1. Һьнә кәс ль сәритийе чаԝа дьньһерʹьн?

ГАВА тӧ хәбәра «сәрити» дьбьһейи, чь те һʹьше тә? Һьнә мер сәритийа хԝә малбәтеда ль гора әʹрф-әʹдәт йан ль гора ньһерʹандьна мәрьвед хԝә тиньн сери. Хушкәкә бь наве Йанита, йа кӧ ль Әԝропайе дьжи, ӧса дьбежә: «Ԝәлате мәда, гәләк мәрьв дьфькьрьн кӧ жьн жь мера ньмьзтьр ьн, у жьна ча хӧлам һʹәсаб дькьн.» Бьраки бь наве Лука, йе кӧ ль Америкайе дьжи, ӧса дьбежә: «Һьнә бав кӧрʹед хԝә һин дькьн кӧ жьн гәрәке дәнге хԝә нәкьн, у кӧ ньһерʹандьна жьна ԛәт фәрз нинә.» Ле фькьред ӧса шаш ьн. Йаһоԝа нахԝазә кӧ мер рола хԝә бь ви щурʹәйи биньн сери (Марԛос 7:13 жи бьньһерʹә). Гәло мер чаԝа дькарә бона малбәта хԝә бьбә малхеки баш?

2. Гәрәке сәре малбәте чь бьзаньбә, у чьма?

² Сәва кӧ мер бьбә сәре малбәтейә баш, гәрәке әԝ фәʹм бькә кӧ Йаһоԝа жь ԝи чь дьхԝазә. Гәрәке әԝ бьзаньбә кӧ чьма Йаһоԝа сәрити саз кьрийә у чаԝа әԝ дькарә чʹәʹв бьдә Йаһоԝа у Иса Мәсиһ. Чьма фәрз ә кӧ мер ван тьшта һин бьбә? Чьмки Йаһоԝа әв щабдари дайә сәре малбәте, у дьхԝазә кӧ әԝ ве щабдарийе рʹаст бинә сери (Луԛа 12:48б).

3. Готьнед жь 1 Корьнтʹи 11:3 дәрһәԛа сәритийе чь мә һин дькә?

³ 1 Корьнтʹи 11:3 бьхунә. Әв рʹез нишани мә дькә кӧ Йаһоԝа малбәта хԝә йа ль әʹзмана у ль сәр әʹрде чаԝа организә кьрийә. Сәрити һʹӧкӧм у щабдарийева гьредайи йә. Йе һәри бьльнд Йаһоԝа йә, ләма жи һʹәму мәләк у инсан ль бәр ԝи щабдар ьн (Рʹомайи 14:10; Әфәси 3:14, 15). Йаһоԝа сәрԝертийа ль сәр щьвате дайә дәсте Иса Мәсиһ, ле Иса диса жи бона хер- хԝәшийа щьвате ль бәр  Йаһоԝа щабдар ә (1 Корьнтʹи 15:27). Ӧса жи, Йаһоԝа щабдари ль сәр жьн у зарʹа дайә дәсте мер, ле мер бона хер-хԝәшийа малбәте һьм ль бәр Йаһоԝа һьм жи ль бәр Иса Мәсиһ щабдар ә (1 Пәтрус 3:7).

4. Һʹӧкӧме Йаһоԝа у Иса Мәсиһ һәйә кӧ чь бькьн?

⁴ Йаһоԝа сәре малбәта хԝә йа ль сәр әʹрд у ль сәр әʹзмен ә. Ләма жи, изьна ԝи һәйә кӧ бона зарʹед хԝә ԛәйд-ԛануна дайнә, у һәгәр йәк жь ԝан гӧһ нәдә ван ԛәйд-ԛануна, Йаһоԝа дькарә ширәте бьдә ԝи у ԝи рʹаст бькә (Ишайа 33:22). Ле Иса Мәсиһ сәре щьвате йә, ләма һʹӧкӧме ԝи жи һәйә кӧ ԛәйд-ԛануна бона ван дайнә (Галати 6:2; Колоси 1:18-20).

5. Һʹӧкӧме сәре малбәте һәйә кӧ чь бькә, у чь синоред ԝи һәнә?

⁵ Мина Йаһоԝа у Иса Мәсиһ, һʹӧкӧме сәре малбәте жи һәйә кӧ бона малбәта хԝә сафикьрьна бькә (Рʹомайи 7:2; Әфәси 6:4). Ле йәкә, синоред һʹӧкӧме ԝи һәнә. Мәсәлә, ԛәйдед кӧ әԝ бона малбәте датинә, гәрәке сәр һʹиме принсипед Кʹьтеба Пироз бьн (Мәтʹәлок 3:5, 6). Ӧса жи, изьна сәре малбәте тʹӧнә ԝәки бона кәсе кӧ нәфәре малбәта ԝи нинә, ԛәйда дайнә (Рʹомайи 14:4). Хенщи ве йәке, гава зарʹ мәзьн дьбьн у жь мале дьчьн, һәмьки әԝана диса жи ԛәдре баве хԝә дьгьрьн, ле ида бьн һʹӧкӧме ԝида ниньн (Мәтта 19:5).

6. Йаһоԝа чьма һʹӧкӧм дайә һьнә кәса?

⁶ Йаһоԝа малбәта хԝә һʹьз дькә, ләма жи әԝи һʹӧкӧм дайә һьнә кәса. Әв йәк пʹешкʹешәкә жь Хԝәде йә, чьмки бь сайа сәритийе, малбәта Йаһоԝа бь организә йә у әʹдьлайеда нә (1 Корьнтʹи 14:33, 40). Һәгәр сәрити тʹӧнә буйа, малбәта Йаһоԝа ԝе нә бь организә нә жи бәхтәԝар буйа. Мәсәлә, тʹӧ кәси ԝе ньзаньбуйа кӧ кʹе гәрәке сафикьрьна бькә у кʹе гәрәке ван сафикьрьна бинә сери.

7. Ль гора Әфәси 5:25, 28, Йаһоԝа дьхԝәзә кӧ мер һьндава жьна хԝәда чаԝа бә?

⁷ Һәгәр сәрити тьштәки ӧса баш ә, гәләк жьн чьма бьн сәритийа меред хԝәда дьнальн? Проблем әв ә кӧ гәләк мер гӧһ надьн ԛанунед кӧ Йаһоԝа бона малбәте данинә, ле гӧһ дьдьн әʹрф-әʹдәтед мьһале йан мьләте хԝә. Ӧса жи, һьнә мер хԝәһʹьз ьн у тʹәви жьнед хԝә сәрт ьн. Бь ви щурʹәйи әԝана дьбәкә дьхԝазьн хԝәбаԝәрийа хԝә зедә бькьн йан жь кәсед дьнрʹа избат кьн кӧ әԝ «мер ьн». Әԝ бәлки дьфькьрьн кӧ тьште һәри фәрз нә әв ә кӧ жьн мере хԝә һʹьз бькә, ле әԝ гәрәке жь ԝи бьтьрсә. Меред ӧса, тьрсе дьдьнә хәбате ԝәки жьна хԝә контрол бькьн. * Меред кӧ бь ви щурʹйи дьфькьрьн у ӧса дькьн, ԛәдре жьна хԝә нагьрьн у рʹастә-рʹаст ль һьмбәри хԝәстьна Йаһоԝа дәртен (Әфәси 5:25, 28 бьхунә).

8. Мер чаԝа дькарә бьбә малхе баш?

⁸ Сәва кӧ мер бона малбәта хԝә бьбә малхе баш, әԝ гәрәке чʹәʹв бьдә Йаһоԝа у Иса Мәсиһ. Ньһа әме дина хԝә бьдьн дӧ һӧнӧра, кӧ Йаһоԝа у Иса Мәсиһ әʹйан дькьн, у әме бьвиньн кӧ сәре малбәте чаԝа дькарә ван һӧнӧра жьн у зарʹед хԝәрʹа әʹйан бькә.

9. Йаһоԝа мьлуктийа хԝә чаԝа нишан дькә?

 ⁹ Мьлукти. Тʹӧ кәс мина Йаһоԝа билан нинә. Ле диса жи, әԝ гӧһ дьдә ньһерʹандьнед хьзмәткʹаред хԝә (Дәстпебун 18:23, 24, 32). Әԝ изне дьдә ԝан кӧ әԝана фькред хԝә бежьн (1 Пʹадшати 22:19-22). Йаһоԝа йәки беԛьсур ә, ле әԝ беԛьсуртийе жь мә дәʹԝа накә, ле сәрда жи али мә дькә ԝәки әм пешдачуйи бьн (Зәбур 113:6, 7). Кʹьтеба Пирозда те готьне ԝәки Йаһоԝа «аликʹар» ә (Зәбур 27:9; Ибрани 13:6). Даԝьд Пʹадша заньбу кӧ әԝи тʹәне бь сайа мьлукти у аликʹарийа Йаһоԝа дькарьбу щабдарийед хԝәйә мәзьн бинә сери (2 Самуйел 22:36).

10. Иса Мәсиһ мьлуктийа хԝә чаԝа нишан кьр?

¹⁰ Мәсәла Иса Мәсиһ бинә бәр чʹәвʹе хԝә. Рʹаст ә әԝ «Хӧдан» у «Дәрсдар» бу, ле йәкә әԝи ньгед шагьртед хԝә шуштьн. Гәло Йаһоԝа әв сәрһати чьма дь Кʹьтеба Пирозда дайә ньвисаре? Мәʹник әв ә кӧ Йаһоԝа дьхԝәст сәред малбәтарʹа у кәсед дьнрʹа мәсәләкә баш нишан кә. Иса Мәсиһ ӧса гот: «Мьн нәхшәк нишани ԝә кьр, ԝәки чаԝа мьн бона ԝә кьр, һун жи ӧса бькьн» (Йуһʹәнна 13:12-17). Һʹӧкӧме Иса Мәсиһ чьԛас мәзьн бу жи, әԝи нәдьхԝәст кӧ кәсед дьн жерʹа бәрдәстийе бькьн, ле әԝи ԝанрʹа бәрдәстийе дькьр (Мәтта 20:28).

11. Сәре малбәте дәрһәԛа мьлуктийе, жь Йаһоԝа у Иса Мәсиһ чь дькарә һин бә?

¹¹ Дәрс бона мә. Сәре малбәте дькарә мьлуктийа хԝә гәләк тьштада бьдә кʹьфше. Мәсәлә, гәрәке әԝ жь жьн у зарʹед хԝә беԛьсуртийе дәʹԝа нәкә. Һәгәр нәфәред мале тʹәви ньһерʹандьнед ԝи ԛайил ниньн, ԝе диса жи баш бә кӧ сәре малбәте гӧһ бьдә ньһерʹандьнед ԝан. Хушкәкә бь наве Марли, йа кӧ ль Америкайе дьжи, ӧса дьбежә: «Ньһерʹандьна мьн щарна жь ньһерʹандьна мере мьн щӧдә йә. Диса жи, әз заньм кӧ әԝ ԛәдьре мьн дьгьрә, чьмки пешийа кӧ әԝ сафикьрьнәки дькә, әԝ фькьра мьн дьпьрсә у ль сәр ве кʹур дьфькьрә.» Ӧса жи, мәрьв чьԛас бьфькьрә кӧ ише мале нә ише мера ә жи, мерәки мьлук һазьр ә кӧ шьхӧлед маледа аликʹарийа жьна хԝә бькә. Ле гәло әв йәк щарна  чьма һеса нинә? Хушкәкә бь наве Рейчел ӧса дьбежә: «Ль мьһала мә, һәгәр мер али жьна хԝә бькә у фьраԛа бьшо йан мале тʹәмьз кә, щинар у мәрьвед ԝи ԝе бьфькьрьн кӧ әԝ нә мер ә. Әԝе бежьн кӧ әԝи жьна хԝә данийә сәр сәре хԝә.» Һәгәр мьһала тәда ньһерʹандьнәкә ӧса һәйә, бир нәкә кӧ гава Иса Мәсиһ ньгед шагьртед хԝә шуштьн, мәрьвед ԝедәре әв шьхӧл һʹәсаб дькьрьн ча шьхӧле хӧлама. Бона малхеки баш, тьште һәри фәрз нә әв ә кӧ мәрьвед дьн ԝи ча «щамерәки мерхас» бьвиньн, ле кӧ жьн у зарʹед ԝи бәхтәԝар бьн. Хенщи мьлуктийе, гәло сәре малбәте гәрке диса кʹижан һӧнӧр нав хԝәда пешда бинә?

12. Әм жь кӧ заньн кӧ Йаһоԝа у Иса Мәсиһ мә һʹьз дькьн?

¹² Һʹьзкьрьн. Һʹәму кьрьнед Йаһоԝа һʹьзкьрьнева гьредайи нә (1 Йуһʹәнна 4:7, 8). Жь һʹьзкьрьне, Йаһоԝа бона һʹәму һʹәԝщед мәйә рʹӧһʹани хәм дькә. Рʹож бь рʹож, әԝ нишани мә дькә кӧ әԝ мә һʹьз дькә. Мәсәлә, Хԝәде бь сайа Кʹьтеба Пироз у тʹәшкиләта хԝә бона мә хәм дькә. Ӧса жи, Йаһоԝа «һәр тьшти бь мәрʹдани дьдә мә, ԝәки әм мьраз пе бькьн» (1 Тимотʹейо 6:17). Гава әм шашийа дькьн, Йаһоԝа мә рʹаст дькә, ле әԝ диса жи мә һʹьз дькә. Жь һʹьзкьрьне, Йаһоԝа кӧрʹе хԝә кьрә ԛӧрбан. Иса Мәсиһ жи мә пʹьрʹ һʹьз дькә, ләма жи әԝи әʹмьре хԝә бона мә кьрә ԛӧрбан (Йуһʹәнна 3:16; 15:13). Бәле, Йаһоԝа у Иса Мәсиһ кәсед кӧ ԝанрʹа амьн ьн, һʹьз дькьн, у тʹӧ тьшт нькарә ԝана жь ве һʹьзкьрьне вәԛәтинә (Йуһʹәнна 13:1; Рʹомайи 8:35, 38, 39).

13. Чьма фәрз ә ԝәки сәре малбәте нишан кә кӧ әԝ малбәта хԝә һʹьз дькә? (Бьньһерʹә чаргошә бь наве « Мерәки кӧ Тʹәзә Зәԝьщи йә Чаԝа Дькарә Ԛәдьре Жьна Хԝә Ԛазанщ кә?».)

¹³ Дәрс бона мә. Гәрәке сәре малбәте жи һәр тьшти жь һʹьзкьрьне бькә. Гәло әв йәк чьма фәрз ә? Йуһʹәннайе шанди ӧса дьбежә: «Һәгәр әԝе бьре хԝә кӧ дьбинә һʹьз накә, ԝе чаԝа бькарьбә  Хԝәде һʹьз бькә кӧ набинә?» (1 Йуһʹәнна 4:11, 20). Мина Йаһоԝа у Иса Мәсиһ, әв мере кӧ малбәта хԝә һʹьз дькә, гәрәке бона һʹәԝщед ԝанә физики у рʹӧһʹани хәм бькә (1 Тимотʹейо 5:8). Гәрәке әԝ зарʹед хԝә һин кә у ширәт кә. Ӧса жи, гәрәке әԝ һин бә сафикьрьнед ӧса бькә, йед кӧ ԝе Йаһоԝа рʹумәт кьн, у малбәта ԝирʹа кʹаре биньн. Ньһа әме шеԝьр кьн у бьвиньн кӧ сәре малбәте чаԝа дькарә ве йәкеда чʹәʹв бьдә Йаһоԝа у Иса Мәсиһ.

14. Сәре малбәте чаԝа дькарә али жьн у зарʹед хԝә бькә кӧ әԝана незики Йаһоԝа бьн?

¹⁴ Али жьн у зарʹед хԝә бькә кӧ әԝ незики Йаһоԝа бьн. Мина Йаһоԝа, Иса Мәсиһ жи али шагьртед хԝә дькьр кӧ баԝәрийа ԝан ԛәԝи бә (Мәтта 5:3, 6; Марԛос 6:34). Щабдарийа һәри фәрз йа сәре малбәте жи әв ә кӧ али жьн у зарʹед хԝә бькә ԝәки әԝана незики Йаһоԝа бьн (Ԛануна Дӧщари 6:6-9). Әԝ гәрәке али ԝан бькә кӧ әԝана Кʹьтеба Пироз бьхуньн у леколин бькьн, һәрʹьн щьвина, мьзгине бәла кьн у бьбьн достед Йаһоԝа.

15. Сәре малбәте чаԝа дькарә нишани малбәта хԝә бькә кӧ әԝ ԝана һʹьз дькә?

¹⁵ Нишан кә кӧ тӧ малбәта хԝә һʹьз дьки. Йаһоԝа рʹастә-рʹаст гот кӧ әԝ Кӧрʹе хԝә һʹьз дькә (Мәтта 3:17). Иса Мәсиһ бь готьн у кьрьнед хԝә нишан дькьр кӧ шагьртед хԝә һʹьз дькә, у ԝана жи дьготьнә Иса, кӧ ԝи һʹьз дькьн (Йуһʹәнна 15:9, 12, 13; 21:16). Сәре малбәте жи дькарә бь кьред хԝә нишан кә, кӧ әԝ жьн у зарʹед хԝә һʹьз дькә. Мәсәлә, гәләк фәрз ә кӧ әԝ Кʹьтеба Пироз тʹәви ԝан леколин бькә. Ӧса жи, гәрәке әԝ рʹастә-рʹаст ԝанрʹа бежә кӧ әԝ ԝан һʹьз дькә у ԛимәт дькә. Һәгәр мәщал һәбә, гәрәке әԝ бәр кәсед дьн жи пʹайе ԝан бьдә (Мәтʹәлок 31:28, 29).

16. Диса кʹижан щабдарийед сәре малбәте һәнә, у гәрәке әԝ чаԝа ван щабдарийа бинә сери?

¹⁶ Әʹбура малбәта хԝә бькә. Рʹаст ә Йаһоԝа мьләте Исраел сәва нәгӧһдарийе щәза дькьр, ле диса жи әԝи бона һʹәԝщед ԝанә һәррʹожи хәм дькьр (Ԛануна Дӧщари 2:7; 29:5). Иро жи Хԝәде бона һʹәԝщед мәйә физики хәм дькә (Мәтта 6:31-33; 7:11). Иса Мәсиһ жи мәрьвед кӧ ль пәй ԝи дьчун, тʹер кьрьн (Мәтта 14:17-20). Ӧса жи, әԝи гәләк кәсед нәхԝәш ԛәнщ дькьрьн (Мәтта 4:24). Малхе мале, йе кӧ дьхԝазә дьле Йаһоԝа ша кә, гәрәке әʹбура малбәта хԝә бькә. Ле гәрәке әԝ мьԛат бә ԝәки хәбат гәләк ԝәʹдә жь ԝи нәстинә, кӧ әԝ бькарьбә алийе рʹӧһʹанива бона малбәта хԝә хәм бькә.

17. Йаһоԝа у Иса Мәсиһ мә чаԝа һин дькьн у ширәт дькьн?

¹⁷ Малбәта хԝә һин бькә. Жь бәр кӧ Йаһоԝа мә һʹьз дькә, әԝ мә һин дькә  (Ибрани 12:7-9). Мина Йаһоԝа, Иса Мәсиһ жи шагьртед хԝә бь дьловани һин дькә (Йуһʹәнна 15:14, 15). Әԝ рʹастә-рʹаст, ле бь нәрми ширәта дьдә мә (Мәтта 20:24-28). Әԝ занә кӧ әм гӧнәкʹар ьн, у щарна шашийа дькьн (Мәтта 26:41).

18. Сәре малбәте гәрәке чь бир нәкә?

¹⁸ Малхе мале, йе кӧ чʹәʹв дьдә Йаһоԝа у Иса Мәсиһ, бир накә кӧ һʹәму нәфәред мале гӧнәкʹар ьн. Ләма жи әԝ сәр жьн у зарʹед хԝә бь зедәйи һерс накʹәвә у дьле ԝан наешинә (Әфәси 4:31; Колоси 3:19). Ль гора Галати 6:1, гәрәке әԝ малбәта хԝә «бь рʹӧһʹе мьлуктийе» ширәт бькә у бир нәкә кӧ әԝ хԝәха жи ԛьсурдар ә. Мина Иса Мәсиһ, әԝ фәʹм дькә кӧ бона һинкьрьна малбәте, кьред ԝи жь готьнед ԝи фәрзтьр ьн (1 Пәтрус 2:21).

19-20. Гава лазьм бә кӧ сәре малбәте сафикьрьнәки бькә, әԝ чаԝа дькарә ве йәкеда чʹәʹв бьдә Йаһоԝа у Иса?

¹⁹ Бона кʹара малбәте сафикьрьна бькә. Гава Йаһоԝа сафикьрьна дькә, әԝ бона кʹара кәсед дьн дьфькьрә. Мәсәлә, әԝи нә кӧ бона кʹара хԝә әʹмьр әʹфьранд, ле ԝәки әм жи бькарьбьн мина ԝи жийинерʹа ша бьн. Ӧса жи, әԝи бь рʹәзәдьли Кӧрʹе хԝә бона гӧнед мә кьрә ԛӧрбан. Гава Иса Мәсиһ тьштәк сафи дькьр, әԝи жи бона кʹара кәсед дьн хәм дькьр (Рʹомайи 15:3). Мәсәлә, рʹожәке, гава әԝ ԝәстийайи бу, дәԝса кӧ һеса бә, әԝи ԝәʹде хԝә бона һинкьрьна мәрьва хәрщ кьр (Марԛос 6:31-34).

²⁰ Бона сәре малбәте щарна һеса нинә кӧ сафикьрьнәкә билан бькә. Әԝ рʹьнд занә кӧ әв йәк щабдарикә мәзьн ә. Ләма жи, сәре малбәте гәрәке рʹьнд бьфькьрә пешийа кӧ сафикьрьна бькә, у изьне бьдә кӧ Йаһоԝа ԝи һин бькә * (Мәтʹәлок 2:6, 7). Бь ве йәке, әԝ ԝе нә кӧ бона кʹара хԝә, ле бона кʹара кәсед дьн бьфькьрә (Филипи 2:4).

21. Готара дьнда, әме дәрһәԛа чь хәбәр дьн?

²¹ Йаһоԝа щабдарикә мәзьн дайә дәсте малхе мале, у әԝ дьхԝазә кӧ сәре малбәте ве щабдарийе бь щурʹе баш бинә сери. Бона ве йәке, әԝ гәрәке чʹәʹв бьдә Йаһоԝа у Иса. Хенщи ве йәке, сәва кӧ зәԝащ бәхтәԝар бә, фәрз ә кӧ жьн жи щабдарийа хԝә бинә сери. Гәло жьн гәрәке һьндаԝа малхетийа мере хԝә чаԝа бә, у щарна әв йәк чьма зор ә? Готара дьнда, әме щабед ван пьрса бьстиньн.