ບົດຄວາມສຶກສາທີ 5
“ພະຄລິດເປັນຜູ້ນຳຂອງຜູ້ຊາຍທຸກຄົນ”
“ພະຄລິດເປັນຜູ້ນຳຂອງຜູ້ຊາຍທຸກຄົນ.”—1 ກຣ. 11:3
ເພງ 12 ພະເຢໂຫວາພະເຈົ້າອົງຍິ່ງໃຫຍ່
ໃຈຄວາມສຳຄັນ *
1. ມີຫຍັງແດ່ສົ່ງຜົນຕໍ່ວິທີທີ່ຜູ້ຊາຍປະຕິບັດກັບເມຍແລະລູກ?
ການເປັນ “ຫົວໜ້າຄອບຄົວ” ຫຼື “ຜູ້ນຳ” ໝາຍຄວາມວ່າແນວໃດ? ຫົວໜ້າຄອບຄົວບາງຄົນປະຕິບັດກັບລູກແລະເມຍຕາມວັດທະນະທຳ ປະເພນີ ຫຼືສິ່ງທີ່ຄອບຄົວສອນ. ພີ່ນ້ອງຍິງທີ່ຊື່ຢານິຕ້າຢູ່ໃນເອີຣົບເວົ້າວ່າ: “ບ່ອນທີ່ຂ້ອຍຢູ່ ຫຼາຍຄົນຖືວ່າຜູ້ຍິງຕ່ຳຕ້ອຍກວ່າຜູ້ຊາຍ ແລະເປັນຄືກັບຄົນຮັບໃຊ້.” ພີ່ນ້ອງຊາຍຄົນໜຶ່ງທີ່ຊື່ລຸກເຊິ່ງຢູ່ໃນສະຫະລັດອາເມຣິກາເວົ້າວ່າ: “ພໍ່ບາງຄົນສອນລູກຊາຍບໍ່ໃຫ້ສົນໃຈສິ່ງທີ່ຜູ້ຍິງເວົ້າ ເພາະມັນບໍ່ໄດ້ສຳຄັນອີ່ຫຍັງ.” ແຕ່ພະເຢໂຫວາບໍ່ຢາກໃຫ້ຜູ້ຊາຍປະຕິບັດກັບເມຍແບບນັ້ນ. (ສົມທຽບກັບມາຣະໂກ 7:13) ແລ້ວຜູ້ຊາຍຈະເປັນຫົວໜ້າຄອບຄົວທີ່ດີໄດ້ແນວໃດ?
2. ຫົວໜ້າຄອບຄົວຕ້ອງຮູ້ຫຍັງ ແລະຍ້ອນຫຍັງ?
2 ເພື່ອຈະເປັນຫົວໜ້າຄອບຄົວທີ່ດີ ຜູ້ຊາຍຕ້ອງເຂົ້າໃຈກ່ອນວ່າພະເຢໂຫວາຕ້ອງການໃຫ້ລາວເຮັດຫຍັງ. ລາວຍັງຕ້ອງຮູ້ອີກວ່າ ເປັນຫຍັງພະເຢໂຫວາໃຫ້ສິດອຳນາດກັບຜູ້ທີ່ເປັນຫົວໜ້າຄອບຄົວ. ແລ້ວລາວຈະເຮັດຕາມຕົວຢ່າງຂອງພະເຢໂຫວາແລະພະເຢຊູແນວໃດ ແລະເປັນຫຍັງການຮູ້ເລື່ອງນີ້ຈຶ່ງສຳຄັນ? ຍ້ອນວ່າພະເຢໂຫວາໃຫ້ສິດອຳນາດນີ້ກັບຫົວໜ້າຄອບຄົວແລະຄາດໝາຍໃຫ້ເຂົາເຈົ້າໃຊ້ສິດອຳນາດນີ້ໃນທາງທີ່ຖືກຕ້ອງ.—ລກ. 12:48 ສ່ວນ ຂ
ການເປັນຫົວໜ້າຄອບຄົວຫຼືຜູ້ນຳໝາຍຄວາມວ່າແນວໃດ?
3. ມີການຈັດລຳດັບສິດອຳນາດແນວໃດໃນ 1 ໂກຣິນໂທ 11:3?
3 ອ່ານ 1 ໂກຣິນໂທ 11:3. ຂໍ້ນີ້ອະທິບາຍວ່າພະເຢໂຫວາຈັດລຳດັບອຳນາດຄອບຄົວທີ່ຢູ່ໃນສະຫວັນແລະໂລກແນວໃດ. ມີ 2 ຢ່າງທີ່ສຳຄັນທີ່ກ່ຽວຂ້ອງກັບການເປັນຫົວໜ້າຄອບຄົວເຊິ່ງກໍຄື: ສິດອຳນາດແລະໜ້າທີ່ຮັບຜິດຊອບ. ພະເຢໂຫວາເປັນ “ຜູ້ນຳ” ທີ່ມີອຳນາດສູງສຸດ ແລະເພິ່ນກໍຍັງໃຫ້ທູດສະຫວັນແລະມະນຸດມີສິດອຳນາດໃນລະດັບໜຶ່ງ ແຕ່ເຂົາເຈົ້າຕ້ອງໄດ້ຮັບຜິດຊອບຕໍ່ພະເຢໂຫວາໃນການໃຊ້ສິດອຳນາດນັ້ນ. (ຣມ. 14:10; ອຟຊ. 3:14, 15) ພະເຢໂຫວາໃຫ້ພະເຢຊູມີສິດອຳນາດເໜືອປະຊາຄົມ ແຕ່ພະເຢຊູເອງກໍຕ້ອງໄດ້ຮັບຜິດຊອບຕໍ່ພະເຢໂຫວາໃນວິທີທີ່ເພິ່ນປະຕິບັດກັບເຮົາ. (1 ກຣ. 15:27) ນອກຈາກນັ້ນ ພະເຢໂຫວາຍັງໃຫ້ຜູ້ເປັນຜົວມີສິດອຳນາດຫຼາຍກວ່າເມຍແລະລູກ ແຕ່ຜູ້ເປັນຜົວຕ້ອງຮັບຜິດຊອບຕໍ່ພະເຢໂຫວາແລະພະເຢຊູໃນວິທີທີ່ລາວປະຕິບັດກັບຄອບຄົວ.—1 ປຕ. 3:7
4. ພະເຢໂຫວາແລະພະເຢຊູມີສິດອຳນາດທີ່ຈະເຮັດຫຍັງ?
4 ເນື່ອງຈາກພະເຢໂຫວາເປັນພໍ່ທີ່ມີອຳນາດຍິ່ງໃຫຍ່ສູງສຸດໃນເອກະພົບ ເພິ່ນຈຶ່ງມີສິດຕັ້ງກົດຕ່າງໆໃຫ້ກັບລູກທີ່ຢູ່ໃນສະຫວັນແລະໃນໂລກ ແລະໃຫ້ເຂົາເຈົ້າເຮັດຕາມກົດນັ້ນ. (ເອຊາ. 33:22) ແລະພະເຢຊູກໍເປັນຜູ້ນຳຂອງປະຊາຄົມຄລິດສະຕຽນ ດັ່ງນັ້ນເພິ່ນຈຶ່ງມີສິດຕັ້ງກົດແລະໃຫ້ເຂົາເຈົ້າເຮັດຕາມກົດນັ້ນ.—ຄລຕ. 6:2; ກລຊ. 1:18-20
5. ຫົວໜ້າຄອບຄົວຄລິດສະຕຽນມີສິດອຳນາດຫຍັງ ແຕ່ສິດອຳນາດຂອງລາວມີຂີດຈຳກັດແນວໃດ?
5 ຄືກັບພະເຢໂຫວາແລະພະເຢຊູ ຫົວໜ້າຄອບຄົວຄລິດສະຕຽນມີສິດທີ່ຈະຕັດສິນໃຈເລື່ອງຕ່າງໆໃນຄອບຄົວ. (ຣມ. 7:2; ອຟຊ. 6:4) ແຕ່ສິດອຳນາດຂອງເຂົາເຈົ້າມີຂີດຈຳກັດ ເຊັ່ນ: ເຂົາເຈົ້າຕ້ອງຕັ້ງກົດຕາມຫຼັກການໃນຄຳພີໄບເບິນ. (ສຸພາ. 3:5, 6) ແລະເຂົາເຈົ້າບໍ່ມີສິດທີ່ຈະຕັ້ງກົດໃຫ້ກັບຄົນທີ່ບໍ່ແມ່ນສະມາຊິກຄອບຄົວຂອງຕົວເອງ. (ຣມ. 14:4) ນອກຈາກນັ້ນ ຖ້າລູກສາວຫຼືລູກຊາຍທີ່ໃຫຍ່ແລ້ວແລະຍ້າຍອອກໄປຢູ່ຕ່າງຫາກ ເຂົາເຈົ້າກໍບໍ່ໄດ້ຢູ່ໃຕ້ສິດອຳນາດຂອງລາວແລ້ວ ແຕ່ວ່າຍັງນັບຖືລາວຢູ່.—ມທ. 19:5
ເປັນຫຍັງພະເຢໂຫວາຈຶ່ງໃຫ້ມີຫົວໜ້າຄອບຄົວ?
6. ເປັນຫຍັງພະເຢໂຫວາຈຶ່ງໃຫ້ມີຫົວໜ້າຄອບຄົວ?
6 ສິດອຳນາດໃນຄອບຄົວເປັນຂອງຂວັນຈາກພະເຢໂຫວາ. ພະເຢໂຫວາໃຫ້ສິດອຳນາດນັ້ນກໍຍ້ອນພະອົງຮັກຄອບຄົວຂອງເພິ່ນ. ການມີຫົວໜ້າຄອບຄົວຈະເຮັດໃຫ້ຄອບຄົວສາມັກຄີກັນແລະເປັນລະບຽບຮຽບຮ້ອຍ. (1 ກຣ. 14:33, 40) ແຕ່ຖ້າບໍ່ຮູ້ວ່າໃຜເປັນຫົວໜ້າຄອບຄົວ ຄອບຄົວກໍຈະສັບສົນວຸ່ນວາຍແລະບໍ່ມີຄວາມສຸກຍ້ອນບໍ່ຮູ້ວ່າໃຜຈະເປັນຜູ້ຕັດສິນຄັ້ງສຸດທ້າຍ ແລະໃຜຈະພາເຮັດຕາມການຕັດສິນນັ້ນ.
7. ຕາມເອເຟໂຊ 5:25, 28 ພະເຢໂຫວາຕ້ອງການໃຫ້ຜູ້ຊາຍປະຕິບັດແນວໃດກັບເມຍ?
7 ຖ້າການມີຫົວໜ້າຄອບຄົວເປັນສິ່ງທີ່ດີ ແລ້ວເປັນຫຍັງຜູ້ຍິງຫຼາຍຄົນໃນທຸກມື້ນີ້ຈຶ່ງຮູ້ສຶກວ່າຜົວຂອງເຂົາເຈົ້າບັງຄັບແລະເຮັດບໍ່ດີກັບເຂົາເຈົ້າ? ທີ່ເປັນແບບນີ້ກໍຍ້ອນວ່າຜູ້ຊາຍຫຼາຍຄົນບໍ່ໄດ້ເຮັດຕາມຫຼັກການຂອງພະເຢໂຫວາ ແຕ່ເຂົາເຈົ້າເຮັດຕາມທຳນຽມແລະຮີດຄອງປະເພນີ. ເຂົາເຈົ້າເຮັດບໍ່ດີກັບເມຍເພື່ອຈະໄດ້ສິ່ງທີ່ຕົວເອງຕ້ອງການເຊັ່ນ: ຜູ້ເປັນຜົວອາດຈະຂົ່ມເຫງເມຍເພື່ອໃຫ້ເຂົາເຈົ້ານັບຖືລາວຫຼາຍຂຶ້ນ ຫຼືເພື່ອສະແດງໃຫ້ຄົນອື່ນເຫັນວ່າລາວເປັນ “ລູກຜູ້ຊາຍ.” ລາວອາດຈະຄິດວ່າເຖິງລາວຈະບໍ່ສາມາດບັງຄັບໃຫ້ເມຍຮັກລາວ ແຕ່ລາວສາມາດເຮັດໃຫ້ເມຍຢ້ານລາວໄດ້. ລາວຈຶ່ງໃຊ້ຄວາມຢ້ານນີ້ເພື່ອບັງຄັບເມຍ. * ການຄິດແລະເຮັດແບບນີ້ກົງກັນຂ້າມກັບສິ່ງທີ່ພະເຢໂຫວາຕ້ອງການ ແລະຍັງເປັນການບໍ່ໃຫ້ກຽດແລະນັບຖືຜູ້ຍິງຕາມທີ່ເຂົາເຈົ້າສົມຄວນໄດ້ຮັບ.—ອ່ານເອເຟໂຊ 5:25, 28
ຜູ້ຊາຍຈະເປັນຫົວໜ້າຄອບຄົວທີ່ດີໄດ້ແນວໃດ?
8. ຜູ້ຊາຍຈະເປັນຫົວໜ້າຄອບຄົວທີ່ດີໄດ້ແນວໃດ?
8 ຜູ້ຊາຍຈະເປັນຫົວໜ້າຄອບຄົວທີ່ດີໄດ້ໂດຍເຮັດຕາມວິທີທີ່ພະເຢໂຫວາແລະພະເຢຊູໃຊ້ອຳນາດ. ຂໍໃຫ້ມາເບິ່ງສອງຄຸນລັກສະນະທີ່ພະເຢໂຫວາແລະພະເຢຊູໄດ້ສະແດງຕອນທີ່ໃຊ້ອຳນາດ ແລະຫົວໜ້າຄອບຄົວຈະສະແດງຄຸນລັກສະນະເຫຼົ່ານີ້ແນວໃດຕອນທີ່ປະຕິບັດກັບເມຍແລະລູກ.
9. ພະເຢໂຫວາສະແດງຄວາມຖ່ອມແນວໃດ?
9 ຄວາມຖ່ອມ. ພະເຢໂຫວາເປັນຜູ້ທີ່ສະຫຼາດທີ່ສຸດ ແຕ່ເພິ່ນກໍຍັງຟັງຄວາມຄິດເຫັນຂອງຜູ້ຮັບໃຊ້ຂອງເພິ່ນ. (ຕົ້ນ. 18:23, 24, 32) ແລະຍັງໃຫ້ເຂົາເຈົ້າສະເໜີຄວາມຄິດເຫັນນຳ. (1 ກະ. 22:19-22) ພະເຢໂຫວາເປັນພະເຈົ້າທີ່ສົມບູນແບບ ແຕ່ເພິ່ນກໍບໍ່ໄດ້ຄາດໝາຍຄວາມສົມບູນແບບຈາກເຮົາ. ແທນທີ່ຈະເປັນແນວນັ້ນ ເພິ່ນຊ່ອຍມະນຸດທີ່ບໍ່ສົມບູນແບບຄືພວກເຮົາໃຫ້ເຮັດວຽກຮັບໃຊ້ຂອງເພິ່ນໄດ້ສຳເລັດ. (ເພງ. 113:6, 7) ທີ່ຈິງຄຳພີໄບເບິນບອກວ່າພະເຢໂຫວາເປັນ “ຜູ້ຊ່ວຍເຫຼືອ.” (ເພງ. 27:9; ຮຣ. 13:6) ແລະແມ່ນແຕ່ກະສັດດາວິດກໍຍັງເວົ້າວ່າ ທີ່ລາວສາມາດເຮັດວຽກທີ່ພະເຢໂຫວາມອບໝາຍໃຫ້ໄດ້ສຳເລັດກໍຍ້ອນພະເຢໂຫວາຖ່ອມຕົວແລະຊ່ວຍເຫຼືອລາວ.—2 ຊາມ. 22:36
10. ພະເຢຊູໄດ້ສະແດງຄວາມຖ່ອມແນວໃດ?
10 ໃຫ້ເຮົາມາເບິ່ງຕົວຢ່າງຂອງພະເຢຊູ. ເຖິງວ່າພະເຢຊູເປັນນາຍ ແຕ່ເພິ່ນກໍຍັງລ້າງຕີນໃຫ້ພວກລູກສິດ. ເປັນຫຍັງພະເຢໂຫວາຈຶ່ງໃຫ້ຂຽນເລື່ອງນີ້ໄວ້ໃນຄຳພີໄບເບິນ? ເພື່ອເປັນແບບຢ່າງໃຫ້ກັບທຸກຄົນ ໂດຍສະເພາະແມ່ນຫົວໜ້າຄອບຄົວ. ພະເຢຊູເວົ້າວ່າ: “ຂ້ອຍເຮັດເປັນຕົວຢ່າງໃຫ້ເບິ່ງແລ້ວ ພວກເຈົ້າກໍຄວນເຮັດຕາມ.” (ຢຮ. 13:12-17) ເຖິງວ່າພະເຢຊູຈະມີສິດອຳນາດຫຼາຍ ແຕ່ເພິ່ນກໍຍັງຮັບໃຊ້ຄົນອື່ນແລະບໍ່ໄດ້ຄາດໝາຍໃຫ້ຄົນອື່ນມາຮັບໃຊ້ເພິ່ນ.—ມທ. 20:28
ຫົວໜ້າຄອບຄົວຄົນໜຶ່ງສະແດງຄວາມຖ່ອມແລະຄວາມຮັກຕໍ່ຄອບຄົວໂດຍຊ່ອຍເຮັດວຽກເຮືອນແລະຊ່ອຍໃຫ້ຄອບຄົວມີຄວາມເຊື່ອເຂັ້ມແຂງ (ເບິ່ງຂໍ້ 11, 13)
11. ຫົວໜ້າຄອບຄົວຈະເຮັດຕາມຕົວຢ່າງຂອງພະເຢໂຫວາແລະພະເຢຊູແນວໃດໃນເລື່ອງຄວາມຖ່ອມ?
11 ບົດຮຽນສຳລັບເຮົາ: ຫົວໜ້າຄອບຄົວສາມາດສະແດງຄວາມຖ່ອມໄດ້ໃນຫຼາຍໆທາງ. ຕົວຢ່າງເຊັ່ນ: ລາວຈະບໍ່ຄາດໝາຍຄວາມສົມບູນແບບຈາກລູກແລະເມຍ. ເຖິງວ່າລູກແລະເມຍຈະບໍ່ເຫັນດີກັບຄວາມຄິດເຫັນຂອງລາວ ແຕ່ລາວກໍຍັງຕັ້ງໃຈຟັງຄວາມຄິດເຫັນຂອງເຂົາເຈົ້າ. ມາລີທີ່ຢູ່ໃນສະຫະລັດອາເມຣິກາບອກວ່າ: “ບາງເທື່ອຂ້ອຍກັບຜົວຄິດບໍ່ຄືກັນ ແຕ່ຂ້ອຍຮູ້ສຶກວ່າລາວໃຫ້ກຽດຂ້ອຍເພາະລາວຂໍໃຫ້ຂ້ອຍອອກຄວາມຄິດເຫັນ ແລະລາວກໍຄິດຢ່າງຮອບຄອບກ່ອນທີ່ຈະຕັດສິນໃຈ.” ນອກຈາກນັ້ນ ຜົວທີ່ຖ່ອມຕົວຈະເຕັມໃຈເຮັດວຽກເຮືອນຊ່ອຍເມຍເຖິງຄົນອື່ນຈະຄິດວ່າວຽກເຫຼົ່ານັ້ນເປັນວຽກຂອງຜູ້ຍິງກໍຕາມ. ການເຮັດແບບນີ້ຍາກຫຼາຍ. ຍ້ອນຫຍັງ? ພີ່ນ້ອງຍິງຄົນໜຶ່ງທີ່ຊື່ຣາເຊວບອກວ່າ: “ຖ້າຜົວລ້າງຖ້ວຍຫຼືອະນາໄມເຮືອນຊ່ອຍເມຍ ຄົນແຖວບ້ານຫຼືຍາດພີ່ນ້ອງກໍຈະເວົ້າວ່າ ລາວບໍ່ແມ່ນລູກຜູ້ຊາຍເພາະລາວຍອມໃຫ້ເມຍຂົ່ມລາວ.” ຖ້າຫາກບ່ອນທີ່ເຈົ້າຢູ່ມີຫຼາຍຄົນຄິດແບບນີ້ ກໍຂໍໃຫ້ຈື່ວ່າແມ່ນແຕ່ພະເຢຊູເອງກໍຍັງລ້າງຕີນໃຫ້ພວກລູກສິດເຖິງວ່າວຽກນັ້ນຈະເບິ່ງຄືວ່າເປັນວຽກຂອງຄົນໃຊ້. ຫົວໜ້າຄອບຄົວທີ່ດີຈະບໍ່ສົນໃຈວ່າຄົນອື່ນຈະເບິ່ງວ່າລາວເປັນຄົນແບບໃດ ແຕ່ລາວສົນໃຈສິ່ງທີ່ຈະເຮັດໃຫ້ເມຍແລະລູກມີຄວາມສຸກ. ແລ້ວຫົວໜ້າຄອບຄົວທີ່ດີຈະຕ້ອງສະແດງຄຸນລັກສະນະທີ່ສຳຄັນຫຍັງອີກ?
12. ຄວາມຮັກກະຕຸ້ນພະເຢໂຫວາແລະພະເຢຊູໃຫ້ເຮັດຫຍັງ?
12 ຄວາມຮັກ. ທຸກຢ່າງທີ່ພະເຢໂຫວາເຮັດແມ່ນມາຈາກຄວາມຮັກ. (1 ຢຮ. 4:7, 8) ພະເຢໂຫວາສະແດງຄວາມຮັກຕໍ່ເຮົາໂດຍໃຫ້ເຮົາມີຄຳພີໄບເບິນແລະອົງການເພື່ອຊ່ອຍເຮົາໃຫ້ມີຄວາມເຊື່ອເຂັ້ມແຂງ. ພະເຢໂຫວາຍັງເບິ່ງແຍງເຮົາທາງດ້ານອາລົມຄວາມຮູ້ສຶກໂດຍບອກວ່າຮັກເຮົາ. ແລ້ວສິ່ງຈຳເປັນທາງດ້ານວັດຖຸເດ ພະເຢໂຫວາຊ່ອຍເຮົາບໍ? ພະເຢໂຫວາ “ໃຫ້ພວກເຮົາມີທຸກສິ່ງທີ່ເຮັດໃຫ້ພວກເຮົາມີຄວາມສຸກ.” (1 ຕມ. 6:17) ແລະຕອນທີ່ເຮົາເຮັດຜິດພາດເພິ່ນກໍສັ່ງສອນເຮົາແລະບໍ່ໄດ້ເຊົາຮັກເຮົາ. ຍ້ອນຄວາມຮັກ ພະເຢໂຫວາຈຶ່ງໄດ້ຈັດກຽມຄ່າໄຖ່ໃຫ້ພວກເຮົາ. ສ່ວນພະເຢຊູເອງກໍຮັກເຮົາຫຼາຍຈົນເຖິງຂັ້ນຍອມຕາຍເພື່ອເຮົາ. (ຢຮ. 3:16; 15:13) ເຫັນໄດ້ແຈ້ງວ່າບໍ່ມີຫຍັງທີ່ຈະມາຂັດຂວາງບໍ່ໃຫ້ພະເຢໂຫວາແລະພະເຢຊູສະແດງຄວາມຮັກຕໍ່ເຮົາ.—ຢຮ. 13:1; ຣມ. 8:35, 38, 39
13. ເປັນຫຍັງຈຶ່ງສຳຄັນທີ່ຫົວໜ້າຄອບຄົວຈະສະແດງຄວາມຮັກຕໍ່ຄອບຄົວ? (ເບິ່ງຂອບ “ ຜູ້ຊາຍທີ່ແຕ່ງດອງໃໝ່ຈະໄດ້ຮັບຄວາມນັບຖືຈາກເມຍໄດ້ແນວໃດ?”)
13 ບົດຮຽນສຳລັບເຮົາ: ຫົວໜ້າຄອບຄົວຄວນເຮັດທຸກຢ່າງດ້ວຍຄວາມຮັກ. ເປັນຫຍັງການເຮັດແບບນີ້ຈຶ່ງສຳຄັນ? ອັກຄະສາວົກໂຢຮັນບອກວ່າ: “ຄົນທີ່ບໍ່ຮັກພີ່ນ້ອງ [ຫຼື ຄອບຄົວ] ທີ່ລາວເບິ່ງເຫັນຈະຮັກພະເຈົ້າທີ່ລາວເບິ່ງບໍ່ເຫັນໄດ້ແນວໃດ.” (1 ຢຮ. 4:11, 20) ຜູ້ຊາຍທີ່ຮັກຄອບຄົວແລະຢາກເຮັດຕາມຕົວຢ່າງຂອງພະເຢໂຫວາແລະພະເຢຊູຈະຊ່ອຍຄອບຄົວໃຫ້ມີສິ່ງຈຳເປັນທາງດ້ານຄວາມເຊື່ອ ທາງດ້ານອາລົມຄວາມຮູ້ສຶກ ແລະທາງດ້ານວັດຖຸ. (1 ຕມ. 5:8) ລາວຈະຝຶກລູກແລະສັ່ງສອນລູກ. ລາວຈະຕັດສິນໃຈໃນແບບທີ່ເຮັດໃຫ້ພະເຢໂຫວາໄດ້ຮັບກຽດ ແລະເຮັດໃຫ້ຄອບຄົວໄດ້ຮັບປະໂຫຍດ. ໃຫ້ເຮົາມາເບິ່ງ 3 ຢ່າງທີ່ຫົວໜ້າຄອບຄົວຄວນເຮັດ ແລະເຮົາຈະມາເບິ່ງວ່າລາວຈະເຮັດຕາມຕົວຢ່າງຂອງພະເຢໂຫວາແລະພະເຢຊູໄດ້ແນວໃດ.
ສິ່ງທີ່ຫົວໜ້າຄອບຄົວຄວນເຮັດ
14. ຫົວໜ້າຄອບຄົວຈະຊ່ອຍຄອບຄົວໃຫ້ມີຄວາມເຊື່ອທີ່ເຂັ້ມແຂງໄດ້ແນວໃດ?
14 ຊ່ອຍຄອບຄົວໃຫ້ມີຄວາມເຊື່ອເຂັ້ມແຂງ. ພະເຢຊູໄດ້ສະແດງໃຫ້ເຫັນວ່າເພິ່ນເປັນຄືກັບພໍ່ຂອງເພິ່ນໂດຍການຊ່ອຍພວກລູກສິດໃຫ້ມີຄວາມເຊື່ອທີ່ເຂັ້ມແຂງ. (ມທ. 5:3, 6; ມຣກ. 6:34) ຄ້າຍຄືກັນ ສິ່ງທີ່ສຳຄັນທີ່ສຸດທີ່ຫົວໜ້າຄອບຄົວຕ້ອງເຮັດກໍຄື ຊ່ອຍຄອບຄົວໃຫ້ມີຄວາມເຊື່ອທີ່ເຂັ້ມແຂງ. (ບັນຍັດ. 6:6-9) ເພື່ອຈະເຮັດແບບນີ້ໄດ້ລາວຕ້ອງພາຄອບຄົວສຶກສາຄຳພີໄບເບິນ ເຂົ້າຮ່ວມການປະຊຸມ ໄປປະກາດ ແລະຊ່ວຍໃຫ້ຄອບຄົວມີສາຍສຳພັນທີ່ໃກ້ຊິດກັບພະເຢໂຫວາຕໍ່ໆໄປ.
15. ວິທີໜຶ່ງທີ່ສະແດງວ່າຫົວໜ້າຄອບຄົວເບິ່ງແຍງຄອບຄົວທາງດ້ານອາລົມຄວາມຮູ້ສຶກແມ່ນຫຍັງ?
15 ເບິ່ງແຍງຄອບຄົວທາງດ້ານອາລົມຄວາມຮູ້ສຶກ. ພະເຢໂຫວາບອກວ່າເພິ່ນຮັກພະເຢຊູຕໍ່ໜ້າຄົນອື່ນ. (ມທ. 3:17) ພະເຢຊູສະແດງຄວາມຮັກຕໍ່ພວກລູກສິດໂດຍທາງຄຳເວົ້າແລະການກະທຳ ແລະພວກລູກສິດບອກວ່າເຂົາເຈົ້າຮັກພະເຢຊູຄືກັນ. (ຢຮ. 15:9, 12, 13; 21:16) ຫົວໜ້າຄອບຄົວເຮັດໃຫ້ເມຍແລະລູກເຫັນວ່າລາວຮັກເຂົາເຈົ້າໂດຍສິ່ງທີ່ລາວເຮັດເຊັ່ນ: ພາຄອບຄົວສຶກສາຄຳພີໄບເບິນ. ລາວຄວນບອກວ່າລາວຮັກແລະເຫັນຄ່າລູກກັບເມຍ ແລະຊົມເຊີຍເຂົາເຈົ້າຕໍ່ໜ້າຄົນອື່ນເມື່ອເຫັນວ່າເໝາະສົມ.—ສຸພາ. 31:28, 29
ເພື່ອຈະເຮັດໃຫ້ພະເຢໂຫວາພໍໃຈ ຫົວໜ້າຄອບຄົວຕ້ອງຈັດໃຫ້ຄອບຄົວມີສິ່ງຈຳເປັນເລື່ອງວັດຖຸ (ເບິ່ງຂໍ້ 16)
16. ຫົວໜ້າຄອບຄົວຕ້ອງເຮັດຫຍັງ ແລະລາວຄວນລະວັງໃນເລື່ອງຫຍັງ?
16 ເບິ່ງແຍງຄອບຄົວໃຫ້ມີສິ່ງຈຳເປັນໃນເລື່ອງວັດຖຸ. ພະເຢໂຫວາໄດ້ເບິ່ງແຍງຊາວອິດສະຣາເອນໃຫ້ມີສິ່ງຈຳເປັນ ແມ່ນແຕ່ຕອນທີ່ເຂົາເຈົ້າຖືກລົງໂທດຍ້ອນບໍ່ເຊື່ອຟັງ. (ບັນຍັດ. 2:7; 29:5) ໃນທຸກມື້ນີ້ເພິ່ນກໍເບິ່ງແຍງເຮົາໃຫ້ມີສິ່ງຈຳເປັນຄືກັນ. (ມທ. 6:31-33; 7:11) ພະເຢຊູກໍຮຽນແບບພະເຢໂຫວາໂດຍເບິ່ງແຍງພວກລູກສິດຂອງເພິ່ນ. (ມທ. 14:17-20) ແລະເພິ່ນຍັງໄດ້ປິ່ນປົວຄົນເຈັບນຳ. (ມທ. 4:24) ດັ່ງນັ້ນ ຫົວໜ້າຄອບຄົວຕ້ອງເບິ່ງແຍງຄອບຄົວໃຫ້ມີສິ່ງຈຳເປັນເລື່ອງວັດຖຸເພື່ອຈະເຮັດໃຫ້ພະເຢໂຫວາພໍໃຈ. ແຕ່ລາວຕ້ອງລະວັງໃນເລື່ອງນີ້ ລາວບໍ່ຄວນເຮັດວຽກອາຊີບຫຼາຍເກີນໄປຈົນວ່າບໍ່ມີເວລາເບິ່ງແຍງຄອບຄົວທາງດ້ານຄວາມເຊື່ອແລະອາລົມຄວາມຮູ້ສຶກ.
17. ພະເຢໂຫວາແລະພະເຢຊູຝຶກແລະສອນເຮົາແນວໃດ?
17 ຝຶກແລະສອນ. ພະເຢໂຫວາຝຶກແລະສັ່ງສອນເຮົາຍ້ອນຢາກໃຫ້ເຮົາໄດ້ຮັບສິ່ງດີໆ. (ຮຣ. 12:7-9) ພະເຢຊູກໍເຮັດຄືກັບພະເຢໂຫວາໂດຍຝຶກສອນພວກລູກສິດດ້ວຍຄວາມຮັກ. (ຢຮ. 15:14, 15) ເພິ່ນໃຫ້ຄຳແນະນຳແບບກົງໄປກົງມາກັບພວກລູກສິດ ແຕ່ກໍເຮັດດ້ວຍຄວາມອ່ອນໂຍນ. (ມທ. 20:24-28) ເພິ່ນເຂົ້າໃຈວ່າເຮົາເປັນຄົນບໍ່ສົມບູນແບບແລະມັກຈະເຮັດຜິດພາດເລື້ອຍໆ.—ມທ. 26:41
18. ຫົວໜ້າຄອບຄົວທີ່ດີຕ້ອງຈື່ຫຍັງໄວ້?
18 ຫົວໜ້າຄອບຄົວເຮັດຕາມຕົວຢ່າງຂອງພະເຢໂຫວາແລະພະເຢຊູໂດຍຈື່ວ່າເມຍແລະລູກເປັນຄົນບໍ່ສົມບູນແບບ. ດັ່ງນັ້ນລາວຈະບໍ່ໃຊ້ຄວາມ “ຮຸນແຮງ” ກັບເມຍແລະລູກ. (ກລຊ. 3:19) ແທນທີ່ຈະເຮັດແນວນັ້ນ ລາວຈະເຮັດຕາມຫຼັກການທີ່ຢູ່ໃນຄາລາເຕຍ 6:1 ແລະພະຍາຍາມຊ່ອຍເຂົາເຈົ້າໃຫ້ຢູ່ໃນທາງທີ່ຖືກຕ້ອງ “ດ້ວຍຄວາມອ່ອນໂຍນ.” ແລະໃນຂະນະດຽວກັນລາວຕ້ອງຈື່ວ່າຕົວເອງກໍເປັນຄົນບໍ່ສົມບູນແບບຄືກັນ. ລາວເຂົ້າໃຈວ່າວິທີສອນທີ່ດີທີ່ສຸດກໍຄືເປັນຕົວຢ່າງໃຫ້ຄົນອື່ນຮຽນແບບຄືກັບທີ່ພະເຢຊູເຮັດ.—1 ປຕ. 2:21
19-20. ເມື່ອຕ້ອງຕັດສິນໃຈ ຫົວໜ້າຄອບຄົວຈະຮຽນແບບພະເຢໂຫວາແລະພະເຢຊູໄດ້ແນວໃດ?
19 ຕັດສິນໃຈແບບຄິດເຖິງຄົນອື່ນ. ພະເຢໂຫວາຕັດສິນໃຈໃນແບບທີ່ຈະເຮັດໃຫ້ຄົນອື່ນໄດ້ຮັບປະໂຫຍດຫຼາຍທີ່ສຸດ. ຕົວຢ່າງເຊັ່ນ: ຕອນທີ່ພະເຢໂຫວາສ້າງສິ່ງທີ່ມີຊີວິດເພິ່ນບໍ່ໄດ້ຄິດເຖິງຜົນປະໂຫຍດຂອງຕົວເອງ ແຕ່ເພິ່ນຢາກໃຫ້ເຮົາມີຄວາມສຸກກັບຊີວິດ. ບໍ່ມີໃຜບັງຄັບເພິ່ນໃຫ້ສະລະລູກຊາຍເພື່ອໄຖ່ບາບໃຫ້ພວກເຮົາ. ແຕ່ເພິ່ນເຕັມໃຈເຮັດແບບນັ້ນເພາະຢາກຊ່ອຍເຮົາ. ພະເຢຊູກໍຄືກັນ ເພິ່ນຕັດສິນໃຈໃນແບບທີ່ເຮັດໃຫ້ຄົນອື່ນໄດ້ຮັບປະໂຫຍດ ເຊັ່ນ: ພະເຢຊູໄດ້ສະລະເວລາທີ່ຈະພັກຜ່ອນເພື່ອສອນຜູ້ຄົນທີ່ມາຫາເພິ່ນ.—ຣມ. 15:3; ມຣກ. 6:31-34
20 ຫົວໜ້າຄອບຄົວທີ່ດີຮູ້ວ່າສິ່ງທີ່ຍາກທີ່ສຸດທີ່ລາວຕ້ອງເຮັດກໍຄື ຕັດສິນໃຈດີໆເພື່ອຄອບຄົວ. ແຕ່ລາວຖືວ່າການຕັດສິນໃຈດີໆເພື່ອຄອບຄົວນີ້ເປັນເລື່ອງສຳຄັນຫຼາຍ ດັ່ງນັ້ນລາວຕ້ອງລະວັງທີ່ຈະບໍ່ຕັດສິນໃຈຕາມໃຈຕົວເອງຫຼືຕາມອາລົມ. ແຕ່ລາວຈະໃຫ້ພະເຢໂຫວາສອນລາວເພື່ອຊ່ອຍໃຫ້ລາວຕັດສິນໃຈໄດ້ຢ່າງດີ. * (ສຸພາ. 2:6, 7) ເມື່ອລາວເຮັດແບບນີ້ລາວກໍຄິດເຖິງຜົນປະໂຫຍດຂອງຄົນອື່ນ ບໍ່ແມ່ນຂອງລາວເອງ.—ຟລປ. 2:4
21. ເຮົາຈະຮຽນຫຍັງໃນບົດຄວາມຕໍ່ໄປ?
21 ພະເຢໂຫວາໃຫ້ຫົວໜ້າຄອບຄົວມີໜ້າທີ່ຮັບຜິດຊອບທີ່ຍາກພໍສົມຄວນ ແລະເພິ່ນຍັງໃຫ້ເຂົາເຈົ້າຮັບຜິດຊອບຕໍ່ວຽກນັ້ນ. ແລະຖ້າຜົວພະຍາຍາມທີ່ຈະເຮັດຕາມຕົວຢ່າງຂອງພະເຢໂຫວາແລະພະເຢຊູ ລາວກໍຈະເປັນຫົວໜ້າຄອບຄົວທີ່ດີ. ແລະຖ້າເມຍເຮັດຕາມໜ້າທີ່ຂອງຕົວເອງກໍຈະເຮັດໃຫ້ຄອບຄົວມີຄວາມສຸກ. ເມຍຈະຮູ້ສຶກແນວໃດຕໍ່ຜົວທີ່ເປັນຫົວໜ້າຄອບຄົວ ແລະລາວອາດຈະມີບັນຫາຫຍັງແດ່ໃນເລື່ອງນີ້? ໃນບົດຄວາມຕໍ່ໄປຈະຕອບຄຳຖາມນີ້.
ເພງ 16 ສັນເສີນເຢໂຫວາສຳລັບລູກຊາຍທີ່ຖືກແຕ່ງຕັ້ງ
^ ຂໍ້ 5 ເມື່ອຜູ້ຊາຍຄົນໜຶ່ງແຕ່ງດອງ ລາວກໍກາຍມາເປັນຫົວໜ້າຄອບຄົວ. ໃນບົດຄວາມຊຸດນີ້ມີ 3 ເລື່ອງ. ບົດຄວາມທຳອິດເຮົາຈະມາຮຽນຮູ້ວ່າ ການເປັນຫົວໜ້າຄອບຄົວຫຼືຜູ້ນຳໝາຍຄວາມວ່າແນວໃດ? ເປັນຫຍັງພະເຢໂຫວາຈຶ່ງໃຫ້ສິດອຳນາດນັ້ນ? ແລ້ວຜູ້ຊາຍຈະຮຽນຫຍັງຈາກຕົວຢ່າງຂອງພະເຢໂຫວາແລະພະເຢຊູ? ໃນບົດຄວາມທີ 2 ເຮົາຈະມາຮຽນຮູ້ວ່າຜົວແລະເມຍຈະຮຽນຫຍັງຈາກຕົວຢ່າງຂອງພະເຢຊູແລະຕົວຢ່າງຂອງຄົນອື່ນໆໃນຄຳພີໄບເບິນ. ແລະໃນບົດຄວາມທີ 3 ເຮົາຈະມາຮຽນຮູ້ວ່າພີ່ນ້ອງຊາຍຄວນໃຊ້ອຳນາດແນວໃດໃນປະຊາຄົມ.
^ ຂໍ້ 7 ເບິ່ງຄືວ່າການໃຊ້ຄວາມຮຸນແຮງກັບເມຍເປັນເລື່ອງທຳມະດາເຊິ່ງບາງເທື່ອເຮົາກໍຈະເຫັນຢູ່ໃນໜັງ ໃນລະຄອນ ຫຼືແມ່ນແຕ່ໃນປຶ້ມກາຕູນ. ຍ້ອນແນວນີ້ຈຶ່ງເຮັດໃຫ້ຫຼາຍຄົນຄິດວ່າການທີ່ຜົວໃຊ້ຄວາມຮຸນແຮງກັບເມຍບໍ່ແມ່ນເລື່ອງຜິດ.
^ ຂໍ້ 20 ສຳລັບຂໍ້ມູນເພີ່ມເຕີມກ່ຽວກັບວິທີຕັດສິນໃຈໄດ້ດີໃຫ້ເບິ່ງບົດຄວາມທີ່ຊື່ວ່າ “ຈົ່ງຕັດສິນໃຈແບບທີ່ເຮັດໃຫ້ພະເຢໂຫວາໄດ້ຮັບການສັນລະເສີນ” ໃນຫໍສັງເກດການ 15 ເມສາ 2011 ໜ້າ 13-17 (ພາສາໄທ)
