ARTIKLE YA KULONGOKA 5
‘Mfumu ya bakala nyonso ke Kristo’
‘Mfumu ya bakala nyonso ke Kristo.’—1 KO. 11:3.
NZIMBU 12 Jéhovah, Dieu magnifique
YINA BETO KE LONGOKA *
1. Yinki lenda nata chef ya famiye na kubakila ve kento ya yandi mpe bana ya yandi na faso ya mbote?
NA NGE, yinki zola zonza kuvanda na otorite to kuvanda chef ya famiye? Babakala ya nkaka ke bakilá bakento ya bawu mpe bana ya bawu faso ba ke salá yawu na bwala mpe na ndinga ya bawu to na famiye yina ba kulá. Yanita mpangi mosi ya kento yina ke vandá na Europe zonzá: “Na kote yina mu ke vandá, bantu ke talá bakento faso bantu ya mpamba, mpe samu na bawu, bakento zolá sadila babakala.” Mpe Luke mpangi mosi ya bakala yina ke vandá na États-Unis zonzá: “Bapapa ya nkaka ke zonzá na bana ya bawu ti, mambu yina bakento ke zonzá ke vandá ve na valere, ba zolá bebisa ve ntangu ya bawu na kuwa bawu.” Kasi, Yehova zola ata fioti ve ti babakala vanda na makanisi ya faso yayi samu na bakento ya bawu. (Tala Marke 7:13.) Na yawu, wa’ faso bakala lenda longoka kuvanda chef ya famiye ya mbote?
2. Yinki bachef ya famiye me lunga kuzaba, mpe samu na yinki?
2 Na kuvanda chef ya famiye ya mbote, bakala me lunga kuzaba ntete, mambu yina Yehova me zola yandi sala. Yandi ke mpe na nsatu ya kuzaba samu na yinki Yehova me pesa otorite na bakala, mpe wa’ faso yandi lenda landa ekzample ya Yehova na Yesu. Samu na yinki ya ke important na bakala na kuzaba yawu? Samu Yehova pesá na bachef ya famiye ndambu ya otorite, mpe yandi ke na vingilá ti ba sadila yawu na faso ya bien.—Luke 12:48b.
YINKI ZOLA ZONZA KUVANDA NA OTORITE?
3. Yinki 1 Bakorinto 11:3, ke na longá beto na faso Yehova tulá otorite na kati ya famiye ya yandi?
3 Tanga 1 Bakorinto 11:3. Verse yayi ke na lakisá faso Yehova me tula otorite na kati ya famiye ya yandi ya zulu mpe ya ntoto. Samu yandi ke Mfumu ya Kulutila Nene, yandi ke na otorite nyonso. Kasi yandi pesá ndambu ya otorite na bantu ya nkaka mpe yandi ke na vingilá ba sadila yawu na faso ya mbote. (Rom. 14:10; Ef. 3:14, 15) Yehova pesá Yesu otorite na zulu ya bimvuka nyonso ya batemwe ya Yehova. Na yawu, yandi ke na talá faso Yesu ke na sadilá otorite yango. (1 Ko. 15:27) Yehova pesá mpe bakala otorite na zulu ya kento mpe bana ya yandi, na yawu, Yehova na Yesu ke na talá faso babakala ke na sadilá otorite yango na kati ya bafamiye ya bawu.—1 Pi. 3:7.
4. Wapi otorite Yehova na Yesu ke na yawu?
4 Samu yandi ke Mfumu ya Kulutila Nene na kati ya famiye ya yandi, Yehova me lunga kupesa misiku na faso bana ya yandi zolá sala bamambu. Mpe yandi me lunga kutala si ba ke na landá misiku yango na faso ya bien. (Iza. 33:22) Yesu, Mfumu ya bimvuka nyonso ya batemwe ya Yehova, me lunga mpe kupesa misiku mpe kutala si beto ke na landak’ yawu.—Gal. 6:2; Kol. 1:18-20.
5. Wapi otorite bachef ya famiye ke na yawu, mpe wapi balimite ke na otorite ya bawu?
5 Faso Yehova na Yesu, bachef ya famiye ke na otorite ya kubaka badesizion na kati ya bafamiye ya bawu. (Rom. 7:2; Ef. 6:4) Kasi ba zolá zimbana ve ti, otorite ya bawu ke na balimite. Na kifwani, misiku yina ba ke tulá na kati ya bafamiye ya bawu, zolá katuka na Biblia. (Bin. 3:5, 6) Mpe bachef ya famiye ke ve na otorite ya kupesa misiku na bantu yina ke ve na kati ya famiye ya bawu. (Rom. 14:4) Dyaka, ntangu bana ya bawu ke kulá mpe ke biká yinzo, ata bana ke kontinye kupesa bawu buzitu, kasi ba ke dyaka ve na otorite na zulu ya bawu.—Mat. 19:5.
SAMU NA YINKI YEHOVA PESÁ OTORITE NA BANTU YA NKAKA?
6. Samu na yinki Yehova tulá otorite?
6 Yehova tulá otorite samu yandi zola famiye ya yandi. Ya ke kado yina me katuka na yandi. Samu otorite kele, famiye ya Yehova ke na kizunu mpe muvusu ke ve. (1 Ko. 14:33, 40) Si ata muntu vandá na otorite na kati ya famiye ya Yehova, muntu nyonso zolá sala mambu yina yandi zola mpe kilengi zolá vanda ve. Na kifwani, ata muntu zolá zaba nani me lunga kubaka badesizion ya nsuka mpe nani me lunga kusala ti badesizion yango salama.
7. Yinki Baefeze 5:25, 28, ke zonzá na faso Yehova zola ti babakala bakila bakento ya bawu?
7 Si ya ke mbote na babakala na kuvanda na otorite na kati ya famiye, samu na yinki bakento mingi ke talá ti babakala ya bawu ke bakilá bawu na ngolo mpe ke dyatilá bawu? Ya ke samu babakala mingi ke zabá ve misiku yina Yehova pesá na bafamiye, na yawu, ba ke landá faso bamambu ke salamá na bwala mpe na ndinga ya bawu to na kote yina ba kulá. Dyaka, ba lenda bakila bakento ya bawu na faso ya yimbi, samu na kusepelisa bansatu ya bawu mosi. Na kifwani, babakala ya nkaka ke sosá kudyatila bakento ya bawu samu na kulakisa ti, ba ke important to samu na kulakisa na bantu ya nkaka ti ba ke “babakala ya kulunga.” Bakala zaba ti yandi lenda forse ve kento ya yandi na kuzola yandi, kasi yandi lenda sala ti kento vanda na boma ya yandi. Mpe yandi lendá sadila boma yina, samu na kuforse kento na kusala kaka mambu yina yandi zola. * Ya ke na talaná pwelele ti, bakala yina ke na makanisi yayi mpe ke salá bamambu yayi ke muntu ya yimbi. Yandi ke na pesá ve kento ya yandi buzitu yina me lunga, mpe faso ya kusala yayi ke vrai yimbi na meso ya Yehova.—Tanga Baefeze 5:25, 28.
WA’ FASO BAKALA LENDA LONGOKA KUVANDA CHEF YA FAMIYE YA MBOTE?
8. Wa’ faso bakala lenda longoka kuvanda chef ya famiye ya mbote?
8 Bakala lenda longoka kuvanda chef ya famiye ya mbote, si yandi landa faso Yehova na Yesu ke sadilá otorite ya bawu. Beto zonzila kaka bifu zole ya mbote yina Yehova na Yesu lakisá mpe beto tala faso bachef ya famiye lenda lakisa bifu yango na bakento mpe bana ya bawu.
9. Yinki ke na lakisá ti Yehova ke ya kukuluka?
9 Ntima ya kukuluka. Yehova ke Muntu ya kulutila mayela na bantu nyonso, kasi yandi ke baká ntangu ya kuwa makanisi ya bisadi ya yandi. (Kub. 18:23, 24, 32) Yandi ke biká ba yina ke na yisi ya otorite ya yandi kupesa yandi ba-idée. (1 Mf. 22:19-22) Yehova ke salá ve masumu, kasi yandi ke vingilá ve ti beto bantu ya masumu sala kaka bamambu ya mbote. Dyaka, yandi ke sadisá beto na kulenda kusadila yandi na faso ya kulunga. (Nku. 113:6, 7) Ni na yawu, Biblia ke zonzá ti Yehova ke ‘Muntu yina ke sadisaka.’ (Nku. 27:9; Ebr. 13:6) Mfumu David zonzá ti, si yandi lendá kusala bisalu ya nene, ya vandá kaka samu Yehova ke ya kukuluka mpe sadisak’ yandi.—2 Sa. 22:36.
10. Wa’ faso Yesu lakisá ti yandi ke ya kukuluka?
10 Beto zonzila ekzample ya Yesu. Ata yandi vandá Mfumu ya badisiple ya yandi, yandi sukulá bawu makulu. Wapi yina ke mosi ya barezon yina natá Yehova na kusala ti ba sonika disolo yayi na Biblia? Ya ke samu beto nyonso, na bachef ya famiye mpe, landa ekzample ya Yesu. Yesu yandi mosi zonzá: “Mu me lakisa beno [faso] ya kusala, samu beno mpe beno sala yawu.” (Yoa. 13:12-17) Ata yandi vandá na otorite ya mingi, Yesu vandá vingila ve ti ba sadila yandi. Kasi, ni yandi vandá sadila bampangi.—Mat. 20:28.
Chef ya famiye lenda lakisa ti yandi ke ya kukuluka mpe yandi ke zolá famiye ya yandi na kutulá diboko na bisalu ya yinzo mpe na kukipeke bansatu ya kimpeve ya famiye ya yandi (Tala baparagrafe 11, 13)
11. Yinki bachef ya famiye lendá longoka na ntima ya kukuluka ya Yehova mpe ya Yesu?
11 Baleson samu na beto. Si chef ya famiye ke ya kukuluka, ya ke talana na mambu mingi. Na kifwani, samu yandi zaba ti kento na bana ya yandi ke bantu ya masumu, yandi lendá vingila ve ti ba sala kaka mambu yina ke sepelisa yandi. Yandi ke baka ntangu ya kuwa makanisi ya kento ya yandi mpe bana ya yandi, ata ntangu yandi ke talá ti mambu yina ba ke na zonzá ke ve mbote na meso ya yandi. Marley yina ke vandá na États-Unis me zonza: “Mu ke vandá ve ntangu nyonso na dikanisi mosi na bakala ya munu. Kasi mu zaba ti mu ke na valere na meso ya yandi mpe yandi ke pesá mu buzitu. Yandi ke lakisak’ yawu ntangu yandi ke sosá kuzaba dikanisi ya munu avant yandi baka desizion.” Dyaka, bakala ya kukuluka ke eziteke ve na kusala bisalu ya yinzo, ata si na kote yina yandi ke vandá bantu ke talá ti ya ke bisalu ya bakento. Kasi, mambu yayi beto me zonza lenda vanda mpasi na kusala. Samu na yinki? Rachel mpangi mosi ya kento me zonza: “Na kote yina mu katuká, si bavoizin to bantu ya famiye tala bakala ke na sadisá kento ya yandi na kusukula bandonga to na kuyidika yinzo, ba ke zonza ti yandi ke ve vrai bakala.” Si bantu mingi ke kanisá faso yayi na kote yina nge ke vandá, kuzimbana ve ti Yesu sukulá makulu ya badisiple ya yandi ata bantu vandá tala ti ya vandá kisalu ya bangaamba. Chef ya famiye ya mbote ke ve na nsatu ya kunata bantu ya nkaka na kukanisa ti yandi ke muntu ya nene to ya important. Kasi, nsatu ya yandi ke ya kutala kento mpe bana ya yandi kuvanda na kilengi. Wapi kifu ya nkaka ya mbote chef ya famiye zolá vanda na yawu?
12. Yinki luzolo natá Yehova na Yesu na kusala?
12 Luzolo. Kima ni kima yina Yehova ke salá, ni luzolo ke natak’ yandi na kusala yawu. (1 Yoa. 4:7, 8) Samu yandi zola beto mpe yandi ke na nsatu beto vanda bakamarade ya yandi, Yehova pesá beto Biblia mpe tulá beto na kati ya organizasion ya yandi. Yandi ke salá nyonso samu beto zaba ti yandi ke zolá beto. Kasi yinki beto lenda zonza samu na bansatu ya beto ya nkaka? Yehova “ke [pesá] beto bima nyonso ya kulutila, samu ti beto [vanda] na kilengi.” (1 Tim. 6:17) Ntangu beto ke salá mambu ya yimbi na meso ya yandi, yandi ke pesá beto disipline, kasi yandi ke biká ve kuzola beto. Na luzolo nyonso, Yehova pesá mwana ya yandi faso sakrifise samu na beto. Mpe Yesu zola beto mingi, ni na yawu yandi pesá luzingu ya yandi samu na beto. (Yoa. 3:16; 15:13) Ata kima lenda kanga Yehova na Yesu nzila ya kulakisa luzolo na ba yina ke ya kukangama na bawu.—Yoa. 13:1; Rom. 8:35, 38, 39.
13. Samu na yinki ya ke mbote na bachef ya famiye na kulakisa luzolo na bafamiye ya bawu? (Tala mpe tablo “ Wa’ faso bakala yina me kwela ntama mingi ve lenda sala ti kento ya yandi pesa yandi buzitu?”)
13 Baleson samu na beto. Kima ni kima yina chef ya famiye ke sala, ni luzolo zolá nata yandi na kusala yawu. Samu na yinki ya ke mbote? Apotre Yoane zonzá: ‘Muntu yina ke zolá ve bampangi [to famiye] ya yandi yina yandi ke talá, lenda zola ve Nzambi yina yandi ke talá ve.’ (1 Yoa. 4:11, 20) Bakala yina zola famiye ya yandi mpe ke na nsatu ya kulanda ekzample ya Yehova na Yesu, ke sadisa famiye ya yandi na kuvanda na kikamarade ya mbote na Yehova, na kuvanda na sekurite, mpe yandi ke kipe bansatu ya bawu. (1 Tim. 5:8) Yandi ke longa bana ya yandi mpe ke ngala bawu ntangu ba ke salá mambu ya yimbi. Yandi ke kontinye mpe kulongoka faso ya kubaka badesizion yina ke sepelisa Yehova mpe ke natina bima ya mbote na famiye ya yandi. Beto mase zonzila bima yango yina lenda sadisa bachef ya famiye, mpe beto ke tala faso ba lendá landa ekzample ya Yehova na ya Yesu.
YINA BACHEF YA FAMIYE LENDA SALA
14. Wa’ faso bachef ya famiye lenda sadisa bafamiye ya bawu na kutunga kikamarade ya ngolo na Yehova?
14 Yandi ke sadisa famiye ya yandi na kutunga kikamarade ya mbote na Yehova. Yesu lakisá ti yandi ke zolá Papa ya yandi, ntangu yandi sadisá badisiple ya yandi na kuvanda na kiminu ya ngolo na Yehova. (Mat. 5:3, 6; Mrk. 6:34) Faso mosi mpe, kima ya kulutila important samu na chef ya famiye ke ya kusadisa famiye ya yandi na kutunga kikamarade ya ngolo na Yehova. (Kul. 6:6-9) Na kusala yawu, yandi na famiye ya yandi zolá tanga Biblia mpe kulongoka yawu, kuvanda na balukutakanu, kupreche nsangu ya mbote, kutunga mpe kubumba kikamarade ya ngolo na Yehova.
15. Wa’ faso chef ya famiye lenda lakisa na famiye ya yandi ti yandi ke zolá bawu?
15 Yandi ke lakisa famiye ya yandi ti yandi ke zolá bawu. Yehova zonzá na mantwala ya bantu mingi ti yandi ke zolá Yesu. (Mat. 3:17) Na yina yandi vandá zonzá mpe na yina yandi vandá salá, Yesu vandá lakisá ntangu nyonso na badisiple ya yandi ti yandi vandá zolá bawu. Badisiple ya yandi mpe vandá lakisá yandi luzolo. (Yoa. 15:9, 12, 13; 21:16) Chef ya famiye mpe zolá lakisa luzolo na kento mpe na bana ya yandi na bamambu yina yandi ke salá, faso ntangu yandi ke longoká Biblia na bawu. Dyaka, yandi zolá zonza na bawu ti yandi ke zolá bawu mpe ke sepelá na bawu. Mpe ntangu okazion ke talaná, yandi zolá felisite bawu na mantwala ya bantu ya nkaka.—Bin. 31:28, 29.
Na kusepelisa Yehova, chef ya famiye me lunga kupesa famiye ya yandi bima yina ba ke na yawu nsatu (Tala paragrafe 16)
16. Wapi kima ya nkaka bachef ya famiye me lunga kusala, mpe yinki ba zolá sala ve?
16 Yandi ke kipe bansatu ya famiye ya yandi. Yehova vandá kipeke bansatu ya ba-izraelite, ata ntangu yandi vandá pesá bawu disipline samu ba me landa ve misiku ya yandi. (Kul. 2:7; 29:5) Yandi ke pesá mpe beto bima yina beto ke na yawu nsatu bubu yayi. (Mat. 6:31-33; 7:11) Faso mosi mpe, Yesu dikisá badisiple ya yandi. (Mat. 14:17-20) Dyaka, yandi belusá ba yina vandá maladi. (Mat. 4:24) Samu na kusepelisa Yehova, chef ya famiye me lunga kudikisa, kulwatisa mpe kukipe famiye ya yandi. Kasi, ya ke na kima yina yandi zolá sala ve. Yandi zolá lutisa ve ntangu ya yandi nyonso na kisalu, mpe kuvanda dyaka ve na ntangu ya kukipe kimpeve ya famiye ya yandi mpe ya kulakisa bawu ti yandi ke zolá bawu.
17. Wapi ekzample Yehova na Yesu biká na faso ya kuforme mpe ya kupesa disipline?
17 Yandi ke pesa famiye ya yandi formasion. Yehova ke formeke beto mpe ke pesá beto disipline samu yandi ke na nsatu ya kusadisa beto. (Ebr. 12:7-9) Faso Papa ya yandi, Yesu formeke ba yina vandá na yisi ya otorite ya yandi na luzolo nyonso. (Yoa. 15:14, 15) Yandi pesá bawu bakonseye ya kulunga kasi yandi vandá sala yawu na ntima ya mbote. (Mat. 20:24-28) Yandi zaba ti beto ke bantu ya masumu mpe ntangu nyonso ve beto ke salá mambu ya mbote na meso ya yandi.—Mat. 26:41.
18. Yinki chef ya famiye ya mbote zaba?
18 Chef ya famiye yina ke landá ekzample ya Yehova na Yesu, zaba ti kento mpe bana ya yandi ke bantu ya masumu. Yandi lenda “dasukila ve” bawu ya kulutila. (Kol. 3:19) Na yawu, yandi ke sadila mambu yina ke na Bagalate 6:1, mpe ke sosa kupesa bawu bakonseye na ‘ntima ya mbote,’ samu yandi zaba ti, yandi mpe ke muntu ya masumu. Faso Yesu, yandi zaba ti faso ya mbote ya kulonga ni ya kulakisa ekzample.—1 Pi. 2:21.
19-20. Ntangu chef ya famiye ke baká badesizion, wa’ faso yandi lenda landa ekzample ya Yehova na Yesu?
19 Yandi ke baka badesizion yina ke bien samu na famiye ya yandi kasi na yandi mosi ve. Yehova ke baká badesizion yina ke vandá mbote samu na bantu ya nkaka. Na kifwani, yandi yidiká ve luzingu samu na bien ya yandi mosi, kasi samu na kukabula kilengi ya luzingu na beto. Ata muntu forseke Yehova na kufilisa Mwana ya yandi na kufwa samu na masumu ya beto. Yandi salak’ yawu samu na kusadisa beto. Yesu mpe vandá baká badesizion ntete samu na bambote ya bantu ya nkaka. (Rom. 15:3) Na kifwani, ntangu nzutu ya yandi vandá ya kulemba, yandi vandá na nsatu ya kupema, kasi yandi salá ve yawu. Yandi sadilá ntangu ya yandi ya kupema samu na kulonga ba yina vandá na nsatu ya kuwa yandi.—Mrk. 6:31-34.
20 Chef ya famiye yina zola kulungisa responsabilite ya yandi na faso ya mbote, zaba ti ya ke mpasi na kubaka badesizion ya kulunga samu na famiye ya yandi. Na yawu, yandi zolá sala nyonso samu na kubaka ve badesizion na mbangu to faso ya ke na kwizilá yandi na yintu. Mpe yandi zolá baka ve badesizion yina ke sepelisa kaka yandi mosi. Dyaka, yandi ke bika Yehova longa yandi faso ya kubaka badesizion ya mbote. * (Bin. 2:6, 7) Faso ya kusala yayi ke sadisa yandi na kukanisa ntete na bampangi, avant yandi mosi.—Flp. 2:4.
21. Yinki beto ke zonzila na artikle ke landa?
21 Yehova pesá bachef ya famiye responsabilite mosi ya nene. Yandi ke na vingilá ti ba sala nyonso samu na kulungisa yawu. Na yawu, si bakala ya kukwela landa ekzample ya Yehova na ya Yesu, yandi ke vanda chef ya famiye ya mbote. Mpe si kento lungisa role yina Yehova me pesa yandi na kati ya famiye, dikwela ya bawu ke vanda na kilengi. Wa’ faso kento zolá tadila otorite yina bakala ya yandi ke na yawu na kati ya famiye? Mpe wapi mambu ya mpasi yandi lenda bwabana na yawu? Artikle yina ke landa ke pesa bareponse na bakestion yayi.
NZIMBU 16 Louez Jéhovah et son Fils, l’Oint
^ par. 5 Ntangu bakala ke kwelá, yandi ke kumá chef ya famiye. Na artikle yayi, beto ke tala wapi otorite Yehova pesá na bantu ya nkaka, samu na yinki yandi pesak’ yawu mpe yinki babakala lenda longoka na ekzample ya Yehova na ya Yesu. Na artikle ke landa, beto ke zonzila yinki babakala na bakento ya kukwela lenda longoka na ekzample ya Yesu mpe ya bantu ya nkaka na kati ya Biblia. Mpe na artikle ya tatu, beto ke zonzila faso bampangi ya bakala zolá sadila otorite yina ba ke na yawu na kati ya kimvuka.
^ par. 7 Bafilm, ba-serie mpe balivre ke lakisá ntangu ya nkaka ti ya ke ve yimbi na bakala na kukwamisa kento ya yandi to na kubula yandi. Na yawu, bantu mingi ke kanisá ti ya ke ve yimbi na bakala na kudyatila kento ya yandi.
^ par. 20 Na kuzaba dyaka ya kulutila faso ya kubaka badesizion ya mbote, tala artikle “Prenons des décisions qui honorent Jéhovah,” na Yinzo ya Kengidi (na français) ya 15 Avril 2011, p. 13-17.
