1. Kuzê ki pode influensia un ómi na manera ki el ta trata se mudjer i se fidjus?

PA BO kuzê ki siginifika ser kabésa ô xéfi di un família? Alguns ómi ta dexa tradison, kultura ô manera ki es kriadu influensia-s na manera ki es ta trata ses mudjer i ses fidjus. Odja kuzê ki un irman ki txoma Yanita, ki ta vive na Europa, fla: “Na undi ki N ta mora, pesoas ten un ideia fórti ma ómis é más inportanti ki mudjeris, i ma mudjeris nase pa sirbi otus.” Un otu irmon ki txoma Luke, ki ta vive na Mérka, fla: “Alguns pai ta inxina ses fidju ma nu debe odja mudjeris, má nu ka debe obi-s pamodi ses opinion é ka inportanti.” Má Jeová ka krê pa ómis trata mudjeris di kel manera li. (Konpara ku Marcos 7:13.) Nton modi ki un ómi pode prende ser un bon xéfi di família?

2. Kuzê ki un xéfi di família meste sabe i pamodi?

² Un ómi ki krê ser un bon xéfi di família, meste ntende primeru kuzê ki Jeová ta spéra pa el faze. Tanbê, el meste ntende pamodi ki Jeová da alguns algen autoridadi. Dipôs, el meste sabe dretu kuzê ki el ten ki faze pa el imita izénplu di Jeová i di Jizus. Pamodi ki é inportanti pa xéfis di família ntende kes kuza li? Pamodi Jeová da-s algun autoridadi i el ta spéra ma es ta uza dretu kel autoridadi ki es resebe. — Luc. 12:48b.

3. Kuzê ki 1 Coríntios 11:3, ta inxina-nu sobri ser kabésa ô xéfi?

³ Lé 1 Coríntios 11:3. Kel testu li ta mostra-nu modi ki Jeová organiza se família na Séu ku Téra. Ser kabésa ô xéfi, ta nvolve dôs kuza prinsipal: autoridadi i presta kónta. Jeová é ‘kabésa’, ô kel autoridadi más grandi ki ten i tudu se fidjus, na Séu ku na Téra, debe presta kónta na el.  (Rom. 14:10; Efé. 3:14, 15) Jeová da Jizus autoridadi pa toma kónta di tudu kongregason, má Jizus ten ki presta kónta na Jeová pa manera ki el ta trata kongregason. (1 Cor. 15:27) Jeová tanbê da maridu autoridadi sobri se mudjer i se fidjus. Má kel maridu ten ki presta kónta na Jeová i na Jizus pa manera ki el ta trata se família. — 1 Ped. 3:7.

4. Kuzê ki Jeová ku Jizus ten autoridadi di faze?

⁴ Dja ki Jeová é kabésa di se família na Séu ku na Téra, El ten autoridadi pa kria régras i pa iziji pa se fidjus obidese kes régra. (Isa. 33:22) I dja ki Jizus é kabésa di kongregason, tanbê el ten direitu di kria régras i iziji pa obidesedu kes régra. — Gál. 6:2; Col. 1:18-20.

5. Kuzê ki un xéfi di família ten autoridadi pa faze, i pamodi ki nu ta fla ma se autoridadi ten limiti?

⁵ Sima Jeová ku Jizus, xéfi di família ten autoridadi pa kria régras pa se família. (Rom. 7:2; Efé. 6:4) Má se autoridadi ten limiti. Pur izénplu, kes régra ki el ta kria debe ten bazi na prinsípiu di Palavra di Deus. (Pro. 3:5, 6) I kes ki é xéfi di família ka ten autoridadi pa kria régras pa kes ki ka ta faze párti di ses família. (Rom. 14:4) Tanbê, óras ki ses fidju bira grandi i es sai di kaza, es debe kontinua ta ruspeta ses pai, má es ka sta más dibaxu di ses autoridadi. — Mat. 19:5.

6. Pamodi ki Jeová da autoridadi?

⁶ Autoridadi é un prezenti ki Jeová da-nu pamodi el ta ama-nu. Autoridadi ta djuda pa tudu kuza na família di Jeová funsiona na órdi i na pas. (1 Cor. 14:33, 40) Sen kel-li, família di Jeová ta fikaba dizorganizadu i ningen ka ta sérba filís. Pur izénplu, ta fikaba difísil di sabe ken ki devia tomaba kes disizon final i aji di akordu ku kes disizon.

7. Sima sta na Efésios 5:25, 28, modi ki Jeová krê pa ómis trata mudjeris?

⁷ Si é bon ten un xéfi di família, nton pamodi ki txeu mudjer ta xinti ma ses maridu ta kontrola-s i ta maltrata-s? Kel-li ta kontise pamodi txeu ómi ka ta sigi kes lei ki Jeová da pa família i es ta skodje sigi kes kustumu i tradison di lugar ki es ta vive. Ô talvês es ta trata ses mudjer mariadu sô pa es xinti dretu ku ses kabésa. Pur izénplu, un maridu talvês ta tenta kontrola se mudjer sô pa el pode xinti ruspetadu i pa el prova otus ma el é ‘ómi di verdadi’. Talvês el ta pensa: ‘N ka pode obriga nha mudjer pa ama-m, má N pode pô-l ta xinti medu mi.’ I el pode uza kel medu pa kontrola se mudjer. * É klaru ki es manera di pensa i di aji, ka ta dexa mudjeris tratadu ku ónra i ruspetu ki es merese. Kel-li sta kóntra kuzê ki Jeová ta spéra di maridus. — Lé Efésios 5:25, 28.

8. Modi ki un ómi pode ser un bon xéfi di família?

⁸ Un ómi pode prende ser un bon xéfi di família, óras ki el ta imita manera ki Jeová i Jizus ta uza ses autoridadi. Primeru, nu sta ben odja dôs kualidadi ki Jeová ku Jizus ta mostra. Dipôs, nu ta ben odja modi ki xéfis di família pode imita kes kualidadi, óras ki es ta lida ku ses mudjer i ses fidjus.

9. Modi ki Jeová ta mostra umildadi?

⁹ Umildadi. Jeová ten sabedoria más  di ki kalker algen, má simé, el ta obi opinion di se sérvus. (Gén. 18:23, 24, 32) I Jeová tanbê ta seta ses sujiston. (1 Reis 22:19-22) Jeová é perfetu, má gósi el ka ta spéra pa nu ser perfetu. Envês di kel-li, el ta djuda se sérvus pa sirbi-l di midjór manera ki es ta pode. (Sal. 113:6, 7) É ka atoa ki Bíblia ta txoma Jeová di ‘kel ki ta djuda-nu’. (Sal. 27:9; Heb. 13:6) Rei Davidi rekonhese ma el konsigi kunpri kel grandi diziginason ki el resebe sô pamodi umildadi di Jeová. — 2 Sam. 22:36.

10. Modi ki Jizus mostra umildadi?

¹⁰ Odja izénplu di Jizus. El éra Instrutor i Sinhor di se disiplus, má simé, el laba ses pé. Pamodi ki Jeová poi kel stória li na Bíblia? Di sertéza, el poi kel-li pa xéfis di família i otus algen ten un bon izénplu pa imita. Própi Jizus fla: ‘N dexa izénplu pa nhos, nton sima N faze nhos, nhos debe faze tanbê.’ (João 13:12-17) Nbóra Jizus tinha grandi autoridadi, el ka ta speraba pa otus sirbiba el. Envês di kel-li, el ta sirbiba otus. — Mat. 20:28.

11. Modi ki xéfis di família pode imita umildadi di Jeová i di Jizus?

¹¹ Kuzê ki nu ta prende. Un xéfi di família pode mostra umildadi di txeu manera. Pur izénplu, el ka ta spéra ma se mudjer ku se fidjus ta ser perfetu. Mésmu óras ki otus algen di se família ka ta konkorda ku se opinion, el sta dispostu pa obi-s. Marley, ki ta vive na Mérka, fla: “Mi ku nha maridu, alvês nu ta ten opinion diferenti sobri asuntus. Má ta da pa xinti ma el ta da valor i el ta ruspeta nhas opinion. I sénpri el ta leba en kónta kuzê ki N ta fla, antis di el toma disizons.” Kes xéfi di família ki é umildi, tanbê ta sta prontu pa djuda na kes trabadju di kaza, sikrê kes algen di lugar undi ki es ta vive ta fla ma kel-la é ka trabadju pa ómi. Aji ku umildadi pode ser un dizafiu. Pamodi? Un irman ki txoma Rachel, fla: “Di undi ki N ben, si un ómi djuda se mudjer laba losa ô linpa kaza, vizinhus ku família ta kumesa ta duvida si el é ‘ómi di verdadi.’ Es pode pensa ma el ka ta konsigi manda na se mudjer.” Si kel manera di pensa li é normal na undi bu ta mora,  lenbra ma Jizus laba pé di se disiplus, sikrê kel-la éra un trabadju ki skravus ta fazeba. Un bon xéfi di família ka krê pa otus algen pensa ma el é fórti ô inportanti. El krê pa se mudjer ku se fidjus xinti filís. Alén di umildadi, ten otu kualidadi inportanti pa un bon xéfi di família. É kuzê?

12. Modi ki Jeová ku Jizus mostra ma es ta ama-nu?

¹² Amor. Tudu kuza ki Jeová ta faze é amor ki ta motiva-l. (1 João 4:7, 8) El ta mostra ma el ta ama-nu pamodi el da-nu se Palavra, ki é Bíblia, i se organizason pa djuda-nu ten un amizadi fórti ku el. Tanbê, el ta preokupa ku nos sentimentu pamodi el ta da-nu sertéza ma el ta ama-nu. I sobri kes kuza material ki nu ta meste? Bíblia ta fla ma Jeová ta da-nu ‘tudu kuza pa nu xinti alegria.’ (1 Tim. 6:17) Óras ki nu ta fadja, Jeová ta koriji-nu, má el ka ta para di ama-nu. É pamodi el ten grandi amor pa nos, ki el da resgati. Jizus tanbê mostra ma el ta ama-nu kantu el da se vida pa salva-nu. (João 3:16; 15:13) Ka ten nada ki pode kaba ku kel amor ki Jeová ku Jizus ta xinti pa kes ki é lial. — João 13:1; Rom. 8:35, 38, 39.

13. Pamodi ki é inportanti un xéfi di família mostra ma el ta ama se mudjer i se fidjus? (Tanbê odja kuadru ‘ Modi ki un ómi ki kaza ka dura li, pode ganha ruspetu di se mudjer?’)

¹³ Kuzê ki nu ta prende. Tudu kel ki un xéfi di família ta faze é amor ki debe motiva-l. Pamodi ki kel-li é inportanti? Apóstlu Juan ta responde: ‘Ken ki ka ta ama se irmon [ô se família], ki el ta odja, ka ta pode ama Deus, ki el ka ta odja.’ (1 João 4:11, 20) Un xéfi di família ki ta ama se mudjer ku se fidjus i ki ta sigi izénplu di Jeová i di Jizus, ta djuda se família ten un amizadi fórti ku Deus, ta preokupa ku ses sentimentu i ta da-s kes kuza ki es ta meste. (1 Tim. 5:8) El ta trena i el ta koriji se fidjus. Tanbê el ta toma kes disizon ki ta da Jeová ónra i ki ta djuda se família. Gósi, nu sta ben odja modi ki xéfis  di família pode imita Jeová i Jizus, óras ki es ta faze kada un di kes kuza ki dja nu pâpia di es.

14. Modi ki un xéfi di família ta djuda se mudjer ku se fidjus ten un amizadi fórti ku Jeová?

¹⁴ El ta djuda se família ten un amizadi fórti ku Deus. Jizus ta imitaba izénplu di se Pai. El ta djudaba se sigidoris tinha un amizadi fórti ku Jeová. (Mat. 5:3, 6; Mar. 6:34) Di mésmu manera, un xéfi di família ta rekonhese ma kel responsabilidadi más inportanti ki el ten é djuda família ten un amizadi fórti ku Jeová. (Deut. 6:6-9) Un xéfi di família ta faze kel-li, óras ki el ta tra ténpu pa el ku se família lé i studa Palavra di Deus, sisti runion, prega notísias sábi, bira amigu di Jeová i mante kel amizadi.

15. Modi ki un xéfi di família ta mostra ma el ta preokupa ku sentimentus di se mudjer ku se fidjus?

¹⁵ El ta preokupa ku sentimentu di se família. Jeová mostra klaru ma el ta amaba se Fidju Jizus txeu, ti mésmu na frenti di otus algen. (Mat. 3:17) Jizus faze mésmu kuza ku se sigidoris. Jizus mostra klaru se amor pa es, na kuzê ki el ta flaba i na kuzê ki el ta fazeba. Pamodi kel-li, se sigidoris tanbê mostra ses amor pa el. (João 15:9, 12, 13; 21:16) Un xéfi di família pode mostra se amor pa se mudjer i pa se fidjus pa kel ki el ta faze, pur izénplu, sima studa Bíblia ku es. Tanbê el ta mostra ma el ta da valor pa se mudjer i pa se fidjus, óras ki el ta ilojia-s na frenti di otus sénpri ki es ta merese. — Pro. 31:28, 29.

16. Kuzê más ki un xéfi di família debe faze, i el meste toma kuidadu ku kuzê?

¹⁶ El ta da-s kes kuza ki es ta meste. Jeová da israelitas kes kuza ki es staba ta meste, mésmu kantu es ka obi ku el i es mereseba kastigu. (Deut. 2:7; 29:5) Tanbê oji el ta da-nu kes kuza ki nu ta meste. (Mat. 6:31-33; 7:11) Di mésmu manera, Jizus da se sigidoris kumida. (Mat. 14:17-20) I tanbê el ta preokupaba ku ses saúdi. (Mat. 4:24) Un xéfi di família ki krê agrada Jeová, meste da se mudjer ku se fidjus kes kuza ki es ta meste. Má, el meste toma kuidadu pa trabadju ka ser kel kuza más inportanti na se vida. El ka debe trabadja dimás pa sustenta se família i dexa di preokupa ku ses sentimentu i kuida di ses amizadi ku Jeová.

17. Modi ki Jeová ku Jizus ta trena-nu i ta disiplina-nu?

¹⁷ El ta trena se família. Jeová ta trena-nu i el ta disiplina-nu, pamodi el krê kel ki é midjór pa nos. (Heb. 12:7-9) Pa sigi izénplu di se Pai, Jizus ta trena ku amor kes ki sta dibaxu di se autoridadi. (João 15:14, 15) El é firmi, má el ta trata algen  ku bondadi. (Mat. 20:24-28) El sabe ma nos é inperfetu i ma nos tendénsia é di faze kuzas mariadu. — Mat. 26:41.

18. Un bon xéfi di família ta lenbra di kuzê?

¹⁸ Un xéfi di família ki ta imita izénplu di Jeová i di Jizus, ta tenta ntende otus algen. El ta lenbra ma kes algen di se família é inperfetu. Pur isu, el ka ta ‘sai di kabésa’ ku se mudjer i se fidjus. (Col. 3:19) Envês di kel-li, el ta sigi kel konsedju ki sta na Gálatas 6:1, i el ta tenta koriji-s ‘ku un spritu di brandura’, pamodi el ta lenbra ma el tanbê é inperfetu. Sima Jizus, el ta rekonhese ma midjór manera di inxina otus é através di se izénplu. — 1 Ped. 2:21.

19-20. Modi ki un xéfi di família pode imita Jeová ku Jizus, óras ki el ta toma disizons?

¹⁹ El ta toma kes disizon ki ta djuda se família. Jeová ta toma disizons ta pensa na kel ki é midjór pa otus. Pur izénplu, el disidi kria vida ka pa djuda se kabésa, má pa nos tanbê nu xinti alegria di vive. I ningen ka obriga-l da vida di se Fidju pa salva-nu di pekadu. El faze kel-li pamodi el kreba, el staba ta pensa na kuzê ki é midjór pa nos. Jizus tanbê toma disizons ta pensa primeru na kel ki éra midjór pa otus. (Rom. 15:3) Pur izénplu, el disidi abri mô di se diskansu pa el inxinaba un monti di algen. — Mar. 6:31-34.

²⁰ Un bon xéfi di família, sabe ma un di kes responsabilidadi más difísil ki el ten, é toma kes disizon ki ta djuda se família i kel-li é inportanti pa el. El ta sforsa pa el ka toma ninhun disizon sen bons razon ô ku bazi na se sentimentu. Má, el ta dexa Jeová inxina-l toma bons disizon. * (Pro. 2:6, 7) Di kel manera li, el ka ta pensa na kuzê ki é midjór pa el, má na kuzê ki é midjór pa se família. — Fil. 2:4.

21. Kuzê ki nu sta ben odja na kel otu studu?

²¹ Jeová da xéfis di família un diziginason difísil i el ta spéra ma es ta faze ses midjór na es diziginason. Má si un xéfi di família sforsa na imita izénplu di Jeová i di Jizus, el ta ten bons rezultadu. I si se mudjer tanbê faze se párti, es ta ten un kazamentu filís. Modi ki un mudjer debe odja responsabilidadi di se maridu sima xéfi di família? Nu ta ben pâpia di kel-li na kel otu studu.