IKPƐYI ƐLĀ Ō KLƆCƐ ƆMƐ 5
“Ohɔ́nyɛtá Ā Wɛ Otrɛ̄yí Kú Ācɛnyīlɔ Dóódu Á”
“Ohɔ́nyɛtá ā wɛ otrɛ̄yí kú ācɛnyīlɔ dóódu á.”—1 UKƆ́R. 11:3.
IJÉ ƆMƐ 12 Great God, Jehovah
ƆDĀ NƐ ALƆ GÁĀ NWU A *
1. Ɔdi lɔfu lɛ abɔ kwu ɔwɛ nɛ ɔcɛnyilɔ lɔfu ya uce mla ɔnyā nu mɛmla ayi nu lɛ a?
ÍKWU ō lɛ, ɔdi nɛ a gbɛla ka ó wɛ ɛyi nu a? Acɛnyilɔ ōhī jɛga lɛ ucolo, amāŋ ɛdɔ apɔlɛ néē ŋma a, kóō lɛ abɔ kwu ɔwɛ néē gē ya uce mla anya uwa mɛmla ayi uwa lɛ a. Ɔyinɛ alɔ nɔnya Yanita nōo lā ipu éwo ku Europe a kahinii: “Ɛga nɛ um lā a, ācɛ kpɔtuce lɔfu lɔfu ku acɛnya i cɛgbá bɛɛka acɛnyilɔ a ŋ, kē klla cika ō má uwa bɛɛka acocɛhɔ a.” Ɔyinɛ alɔ nɔnyilɔ Luke nōo lā ipu United State a kahinii: “Aadā ōhī gē nwu ayi nɔnyilɔ ku uwa ku ɔdā duuma nɛ acɛnya gē ka a i cɛgbá ŋ, ohigbu ɛnyā, acɛnyilɔ i cika ō jahɔ tu ɔdā duuma nɛ acɛnya gē ka a ŋ.” Amáŋ, Ujehofa i kē dɔka ku acɛnyilɔ kéē bēē ya uce mla anyā uwa ɔwɛ ɛgɔɔma ŋ. (Má Umák. 7:13.) Ó lɛ a, ɛgɛnyá nɛ ɔcɛnyilɔ lɔfu nwu ɛgɛ nɛ ó géē wɛ otrɛyi ku apɔlɛ olɔhi a?
2. Ɔdi nɛ otrɛyi ku apɔlɛ cika ō jé a, ɔdi kē ya a?
2 Ɔdaŋ ku ɔcɛnyilɔ dɔka ō wɛ otrɛyi ku apɔlɛ olɔhi, aflɛyi, ó cika ō jé ɔdā nɛ Ujehofa dɔka kóō ya a. Ó klla cɛgbá ō jé ɔdā nōo ya nɛ Ujehofa je íkwu lɛ ācɛ ōhī ikpɛyi ku ācɛ ɔhá, mla ɛgɛ nɛ ó lɔfu ya ɛgbla ku ocabɔ nɛ Ujehofa mla Ujisɔsi le taajɛ a. Ɔdiya nōó cɛgbá ku ɔcɛnyilɔ kóō jé aɔdā nyā a? Ohigbu ku Ujehofa je íkwu ōhī lɛ aotrɛyi ku apɔlɛ, ó kē leyice ku uwa géē bi ɔ le yuklɔ lɔɔlɔhi.—Ulúk. 12:48 aya ɔmpa ku nu.
ƐGƐNYÁ NƐ UJEHOFA GWO APƆLƐ KU NU NŌO YƆ ƆKPANCO MLA ƐCƐ TU LƐ A?
3. Oŋma ɛlā nōo yɔ ipu ɔkpá ku 1 Ācɛ Ukɔ́rīnti 11:3 a, ɛgɛnyá nɛ Ujehofa gwo apɔlɛ ku nu nōo yɔ ɔkpanco mla ɛcɛ tu lɛ a?
3 Jé 1 Ācɛ Ukɔ́rīnti 11:3. Ɛga ku Ubáyíbu nyā kɛla lɛyikwu ɛgɛ nɛ Ujehofa gwo apɔlɛ ku nu nōo yɔ ɔkpanco mɛmla ɛcɛ a tu lɛ a. Abɔɔ anu wɛ otrɛyi a, ó lɛ íkwu nōo fiyɛ duu a. O bu ɔwɛ nɛ ó ya ōmiya ku otrɛyi lɛ a, ó je íkwu ōhī lɛ ācɛ ɔhá, amáŋ é lɛ ohi ō je lɛ ɔ ɔwɛ néē bi íkwu ku uwa lɛ yuklɔ lɛ a. (Uróm 14:10; Āfi. 3:14, 15) Ujehofa lɛ íkwu je lɛ Ujisɔsi ikpɛyi ku ujɔ, amáŋ Ujisɔsi lɛ ohi ō je lɛ Ujehofa ɔwɛ nɛ ó gē ya ɛlā mla alɔ lɛ a. (1 Ukɔ́r. 15:27) Ujehofa je íkwu lɛ ɔba ikpɛyi ku ɔnyā nu mla ayi nu, amáŋ ɔba lɛ ohi ō je lɛ Ujehofa mla Ujisɔsi lɛyikwu ɔwɛ nɛ ó gē ya ɛlā mla ācɛ apɔlɛ ku nu lɛ a.—1 Upít. 3:7.
4. Ɛdɔ íkwu nyá nɛ Ujehofa mla Ujisɔsi lɛ a?
4 Ujehofa wɛ Otrɛyi ku apɔlɛ nōo yɔ ɔkpanco mɛmla ɛcɛ a. Ohigbu ɛnyā, ó lɛ íkwu ō lɛ íne kwaajɛ lɛ ayi nu. Ó klla lɛ íkwu ō ya ɔcɛ duuma nōo ta ō lɛyitaajɛ lɛ aíne a itala. (Ayis. 33:22) Abɔɔ Ujisɔsi wɛ otrɛyi ku ujɔ a, ó lɛ íkwu ō lɛ íne kwaajɛ klla ya ku alɔ lɛyitaajɛ lɛ aíne a duu.—Ugal. 6:2; Ukól. 1:18-20.
5. Ɛdɔ íkwu nyá nɛ otrɛyi ku apɔlɛ nōo wɛ Ɔcɛ O Yɛce Ukraist lɛ a, amáŋ ɔdi wɛ ɛji ku íkwu nɛ ó lɛ a?
5 Bɛɛka Ujehofa mla Ujisɔsi a, otrɛyi ku apɔlɛ nōo wɛ Ɔcɛ O Yɛce Ukraist a, lɛ íkwu ō lɛ íne kwaajɛ lɛ apɔlɛ ku nu. (Uróm 7:2; Āfi. 6:4) Amáŋ, íkwu ku nu lɛ ɛji. Ocabɔ mafu, aíne ku nu cika ō tɛɛma kwu aukɔ́ nōo yɔ ipu ɛlā Ɔwɔico a. (Aíit. 3:5, 6) Otrɛyi ku apɔlɛ i kē lɛ íkwu ō je íne duuma kwaajɛ lɛ ācɛ nōó wɛ ācɛ apɔlɛ ku nu ŋ. (Uróm 14:4) Amáŋ, ɔdaŋ ku ayi nɔnyilɔ mla ayi nɔnya ku nu le jɛ néē ŋma ɔlɛ, é géē gɔbu yɔ i lɛ ojilima ce ɔ, amáŋ ó wɛ anu wɛ otrɛyi ku uwa a gɛ ŋ.—Umát. 19:5.
ƆDIYA NƐ UJEHOFA YA ŌMIYA KU ĀCƐ ŌHĪ KÉĒ LƐ ÍKWU A?
6. Ɔdiya ɛɛ nɛ Ujehofa fu ācɛ ōhī nōo géē wɛ ācɛ ō lɛ íkwu a?
6 Ujehofa fu ācɛ nōo géē wɛ ācɛ ō lɛ íkwu, ohigbu ihɔtu nɛ ó lɛ lɛ apɔlɛ ku nu a. Ó wɛ ɛhi ŋma ɛgiyi nu. Íkwu ya kóō tɔɔtɛ lɛ apɔlɛ ku Ujehofa kóō yuklɔ ipu ɛbɔ mla ɔwɛ okpaakpa. (1 Ukɔ́r. 14:33, 40) Ɔdaŋ ka ó teyi peee lɛyikwu ɔcɛ nōo lɛ íkwu ŋ, igbaji géē yɔ ipu apɔlɛ ku Ujehofa néē klla gáā lɛ eeye ŋ. Ocabɔ mafu, ɔcɛ duuma i gáā jé ɔcɛ nōo cika ō ya ōmiya amoomɛ, mla ɔcɛ nōo cika ō gbɔbu ya ka ōmiya a kóō le ya jila ŋ.
7. Ɔdi nɛ ɔkpá ku Ācɛ Ɛ́fēsɔsi 5:25, 28 ka lɛyikwu ɛgɛ nɛ Ujehofa dɔka ku acɛnyilɔ kóō ya uce mla anya uwa lɛ a?
7 Ɔdaŋ ka ó lɔhi ku acɛnyilɔ kóō lɛ íkwu ipu apɔlɛ, ɔdiya nōó gē ya acɛnya alɛwa ku ɔba uwa gē ya uwa owe nɛhi, klla gē da uwa ɔdā néē cika ō ya a? Ɛnyā lɛ a ohigbu ku acɛnyilɔ alɛwa leyi gwo íne ku Ujehofa lɛyikwu ɛgɛ nɛ apɔlɛ cika ō lā oyeeyi a bonu, gbɔɔ ō yɛce ucolo ku uwa. Amāŋ é lɔfu ya uce mla anya uwa ɔwɛ obɔbi, o ya ɛɛ ku ɔtu kóō he uwa abɔyi uwa. Ocabɔ mafu, ɔba lɔfu gbɔɔ ō da ɔnyā nu ɛyi taajɛ, o ya ɛɛ kóō mafu ka anu cɛgbá fiyɛ a, amāŋ ō mafu lɛ ācɛ ɔhá ku anu wɛ ɔkpani ɔlɛ a. Ó lɔfu gbɛla ku anuɔ i gáā kwu ɔnyā nu abɔfu kóō yihɔtu nu ŋ, amāŋ ó lɔfu ya cɛɛ kóō yufii nu. Ó kē lɔfu bi ufi ɔɔma le ya ku ɔnyā a kóō bēē ya ɔdā duuma nɛ ó dɔka a. * Ó teyi peee ku ɛlá ɛgɛnyā nɛ acɛnyilɔ gē gbo, mla ɔwɛ néē ge ya uce a i lɔhi ŋ duudu. É gē lɛ ojilima ce acɛnya ɛgɛ néē cika ō ya a ŋ, ɔdā néē kéē i ya i kē cɛtɔha mla ɔdā nɛ Ujehofa dɔka a ŋ.—Jé Ācɛ Ɛ́fēsɔsi 5:25, 28.
ƐGƐNYÁ NƐ ƆCƐNYILƆ LƆFU NWU Ō WƐ OTRƐYI KU APƆLƐ OLƆHI A?
8. Ɛgɛnyá nɛ ɔcɛnyilɔ lɔfu nwu ō wɛ otrɛyi ku apɔlɛ olɔhi a?
8 Ɔcɛnyilɔ lɔfu nwu ō wɛ otrɛyi ku apɔlɛ olɔhi, ŋma lɛ ō ya ɛgbla ku Ujehofa mla Ujisɔsi ɔwɛ néē gē bi íkwu ku uwa le yuklɔ lɛ a. Alɔ leyi yɛ uce ō ya ɛpa nɛ Ujehofa mla Ujisɔsi mafu, ku alɔ má ɛgɛ nɛ otrɛyi ku apɔlɛ lɔfu mafu auce ō ya nyā ɛgiyi ɔnyā nu mla ayipɛ ɔlɛ nu lɛ a.
9. Ɛgɛnyá nɛ Ujehofa mafu ka ó wɛ ɔcɛ ō tu iyi nu waajɛ a?
9 Ō tu iyi ɔcɛ waajɛ. Ujehofa jijeeyi nɛhi fiyɛ ɔcɛ duuma ɔhá a, amáŋ, ó kē i jahɔ tu ɛlā nɛ acocɛhɔ ku nu gbɛla lɛyikwu odee kpɔ. (Ohút. 18:23, 24, 32) Ó jɛga lɛ ācɛ nōo yɔ ɛhaajɛ íkwu ku nu a kéē ka ɔdā néē gbɛla a. (1 Aɔ́cɛ́ 22:19-22) Ujehofa jila iyē mɛɛlɛ, amáŋ ó gē leyice ɔdā nōo fiyɛ alɔ ɔfu a ŋma ɛgiyi alɔ ŋ. Ikɔkɔ ɔɔma, ó gē je otabɔ lɛ alɛɛcɛ nōó jila iyē ŋ nōo gē gba ɔ ɛ̄gbā a, kéē ya lɔhi fiyɛ ipu ɛ̄gbā ō gba ku nu. (Aíjē 113:6, 7) Ku ɛlā ɔkwɛyi a ba, Ubáyíbu kóō da alɔ ku Ujehofa wɛ “ɔ̄cɛ otá alɔ abɔ̄” a. (Aíjē 27:9; Uhíb. 13:6) Udefidi nōo wɛ ɔcɛ́ a ka ka ó tɔɔtɛ lɛ ɔ ō yuklɔ nɛhi nɛ ó ya a, ohigbu ku Ujehofa tu iyi nu waajɛ klla je otabɔ lɛ ɔ.—2 Usám. 22:36.
10. Ɛgɛnyá nɛ Ujisɔsi mafu ka ó wɛ ɔcɛ ō tu iyi nu waajɛ a?
10 Leyi yɛ ocabɔ mafu ku Ujisɔsi. Naana nɛ ó wɛ Ondu mla Itica ku ayikpo ku nu a, ó lɛ ikpo ku uwa na. Ɔdiya nɛ Ujehofa jɛga kéē lɛ ɔ̄kā nyā ta taajɛ ipu Ubáyíbu a? Ó lɛ afuu ŋ, o ya ɛɛ kóō je ocabɔ mafu nɛ ɛjɛɛji ācɛ géē yɛce, kwu otrɛyi ku apɔlɛ. Ujisɔsi abɔyi nu kahinii: “N lɛ ɔdā ōgbla ɔdā je lɛ aá ɛɛ́, cɛ́ɛ́ ká aá yá ɛ́gɛ́nɛ̄ n yá lɛ aá nyā.” (Ujɔ́n. 13:12-17) Naanɛ nɛ ó lɛ íkwu nɛhi a, Ujisɔsi i leyice ku ācɛ ɔhá géē ce ɔ ɛhɔ ŋ. Ikɔkɔ ɔɔma, anu a ce ācɛ ɔhá ɛhɔ a.—Umát. 20:28.
Otrɛyi ku apɔlɛ lɔfu mafu ka ó wɛ ɔcɛ ō tu iyi nu waajɛ klla lɛ ihɔtu, ŋma lɛ ō yuklɔ ɔlɛ mla ō ya ku apɔlɛ ku nu kéē lɛ ɛma olɔhi mla Ujehofa (Má ogwotu ɔmɛ 11, 13)
11. Ɔdi nɛ otrɛyi ku apɔlɛ lɔfu nwu lɛyikwu ō tu iyi ɔcɛ waajɛ ŋma ocabɔ nɛ Ujehofa mla Ujisɔsi le taajɛ a?
11 Aɛlā nɛ alɔ nwu a. Ɔdaŋ ku otrɛyi ku apɔlɛ wɛ ɔcɛ ō tu iyi nu waajɛ, ó géē má ɔ fu ɔwɛ alɛwa. Ocabɔ mafu, ó gáā leyice ku ɔnyā nu mla ayipɛ ɔlɛ nu géē ya ɔdā okpaakpa eko doodu ŋ. Ó gē jahɔ tu ɛlá ō gbo ku apɔlɛ ku nu, naana néē kóō cɛtɔha mla aku nu ŋ ma. Marley nōo lā ipu United State a kahinii: “Ekoohi, ami mla ɔba um gē lɛyi má ɛlā ɔwɛ ɛyɛɛyɛyi. Amáŋ n jé ku um cɛgbá lɛ ɔ, ó klla gē lɛ ojilima cɛ um, ohigbu ka ó gē da um ɔka ɔdā nɛ um gbɛla lɛyikwu odee, klla gē gbɛla tu ɔ lɔɔlɔhi gbɔbu ɛɛ kóō ya ōmiya duuma.” Ō ka tu ɔ, ɔba nōo wɛ ɔcɛ ō tu iyi nu waajɛ a, géē tutu ō yuklɔ ɔlɛ, ɔdaŋ ku ɔwɛ ɛga nɛ ó lā a ācɛ kóō gbɛla ku uklɔ ɔɔma wɛ uklɔ ku acɛnya. Ɔɔma lɔfu lɔnɔ nɛhi. Ɔdiya a? Ɔyinɛ alɔ nɔnya Rachel kahinii: “Ɛga nɛ um ŋma a, ɔdaŋ ku ɔba ta ɔnyā abɔ lɛ ogo na amāŋ lɛ ɔlɛ tu yeŋee, aoladogbe mla aɔmaapu nu géē gbɛla ka ó wɛ anu wɛ ‘ɔkpani ɔlɛ’ a ŋ. É lɔfu gbɛla ka ó lɛ íkwu ō da ɔnyā nu ɔdā nɛ ó cika ō ya a ŋ.” Ɔdaŋ ku ācɛ alɛwa gē gbɛla ɔwɛ ɛgɔɔma ɛga nɛ a lā a, bla ku Ujisɔsi lɛ ikpo ku ayikpo ku nu na, naana nɛ ācɛ gē leyi má ɛdɔ uklɔ ɔɔma ka ó wɛ uklɔ ku aɔfiyɛ a. Otrɛyi ku apɔlɛ olɔhi i gáā dɔka ō ya ku ācɛ ɔhá kéē gbɛla ka ó lɔfu amāŋ cɛgbá nɛhi ŋ. Amáŋ, ó géē dɔka ō ya ku ɔtu kóō he ɔnyā nu mla ayipɛ ɔlɛ nu. Ó wɛ ō tu iyi ɔcɛ waajɛ wɛ uce nɛ otrɛyi ku apɔlɛ olɔhi cika ō lɛ foofunu a ŋ. Ó lɛ a, uce ō ya nyá cɛgbá kpɔ a?
12. Ɔdi nɛ ihɔtu gē lɛ abɔ kwu Ujehofa mla Ujisɔsi ɔtu kéē ya a?
12 Ihɔtu. Ihɔtu nɛ Ujehofa lɛ a gē lɛ abɔ kwu ɔ ɔtu kóō ya ɛjɛɛji ɔdā nɛ ó gē ya a. (1 Ujɔ́n. 4:7, 8) Ó mafu ka ó yihɔtu alɔ klla dɔka ku alɔ wɛ oklobiya ku nu, ŋma lɛ ō je ɛlā ku nu nōo wɛ Ubáyíbu mla ɔwa ku nu lɛ alɔ. Ó gē ta alɔ abɔ ku alɔ má ka anuɔ lɛ ɛlá wu alɔ, ŋma lɛ ō ta alɔ ɔtu kwu ɔtu ka anuɔ yihɔtu alɔ. Aɔdā agbenu nōo kē ce alɔ ɛgbá a bɛ? Ujehofa “gē je ɔdā dóódu lɛ alɔ āa.” (1 Utím. 6:17) Ɔdaŋ ku alɔ lɛ inyileyi ya, ó gē na alɔ tu ɔwɛ, amáŋ ó gáā lɛ abɔ ci ō yihɔtu alɔ ŋ. Oŋma ipu ihɔtu, Ujehofa lɛ ōmiya ya kóō lɛ alɔ fla ŋma íne obiya. Ujisɔsi kē yihɔtu alɔ nɛhi, nɛ ó kwu oyeeyi ku nu u gwɛɛya ohigbu alɔ. (Ujɔ́n. 3:16; 15:13) Ɔdā duuma i gáā ci Ujehofa mla Ujisɔsi ŋma ō yihɔtu ācɛ nōo hayi kpaakpa lɛ uwa a ŋ.—Ujɔ́n. 13:1; Uróm 8:35, 38, 39.
13. Ɔdiya nōó cɛgbá ku otrɛyi ku apɔlɛ kóō mafu ihɔtu lɛ apɔlɛ ku nu a? (Má ikpati nōo kahinii: “ Ɛgɛnyá Nɛ Ɔcɛnyilɔ Nōo Lɛ Ɔnyā Ɛyipɛ Lɔfu Ya Ku Ɔnyā Nu Kóō Lɛ Ojilima Cɛ Ɔ A?”)
13 Aɛlā nɛ alɔ nwu a. Ihɔtu nɛ otrɛyi ku apɔlɛ lɛ a cika ō gbo ɛjɛɛji ɔdā nɛ ó gē ya a. Ɔdiya nɛ ɔɔma cɛgbá a? Ujɔni ta ohi kahinii: “Ɔ̄cɛ dúúma nɛ̄ ó ī yíihɔtū tū ɔyinɛ́ nū [amāŋ ācɛ apɔlɛ], nōó gē má eyī ā ŋ́, ó gáā lɔfú yíihɔtū tū Ɔwɔicō nōó má eyī ɛ́ɛ́ ŋ́ mā glá ŋ́.” (1 Ujɔ́n. 4:11, 20) Ɔcɛnyilɔ nōo yihɔtu apɔlɛ ku nu nōo klla dɔka ō gbla Ujehofa mla Ujisɔsi ya, géē ta apɔlɛ ku nu abɔ kéē lɛ ɛma olɔhi mɛmla Ujehofa, géē ya kéē lɛ ogbotu, klla géē ya aɔdā nōo ce uwa ɛgbá a. (1 Utím. 5:8) Ó géē nwu ayipɛ ɔlɛ nu ɛlā klla géē na uwa tu ɔwɛ okpaakpa. Ó klla géē bēē nwu ō ya ōmiya nōo géē bi owoofu gē lɛ Ujehofa, nɛ apɔlɛ ku nu klla géē lɛ itene ŋma anu. Alɔ géē kɛla lɛyikwu eyeeye ku aɔdā nyā babanya, cɛɛ ku alɔ má ɛgɛ nɛ otrɛyi ku apɔlɛ lɔfu gbla Ujehofa mla Ujisɔsi ya a.
ƆDĀ NƐ OTRƐYI KU APƆLƐ CIKA Ō YA A
14. Ɛgɛnyá nɛ otrɛyi ku apɔlɛ lɔfu ya ku apɔlɛ ku nu kéē tubla Ujehofa ajaajɛ a?
14 Ō ya ku ācɛ apɔlɛ ku nu kéē lɛ ɛma olɔhi mla Ujehofa. Ujisɔsi mafu ka ó lɛbɛɛka Adā nu a, ohigbu ka ó ta ācɛ nōo gē yɛce ɔ abɔ kéē lɛ abɔ bi ɔtu okpoce olɔfu ku uwa. (Umát. 5:3, 6; Umák. 6:34) Ɛgɔɔma duu, ɔdā nōo ce otrɛyi ku apɔlɛ ɛgbá fiyɛ duu a, wɛ ō ta apɔlɛ ku nu abɔ kéē tubla Ujehofa ajaajɛ. (Obla. 6:6-9) Ó lɔfu ya ɛnyā ŋma lɛ ō ya ɛjɛɛji ɔdā nɛ ó ya gla, o ya ɛɛ ku anu mla apɔlɛ ku nu kéē bēē jé klla gē ya oklɔcɛ ku ɛlā Ɔwɔico, bēē gā ōjila ku ujɔ, bēē tɔɔna ku ɔkoolɔhi, mɛmla ō gáā wɛ ɛnɛɛnɛ ɔya ku Ujehofa, klla wɛ ɔya ku nu piyoo.
15. Ɛgɛnyá nɛ otrɛyi ku apɔlɛ lɔfu ta apɔlɛ ku nu abɔ kéē jé ka ó lɛ ɛlá wu uwa nɛhi a?
15 Ō mafu ka ó lɛ ɛlá wu ācɛ apɔlɛ ku nu. Ujehofa da Ujisɔsi ka ó yihɔtu nu ipeyi ācɛ ɔhá. (Umát. 3:17) Igbalɛwa, Ujisɔsi gē mafu ka ó yihɔtu ācɛ nōo gē yɛce ɔ a, ŋma lɛ ɔdā nɛ ó gē ya mla ō ka a. Ācɛ nōo gē yɛce ɔ a klla da ɔ kē yihɔtu ku nu duu. (Ujɔ́n. 15:9, 12, 13; 21:16) Otrɛyi ku apɔlɛ lɔfu mafu lɛ ɔnyā nu mla ayipɛ ɔlɛ nu ka ó yihɔtu uwa, ŋma lɛ ɔdā nɛ ó gē ya a, bɛɛka ō klɔcɛ ku Ubáyíbu mla uwa. Ó klla cika ō da uwa ka ó yihɔtu uwa, ku uwa klla cɛgbá lɛ ɔ. Eko duuma nōó cika, ó cika ō cɛtra uwa ipeyi ācɛ ɔhá.—Aíit. 31:28, 29.
Otrɛyi ku apɔlɛ cika ō ya ɛgbá ku apɔlɛ ku nu lɛ uwa o ya ɛɛ ku ɔtu kóō he Ujehofa (Má ogwotu ɔmɛ 16)
16. Ɔdā ɔhá nyá nɛ otrɛyi ku apɔlɛ cika ō ya a, ɔdi nɛ ó kē cika ō lɛ abɔ ci ɔ a?
16 Ō ya aɔdā nōo cɛgbá lɛ apɔlɛ ku nu a lɛ uwa. Ujehofa ya ku ācɛ Isrɛlu a kéē lɛ aɔdā nōo ce uwa ɛgbá, naana néē gē miyɛ itala ku ikpɛyi olɔfu néē gē ya a. (Obla. 2:7; 29:5) Ó gē je aɔdā nɛ alɔ cɛgbá a lɛ alɔ icɛ duu. (Umát. 6:31-33; 7:11) Ujisɔsi abɔyi nu klla je ɔdole lɛ ācɛ nōo yɛce a duu. (Umát. 14:17-20) Ó nya ācɛ alɛwa nōo yɔ i doōcē a ta. (Umát. 4:24) O ya ɛɛ ku ɔtu ku he Ujehofa a, otrɛyi ku apɔlɛ cika ō je aɔdā nɛ apɔlɛ ku nu cɛgbá a lɛ uwa. Amáŋ, ó lɛ odee nɛ ó cika ō lɛ abɔ ci ɔ. Ó cika ō ya ku uklɔ ō ya eko doodu kóō ci ɔ ŋma ō ya ɛgbá ku ɛlā Ɔwɔico ku apɔlɛ ku nu, mla ō mafu ka ó lɛ ɛlá wu uwa ŋ.
17. Ɛgɛnyá nɛ Ujehofa mla Ujisɔsi gē nwu alɔ ɛlā klla gē ya alɔ itala a?
17 Má ɔwɛ fu ku a klla tu apɔlɛ ku uwɔ ukɔ́ ipu ihɔtu. Ujehofa gē nwu alɔ ɛlā klla gē ya alɔ itala, ohigbu ka ó dɔka ō ta alɔ abɔ. (Uhíb. 12:7-9) Bɛɛka Adā nu a, Ujisɔsi gē nwu ācɛ nōo yɔ ɛhaajɛ íkwu ku nu a ɛlā ɔwɛ ihɔtu. (Ujɔ́n. 15:14, 15) Ujisɔsi gē tu ukɔ́ lɔfu lɔfu, amáŋ ó gē ya ɔ ɔwɛ ogbonɛnɛ. (Umát. 20:24-28) Ó jé ku alɔ i jila iyē ŋ, ku igbalɛwa, alɔ gē nyileyi.—Umát. 26:41.
18. Ɔdi nɛ otrɛyi ku apɔlɛ cika ō bla kwu ɔ a?
18 Otrɛyi ku apɔlɛ nōo gē ya ɛgbla ku Ujehofa mla Ujisɔsi cika ō bla, ku ɔnyā nu mla ayipɛ ɔlɛ nu i jila iyē ŋ. Ó klla cika ō “lɔnɔɔtū” lɛ ɔnyā nu mla ayipɛ ɔlɛ nu ŋ. (Ukól. 3:19) Ikɔkɔ ɔɔma, ó géē bi ukɔ́ nōo yɔ ipu ɔkpá ku Ācɛ Ugalésīya 6:1 a yuklɔ, o ya ɛɛ cɛɛ kóō na uwa tu ɔwɛ ipu “ɔtū ogbonɛnɛ,” ohigbu ka ó jé ku anu abɔyi nu i jila iyē ŋ. Bɛɛka Ujisɔsi, ó jé ku ɔwɛ olɔhi fiyɛ duu ō bi le nwu ɛlā a, wɛ o bu ipu ocabɔ olɔhi ku nu nɛ.—1 Upít. 2:21.
19-20. Eko duuma nɛ otrɛyi ku apɔlɛ lɛ ōmiya ya, ɛgɛnyá nɛ ó lɔfu gbla Ujehofa mla Ujisɔsi ya a?
19 Ō ya ōmiya nōo mafu ka ó bi ācɛ ɔhá ɔtu. Ujehofa gē ya ōmiya nōo géē lɔhi lɛ ācɛ ɔhá. Ocabɔ mafu, ó le miya ō ya oyeeyi, ó wɛ ohigbu itene ku nu nóó, amáŋ ohigbu ka ó dɔka ku alɔ jɔɔnyɛ oyeeyi nɛ. Ó wɛ ɔcɛ duuma kwu Ujehofa abɔfu kóō ta Ɔyinɔnyilɔ ku nu ɛhɔ kóō gáā kwū ohigbu íne ō biya ku alɔ a ŋ. Ó ya ōmiya ɔɔma ohigbu ka ó dɔka ō ta alɔ abɔ. Ujisɔsi klla ya ōmiya nōo ta ācɛ ɔhá abɔ duu. (Uróm 15:3) Ocabɔ mafu, eko nɛ ɛ̄jɛ̄ le jɛ ɔ nɛhi a, ó nwu ɛwa nɛhi ku ācɛ ɛlā, ikɔkɔ nɛ ó géē yɔ i mlɛnyɔ a.—Umák. 6:31-34.
20 Otrɛyi ku apɔlɛ olɔhi jé ku ɔdā éyi nōo lɔnɔ fiyɛ duu nɛ ó cika ō ya a, wɛ ō ya ōmiya ijeeyi lɛ apɔlɛ ku nu, uklɔ ɔɔma kē cɛgbá lɛ ɔ nɛɛnɛhi. Ó cika ō bēē ya ōmiya nōó lɛyi amāŋ nōo gbolo ce ɛgɛ nɛ ɔtu yɔ i ya ɔ ɔkwɔɔkwu ɔɔma a ŋ. Ikɔkɔ ɔɔma, ó géē jɛga lɛ Ujehofa kóō nwu ɔ ɛgɛ nɛ ó géē jé ō ya ōmiya olɔhi a. * (Aíit. 2:6, 7) Ɛnyā géē ya ka ó gbɛla ɔwɛ nɛ ó géē ya ɔdā nōo géē tiile lɛ ācɛ ɔhá, ó wɛ anu abɔyi nu ŋ.—Ufíl. 2:4.
21. Ɔdi nɛ alɔ gáā kɛla lɛyikwu ɔ ipu ikpɛyi ɛlā nōo gbɔce ɛnyā a?
21 Ujehofa je uklɔ olɔnɔ lɛ aotrɛyi ku apɔlɛ. Ó kē leyice ku uwa géē yuklɔ nɛ ó je lɛ uwa a lɔɔlɔhi. Amáŋ ɔdaŋ ku ɔba ceyitikwu kóō yɛce ocabɔ nɛ Ujehofa mla Ujisɔsi le taajɛ a, ó géē wɛ otrɛyi ku apɔlɛ olɔhi. Ɔdaŋ ku ɔnyā kē lɛ uklɔ nɛ ó lɛ ipu apɔlɛ a ya, eeye géē yɔ ipu obatɔha ku uwa. Ɛgɛnyá nɛ ɔnyā cika ō leyi má uklɔ nɛ ɔba nu lɛ ō wɛ otrɛyi ku apɔlɛ a, unwalu nyá nɛ ó kē lɔfu lɛ a? Ikpɛyi ɛlā nōo gboce ɛnyā a, géē cila ohi ku aɔka nyā.
IJÉ ƆMƐ 16 Praise Jah for His Son, the Anointed
^ par. 5 Ɔdaŋ ku ɔcɛnyilɔ lɛ ɔnyā lɛ, ó kwu piya otrɛyi ku apɔlɛ ɛyipɛ. Ipu ikpɛyi ɛlā nyā, alɔ géē kɛla lɛyikwu ɛdɔ íkwu nɛ Ujehofa je lɛ ācɛ ɔhá, ɔdā nōo ya nɛ Ujehofa ya ɔɔma, mla ɔdā nɛ acɛnyilɔ lɔfu nwu ŋma ocabɔ mafu nɛ Ujehofa mla Ujisɔsi le taajɛ a. Ipu ikpɛyi ɛlā nōo gboce ɛnyā a, alɔ géē leyi yɛ ɔdā nɛ ɔba mla ɔnyā lɔfu nwu ŋma ɛgiyi Ujisɔsi, mla aocabɔ ɔhá nōo yɔ ipu Ubáyíbu a. Ipu ikpɛyi ɛlā ɔmɛta a, alɔ géē kɛla lɛyikwu ɛgɛ nɛ ayinɛ nɔnyilɔ cika ō bi íkwu yuklɔ ipu ujɔ a.
^ par. 7 Ekoohi aufilm, aɔ̄kā mla aōmiya ipu TV nōo gē ta ācɛ ɛhɛ a, gē mafu ɛgɛ nɛ ɔba gē ya ɛlā mla ɔnyā nu ɛgɛ duuma nōo he ɔ ɔtu, mla ō yɔ i ŋmo ɔ ije. Ɛnyā ya ɛɛ nɛ ācɛ alɛwa gē gbɛla ka ó wɛ ɔdobɔbi ku acɛnyilɔ kéē ya ɛlā mla anya uwa ɛgɛ duuma nōo he uwa ɔtu a ŋ.
^ par. 20 O ya ɛɛ ku a nwu ɛlā fiyɛ lɛyikwu ɛgɛ nɛ a lɔfu ya ōmiya olɔhi a, má ikpɛyi ɛlā nōo kahinii: “Make Decisions That Honor God,” nōo bɛɛcɛ ipu Ɔda Ō Gbaajɛ ku Ɔya Ɔmɛnɛ 15 ku 2011, aku oyibo upeji ɔmɛ 13-17 a.
