1. ¿Tlen mokuayejyekouaj sekimej tlakamej ken moneki kinyekanaskej infamilia?

¿TLEN timokuayejyekoua ijkuak tikkaki se tlakatl kiyekana ifamilia? Sekimej kiyekanaj insiua uan inkoneuan ijkon ken okinmachtijkej inmialtepe noso infamilia. Se tokni tlen itoka Yanita uan chanti Europa, okijto: “Itech noaltepe nochtin mokuayejyekouaj siuamej amitlaj inpati uan san moneki kinnauatijtoskej”. Se tokni tlen itoka Luke uan chanti Estados Unidos, okijto: “Sekimej tetajmej kinmiluiaj inkoneuan amitlaj ipati tlen kijtouaj siuamej, ik non, tlakamej amo moneki kinkakiliskej”. Pero Jehová amo kineki ijkon ma kinchiuilikan insiua (noijki xikita Marcos 7:13). ¿Ken uelis tlakamej kuali kinyekanaskej infamilia?

2. ¿Tlen moneki kimatiskej tlakamej uan tleka?

² Tlakamej kuali kinyekanaskej infamilia tla kajsikamatij ken kineki Jehová ma tlayekanakan. Noijki moneki kimatiskej tleka Jehová okintlali sekimej ma kinyekanakan oksekimej uan ken uelis kichiuaskej ken Jehová uan Jesús. ¿Tleka tlakamej moneki kimatiskej nochi non? Porque Jehová okinkauili ma tlayekanakan uan ye kineki kuali ma kichiuakan (Lucas 12:48b).

3. ¿Tlen techmachtia 1 Corintios 11:3?

³ (Xiktlajtolti 1 Corintios 11:3). Non versículo kiteititia ken Jehová kinyekana akinmej katej iluikak uan tlaltikpak. Ken ye ueyititok, san ye kinamiki tlayekanas. Ye okinkauili sekimej ángeles uan itekipanojkauan nikan tlaltikpak ma tlayekanakan. Moneki kichiuaskej ken toTajtsin Dios kineki porque ye kinmixkomakas (Rom. 14:10, TNM;  Efes. 3:14, 15). Jehová kikauilijtok Jesús ma kinyekana tokniuan pero moneki kinyekantos ijkon ken ye kineki (1 Cor. 15:27). Jehová noijki kinkauilia tlakamej ma kinyekanakan insiua uan inkoneuan pero moneki kinyekanaskej ijkon ken Jehová uan Jesús kichiuaj (1 Ped. 3:7).

4. ¿Tlen kinnamiki kichiuaskej Jehová uan Jesús?

⁴ Jehová kiyekana nochi ifamilia tlen kajki iluikak uan tlaltikpak, ik non, ye kinnauatia ken moneki kipiaskej innemilis (Is. 33:22). Jesús kinyekana nochtin tokniuan itech nochi tlaltikpak, ik non, kinamiki ma kintlali tlanauatilmej para nochtin ma tikchiuakan (Gál. 6:2; Col. 1:18-20).

5. ¿Tokniuan tlakamej ken moneki kinyekanaskej infamilia uan hasta keman moneki ijkon kichiuaskej?

⁵ Ijkon ken Jehová uan Jesús tlayekanaj, tlakamej tlen kipiaj infamilia noijki uelis kitaskej ken kinyekanaskej infamilia (Rom. 7:2; Efes. 6:4). Pero amo uelis kipejpenaskej ken tlayekanaskej. Moneki kichiuaskej ijkon ken kijtouaj principios bíblicos (Prov. 3:5, 6). Noijki amo uelis kinyekanaskej oksekimej tlen amo infamilia (Rom. 14:4). Inkoneuan ok kintlakaitaskej maski yomoskaltijkej uan ayakmo iuan chantij pero ayakmo kinamiki kinyekanas (Mat. 19:5).

6. ¿Tleka Jehová okintlali sekimej ma tlayekanakan?

⁶ Jehová okintlali sekimej ma tlayekanakan uan non kipaleuia nochtin familias. Ijkon kitekichiuiliaj ken moneki uan kuali mouikaj (1 Cor. 14:33, 40). Tla amikaj tlayekanaskia, amo kuali tiyetoskiaj uan amo tiyolpakiskiaj. Tla amikaj kinyekanaskia familias amo kimatiskiaj tlen kichiuaskiaj.

7. ¿Ken kineki Jehová tlakamej ma kiyekanakan insiua ijkon ken kiteititia Efesios 5:25, 28?

⁷ Tla toTajtsin Dios okintlali tlakamej ma tlayekanakan, ¿tleka miakej siuamej kimachiliaj kintlajyouiltiaj? Porque miakej tlakamej amo kichiuaj tlen kijtouaj principios bíblicos ijkuak kinyekanaj infamilias uan san kichiuaj tlen okinmachtijkej intatajuan. Xamo noijki kintlajyouiltiaj insiua porque san kinekij moyolpaktiskej. Xamo sekimej tlakamej san kinekij kinnauatijtoskej insiua porque kinekij kiteititiskej melauak chikauakej. Xamo mokuayejyekouaj amo uelis kinchiualtiskej ma kintlasojtlakan pero uelis kichiuaskej ma momojtikan. Sekimej ijkon kichiuaj san para kinnauatijtoskej. * Akinmej ijkon kichiuaj amo kitlakaitaj insiua uan ijkon oksekimej amo kuali kinmitaj uan amo kitlakamatij Jehová (xiktlajtolti Efesios 5:25, 28).

8. ¿Tlakamej ken uelis kuali kinyekanaskej infamilia?

⁸ Tlakamej uelis kuali kinyekanaskej infamilia tla kichiuaj ken Jehová uan Jesús. Ma tikitakan ome tlamantli tlen yejuan kichiuaj uan ma tikitakan ken ijkon uelis kichiuaskej tlakamej ijkuak kinyekanaj insiua uan inkoneuan.

9. ¿Ken kiteititia Jehová yolyamanki?

⁹ Yolyamanki. Maski Jehová okachi ixtlamatki, kinkaki itekipanojkauan (Gén. 18:23, 24, 32). Noijki akinmej kinyekana  kinkauilia ma kijtokan ken uelis kichiuas seki tlamantli (1 Rey. 22:19-22). Maski Jehová nochi kuali kichiua, ye kimati amo nochi kuali tikchiuaskej uan techpaleuia kuali ma tiyetokan (Sal. 113:6, 7). Itech Biblia David okijto Jehová ye akin okipaleuiaya (Sal. 27:9; Heb. 13:6). Tekiua David okajsikamatki okichi tlen okinauatijkej porque Jehová yolyamanki uan ye okipaleui (2 Sam. 22:36).

10. ¿Ken okiteititi Jesús yolyamanki?

¹⁰ Ma tikitakan tlen okichi Jesús. Maski otlamachtiaya uan okatka inTeko imachtijkauan, okinpakili inmikxiuan. ¿Tleka Jehová okitekauili ma kijkuilokan non itech Biblia? Para ma tiyetokan tiyolyamankej uan noijki tokniuan tlakamej tlen kinyekanaj infamilia. Jesús okijto: “Ijkó kemi Ne onikchi moneki no ijkó xikchiwakah” (Juan 13:12-17). Maski otlayekanaya amo okichixtoka san ma kipaleuikan, ye okinpaleuiaya oksekimej (Mat. 20:28).

11. Jehová uan Jesús yolyamankej, ¿ken uelis ijkon kichiuaskej tlakamej tlen kipiaj infamilia?

¹¹ ¿Tlen techmachtia? Tlakamej tlen kipiaj infamilia tla yolyamankej kiteititiskej. Kilnamikij insiua uan inkoneuan amo nochi kuali kichiuaskej. Kikakij tlen yejuan mokuayejyekouaj maski yejuan amo ijkon mokuayejyekouaj. Marley chanti Estados Unidos, ye okijto: “Ualeua nonamik uan ne tlatlamantli itlaj tikitaj pero nikmachilia nechtlasojtla porque nechtlajtlania ken nimokuayejyekoua, achto mokuayejyekoua tlen nikiluia uan satepan kipejpena tlen kichiuas”. Tla yolyamankej tlakamej, noijki tlapaleuiskej inkalijtik, maski oksekimej mokuayejyekoskej non san kinamiki kichiuaskej siuamej. Ualeua oui kitaskej, ¿tleka? Se tokni tlen itoka Rachel okijto: “Itech noaltepe tla se tlakatl tlapajpaka uan tlachipaua, ifamiliares uan akinmej ik ompa chantij kijtouaj amo melauak chikauak. Mokuayejyekouaj amo kimati kinauatis isiua”. Tla ik kanin tichanti miakej ijkon mokuayejyekouaj, xikilnamiki Jesús okinpakili inmikxiuan imachtijkauan maski miakej okijtouayaj non san tlakeualmej okichiuayaj. Tlakamej tlen kuali kinyekanaj infamilia  amo kintekipachos tlen oksekimej mokuayejyekoskej, yejuan kitaskej tlen kinpaleuis infamilia. Ken otikitakej, tlakamej tlen kipiaj infamilia moneki yetoskej yolyamankej. Noijki tikitaskej tlen okseki tlamantli moneki kichiuaskej.

12. ¿Ken yokiteititijkej Jehová uan Jesús techtlasojtlaj?

¹² Ye tetlasojtla. Jehová kichiua miak tlamantli porque techtlasojtla (1 Juan 4:7, 8). Techmaka iTlajtol uan techpaleuia ika ialtepe para uelis iuan timouikaskej. Ye nochipa techilnamiktia techtlasojtla, ik non, kuali timomachiliaj. Noijki Jehová techmaka tlen ika timopanoltiskej, “techmaka nochi tlan techpoloa para matipaktokah” (1 Tim. 6:17). Ijkuak timotlapololtiaj ye techyektlalia pero nochipa techtlasojtla. Ik non, okitemakak iKone para ma techmakixti uan Jesús noijki techtlasojtla, ik non, topatka omotemakak (Juan 3:16; 15:13). Jehová uan Jesús nochipa kintlasojtlaskej akinmej kintlasojtlaj ika nochi inyolo (Juan 13:1; Rom. 8:35, 38, 39).

13. ¿Tleka akinmej kinyekanaj infamilia moneki tetlasojtlaskej? (Noijki xikita recuadro “ ¿Tlen moneki kichiuas se tlakatl tlen yikin omonamikti uan ijkon isiua kitlakaitas?”).

¹³ ¿Tlen techmachtia? Tlakamej tlen kipiaj infamilia nochipa moneki kiteititiskej tetlasojtlaj. ¿Tleka ijkon moneki kichiuaskej? Apóstol Juan okijto: “Tla amo kitlasojtla se ikni [ifamilia] non [kita], kenomi weletis kitlasojtlas Dios non amo kita” (1 Juan 4:11, 20). Tlakamej tlen kinekij kichiuaskej ken Jehová uan Jesús kintlasojtlaj infamilia, kinpaleuiaj ma mouikakan iuan Jehová, kinpaleuiaj kuali ma momachilikan uan kinmakaj tlen ika mopanoltiskej (1 Tim. 5:8). Kinmachtiaj uan kinyektlaliaj inkoneuan. Kiueyichiuaskej Jehová tla nochipa kuali kipejpenaj tlen kichiuaskej uan moneki kitaskej tlen kipaleuis infamilia. Ma tikitakan ken uelis kichiuaskej ijkon ken Jehová uan Jesús.

14. ¿Tlakamej ken uelis kinpaleuiskej infamilia ma mouikakan iuan Jehová?

¹⁴ Ma kinpaleuikan infamilia ma mouikakan iuan Jehová. Jesús okichi ken iTajtsin, okitak ken kinpaleuis imachtijkauan para ma kipiakan chikauak intlaneltokilis (Mat. 5:3, TNM 6; Mar. 6:34). Noijki ijkon tlakamej tlen kipiaj infamilia moneki ma kinpaleuikan ma mouikakan iuan Jehová (Deut. 6:6-9). Ik non, moneki kitlajtoltiskej uan momachtiskej Biblia iuan infamilia, ma monechikokan, ma tetlapouikan uan nochipa ma mouikakan iuan Jehová.

15. ¿Tlakamej ken uelis kinpaleuiskej infamilia kuali ma momachilikan?

¹⁵ Ma kinpaleuikan infamilia kuali ma momachilikan. Jehová teixpan okilui Jesús okitlasojtlaya (Mat. 3:17). Jesús okijto uan okiteititi okintlasojtlaya imachtijkauan, ik non, yejuan okijtojkej okitlasojtlayaj (Juan 15:9, 12, 13; 21:16). Tlakamej tlen kipiaj infamilia uelis kiteititiskej kintlasojtlaj tla inmiuan momachtiaj Biblia. Noijki moneki kinmiluiskej kintlasojtlaj uan kipatioitaj tlen kichiuaj uan ualeua teixpan uelis kijtoskej tlen kuali kichiuaj (Prov. 31:28, 29).

16. (1) ¿Tlen okseki moneki kichiuaskej tlakamej tlen kipiaj infamilia? (2) ¿Tleka amo moneki okachi kipatioitaskej tekipanoskej?

¹⁶ Ma kinmakakan infamilia tlen ika mopanoltiskej. Jehová okinmakak israelitas tlen ika mopanoltiskiaj maski ualeua otlajyouijkej porque amo okitlakamatkej (Deut. 2:7; 29:5). Axkan Jehová techmaka tlen ika timopanoltiskej (Mat. 6:31-33; 7:11). Jesús noijki okinpaleui imachtijkauan ma kipiakan tlen moneki (Mat. 14:17-20). Noijki miakej okinpajti (Mat. 4:24). Ijkon tlakamej tlen kipiaj infamilia kiyolpaktiskej Jehová tla kinmakaj tlen ika mopanoltiskej. Pero amo moneki okachi tekipanoskej para uelis kinpaleuiskej infamilia ma mouikakan iuan Jehová uan kuali ma momachilikan.

17. ¿Ken techmachtiaj uan techyektlaliaj Jehová uan Jesús?

¹⁷ Kinmachtiskej uan kinyektlaliskej. Jehová techyektlalia uan techmachtia porque kineki kuali ma tiyetokan (Heb. 12:7-9). Jesús noijki okichi ken iTajtsin, okinyektlali uan okinmachti akinmej okinyekanaya (Juan 15:14, 15). Ye technauatia tlen moneki tikchiuaskej pero noijki techtlasojtla (Mat. 20:24-28). Noijki kimati titlajtlakolejkej uan nochipa timotlapololtiaj (Mat. 26:41).

18. ¿Tlen moneki kilnamiktoskej tlakamej tlen kipiaj infamilia?

¹⁸ Tlakamej tlen kinpiaj infamilia kichiuaj ken Jehová uan Jesús ijkuak kilnamiktokej insiua uan inkoneuan amo nochi  kuali kichiuaskej uan amo inmiuan kualanij (Col. 3:19). Kichiuaj tlen kijtoua Gálatas 6:1, kinyektlaliaj ika yolseuilistli porque kilnamikij yejuan noijki motlapololtiaj. Noijki kichiuaj ken Jesús ika tlen kijtouaj uan tlen kichiuaj (1 Ped. 2:21).

19, 20. ¿Tlakamej ken uelis kichiuaskej ken Jehová uan Jesús ijkuak itlaj kichiuaskej?

¹⁹ Ma kipejpenakan kichiuaskej tlen kinpaleuis infamilia. Jehová kita tlen kinpaleuis oksekimej. Ma tikitakan ken kichiua, ye amo otechchijchi san para ye moyolpaktis, noijki kineki ma tiyolpakikan. Amikaj okichiualti ma kiualtitlani iKone ma motemaka topatka, ye ijkon okichi porque okinek techpaleuis. Jesús noijki okipejpenki tlen kinpaleuiskia oksekimej (Rom. 15:3). Se tonal maski Jesús sapanoua osotlauak amo omoseui uan miakej okinmachti (Marcos 6:31-34).

²⁰ Tlakamej tlen kipiaj infamilia kimatokej ualeua oui kipejpenaskej tlen kinpaleuis infamilia, ik non, kuali kitaj tlen kichiuaskej. Achto mokuayejyekouaj para amo san niman itlaj kichijtikisaskej. Kikauiliaj Jehová ma kinpaleui para kimatiskej tlen kichiuaskej, ijkon kiteititiaj ken uelis kinpaleuiskej infamilia uan amo san intech motekipachoskej (Prov. 2:6, 7; Filip. 2:4). *

21. ¿Tlen timomachtiskej itech okse tlamachtil?

²¹ Jehová okinkauili tlakamej ma kinyekanakan infamilia pero non ualeua oui uan ye kitas kox kuali okichijkej. Tla kichiuaj ken Jehová uan Jesús, kuali kinyekanaskej infamilia. Noijki tla insiua kichiuaj tlen moneki nochipa yolpakiskej. ¿Siuatl ken moneki kitas ijkuak kiyekana inamik uan ualeua tlen kixnamikis? Non tikitaskej itech okse tlamachtil.