1. Oshike hashi nwefa mo ovalumenhu monghedi omo hava ungaunga nomaukwaneumbo avo?

OSHIKE hashi uya momadiladilo oye ngeenge taku popiwa “oukwamutwe”? Ovalumenhu vamwe ohava ungaunga novakulukadi vavo nosho yo nounona vavo she likolelela komufyuululwakalo nokeputuko lavo. Omumwameme Yanita wokoEurope okwa ti: “Moshitukulwa shetu ovanhu ova itavela neenghono kutya ovakainhu inava fimana kovalumenhu nove na okuungaungiwa navo ngaashi ovapiya.” Omumwatate umwe wedina Luke wokoUnited States okwa ti: “Ovashamane vamwe ohava hongo ovanamati vavo kutya kave na okupwilikina kwaasho tava lombwelwa kovakainhu, shaashi kashi na oshilonga.” Kakele kaasho, oikala ya tya ngaho kai li metwokumwe nonghedi omo Jehova a hala ovalumenhu va longife oukwamutwe wavo. (Yelekanifa naMarkus 7:13.) Ndele ongahelipi omulumenhu ta dulu okulihonga a kale omutwe muwa woukwaneumbo?

2. Oshike omutwe woukwaneumbo wa pumbwa okushiiva, nomolwashike?

² Opo omulumenhu a kale omutwe woukwaneumbo muwa, tete okwa pumbwa okuuda ko kutya Jehova okwa teelela a ninge shike. Okwa pumbwa yo okushiiva kutya omolwashike Jehova a tulila po oukwamutwe, naasho sha fimanenena okwa pumbwa okushiiva nghee e na okushikula oshihopaenenwa shaJehova naJesus. Omolwashike sha fimana komulumenhu a mone eudeko la tya ngaho? Omolwaashi Jehova okwa pa omitwe domaukwaneumbo eenghonopangelo donhumba nokwa teelela ve di longife nawa. — Luk. 12:48b.

3. Oshike hatu lihongo shi na sha noukwamutwe meendjovo odo tadi hangwa mo 1 Ovakorinto 11:3?

³ Lesha 1 Ovakorinto 11:3. Ovelishe oyo oya popya nghee Jehova a unganeka oukwaneumbo waye womeulu nosho yo wokombada yedu. Oukwamutwe owa kwatela mo oinima ivali ya fimanenena, eenghonopangelo nosho yo oku ke lihokolola. Jehova oye e li pondodo yotete “moukwamutwe,” ile e na eenghonopangelo da shiya  ko. Ovana vaye aveshe, sha hala okutya ovaengeli novanhu, otave ke lihokolola kuye. (Rom. 14:10; Ef. 3:14, 15) Jehova okwa pa Jesus eenghonopangelo dokupangela eongalo, ashike Jesus ote ke lihokolola kuye monghedi omo a ungaunga nafye. (1 Kor. 15:27) Jehova okwa pa yo omushamane eenghonopangelo dokupangela omukulukadi waye nounona vaye, ndele omushamane ote ke lihokolola kuJehova naJesus monghedi omo ha ungaunga noukwaneumbo waye. — 1 Pet. 3:7.

4. Jehova naJesus ove na eenghonopangelo dilipi?

⁴ Molwaashi Jehova oye omutwe woukwaneumbo aushe, oku na oufemba wokutulila po ovana vaye eemhango di na sha nanghee ve na okulihumbata nokushilipaleka kutya otava dulika kudo. (Jes. 33:22) Jesus, e li omutwe weongalo lopaKriste, naye oku na oufemba wokutula po eemhango nokushilipaleka kutya otadi wanifwa po. — Gal. 6:2; Kol. 1:18-20.

5. Omutwe woukwaneumbo wopaKriste ou na eenghonopangelo dilipi, nou na omangabeko elipi?

⁵ Ngaashi ashike oshihopaenenwa osho sha tulwa po kuJehova naJesus, omutwe woukwaneumbo wopaKriste ou na eenghonopangelo dokuninga omatokolo e na sha noukwaneumbo wao. (Rom. 7:2; Ef. 6:4) Ashike, eenghonopangelo daye oda ngabekwa. Pashihopaenenwa, eemhango daye odi na okukala da kanghamena komafinamhango oo e li mEendjovo daKalunga. (Omayel. 3:5, 6) Natango, omutwe woukwaneumbo kau na eenghonopangelo dokutulila po eemhango ovo vehe fi oilyo youkwaneumbo wao. (Rom. 14:4) Ovana vaye ngeenge ova kulu, ndele tava fiye po eumbo ove na oku mu fimaneka, ashike kave li vali koshi yepangelo laye. — Mat. 19:5.

6. Omolwashike Jehova a tula po oukwamutwe?

⁶ Jehova okwa tula po oukwamutwe molwaashi oku hole oukwaneumbo waye. Ou li oshali ya dja kuye. Elongekido loukwamutwe ole shi ningifa tashi shiiva opo oukwaneumbo waye u kale nombili nopalandulafano. (1 Kor. 14:33, 40) Ngeno kapa li elongekido li na sha noukwamutwe, ngeno oukwaneumbo waJehova owa dundakana nokau na ehafo. Pashihopaenenwa, ngeno kape shiivike kutya olyelye e na okuninga omatokolo axuuninwa nosho yo oo e na oku a kwatela komesho.

7. Metwokumwe nOvaefeso 5:25, 28, mbela Jehova okwa hala ovalumenhu va pangele ovakainhu vavo?

⁷ Ngeenge elongekido laJehova li na sha noukwamutwe oshinima sha denga mbada, omolwashike ovakainhu vahapu va wililwa po nove udite tava pangelwa nonyanya kovashamane vavo? Omolwaashi ovalumenhu vahapu ihava dulika komifikamhango daJehova di na sha noukwaneumbo nohava shikula eenghedindjikilile domoitukulwa yavo ile omifyuululwakalo. Ohava hepeke ovakulukadi vavo opo ve liwanifile po omahalo avo opaumwene. Pashihopaenenwa, omushamane otashi dulika a ungaunge nai nomukulukadi waye opo a kale a fimanekwa, ile a ulikile vamwe kutya ye “omulumenhuelela.” Otashi dulika a tomhafane kutya iha fininike omukulukadi waye a kale e mu hole, ashike ohe mu mbadapaleke a kale he mu tila. Otashi dulika a longife onghedi oyo, opo a dule okupangela omukulukadi waye. * Ovalumenhu ovo hava diladila nokuninga oinima ya yukila oko ova puka filufilu, inava fimaneka ovakainhu ngaashi shi na okukala, naasho hava ningi otashi kondjifafana nehalo laJehova. — Lesha Ovaefeso 5:25, 28.

8. Ongahelipi omulumenhu ta dulu okulihonga a kale omutwe muwa woukwaneumbo?

⁸ Omulumenhu ota dulu okulihonga okukala omutwe muwa woukwaneumbo ngeenge okwa  hopaenene onghedi omo Jehova naJesus hava longifa oukwamutwe wavo. Natu ka taleni komaukwatya avali oo a ulikwa kuJehova naJesus, nanghee omutwe woukwaneumbo tau dulu okuulika omaukwatya oo ngeenge tau ungaunga nomukulukadi wao nosho yo nounona.

9. Jehova oha ulike ngahelipi elininipiko?

⁹ Elininipiko. Nonande Jehova Omunaendunge a shiya ko, oha pwilikine komaetepo ovapiya vaye. (Gen. 18:23, 24, 32) Okwa pitika ovo ve li koshi yeenghonopangelo daye va ninge omaetepo. (1 Eeh. 22:19-22) Jehova okwa wanenena, ashike ina teelela tu ninge oinima monghedi ya wanenena. Ponhele yaasho, oha kwafele ovanhu inava wanenena ovo have mu longele va pondole. (Eps. 113:6, 7) Ombiibeli oya popya Jehova e li “omukwafi.” (Eps. 27:9; Heb. 13:6) Ohamba David oya didilika kutya oya dula ashike okuwanifa po oilonga inene oyo ya li ye lineekelelwa kekwafo laJehova. — 2 Sam. 22:36.

10. Jesus okwa ulika ngahelipi elininipiko?

¹⁰ Natu taleni koshihopaenenwa shaJesus. Nonande okwa li Omwene wovahongwa vaye okwa li e va kosha keemhadi. Jehova okwa shangifa oshihopaenenwa osho mOmbiibeli netomheno limwe lilipi? Opo a kwafele ovanhu aveshe, mwa kwatelwa omitwe domaukwaneumbo di shikule oshihopaenenwa osho. Jesus okwa popya ye mwene a ti: “Onde mu tulila po oshihopaenenwa mu ninge ngaashi naanaa nde mu ningila.” (Joh. 13:12-17) Nonande okwa li e na eenghonopangelo dinene, Jesus ka li a teelela a yakulwe. Ponhele yaasho, oye kwa li ha yakula ovanhu. — Mat. 20:28.

11. Oshike omutwe woukwaneumbo tau lihongo koshihopaenenwa shelininipiko osho sha tulwa po kuJehova naJesus?

¹¹ Oilihongomwa kufye. Omutwe woukwaneumbo otau dulu okuulika elininipiko meenghedi dihapu. Pashihopaenenwa, kau na okuteelela omukulukadi wao nounona va kale hava ningi oinima monghedi ya wanenena. Ohau pwilikine komaetepo oukwaneumbo wao, nonande itau tu kumwe nao. Marley wokoUnited States okwa ti: “Fye nomushamane wange omafimbo amwe ohatu kala tu na omaetepo a yoolokafana. Ashike ondi shii kutya oku hole nge nokwa fimaneka nge, molwaashi oha pula nge ndi ninge omaetepo noha diladila kuo noukeka ofimbo ina ninga etokolo.” Shikwao vali, omushamane omulininipiki oha longo oilonga yomeumbo, nonande momudingonoko wavo oya talika ko ashike hai longwa kovakainhu. Osho otashi dulu okukala eshongo. Omolwashike mbela? Omumwameme wedina Rachel  okwa popya a ti: “Koshitukulwa shetu oko nda dja ngeenge omushamane okwa kwafele omukulukadi waye kokukosha ko koiyaxa ile kokuwapaleka eumbo, ovashiinda nosho yo ovapambele ohava kala va limbililwa ngeenge ‘omulumenhu ngoo shili.’ Ohava diladila kutya okwa dinika komukulukadi waye.” Ngeenge ovanhu moshitukulwa sheni osho ve li ngaho, dimbuluka kutya Jesus okwa li a kosha eemhadi dovahongwa vaye, nonande oshilonga osho osha li ashike hashi longwa kovapika. Omutwe muwa woukwaneumbo ihau kala wa hala vamwe va diladile kutya ou na eenghono nowa fimana, ashike ohau kala wa hala omukulukadi wao nounona vao va kale va hafa. Kakele kelininipiko, oukwatya vali ulipi wa pumbiwa komutwe muwa woukwaneumbo?

12. Ohole oye linyengifa Jehova naJesus va ninge shike?

¹² Ohole. Keshe osho Jehova ha ningi ohe shi ningi te linyengifwa kohole. (1 Joh. 4:7, 8) Oha file oshisho pahole eemhumbwe detu dopamhepo okupitila mEendjovo daye, Ombiibeli nosho yo mehangano laye. Ohe tu file oshisho pamaliudo moku tu shilipaleka kutya oku tu hole. Ongahelipi shi na sha neemhumbwe detu dopainiwe? Jehova ohe “tu pe pauyadi oinima aishe oyo hatu hafele.” (1 Tim. 6:17) Ngeenge twa nyona ohe tu pukulula, ashike osho ihashi mu ningifa aha kale e tu hole. Jehova okwe tu longekidila ekulilo molwaashi oku tu hole. Jesus okwa yandja omwenyo waye omolwetu shaashi oku tu hole. (Joh. 3:16; 15:13) Kape na osho tashi dulu okuya moshipala Jehova naJesus vaha kale ve hole ovo ovadiinini kuvo. — Joh. 13:1; Rom. 8:35, 38, 39.

13. Omolwashike sha fimana komutwe woukwaneumbo okuulikila ohole ovaneumbo vao? (Tala yo oshimhungu “ Ongahelipi omulumenhu oo opo a hombola ta dulu okukala a fimaneka omukulukadi waye?”)

¹³ Oilihongomwa kufye. Keshe osho omutwe woukwaneumbo tau ningi nau kale tau linyengifwa kohole. Omolwashike osho sha fimana? Omuyapostoli Johannes okwa nyamukula a ti: “Ou ehe hole omumwaxe [ile oukwaneumbo] oo e wete, ita dulu okukala e hole Kalunga oo ehe wete.” (1 Joh. 4:11, 20) Osho otashi ulike kutya, omulumenhu oo e hole oukwaneumbo waye nokwa hala okuhopaenena Jehova naJesus oku na oku u fila oshisho pamhepo, pamaliudo nosho yo painiwe. (1 Tim. 5:8) Oku na okudeula ovana noku va pa outekuduliko. Oku na okutwikila okulihonga  nghee e na okuninga omatokolo oo taa hafifa Jehova notaa etele oukwaneumbo waye ouwa. Natu ka kundafaneni keshe shimwe shomoinima oyo nokutala nghee omutwe woukwaneumbo tau dulu okuhopaenena Jehova naJesus.

14. Ongahelipi omutwe woukwaneumbo tau dulu okufila oshisho ovaneumbo vao pamhepo?

¹⁴ Fila oshisho oukwaneumbo woye pamhepo. Jesus okwa li a hopaenena Xe eshi a shilipaleka kutya keshe oo e li koshi yefiloshisho laye okwa filwa oshisho nawa pamhepo. (Mat. 5:3, 6; Mark 6:34) Sha faafana, omutwe woukwaneumbo owa pumbwa okupitifa komesho eemhumbwe dopamhepo doukwaneumbo wao. ( Deut. 6:6-9) Osho ohau shi ningi mokushilipaleka kutya oukwaneumbo wavo ohau lesha nokukonakona Eendjovo daKalunga, hau kala pokwoongala, hau udifa onghundana iwa nohau pameke ekwatafano lao naJehova noku li kaleka po.

15. Onghedi imwe ilipi omutwe woukwaneumbo tau dulu okufila oshisho oukwaneumbo wao pamaliudo?

¹⁵ Fila oshisho oukwaneumbo woye pamaliudo. Jehova okwa li a lombwela Jesus moipafi yovanhu kutya oku mu hole. (Mat. 3:17) Jesus naye okwa li a ulikila ovashikuli vaye kutya oku va hole okupitila meendjovo nomoilonga. Ovashikuli vaye navo ova li va ulika kutya ove mu hole. (Joh. 15:9, 12, 13; 21:16) Omutwe woukwaneumbo nao otau dulu okuulika kutya ou hole omukulukadi nounona vavo okupitila mwaasho hau ningi, ngaashi okukonakona Ombiibeli pamwe navo. Otau dulu yo oku va lombwela kutya ou va hole nowe va lenga. Apa tashi shiiva, nau kale hau va pandula moipafi yavamwe. — Omayel. 31:28, 29.

16. Oshike vali omutwe woukwaneumbo tau dulu okuninga, noshike wa pumbwa okuhenuka?

¹⁶ Fila oshisho oukwaneumbo woye painiwe. Jehova okwa li ha wanifa po eemhumbwe dOvaisrael nokuli nopefimbo opo va li hava kala tava mono oixuna omolwokuhadulika. (Deut. 2:7; 29:5) Oha wanifa po yo eemhumbwe detu nokunena. (Mat. 6:31-33; 7:11) Sha faafana, Jesus okwa li a palula ovo va li ve mu shikula. (Mat. 14:17-20) Okwa li yo a velula vahapu ovo va li tava vele. (Mat. 4:24) Opo omutwe woukwaneumbo u kale wa hokiwa kuJehova ou na okufila oshisho ovaneumbo wavo painiwe. Ashike ope na oshinima shimwe osho wa pumbwa okuhenuka. Kau na okuyandja elitulemo lihapu koilonga yokulikongela omboloto opo u file oshisho oukwaneumbo wao, ndele tau dopa oku u fila oshisho pamhepo nosho yo pamaliudo.

17. Jehova naJesus ova tula po oshihopaenenwa shilipi monghedi omo have tu deula noku tu pa outekuduliko?

¹⁷ Yandja edeulo. Jehova ohe tu deula noku tu pa outekuduliko omolwouwa wetu. (Heb. 12:7-9) Jesus naye oha deula ovo ve li koshi yewiliko laye pahole ngaashi Xe. (Joh. 15:14, 15) Oha yandje omayele a kwata moiti, ashike ohe shi ningi pahole. (Mat. 20:24-28) Oku shii kutya inatu wanenena, noinatu lya olusha lokuhaninga omapuko. — Mat. 26:41.

18. Omutwe muwa woukwaneumbo ohau dimbuluka shike?

¹⁸ Omutwe woukwaneumbo, oo hau hopaenene  Jehova naJesus, ohau dimbuluka kutya oilyo youkwaneumbo wayo inai wanenena. Ihau ungaunga “nonyanya” nomukulukadi ile nounona vavo. (Kol. 3:19) Ponhele yaasho, ohau tula moilonga efinamhango olo tali hangwa mOvagalati 6:1, nokukendabala oku va pukulula “nombili,” u shii kutya nao inau wanenena. Ngaashi Jesus, ou shii kutya oku va tulila po oshihopaenenwa shiwa oyo onghedi ya denga mbada yoku va honga. — 1 Pet. 2:21.

19-20. Ngeenge tashi uya pokuninga omatokolo, omutwe woukwaneumbo ohau hopaenene ngahelipi Jehova naJesus?

¹⁹ Omatokolo oye inaa kanghamena kokuliholamwene. Jehova oha ningi omatokolo oo taa etele vamwe ouwa. Pashihopaenenwa, eshi Jehova a tokola okushita ovanhu ine shi ninga molwouwa waye mwene, ndele okwa hala nafye tu hafele onghalamwenyo. Kape na ou e mu fininika a yandje Omona waye omolwomatimba etu. Oye mwene a tokola nehalo liwa Omona a ninge ekuliloyambo omolwouwa wetu. Jesus naye okwa li a ninga omatokolo omolwouwa wavamwe. (Rom. 15:3) Pashihopaenenwa, nonande okwa li ha kala a loloka, okwa li ha hongo eemhunga dovanhu ponhele yokukala ta fuda po. — Mark. 6:31-34.

²⁰ Omutwe woukwaneumbo ou na okudimbuluka kutya oshinima sha kwata moiti osho u na okukaleka momadiladilo okuninga omatokolo opandunge moukwaneumbo, noshinakuwanifwa osho kashi fi shipu. Ou na yo okuhenuka okuninga omatokolo inaa kanghamena komatomheno a femba ile e likolelela komaliudo. Ponhele yaasho, ohau pula Jehova e u kwafele. * (Omayel. 2:6, 7) Osho ohashi etele ovanhu vakwao ouwa, ponhele ashike oo vene u mone ouwa. — Fil. 2:4.

21. Oshike hatu ka kundafana moshitukulwa tashi shikula ko?

²¹ Jehova okwa pa omitwe domaukwaneumbo oshinakuwanifwa sha kwata moiti, nodi na oku ke lihokolola shi na sha nanghee ha di shi wanifa po. Ashike ngeenge omutwe woukwaneumbo owa kendabala okushikula oshihopaenenwa osho sha tulwa po kuJehova naJesus, otau ka kala oukwamutwe muwa. Ngeenge omukulukadi oha wanifa po onghandangala oyo ta dana, ohombo yavo otai ka kala ihafifa. Omukulukadi oku na okukala a tala ko ngahelipi oukwamutwe, nomashongo elipi a taalela? Oshitukulwa tashi shikula ko otashi ka nyamukula omapulo oo.