1. Dahaka badi haida daidiai tatau haida ese ha’hine bona natu na e biagudia aukamu?

OIEMU ai ina hereva ruma bese “kwarana” anina be dahaka? Tatau haida na hanua ena kastom o edia bese maurina e badinaiamu dainai, idia ese hahine bona natu na e biagudia aukamu. Europe ai, Taihu Yanita na ini e gwau toma: “Lau na nohomu gabunai, taunimanima na e laloamu tatau ese hahine na e hereadia bona hahine na hesiai taudia.” United States ai, Tadikaka Luke na ini e gwau toma: “Tama haida ese natudia memerodia na e hadibadiamu, hahine ese e gwauraimu herevadia na asi anidia dainai, basie kamonai henidia.” To, Iehova na e uramu tatau ese adavadia na bae matauraidia. (Mareko 7:13 ba haheḡereḡerea.) Una dainai dahaka ese tau baine durua ruma bese kwarana namona ai bainela?

2. Ruma bese kwarana be dahaka baine diba na namo, bona dahaka dainai?

² Bema tau ta na e uramu ruma bese kwarana namona ai bainela, namona na baine diba Iehova be e uramu ia be dahaka baine kara. Dahaka dainai Iehova ese ruma bese kwarana e haginia? Tau ese Iehova bona Iesu be ede baine tohotohodia toma? Dahaka dainai tau ese unu henanadai haeredia baine diba na ḡau badana? Badina Iehova ese siahu na ruma bese kwarana e henia, bona ia na e uramu una siahu na tau ese baine ḡaukaralaia namonamo.​—Luka 12:48b.

3. Korinto Ginigunana 11:3 ese kwara dagina be ede e herevalaia toma?

³ Korinto Ginigunana 11:3 ba duahia. Ina siri na Iehova ese guba bona tanobada ai ena bese badana e haginia dalana e herevalaia. Ia na kwara dainai, ia ese ḡau iboudiai e biagudiamu. Bona Dirava ese una kwara dagina na ma haida e  henidia, to dagi e ḡaukaralaia kereremu taudia na be hahemaoro henidiamu. (Roma 14:10; Efe. 3:14, 15) Iehova ese Iesu na siahu e henia kongrigeisin baine biagua, to Iesu ese ita e biagudamu dalana na Iehova ese e itaiamu. (1 Kor. 15:27) Iehova ese tau danu siahu e henia adavana bona natuna baine biagudia, to ia ese ena ruma bese e biagudiamu dalana na Iehova bona Iesu ese e itaiamu danu.​—1 Pet. 3:7.

4. Iehova bona Iesu be mai edia siahu dahaka bae kara?

⁴ Iehova na mai ena siahu taravatu baine ato bona ia natuna guba ai bona tanobada ai baine hamaorodia bae badina totona. (Isa. 33:22) Iesu na Kristen kongrigeisin kwarana dainai, ia danu mai ena maoro taravatu baine ato bona baine hamaoroda unu taravatu baita badina.​—Gal. 6:2; Kol. 1:18-20.

5. Kristen ruma bese kwarana be mai ena siahu dahaka baine kara?

⁵ Iehova bona Iesu e tohotohodiamu tauna na mai ena siahu ena ruma bese totona abi hidi o disisin baine kara. (Roma 7:2; Efe. 6:4) To, iena siahu na mai hetoana. Heḡereḡere, ia ese Dirava ena Hereva ena hahekau herevadia amo taravatu baine ato. (Her. 3:5, 6) To ruma bese kwarana na asi ena maoro ruma bese ma ta totona taravatu baine ato. (Roma 14:4) Danu natu bae bada bona ruma bae rakatania neganai, ena be idia na dia tamadia henudiai, to dounu ia na bae matauraia.​—Mat. 19:5.

6. Dahaka dainai Iehova ese kwara dagina e atoa?

⁶ Iehova ese kwara dagina e atoa badina na ena bese e lalokau henidiamu. Una na iena harihari ḡauna ta. Kwara dagina dainai Iehova ena ruma bese na maino ai bae noho bona ḡau iboudiai bae heau namonamo diba. (1 Kor. 14:33, 40) Bema kwara dagina na lasi, Iehova ena bese na basine heau namonamomu bona basine moalemu. Heḡereḡere, ta basine dibamu daika ese abi hidi be karaiamu bona daika ese be gunalaidiamu.

7. Efeso 5:25, 28 heḡereḡerena, Iehova ena ura be tatau ese ha’hine bae biagudia auka, a?

⁷ Bema Dirava ese e atoa kwara dagina na ḡau namona, dahaka dainai hari ha’hine momo na e hemamimu adavadia ese e kara auka henidiamu o e biagudia aukamu? Badina tatau momo ese Iehova ena taravatu ruma bese totona na asie badinaiamu, to edia kastom bona mauri daladia e badinamu. Reana adavadia e daḡedaḡe henidiamu, edia ura dikadia bae haḡuḡuru totona. Heḡereḡere, reana tau na be uramu haida ese bae matauraia dainai adavana be biagua aukamu, eiava unu be kara tomamu badina e uramu baine hahedinaraia ia na “tau korikori.” Reana be laloamu adavana na basine doriamu ia baine lalokau henia, to garina baine gari. Bona una gari karana baine ḡaukaralaia baine biagua totona. * Unu e lalo tomamu bona unu e kara tomamu tataudia na kekerere. Idia ese ha’hine na asie matauraidiamu bona idia e karaiamu karana na dia Iehova ena ura.​—Efeso 5:25, 28 ba duahi.

8. Edena dalai tau na ruma bese kwarana namona ai bainela diba?

⁸ Tau na ruma bese kwarana namona ai bainela diba, bema Iehova bona Iesu ese kwara dagina e ḡaukaralaiamu dalana baine tohotohoa. Mani Iehova bona Iesu ese e  hahedinarai kara rua aita lalodia, bona baita itaia edena dalai tau ese adavana bona natuna e kara henidiamu neganai, unu kara baine hahedinarai.

9. Iehova ese manau karana be ede e hahedinaraia tomamu?

⁹ Manau. Iehova na aonega herea Tauna; to, ia na ena hesiai taudia edia lalohadai danu e kamonaimu. (Gen. 18:23, 24, 32) Ena heitatao henunai e nohomu taudia na e hagoadadiamu edia lalohadai bae gwaurai. (1 Han. 22:19-22) Iehova na ḡoevadae, to ita na se doridamu baita ḡoevadae. To Ia ese dia ḡoevadae taudia na e durudiamu ia ihesiai henina ai bae kwalimu. (Sal. 113:6, 7) Baibul ese Iehova na e gwauraiamu ‘ikahada’ tauna. (Sal. 27:9; Heb. 13:6) King David na e gwa, Iehova ena heduru bona manau dainai ia e henia ḡaukara badana na e haḡuḡurua.​—2 Sam. 22:36.

10. Iesu ese manau karana be ede e hahedinaraia toma?

¹⁰ Iesu ena haheitalai mani aita laloa. Ena be ia na ena hahediba edia Lohiabada, to ia ese idia aedia e huri. Dahaka dainai Iehova ese una sivarai na Baibul lalonai e torea? Unu amo taunimanima iboudiai, ruma bese kwaradia danu, baine hadibadia una haheitalai bae tohotohoa. Iesu eto: “Lau ese na karaiamu karana na umui danu ba kara.” (Ioa. 13:12-17) Ena be Iesu ena siahu na bada, to se ura haida ese isiaina bae lao heni. A ia hari haida isiaidia e lao heniva.​—Mat. 20:28.

11. Ruma bese kwarana be Iehova bona Iesu edia manau karana amo dahaka e dibamu?

¹¹ Ta dibaiamu ḡauna. Ruma bese kwarana ese manau karana na dala momo ai baine hahedinaraia diba. Heḡereḡere, basineto ia adavana bona natuna na ḡoḡoevadae. Ia ese edia lalohadai baine kamonai, ena be edia lalohadai na idau. United States ai, taihu Marley na e gwa: “Nega haida adavagu bona lau emai lalohadai na i’idau. To na mamiamu ia ese e lalogu badamu bona e matauraigumu badina egu lalohadai e tahuamu, e lalodia namonamomu bena abi hidi e karamu.” Danu, manau tauna na mai moalena ida ruma ḡaukaradia e karamu, ena be ena gabu ai unu na ha’hine edia ḡaukara. Una na taina auka. Dahaka dainai? Taihu Rachel na e gwa: “Egu gabu ai, bema tau na adavana be duruamu mereki be hurimu  o ruma be haḡoevaiamu, dekena taudia o varavara na be lalomu, ia be ‘tau korikori’ eiava. Be tomamu adavana na se biaguamu.” Bema emu gabu ai danu unuheto, ba helalotao Iesu na ena hahediba aedia e huri, ena be taunimanima e tomava una na hesiai tauna ena ḡaukara. Ruma bese kwarana namona na sibona se helalomu, to adavana bona natuna edia hemami e lalomu. Dia manau karana mo, to edena kara ma ta ese tau baine durua ruma bese kwarana namona ai bainela?

12. Lalokau dainai Iehova bona Iesu be dahaka e kara?

¹² Lalokau. Iehova na lalokau ai ḡau iboudiai e kara. (1 Ioa. 4:7, 8) Ia ese e lalokau henidamu dainai ena Hereva, Baibul, bona ena orea amo lauma dalanai e naridamu. Eda hemami e lalomu dainai e hadibadamu ita na e lalokau henidamu. Bona tauani dalanai be ede bamona? Iehova ese ‘ihamoaleda ḡaudia iboudiai e henidamu.’ (1 Tim. 6:17) Ta kereremu neganai e matahakani henidamu, to dounu e lalokau henidamu. Iehova na lalokau dainai mauri davana e karaia. Bona Iesu ese e lalokau henida bada dainai ena mauri e heni. (Ioa. 3:16; 15:13) Iehova bona Iesu ese idia e badinadiamu taudia ediai e hahedinaraia lalokauna na ḡau ta ese basine hadikaia diba.​—Ioa. 13:1; Roma 8:35, 38, 39.

13. Dahaka dainai ruma bese kwarana ese ena famili baine lalokau henidia na ḡau badana? (Maua ladana, “ Headava Matamata Tauna ese Adavana be Ede Baine Matauraia Toma?” ba itaia.)

¹³ Ta dibaiamu ḡauna. Namona na ruma bese kwarana ese lalokau ai ḡau iboudiai baine kara. Dahaka dainai una na mai anina bada? Aposetolo Ioane eto: “Tadikakana, e itaiamu tauna, na basinema ura henia, se itaiamu Diravana ede bema ura henia toma?” (1 Ioa. 4:11, 20) Ena ruma bese e lalokau heniamu bona e uramu Iehova bona Iesu baine tohotohodia tauna ese ena ruma bese be duruamu Iehova bae hetura henia, edia hemami be lalomu, bona edia dabu ḡaudia be henimu. (1 Tim. 5:8) Natuna be hadibadiamu bona be sisiba henidiamu. Danu be hekwarahimu Iehova  ihanamona bona ena ruma bese baine durudia diba abi hididia be karamu. Mani unu dala ta ta aita herevalai bona baita itaia ededia dala ai ruma bese kwarana ese Iehova bona Iesu baine tohotohodia.

14. Edena dalai ruma bese kwarana ese lauma dalanai ena famili baine naria?

¹⁴ Lauma dalanai ena famili baine naria. Iesu na Tamana e tohotohoava dainai, ia murinai e raka taudia edia abidadama e hagoadaiava. (Mat. 5:3, 6; Mar. 6:34) Una heḡereḡerena, ruma bese kwarana ena maduna na, lauma dalanai ena famili baine naridia. (Deu. 6:6-9) Tau na ena famili ida Dirava ena Hereva bae duahia bona bae stadilaia, hebou baela, sivarai namona bae harorolaia bona edia hetura karana Iehova ida bae hagoadaia.

15. Edena dalai ruma bese kwarana ese baine hahedinaraia ena ruma bese edia hemami na e laloamu?

¹⁵ Ena ruma bese edia hemami baine laloa. Iehova na taunimanima vairadiai e gwau hedinarai Iesu na e lalokau heniamu. (Mat. 3:17) Iesu ese ena kara bona hereva amo e hahedinaraia ia murinai e rakava taudia na e lalokau henidiava. Una dainai, idia danu Iesu e lalokau henia. (Ioa. 15:9, 12, 13; 21:16) Ruma bese kwarana ese baine hahedinaraia adavana bona natuna na e lalokau henidiamu, heḡereḡere idia ida Baibul baine stadilaia. Danu, namona na baine hadibadia, idia na e lalokau henidiamu bona e lalodia badamu, bona haida vairadiai danu baine hanamodia.​—Her. 31:28, 29.

16. Ruma bese kwarana be dahaka baine kara, bona dahaka dainai baine henahua toho?

¹⁶ Tauani dalanai ena ruma bese baine naria. Iehova ese Israel taudia edia dabu ḡaudia na e heniva, ena be edia gwau-edeede dainai e matahakani henidiava. (Deu. 2:7; 29:5) Hari ina negai danu ia ese eda dabu ḡaudia na e henimu. (Mat. 6:31-33; 7:11) Una heḡereḡerena, Iesu ese ia murinai e rakava taudia na e ubudiava. (Mat. 14:17-20) Danu ia ese gorere taudia e hanamodiava. (Mat. 4:24) Ruma bese kwarana ese Iehova baine hamoalea totona, namona na tauani dalanai ena ruma bese baine naria. To, namona na baine henahua toho. Badina moni ḡaukara ai be bisimu neganai, ia na asi ena nega ena ruma bese edia hemami baine laloa bona lauma dalanai baine naridia.

17. Iehova bona Iesu ese e hadibadamu bona e sisiba henidamu karana amo dahaka ta dibamu?

¹⁷ Lalokau ai emu ruma bese ba hadibaia bona ba sisiba henia. Iehova na ita e hadibadamu bona e sisiba henidamu badina e uramu baine duruda. (Heb. 12:7-9) Tamana heḡereḡerena, Iesu na lalokau ai e gunalaidiamu taudia e hadibadiamu. (Ioa. 15:14, 15) Mai ena kara namo ida sisiba auka e  henimu. (Mat. 20:24-28) Bona e lalopararamu, ita na dia ḡoevadae bona nega haida baita kereremu.​—Mat. 26:41.

18. Ruma bese kwarana namona ese dahaka baine lalopararalaia na namo?

¹⁸ Iehova bona Iesu e tohotohodiamu ruma bese kwarana na e lalopararamu ia adavana bona natuna na dia ḡoevadae. Una dainai se ‘lalo dika henidiamu.’ (Kol. 3:19) To, Galatia 6:1 ena hahekau herevana e badinaiamu bona ‘mai manauna ida’ e hamaoromaorodiamu, badina ia na dibana ia danu dia ḡoevadae. Iesu heḡereḡerena, tau na e lalopararamu namona na kara amo ena ruma bese baine hadibadia.​—1 Pet. 2:21.

19-20. Ruma bese kwarana ese abi hidi e karamu neganai, edena dalai Iehova bona Iesu baine tohotohodia?

¹⁹ Abi hidi baine kara neganai, sibona basine helalo. Iehova ese abi hidi e karamu neganai, haida edia namo danu e lalomu. Heḡereḡere, ia ese mauri ḡaudia iboudiai e kara, badina e uramu ita ese mauri baita moalelaia. Ta ese se doria Natuna baine siaia eda kara dika dainai baine mase. To ia na unu e kara toma badina e ura ita baine duruda. Iesu danu abi hidi e karava neganai, haida edia namo e lalova. (Roma 15:3) Heḡereḡere, ia ese ena laḡa-ani negana e ḡaukaralaia hutuma e hadibadia.​—Mar. 6:31-34.

²⁰ Ruma bese kwarana namona na mai dibana, ena ruma bese totona abi hidi maorodia baine kara na namo, bona una maduna na e laloa badamu. Ia na dia sibona ena ura o hemami dainai abi hidi be karamu. To be uramu Iehova ese baine hadibaia abi hidi maorodia baine kara. * (Her. 2:6,  7) Unu amo dia sibona ena namo be tahumu, to haida edia namo be tahumu.​—Fili. 2:4.

21. Atikol gabena ai dahaka baita herevalaimu?

²¹ Iehova ese ruma bese kwaradia na maduna badana ta e henidia, bona e uramu bae hekwarahi una maduna bae huaia namonamo. Bema tama na Iehova bona Iesu edia haheitalai be badinamu, ia na ruma bese kwarana namona ai be laomu. Bona bema hahine ese ena maduna be huaiamu, ruma bese na be moalemu. To hahine ese kwara dagina be ede baine laloa toma? Bona dahaka metau haida e davarimu? Atikol gabena ese unu henanadai be haerelaimu.