MWAHA WOOSOMIYA 5
“Nhooleli a nlopwana khanle Kristu”
“Nhooleli a nlopwana khanle Kristu.”—1 AKOR. 11:3.
NCIPO 12 O Nosso Grandioso Deus, Jeová
NINHALA WIITTHUCANI? *
1. Nlattuni alopwana akiina uhinaawaceraaya ratta asaaraya ni asaanaaya?
WOONELA winyu, ukhala nhooleli itthoko maanaaya isiyani? Ahaavo alopwana ahinaawacera ratta asaaraya ni asaanaaya nlattu wootthara ilema co nipuro ninkhalaaya ni mananna yuunuwihiyaaya. Moone itthu yuulumalyaaya arokorihu ankhala u Europa, aneehaniya Yanita. Ayo aneera: “Ncoko unkhalaaka, atthu enci anaakupali wiira alopwana phiri atthu ofayita waapwaha athiyana, ni ankupali wiira athiyana ayariye wiira yaavarele nteko alopwana paahi.” Munna nkhwaawe neehaniya Luke, nokhala u Estados Unidos, neera: “Ahaavo atthu anwiitthuciha asaanaaya wiira athiyana anlamuliya uwehiya paahi, ayo khanlamuliya uviriyaniya, awula, miruku cinvahaaya khacirina maana.” Masi Yehova khampheela wiira alopwana yaawacere athiyana ayo manannaayo. (Nwehe ciicammo Markus 7:13.) Vano, isiyani nlopwana inlamuliyaawe upanka wiira akhale nhooleli itthoko omaana?
2. Isiyani nhooleli itthoko inlamuliyaawe ucuwela, ni nlattuni?
2 Nlopwana nopheela ukhala nhooleli itthoko omaana, woopacera, haana acuwelaka isiyani Yehova inwehereraawe wiira uyo apanke. Uyo ciicammo haana acuwelaka nlattuni Yehova utthenkacilyaawe wiira akhale ahooleli, ni haana acuwelaka mananna ontakiha Yehova ni Yesu. Nlattuni ahooleli itthoko unlamuliyaaya ucuwela nnyo citthunnyo? Kontha Yehova hosaavahacera ukhulupale, ni uyo noweherera wiira ayo avarele nteko saana ukhulupale waavahacenryaawe.—Luka 12:48b.
UHOOLELA ISIYANI?
3. 1 Akorintu 11:3 inniitthuciha isiyani nhina uhoolela?
3 Nsome 1 Akorintu 11:3. * Ila iveeruswiila inaathoonyera mananna Yehova cithotokanihilyaawe itthokwaawe wiirimu ni watuninyani. Ukhala wiira uyova phinhooleli, uyo haana ukhulupale wotheene ni khanlikananiya. Hataa ukhalaka commo, uyo haavahacera ukhulupale akhwaawe, masi ayo ahaana waakhula uhoolo wawe nlattu wo mananna cinvarelaaya nteko ukhulupale waavahacenryaawe. (Aroo. 14:10; Efesu 3:14, 15) Yehova honvahacera Yesu ukhulupale wanlokoni. Masi Yesu haana aakhulaka uhoolo wa Yehova nlattu wo mananna cinwaceraawe nloko. (1 Akor. 15:27) Ciicammo, Yehova haavahacera alopwana ukhulupale watthokoni wiira yaahoolele asaaraaya ni asaanaaya. Masi alopwana ahaana yaakhulaka uhoolo wa Yehova ni Yesu nlattu wo mananna cinaawaceraaya atthu o watthokoni waya.—1 Pet. 3:7.
4. Yehova ni Yesu ahaana ukhulupale wiira apanke isiyani?
4 Ukhala wiira Yehova phiri Nhooleli watthokoni wawe wiirimu ni watuninyani, uyo haana isariya yookumihera malamulo ni waaruma asaanaawe wiira atthare ayo malamulwaayo. (Isai. 33:22) Ni ukhala wiira Yesu phiri nhooleli o wanlokoni neekristau, uyo ciicammo haana isariya yookumihera malamulo ni uruma wiira yeetteliye.—Akalas. 6:2; Akol. 1:18-20.
5. Ahooleli itthoko ahaana isariya yoopanka isiyani, ni nlattuni uneereehu wiira ukhulupale urinaaya uhaana mpika?
5 Toko Yehova ni Yesu, nhooleli itthoko haana isariya yooruma citthu cinlamuliya weetteliya wapuwani. (Aroo. 7:2; Efesu 6:4) Masi ukhulupale urinaawe nhooleli itthoko uhaana mpika. Wootakihera, citthu nhooleli itthoko cinrumaawe wiira ceetteliye wapuwani, cihaana civaranacaka niitthu inhimyaaya Ibiiblya. (Miru. 3:5, 6) Ni ahooleli itthoko kharina isariya yooruma citthu cinlamuliya weetteliya watthokoni ihikhanle yawaya. (Aroo. 14:4) Ciicammo, asaana yoonuwaka ni yathamaka wapuwani, ayo nanlelo ahaana yaahisimaka athumwanaya, masi anaahiya uhooleliya naayo.—Mat. 19:5.
NLATTUNI YEHOVA UTTHENKACILYAAWE WIIRA AKHALE AHOOLELI?
6. Nlattuni Yehova utthenkacilyaawe wiira akhale ahooleli?
6 Yehova tthenkacile wiira akhale ahooleli kontha uyo naanifenta. Nlattu wookhala ahooleli watthokoni ya Yehova, citthu cotheene cinaweetta ninnema ni cinaakhala coothotokanihiya. (1 Akor. 14:33, 40) Waari wiira khayaarivo ahooleli, itthoko ya Yehova khayaahala ukhala yoothotokanihiya ni khaavo aahala utteeliya nrima. Wootakihera, yapheeliyaka ulakeliya itthu, khaahala ucuwannya tipani aahala ulamuliya ulakela ni weettela iyo itthwiiyo.
7. Toko cinthoonyeraaya Efesu 5:25, 28, Yehova nopheela wiira alopwana yaawacereke cani asaaraya?
7 Wakhala wiira ikhanle itthu yofayita ukhala nhooleli watthokoni, vano nlattuni athiyana enci uniicoonaaya usuphiya ni uhuvihiya naasiwannyaya? Iyo inkhumelelaka kontha alopwana enci khantthara malamulo avahilyaawe Yehova wiire yeetteliye watthokoni, masi antthara ilema co nipuro ninkhalaaya. Ayo alopwanaayo khanaawacera ratta asaaraya kontha anhoolelihera citthu cowaatteeliha nrima ayova paahi. Wootakihera, nlopwana atthunaka naaweheeha khula itthu invaraaya amwaarawe wiira iicoone ratta awula athoonyere wiira uyova phinlopwana. Uyo atthunaka pooti wuupuwela co: “Mi akinhala ukhitiri waakhanyereriha amwaaraka wiira aciveliye ni mi, masi mi pooti uwiiriha ayo wiira akoove.” Vano uyo pooti wancera uwoopopiha amwaarawe wiira apanke itthu uyova impheelaawe. * Upanka ni wuupuwela commo, unaawiiriha athiyana uhiwaceriya niihisima toko cinaaphwanelaaya, ni ikhanle itthu Yehova ihimpheelaawe.—Nsome Efesu 5:25, 28. *
ISIYANI INHALA UNKAVIHERA NLOPWANA UKHALA NHOOLELI OMAANA WATTHOKONI?
8. Isiyani inhala unkavihera nlopwana wiitthuca ukhala nhooleli omaana watthokoni?
8 Itthu inhala unkavihera nlopwana wiitthuca ukhala nhooleli omaana, ukhanle utakiha mananna Yehova ni Yesu cinvarelaaya nteko ukhulupalyaaya. Woopacera, nimpheela woona makhalelo Yehova ni Yesu anthoonyeraaya ukati unhoolelaaya. Vano, ninaahala woona mananna ahooleli itthoko cinlamuliyaaya utakiha ayo makhalelwaayo ukati wo waawacera amwaaraya ni asaanaaya.
9. Yehova nothoonyera cani wiiyeviha?
9 Wiiyeviha. Yehova phiri ootepa ucuwelaca ntuninyani motheene ni wiirimu. Hataa ukhalaka commo, uyo nawaaviriyana atthu anonswalela yanvahaka miruku. (Upha. 18:23, 24, 32) Ni ciicammo Yehova naatthuna miruku cinonvahaaya. (1 Mam. 22:19-22) Yehova khanakhala oopahuwa, masi nna co uyo khanweherera wiira nikhale oohipahuwa. Uhiya commo, uyo nawaakavihera atthu anonswalela wiira ayo answalele saana. (Isaa. 113:6, 7) Phimaana Ibiiblya ineeraaya wiira Yehova khanle “nikavihero” nihu. (Isaa. 27:9; Mabere. 13:6) Mwene Davidi ancuwela wiira uyo aakhitinri uvara nteko muulupale waavahaceriyaawe nlattu wo wiiyeviha urinaawe Yehova.—2 Sam. 22:36.
10. Yesu aathoonyenre cani wiiyeviha?
10 Moone ntakihero na Yesu. Uyo aari Mwiitthucihi ni Pwiiya aattharyaawe. Waahookhalaru commo, uyo ahorapiha inyaa caya. Nlattuni Yehova uhiilyaawe wiira iyo itthwiiyo yantikhiye mbiibliyani? Woohaanyihacera, uyo hiile iyo wiira yantikhiye kontha nopheela wiira ahooleli itthoko ni atthu akhwaawe atakihe itthu yaapankilyaawe Yesu. Yesu mwaneene, ahooluma eeraka: “Kontha kihoovahani ntakihero, wiira khampa miiva cuupankilyaakani, nyuuva ciicammo mpanke.” (Joau 13:12-17) Hataa Yesu akhalanaka ukhulupale, uyo khaaweherera wiira apankeliye citthu; uyova aanaapankela citthu akhunanawe.—Mat. 20:28.
Nhooleli itthoko naathoonyera wiiyeviha ni nifento, akaviheraka miteko co wapuwani ni aakaviheraka amucyaawe ukhalana upatthani womaana ni Yehova (Nwehe iparaagarafu 11, 13)
11. Ahooleli itthoko anlamuliya utakiha cani wiiyeviha wa Yehova ni wa Yesu?
11 Citthu cineetthuceehu. Ahaavo mananna menci nhooleli itthoko cinlamuliyaawe uthoonyera wiiyeviha. Wootakihera, uyo khanhala uweherera wiira amwaarawe ni asaanaawe ahivonye. Ni wakhalaka wiira amwaarawe ni asaanaawe khanaamini miruku cawe, uyo nawaaviriyana. Marley, nokhala u Estados Unidos, neera: “Ikwaha cinci, miruku cinkhalaneehu mi naawannyaka cinaavirikana. Masi kinaakhitiri woona wiira ayo anaahisima ni khanvyaavyeehaca itthu inhimyaaka. Ni khula ukati umpheelaaya ulakela itthu, ayo anawuupuwela citthu cinaahimeryaaka.” Ahooleli itthoko owiiyeviha ciicammo anaakavihera miteko co wapuwani, hataa atthu o ncoko unkhalaaya yiiraka wiira nnyo khacinakhala miteko ca nlopwana. Wiiyeviha ukati nkiina pooti urika. Nlattuni? Arokorihu amoca aneehaniya Rachel aneera: “Nipuro ninkhumaaka, nlopwana aakaviheraka amwaarawe urapiha mattiisi awula ukweca wapuwani, aattamanannyaawe ni amucyaawe pooti wuupuwela wiira uyo khweeliini khanakhala nlopwana. Ayo anoopuwela co: ‘Ula nlopwanoola khankhitiri waaruma amwaarawe.’” Wakhala wiira atthu o ncoko nyuuva unkhaleenyu phinoopuwelaaya commo, nhiliyale wiira Yesu ahorapiha inyaa caattharyaawe, waahookhalaru nteko waavariya niipottha. Nhooleli itthoko omaana khanwacera wakhala wiira atthu akhwaawe anaahala uncocolaca awula mena; masi uyo nopheela waakavihera amwaarawe ni asaanaawe. Masi ihaavo ikhalelo ikhwaawe nlopwana inlamuliyaawe uthoonyera wiira akhale nhooleli itthoko omaana. Ikhaleloni?
12. Yehova ni Yesu anthoonyera cani wiira anaanifenta?
12 Nifento. Citthu cotheene cimpankaawe Yehova, cinkurumiciya ni nifento. (1 Jo. 4:7, 8) Uyo naathoonyera wiira naanifenta ni nopheela wiira nimpatthanane, anivahaka Nuulumo nawe ni mphwinkwaawe woothotokanihiya. Uyo ciicammo naanikavihera wiicoona ukhala ookhikiceriya nlattu woonikhuluveliha wiira naanifenta. Vano citthu co mwiirutthuni cinnithwaa? Ibiiblya ineera wiira Yehova ‘naanithaciriha anivahaka citthu cotheene cinnitteeliha nrima.’ (1 Tim. 6:17) Navonyaka, Yehova naanilaka, masi khanhiya unifenta. Nifento nawe nuulupale phimwiirihile unveleeliha Mwanawe wiira anoopole. Ni Yesu ciicammo hothoonyera wiira naanifenta, wavahilyaawe ukumyaawe wiira anoopole. (Joau 3:16; 15:13) Khiivo hataa itthu inhala unhiiha Yehova ni Yesu waafenta ale anaavaresesa.—Joau 13:1; Aroo. 8:35, 38, 39.
13. Nlattuni nhooleli itthoko nolamuliyaawe uthoonyera wiira nawaafenta amwaarawe ni asaanaawe? (Nwehe ciicammo ikwaaturu “ Isiyani inlamuliyaawe upanka nlopwana thenle phiyaaru wiira amwaarawe anhisime?”)
13 Citthu cineetthuceehu. Citthu cotheene cimpankaawe nhooleli itthoko, cihaana cikurumiciyaka ni nifento. Nlattuni unreeraaya upanka commo? Apostolu Joau hantikha co: “Kontha ule [hinaafenta amucyaawe nowoonaawe,] khanlamuliya unfenta Nluku, ule himmoonaawe.” (1 Jo. 4:11, 20) Nhooleli itthoko naafenta amwaarawe ni asaanaawe, ni nontakiha Yehova ni Yesu, nawaakavihera amucyaawe ukhalana upatthani womaana ni Yehova, nawaakavihera wiira yiicoone ukhikiceriya ni naawaaverya citthu cinaathwaa, toko iyoolya ni citthu cikhwaawe. (1 Tim. 5:8) Uyo nawaalaka ni nawaahimerya asaanaawe. Uyo ciicammo naalakela citthu cinonttitthimiha Yehova ni cinaakavihera amucyaawe. Vano, nttwee noone mananna ahooleli itthoko cinlamuliyaaya untakiha Yehova ni Yesu ukati woopanka nnya citthunnya.
ISIYANI NHOOLELI ITTHOKO NOLAMULIYAAWE UPANKA?
14. Isiyani nhooleli itthoko inlamuliyaawe upanka wiira aakavihere amucyaawe ukhalana upatthani womaana ni Yehova?
14 Waakavihera amucyaawe ukhalana upatthani womaana ni Yehova. Yesu ahaatakiha athumwaane ni ahaakavihera attharyaawe ulipihaca upatthannyaaya ni Yehova. (Mat. 5:3, 6; Mark. 6:34) Inanna imocaaru, ahooleli itthoko anaacuwela wiira nrintti muulupele urinaaya, ukhanle waakavihera amucyaaya ukhalana upatthani woolipa ni Yehova. (Deut. 6:6-9) Nhooleli itthoko nopanka iyo ukati neekurumicaawe usoma Ibiiblya wamoca naamucyaawe otheene, urwaa umikutthaanoni, ulalyeera ihapari comaana, umpatthanana Yehova ni wiikurumica wiira uyo upatthaannyuuyo uhimale ni uhivololace.
15. Manannani nhooleli itthoko cinlamuliyaawe uthoonyera wiira nawaafenta amwaarawe ni asaanaawe?
15 Waathoonyera wiira nawaafenta. Yehova ahothoonyera waatthuni inanna canfentaawe Mwanawe, Yesu. (Mat. 3:17) Ciicammo Yesu aanaapankaawe ni aanawuuluma citthu caathoonyera aanawaafenta cinene attharyaawe. Nlattu wo iyo, attharyaawe ciicammo yahomwiirela wiira yaananfenta. (Joau 15:9, 12, 13; 21:16) Nhooleli itthoko pooti uthoonyera wiira nawaafenta amwaarawe ni asaanaawe nlattu wo citthu cimpankaawe ni cinoolumaawe, toko waasomana Ibiiblya nkhayi. Uyo ciicammo nothoonyera wiira nawaafenta cinene ni naawoona ukhalana ifayita amwaarawe ni asaanaawe aattottopelaka hataa ukhalaka waatthuni, oonaka wiira uyo uwakatyuuyo unaareerana.—Miru. 31:28, 29.
Wiira ancivelihe Yehova, nhooleli itthoko haana awaaveryaka citthu cinaathwaa amwaarawe ni asaanaawe (Nwehe iparaagarafu 16)
16. Isiyani-tho nhooleli itthoko inlamuliyaawe upanka, ni nolamuliya uwehera cani nteko?
16 Uwaaverya amucyaawe citthu cinaathwaa. Yehova khaahiile waavaha asarayeli citthu caathwaa, hataa ukhalaka wiira ayo khayaamwiiwelela ni waanaaphwanela uttarusiya. (Deut. 2:7; 29:5) Ni mahukwaala, uyo ciicammo naanikavihera ukhalana citthu cinnithwaa. (Mat. 6:31-33; 7:11) Inanna imocaaru, Yesu ahaavaha iyoolya attharyaawe. (Mat. 14:17-20) Uyo ciicammo ahowacera ukumyaaya. (Mat. 4:24) Nhooleli itthoko nopheela unciveliha Yehova, haana awaaveryaka citthu cinaathwaa amwaarawe ni asaanaawe. Masi ratta! Uyo haana acuwelaka uwehera ratta nteko. Nhooleli itthoko khanlamuliya uhoolelihera cinene ntekwaawe mpaka wahinkhitiryaawe uviriha ukati naamucyaawe ni waakavihera ukhalana upatthani woolipa ni Nluku.
17. Manannani Yehova ni Yesu cinnilakaaya ni cinnittarusaaya?
17 Waalaka. Yehova nonilaka ni nonittarusa kontha nopheela unikavihera. (Mabere. 12:7-9) Aatakihaka Athumwaane, Yesu nawaalaka ninifento ale anaahoolelaawe. (Joau 15:14, 15) Uyo nawaavaha ikano woohaakhuwakhuwa, masi athoonyeraka unamaana. (Mat. 20:24-28) Uyo naacuwela wiira nikhanle atthu oopahuwa ni ikwaha cinci ninaavonyaka.—Mat. 26:41.
18. Isiyani nhooleli itthoko omaana incuwelaawe?
18 Nhooleli itthoko nontakiha Yehova ni Yesu naacuwela wiira amwaarawe ni asaanaawe akhanle atthu oopahuwa. Phimaana, uyo ‘khantepa waaviruwela’ amwaarawe ni asaanaawe. (Akol. 3:19) Uhiya commo, uyo naatthara ikano iri nhina Akalasiya 6:1 ni naamananiha waalaka ni “mananna oomaalya,” hiliyalaka wiira uyova ciicammo khanle ntthu oopahuwa. Toko Yesu, uyo naacuwela wiira inanna yooreera wiitthuciha, ukhanle uvaha ntakihero.—1 Pet. 2:21.
19-20. Manannani nhooleli itthoko cinlamuliyaawe untakiha Yehova ni Yesu ukati woolakela upanka itthu?
19 Ulakela itthu yoohala waakavihera amucyaawe. Yehova naalakela upanka itthu, oopuwelaka waakavihera atthu. Wootakihera, uyo holakela wumpa ukumi, kahi wiira aphwanyere ifayita mwaneene, masi wiira hiiva unitteele nrima nlattu wookhalana ukumi. Ni khaavo nkhanyererihile Yehova unveleeliha Mwanawe wiira oonoopole mmatampini wihu. Uyo nveleelihile kontha hoopheela, wiira anikavihere hiiva. Yesu ciicammo aholakela upanka itthu, oopuwelaka waakavihera akhunanawe. (Aroo. 15:3) Wootakihera, uyo aholakela uhimumula wiira awiitthucihe atthu enci.—Mark. 6:31-34.
20 Nhooleli itthoko omaana naacuwela wiira nrintti mmoca wootepa urika urinaawe, ukhanle ulakela itthu inhala waaphwanyiha ifayita amucyaawe, ni uyo naalemeliha uyo nrinttyuuyo. Uyo nawiikurumica wiira hilakele itthu woohuupuwelaca ratta. Uhiya commo, uyo naatthuna wiitthucihiya ni Yehova ulakela upanka itthu yomaana. * (Miru. 2:6, 7) Ala manannaala, uhiya uhoolelihera itthu inhala umphwanyiha ifayita uyova, uyo nohoolelihera wuupuwela itthu inhala waaphwanyiha ifayita amucyaawe.—Afili. 2:4.
21. Isiyani inhaleehu woona nhina mwaha nkiina unhaleehu usoma?
21 Yehova haavahacera ahooleli itthoko nteko woorika, ni noweherera wiira ayo yiikurumice uvara ratta uyo ntekooyo. Masi nlopwana neekurumica untakiha Yehova ni Yesu naahala ukhala nhooleli itthoko omaana. Ni athiyana ciicammo yeekurumicaka, ooyeeli anaahala ukhala ootteeliya muuthelanacani waya. Masi athiyana anlamuliya uwehera cani nrintti urinaaya awannyaya, wookhala nhooleli itthoko? Marikarikoni athiyana ankhalanakaaya? Mwaha nkiina unhaleehu usoma, unaahala wuuluma iyo.
NCIPO 16 Jeová Escolheu o Nosso Rei
^ par. 5 Nlopwana athelaka, uyo nokhala nhooleli itthoko. Nhina nnya myaha coottharanacannya, mwaha woopacera unaahala unithoonyera uhoolela isiyani, nlattuni Yehova utthenkacilyaawe wiira akhale ahooleli ni isiyani ahooleli itthoko ineetthuceraaya ntakihero na Yehova ni na Yesu. Mwaha woosomiya wonayeeli, unaahala wuuluma isiyani nlopwana ni nthiyana watthokoni ineetthuceraaya ntakihero na Yesu ni matakihero o mbiiblyani aatthu akhwaawe. Mwaha woneeraru, unaahala wuuluma manannani mayamunna cinlamuliyaaya uvarela nteko ukhulupale uvahaceriyaaya wanlokoni.
^ par. 3 1 Akorintu 11:3 Vano, kimpheela ncuwele wiira nhooleli a nlopwana khanle Kristu; nhooleli a nthiyana khanle nlopwana; ni nhooleli a Kristu khanle Nluku.
^ par. 7 Moopuwelelo owiiriya wiira nlopwana pooti waahuviha amwaarawe, ni mpaka uwaatta, anaakumiheriyaka mmafiilimeni, mmateaturuni ni mmalivuruni. Phimaana, atthu enci anoopuwela wiira khinakhala itthu yoonanara nlopwana waahuviha amwaarawe.
^ par. 7 Efesu 5:25 Ntheli, uhihiye waafenta amwaarwaa, toko ciicammo Kristu cifentilyaawe nloko ni ciivaherenryaawe. 28 Inanna imocaaru, nlopwana oothela haana aafentaka amwaarawe khampa cinfentaawe irutthwaawe. Nlopwana naafenta amwaarawe, neefentaa mwaaneennyaawe.
^ par. 20 Mwapheela ucuweleeha mananna oolakela upanka citthu comaana, nwehe mwaha uneera “Tome decisões que honram a Deus”, nrevistani Ukhalenla 15 yo Abril 2011, ipaagina 13 mpaka 17 (yeekunya).
