1. Ɛbɛ pɩzɩɣ nɛ pɩwɛɛnɩ ɖoŋ wɛtʋ ndʋ abalʋ nɔɔyʋ wɛɣnɩ ɛ-halʋ nɛ e-piya yɔɔ yɔ tɩ-yɔɔ?

ŊMAƔZƖƔ se tɔm piye “ñʋʋdʋ” tɔbʋʋ lɛ suwe? Abalaa nabɛyɛ yeki nɛ sɔnzɩ, yaa ɛzɩma paafalɩsɩ-wɛ nɛ pɩɖɛɛ yɔ, pɩwɛɣnɩ ɖoŋ wɛtʋ ndʋ pɛwɛnɩ pa-halaa nɛ pe-piya yɔɔ yɔ tɩ-yɔɔ. Yanita wɛ Erɔɔpɩ, na tɔm ndʋ ɛyɔɔdaa yɔ. Ɛyɔɔdaa se: “Ðenɖe mɛwɛɛ yɔ, ɛyaa maɣzɩɣ kpem se halaa tɩlɩɩ nabʋyʋ abalaa ɛsɩndaa nɛ pʋyɔɔ lɛ, pɩwɛɛ se pɛkɛnɩ abalaa yomaa.” Payaɣ koobu nɔɔyʋ se Luke, ɛwɛ Etaazuunii. Ɛyɔɔdaa se: “Cajanaa nabɛyɛ wɩlɩɣ pa-pɩyalaa se tɔm ndʋ halaa yɔɔdʋʋ yɔ, tɩfɛyɩnɩ wazaɣ nakɛyɛ nɛ pɩtɩcɛyɩ se abalaa iwelisini-wɛ.” Ɛlɛ, pɩtɩkɛ mbʋ Yehowa sɔɔlaa se abalaa ɩlabɩnɩ tʋmɩyɛ ñʋʋdʋ waɖɛ nɖɩ ɛha-wɛ yɔ. (Kpaɣ-tʋ nɛ ŋmaɣzɩnɩ Maarkɩ 7:13.) Ye mbʋ, ɛbɛ abalʋ pɩzɩɣ ɛla nɛ ɛkɛ hɔʋ ñʋʋdʋ kɩbanʋ?

2. Tɔm ndʋ pɩcɛyaa se hɔʋ ñʋʋdʋ ɛtɩlɩ, nɛ ɛbɛ yɔɔ?

² Pɩsa nɛ abalʋ nɔɔyʋ kɛnɩ hɔʋ ñʋʋdʋ kɩbanʋ lɛ, kajalaɣ lɛ pɩwɛɛ se ɛtɩlɩ mbʋ Yehowa sɔɔlaa se ɛla yɔ. Pɩcɛyaa ɖɔɖɔ se ɛtɩlɩ mbʋ pʋyɔɔ Yehowa labɩ ɖʋtʋ se ɛyaa nabɛyɛ ɩkɛnɩ ñʋndɩnaa yɔ, nɛ ɛzɩma ɛpɩzɩɣ nɛ ɛmaɣzɩnɩ Yehowa nɛ Yesu yɔ. Ɛbɛ yɔɔ pɩcɛyaa se abalʋ ɛtɩlɩ pɩtɩŋa payɩ mbʋ yɔ? Pɩcɛyaa se ɛtɩlɩ tɔm ndʋ mbʋ pʋyɔɔ yɔ, Yehowa ha hɔŋ ñʋndɩnaa ɖoŋ nɩɩyɩ nɛ ɛsɔɔlaa se palabɩnɩ-ɩ tʋmɩyɛ camɩyɛ.—Luka 12:48b.

3. Ɛbɛ ɖɩkpɛlɩkɩɣ tɔm ndʋ Bibl yɔɔdɩ 1 Kɔrɛntɩ mba 11:3 taa yɔ, tɩ-taa?

³ Kalɩ 1 Kɔrɛntɩ mba 11:3. Yehowa labɩ ɛ-hɔʋ ŋgʋ kɩwɛ ɛsɔdaa nɛ tataa yɔ kɩ-taa ɖʋtʋ natʋyʋ. Nɛ ɖʋtʋ ndʋ tɩ-tɔm mayaɣ kanɛ kɔyɔɔdʋʋ. Yehowa kɛnɩ “ñʋʋdʋ” nɛ pʋyɔɔ lɛ, ɛwɛnɩ ɖoŋ pɩtɩŋa pɩ-yɔɔ. Ɛtɩŋnɩ ɖʋtʋ ndʋ ɛlaba se nabɛyɛ ɩkɛ ñʋndɩnaa yɔ tɩ-yɔɔ nɛ ɛha-wɛ ɖoŋ nɩɩyɩ lalaa yɔɔ; ɛlɛ pakaɣ-ɩ labʋ akɔnta  ɛzɩma palakɩnɩ tʋmɩyɛ ɖoŋ ɛnɩ yɔ pɩ-yɔɔ. (Roma 14:10; Efɛz. 3:14, 15) Yehowa ha Yesu ɖoŋ ɛgbɛyɛ yɔɔ, ɛlɛ ɛzɩma Yesu lakɩnɩ tʋmɩyɛ ɖoŋ ɛnɩ ɖɔ-yɔɔ yɔ, ɛkaɣ Yehowa labʋ akɔnta pɩ-yɔɔ. (1 Kɔr. 15:27) Yehowa ha ɖɔɖɔ walʋ ɖoŋ ɛ-halʋ nɛ e-piya pɔ-yɔɔ, ɛlɛ ɛzɩma ɛlakɩnɩ e-ɖoŋ ɛnɩ tʋmɩyɛ ɛ-hɔʋ taa yɔ, ɛkaɣ Yehowa nɛ Yesu labʋ akɔnta pɩ-yɔɔ.—1 Pɩy. 3:7.

4. Waɖɛ nɖɩ Yehowa nɛ Yesu pɛwɛna?

⁴ Yehowa kɛnɩ kedeŋa kpeekpe hɔʋ Ñʋʋdʋ; pʋyɔɔ lɛ, ɛwɛnɩ waɖɛ se ɛɖʋ e-piya paɣtʋ pɩlɩɩnɩ ɛzɩma pɩpɔzʋʋ se sɩcaɣ wezuu yɔ pɩ-yɔɔ, nɛ ɛwɛnɩ waɖɛ ɖɔɖɔ se ɛla nɛ sɩña ɛ-paɣtʋ. (Iza. 33:22) Yesu kɛnɩ Krɩstʋ ɛgbɛyɛ ñʋʋdʋ nɛ ɛwɛnɩ waɖɛ ɖɔɖɔ se ɛɖʋ paɣtʋ nɛ ɛla nɛ pañam-tʋ.—Gal. 6:2; Kol. 1:18-20.

5. (a) Waɖɛ nɖɩ paa Krɩstʋ mba hɔʋ ñʋʋdʋ weyi lɛ ɛwɛna? (b) Ɛlɛ le waɖɛ nɖɩ ɖɩsɩnaa?

⁵ Ɛzɩ Yehowa nɛ Yesu yɔ, paa Krɩstʋ mba hɔʋ ñʋʋdʋ weyi lɛ, ɛwɛnɩ waɖɛ ɖɔɖɔ se ɛkpaɣ lɩmaɣza ɛ-hɔʋ taa. (Roma 7:2; Efɛz. 6:4) Ɛlɛ, waɖɛ nɖɩ ɖɩwɛnɩ kamaɣ. Pɩpɔzʋʋ se lɩmaɣza wena ɛkpakɩɣ yɔ, ala nɔɔ kʋɖʋmaɣ nɛ paɣtʋ kila wena awɛ Ɛsɔtɔm taa yɔ. (Adu. 3:5, 6) Nɛ hɔʋ ñʋʋdʋ nɔɔyʋ fɛyɩnɩ waɖɛ se ɛɖʋ paɣtʋ ɛyaa mba pɛfɛyɩ ɛ-hɔʋ taa yɔ. (Roma 14:4) Pɩtasɩ lɛ, alɩwaatʋ ndʋ ɛ-pɩyalaa yaa ɛ-pɛlaa paɣlɩɣ nɛ palɩɩ ɖɩɣa lɛ, powoki pɩ-yɔɔ nɛ pañaŋɩ-ɩ, ɛlɛ ɛtɩtasɩ kɛʋ pa-ñʋʋdʋ.—Mat. 19:5.

6. Ɛbɛ yɔɔ Yehowa labɩ ɖʋtʋ se nabɛyɛ ɩkɛ ñʋndɩnaa?

⁶ Yehowa labɩ ɖʋtʋ se nabɛyɛ ɩkɛ ñʋndɩnaa mbʋ pʋyɔɔ yɔ, ɛsɔɔlɩ ɛ-hɔʋ. Pɩkɛnɩ kʋjɔʋ ŋgʋ kɩlɩnɩ ɛ-cɔlɔ yɔ. Ðʋtʋ ndʋ, tiyeki se Yehowa hɔʋ taa ñɩma ɩla tʋmɩyɛ laŋhɛzɩyɛ taa nɛ pɩtɩŋa pʋtʋʋzɩ cɔlɩɩɩ. (1 Kɔr. 14:33, 40) Ye ñʋndɩnaa ɩtaawɛɛ Yehowa hɔʋ taa yɔ, wondu kaasidi kɩ-taa yem yem nɛ kɩwɛɛ laŋwɛɛkɩyɛ taa. Kɩɖaʋ nakʋyʋ yɔ: Nɔɔyʋ taapɩzɩɣ se ɛtɩlɩ weyi pɩwɛɛ se ɛkpaɣ kɛdɛzaɣ lɩmaɣzɩyɛ yɔ, nɛ weyi pɩwɛɛ se ɛɖɛɛ nɔɔ nɛ eyele nɛ palabɩnɩ tʋmɩyɛ lɩmaɣzɩyɛ nɖɩ yɔ.

7. Ɛzɩ Efɛɛzɩ mba 5:25, 28 yɔɔdʋʋ yɔ, Yehowa sɔɔlaa se abalaa ɩtɔɔ kewiyitu pa-halaa yɔɔ?

⁷ Ye ɖʋtʋ ndʋ Yehowa laba se nabɛyɛ ɩkɛ ñʋndɩnaa yɔ, tɩwɛ ɖeu yɔ, ɛbɛ yɔɔ halaa sakɩyɛ maɣzɩɣ se pa-walaa nazɩɣ-wɛ nɛ pɔtɔkɩ kewiyitu pɔ-yɔɔ? Mbʋ pʋyɔɔ yɔ, abalaa sakɩyɛ ɩɩɖɔŋ paɣtʋ ndʋ Yehowa ɖʋ hɔŋ yɔ tɩ-yɔɔ, nɛ palɩzɩɣ se pɔɖɔŋ pe-egeetiye taa sɔnzɩ yɔɔ. Pɩtasɩ lɛ, pɩtɩla palakɩ pa-halaa mbʋ pɩfɛyɩ ɖeu yɔ se panɩɩ leleŋ nɩɩyɩ. Abalʋ nɔɔyʋ pɩzɩɣ nɛ ɛtɔkɩ kewiyitu ɛ-halʋ yɔɔ se pɩsa nɛ ɛlɛ ñamɩ-ɩ yaa ɛwɩlɩ lalaa se ɛtɩkɛ ɛjam. Ɛpɩzɩɣ nɛ ɛmaɣzɩ se ɛɛpɩzɩɣ nɛ ɛñɩɣ ɛ-halʋ yɔɔ se ɛsɔɔlɩ-ɩ, ɛlɛ ɛpɩzɩɣ ɛla nɛ ɛlɛ se-i sɔɔndʋ. Nɛ ɛpɩzɩɣ nɛ ɛtɩŋnɩ nʋmɔʋ ŋgʋ kɩ-yɔɔ nɛ ɛtɔɔ kewiyitu ɛ-halʋ yɔɔ. * Abalaa mba pɛwɛnɩ lɩmaɣza ana nɛ palakɩ mbʋ yɔ, paaɖʋʋ halaa hɩɖɛ nɛ paañaŋ-wɛ ɛzɩ pɩpɔzʋʋ yɔ; nɛ pɛ-wɛtʋ ndʋ tɩkaɖɩɣnɩ Yehowa sɔɔlɩm.—Kalɩ Efɛɛzɩ mba 5:25, 28.

8. Ɛbɛ abalʋ pɩzɩɣ ɛla nɛ ɛkɛ hɔʋ ñʋʋdʋ kɩbanʋ?

⁸ Ye abalʋ ɛmaɣzɩɣnɩ ɛzɩma Yehowa nɛ Yesu palakɩnɩ tʋmɩyɛ po-ɖoŋ yɔ, ɛpɩzɩɣ nɛ ɛkɛ hɔʋ ñʋʋdʋ kɩbanʋ. Iyele nɛ ɖɩna wɛtʋ kɩbandʋ naalɛ ndʋ Yehowa nɛ Yesu pawɩlaa yɔ, nɛ ɖɩna ɛzɩma hɔʋ ñʋʋdʋ pɩzɩɣ nɛ ɛwɛɛnɩ wɛtʋ ndʋ ɛ-halʋ nɛ e-piya pɔ-yɔɔ yɔ.

9. Ɛzɩma Yehowa wɩlɩɣ se ɛwɛnɩ tɩ luzuu?

⁹ Tɩ luzuu. Yehowa kɛnɩ Ɛyʋ weyi ɛkpaɖɩ lɔŋ kedeŋa kpeekpe yɔɔ yɔ. Paa mbʋ yɔ,  ewelisiɣ ɛ-sɛyaa lɩmaɣza. (Kiɖe 18:23, 24, 32) Ɛhaɣ waɖɛ mba ɛkɛ pa-ñʋʋdʋ yɔ se pɔyɔɔdɩ pa-lɩmaɣza. (1 Aw. 22:19-22) Yehowa talɩ pilim, paa mbʋ yɔ ɛɛɖaŋɩɣ se ɖɩla mbʋ pɩtalɩ pilim yɔ. Ɛlɛ, ɛsɩɣnɩ ɛyaa mantɩtalɩ pilimwaa mba pɛsɛɣ-ɩ yɔ se piɖeni-wɛ. (Keɣa 112:6, 7) Halɩ Bibl yɔɔdɩ Yehowa tɔm se ɛkɛ “sɩnɩyʋ.” (Keɣa 26:9; Ebr. 13:6) Wiyaʋ Daviid yɔɔdaa se mbʋ pi-ɖeke pɩsɩnɩ-ɩ nɛ ɛla tʋmɩyɛ sɔsɔyɛ nɖɩ ɛlaba yɔ, mbʋ lɛ se Yehowa luzi ɛ-tɩ nɛ ɛsɩnɩ-ɩ.—2 Sam. 22:36.

10. Ɛzɩma Yesu wɩlaa se ɛwɛnɩ tɩ luzuu?

¹⁰ Iyele nɛ ɖɩna Yesu kɩɖaʋ. Paa ɛɛkɛ ɛ-tɔmkpɛlɩkɩyaa Ñʋʋdʋ nɛ pa-Kɩbaɣlʋ yɔ, ɛkɔ pa-nɩŋgbanzɩ lɩm. Lɩmaɣza wena a-yɔɔ Yehowa yeba nɛ pama tɔm ndʋ Bibl taa yɔ, a-taa naɖɩyɛ lɛ nɖɩ? Ɛsɔɔlaa se paa anɩ, pɩkpɛndɩnɩ hɔŋ ñʋndɩnaa ɩmaɣzɩnɩ kɩɖaʋ ŋgʋ. Yesu maɣmaɣ yɔɔdaa se: “Mawɩlɩ-mɩ nʋmɔʋ se ɩla ɖama ɛzɩ malabʋ-mɩ yɔ.” (Yoh. 13:12-17) Paa Yesu kaawɛnɩ lone sɔsɔɖɛ yɔ, etiyele se lalaa ɩɖʋnɩ-ɩ lɩm. Ɛlɛ, ɛnʋ ɖʋnɩ lalaa lɩm.—Mat. 20:28.

11. Ɛbɛ hɔʋ ñʋʋdʋ nɔɔyʋ pɩzɩɣ nɛ ɛkpɛlɩkɩ kɩɖaʋ ŋgʋ Yehowa nɛ Yesu paha tɩ luzuu nʋmɔʋ taa yɔ kɩ-taa?

¹¹ Lɔŋ weyi pɩkpɛlɩkɩɣ-ɖʋ yɔ. Hɔʋ ñʋʋdʋ nɔɔyʋ pɩzɩɣ nɛ ɛwɩlɩ se ɛwɛnɩ tɩ luzuu hɔɔlɩŋ sakɩyɛ taa. Kɩɖaŋ nɩɩyɩ yɔ: Ɛɛɖaŋɩɣ se ɛ-halʋ nɛ e-piya pala mbʋ pɩtalɩ pilim yɔ. Ewelisiɣ ɛ-hɔʋ taa mba lɩmaɣza halɩ pɩkpɛndɩnɩ alɩwaatʋ ndʋ paba iitisiɣ ɛ-ñɩna yɔɔ yɔ. Marley wɛ Etaazuunii ɛjaɖɛ taa, nɛ ɛyɔɔdaa se: “Nabʋyʋ taa, ma nɛ ma-walʋ ɖa-lɩmaɣza wɛ ndɩ ndɩ. Ɛlɛ, manawa se mɔn-tɔm cɛyɩ ɛ-ɛsɩndaa nɛ manawa ɖɔɖɔ se ɛñaŋɩ-m mbʋ pʋyɔɔ yɔ, ɛpɔzʋʋ ma-lɩmaɣza nɛ meheyiɣ-i yɛ lɛ, ɛmaɣzɩɣ a-yɔɔ camɩyɛ pʋcɔ nɛ ɛkpaɣ lɩmaɣzɩyɛ naɖɩyɛ.” Pɩtasɩ lɛ, walʋ weyi eluzuu ɛ-tɩ yɔ, ɛsɔɔlʋʋ faaa se ɛla ɖɩɣa tʋma, paa ɖenɖe ɛwɛɛ yɔ peeɖe ñɩma ɩmaɣzɩɣ se halaa pɩmʋnaa se palabɩ-yɛ yɔ. Pɩ-labʋ pɩzɩɣ nɛ pɩwɛɛ kaɖɛ. Ɛbɛ yɔɔ? Payaɣ koobu halɩñɩnʋ nɔɔyʋ se Rachel; ɛyɔɔdaa se: “Hɔɔlʋʋ ŋgʋ kɩ-taa malɩnaa yɔ, kɩ-taa lɛ ye walʋ nɔɔyʋ ɛsɩɣnɩ ɛ-halʋ se pañalɩ ñanzɩ yaa se pɔñɔɔzɩ ɖɩɣa nɛ kɛwɛɛ cɩɖɩ cɩɖɩ yɔ, ɛ-taabalaa yaa ɛ-hɔʋ taa ñɩma kaɣ maɣzʋʋ se ɛtɩkɛ ‘abalʋ keekee.’ Pakaɣ maɣzʋʋ se ɛ-halʋ ñazɩɣnɩ-ɩ.” Ðenɖe ŋwɛɛ yɔ, ye lɩmaɣza ana peeɖe ñɩma sakɩyɛ ɩwɛna yɔ, tɔzɩ se Yesu kɔ ɛ-tɔmkpɛlɩkɩyaa nɩŋgbanzɩ lɩm, paa lalaa ɩmaɣzaɣ se yom pɩmʋnaa se ɛla mbʋ yɔ. Hɔʋ ñʋʋdʋ kɩbanʋ  ɛɛñakɩ pana se eyele nɛ lalaa maɣzɩ se ɛwɛ ɖoŋ yaa ɛ-tɔm cɛyaa. Ɛlɛ, ɛsɔɔlʋʋ se eyele nɛ ɛ-halʋ nɛ e-piya taa wɛɛ leleŋ. Pɩtasɩnɩ tɩ luzuu lɛ, wɛtʋ ndʋ pɩpɔzʋʋ se hɔʋ ñʋʋdʋ kɩbanʋ ɛñaɣ pana nɛ ɛwɛɛna?

12. Ɛbɛ sɔɔlɩm seɣtiɣ Yehowa nɛ Yesu nɛ palakɩ?

¹² Sɔɔlɩm. Sɔɔlɩm seɣtiɣni Yehowa nɛ ɛlakɩ pɩtɩŋa payɩ. (1 Yoh. 4:7, 8) Ɛtɩŋɩɣnɩ ɛ-Tɔm Bibl nɛ ɛ-ɛgbɛyɛ pɔ-yɔɔ nɛ ɛcɔŋnɩ ɖe-fezuu taa kɩcɛyɩm ɖeɖe nɛ sɔɔlɩm. Ɛwɩlɩɣ se ɛsɔɔlɩ-ɖʋ nɛ ɛcɔŋnɩ ɖɔ-yɔɔ. Nɛ ɖo-tomnaɣ yɔɔ kɩcɛyɩm yɔ? Yehowa “[haɣ-ɖʋ] pɩtɩŋa sakɩyɛ se ɖa-taa ɛlabɩ-pʋ nɛ leleŋ.” (1 Tim. 6:17) Alɩwaatʋ ndʋ ɖɩlakɩ kɩwɛɛkɩm yɔ, ɛsɩɣzɩɣ-ɖʋ lɔŋ, ɛlɛ ewoki pɩ-yɔɔ nɛ ɛsɔɔlʋʋ-ɖʋ. Sɔɔlɩm seɣti Yehowa nɛ ɛla ɖʋtʋ nɛ Yesu kɔɔ nɛ ɛlaa kɩhɛyʋʋ pʋ-ñʋʋ taa kɩlaʋ ɖɔ-yɔɔ. Nɛ Yesu sɔɔlɩ-ɖʋ siŋŋ, pʋyɔɔ ɛla e-wezuu ɖɔ-yɔɔ. (Yoh. 3:16; 15:13) Nabʋyʋ ɛɛpɩzɩɣ nɛ pɩɖɩɣ Yehowa nɛ Yesu nʋmɔʋ se pataasɔɔlɩ mba pɔɖɔkʋʋ pe-siɣsiɣ wɛtʋ pɛ-ɛsɩndaa yɔ.—Yoh. 13:1; Roma 8:35, 38, 39.

13. Ɛbɛ yɔɔ pɩcɛyaa se hɔʋ ñʋʋdʋ ɛwɩlɩ ɛ-hɔʋ sɔɔlɩm? (Kalɩ ɖɔɖɔ aɖakaɣ “ Ɛbɛ abalʋ weyi ɛɖɔkɩ nesi pitileɖi yɔ ɛpɩzɩɣ ɛla nɛ ɛ-halʋ ñamɩ-ɩ?”)

¹³ Lɔŋ weyi pɩkpɛlɩkɩɣ-ɖʋ yɔ. Mbʋ payɩ hɔʋ ñʋʋdʋ nɔɔyʋ lakɩ yɔ, sɔɔlɩm pɩwɛɛ se piseɣti-i nɛ ɛlabɩ-pʋ. Ɛbɛ yɔɔ pɩcɛyɩ siŋŋ mbʋ? Apostoloo Yohanɛɛsɩ cosaa se: “Weyi ɛɛsɔɔlʋʋ [e-koobu yaa ɛ-hɔʋ ŋgʋ ɛnaɣ-kʋ] yɔ, ɛɛpɩzɩɣ nɛ ɛsɔɔlɩ Ɛsɔ weyi ɛɛnaɣ-ɩ yɔ.” (1 Yoh. 4:11, 20) Abalʋ weyi ɛsɔɔlɩ ɛ-hɔʋ nɛ ɛsɔɔlɩ se ɛmaɣzɩnɩ Yehowa nɛ Yesu yɔ, ɛkaɣ sɩnʋʋ ɛ-hɔʋ nɛ taabalɩyɛ kɩbanɖɛ wɛɛ kɩ nɛ Yehowa pɛ-hɛkʋ taa. Ɛkaɣ-kʋ sɩnʋʋ nɛ kɩwɛɛ pɛɛyɛ taa, nɛ ɛkaɣ cɔnʋʋ ɛ-hɔʋ taa mba tomnaɣ yɔɔ kɩcɛyɩm ɖeɖe. (1 Tim. 5:8) Ɛkaɣ falɩsʋʋ e-piya nɛ ɛsɩɣzɩɣ-sɩ lɔŋ. Ɛkaɣ wobu pɩ-yɔɔ ɖɔɖɔ nɛ ɛñakɩ pana se ɛkpaɣ lɩmaɣza wena aɖʋʋ Yehowa hɩɖɛ nɛ awazɩɣ ɛ-hɔʋ yɔ. Lɛɛlɛɛyɔ, iyele nɛ ɖɩtazɩ lɩmaɣza ana a-taa kʋɖʋm kʋɖʋm nɛ ɖɩna ɛzɩma hɔʋ ñʋʋdʋ nɔɔyʋ pɩzɩɣ nɛ ɛmaɣzɩnɩ Yehowa nɛ Yesu yɔ.

14. Ɛbɛ hɔʋ ñʋʋdʋ nɔɔyʋ pɩzɩɣ ɛla nɛ ɛsɩnɩ ɛ-hɔʋ nɛ kɩñɔtɩnɩ Yehowa?

¹⁴ Pɩpɔzʋʋ se hɔʋ ñʋʋdʋ ɛcɔnɩ ɛ-hɔʋ fezuu taa kɩcɛyɩm ɖeɖe. Yesu wɩlaa se ɛmaɣzɩɣnɩ ɛ-Caa mbʋ pʋyɔɔ yɔ, ɛɛsɔɔlaa se ɛsɩnɩ ɛ-wayɩ tɩŋɩyaa nɛ pɔɖɔkɩ pe-tisuu kpam. (Mat. 5:3, 6; Mark. 6:34) Mbʋ ɖɔɖɔ, mbʋ pɩ-tɔm cɛyɩ hɔʋ ñʋʋdʋ ɛsɩndaa nɛ pɩkɩlɩ yɔ lɛ se ɛsɩnɩ ɛ-hɔʋ taa mba nɛ pɔñɔtɩnɩ Yehowa. (Wp. 6:6-9) Ɛlakɩ mbʋ, ye ɛñakɩ pana nɛ ɛ nɛ ɛ-hɔʋ pakalɩɣ Ɛsɔtɔm nɛ pɛkpɛlɩkɩɣ-tʋ, powoki kediɣzisi, posusuu tɔm kɩbandʋ nɛ pañakɩ pana se taabalɩyɛ kɩbanɖɛ ɛwɛɛ pa nɛ Yehowa pɛ-hɛkʋ taa tam yɔ.

15. Nʋmɔŋ weyi ɩ-yɔɔ hɔʋ ñʋʋdʋ nɔɔyʋ pɩzɩɣ ɛtɩŋna nɛ ɛsɩnɩ ɛ-hɔʋ nɛ kɩwɛɛ pɛɛyɛ taa yɔ, ɩ-taa nakʋyʋ lɛ ŋgʋ?

¹⁵ Pɩpɔzʋʋ se hɔʋ ñʋʋdʋ ɛsɩnɩ ɛ-hɔʋ nɛ kɩwɛɛ pɛɛyɛ taa. Yehowa lɩzaa nɛ ɛwɩlɩ kpayɩ se ɛsɔɔlɩ Yesu siŋŋ. (Mat. 3:17) Ðoŋ ɖoŋ lɛ, Yesu tɩŋaɣnɩ ɛ-lakasɩ nɛ ɛ-yɔɔdaɣ yɔɔ nɛ ɛwɩlɩɣ se ɛsɔɔlɩ ɛ-wayɩ tɩŋɩyaa. Ɛ-wayɩ tɩŋɩyaa ɖɔɖɔ kaaheyi-i se pɔsɔɔlɩ-ɩ siŋŋ. (Yoh. 15:9, 12, 13; 21:16) Hɔʋ ñʋʋdʋ pɩzɩɣ nɛ ɛtɩŋnɩ mbʋ ɛlakɩ yɔ, ɛzɩ hɔʋ taa Bibl kpɛlɩkʋʋ yɔɔ mbʋ yɔ nɛ ɛwɩlɩ se ɛsɔɔlɩ ɛ-halʋ nɛ e-piya. Ɛpɩzɩɣ nɛ eheyi-wɛ ɖɔɖɔ se ɛsɔɔlɩ-wɛ nɛ pamʋ ñɩm siŋŋ ɛ-ɛsɩndaa. Nɛ pɩpɔzʋʋ se ɛsam-wɛ ɛyaa lalaa ɛsɩndaa alɩwaatʋ ndʋ pɩmʋnaa yɔ.—Adu. 31:28, 29.

16. (a) Ɛbɛ pɩpɔzʋʋ se hɔʋ ñʋʋdʋ ɛtasɩ labʋ? (b) Nɛ ɛbɛ pɩtɩmʋna se ɛla?

¹⁶ Pɩpɔzʋʋ se hɔʋ ñʋʋdʋ ɛcɔnɩ ɛ-hɔʋ tomnaɣ yɔɔ kɩcɛyɩm ɖeɖe. Yehowa kaacɔnɩ Izrayɛɛlɩ piya kɩcɛyɩm ɖeɖe halɩ pɩkpɛndɩnɩ alɩwaatʋ ndʋ sɩtaañamɩ-ɩ nɛ ɛhɔ sɩ-nɩŋgbaŋʋʋ yɔ. (Wp. 2:7; 29:4) Sɔnɔ ɖɔɖɔ, ɛcɔŋnɩ ɖa-kɩcɛyɩm ɖeɖe. (Mat. 6:31-33; 7:11) Yesu ɖɔɖɔ kaacalɩ ɛyaa mba patɩŋaɣ ɛ-wayɩ yɔ. (Mat. 14:17-20) Ɛɛwa ɖɔɖɔ ɛyaa sakɩyɛ kʋdɔmɩŋ. (Mat. 4:24) Pɩsa nɛ hɔʋ ñʋʋdʋ tɔm kɛdɩnɩ Yehowa lɛ, pɩpɔzʋʋ se ɛcɔnɩ ɛ-hɔʋ tomnaɣ yɔɔ kɩcɛyɩm ɖeɖe. Ɛlɛ, pɩpɔzʋʋ se ɛkpa ɛ-tɩ nɛ nabʋyʋ. Pɩtɩmʋna se ɛkɩlɩɣ alɩwaatʋ kpaɣʋ nɛ ɛlakɩnɩ tomnaɣ yɔɔ tʋmɩyɛ, nɛ ɛɛtasɩɣ pɩzʋʋ nɛ ɛcɔŋnɩ ɛ-hɔʋ fezuu taa kɩcɛyɩm ɖeɖe nɛ ɛɛtasɩɣ pɩzʋʋ ɖɔɖɔ nɛ ɛsɩɣnɩ-kʋ se kɩwɛɛ pɛɛyɛ taa.

17. Kɩɖaʋ ŋgʋ Yehowa nɛ Yesu paha-ɖʋ falɩsʋʋ nɛ lɔŋ sɩɣzʋʋ hɔɔlʋʋ taa?

¹⁷ Pɩpɔzʋʋ se hɔʋ ñʋʋdʋ ɛfalɩsɩ ɛ-hɔʋ taa ñɩma. Yehowa falɩsɩɣ-ɖʋ nɛ ɛsɩɣzɩɣ-ɖʋ lɔŋ mbʋ pʋyɔɔ yɔ, ɛsɔɔlaa se ɛsɩnɩ-ɖʋ. (Ebr. 12:7-9) Yesu ɖɔɖɔ falɩsɩ mba ɛɛwɛnɩ ɖoŋ pɔ-yɔɔ yɔ nɛ sɔɔlɩm. (Yoh. 15:14, 15) Ɛɛtasɩ-wɛ lɔŋ kpayɩ, ɛlɛ ɛlabɩ mbʋ nɛ nɔɔ kɩbaŋa. (Mat. 20:24-28) Ɛnawa se ɖɩtɩtalɩ pilim nɛ ɖoŋ ɖoŋ lɛ, piyiɣdiɣ-ɖʋ.—Mat. 26:41.

18. Tɔm ndʋ yɔɔ hɔʋ ñʋʋdʋ kɩbanʋ tɔzʋʋ?

¹⁸ Hɔʋ ñʋʋdʋ weyi ɛmaɣzɩɣnɩ Yehowa nɛ Yesu yɔ, ɛtɔzʋʋ se ɛ-halʋ nɛ e-piya patɩtalɩ pilim: Ɛɛkɔʋnɩ ɛ-halʋ nɛ e-piya “pana kadadayaɣ.” (Kol. 3:19). Ɛlɛ, ɛlakɩnɩ tʋmɩyɛ paɣtʋ kiɖe nɖɩ ɖɩwɛ Galaatii mba 6:1 taa yɔ nɛ  ɛñakɩ pana nɛ ɛñɔɔzʋʋ-wɛ nɛ “hɛɛɛ wɛtʋ.” Nɛ ɛɛlakɩ mbʋ lɛ, ɛtɔzʋʋ se ɛnʋ ɖɔɖɔ ɛtɩtalɩ pilim. Ɛzɩ Yesu yɔ, hɔʋ ñʋʋdʋ ɖiɣziɣna se nʋmɔʋ kɩbaŋʋ ŋgʋ kɩ-yɔɔ pɩpɔzʋʋ se ɛtɩŋna nɛ ɛfalɩsɩ ɛ-hɔʋ yɔ, ŋgʋ lɛ se pɩwɛɛ se ɛha-wɛ kɩɖaʋ kɩbaŋʋ.—1 Pɩy. 2:21.

19-20. Alɩwaatʋ ndʋ pɩpɔzʋʋ se hɔʋ ñʋʋdʋ ɛkpaɣ lɩmaɣza yɔ, ɛzɩma ɛpɩzɩɣ nɛ ɛmaɣzɩnɩ Yehowa nɛ Yesu?

¹⁹ Pɩpɔzʋʋ se hɔʋ ñʋʋdʋ ɛkpaɣ lɩmaɣza wena awazɩɣ lalaa yɔ. Yehowa kpakɩɣ lɩmaɣza wena awazɩɣ lalaa yɔ. Ɛkpaɣ lɩmaɣzɩyɛ se ɛlɩzɩɣ wondu ndʋ tifeziɣ yɔ. Pɩtɩkɛ ɛ-maɣmaɣ ɛ-kɛzɛɣa yɔɔ ɛlɩzɩ wondu ndʋ, ɛlɛ ɛlɩzɩ-tʋ mbʋ pʋyɔɔ yɔ ɛsɔɔlaa se ɖɩnɩɩ wezuu leleŋ. Nɔɔyʋ tɩñɩɣ Yehowa yɔɔ se ɛha-ɖʋ ɛ-Pɩyalʋ nɛ ɛkɔɔ ɛsɩ ɖa-kɩwɛɛkɩm yɔɔ. Ɛ-maɣmaɣ ɛkpaɣnɩ lɩmaɣzɩyɛ faaa se ɛlakɩ kɩlaʋ ŋgʋ nɛ pɩwazɩ-ɖʋ. Yesu ɖɔɖɔ kpaɣ lɩmaɣza wena awazɩ lalaa yɔ. (Roma 15:3) Alɩwaatʋ ndʋ pɩɩnɩ-ɩ siŋŋ yɔ, mbʋ ɛzɩ ɛɛcaɣ nɛ ɛhɛzɩ lɛ, ɛkpaɣ lɩmaɣzɩyɛ se ɛwɩlɩɣ ɛyaa samaɣ nakɛyɛ tɔm.—Mark. 6:31-34.

²⁰ Hɔʋ ñʋʋdʋ kɩbanʋ nawa se mbʋ pɩpɔzʋʋ se ɛla nɛ pɩkɩlɩ kaɖɛ yɔ pɩ-taa nabʋyʋ lɛ se ɛkpaɣ lɩmaɣza kɩbana wena awazɩɣ ɛ-hɔʋ yɔ, nɛ pɩ-tɔm cɛyɩ ɛ-ɛsɩndaa siŋŋ. Ɛñakɩ pana se ɛtaakpaɣ lɩmaɣza yem se pɔtɔma se pakpaɣ. Ɛñakɩ pana ɖɔɖɔ se wɛtʋ ndʋ tɩ-taa ɛwɛɛ yɔ, tɩtaawɛɛnɩ ɖoŋ lɩmaɣza wena ɛkpakɩɣ yɔ a-yɔɔ. Ɛlɛ, eyeki se Yehowa ɛwɩlɩ-ɩ ɛzɩma ɛkpaɣ lɩmaɣza kɩbana yɔ. * (Adu. 2:6, 7) Ye ɛlakɩ mbʋ yɔ, pɩwɩlɩɣ se ɛwɛɛ nɛ ɛmaɣzɩɣ lalaa kɛzɛsɩ yɔɔ nɛ pɩtɩkɛ ɛ-maɣmaɣ ɛ-kɛzɛɣa yɔɔ.—Fil. 2:4.

21. Tɔm ndʋ taa ɖɩkaɣ tazʋʋ tɔm ñʋʋ ŋgʋ kɩkɔŋ yɔ kɩ-taa?

²¹ Yehowa ɖʋ hɔŋ ñʋndɩnaa tʋmɩyɛ nɖɩ ɖɩwɛ kaɖɛ yɔ, nɛ ɛsɔɔlaa se palabɩ-ɖɩ camɩyɛ. Ɛlɛ, ye walʋ nɔɔyʋ ɛñakɩ pana nɛ ɛmaɣzɩɣnɩ Yehowa nɛ Yesu yɔ, ɛkaɣ kɛnʋʋ hɔʋ ñʋʋdʋ kɩbanʋ. Nɛ ye ɛ-halʋ ɛlakɩ ɛ-tʋmɩyɛ camɩyɛ yɔ, hɔʋ kaɣ wɛʋ koboyaɣ taa. Lɩmaɣza wena pɩwɛɛ se halʋ ɛwɛɛnɩ tʋmɩyɛ nɖɩ paɖʋ ɛ-walʋ se ɛkɛ hɔʋ ñʋʋdʋ yɔ ɖɩ-yɔɔ? Nɛ kala wena ɛpɩzɩɣ nɛ ɛkatɩ? Tɔm ñʋʋ ŋgʋ kɩkɔŋ yɔ, kɩkaɣ cosuu tɔm ndʋ tɩ-yɔɔ.