MUTWE WA KUFUNDA 5
“Mutwe wa Mwanamulume Yense ye Kilishitu”
“Mutwe wa mwanamulume yense ye Kilishitu.”—1 KO. 11:3.
LWIMBO 12 Yehoba, Lesa Wetu Wawama
BIJI MU UNO MUTWE *
1. Ñanyi bintu bimo bilengela banabalume kubula kwingijisha bulongo bumutwe bwabo?
KYAMBO kya kuba’mba “bumutwe” kilumbulula ka? Banabalume bamo balondela bisho, kisemwa, nangwa kisemi kyabo mu byo boba na bakazhi babo ne baana. Nyenga wikala ku Europe wa jizhina ja Yanita waambile’mba: “Ku mpunzha ko ngikala, bantu baji na kisho kyajimba bingi mizhazhi mu michima yabo kya kuba’mba banabalume banema kukila banabakazhi, kabiji banabakazhi bebamona nobe ba mingilo.” Kabiji mulongo wikala ku United States wa jizhina ja Luke, waambile’mba: “Bashetu bamo bafunjisha baana babo babalume amba byamba banabakazhi kechi byanema ne, onkao mambo, banabalume kechi bafwainwa kutako muchima ku byamba banabakazhi ne.” Pano bino, Yehoba kechi ukeba banabalume kwingijisha bumutwe bwabo mu jino jishinda ne. (Esakanyaiko Mako 7:13.) Pano mwanamulume wakonsha kufunda byepi kwikala mutwe wa kisemi wawama?
2. Ñanyi bintu byafwainwa kuyuka mutwe wa kisemi, kabiji mambo ka?
2 Mwanamulume pa kuba’mba ekale mutwe wa kisemi wawama, patanshi wafwainwa kuyuka Yehoba byo akeba’mba obenga. Kabiji wafwainwa kuyuka ene mambo Yehoba o abikijileko lunengezho lwa bumutwe, ne byo akonsha kulondela Yehoba ne Yesu byo bengijisha bumutwe bwabo. Mambo ka o kyanemena mwanamulume kuyuka bino bintu? Mambo Yehoba wapako banabalume luusa lwa kutangijila bakwabo, kabiji ukeba’mba bengijishenga bulongo luno luusa.—Luka 12:48b.
BUMUTWE BULUMBULULA KA?
3. Byambo byanembwa pa 1 Kolinda 11:3 bitufunjishapo ka pa bumutwe?
3 Tangai 1 Kolinda 11:3. Kino kyepelo kyalumbulula Yehoba byo anengezha kisemi kyanji kya mwiulu ne pano pa ntanda. Bumutwe bwavwangamo bintu bibiji byanema, ko kuba’mba luusa ne kwingijisha bulongo lolo luusa. Yehoba ye “mutwe,” nangwa’mba ye uji na luusa lwakila, kabiji baana banji bonse, bamalaika ne bantu baketotolwela kwi aye pa byo bengijisha luusa lo ebapako. (Loma 14:10; Efi. 3:14, 15) Yehoba wapa Yesu luusa pa kipwilo, bino Yesu wakonsha kwikala na mambo kwi Yehoba inge wabula kwitutangijila bulongo. (1 Ko. 15:27) Kabiji Yehoba wapa mwanamulume luusa pa mukazhanji ne baana, bino ukekala na mambo kwi Yehoba ne Yesu inge ke abule kulama bulongo kisemi kyanji.—1 Pe. 3:7.
4. Yehoba ne Yesu baji na luusa lwa kuba ka?
4 Yehoba byo aji mutwe wa kisemi kya bilengwa byonse, uji na luusa lwa kulenga mizhilo yafwainwa kulondelanga baana banji. Kabiji uji na luusa lwa kukambula boba babula kukookela ino mizhilo. (Isa. 33:22) Yesu naye byo aji mutwe wa kipwilo kya bena Kilishitu, uji na luusa lwa kubikako mizhilo ne kumona kuba’mba bonse babena kulondela ino mizhilo.—Nga. 6:2; Kolo. 1:18-20.
5. Ñanyi luusa luji na mutwe wa kisemi kya bena Kilishitu, kabiji ñanyi bintu byo abulapo luusa?
5 Byonka byuba Yehoba ne Yesu, mutwe wa kisemi kya bena Kilishitu naye uji na luusa lwa kufuukula bintu byalamata kisemi kyanji. (Loma 7:2; Efi. 6:4) Nangwa byonkabyo, luusa lwanji luji na po lupelela. Mizhilo yo alenga yafwainwa kwimena pa mafunde aji mu Mambo a Lesa. (Maana 3:5, 6) Kabiji mutwe wa kisemi kechi uji na luusa lwa kulengela mizhilo bantu babula ba mu kisemi kyanji ne. (Loma 14:4) Kikwabo, baana banji inge bakoma, kabiji bafuma pa nzubo ne kuya na kwiikela, batwajijila kumunemeka, bino kechi utwajijila kwikala mutwe wabo ne.—Mat. 19:5.
MAMBO KA YEHOBA O ABIKIJILEKO LUNENGEZHO LWA BUMUTWE?
6. Mambo ka Yehoba o abikilako lunengezho lwa bumutwe?
6 Yehoba wabikileko lunengezho lwa bumutwe mambo watemwa kisemi kyanji. Bumutwe ke bupe bwafuma kwi aye. Kabiji bumutwe bukwasha kisemi kya Yehoba kwikala mu mutende ne kuba bintu kwa kubula bimvulañanya. (1 Ko. 14:33, 40) Kwa kubula lunengezho lwa bumutwe, kisemi kya Yehoba kechi kyakonsha kukwatankana ne kwikala na lusekelo ne. Mambo inge kechi kwikala kuyuka uji na luusa lwa kufuukula bya kuba ne, kabiji inge kafwako uyuka wafwainwa kwingijila pa kintu kyo bafuukulapo kuba ne.
7. Kwesakana na byaamba Efisesa 5:25, 28, Yehoba ukeba banabalume kwikala byepi na bakazhi babo?
7 Byonka byo twamona, lunengezho lwa Lesa lwa bumutwe lwawama bingi. Pano mambo ka banabakazhi bavula lelo jino o bamwena’mba bamwatawabo kechi bebalama bulongo ne, kabiji bebobila bunkambo? Kiji bino na mambo a kuba’mba banabalume bavula kechi banemeka mizhilo ya Lesa yaamba pa kisemi ne, pakuba basalapo kulondela bisho. Kabiji bakonsha kuyanjisha bakazhi babo pa kuba’mba bemweshe ku bantu amba kechi bazenzalala ne. Bimye bimo, mwanamulume wakonsha kuyanjisha mukazhanji pa kuba’mba anemekwe nangwa kumwesha ku bantu bakwabo amba mwanamulume wa kine kine. Wakonsha kulanguluka’mba kechi wakonsha kukanjikizha mukazhanji kuba’mba amutemwe ne, bino wakonsha kuba bintu byakonsha kulengela mukazhanji kumuchinanga. Kabiji na mambo a kumuchina, mukazhanji kechi wakonsha kwikalapo na luusa lwa kuba kintu ne. * Ndangulukilo ya uno mutundu ilengela kubula kunemeka banabakazhi ne kubula kwibapa mushingi ye bafwainwa kutambula. Kino kyapusana bingi na bikeba Yehoba.—Tangai Efisesa 5:25, 28.
MWANAMULUME WAKONSHA KUFUNDA BYEPI KWIKALA MUTWE WA KISEMI WAWAMA?
8. Mwanamulume wakonsha kufunda byepi kwikala mutwe wa kisemi wawama?
8 Mwanamulume wakonsha kufunda kwikala mutwe wa kisemi wawama kupichila mu kulondela Yehoba ne Yesu byo bengijisha bumutwe bwabo. Akilangulukai pa byubilo bibiji bimwesha Yehoba ne Yesu, ne kumona mutwe wa kisemi byo akonsha kumwesha bino byubilo ku mukazhanji ne baana banji.
9. Yehoba umwesha byepi amba wipelula?
9 Kwipelula. Yehoba ye mwine uji na maana akila; pano bino, uteleka ku milanguluko ya bakalume banji. (Nte. 18:23, 24, 32) Uswisha bakalume banji kwamba milanguluko yabo. (1 Mfu. 22:19-22) Yehoba waoloka, bino kechi uketekela kuba’mba atweba twakonsha kuba byaoloka kimye kyonse ne. Pakuba ukwasha bantu bambulwa kulumbuluka bamwingijila kwingila bulongo. (Sala. 113:6, 7) Kabiji Baibolo wamulumbulula Yehoba amba “nkwasho.” (Sala. 27:9; Hebe. 13:6) Mfumu Davida waambile’mba bintu byonse byo aubile, wibyubile na mambo a kwipelula kwa Yehoba.—2 Sam. 22:36.
10. Yesu wamwesheshe byepi kwipelula?
10 Langulukai pe Yesu. Nangwa kya kuba wajinga Nkambo ya baana banji ba bwanga, bino waovwele maulu abo. Ñanyi kishinka kimo kyalengejile Yehoba kumona kuba’mba kino kyaubile Yesu kyanembwa mu Baibolo? Waubile bino kuba’mba bantu bonse bafunjileko, kubikapotu ne mitwe ya bisemi. Aye mwine Yesu waambile’mba: “Nemushila mwa kulondela, byonka byo nauba kwi anweba, ne anweba mwafwainwa kubanga byonka bino.” (Yoa. 13:12-17) Nangwa kya kuba Yesu wajinga na luusa lukatampe, bino kechi wakebanga bakwabo kumwingijila ne. Pakuba aye ye waingijilanga bakwabo.—Mat. 20:28.
Mutwe wa kisemi wakonsha kumwesha kwipelula ne butemwe kupichila mu kwingilako mingilo ya pa nzubo ne kukwasha kisemi kyanji kwikala na lwitabilo lwakosa (Monai mafuka 11, 13)
11. Mutwe wa kisemi wakonsha kufunjilako ka kwi Yehoba ne Yesu byo bamwesha kwipelula?
11 Byo tufunjilako. Mutwe wa kisemi wakonsha kumwesha kwipelula mu mashinda avula bingi. Kechi uketekela’mba mukazhanji ne baana bobangatu byalumbuluka kimye kyonse ne. Uteleka ku milanguluko ya ba mu kisemi kyanji, nangwatu inge kechi yakwatankana na milanguluko yanji ne. Ba Marley bekala ku United States, baambile’mba: “Amiwa ne bamwatawami twikala na milanguluko yapusana pa bimye bimo. Bino bansanchila ne kunnemeka mambo bangipuzha milanguluko yami ne kulangulukapo saka bakyangye kufuukulapo bya kuba.” Kikwabo, mwanamulume wipelula wingilako ne mingilo ya pa nzubo, nangwa kya kuba ku mpunzha ko ekala bantu bamona ino mingilo amba ya banabakazhi. Kino kyakonsha kukatazha bingi. Mambo ka? Nyenga wa jizhina ja Rachel waambile’mba: “Ku mpunzha ko mfuma, inge mwanamulume wakwashako mukazhanji kovwa mipika ne masanyi, balongo banji ne bakinkala nkulo bakonsha kutendeka kulanguluka’mba ‘bamujiisha.’ Kabiji bakonsha kulanguluka’mba babena kumutangijila ku mukazhi.” Inge byo byo kiji ne ku mpunzha ko mwikala, vulukainga kuba’mba Yesu waovwele maulu a baana banji ba bwanga, nangwa kya kuba uno mwingilo bamumonanga’mba wa bazha. Mutwe wa kisemi wawama kechi uta muchima pa kukeba bantu kumumona’mba wanema nangwa amba uji na bulume ne. Pakuba uta muchima pa bintu byakonsha kusangajika mukazhanji ne baana banji. Kununga pa kwipelula, ñanyi kyubilo kikwabo kyafwainwa kwikala na mutwe wa kisemi wawama?
12. Butemwe bulengela Yehoba ne Yesu kuba byepi?
12 Butemwe. Bintu byonse Yehoba byo oba, wibyuba na mambo a butemwe. (1 Yoa. 4:7, 8) Umwesha’mba witutemwa kupichila mu kwitupa kajo ka ku mupashi kupichila mu Baibolo, ne mu jibumba janji. Witukwasha kwikala na mutende wa mu milanguluko kupichila mu kwitubuula’mba witutemwa. Nga bintu bya mu bwikalo? Yehoba “witupa bintu byonse byo twatemwa.” (1 Timo. 6:17) Inge twalubankanya, witololako, bino kechi uleka kwitutemwa ne. Na mambo a kwitutemwa, Yehoba witunengezhejile bukuzhi. Kabiji Yesu witutemwa bingi kya kuba wapaine bumi bwanji na mambo a atweba. (Yoa. 3:16; 15:13) Kafwako kyakonsha kulengela Yehoba ne Yesu kuleka kutemwa bantu ba kishinka kwi abo ne.—Yoa. 13:1; Loma 8:35, 38, 39.
13. Mambo ka o kyanemena mutwe wa kisemi kumwesha butemwe ku ba mu kisemi kyanji? (Monai kakitenguluzha ka kuba’mba “ Mwanamulume Wasongola Katataka Wakonsha Kuba Byepi pa Kuba’mba Mukazhanji Amunemekenga?”)
13 Byo tufunjilako. Bintu byonse byuba mutwe wa kisemi byafwainwa kwimena pa butemwe. Mambo ka kino o kyanemena? Mutumwa Yoano wakumbula buno bwipuzho. Waambile’mba: “Awa wabula kutemwa mulongo wanji ye amona na meso [nangwa kisemi kyanji], kechi wakonsha kutemwa Lesa ye abula kumona ne.” (1 Yoa. 4:11, 20) Onkao mambo, mwanamulume watemwa kisemi kyanji kabiji ukeba kulondela Yehoba ne Yesu, wafwainwa kukwasha kisemi kyanji kwikala na bulunda bwakosa ne Lesa. Kabiji wafwainwa kwibakwasha kuyuka’mba bazhikijilwa ne kwibakebela bintu bya mu bwikalo. (1 Timo. 5:8) Ufunjisha baana banji ne kwibajimunako. Kabiji utwajijila kufunda bya kufuukula bintu binemeka Yehoba ne kulengela kisemi kyanji kumwenamo. Twayai twisambe pa bino bintu kimo kimo ne kumona mutwe wa kisemi byo akonsha kufunjilako kwi Yehoba ne Yesu.
MUTWE WA KISEMI BYO AFWAINWA KUBA
14. Mutwe wa kisemi ukwasha byepi kisemi kyanji kwikala na bulunda bwakosa ne Yehoba?
14 Kukwasha kisemi kyanji kwikala na bulunda bwakosa ne Lesa. Yesu wamwesheshe’mba uji nobe Shanji mambo wakebelenga kukwasha baana banji ba bwanga kwikala na lwitabilo lwakosa. (Mat. 5:3, 6; Mako 6:34) Kyo kimotu, kintu kitanshi mutwe wa kisemi kyo afwainwa kuteshako muchima ke kukwasha kisemi kyanji kwikala na lwitabilo lwakosa. (Mpitu. 6:6-9) Uba bino kupichila mu kumona kuba’mba aye mwine pamo ne kisemi kyanji batanga ne kufunda Mambo a Lesa, kupwila kimye kyonse, ne kusapwila mambo awama ne kukosesha bulunda bwabo ne Yehoba.
15. Ñanyi jishinda jimo mutwe wa kisemi mo akonsha kumweshesha’mba wata muchima kisemi kyanji?
15 Kukwasha kisemi kyanji kwikala na mutende wa mu milanguluko. Yehoba wabuujile Yesu kuba’mba wamutemwa ne bantu bakwabo saka bomvwako. (Mat. 3:17) Yesu bimye byavula wamweshanga byo atemenwe baana banji ba bwanga mu byo aubanga ne byo aambanga. Baana banji ba bwanga nabo bamubuujile’mba bamutemenwe. (Yoa. 15:9, 12, 13; 21:16) Mutwe wa kisemi wakonsha kumwesha mukazhanji ne baana amba wibatemwa kupichila mu byo oba, nabiji kufunda nabo Baibolo. Kabiji wafwainwa kwibabuula’mba wibatemwa kabiji wibanemeka, ne kwibatakaika saka paji ne bantu bakwabo.— Maana 31:28, 29.
Pa kuba’mba atokeshenga Yehoba ku muchima, mutwe wa kisemi wafwainwa kukebela kisemi kyanji bya mu bwikalo (Monai jifuka 16)
16. Ñanyi kintu kikwabo kyafwainwa kuba mutwe wa kisemi, kabiji wafwainwa kuchinuzhuka ka?
16 Ukebela kisemi kyanji bintu bya mu bwikalo. Yehoba wakebelanga bena Isalela bya mu bwikalo nangwatu kimye kyo bebakambwilenga na mambo a kubula kumukookela. (Mpitu. 2:7; 29:5) Ne lelo jino witupa bikebewa mu bwikalo. (Mat. 6:31-33; 7:11) Kabiji Yesu wajishishe bantu bamulondejilenga. (Mat. 14:17-20) Kabiji wabukile ne bavula bajinga na bikola. (Mat. 4:24) Pa kuba’mba mutwe wa kisemi asangajike Yehoba ku muchima, wafwainwa kukebela kisemi kyanji bikebewa mu bwikalo. Nangwa byonkabyo, kuji kintu kyo afwainwa kuchinuzhuka kuba. Kechi wafwainwa kutwezhamo ne mutwe mu nkito ya ku mubiji kya kuba ke akankalwe kukwasha kisemi kyanji kwikala na bulunda bwakosa na Lesa ne kwibakwasha kwikala na lusekelo ne.
17. Tufunjilako ka kwi Yehoba ne Yesu byo betufunjisha ne kwitujimunako?
17 Kufunjisha. Yehoba witufunjisha ne kwitujimunako mambo ukeba kwitukwasha. (Hebe. 12:7-9) Byonka biji Shanji, Yesu naye ufunjisha boba bo bamupa kutangijila kabiji uba bino mu butemwe. (Yoa. 15:14, 15) Kechi upita mu mbaji pa kupana lujimuno ne, bino uji na lusa. (Mat. 20:24-28) Wayuka’mba twibambulwa kulumbuluka kabiji javula tulubankanya.—Mat. 26:41.
18. Mutwe wa kisemi wawama uvuluka ñanyi kishinka?
18 Mutwe wa kisemi ulondela Yehoba ne Yesu uvuluka kuba’mba ba mu kisemi kyanji bambulwa kulumbuluka. Kechi ‘ushintaukila’ mukazhanji nangwa baana banji ne. (Kolo. 3:19) Bino wingijisha jifunde janembwa pa Ngalatiya 6:1 kabiji wibikako kwibalulula “na muchima wakooka,” mambo uvuluka kuba’mba ne aye kechi waoloka ne. Byonkatu biji Yesu, mutwe wa kisemi uvuluka kuba’mba ba mu kisemi kyanji bafunda byavula kupichila mu kumona byo oba.—1 Pe. 2:21.
19-20. Pa kufuukula bintu, mutwe wa kisemi wakonsha kulondela byepi Yehoba ne Yesu?
19 Kechi ufuukula bintu byamuwaminatu aye mwine ne. Yehoba ufuukula bintu bilengela bilengwa byanji kumwenamo. Byo etulengele, kechi witulengela’mba aye mwine amwenengamo ne, bino waubile kino kuba’mba ne atweba twiyowenga bumi. Kafwako wakonsheshe kumukanjikizha kupana Mwananji kuba’mba etufwile na mambo a bundengamambo bwetu ne. Waubile kino mambo wakebelenga kuba’mba tumwenemo. Yesu naye wafuukulanga bintu byakwashanga bakwabo. (Loma 15:3) Pa kimye kimo, wakookele bingi kabiji wakebelenga kukookoloka, bino kechi waubile bino ne, wafuukwilepo kufunjisha jibumba ja bantu jaishile ko ajinga.—Mako 6:31-34.
20 Mutwe wa kisemi wawama wayuka kuba’mba kintu kimo kyakatazha bingi kyo afwainwa kuba ke kufuukwila kisemi bintu. Kabiji utako bingi muchima ku uno mwingilo. Kechi ufuukula bintu kwa kubula kulangulukapo bulongo nangwa kufuukula saka azhingila ne. Bino uswisha Yehoba kumufunjisha bya kufuukula bulongo bintu. * (Maana 2:6, 7) Kuba bino kukamukwasha kulanguluka pa bintu byakonsha kumwenamo bakwabo, kechi byamuwaminatu aye mwine ne.—Fili. 2:4.
21. Tukesamba pa ka mu mutwe walondelapo?
21 Yehoba wapa mitwe ya bisemi mwingilo wanema bingi, kabiji bakekala na mambo kwi aye umvwe babula kwingila bulongo uno mwingilo. Bino umvwe mwanamulume wibikako kulondela Yehoba ne Yesu, ukekala mutwe wa kisemi wawama. Kabiji inge mukazhanji naye ke engile mwingilo wanji, masongola abo akekala a lusekelo. Mwanamukazhi wasongolwa wafwainwa kumonanga byepi lunengezho lwa bumutwe, kabiji ñanyi makatazho o akonsha kupitamo? Mutwe walondelapo ukakumbula ano mepuzho.
LWIMBO 16 Totai Yehoba pa Mwananji, Washingwa
^ jifu. 5 Mwanamulume inge wasongola, wikala ke mutwe wa kisemi. Mu uno mutwe, tusakwisamba pa byo kilumbulula kwikala bumutwe, ene mambo Yehoba o abikijileko lunengezho lwa bumutwe, ne banabalume byo bakonsha kufunjilako kwi Yehoba ne Yesu byo bengijisha bumutwe. Mu mutwe wa bubiji mu ino mitwe yaamba pa bumutwe, tukafunda mwanamulume wasongola ne mwanamukazhi wasongolwa byo bakonsha kufunjilako kwi Yesu ne ku bantu bakwabo banembwa mu Baibolo. Kabiji mutwe wapelako ukamba pa bumutwe bwa kipwilo.
^ jifu. 7 Bimye bimo, mulanguluko wa kuba’mba kijitu bulongo mwanamulume kuyanjisha mukazhanji, nangwatu kumupuma, bamumwesha mu mafilimu, mu bisela ne mu mabuku a bisela. Onkao mambo, kino kilengela bantu bavula kulanguluka’mba kechi kyatama mwanamulume kuyanjisha mukazhanji ne.
^ jifu. 20 Pa kuba’mba muyukilepo byavula pa bya kufuukula bulongo bintu, monai kibaaba kya kuba’mba “Fuukulainga Bintu Bileta Munema Kwi Lesa,” kyanembelwe mu Kyamba kya Usopa kya April 15, 2011, ma. 13-17.
