1. Yisinke ayi ninkisa mugara a ruganese upangeli wendi monkedi zokudira kuwapera?

YISINKE azi tanta koge nkango “upangeli?” Vagara vamwe kutekura vakadi vawo novana vawo kuliza nompo ndi nontundiliro zawo. Munazinyetu gomukadi Yanita ogu ga tunga moEuropa kwa tanta asi: “Oku na tunga, vantu kwa pura asi vakadi kwato mulyo ntani awo kuvatara ngwendi vakareli.” Ano munazinyetu Luke ogu ga tunga moAmerika kwa tanta asi: “Vagara vamwe kuronga vana vawo asi eyi ava uyunga vakadi kwato mulyo ntani kapisi hepero kuvapurakena.” Nye nkareso ozo kapi za liza nomu Jehova ga harera vagara va tekure vakadi vawo. (Hetakanesa Marukusa 7:13.) Ngapi omu mugara na diva nawa eyi ayi tanta kukara mupangeli gomuwa gepata?

2. Yisinke ga hepa kudiva mupangeli gepata ntani morwasinke?

² Mokuninka asi mugara a kare mupangeli gomuwa, pomuhowo ga hepa kudiva eyi ana mu harere Jehova a rugane. Ga hepa hena kudiva konda zeyi Jehova ga tulira po ewapaiko lyoupangeli, nye unene po ga hepa kudiva omu na honena Jehova naJesus. Morwasinke ya karera nomulyo komugara a dive nayinye eyi? Morwa Jehova kwa pa vagara upangeli ntani age kwa va harera va u ruganese nawa.—Ruk. 12:48b.

3. Kuliza nononkango da kara mo-1 Vakolinte 11:3, yisinke tuna kulirongera mo kuhamena upangeli?

³ Resa 1 Vakolinte 11:3. Velise ezi kufaturura omu Jehova ga wapaika epata lyendi lyemeguru neli lyepevhu. Mokumona asi yige mutwe gepata lyendi, age yige ga kara nononkondo dononene. Age kwa gava upangeli kwa vamwe, nye va hepa kuuruganesa nawa morwa Jehova kutara monkedi omu ava ruganesa upangeli wawo. (Rom. 14:10; Efe. 3:14, 15) Nampili ngomu Jehova  ga gava nonkondo kwaJesus mokupangera mbungakriste, nye simpe Jehova kutara asi ngapi omu Jesus ana kututekura. (1 Kol. 15:27) Jehova kwa gava hena nonkondo komugara mokukara mupangeli gwamukadendi novana vendi, nye Jehova naJesus kutara asi ngapi omu mugara a tekura epata lyendi.—1 Pet. 3:7.

4. Nonkondo musinke ga kara nado Jehova naJesus?

⁴ Mokumona asi Jehova yige Mupangeli gepata nalinye lyemeguru neli lyepevhu, age ga kara nononkondo dokutura po noveta kuhamena omu va hepa kukara vana vendi ntani ga hepa kudivilisa nsene asi kuna kudikwama. (Jes. 33:22) Jesus ngomupangeli gombungakriste, nage ga kara nononkondo dokutura po noveta ntani nokudivilisa nsene asi kuna kudikwama.—Gar. 6:2; Koros. 1:18-20.

5. Nonkondo musinke ga kara nado mupangeli gepata ntani posinke da hagera nonkondo dendi?

⁵ Ngwendi Jehova naJesus, mupangeli gepata nage ga kara nononkondo dokutura po noveta mepata lyendi. (Rom. 7:2; Efe. 6:4) Nye popeli apa da hagera nonkondo dendi. Pasihonena, ga hepa kutura po noveta kuliza nonompango domoBibeli. (Yis. 3:5, 6) Ntani mupangeli gepata kapi ga kara nononkondo dokutura po noveta kwava va dira kukara mepata lyendi. (Rom. 14:4) Ntani hena nsene vana vendi va kura ntani kwa ka likarera velike, age kapi ga kara hena nononkondo dokuvapangera, nye nampili ngoso, awo va hepa kutwikira kufumadeka guhyawo.—Mat. 19:5.

6. Morwasinke Jehova ga tulisira po ewapaiko lyoupangeli?

⁶ Jehova kwa tulisa po ewapaiko lyoupangeli morwa kwa hara epata lyendi. Awo uhwi wokutunda kwendi. Upangeli kuvatera epata lyaJehova li kare mombili ntani pa dire kukara epiyagano. (1 Kol. 14:33, 40) Ngano kapi pwa kara mauzera asi yilye mupangeli, epata lyaJehova ngano kapi ali hafa ntani ngano kwa kara mepiyagano. Pasihonena, ngano kwato ogu ga diva asi yilye ga kara nositumbukira sokutura po matokoro gokuhulilira ntani nogu naga sikisa mo.

7. Yisinke ali uyunga etjangwa lyomo-Vaefeso 5:25, 28 kuhamena omu Jehova ga harera vagara va tekure vakadi vawo?

⁷ Nsene asi ewapaiko lyoupangeli sininke sosiwa, morwasinke nye vakadi vamwe ava lizuvhire asi kuna kuvatekura momudona nokuvaninkiliramo? Morwa sinzi sovagara kapi ava kwama nompango daJehova dokuhamena kepata, nye awo kukwama nompo. Awo hena nampo kutekura vakadi vawo momudona yipo va lizuvhe vene nawa. Pasihonena, mugara kuvhura a tekure mukadendi momudona yipo a li mone mwene asi age mulyo ndi yipo wopeke va yi dimburure asi age mugarazuni. Age kuvhura a gazare asi kapi ta vhuru kusininika mukadendi a mu hare, nye kuvhura a mu ninkise a mu tjire. Age kuvhura a pangere mukadendi a rugane nkenye eyi morwa mukadi ga tjira mugara gwendi. * Vagara ava ava gazara ngoso nokurugana yininke oyo, mepuko va kara. Awo kapi ava fumadeke vakadi moomu ga yi harera Jehova.—Resa Vaefeso 5:25, 28.

8. Ngapi omu mugara na kara mupangeli gomuwa gepata?

⁸ Mugara kuvhura a kare mupangeli gomuwa gepata nsene a honena Jehova naJesus monkedi omu ava ruganesa upangeli wawo. Tu tareni ko yikara yivali eyi ga likidire Jehova  naJesus ntani konekeni omu mupangeli gepata na likida yikara oyo kwamukadendi novana vendi.

9. Ngapi omu Jehova a likida elinunupiko?

⁹ Elinunupiko. Jehova yige muntu gonondunge po unene, nye nampili ngoso, age kupurakena komagano govakareli vendi. (Gen. 18:23, 24, 32) Age kwa pulisilire ava va kara mepangero lyendi va uyunge magano gawo. (1 Vah. 22:19-22) Jehova ga sikilira mo, nye kapi a tu pura tu rugane eyi natu dira kuvhura kurugana. Age kuvatera vantu wokudira kusikilira mo ava ava mu karere yipo yi va tompoke. (Epis. 113:6, 7) Bibeli kuuyunga asi Jehova yige “Mukwafi.” (Epis. 27:9; Heb. 13:6) Hompa Ndafita kwa tente asi age kwa mu tompokere kusikisa mo sirugana esi va mu pere morwa Jehova ga li nunupika ntani ga mu vaterere.—2 Sam. 22:36.

10. Ngapi omu Jesus ga likidire elinunupiko?

¹⁰ Tu konakoneni sihonena saJesus. Age kwa kuhwire nompadi dovarongwa vendi nampili ngomu ga kara Hompa ntani Murongi. Morwasinke Jehova ga tjangera sihorokwa esi moBibeli? Yipo vantu navenye va lirongere ko kukwatera mo vanturagumbo. Jesus kwa uyungire hena asi: “Moomu nina mu pe sihonena, none omu rugane moomu nina mu rugana.” (Joh. 13:12-17) Nampili ngomu Jesus ga kara nononkondo dononene, age kapi ga here va mu karere, nye age kwa ruganene wopeke yuma.—Mat. 20:28.

11. Yisinke na lirongera ko nturagumbo kosihonena saJehova naJesus selinunupiko?

¹¹ Eyi natu lirongera ko. Nturagumbo kuvhura kulikida elinunupiko mononkedi dononzi. Pasihonena, age kapi a ndindire ko yoyinzi kwamukadendi novana vendi va rugane eyi nava dira kuvhura kusikisa mo. Age kupurakena komagano gava vemepata lyendi nampili ga dire kuliza naga gendi. Marley ogu ga tunga moAmerika kwa tanta asi: “Poyiruwo yimwe name namugara gwange kukara nomagano gokulisiga. Nye age kutara nge asi ame mulyo ntani ga fumadeka nge morwa age kupura nge ko magano komeho a ture po etokoro.” Nturagumbo ogu ga linunupika kurugana hena yirugana yemembo nampili yi kare asi vantu kuyitara momukunda gwawo asi yirugana yovakadi. Nye ayo kapisi ureru. Morwasinke? Munazinyetu gomukadi Rachel kwa tanta asi: “Oku na  tunda nsene nturagumbo a kuhwa marupasa ndi a zerese membo, vantu tava gazara asi age kapisi mugarazuni. Vantu kuvhura va gazare hena asi kapi a vhuru kupangera mukadendi.” Nsene asi momukunda gweni namo mwa kara nkareso ezi, diworoka asi Jesus kwa kuhwire nompadi dovarongwa vendi, nampili ngomu sa kere sirugana somupika. Nturagumbo gomuwa kwa hara kuvatera mukadendi novana vendi va kare noruhafo. Kugusa ko elinunupiko, sikara musinke hena simwe somulyo ga hepa kukara naso nturagumbo gomuwa?

12. Yisinke a rugana Jehova naJesus morwa eharo?

¹² Eharo. Eharo yilyo ali mu tumangeda Jehova mwanayinye eyi a rugana. (1 Joh. 4:7, 8) Nonkango dendi Bibeli edi ga tu pa ntani mbunga zendi kulikida asi ga tu hara. Age kutuvatera tu lizuvhe epopero pokututantera asi ga tu hara. Nye ngapi kuhamena yihepwa yetu yopanyama? Jehova ‘kutupa yininke yoyinzi yokutuhafesa.’ (1 Tim. 6:17) Apa atu lipuka, age kutupukurura ntani kutwikira kutulikida eharo. Eharo kwa tumangedere Jehova a gave sizoweseso kwetu. Jesus kwa tu hara unene, ano eyi yiyo ya mu ninkisire aya tu fire. (Joh. 3:16; 15:13) Jehova naJesus ngava twikira kulikida eharo kwanavenye ava ava va limburukwa.—Joh. 13:1; Rom. 8:35, 38, 39.

13. Morwasinke ya karera nomulyo kwanturagumbo a hare epata lyendi? (Tara kakende “ Yisinke na rugana nturagumbo gomupe yipo mukadendi a mu fumadeke?”)

¹³ Eyi natu lirongera ko. Eharo lya hepa kutumangeda nturagumbo mwanayinye eyi a rugana. Morwasinke ya karera nomulyo? Mupositoli Johanesa kwa geve elimbururo asi: “Yeeyi ogo ga nyenga mukwawo [ndi epata] ogu a mono, omu na hara-hara nye Karunga ogu ga dira kumona, ngapi?” (1 Joh. 4:11, 20) Nturagumbo ogu ga hara epata lyendi ntani ogu ga hara kuhonena Jehova naJesus nga vatera epata lyendi pampepo nopanyama ntani yipo va lizuvhe epopero. (1 Tim. 5:8) Age nga ronga vana vendi nokuvapukurura. Age hena nga tura po matokoro gomawa aga aga fumadeke Jehova nokuretera epata lyendi mauwa. Tu zeni tu zogere yitwa eyi ntani tu tare omu nturagumbo na honena Jehova naJesus.

14. Ngapi omu nturagumbo na vatera epata lyendi li hedere pepi Jehova?

¹⁴ Kupakera mbili epata lyendi pampepo. Jesus kwa yi likidire asi age kwa honenene oGuhwe morwa kwa here kuvatera varongwa vendi va kare nepuro lyokupama. (Mat. 5:3, 6; Mar. 6:34) Mokulifana, sininke somulyo po unene kwanturagumbo kuna kara mokuvatera epata lyendi li hedere pepi naJehova. (Deut. 6:6-9) Age kuyirugana eyi pokudivilisa asi nage nepata lyendi kuna kuresa nokulironga Bibeli, kuna kuwiza komapongo, kuna kuzuvhisa mbudi zongwa ntani kuna kunkondopeka ukaume wawo naJehova.

15. Nkedi musinke zimwe nturagumbo na vatera vemepata lyendi va lizuvhe asi age kuvapakera mbili?

¹⁵ Kuvatera epata lyendi va lizuvhe asi age kuvapakera mbili. Jehova kwa tanterere Jesus moyitara meho yovantu asi ga mu hara. (Mat. 3:17) Jesus kwa yi likidire nkenye apa asi age kwa here varongwa vendi kupitira mweyi ga rugene neyi nga uyunga. Varongwa vendi nawo kwa mu tanterere asi va mu hara. (Joh. 15:9, 12, 13; 21:16) Nturagumbo kuvhura a likide mukadendi novana vendi asi ga va hara kupitira mweyi a rugana. Pasihonena pokulironga nawo Bibeli. Ga hepa hena kuvatantera asi ga va hara ntani asi awo mulyo kwendi. Ntani ga hepa kuvapandadeka moyitara meho yovantu nsene kuvhura.—Yis. 31:28, 29.

16. Yisinke na rugana hena nturagumbo ntani yisinke na nyokera po?

¹⁶ Kugava yihepwa yopanyama kepata lyendi. Jehova kwa pere Vaisraeli yihepwa yopanyama nampili apa va li gwanekerere netengeko morwa kudira kulimburukwa. (Deut. 2:7; 29:5) Age hena kuna kutupa yihepwa yetu yopanyama naina. (Mat. 6:31-33; 7:11) Mokulifana, Jesus kwa kutikire ava ngava mu kwama. (Mat. 14:17-20) Age hena kwa verwire ava ngava vere. (Mat. 4:24) Mokuninka asi nturagumbo a hafese Jehova, ga hepa kupakera mbili yihepwa yepata lyendi yopanyama. Nye koyili eyi ga hepa kunyokera po. Kapisi a kare siruwo sosinzi unene koyirugana morwa ngano kuvhura a dire kupakera nawa mbili epata lyendi pampepo ndi pamalizuvho.

17. Ngapi omu Jehova naJesus ava tu rongo nokutupukurura?

¹⁷ Ronga epata lyoge. Jehova kuturonga nokutupukurura morwa ana hara kutuvatera. (Heb. 12:7-9) Jesus nage kuhonena oGuhwe yipo a ronge ava va kara mepangero lyendi monkedi zeharo. (Joh. 15:14, 15) Age kugava mapukururo, nye kuyirugana neharo. (Mat. 20:24-28) Age ga yi diva asi ose kapi twa sikilira mo ntani ose pamwe kulipuka.—Mat. 26:41.

18. Yisinke a diworoka nturagumbo gomuwa?

¹⁸ Nturagumbo ogu a honene Jehova naJesus kudiworoka asi mukadendi novana vendi kapi va sikilira mo. Age kapi a kara ‘nonyanya’  namukadendi ndi novana vendi. (Koros. 3:19) Nye age kutura pasirugana mpango zomoVagarata 6:1 ntani nokuvapukurura ‘monkedi zongwa’ morwa age kudiworoka asi nage kapi ga sikilira mo. Ngwendi Jesus, age ga yi dimburura asi nkedi zongwa omu na ronga epata lyendi kuna kara kupitira mosihonena sendi.—1 Pet. 2:21.

19-20. Ngapi omu nturagumbo na honena Jehova naJesus nsene kuna kutura po matokoro?

¹⁹ Tura po matokoro gomawa. Jehova kutura po matokoro aga aga retere wopeke mauwa. Pasihonena, age kwa sitire eparu yipo tu li hafere nye kapisi a gwanene mo mauwa. Kwato ogu ga mu sininikire a gave Munwendi a ya tu fire. Age kwa yi rugene morwa kwa here tu gwanene mo uwa. Jesus nage kwa tulire po matokoro aga ga vaterere wopeke. (Rom. 15:3) Pasihonena, sikando simwe apa ga rorokere, age kwa rongere mbunga zovantu mevango lyokuninka asi a pwizumuke.—Mar. 6:31-34.

²⁰ Nturagumbo gomuwa ga yi diva asi sininke simwe somulyo esi ga hepa kurugana kuna kara kutura po matokoro gomawa mepata lyendi ntani aso situmbukira somulyo kwendi. Age kapi a tura po matokoro pwa hana konda zomulyo ndi a yi rugane moomu ana kulizuvha. Nye age kupulisira Jehova a mu ronge yipo a ture po matokoro gomawa. * (Yis. 2:6, 7) Monkedi zangoso, age nga tura po matokoro aga ngaga vatera wopeke.—Fil. 2:4.

21. Yisinke ngatu ka zogera mosirongwa sokukwama ko?

²¹ Jehova kwa pa vanturagumbo situmbukira soudigu ntani age kundindira ko kwawo va si sikise mo. Nsene nturagumbo a honena Jehova naJesus, nga kara nturagumbo gomuwa. Ano nsene mukadi a sikisa mo situmbukira sendi mepata, ngava hafa mononkwara dawo. Ngapi omu mukadi na tara upangeli wamugara gwendi mepata ntani maudigu musinke a ligwanekere nago? Sirongwa sokukwama ko ngasi ka limburura mapuro ogo.