1. Echu taani yaahaala ovolowela mukhalelo mulopwana onamukhaliheiye mwaariye ni anaawe?

MUNUUPUWELA wi enataphulela eheeni okhala muhooleli, ntoko yootakiherya okhala muru wa echoko? Alopwana akina anneemererya wi sookhovelela naari mukhalelo aphwiiwaya ivolowele mukhalelo anaakhalihaaya asaaraya naari anaaya. Moone yeeyo Anita, murokora yoowo onakhala o Europa olonceiye: “Mukuma kinakhalaakawo achu aneemererya wi athiyana tahi echu enevo nave awo anaphwanela wooniwaka ntoko akapuro.” Nave tho munna awiichaniwa Luka yoowo onakhala o Estatu Unitu oriye: “Asitiithi akina anaahusiha anaaya wi yeeyo athiyana analocaaya henaphwanela owiriyaniwa naari wi moonelo aya tahi woochuneya.” Nyenya Yehova hanachuna wi alopwana yaakhaliheke asaaraya mmukhalelo yoola. (Mulikanyihe ni Marko 7:13.) Vano mulopwana oni ahuserye hai okhala muru wa echoko waphaama?

2. Tiheeni muru wa echoko onaphwanelaaya osuwela, nave ntakhara heeni?

² Wi akhale muru waphaama wa echoko, voopacerya, mulopwana onaphwanela wiiwexexa yeeyo Yehova onaweheryeiye wa yoowo wi apake. Owotho onaphwanela osuwela ntakhara heeni Yehova aavanheiye owerya achu akina, nave oni awerye hai ochariha sootakiherya itikitheryiwe ni Yehova vamoha ni Yesu. Ntakhara heeni eryaaya yoochuneya wa mulopwana osuwela ichu seiya? Nthowa nawi Yehova ohaavahererya alopwana murici mutokweene wa okhala muru wa echoko nave owo onaweherya wi alopwana epharihele phaama murici yoola.—Luka 12:48b.

3. Tiheeni nnahuseryaahu orweela wa ohoolela onalociwa mu 1 Korinto 11:3?

³ Mwaalakhanye 1 Korinto 11:3. Yoorepa yeela ennooniherya mukhalelo Yehova oreherenryeiye emusi awe ya wirimu ni ya veelaponi yavathi. Woona wi owo muru, ookhalano owerya woothene. Moorweela wa marehereryo awe a ohoolela, owo ohaavaha akina owerya, nyenya awo anahaala waakhula mulacu mmukhalelo anapharihelaaya owerya waya. (Aro. 14:10; Éfe. 3:14, 15) Yehova omvaha  murici Yesu wa ohoolela muloko, nave Yehova onaweherya wi Yesu anikhaliheke phaama hiyo. (1 Kor. 15:27) Yehova tho oomvaha muru wa echoko awerya wa omuhoolela mwaariye ni anaawe, nyenya mulopwana onamwaakhula mulacu ni Yehova vamoha ni Yesu vooloca sa mukhalelo onakhaliheiye echoko awe.—1 Ped. 3:7.

4. Owerya taani Yehova ni Yesu aryaayano?

⁴ Nthowa na Yehova okhala Muhooleli a imusi soothene sa wirimu ni sa veelaponi yavathi, owo ookhalano ophwanelela wa opaka malamulo mmukhalelo anaawe anaphwanelaaya okhalaka, nave onnaaceenyerya akina ochariha malamulo yaawo. (Isa. 33:22) Yesu ntoko muru wa muloko Weekristu, ookhalano tho ophwanelela wa opaka malamulo ni waaceenyerya achu wiiwelela malamulo yaawo.—Gal. 6:2; Kol. 1:18-20.

5. Owerya taani muru wa echoko Yeekristu oreiyeno, nave mphimo taani okhanleiyeno?

⁵ Hiiha ntoko Yehova ni Yesu, munna yoowo ori muru wa echoko Yeekristu ookhalano owerya wa opaka soolakelela ntakhara echoko awe. (Aro. 7:2; Éfe. 6:4) Naamwiihiiha, owerya wawe wookhalano mphimo. Ntoko yootakiherya, malamulo awe anathipeleya mu malakiheryo anaphwanyeya Mmasu a Muluku. (Masi. 3:5, 6) Nave muru wa echoko hiwaanono owerya wa opaka malamulo wa yoole ohinapaka makupa a echoko awe. (Aro. 14:4) Nave tho, vaavaa anaawe aasilopwana ni aasithiyana aninnuwaaya nave ekhumavo vaate, awo annatitelela waacicimiha asitiithi aya, nave tiithi owo hanakhala muru wa anamwane awo.—Mat. 19:5.

6. Ntakhara heeni Yehova ootikitherya ohoolela?

⁶ Yehova ootikitherya ohoolela nthowa na osivela emusi awe. Ela yamahala enarweela wa yoowo. Ohoolela onneeriha wi emusi ya Yehova ekhaleke mmureceleni ni yooreheryeya mmikhalelo mikina. (1 Kor. 14:33, 40) Waakhanle wi Yehova haathanlile akina wi ehooleleke mu emusi awe, waahaala okhalavo waakanyeryeya nave hoki okhalevo murecele. Ntoko yootakiherya, haavo aahaala omusuwela taani onaphwanela opaka soolakelela sookuchula ni taani onaphwanela ohoolela wi soolakelela iho ikhwaaniheryiwe.

7. Tiheeni Éfeso 5:25, 28, onaloceiye sa mukhalelo Yehova onachuneiye wi alopwana yaakhaliheke asaaraya?

⁷ Waakhanle wi marehereryo a Muluku a ohoolela echu yaphaama, ntakhara heeni athiyana ancipale atheliwe analocaaya wi asiiyaya annaakhaliha moohiphwanelela nave hanaweeriha okhala ootaphuwa? Ela enneereya nthowa nawi alopwana ancipale annathanla ohichariha malakiheryo a Yehova vooloca sa ekumi ya echoko nave enachariha mihapo ni sookhovelela sa vanipuroni. Naari awo annaakhaliha asaaraya moohiphwanelela echunaka wiihakalaliha mukhataaya. Ntoko yootakiherya, mulopwana othenle onanwerya omuhoosaka mwaariye ni yoolakelela ya wiisooneiha okhala ookhweleyaxa naari wooniherya wa akina wi “tahi mulolo.” Owo onanwerya wuupuwela wi hanachuna omukhinyererya mwaariye wi amucicimiheke, nyenya onanwerya omweeriha mwaariye omoovaka yene. Nave mulopwana owo onampharihela woopopiha yoowo ntoko mukhalelo wa omulamulela. * Muupuwelo ni meecelo ntoko yaawo annawaakha athiyana mahala ni ncicimiho anaphwanelaaya waakhela, nave eyo ennavuhana ni yeeyo Yehova onachuneiye.—Mwaalakhanye Éfeso 5:25, 28.

8. Mulopwana oni ahuserye hai okhala muru wa echoko aphaama?

⁸ Mulopwana onanwerya ohuserya okhala muru waphaama wa echoko moorweela wa  omutakiherya Yehova ni Yesu mmukhalelo anapharihelaaya ohoolela waya. Muthokororye mikhalelo miili sooniheryiwe ni Yehova vamoha ni Yesu, nave moone mukhalelo muru wa echoko oneereiye ooniherye mikhalelo seiya vaavaa onamukhaliheiye mwaariye ni anaawe.

9. Ti mwawiihai Yehova onooniheryeiye wiiyeviha?

⁹ Wiiyeviha. Yehova Muchu amirukuxa, naamwiihiiha onnawiriyana moonelo wa alapeli awe. (Map. 18:23, 24, 32) Owo onnaweemererya yaale ari vathi va olamulelo awe wi evahererye miyoonelo saya. (1 Mam. 22:19-22) Yehova toophaameya, nyenya owo hanaweherya wi nikhale oophaameya. Ohiya yeeyo, onnaakhaviherya achu oohiphaameya wi emurumeeleke ni okhumelela phaama. (Sal. 113:6, 7) Mweeparipari, Piipiliya onnamuloca Yehova ntoko “mukhaviheryi.” (Sal. 27:9; Ahe. 13:6) Mwene Tavite aahisuwela wi aahiwerya waakhwaniherya muteko mutokweene aavahiweiye nthowa nawi Yehova aari awiiyeviha nave aahimukhaviherya.—2 Sam. 22:36.

10. Ti mwawiihai Yesu oonihenryeiye wiiyeviha?

¹⁰ Muthokororye yootakiherya ya Yesu. Naamwi owo aari Pwiya ni Muhusiha, Yesu aahirapiha inaani sa oohuserya awe. Mathowa taani yaamweerinhe Yehova wi ela erempwe Mpiipiliya? Wi avahe yootakiherya yaphaama wa mmoha ti mmoha a hiyo, yeeyo nnaphwanelaahu ochariha ophitaanyerya miru sa ichoko. Yesu mwaneene aaloca ariki: “Vawi miyo, koowooniheryaani yeela mukitakiheryeke hiiha.” (Yoh. 13:12-17) Naamwi Yesu aarino owerya haaweherya wi arumeeliweke. Ohiya yeeyo, owo aahaarumeela akina.—Mat. 20:28.

11. Tiheeni muru wa echoko onahusereiye orweela wa yootakiherya etikitheryiwe ni Yehova ni Yesu?

¹¹ Nihusiheryo wa hiyo. Muru wa echoko onaphwanela wooniherya wiiyeviha mmikhalelo soohiyana hiyana. Ntoko yootakiherya, owo hanaphwanela oweherya wi mwaariye naari anaawe epake ichu seiho ahinaweryaaya opaka. Owo onnawiriyana miyoonelo sa mwaariye ni sa anaawe, naamwi asuwelaka wi iho hasiniiwanana ni sawawe. Marley, yoowo onakhala o Estatu Unitu oriye: “Miyaano ni iyaka ikwaha ikina ninnakhalano miyoonelo soohiyana. Nyenya kinnasuwela wi iyaka onnasiveliwa ni miyaano nave onnakicicimiha woona wi onnakikoha moonelo aka nave onnathokororya moomaaleleya ahaakumve opaka yoolakelela.” Mwawaaceererya, mulopwana othenle yoowo ori awiiyeviha onaphwanela opakaka miteko sa vaate, naamwi vamukumani vaya miteko iho sooniwaka wi ti sa athiyana. Nno nnamukhala nikacamiho. Ntakhara heeni? Murokora oniichaniwa Rachel  oriye: “Nipuro kiyariwaakawo, wakhala wi mulopwana onnamukhaviherya mwaariye orapiha iparatho naari orehererya empa, amwaacamani awe ni amusi anahaala omukoha waakhanle wi owo ‘mulopwana eeparipari.’ Awo anahaala wuupuwela wi mulopwana owo hanawerya omulamulela mwaariye.” Waakhanle wi moonelo yoowo ti wa wunlaana mmukuma munakhalaanyuwo, muupuwele wi Yesu aahirapiha inaani sa oohuserya awe, naamwi muteko owo wooniwa ntoko muteko wa kapuro. Munna ori muru wa echoko aphaama hanachuna wi akina yuupuweleke wi owo toowerya naari tookhweleyaxa waapwaha akina. Yoochunaawe ori omweeriha mwaariye ni anaawe okhala oohakalala. Waaceererya va wiiyeviha, mukhalelo taani ori woochuneya wa muru wa echoko aphaama?

12. Tiheeni osivela oweerinhaaya Yehova ni Yesu opaka?

¹² Osivela. Echu eri yoothene Yehova onapakeiye onaceenyeryiwa ni osivela. (1 Yoh. 4:7, 8) Owo onnathokororya soothowa sahu soomunepani moorweela wa Masu awe oorempwa—Piipiliya, vamoha ni marehereryo awe. Onnathokororya soothowa sahu sa mmuupuweloni moorweela wa onooniherya wi onnanisivela. Hanka vooloca sa soothowa sahu soomwiilini? Yehova “[onnanivaha] mwawaacasha soothene wi nihakalalekeno.” (1 Tim. 6:17) Elukuluku nnapakaahu soocheka owo onnanookolola, nyenya hanamaala onisivela. Mwawaaceererya ni osivela, Yehova oovahererya woopola ntakhara hiyo. Nave Yesu onnanisivela moopwaha ophiyerya oveleela ekumi awe ntakhara hiyo. (Yoh. 3:16; 15:13) Hiyaavovo echu eni emalihe nimakelo na osivela nenlo Yehova ni Yesu aryaayano wa yaale ari oororomeleya wa yaawo.—Yoh. 13:1; Aro. 8:35, 38, 39.

13. Ntakhara heeni eryaaya yookhweleya wi muru wa echoko wooniherye osivela ntakhara echoko awe? (Moone tho ekaaxa “ Mulopwana Othenle Hiihaanoru Oni Awerye Hai Waakhela Ncicimiho na Mwaariye?”)

¹³ Nihusiheryo wa hiyo. Echu eri yoothene muru wa echoko onapakeiye onaphwanela oceenyeryeya ni osivela. Ntakhara heeni eryaaya yookhweleya? Murummwa Yohani onnaakhula: “Yoowo ohinamukhwela munnawe [naari mmusi], onamooneiye, hawerya omukhwela Muluku, yoowo ohinamooneiye.” (1 Yoh. 4:11, 20) Mweeparipari, mulopwana yoowo onasivela echoko awe nave onachuna omutakiherya Yehova vamoha ni Yesu, onahaala ovahererya echoko awe soothowa soomunepani, oweeriha wiisoona okhala  ookhapeleleya, ni waavahererya soothowa soomwiilini. (1 Tim. 5:8) Owo onahaala waavyakiha ni waalaka anaawe. Onahaala otitelela ohuserya opakaka soolakelela sinamucicimiha Yehova nave inakhaviherya echoko awe. Hankooni naalikhele emoha ti emoha sa seiya nave noone mukhalelo muru wa echoko oneereiye amutakiherye Yehova vamoha ni Yesu.

14. Muru wa echoko onavahererya hai echoko awe soothowa soomunepani?

¹⁴ Mvahererye echoko anyu soothowa soomunepani. Amutakiheryaka Tiithi awe, Yesu aaheeriha wi yaale aahooleleiye ekhale oolyiheya phaama makupa oomunepani. (Mat. 5:3, 6; Mar. 6:34) Moolikana, muru wa echoko murici awe woopacerya ori othokororya soothowa soomunepani sa echoko awe. (Malam. 6:6-9) Owo onneerano yeela, moorweela wa weeriha wi owo ni echoko awe yaalakhanye nave ehuserye Masu a Muluku, ephwanyeye mmithukumano, elaleerye michaka saphaama, nave eteke ni okhapelela onthamwene ni Yehova.

15. Mmukhalelo taani mmoha mulopwana ori muru wa echoko oneereiye aakhaviherye achu aveechokoni vawe woona wi onnaasivela?

¹⁵ Mwaakhaviherye achu aveechokoni vanyu woona wi munnaasivela. Yehova aahimuleela Yesu wi aanamusivela variyari va achu akina. (Mat. 3:17) Wiiliwiili Yesu aahooniherya osivela ntakhara oomuchara awe, moorweela wa yeeyo aapakeiye ni yeeyo aaloceiye. Oomuchara awe tho yaahimuleela wi yaanamusivela yene. (Yoh. 15:9, 12, 13; 21:16) Muru wa echoko onanwerya omooniherya mwaariye ni anaawe wi onnaasivela orweela wa yeeyo onapakeiye moorweela wa omuhuserya Piipiliya ni yaawo. Owo onaphwanela tho waaleela wi onnaasivela nave wi tasisapo wa yoowo, nave wakhala wooweryeya, waathamalela ohoolo wa akina.—Masi. 31:28, 29.

16. Echu taani ekina muru wa echoko onaphwaneleiye opaka, nave tiheeni onaphwaneleiye osepa?

¹⁶ Mvahererye echoko anyu soothowa soomwiilini. Yehova aaheeriha wi Aisarayeli ekhaleno ichu seiyo yaachunaaya naamwi elukuluku yaalakiwaaya nthowa na ohiiwelela. (Malam. 2:7; 29:5) Olelo owo onnanivaha soothowa sahu. (Mat. 6:31-33; 7:11) Moolikana, Yesu aahaalyiha yaale yaamuchara. (Mat. 14:17-20) Owo tho aahaapenusa ancipale yiiceliwa. (Mat. 4:24) Wi amuhakalalihe Yehova, muru wa echoko onaphwanela ovakulela echoko awe. Nyenya, onaphwanela wooniherya ophimelela. Hanaphwanela wiivoliiherya moomalela mmuteko weelapo wi avakulele echoko awe ophiyerya ohiwerya othokororya soothowa soomunepani ni sa mmuupuweloni sa echoko awe.

17. Yootakiherya taani Yehova ni Yesu avanhaaya mmukhalelo ananivyakihaaya ni onlaka?

¹⁷ Mvahererye ovyakiha. Yehova onnanivyakiha ni onilaka ntakhara mphurelo ahu. (Ahe. 12:7-9) Ntoko Tiithi awe, Yesu onnaavyakiha yaale ari vathi wa olamulelo awe mmukhalelo woosivela. (Yoh. 15:14, 15) Yesu onnavaha ekano yoolipa nyenya tho tooreera murima. (Mat. 20:24-28) Onniiwexexa wi naachu oohiphaameya  nave wi wiiliwiili ninnapaka soocheka.—Mat. 26:41.

18. Tiheeni muru wa echoko onaphwaneleiye wuupuwela?

¹⁸ Muru wa echoko onamutakiherya Yehova ni Yesu onnuupuwela wi mwaariye ni anaaya tahi oophaameya. Owo hanakhala “òpwalu” ni mwaariye vamoha ni anaawe. (Kol. 3:19, BNM) Ohiye yeeyo, onnapharihela nlakiheryo nnaphwanyeya mu Galasya 6:1 nave onneererya waacarusa “mwa munepa ni opisa murima,” uupuwelaka tho wi awo toohiphaameya. Hiiha ntoko Yesu, owo oosuwela wi mukhalelo waphaama wa ohusiha ori moorweela wa yootakiherya.—1 Ped. 2:21.

19-20. Elukuluku muru wa echoko onapakeiye soolakelela, oni amutakiherye hai Yehova ni Yesu?

¹⁹ Mpake soolakelela muthokororyaka tho sa akina. Yehova onnapaka soolakelela inaakumiherya mphurelo wa akina. Ntoko yootakiherya, owo aahilakelela opatusa okumi, ohiya wi iiruuhele mphurelo mukhateiye, nyenya wi uuke ni hiyo ohakalala wa okhala. Haavovo aahaala omukhinyererya omvaha Mwanawe wi akhwe ntakhara soocheka sahu. Owo aahilakelela ovaha woopola ntakhara mphurelo ahu. Yesu tho aahipaka soolakelela seiyo woopaceryani saakumihenrye mphurelo wa akina. (Aro. 15:3) Ntoko yootakiherya, owo aahilakelela ohipaka yoochunaawe ya wiichuuwa wi ahusihe muloko wa achu.—Mar. 6:31-34.

²⁰ Muru wa echoko oosuwela wi echu emoha eri yoovilaxa onaphwaneleiye opaka iri soolakelela saphaama ntakhara echoko awe, nave murici owo ti wookhweleya wa yene. Owo onnasepa opaka soolakelela soohiphwanelela naari inathipeleya mwa yeeyo onachuneiye mu elukuluku yeeyo. Ohiya yeeyo, onnamweemererya Yehova wi amuhusihe mukhalelo wa opaka soolakelela saphaama. * (Masi. 2:6, 7) Eerano hiiha, owo onahaala wuupuwela mphurelo wa akina, ohiya wa yoowo mukhateiye.—Fil. 2:4.

21. Tiheeni enahaala othokororyiwa mmwaha onacharela?

²¹ Yehova ohaavaha miru sa ichoko murici woovila. Owo onaweherya wi ekhwaaniherye phaama murici aya. Nyenya wakhala wi mulopwana othenle onniilipiserya ochariha yootakiherya etikitheryiwe ni Yehova vamoha ni Yesu, owo onahaala okhala muru wa echoko waphaama. Nave wakhala wi mwaariye onnakhwaaniherya phaama murici awe, anahaala okhala mutheli oohakalala. Muthiyana otheliwe onaphwanela woonaka hai murici wa iyawe ntoko muru wa echoko, nave makacamiho taani oneereiye akhaleno? Mwaha onacharela onahaala othokororya makoho yaala.