1. ¿Tleka sekimej teueuentsitsinuan xmás kitlakaitaj insiuauj niman inkoneuan?

¿TLENON noneki kinemilis se teueuentsin itech ifamilia? Sekimej teueuentsitsinuan xmás kitlakaitaj insiuauj niman inkoneuan pampa intajuan ijkon kimijliaj makichiuakan noso pampa ijkon nochiua ipan inkalpan. Yanita, se tokniuj akin chanti Europa, kijtoua: “Kampa nejua nichanti, miyekej kinemiliaj ika tlakamej más uejueyixtokej xijkon ken siuamej, niman kijtouaj ika siuamej san noneki kimitaskej ken tlakeualtin”. Niman se tokniuj, akin itoka Luke niman chanti Estados Unidos, kijtoua: “Sekimej tajtin kimijliaj inkoneuan ika tlen siuamej kijtouaj xtepaleuij, ika yejon, tlakamej xnoneki kinkakiskej siuamej”. San ika, Jehová xkineki ika teueuentsitsinuan ijkon makichiuakan (uelis tikitas Marcos 7:13). Kuakon, ¿kenon se teueuentsin uelis kuajli kiyekanas ifamilia?

2. ¿Tlenon noneki kasikamatis se teueuentsin, niman tleka?

² Tla se teueuentsin kineki kuajli kiyekanas ifamilia, kachtopa noneki kasikamatis tlen Jehová kitlajtlanilia makichiua. Niman, noijki noneki kasikamatis tleka Jehová kineki manemikan akin matlayekanakan niman kenon uelis tlayekanas ijkon ken Jehová niman Jesús. ¿Tleka se tlakatl noneki kasikamatis nochi yejuin? Pampa Jehová kimijlia teueuentsitsinuan ika yejuamej akin kipiya ika tlayekanaskej ipan infamilias, niman yejua kineki kuajli matlayekanakan (Luc. 12:48b).

3. ¿Tlenon techijlia 1 Corintios 11:3?

³ Xpoua 1 Corintios 11:3. Ipan yejuin tlaxelojli, Jehová techijlia akinon kiyekana se tesiuauj, se teueuentsin niman Cristo. Jehová akin más ueyixtika niman yejua nochimej kinyekana.  Ipampa yejuin, kinkauilia oksekimej matlayekanakan, san ika, akin yokinkauili matlayekanakan xnoneki kilkauaskej ika yejua kitstika kenon tlayekanaj (Rom. 14:10, TNM; Efes. 3:14, 15). Jehová yokikauili Jesús makiyekana tlanechikojli; san ika, Jehová kitstika tla Jesús kuajli kiyekantika tlanechikojli (1 Cor. 15:27). ToTajtsin noijki yokimijli teueuentsitsinuan makiyekanakan insiuauj niman inkoneuan; san ika, Jehová niman Jesús kitstokej tla kuajli kinyekantokej infamilias (1 Ped. 3:7).

4. ¿Tlenon uelis kichiuaskej Jehová niman Jesús?

⁴ Jehová yejua akin ueyixtika tlayekanketl, ika yejon, uelis kimijlis ikoneuan tlenon noneki kichiuaskej. Niman, noijki uelis kichiuas tlen noneki niman ijkon makitlakamatikan (Is. 33:22, 23). Jesús, akin kiyekana tlanechikojli, noijki uelis kijtos tlenon noneki nochiuas ipan tlanechikojli. Niman, noijki uelis kichiuas tlen noneki niman ijkon makitlakamatikan (Gál. 6:2; Col. 1:18-20).

5. ¿Tlenon uelis kichiuas se teueuentsin niman tlenon ka?

⁵ Ijkon ken Jehová niman Jesús, se teueuentsin noijki uelis kijtos tlenon noneki kichiuas ifamilia (Rom. 7:2; Efes. 6:4). San ika, yejuin xkijtosneki ika san yejua kualijtos tlenon noneki nochiuas. Nochipa ijkuak kijtos tlenon nonekis kichiuas ifamilia, noneki kitas tlenon kinemilia Jehová (Prov. 3:5, 6). Niman, se teueuentsin xuelis kijlis okse familia tlenon noneki kichiuas (Rom. 14:4). Niman noijki, ijkuak ikoneuan noskaltiskej niman xok iuan chantiskej, yejua xok noneki kinyekanas. Maski ijkon, ikoneuan ok kitlakaitaskej (Mat. 19:5).

6. ¿Tleka Jehová kineki manemikan akin matlayekanakan?

⁶ Jehová yokijto akinomej noneki tlayekanaskej. Ipampa yejuin, nochimej ikoneuan kuajli nemij niman san sekan tekitij (1 Cor. 14:33, 40). Tla ikoneuan Jehová xkuajli kasikamatiskiaj akinomej yokintekitlalijkej para matlayekanakan, yejuamej xkuajli kichiuaskiaj intekiyo niman xyolpakiskiaj. ¿Tleka ijkon tikijtouaj? Pampa xkimatiskiaj akinon noneki kijtos tlenon nochiuas niman akinon noneki kiyekanas se tekitl.

7. Ijkon ken kijtoua Efesios 5:25, 28, ¿tlenon kineki Jehová makichiuakan teueuentsitsinuan?

⁷ Ken yotikitakej, Jehová yokintlapejpeni teueuentsitsinuan niman ijkon makinyekanakan infamilias pampa kineki kuajli manemikan. San ika ¿tleka miyekej tesiuauan xnemij ika inyojlo niman kimachiliaj ika inueuentsin kintlajyouiltia? Ijkon panoua pampa miyekej tlakamej xtlayekanaj ijkon ken Jehová kitlajtlani, yejuamej xkitlakaitaj insiuauj pampa kanaj ijkon nochiua ipan inkalpan. Niman, sekimej tlakamej kichiuiliaj tlen xkuajli insiuauj pampa san intech tlanemiliaj. San matikonnemilikan yejuin, kanaj se teueuentsin kitlajyouiltia isiuauj san pampa kineki kiteititis ika yejua más ueyixtika niman ika yejua “melak tlakatl”. Kanaj kinemilia ika, maski xuelis kichiuas ika isiuauj makitlasojtla, kema uelis kichiuas makimakasi niman ijkon kichiualtis makitlakamati. * Ijkuak teueuentsitsinuan ijkon kichiuaj, yejuamej kiteititiaj ika xkitlasojtlaj niman xkitlakaitaj insiuauj. Niman yejuin itlaj tlen xkuelita Jehová (xpoua Efesios 5:25, 28).

8. ¿Kenon uelis kuajli tlayekanas se teueuentsin?

⁸ Se teueuentsin uelis kuajli kiyekanas ifamilia tla kita kenon Jehová niman Jesús tlayekanaj. Matikitakan ome tlemach tlen Jehová  niman Jesús kiteititiaj ijkuak tlayekanaj, niman noijki matikitakan kenon teueuentsitsinuan noijki uelis ijkon kinyekanaskej infamilias.

9. ¿Kenon kiteititia Jehová ika yolyemanki?

⁹ Kiteititiaj ika yolyemankej. Maski Jehová yejua akin más tlamachilise, yejua kikaki tlen kinemiliaj itekipanojkauan (Gén. 18:23, 24, 32). Yeuejkaui, hasta okintlajtolti akin yejua kinyekanaya kenon ueliskia noyektlalis se tlauejli (1 Rey. 22:19-22). Maski Jehová xkeman nopopoloua, yejua xkichia ika tejuamej maka keman matopopolokan. Yejua kinpaleuiya nochimej itekipanojkauan niman ijkon kuajli makisa nochi intekiyo (Sal. 113:6, 7). Biblia kijtoua ika David hasta okijli Jehová: “¡San tejua uelis tinechpaleuis!” (Sal. 27:9; Heb. 13:6). David kimatstoya ika Jehová okipaleui ipan nochi tlen okichiuj pampa toTajtsin yolyemanki (2 Sam. 22:36).

10. ¿Kenon okiteititi Jesús ika yolyemanki?

¹⁰ Aman matitlajtokan itech Jesús. Maski inomachtijkauan kijliayaj “Temachtijketl” niman “noTeko”, yejua okimikxipajpak. ¿Tleka Jehová okinek manoijkuilo ipan Biblia tlen okichiuj Jesús? Yejua ijkon okichiuj pampa kineki techititis ika noneki tiyolyemankej yeskej, hasta on teueuentsitsinuan. Jesús okijto: “Nejua nemechchiuilia in para nemejuamej no xchiuakan ken nejua yonikchiu” (Juan 13:12-17). Maski Jesús melak ueyixtoya, xkichiaya makitekichiuilikan, yejua nochipa kinektoya tetekichiuilis (Mat. 20:28).

11. ¿Kenon uelis kiteititis se teueuentsin ika yolyemanki ijkon ken Jehová niman Jesús?

¹¹ ¿Tlenon tiuelij? Se teueuentsin uelis kichiuas miyek tlemach niman ijkon kiteititis ika yolyemanki. Se teueuentsin akin yolyemanki xkichia ika isiuauj niman ikoneuan maka keman manopopolokan. Noijki, kuajli kikaki tlen yejuamej kinemiliaj, niman, ijkon kichiua maski kemantika xmás kuelkaki tlen kijliaj. Marley, akin chanti Estados Unidos, kijtoua: “Nejua iuan noueuentsin xsan noijki ken titlanemiliaj, san ika, nikita ika nechtlakaita pampa, achto itlaj kitlapejpenis, nechtlajtoltia tlenon niknemilia”. Se tlakatl akin yolyemanki kinektika tekichiuas ichan, maski kampa yejua chanti kijtouaj ika yejon siuatekitl. Yejuin kanaj uelis kintekiyomakas teueuentsitsinuan. ¿Tleka? Se tokniuj akin itoka Rachel kijtoua: “Kampa nejua niualeua, tla se tlakatl kipaleuiya isiuatsin  niman tlapajpaka noso tlachipaua ichan, ichanejkauan niman ivecinos uelis kinemiliskej ika yejua ‘xtlakatl’. Uelis kinemiliskej ika yejua xueli kinauatia isiuauj”. Tla tejua tichanti kampa noijki ijkon tlanemiliaj, xkilnamiki ika Jesús okimikxipajpak inomachtijkauan, maski miyekej kinemiliayaj ika yejon san nonekiya kichiuas se tlakeuajli. Se teueuentsin xnoneki kinyolpaktis oksekimej, yej noneki kiyolpaktis ifamilia. San ika, xsan noneki yolyemanki yes, noijki noneki kichiuas itlaj okse.

12. ¿Kenon techititiaj Jehová niman Jesús ika techtlasojtlaj?

¹² Kiteititiaj ika tetlasojtlaj. Nochi tlen kichiua Jehová kichiua ika tlasojtlalistli (1 Juan 4:7, 8). Yejua techititia ika techtlasojtla pampa kichikaua totlaneltokil itechkopa iTlajtol niman ikalpan. Nochipa techilnamiktia ika techtlasojtla pampa kineki kuajli matomachilikan. ¿Niman tlenon kichiua ijkuak itlaj techpoloua? Jehová techmaka “nochi tlen ika tompanotokej para kuajli tinemij” (1 Tim. 6:17). Ijkuak topopolouaj, techmelajkatlalia, san ika, yejua xtechtlauelkaua. Jehová okuajtitlan isenteKonetsin pampa techtlasojtla, niman Jesús noijki melak techtlasojtla pampa hasta okinek mikis topampa (Juan 3:16; 15:13). Xitlaj uelis kichiuas ika Jehová niman Jesús makikajkauakan ika kintlasojtlaj akin intech yolmelajkanemij (Juan 13:1; Rom. 8:35, 38, 39).

13. ¿Tleka melak noneki ika se teueuentsin makitlasojtla ifamilia? (Noijki xkita recuadro “ ¿Tlenon uelis kichiuas se tlakatl akin kemach yononamikti niman ijkon isiuauj itech matlaneltoka?”).

¹³ ¿Tlenon tiuelij? Nochi tlen kichiuas se teueuentsin noneki kichiuas ika tlasojtlalistli. ¿Tleka melak noneki ijkon makichiua? Apóstol Juan okijto: “Tla se xkitlajsojtla ikniu [noso ifamilia] yejuan kita, no xkitlajsojtla Dios yejuan xkita” (1 Juan 4:11, 20). Yejua ika, tla se teueuentsin kitlasojtla ifamilia niman kineki kichiuas ijkon ken Jehová niman Jesús, yejua kipiya ika kinpaleuis akin nemij ipan ifamilia machikaujto intlaneltokil, manemikan ika inyojlo niman maka itlaj makinpolo (1 Tim. 5:8). Noijki, noneki kinmachtis niman kinmelajkatlalis ikoneuan. Niman nochipa kipiya ika nokojtilis kitlapejpenis tlen kiyolpaktis Jehová  niman tlen kipaleuis ifamilia. Matikitakan kenon se teueuentsin uelis kichiuas nochi yejuin niman kenon uelis kichiuas ijkon ken Jehová niman Jesús.

14. ¿Kenon se teueuentsin uelis kipaleuis ifamilia machikaujto itlaneltokil?

¹⁴ Kipiya ika kinpaleuis akin nemij ipan ifamilia machikaujto intlaneltokil. Jesús okiteititi ika kichiuaya ken iTaj pampa onokojtili kinpaleuis inomachtijkauan machikaujto intlaneltokil (Mat. 5:3, TNM; Mat. 5:6; Mar. 6:34). Se teueuentsin noijki noneki kichiuas tlen noneki niman ijkon nochimej ichanejkauan makitlasojtlakan Jehová (Deut. 6:6-9). Ika yejon, yejua noneki nokojtilis kipouas niman nomachtis Biblia san iselti niman imiuan ichanejkauan. Noneki yaskej tlanechikoltin, tenojnotsaskej niman nokojtiliskej nochipa kuajli nouikaskej iuan Jehová.

15. ¿Kenon se teueuentsin uelis kipaleuis ifamilia manemi ika iyojlo?

¹⁵ Kipiya ika kinpaleuis akin nemij ipan ifamilia manemikan ika inyojlo. Jehová teixpan okijli Jesús ika kitlasojtlaya (Mat. 3:17). Jesús noijki okiteititi ika kintlasojtlaya inomachtijkauan ipampa tlen okichiuj niman ipampa tlen okijto. Niman inomachtijkauan noijki okititijkej ika kitlasojtlayaj (Juan 15:9, 12, 13; 21:16). Se teueuentsin noijki uelis kititis isiuauj niman ikoneuan ika kintlasojtla. ¿Kenon? Tla imiuan nomachtia Biblia. Noijki noneki kimijlis ika kintlasojtla niman ika intech tlanemilia. Niman, ijkuak kitas ika itlaj kuajli okichiujkej, uelis teixpan kimijlis ika melak kuajli tlen okichiujkej (Prov. 31:28, 29).

16. a) ¿Tlenon más noneki kichiuas se teueuentsin? b) ¿Niman itech tlenon noneki notlajpiyas?

¹⁶ Kipiya ika kinpaleuis akin nemij ipan ifamilia maka itlaj makinpolo. Jehová nochipa okinmakak tlen kinpolouaya israelitas. Maski kemantika yejuamej kikualaniayaj pampa xkitlakamatiyaj, yejua nochipa okinmakak tlen nonekiya (Deut. 2:7; 29:5). Ipan yejuin tonaltin, Jehová noijki kita ika itekipanojkauan maka itlaj makinpolo (Mat. 6:31-33; 7:11). Niman, Jesús noijki okitak ika inomachtijkauan makipiyakan tlen uelis kikuaskej (Mat. 14:17-20). Niman noijki okitak ika kuajli manemikan (Mat. 4:24). Tla se teueuentsin kineki kiyolpaktis Jehová, kipiya ika kitas maka itlaj makinpolo akin nemij ipan ifamilia. San ika, noneki notlajpiyas maka sajnoye tekitis, pampa tla xnotlajpiya, kanaj xok uelis kipaleuis ifamilia machikaujto itlaneltokil niman manemi ika iyojlo.

17. ¿Tlenon kichiuaj Jehová niman Jesús niman ijkon kuajli matinemikan?

¹⁷ Kipiya ika kinmachtis niman kinmelajkatlalis ikoneuan. Jehová kuajli techmachtia niman techmelajkatlalia pampa kineki kuajli matinemikan (Heb. 12:7-9). Ijkon ken Jehová, Jesús noijki okinmachti niman okinmelajkatlali akin yejua kinyekanaya (Juan 15:14, 15). Jesús  techikajkanotsa, san ika, noijki teiknelia (Mat. 20:24-28). Kimatstika ika titlajtlakolejkej niman ika miyekpa topopolouaj (Mat. 26:41).

18. ¿Tlenon nochipa kilnamiktok se teueuentsin akin kichiua ijkon ken Jehová niman Jesús?

¹⁸ Se teueuentsin akin kichiua ijkon ken Jehová niman Jesús nochipa kilnamiktok ika isiuauj niman ikoneuan uelis nopopoloskej, niman xkintlauelita ijkuak ijkon panoua (Col. 3:19). Yejua nokojtilia kinmelajkatlalis “ikan yolyemanilistli” ijkon ken kijtoua Gálatas 6:1, niman nochipa kilnamiktok ika yejua noijki nopopoloua. Ijkon ken Jesús, kuajli kimatstok ika ichanejkauan más kitlakamatiskej tla yejua kichiua tlen kimijlia (1 Ped. 2:21).

19, 20. ¿Kenon se teueuentsin uelis kichiuas ijkon ken Jehová niman Jesús ijkuak nonekis itlaj kitlapejpenis?

¹⁹ Kipiya ika nokojtilis kitlapejpenis tlen kipaleuis ifamilia. Jehová nochipa kitlapejpenia tlen kinpaleuis ikoneuan. San matitlanemilikan itech yejuin, yejua okinchijchiuj ikoneuan pampa noijki kineki mayolpakikan. Xakaj okichiualti makuajtitlani iKoneuj niman ijkon makitemaka inemilis topampa. Yejua ijkon okichiuj pampa kineki techpaleuis. Jesús noijki nochipa okitlapejpeni tlen kinpaleuiskia oksekimej (Rom. 15:3). Sejpatipan, ijkuak yejua melak siaujtoya, miyekej okitejtemotoj para makinmachti. Yejua ueliskia kimijlis ika kinekiya noseuis, san ika, okitlapejpeni kinmachtis (Mar. 6:31-34).

²⁰ Se teueuentsin akin kuajli kichiua itekiyo melak nokojtilia kitlapejpenis tlen kipaleuis ifamilia. Xsan kauilmati itekiyo. Xkitlapejpenia san tlen yejua kuelita, yejua kuajli tlanemilia achto itlaj kichiuas. Yejua noijki kinokauilia ika Jehová makimajmachti kenon kitlapejpenis tlen kuajli (Prov. 2:6, 7). * Ijkuak se teueuentsin ijkon kichiua, xsan kitlapejpenia tlen yejua kipaleuiya, noijki kitlapejpenia tlen kinpaleuiya oksekimej (Filip. 2:4).

21. ¿Tlenon tikitaskej ipan okse tlamachtijli?

²¹ Jehová yokinmakak nochimej teueuentsitsinuan se ueyi tekitl, niman kineki ika kuajli makichiuakan intekiyo. San ika, tla se teueuentsin nokojtilia kichiuas ijkon ken Jehová niman Jesús, kuajli kichiuas itekiyo. Niman, tla isiuauj noijki kichiua tlen Jehová kitlajtlanilia, nochimej melak yolpakiskej. ¿Kenon kineki Jehová ika se tesiuauj makitlakaita iueuentsin? ¿Niman tlenon kixnamiki se tesiuauj? Yejuin tikitaskej ipan okse tlamachtijli.