5-زەرتتەۋ ماقالاسى
«ٵربىر ەركەكتىڭ باسى — ٴماسىح»
«ٵربىر ەركەكتىڭ باسى — ٴماسىح» (قور. 1-ح. 11:3).
12-ٵن ۇلى قۇداي ەحوبا
اڭداتپا *
1. كوپتەگەن ەر ادامدارعا نە نارسە اسەر ەتىپ جاتادى؟
ٴسىز وتباسىندا باسشى بولۋ دەگەندى قالاي تۇسىنەسىز؟ كەيبىر ەر ادامدارعا مادەنيەتى، سالت-داستۇرلەر، ٷي ىشىندە كورگەن تاربيەسى قاتتى اسەر ەتەدى. ەۋروپادا تۇراتىن يانيتا ەسىمدى ايەل بىلاي دەيدى: «ٴبىز تۇراتىن جەردە ەر ادامدار ايەلدەردى تومەن ساناپ، ولاردى كۇڭ سياقتى كورەدى». ال قۇراما شتاتتاردا تۇراتىن ليۋك ەسىمدى ەر باۋىرلاستىڭ ايتۋىنشا، كەيبىر اكەلەر ۇلدارىنا «ايەلدەردى تىڭداما، ولاردىڭ ويلارى ماڭىزدى ەمەس» دەپ ۇيرەتەدى ەكەن. ٴبىراق ەحوبا ەر ادامداردىڭ ايەلدەرگە بۇلاي قاراعانىن قالامايدى (مارقا 7:13 سالىستىرىڭىز). ەر ادامدار وتباسىندا جاقسى باسشى بولۋدى قايدان ۇيرەنە الادى؟
2. جاقسى باسشى بولۋ ٷشىن ەر ادام نە نارسەنى ٴتۇسىنۋ كەرەك جانە بۇل نەگە ماڭىزدى؟
2 وتباسىندا جاقسى باسشى بولۋ ٷشىن ەر ادام نەنى ٴتۇسىنۋى كەرەك؟ ول الدىمەن ەحوبا ودان نەنى تالاپ ەتەتىنىن ٴبىلىپ الۋى قاجەت. سوسىن ەحوبا كەيبىر ادامدارعا نە ٷشىن بيلىك بەرگەنىن ٴتۇسىنىپ الۋى كەرەك. سونداي-اق ول ەحوبا مەن يسادان ۇلگى الۋدى ۇيرەنۋ كەرەك. بۇل نە ٷشىن ماڭىزدى؟ وتاعالارعا بيلىكتى ەحوبا بەرگەندىكتەن، ول وتاعالاردان سول بيلىكتى دۇرىس قولدانۋدى دا تالاپ ەتەدى (لۇقا 12:48ٵ).
باسشىلىق ٴپرينسيپى دەگەن نە؟
3. قورىنتتىقتارعا 1-حات 11:3 تە باسشىلىق پرينسيپىنە قاتىستى نە ايتىلعان؟
3 قورىنتتىقتارعا 1-حات 11:3 وقىڭىز. بۇل تارماقتا باسشىلىق ٴپرينسيپى جايلى، ياعني ەحوبانىڭ كوكتەگى جانە جەردەگى بالالارىنا قاتىستى ورناتقان قۇرىلىمى جايلى ايتىلادى. ەحوبا ەڭ جوعارعى بيلىك يەسى بولعاندىقتان، ول باسقالارعا بيلىك بەرەدى جانە سول بيلىك ٷشىن ەسەپ تالاپ ەتەدى (ريم. 14:10؛ ەفەس. 3:14، 15). مىسالى، ەحوبا يساعا قاۋىمداردىڭ ۇستىنەن قاراۋعا بيلىك بەردى. يسا قاۋىمدارعا قالاي قارايتىنى جونىندە ەحوباعا ەسەپ بەرەدى (قور. 1-ح. 15:27). ەحوبا ەر ادامعا دا بيلىك بەرگەن. ٴبىراق ەر ادام ايەلى مەن بالالارىنا قالاي قارايتىنى جونىندە ەحوباعا دا، يساعا دا ەسەپ بەرەدى (پەت. 1-ح. 3:7).
4. ەحوبا مەن يسانىڭ قانداي قۇقىقتارى بار؟
4 باسشىلىق ٴپرينسيپى بويىنشا، ەحوبا — بۇكىلالەمدىك وتباسىنىڭ باسى. سوندىقتان ول زاڭدار مەن ەرەجەلەر ورناتۋعا جانە بالالارىنان سولاردىڭ ورىندالۋىن تالاپ ەتۋگە قۇقىلى (يشايا 33:22). قاۋىمنىڭ باسى يسانىڭ دا زاڭدار مەن ەرەجەلەر ورناتىپ، سولاردىڭ ورىندالۋىن قاداعالاۋعا قۇقى بار (عال. 6:2؛ قول. 1:18—20).
5. وتاعالاردىڭ قانداي قۇقى بار جانە ولاردىڭ بيلىگى قاي جاعىنان شەكتەۋلى؟
5 ەحوبا مەن يسا سياقتى، ەر ادامنىڭ دا ٶز وتباسىندا ەرەجەلەر ورناتۋعا قۇقى بار، ٴبىراق ونىڭ بيلىگى شەكتەۋلى (ريم. 7:2؛ ەفەس. 6:4). سەبەبى ول ٶزىنىڭ ەرەجەلەرىن كيەلى كىتاپ پرينسيپتەرىنىڭ اياسىندا عانا ورناتا الادى (ناق. س. 3:5، 6). ٴبىراق ونىڭ ٶز وتباسىنان تىس ادامدارعا بيلىك ەتۋگە قۇقى جوق (ريم. 14:4). سونداي-اق بالالارى ەسەيىپ، ۇيدەن كەتكەندە، ول بۇدان بىلاي ولاردىڭ باسى بولمايدى. ٴبىراق بالالارى ونى اكەسى رەتىندە قۇرمەتتەي بەرەدى (مات. 19:5).
ەحوبا باسشىلىق ٴپرينسيپىن نە ٷشىن ورناتقان؟
6. ەحوبا باسشىلىق ٴپرينسيپىن نە ٷشىن ورناتقان؟
6 ەحوبانىڭ باسشىلىق ٴپرينسيپىن ورناتقان سەبەبى — وتباسىن جاقسى كورەدى. ول ٶز وتباسىنىڭ ٴتارتىپ پەن تاتۋلىقتا ٶمىر ٴسۇرىپ، باقىتتى بولعانىن قالايدى (قور. 1-ح. 14:33، 40). ەگەر باسشىلىق ٴپرينسيپى بولماعاندا، الەمدە بەيبەرەكەتتىك ورناپ، بارلىعى جاپا شەگەر ەدى. كىمنىڭ شەشىم قابىلداپ، كىمنىڭ سول شەشىمدى جۇزەگە اسىراتىنى دا تۇسىنىكسىز بولار ەدى.
7. ەفەستىكتەرگە 5:25، 28 گە ساي، ەحوبا كۇيەۋلەردىڭ ٶز ايەلدەرىنە قالاي قاراعانىن قالايدى؟
7 ەگەر ەحوبانىڭ باسشىلىققا قاتىستى ورناتقان قۇرىلىمى تاماشا قۇرىلىم بولسا، نەگە وندا ايەلدەر كۇيەۋلەرىنەن ٴجابىر كورىپ ٴجۇر؟ مۇنىڭ سەبەبى — كوپتەگەن وتاعالار ەحوبانىڭ وتباسىنا قاتىستى بەرگەن زاڭ-تالابىنا مويىنسۇنبايدى. ولار جەرگىلىكتى سالت-داستۇرلەر مەن مادەنيەتتىڭ ىقپالىنا بەرىلگەن. ال كەيبىرەۋلەر ايەلدەر ەر ادامنىڭ قاجەتتىلىگىن قاناعاتتاندىرۋ ٷشىن جارالعان دەپ ويلايدى. مىسالى، ولار وزگەلەردىڭ الدىندا «ناعىز ەركەك» بولىپ كورىنۋ ٷشىن ايەلدەرىنە وكتەمدىك ەتەدى. يا بولماسا «ايەلىم مەنى جاقسى كورمەسە جاقسى كورمەي اق قويسىن، ٴبىراق مەنەن قورقاتىن بولسىن. سوندا وعان ايتقانىمدى ىستەتە الامىن» دەپ ويلاۋى مۇمكىن *. وسىنداي كوزقاراستاردىڭ كەسىرىنەن ايەلدەردىڭ قادىر-قاسيەتى تاپتالىپ جاتىر. ٴبىراق ەحوبانىڭ قالاعانى — بۇل ەمەس (ەفەستىكتەرگە 5:25، 28 وقىڭىز).
ەر ادام وتباسىندا جاقسى باسشى بولۋدى قايدان ۇيرەنە الادى؟
8. ەر ادام وتباسىندا جاقسى باسشى بولۋدى قايدان ۇيرەنسە بولادى؟
8 ەر ادام وتباسىندا جاقسى باسشى بولۋدى ەحوبا مەن يسادان ۇيرەنە الادى. ەحوبا مەن يسا ٶز بيلىكتەرىن قولدانعان كەزدە تاماشا قاسيەتتەر تانىتادى. قازىر سولاردىڭ ەكەۋىنە عانا توقتالايىق. سول ەكى قاسيەتتى وتاعاسى ٶز وتباسىندا قالاي تانىتسا بولادى؟
9. ەحوبانىڭ كىشىپەيىل ەكەنى نەدەن كورىنەدى؟
9 كىشىپەيىلدىلىك. ەحوبا — الەمدەگى ەڭ دانا تۇلعا. سوندا دا ول ٶز قىزمەتشىلەرىنىڭ پىكىرىن تىڭدايدى (مۇس. 1-ج. 18:23، 24، 32). كەيدە ٴتىپتى ۇسىنىستار ايتۋعا مۇمكىندىك بەرەدى (پات. 1-ج. 22:19—22). سونداي-اق ەحوبا — كەمەلدى تۇلعا. ٴبىراق ول كەمەلسىز پەندەلەردەن ەشقاشان مىنسىزدىكتى تالاپ ەتپەيدى. ول ٶزىنىڭ قىزمەتشىلەرىنە كىشىپەيىلدىلىكپەن كومەكتەسەدى (ٴزاب. 113:6، 7). كيەلى كىتاپتا ٴتىپتى ەحوبا ٴبىزدىڭ كومەكشىمىز ەكەنى ايتىلعان (ٴزاب. 27:9؛ ەۆر. 13:6). مىسالى، ٴداۋىت ەحوبانىڭ كىشىپەيىلدىلىكپەن كومەكتەسكەنىنىڭ ارقاسىندا عانا ۇلى ىستەر اتقارا العانىن ايتقان (سام. 2-ج. 22:36).
10. يسانىڭ كىشىپەيىلدىلىگى نەدەن كورىندى؟
10 ەندى يساعا كەلەر بولساق، ول يە ٵرى ۇستاز بولعان. سوعان قاراماستان ول شاكىرتتەرىنىڭ اياقتارىن جۋعان. ەحوبانىڭ بۇل وقيعانى كيەلى كىتاپقا جازدىرعان سەبەبى — ول ادامدار، سونىڭ ىشىندە وتاعالار يسادان ۇلگى السىن دەدى. يسانىڭ ٶزى: «مەن نە ىستەسەم، سەندەر دە سولاي ىستەسىن دەپ، ۇلگى كورسەتتىم»،— دەگەن (جوح. 13:12—17). يسا — وتە جوعارى بيلىك يەسى. ٴبىراق ول وزگەلەردەن وزىنە قىزمەت ەتۋدى تالاپ ەتپەگەن، قايتا، ٶزى باسقالارعا قىزمەت ەتكەن (مات. 20:28).
كىشىپەيىل ٵرى ٴسۇيۋشى وتاعالار ٷي تىرلىكتەرىنە كومەكتەسەدى جانە وتباسىنىڭ رۋحاني قاجەتتىلىگىن قامدايدى (11، 13-ابزاستى قاراڭىز)
11. وتاعالار ەحوبا مەن يسانىڭ كىشىپەيىلدىلىگىنەن نە نارسەگە ۇيرەنە الادى؟
11 ۇيرەنەرىمىز. ەحوبا مەن يسانىڭ كىشىپەيىلدىلىگى وتاعالار ٷشىن تاماشا ۇلگى. ولارعا ەلىكتەيتىن وتاعالار ايەلى مەن بالالارىنان كەمەلدىلىكتى تالاپ ەتپەيدى. سونداي-اق وزىنىكىنە قايشى بولسا دا، ولاردىڭ پىكىرلەرىن تىڭدايدى. وسى ورايدا مارلي ەسىمدى ايەل باۋىرلاس بىلاي دەيدى: «كۇيەۋىم ەكەۋمىزدىڭ ويىمىز ٴبىر جەردەن شىقپايتىن كەزدەر دە بولادى. سونداي كەزدەرى ول مەنىڭ پىكىرىمدى مۇقيات تىڭداپ، ٴبارىن سارالاپ-سالماقتاپ، سودان كەيىن عانا شەشىم قابىلدايدى. سونداي كەزدە ونىڭ مەنى قانشالىقتى قۇرمەتتەيتىنىن كورىپ، ريزا بولىپ قالامىن». كەيبىر مادەنيەتتە ٷي شارۋاسىمەن اينالىسۋ ايەلدىڭ تىرلىگى دەپ قاراستىرىلادى. ٴبىراق كىشىپەيىلدىلىك تانىتاتىن وتاعاسى بۇنداي ىستەردى اتقارۋدان ۇيالمايدى. مىسالى، يسانىڭ ٶزى شاكىرتتەرىنىڭ اياعىن جۋىپ، قۇلدار اتقاراتىن تىرلىكتى ىستەگەن. «مەن تۋىپ-وسكەن جەردە ەر ادام ايەلىنە كومەكتەسىپ، ٷي جيناپ، ىدىس جۋاتىن بولسا، كورشىلەرى مەن تۋىستارى بىردەن «مىناۋ ەركەك ەمەس، ايەلىنىڭ ايتقانىنان شىعا المايدى» دەپ جاتادى»،— دەيدى رەيچەل ەسىمدى ايەل باۋىرلاس. وتباسىندا جاقسى باسشى بولعىسى كەلەتىن ەر ادام وزگەلەردىڭ الدىنداعى ابىرويىن ەمەس، ايەلى مەن بالا-شاعاسىنىڭ باقىتىن ويلايدى. وتاعالار ەحوبا مەن يسادان كىشىپەيىلدىلىكتەن بولەك تاعى ٴبىر قاسيەتكە ۇيرەنە الادى.
12. ەحوبا مەن يسانىڭ ٴبىزدى جاقسى كورەتىنى نەدەن كورىنەدى؟
12 سۇيىسپەنشىلىك. ەحوبانىڭ ٴبىزدى جاقسى كورەتىنى بارلىق نارسەدەن كورىنەدى (جوح. 1-ح. 4:7، 8). ول ٴبىزدىڭ بارلىق قاجەتتىلىكتەرىمىزدى قامدايدى. رۋحاني توق ٴجۇرۋىمىز ٷشىن كيەلى كىتاپتى، ٶز ۇيىمىن بەردى. ەموسيالىق جاعىنا كەلسەك، كوڭىلىمىز توق بولۋ ٷشىن ٴبىزدى جاقسى كورەتىنىن ۇنەمى ٴبىلدىرىپ وتىرادى. ەحوبا ماتەريالدىق قاجەتتىلىكتەرىمىزدى دە قامداپ، «ٴبىز راقاتىن كورۋ ٷشىن ٴبارىن مولىنان قامتاماسىز ەتتى» (ٴتىم. 1-ح. 6:17). ٴتىپتى قاتەلىك جاساپ قويعان كەزدە دە، ەحوبا ٴبىزدى جاقسى كورە بەرەدى. ول ٴبىزدى سۇيىسپەنشىلىكپەن تۇزەتەدى. ونىڭ ٴبىزدى جاقسى كورەتىنى سونشا — ٶزىنىڭ سۇيىكتى ۇلىن ٴبىز ٷشىن قۇربان ەتتى. ال يساعا كەلەر بولساق، ول ٶزىنىڭ ٶمىرىن ٴبىز ٷشىن قيۋىمەن ٴبىزدى قانشالىقتى جاقسى كورەتىنىن كورسەتتى (جوح. 3:16؛ 15:13). ەحوبا مەن يسانىڭ سۇيىسپەنشىلىگىنەن ٴبىزدى ەش نارسە دە ايىرا المايدى (جوح. 13:1؛ ريم. 8:35، 38، 39).
13. نەلىكتەن وتاعالاردىڭ ٵربىر ىسىنەن ٶز وتباسىن سۇيەتىنى كورىنىپ تۇرۋ كەرەك؟ (« ەندى عانا ۇيلەنگەن بولساڭىز، ايەلىڭىزدىڭ قۇرمەتىنە يە بولۋ ٷشىن نە ىستەي الاسىز؟» دەگەن قورشاۋدى دا قاراڭىز.)
13 ۇيرەنەرىمىز. وتاعالاردىڭ ٵربىر ىسىنەن وتباسىن جاقسى كورەتىنى كورىنىپ تۇرۋى كەرەك. بۇل وتە ماڭىزدى. سەبەبى كيەلى كىتاپتا: «كوز الدىنداعى باۋىرلاسىن، [ياعني وتباسىن] سۇيمەيتىن كىسى كوزىمەن كورمەگەن قۇدايدى سۇيە المايدى»،— دەلىنگەن (جوح. 1-ح. 4:11، 20). ەحوبا مەن يسادان ۇلگى الاتىن جانە وتباسىن جاقسى كورەتىن وتاعالار وتباسىنىڭ رۋحاني، ەموسيالىق جانە ماتەريالدىق قاجەتتىلىكتەرىن قامتاماسىز ەتەدى (ٴتىم. 1-ح. 5:8). سونداي-اق بالالارىن تاربيەلەپ، جونگە سالىپ وتىرادى. ال شەشىمدەر قابىلداعان كەزدە، وتباسىنىڭ يگىلىگىن جانە ەحوباعا ماداق اكەلۋدى ويلايدى. قازىر وتاعالار وسى مىندەتتەرىن اتقارعان كەزدە ەحوبا مەن يساعا قالاي ەلىكتەي الاتىندارىن كورەيىك.
وتاعالارعا قانداي جاۋاپكەرشىلىك جۇكتەلگەن؟
14. وتاعالار وتباسىنىڭ رۋحاني قاجەتتىلىگىن قامداۋ ٷشىن نە ىستەۋ كەرەك؟
14 وتباسىنىڭ رۋحاني قاجەتتىلىگىن قامداۋ. ەحوبا ٶز وتباسىنىڭ رۋحاني كۇيىن ويلايتىنى سياقتى، يسا دا ٸزباسارلارىنىڭ رۋحاني توق ٴجۇرۋىن قامداعان (مات. 5:3، 6؛ مار. 6:34). وتاعالار دا ٴبىرىنشى كەزەكتە وتباسىنىڭ رۋحاني قاجەتتىلىكتەرىن قامتاماسىز ەتۋ كەرەك (مۇس. 5-ج. 6:6—9). بۇل ٷشىن ولار وتباسى مۇشەلەرىنە كيەلى كىتاپتى وقىپ، تەرەڭ زەرتتەۋگە، قاۋىم كەزدەسۋلەرىنە بارۋعا، ۋاعىزعا شىعۋعا جانە ەحوبامەن جەكە قارىم-قاتىناس دامىتۋعا كومەكتەسۋ كەرەك.
15. وتباسىنىڭ ەموسيالىق قاجەتتىلىكتەرىن قاناعاتتاندىرۋدىڭ ٴبىر جولى قانداي؟
15 وتباسىنىڭ ەموسيالىق قاجەتتىلىگىن قامداۋ. ەحوبا باسقالاردىڭ كوزىنشە يسانى جاقسى كورەتىنىن ٴبىلدىرىپ وتىرعان (مات. 3:17). يسا دا ٸزباسارلارىن جاقسى كورەتىنىن سوزىمەن دە، ىسىمەن دە كورسەتكەن. سونىڭ ارقاسىندا ٸزباسارلارى دا يسانى جاقسى كورەتىندەرىن ايتۋعا قىسىلماعان (جوح. 15:9، 12، 13؛ 21:16). تۋرا سول سياقتى، وتاعالار دا ايەلى مەن بالالارىن جاقسى كورەتىنىن ىسىمەن جانە سوزىمەن كورسەتىپ وتىرۋ كەرەك. مىسالى، ولارمەن بىرگە وتىرىپ كيەلى كىتاپتى زەرتتەسە بولادى. سونداي-اق ولاردى جاقسى كورەتىنىن، باعالايتىنىن ايتىپ، ورىندى بولسا، وزگەلەردىڭ الدىندا ماقتاسا بولادى (ناق. س. 31:28، 29).
ەحوباعا ۇنامدى بولعىسى كەلەتىن وتاعالار وتباسىنىڭ ماتەريالدىق قاجەتتىلىگىن قامدايدى (16-ابزاستى قاراڭىز)
16. وتاعالار تاعى نە ىستەۋ كەرەك جانە ولار نەدەن ساق بولۋلارى قاجەت؟
16 وتباسىنىڭ ماتەريالدىق قاجەتتىلىگىن قامداۋ. ەحوبا يسرايلدىكتەر قاتەلىكتەرى ٷشىن ٴشول دالانى كەزىپ جۇرگەن كەزدە دە ولاردىڭ نەگىزگى قاجەتتىلىكتەرىن قامداعان (مۇس. 5-ج. 2:7؛ 29:5). ەحوبا بۇگىندە ٴبىزدىڭ دە ەڭ قاجەت دەگەن نارسەلەرىمىزدىڭ بولۋىن قامدايدى (مات. 6:31—33؛ 7:11). ال يساعا كەلەر بولساق، ول سوڭىنان ەرگەندەردى تاماقتاندىرعان (مات. 14:17—20). سولاردىڭ ىشىندە كوپتەگەن اۋرۋلاردى ساۋىقتىرعان (مات. 4:24). وتاعالار دا ەحوبا مەن يساعا ەلىكتەپ، ماتەريالدىق جاعىنان وتباسىنىڭ جاعدايىن جاساۋ كەرەك. ٴبىراق ولار جۇمىسقا باسىمەن كىرىپ كەتۋدەن ساق بولۋ كەرەك. ويتكەنى وتباسىنىڭ رۋحاني جانە ەموسيالىق مۇقتاجدىعىن ساپالى تۇردە قاناعاتتاندىرۋعا ۋاقىتى مەن كۇشى قالۋ كەرەك.
17. ٴتالىم بەرىپ، جونگە سالۋ جاعىنان ەحوبا مەن يسا قانداي ۇلگى كورسەتەدى؟
17 ٴتالىم-تاربيە بەرۋ. ەحوبا بىزگە ٴتالىم بەرىپ، جونگە سالعان كەزدە ٴبىرىنشى كەزەكتە ٴبىزدىڭ قامىمىزدى ويلايدى (ەۆر. 12:7—9). يسا جەردە بولعان كەزدە، تۋرا اكەسى سياقتى ارەكەت ەتكەن. ول ٵردايىم ٸزباسارلارىنا جۇمساقتىقپەن، سۇيىسپەنشىلىكپەن ٴتالىم بەرگەن (جوح. 15:14، 15). ٴبىراق قاجەت كەزدە مەيىرىممەن ناقتى كەڭەستەر دە بەرگەن (مات. 20:24—28). ول ٸزباسارلارىنىڭ كەمەلسىز ٵرى قاتەلىكتەر جاساپ قويۋعا بەيىم ەكەنىن جاقسى تۇسىنگەن (مات. 26:41).
18. وتباسىندا جاقسى باسشى بولا بىلەتىن ەر ادامدار نەنى ۇمىتپايدى؟
18 ەحوبا مەن يساعا ەلىكتەيتىن وتاعالار ايەلى مەن بالالارىنىڭ كەمەلسىز ەكەنىن ۇمىتپايدى. ولار قاتەلىك جاساپ قويعان جاعدايدا اشۋعا بۋلىعىپ، دورەكىلىك كورسەتپەيدى (قول. 3:19، ٴسىلت.). قايتا، ٶزىنىڭ دە كەمەلسىز ەكەنىن ەسكەرىپ، عالاتتىقتارعا 6:1 گە ساي، ولاردى جۇمساقتىقپەن تۇزەتەدى. يسا سياقتى، وتاعالار وزدەرى ۇلگى كورسەتۋ كەرەك. ٴتالىم بەرۋدىڭ ەڭ جاقسى جولى — وسى (پەت. 1-ح. 2:21).
19، 20. وتاعالار شەشىم قابىلداعاندا ەحوبا مەن يساعا قالاي ەلىكتەي الادى؟
19 وزگەلەردىڭ پايداسىنا اساتىن شەشىمدەر قابىلداۋ. ەحوبا شەشىم قابىلداعاندا، وزگەلەردىڭ يگىلىگىن ويلايدى. ومىرگە باستاۋ بەرگەن كەزدە ول ٴبىزدىڭ يگىلىگىمىزدى ويلاپ، ومىردەن ٴلاززات العانىمىزدى قالاعان. ول ٶزىنىڭ سۇيىكتى ۇلىن ٴبىزدىڭ كۇنالارىمىز ٷشىن قۇربان ەتكەندە دە ٶزىن ەمەس، ٴبىزدىڭ قامىمىزدى ويلاعان. يسا دا شەشىمدەر قابىلداعاندا ٴبىرىنشى كەزەكتە وزگەلەردى ويلاعان (ريم. 15:3). بىردە ول قاتتى شارشاپ تۇرعانىنا قاراماي، قالىڭ جۇرتقا ٴتالىم بەرگەن (مار. 6:31—34).
20 جاقسى وتاعاسى وتباسىندا شەشىم قابىلداۋ ۇلكەن جاۋاپكەرشىلىك ەكەنىن تۇسىنەدى، سوندىقتان وعان اتۇستى قارامايدى. ول ويلانباستان شەشىم قابىلداي سالمايدى جانە شەشىمدەرى كوڭىل-كۇيىنە بايلانىستى بولمايدى. ول دانا شەشىمدەر قابىلداۋدى ەحوبادان ۇيرەنەدى * (ناق. س. 2:6، 7). سونىڭ ارقاسىندا ول وزىنە ەمەس، وزگەلەرگە پايداسى تيەتىن شەشىمدەر قابىلدايدى (ٴفىلىپ. 2:4).
21. كەلەسى ماقالا نە جايلى بولماق؟
21 ەحوبانىڭ وتاعالارعا جۇكتەگەن جاۋاپكەرشىلىگى وڭاي جۇك ەمەس. سويتسە دە ول وتاعالاردان ٶز مىندەتتەرىن دۇرىس اتقارۋدى تالاپ ەتەدى. ٴبىراق ەحوبا مەن يسانىڭ ۇلگىسىنە ەلىكتەيتىن وتاعالار ٵردايىم جەتىستىككە جەتەدى. وتباسىنىڭ باقىتى ايەلگە دە بايلانىستى. ول باسشىلىق پرينسيپىنە قالاي قاراۋ كەرەك؟ ول قانداي قيىندىقتارعا كەزىگۋى مۇمكىن؟ كەلەسى ماقالادا ٴبىز وسى جايلى قاراستىرامىز.
16-ٵن ەحوبانى پاتشالىعى ٷشىن ماداقتاڭدار!
^ 5-ابزاس ەر ادام ۇيلەنگەن كەزدە، ٶز وتباسىنىڭ باسشىسىنا اينالادى. وسى ورايدا بۇل ماقالادا ٴبىز مىناداي سۇراقتاردى قاراستىرامىز: باسشىلىق ٴپرينسيپى دەگەن نە؟ ونى ەحوبا نە ٷشىن ورناتقان؟ وتاعالار ەحوبا مەن يسادان قانداي ۇلگى الا الادى؟ كەلەسى ماقالادا ٴبىز كۇيەۋلەر مەن ايەلدەر يسادان جانە كيەلى كىتاپ كەيىپكەرلەرىنەن نە نارسەگە ۇيرەنەتىنىن كورەمىز. ال ٷشىنشى ماقالادا باسشىلىق ٴپرينسيپى بويىنشا ەر باۋىرلاستارعا قاۋىمدا قانداي بيلىك بەرىلگەنىن قاراستىراتىن بولامىز.
^ 7-ابزاس كوپ ادامدار ايەلدەرگە قورلىق كورسەتۋ، ۇرىپ-سوعۋ جايلى فيلمدەردەن، انەكدوتتاردان، ٵزىل-سىقاق باعدارلامالارىنان ٴجيى كورىپ-ەستيدى. سوندىقتان ەر ادامداردىڭ ايەلدەرگە سولاي قاراۋىنا بولادى دەگەن كوزقاراس تۋۋى مۇمكىن.
^ 20-ابزاس دانا شەشىمدەر قابىلداۋعا قاتىستى كوبىرەك ٴبىلۋ ٷشىن، «قابىلداعان شەشىمدەرىڭ قۇدايعا ماداق اكەلسىن» دەگەن ماقالانى قاراڭىز («كۇزەت مۇناراسى» (حانزۇشا)، 2011-جىل، 15-ٴساۋىر، 13—17-بەتتەر).
