ngetanka kaul ti manah enggau Jehovah.

15. Baka ni tuai bilik ulih nunjukka pengibuh ngagai sida sebilik?

¹⁵ Nyediaka utai ke diguna diri sebilik ba emosi. Jehovah madahka Diri rinduka Jesus ba mua orang mayuh. (Mat. 3:17) Jesus suah nunjukka diri rinduka bala murid iya ari utai ke digaga enggau utai ke disebut iya. Ketegal nya sida pan madahka diri rinduka Jesus. (Jhn. 15:9, 12, 13; 21:16) Tuai bilik ulih nunjukka pengerindu ngagai bini enggau anak ari utai ke digaga iya baka belajarka Bup Kudus enggau sida. Iya mega ulih madahka diri sayauka sida sebilik, lalu enti bisi peluang, iya muji sida ba mua orang bukai.—J-lam. 31:28, 29.

16. Nama enda tau enda digaga tuai bilik, lalu nama patut diseliahka iya?

¹⁶ Nyediaka utai ke diguna diri sebilik ninting hari. Jehovah nentuka orang Israel bisi utai ke diguna sida, indah lebuh sida diukum ketegal enda ngasi. (U-dat. 2:7; 29:5) Kemayaharitu, Iya mega nyediaka utai ke diguna kitai ninting hari. (Mat. 6:31-33; 7:11) Jesus mega ngintu utai ke diguna bala murid iya. (Mat. 14:17-20) Iya mega ngeraika sida. (Mat. 4:24) Ngambika ulih ngelantangka ati Jehovah, tuai bilik enda tau enda nyediaka utai ke diguna diri sebilik iya. Taja pia, iya patut nyeliahka sekeda pekara. Iya enda kelalu ngena mayuh awak ba kereja nyentukka iya nadai awak nyediaka utai ke diguna diri sebilik ba pengarap sereta emosi.

17. Nama teladan ke udah ditetapka Jehovah enggau Jesus lebuh ngajar sereta disiplin kitai?

¹⁷ Nyediaka latih. Jehovah ngajar sereta disiplin kitai ketegal Iya deka nulung kitai. (Heb. 12:7-9) Baka Apai iya, Jesus ngajar orang ti dibaruh iya enggau chara bepengerindu. (Jhn. 15:14, 15) Iya meri jaku lalau, tang enggau chara ti nelap. (Mat. 20:24-28) Iya nemu kitai enda sempurna, sereta suah ngereja penyalah.—Mat. 26:41.

18. Nama utai ke patut dikingatka tuai bilik?

¹⁸ Tuai bilik ke neladan Jehovah enggau Jesus deka ingat bini enggau anak iya nya enda sempurna. Iya enda “kasar” enggau sida. (Kol. 3:19) Tang iya nitihka prinsip ke bisi ditulis ba Galatia 6:1, lalu nguji ngubah  sida “enggau chara ti nelap.” Iya mega ingat diri empu enda sempurna. Baka Jesus, iya sedar chara ngajar ti pemadu manah nya ari teladan.—1 Pet. 2:21.

19-20. Lebuh ngaga pemutus, baka ni tuai bilik neladan Jehovah enggau Jesus?

¹⁹ Anang ngaga pemutus ke diri empu. Jehovah ngaga pemutus ke penguntung orang bukai. Ambika chunto, Iya mutuska deka nempa pengidup ukai ke penguntung Diri Empu, tang ngambika kitai ulih gaga ati. Nadai orang mejal Iya meri Anak Iya nyadika tebus ke kitai. Tang Iya ngereja nya laban deka nulung kitai. Jesus mega ngaga pemutus ke penguntung orang bukai. (Rom. 15:3) Ambika chunto, taja pan iya deka belelak, tang iya enda ngereja nya ketegal deka ngajar orang mayuh.—Mrk. 6:31-34.

²⁰ Tuai bilik ti manah nemu, enda senang ngaga pemutus ti manah ke diri sebilik. Iya mega nemu iya patut betanggungjawap ke pemutus nya. Iya enda ngaga pemutus sengapa tauka nitihka asai ati aja. Tang iya nejuka Jehovah ngajar iya. (J-lam. 2:6, 7) Enggau chara nya, iya enda berundingka diri empu, tang iya deka berundingka orang bukai.—Plp. 2:4.

21. Nama deka dikerandauka kitai ba artikel pengudah tu?

²¹ Jehovah udah meri tuai bilik tanggung pengawa ti besai, lalu Iya ngarapka sida bejalaika tanggung pengawa nya enggau manah. Enti laki nitihka teladan Jehovah enggau Jesus, iya ulih nyadi tuai bilik ti manah. Lalu enti bini besaup enggau iya, tu ulih mai pengaga ati ba tikah seduai. Baka ni bini ulih nulung laki iya ke nyadi tuai bilik, lalu nama penanggul ke deka ditapi bini? Ba artikel pengudah tu, kitai deka berandauka tanya nya.