1. Aorekhoeb ǁîb taras tsî ǀgôana ra hâ-ū ǀgausa tae-i xa a tsâǀkhāhe ǁkhā?

MATI du ra ǂâi? “Danab” ase ǃereamsa tanisa taen hoana ǃkhōǂgā hâ? ǀNî aorekhoegu ge ǁîb ǀhaohâsib ǃnâ i gere dīhe. Tamas ka io ǁîb ge kaikaihe ǀgaub ǃnâ, ǁîb taras tsî ǀgôana ra hâ-ū. Yanita di ǀon hâ ǃgâsas hîna Europi ǃnâ ra hâs ge mî xū-e kō re. ǁÎs ge ra mî: “Tita ra hâ ban ge ǃnāsa khoena tarekhoede ǃgôaǁnā hâ. Tsî ǁîde ǃgādi ase ra mû.” Luke di ǀon hâ ǃgâsab hîna Amerikab ǃnâ ra hâb ge ra mî. “ǀNî dadasagu ge ǁîgu ǀgôaga ra mîba. Tarekhoedi mûhes ǀguisa nî hîsa, tsî ǃgâhe tidesa. ǁÎdi ra mî xū-i ǂhâǂhâsa tama hâ amaga.” Xaweb ge Jehovaba taradi ti nî hâ-ūhesa ǂgao tama hâ. (Markub 7:13 ǀkha ǀgopeǀnō re.) O, aorekhoeba mati nî ǂan, oms danab aseb tani hâ ǃereamsab nî sîsenū ǀgausa?

2. Omaris danaba tae-e nî ǂan tsî tae-i ǃaroma?

² ǃGâi oms dana kai ǂgaob ga ra o, ob ge aorekhoeba aibe nî ǂan. Tae-eb ǁîba nî dīsab Jehovaba ra ǂhâbasa. Tsîb ge nî ǁnâuǃā tae-i ǃaromab ge Jehovaba danaga a ǂnûiǂgāsa. Tsî matib Jehovab tsî Jesub di aiǁgausa xu a ǁkhāǁkhāsen ǁkhāsa. Tae-i ǃaromab aorekhoeba nē xūn hoana nî ǂan? Jehovab oms danaga ǃereamsa mā hâ amaga. ǁÎb ge nē sîsen-i ǃamkuse nî dīhesa ra ǂhâba.—Luk. 12:48.

3. Tae-e da 1 Korinteǁîn 11:3 sa xu danasis xa ra ǁkhāǁkhāsen?

³ Khomai re 1 Korinteǁîn 11:3 sa. Jehovab ǁîb omaris hîna ǀhommi tsî ǃhūbaib ai hâsa. ǀGoraǂgā hâ ǀgausas ge nē xoasa ra ǃgāsa kai. Danasis ge ǀgam xūna ǃkhōǂgā hâ.  ǀNî xūna dīs di ǀgaib tsî ǃereamsa tanis. Jehovab ge a hoada “di dana.” Tsîn ge ǁîb ôan hoana māhen hâ ǀgaiban ra sîsenū ǀgaub ǃgao. ǁÎb tawa nî ǃeream. (Rom. 14:10; Efe. 3:14, 15) Jehovab ge Jesuba mā-am hâ îb ǀnî xūna ǀhaohâb ǃnâ dī. Xaweb ge Jesuba sidab ra hâ-ū ǀgaub ǃgao Jehovab tawa nî ǃeream. (1Kor. 15:27) Jehovab ge oms aob tsîna ǀgaiba mā hâ. Îb ǁîb taras tsî ǀgôan tsîna xūna dī kai. Xaweb ge ǁnā aoba Jehovab tsî Jesub tawa nî ǃeream. ǁÎb omarisab ra hâ-ū ǀgaus ǃgao.—1Pet. 3:7.

4. Jehovab tsî Jesub tsîna tae-e a dī ǁkhā?

⁴ Jehovab a ǀhommi tsî ǃhūbaib ai hâ omaris di Dana. Amagab ge ǁîba ǁgaraga a mā ǁkhā. Tsî a kōǃgâ ǁkhā în ǁîb ôana ǁnā ǁgaraga ǁnâuǀnam. (Jes. 33:22) Jesub a Xristeǁî ǀhaohâb di dana. Amagab ge ǁîb tsîna ǁgaraga a mā ǁkhā. Tsî a kōǃgâ ǁkhā îgu ǁnā ǁgaraga ǁnâuǀnamhe.—Gal. 6:2; Kol. 1:18-20.

5. Omaris danaba mâ ǀgaiba ūhâ tsî mati i Jehovab tsî Jesub dib ǀkha ǀgui tama?

⁵ Jehovab tsî Jesub khamib ge omaris danab tsîna ǁgaraga ǁîb omarisa a mā ǁkhā. (Rom. 7:2; Efe. 6:4) Xawe ǁîb māhe hâ ǀgaib ge Jehovab tsî Jesub ǀkha ǀgui tama hâ. Aiǁgause ǁîb ǁgaragab ge Elobmîs ai nî ǃgaoǃgao. (ǂKhm. 3:5, 6) Tsî omaris danab ge ǁîb omaris ǃnâ hâ tama khoena ǁgaraga a mā ǁoa. (Rom. 14:4) Tsî ǁîb ôan ga kai tsî a doeǂoa on ge ǁîba noxoba ra ǃgôa. Xaweb ge ǁîba ǁîn di dana tama hâ.—Mat. 19:5.

6. Jehovaba tae-i ǃaroma danasisa ge ǂnûiǂgā?

⁶ Jehovab ge ǁîb omarisab a ǀnam amaga danasisa ge ǂnûiǂgā. ǁÎba xu hâ ǀkhaeb ge. Danagu hâ amaga i ge ǂkhîba Jehovab omaris ǃnâ a hâ ǁkhā. Tsîn ge xūna ǃamkuse a dīhe ǁkhā. (1Kor. 14:33, 40) ǃGāsa tama i ga hâ o ham i ǃereamsa tani hâsa. O i ge Jehovab omarisa ga ǀhomaxa tsî ǂkhîoǃnâ hâ. Aiǁgause i ge khoe-e ǂan tide hami ǀuniga mîǁguiba nî dīsa. Tamas ka io ham i ǁnā mîǁguiga nî sîsenǂui kaisa.

7. Efeseǁîn 5:25, 28 ǃnâb Jehovaba mati ra mî aogu tarede nî hâ-ū ǀgaub xa?

⁷ Elob ǂnûiǂgās danagu dis ga ǃgâi xūna a hau o. Tae-i ǃaroma di ǀnî tarekhoede ǁîdi aogu xa di ǁgaise ra hâ-ūhe tsî ra gaoǂamhe khami ra tsâ? ǂGui aogu Jehovab omaris ǃgao mā hâ daoǁgaude sîsenū tama i. Tsî ǀhaohâsib tamas ka io ǁîgu ge kai ǀgaub ǃnâ omarisa ra hâ-ū amaga. Tamas ka io gu ge ǁîgu ǃgâise ra tsâ ǂgao amaga ǁîgu tarade ra ǁore. Aiǁgauseb ge aoba ǀnîsi tarasa ra gaoǂam. ǂHâǂhâsaseb ra mûsen ǂgao amaga. Tamas ka io “ama aorekhoeb” asab ra ǁgau ǂgao amaga. ǁÎb ge ǁîb tarasa a ǀnam kai ǁoa. Xaweb ge ǁîsa a ǃao kai ǁkhā, tib ge ǀnîsi ra ǂâi. Tsîb ge ǃaos ra amaga ǂgaob ra xū-i hoa-e a dī kai si ǁkhā. * Neti ī ǂâiǀgaub ge tarekhoesa ra khôaǁnā. Tsî ǁîsa xū-e ǃoaǂui tama khami a tsâ kai ǁkhā. Xawe Jehovab ge ǁnati ǂâi tama hâ.—Khomai re Efeseǁîn 5:25, 28.

8. Matib aoba a ǃgâi omaris di dana kai ǁkhā?

⁸ Aob ge a ǃgâi dana kai ǁkhā, Jehovab tsî Jesub tsînab ga ǁgae o. Jehovab tsî Jesub tsîn di ǀgauga gu ga oms di danaga ǂâis  ǃnâ ūhâ o. O gu ge ǁîgu di ǀgôan tsî taradi ǀkha ǃgâi ǀgaub ǃnâ nî hâ.

9. Jehovaba mati ǃgamǃgamsenxasibab ūhâsa ra ǁgau?

⁹ ǃGamǃgamsenxasib. Jehovab ge hoada xa a gā-ai. Xaweb ge ǁÎb di ǃoaba-aon di ǂâiǀgaub tsîna ra ǃgâ. (Gen. 18:23, 24, 32) Tsîb ge ǁnān hîna ǁîb ǃnāka hân tsîna ra mā-am în ǁîn di ǂâiǀgauba ǁîb ǀkha ǀgoragu. (1Gao. 22:19-22) Jehovab ge ǀoasa kurusa ūhâ. Xawe ǀoasa kurusa da nî ūhâsa nēsi ǂgaoǀkha tama. Tsîb ge ǀoasa kurusa ūhâ tama khoen tsîna ra hui. În ǃgâi ǀgaub ǃnâ ǁîba ǃoaba. (Psa. 113:6, 7) “Hui-ao” tib ge Jehovaba Elobmîs ǃnâ ra ǂgaihe. (Psa. 27:9; Heb. 13:6) Gao-aob Davib ge ge mî sîsen-i hînab ge māhe-eb ge Jehovab ǃgamǃgamsenxasib tsî huib ǀkha ǀgui dīhō ǁkhā ī ǃkhaisa.—2Sam. 22:36.

10. Matib ge Jesuba ǃgamǃgamsenxasiba ǁgau?

¹⁰ Jesub di aiǁgausa kō re. ǁÎb ǁkhāǁkhāsabegu di ǃKhūb ge i, xaweb ge ǁîgu di ǂaide ge ǁā. Tae-i ǃaromab ge Jehovaba nē xūna Elobmîs ǃnâ xoamâi kai? Nēs omaris danagu tsî naun tsîna aiǁgause ra ība amaga. Jesub ge ge mî: “Aiǁgau-e ta go mā go, sago on nî dīga, tita goro dība go khami.” (Jhn. 13:12-17) Jesub ge kai ǃereamsa tani hâ i. Xaweb ge ge ǂgaoǀkha tama hâ i îb ǃoabahe. Xaweb ge ǁîba nau khoena gere ǃoaba.—Mat. 20:28.

11. Oms danaba tae-e ǃgamǃgamsenxasib xa Jehovab tsî Jesub di aiǁgausa xu a ǁkhāǁkhāsen ǁkhā?

¹¹ ǁKhāǁkhāsen da ra xūn. Oms di danab ge ǂgui ǀgaugu ǃnâ ǃgamǃgamsenxasiba a ǁgau ǁkhā. Aiǁgauseb ge ǃâubasen tama hâ ǁîb ǀgôan tsî kaikhoes tsîn ǀoasa kurusa nî ūhâsa. ǁÎb ge omaris di ǁanin di ǂâiǀgaugu tsîna ra ǃgâ. ǁÎb di ǂâiǀgaub ǀkha i ga ǀgui tama is tsîna. Marleys hîna Amerikab ǃnâ ra hâs ge nēti ra mî. “Tita tsî ti kaikhoeb tsîn ge ǀnî ǁaegu ai ǃkharagagu ǂâiǀgauga ūhâ. ǂAn ta ge a ǁîb ti ǂâiǀgauba ra ǃgôaǃgâsa. ǁÎb ra mati ta ra ǂâisa dîde tsî ǁnapaxu mîǁguiga dī amaga.” ǃGamǃgamsenxa aob ge omsa ra ǃanu hui. Tarekhoes sîsen-i ase i ga mûhe xawes tsîna. ǁNās ge kaise a ǃgom ǁkhā. Tae-i ǃaroma?  Rachel di ǀon hâ ǃgâsas ge ra mî. “Tita ge kai ǀkhāb aib ga aoba xapana ǁā tamas ka io omsa ǃanu o. On ge ǁanǁare-aona ra dî ‘ama aorekhoeb’ asa. ǁÎn ge nî ǂâi ǁîb taras xa ra dāhe di.” Sadu ra hâba i ga ǁnati ǂâihe o. O da ge nî ǂâihō Jesub tsîn ge ǁîb ǁkhāǁkhā-aogu ǂaide a ǁāsa. ǃGān di sîsen-i ge i xawe. ǃGâi oms danab ge nau khoen ais ai ǀgaisa tsî ǂhâǂhâsase mûsen ǂgao tama hâ. ǁÎb taras tsî ǀgôan nî ǂkhîsab ge ǂhâba hâ. ǃGamǃgamsenxasib tsî mâ ǀgaubab ǃgâi oms danaba ǂhâ hâ?

12. Jehovab tsî Jesub tsîna ǀnam da kha a amaga taena ra dī?

¹² ǀNammi. Jehovab ge dīb ra xū-i hoa-e ǀnammab ra ǁgau ǂgao amaga ra dī. (1Jhn. 4:7, 8) ǀNamxaǃnâ ǀgaub ǃnâb ge sida gagasi ǂhâsiga ra kōǃgâ. ǁÎb mîs tsî ǀapeǂhomis ǃnâ-ū. Tsâba dab ra ǃkhaisab ge ra ǁgau ǀnamdab a dib ra mîba da o. O sida di ǂûs tsî āsab mati ra kōǃgâ? Jehovab ge “ǃkhū hâse hoana ǂûs ǃoa ra mā” da. (1Tim. 6:17) ǁÎb ge ra huida dīsā da ga o. Tsîb ge noxoba a ǀnam da. ǀNamdab a amagab ge Jehovaba xoremariba ge māda. Tsîb ge Jesuba kaiseb a ǀnamda amaga ǁîb ûiba ge mā da. (Jhn. 3:16; 15:13) Jehovab tsî Jesub ǂgomǂgomsa khoena ūba hâ ǀnammi ge ǀgui xū-i xas tsîna ǁkhaehe tide.—Jhn. 13:1; Rom. 8:35, 38, 39.

13. Oms danaba tae-i ǃaroma ǁîb omarisa ǀnamma nî ǁgau? (“ Nēsi go ǃgamme khoeba mati ǁîb taras xab nî ǃgôahese nî tanisen?” di hâ boksisa khomai re.)

¹³ ǁKhāǁkhāsen da ra xūn. Dīb ra xū-i hoa-eb ge oms danaba ǀnammi ǀkha nî dī. Nēsa tae-i ǃaroma a ǂhâǂhâsa? Apostel Johaneb ge ra mî: “ǁÎ-i ǃgâsab [tamas ka io omaris], mû i raba i ga ǀnam tama io, mati i kha ǁnâi Elob, mû tama i hâba nî ǀnam?” (1Jhn. 4:11, 20) ǁKhā ǀgaub ǃnâb ge oms danab hîna ǁîb omarisa a ǀnamma Jehovab tsî Jesub di aiǁgausa nî sao. ǁÎb omaris ǁaninab ge nî hui în  Jehovab ǀgūse hâ. Tsîb ge ǁîna nî ǁgau ǀnamnib a ǃkhaisa. Tsîb ge ǁîn di ǂûs tsî ās tsîna nî kōǃgâ. (1Tim. 5:8) ǁÎb ǀgôanab ge ǁkhāǁkhā tsî nî hui-unu. Tsîb ge Jehovaba ra ǂkhîǂkhî tsî ǁîb omarisa nî omkhâi mîǁguiga nî dī. Hā da nē xūna ǀguiǀguibese ǃhoaǃgao. Tsî kō re oms danab Jehovab tsî Jesub di aiǁgausa mati a sao ǁkhāsa.

14. Omaris danaba mati ǁîb omarisa Jehovab ǀgūse ra ūhâ?

¹⁴ ǁÎb omarisab ge Jehovab ǀgūse nî ūhâ. ǁÎb ǁGûb khamib ge Jesuba ǁîb ǁkhāǁkhāsabena gere hui. În ǁîn ǂgomsa ǀgaisase ūhâ. (Mat. 5:3, 6; Mrk. 6:34) ǁKhā ǀgaub ǃnâb ge omaris danab tsîna ǁîb omarisa Jehovab ǀgūse ūhâsa ǂgurose nî mâi. (Deu. 6:6-9) ǁNā-amagab ge ǁîb omaris ǀkha Elobmîsa khomai tsî ǀhaode ǃoa ra ī. Tsîn ge aoǁnâ tsî Jehovab ǀkha ra ǀhōsagu. Tsî ǃgarise ra sîsen în ǁnā ǀhōsagusa ǃkhōǀgara.

15. Omaris danaba mati ǁîb omarisa a ǁgau ǁkhā, ǁînab a ǀnamsa?

¹⁵ ǁÎb omarisab ge ǀnamnib asa nî ǁgau. Jehovab ge nau khoen ais ai Jesuba ge mîba ǀnambib asa. (Mat. 3:17) Jesub ge dī tsîb gere mî xūn ǃnâ-ū ǂgui ǃnâde gere ǁgau ǁîb ǁkhāǁkhāsabenab a ǀnamsa. ǁÎn tsîn ge Jesuba gere mîba ǁîban a ǀnamsa. (Jhn. 15:9, 12, 13; 21:16) Omaris di danab ge ǁîb taras tsî ǀgôanab a ǀnamsa a ǁgau ǁkhā dīb ra xūn ǃnâ-ū. Aiǁgause ǁîn ǀkhab ga Elobmîsa a ǁkhāǁkhāsen o. ǁÎnab a ǀnam tsîb ǁîna kaise ra ǃgôaǃgâ dis tsînab ge ǁîna nî mîba.—ǂKhm. 31:28, 29.

16. Tae-eb noxoba oms danaba nî dī tsî matib nēsa ǀnōsa ǀgaub ǃnâ nî dī?

¹⁶ ǁÎb omaris di ǂûs tsî ās tsînab ge nî kōǃgâ. Jehovab ge Israelǁaesa ǂhân hâ xūna gere mā. Dīn ge ǁōreb ǃgaon gere ǁkharahe ǁaeb ais tsîna. (Deu. 2:7; 29:5) Nētsēs tsînab ge ǂhâ da hâ xūna ra mā da. (Mat. 6:31-33; 7:11) Jesub tsîn ge ǁîb ǁkhāǁkhāsabena gere ǂûmā. (Mat. 14:17-20) ǁÎb ge ǂguin hîna ge ǀaesen hâ în tsîna gere ǂgauǂgau. (Mat. 4:24) Jehovaba ǂkhîǂkhîs ǃaromab ge omaris di danaba omaris di ǂhâsiba nî kôǃgâ. Xaweb ge nēsa ǀnōsa ǀgaub ǃnâ nî dī. ǁNāti kōseb ge tā ǀgaisase nî sîsen. Îb tā ǁîb omaris di gagasi ǂhâsiga ǀuru.

17. Mâ aiǁgausa kha Jehovab tsî Jesub tsîna ra māda, ǁîkha ra ǁkhāǁkhāda ǀgaub ǃnâ?

¹⁷ ǁKhāǁkhā re. Jehovab ge ra ǁkhāǁkhā da sidab ra hui ǂgao amaga. (Heb. 12:7-9) ǁÎb ǁGûb khamib ge Jesuba ǁîb ǃnāka hâ khoena ǀnamxaǃnâ ǀgaub ǃnâ ra ǁkhāǁkhā. (Jhn. 15:14, 15) ǀGaisaseb ra ǁnama, xaweb ge a tsaura. (Mat. 20:24-28) ǀOasa kurusa da  ūhâ tama tsî da ra dīsāsab ge ra ǁnâuǃā.—Mat. 26:41.

18. ǃGâi oms danaba tae-e ǂâis ǃnâ nî ūhâ?

¹⁸ Oms danab hîna Jehovab tsî Jesub tsîna ra sao ǂgaob ge nî ǂâihō ǁîb taras tsî ǀgôan ǀoasa tamasa. ǁÎb ge kaise ǁaixa tama hâ ǁîb taras tsî ǀgôan ǀkha. (Kol. 3:19) Xaweb ge Galateǁîn 6:1 ǃoagu “tsamtsiǃnâ” ǀgaub ǃnâ ǁîna nî hui-unu. Tsîb ge nî ǂâihō ǁîb tsîn xūna ra dīsāsa. ǃGâi aiǁgaus ǃnâ-ūb ge nî ǁkhāǁkhā Jesub khami.—1Pet. 2:21.

19-20. Mîǁguigu tawa i ga hā ob mati omaris danaba Jehovab tsî Jesub tsîna nî ǁgae?

¹⁹ Sadu omaris xa ǂâi re mîǁguiga du ga dī o. Jehovab ge nau khoen ǃaroma ǃgâi miǁguiga ra dī. Aiǁgauseb ge ge mîǁgui îb ûiba kuru. ǁÎb di ǃgâib ǃaromas ǀguis ose. Xawe î da sida tsîna ǁkhoaxase ûi. Tsî khoe-i tsîn ge ge ǁgaribi tama hâ i. Jesuba sida ǃaroma māsa. ǁÎb ge māsenxase ǁnā ǁguibasa sida ǃaroma ge dī. Jesub tsîn ge nau khoena ra hui mîǁguiga ge dī. (Rom. 15:3) Aiǁgauseb ge tsaub ge hâ i. Tsîb gere sâ ǂgao xawe, khoena gere ǁkhāǁkhā.—Mrk. 6:31-34.

²⁰ ǃGâi omaris danab ge ǂhâǂhâsa mîǁguiga omaris ǃaroma nî dī. Tsî nē mîǁguigu ge omarisa nî hui. Tsîb ge ǁîb di tsâsigu ǃoagu ǀgui hâ mîǁguiga dī tide. Xaweb ge ra mā-am îb Jehovaba ǁkhāǁkhā bi. * (ǂKhm. 2:6, 7) Tsî ǁnā ǀgaub ǃnâb ge ǁîb xa ǀgui ǂâi tide xawe nau khoen xa nî ǂâi.—Fil. 2:4.

21. Tae-e da saora ǁkhāǁkhāǃâs ǃnâ nî ǃhoaǃgao?

²¹ Jehovab ge oms di danaga ǃgom sîsen-e ge mā. Tsîb ge ra ǂhâba îgu ǁnā ǁgaumâisa ǁîb ra ǂhâba ǀgaub ǃnâ dī. Xaweb ga oms di danaba Jehovab tsî Jesub di aiǁgausa sao o. Ob ge nî ǃgâi dana kai. Tsîs ga tarasa ǁîs di ǃâba a ǀhuru o, ob ge ǃgammeba nî ǂkhî. Matis tarasa danasisa nî mû? Tsî mâ ǃgomsinas a hō ǁkhā? Saora ǁkhāǁkhāǃâs ge nē dîde nî ǃeream.