SEHLOGO SE ITHUTWAGO 5
“Hlogo ya Monna yo Mongwe le yo Mongwe ke Kriste”
“Hlogo ya monna yo mongwe le yo mongwe ke Kriste.” —1 BAKOR. 11:3.
KOPELO 12 Modimo yo Mogolo, Jehofa
SEO RE TLAGO GO ITHUTA SONA *
1. Ke dilo dife tšeo di ka amago tsela yeo monna a swarago mosadi wa gagwe le bana?
O NAGANA gore go ba hlogo ya lapa go ra go re’ng? Banna ba bangwe ba dumelela tsela yeo ba godišitšwego ka yona goba setšo sa gabo bona se ama tsela yeo ba swarago basadi ba bona le bana ba bona. Kgaetšedi Yanita, yo a dulago Yuropa o re: “Mo ke dulago gona, batho ba bantši ba nagana gore basadi ga ba bohlokwa le gore sa bona e no ba go šoma mešongwana ya ka gae.” Ngwanabo rena Luke, yo a dulago United States, o re: “Botate ba bangwe ba ruta barwa ba bona gore dilo tšeo basadi ba di bolelago ga di bohlokwa e bile ga se ba swanela go ba theetša.” Eupša Jehofa ga a nyake gore banna ba sware basadi ba bona ka tsela yeo. (Bapiša le Mareka 7:13.) Bjale monna a ka ithuta bjang go ba hlogo ya lapa e botse?
2. Hlogo ya lapa e swanetše go tseba eng, gona ka baka la’ng?
2 E le gore monna e be hlogo e botse, sa mathomo o swanetše go tseba seo Jehofa a nyakago gore a se dire. A tsebe le gore ke ka baka la eng Jehofa a nea batho ba bangwe boikarabelo bja go laola ba bangwe, le gore a ka ekiša bjang tsela yeo Jehofa le Jesu ba dirišago bohlogo bja bona. Ke ka baka la’ng go le bohlokwa gore monna a tsebe dilo tše ka moka? Ka gobane Jehofa o mo file boikarabelo bja go laola ba bangwe e bile o nyaka gore a phethe boikarabelo bjoo gabotse.—Luka 12:48b.
GO BA HLOGO GO BOLELA ENG?
3. Bakorinthe ba Pele 11:3 e re’ng ka bohlogo?
3 Bala 1 Bakorinthe 11:3. Temana ye e hlalosa kamoo Jehofa a rulagantšego lapa la gagwe legodimong le lefaseng. Ka ge Jehofa e le hlogo ya rena ka moka, ke yena a nago le matla ka moka a go laola. Jehofa o kgethile go nea ba bangwe boikarabelo bja go etelela pele. Eupša ba tlo ikarabela go Jehofa ka tsela yeo ba dirišago boikarabelo bjoo ka gona. (Baroma 14:10; Baef. 3:14, 15) Ka mohlala, Jehofa o neile Jesu boikarabelo bja go etelela phuthego pele. Eupša Jesu o tlo ikarabela go Jehofa ka tsela yeo a swarago phuthego ka yona. (1 Bakor. 15:27) Le gona Jehofa o neile monna boikarabelo bja go etelela lapa pele. Eupša monna o tlo ikarabela go Jehofa le Jesu ka tsela yeo a swarago lapa la gagwe.—1 Pet. 3:7.
4. Jehofa le Jesu ba na le matla a go dira’ng?
4 Ka ge Jehofa e le Hlogo ya rena ka moka, o na le matla a go re beela melao le go kgonthišetša gore re a ekwa. (Jes. 33:22) Le gona ka ge Jesu e le hlogo ya phuthego, o na le matla a go re beela melao le go kgonthišetša gore re a ekwa.—Bagal. 6:2; Bakol. 1:18-20.
5. Ngwanabo rena yo e lego hlogo ya lapa o na le boikarabelo bofe, eupša ke’ng seo a sa swanelago go se dira?
5 Go swana le Jehofa le Jesu, ngwanabo rena yo e lego hlogo ya lapa, le yena o na le matla a go beela ba lapa la gagwe melao. (Baroma 7:2; Baef. 6:4) Eupša matla a gagwe go na le moo a felelago gona. Ka mohlala, o swanetše go beela lapa la gagwe melao yeo e dumelelanago le melao ya motheo ya Beibele. (Die. 3:5, 6) Le gona ga se a swanela go beela batho bao e sego ba lapa la gagwe melao. (Baroma 14:4) Taba e nngwe ke gore ge bana ba gagwe ba godile gomme ba etšwa ka gae ba eya malapeng a bona, ba tlo no tšwela pele ba mo hlompha eupša yena ga a sa na matla a go ba beela melao.—Mat. 19:5.
KE KA BAKA LA ENG JEHOFA A NEILE BA BANGWE MAIKARABELO A GO ETELELA PELE?
6. Ke ka baka la’ng Jehofa a neile batho ba bangwe maikarabelo a go etelela ba bangwe pele?
6 Jehofa o neile ba bangwe boikarabelo bja go etelela ba bangwe pele ka gobane a rata lapa la gagwe. Jehofa o a tseba gore go dira bjalo go tlo thuša gore ka lapeng la gagwe go be le khutšo le thulaganyo. (1 Bakor. 14:33, 40) Ge nkabe Jehofa a se a kgetha batho ba itšego gore ba etelele ba bangwe pele, ka lapeng la gagwe go be go tlo ba le tlhakahlakano e bile batho ba be ba ka se thabe. Ka mohlala, batho ba be ba ka se tsebe gore ke mang yo a swanetšego go dira diphetho.
7. Na go ya ka Baefeso 5:25, 28, Jehofa o be a nyaka gore banna ba gatelele basadi ba bona?
7 Ge e ba taba ya gore Jehofa o kgethile banna gore e be dihlogo tša malapa e le e botse, gona ke ka baka la’ng basadi ba bangwe ba ikwa eka banna ba bona ba a ba gatelela? Bothata ke gore banna ba bantši ba rata go latela setšo le go dira dilo ka tsela yeo ba godišitšwego ka yona go e na le go latela melao ya Jehofa. Le gona, banna ba bangwe ba swara basadi ba bona gampe e le gore ba ba bontšhe gore ba na le matla. Ka mohlala, monna a ka swara mosadi wa gagwe gampe goba a mo gatelela e le feela gore a bontšhe batho ba bangwe gore ka lapeng la gagwe seeta go lla sa gagwe. Monna yoo a ka ipotša gore ga a na taba le gore mosadi wa gagwe o a mo rata goba ga a mo rate, se segolo ke ge a ka mo tšhaba e le gore a tle a kgone go mo laola. * Mekgwa e bjalo ke e mebe e bile ga e bontšhe go hlompha basadi. Jehofa le yena ga a e rate.—Bala Baefeso 5:25, 28.
MONNA A KA DIRA ENG GORE E BE HLGO YA LAPA E BOTSE?
8. Monna a ka dira’ng gore e be hlogo ya lapa e botse?
8 Monna a ka ba hlogo ya lapa e botse ge a ka ekiša tsela yeo Jehofa le Jesu ba dirišago matla a bona. Ga bjale re tlo bolela ka dika tše pedi feela tšeo Jehofa le Jesu ba nago le tšona, ke moka re bone kamoo monna a ka bontšhago dika tšeo ka lapeng la gagwe.
9. Jehofa o bontšha bjang gore o ikokobeditše?
9 Boikokobetšo. Jehofa o bohlale go feta batho ka moka, eupša o theetša bahlanka ba gagwe. (Gen. 18:23, 24, 32) E bile o kile a dumelela bahlanka ba gagwe gore ba mo nee ditšhišinyo. (1 Dikg. 22:19-22) Jehofa ga a na sebe e bile ga a dire diphošo, eupša o a tseba gore rena re tlo fela re dira diphošo ka ge re belegwe re na le sebe. Ka gona, ga a lebelele diphošo tša rena kudu, eupša o re thuša gore re kgone go mo hlankela. (Ps. 113:6, 7) E bile Beibele e re Jehofa ke “mothuši” wa rena. (Ps. 27:9; Baheb. 13:6) Kgoši Dafida o ile a re ka ge Jehofa a ikokobeditše, o ile a mo thuša go phetha boikarabelo bja gagwe.—2 Sam. 22:36.
10. Jesu o ile a bontšha bjang gore o na le boikokobetšo?
10 Nagana ka mohlala wa Jesu. Le ge e be e le moetapele wa barutiwa ba gagwe, o ile a ba hlapiša maoto. Ke ka baka la’ng Jehofa a ile a dumelela gore taba ye e ngwalwe ka Beibeleng? Le lengwe la mabaka ke gore batho ba ithute mohlaleng wa Jesu go akaretša le dihlogo tša malapa. Jesu o ile a re: “Ke le beetše mohlala gore go etša ge ke dirile go lena, le lena le dire bjalo.” (Joh. 13:12-17) Le ge Jesu a be a na le matla, ga se a ka a letela gore batho ba bangwe ba mo hlankele. Eupša yena o ile a ba hlankela.—Mat. 20:28.
Monna a ka bontšha gore o ikokobeditše le gore o na le lerato ka go dira mešongwana ya ka gae le go thuša mosadi wa gagwe go ba le segwera se sebotse le Jehofa (Bona serapa 11 le 13)
11. Hlogo ya lapa e ka ekiša Jehofa le Jesu bjang tabeng ya go bontšha boikokobetšo?
11 Seo re ithutago sona. Monna yo e lego hlogo ya lapa a ka bontšha boikokobetšo ka ditsela tše dintši. Ka mohlala, o a tseba gore mosadi wa gagwe le bana ba gagwe ba tlo fela ba dira diphošo. Ka gona ga a šalašale diphošo tšeo morago. O theetša dilo tšeo mosadi wa gagwe le bana ba gagwe ba di bolelago gaešita le ge a sa dumelelane le tšona. Marley yo a dulago United States o re: “Nna le monna wa ka re fela re sa bone dilo go swana. Eupša o boledišana le nna pele a dira diphetho. Ke leboga gore o a ntlhompha e bile o bona ke le bohlokwa.” Le gona, monna yo a ikokobeditšego o dira mešongwana ya ka gae gaešita le ge lefelong leo a dulago go lona batho ba re mešomo yeo ke ya basadi. Go ka no se be bonolo go dira seo. Ka baka la’ng? Kgaetšedi Rachel o re: “Mo ke tšwago gona, ge monna a ka thuša mosadi wa gagwe go hlatswa dibjana goba go hlwekiša ka gae, baagišani ba gagwe le ba leloko ba ka nagana gore ga se monnanna e bile o laolwa ke mosadi wa gagwe.” Ge e ba le wena moo o dulago gona batho ba bantši ba nagana bjalo, o ka thušwa ke’ng? O ka thušwa ke go gopola gore Jesu le yena o ile a hlapiša barutiwa ba gagwe maoto le ge mošomo woo gantši o be o swanetše go dirwa ke bahlanka. Monnanna ga a tshwenyege ka gore batho ba tlo reng, eupša o nyaka go thabiša mosadi wa gagwe le bana ba gagwe. Re boletše ka boikokobetšo, eupša ke seka sefe se sengwe gape seo monna a swanetšego go se bontšha ka lapeng?
12. Lerato le dira gore Jehofa le Jesu ba dire’ng?
12 Lerato. Dilo ka moka tšeo Jehofa a di dirago, o di dira ka baka la lerato. (1 Joh. 4:7, 8) Jehofa o bontšhitše gore o a re rata ka go re nea Lentšu la gagwe e lego Beibele le ka go diriša mokgatlo wa gagwe go re hlokomela. Jehofa o re bontšha gore re bohlokwa go yena ka go dula a re gopotša gore o a re rata. E bile o bontšha gore o a re hlokomela “ka go re nea ka mo go humilego dilo tšohle tšeo re di thabelago.” (1 Tim. 6:17) Ge re dira diphošo, Jehofa ga a re hlape diatla eupša o dula a re phošolla ka tsela e lerato. Ka ge Jehofa a re rata, o re neile sehlabelo sa Jesu sa topollo. Jesu le yena o bontšhitše gore o a re rata ka go re hwela. (Joh. 3:16; 15:13) Ga go na selo le ge e le sefe seo se ka dirago gore Jehofa le Jesu ba se sa rata batho bao ba botegago.—Joh. 13:1; Baroma 8:35, 38, 39.
13. Ke ka baka la’ng go le bohlokwa gore monna a bontšhe mosadi wa gagwe le bana ba gagwe gore o a ba rata? (Bona le lepokisi leo le rego “ Monna yo a sa Tšwago go Nyala a ka Dira Eng Gore Mosadi wa Gagwe a mo Hlomphe?”)
13 Seo re ithutago sona. Dilo ka moka tšeo monna yo e lego hlogo ya lapa a di dirago o swanetše go di dira ka lerato. Ke ka baka la’ng seo se le bohlokwa? Moapostola Johane o araba ka gore: “Yo a sa ratego ngwanabo yo a mmonago [goba lapa la gagwe leo a le bonago], a ka se rate Modimo yo a sa kago a mmona.” (1 Joh. 4:11, 20) Monna yo a ratago lapa la gagwe o ekiša Jehofa le Jesu ka go thuša ba lapa la gagwe gore ba dule ba na le segwera se sebotse le Jehofa, gore ba ikwe ba le bohlokwa e bile o a ba hlokomela. (1 Tim. 5:8) O tlo ruta bana ba gagwe a ba a ba kgala ge ba dira diphošo. Le gona o tlo dira diphetho tšeo di bontšhago gore o hlompha Jehofa le go rata lapa la gagwe. Ga bjale a re boleleng ka dilo tše tšeo monna a swanetšego go di dira le kamoo a ka bontšhago gore o ekiša Jehofa le Jesu.
HLOGO YA LAPA E SWANETŠE GO DIRA ENG?
14. Monna a ka thuša bjang ba lapa la gagwe gore ba be le segwera se sebotse le Jehofa?
14 Monna o swanetše go thuša lapa la gagwe go ba le segwera se sebotse le Jehofa. Jesu o ile a bontšha gore o ekiša Jehofa ka go thuša barutiwa ba gagwe gore ba be le tumelo e tiilego. (Mat. 5:3, 6; Mar. 6:34) Monna le yena o swanetše go ekiša Jesu ka go thuša ba lapa la gagwe go ba le segwera se sebotse le Jehofa. (Doit. 6:6-9) A ka dira seo ka go kgonthišetša gore o ithuta Beibele le ba lapa la gagwe, ba ya dibokeng le tšhemong mmogo e bile ba dula ba gwerane le Jehofa.
15. Monna a ka bontšha bjang ba lapa la gagwe gore ba bohlokwa go yena?
15 Monna o swanetše go dira gore ba lapa la gagwe ba ikwe ba le bohlokwa. Jehofa o ile a botša Jesu gore o a mo rata pele ga batho ba bangwe. (Mat. 3:17) Jesu le yena o ile a bontšha gore o rata barutiwa ba gagwe ka go ba botša gore o a ba rata le ka go ba swara gabotse. Le bona ba ile ba bontšha gore ba a mo rata. (Joh. 15:9, 12, 13; 21:16) Monna a ka bontšha mosadi wa gagwe le bana ba gagwe gore o a ba rata ka dilo tšeo a di dirago, go swana le ka go ithuta le bona Beibele. Le gona o swanetše go ba botša gore o a ba rata le go ba botša gore ba bohlokwa go yena. E bile o swanetše go ba reta pele ga batho ba bangwe, eupša a dire seo ka temogo.—Die. 31:28, 29.
Ge monna a nyaka go thabiša Jehofa, o swanetše go šoma ka thata gore a hlokomele lapa la gagwe (Bona serapa 16)
16. Ke’ng se sengwe seo monna a swanetšego go se dira, eupša ke’ng seo a sa swanelago go se dira?
16 Monna o swanetše go hlokomela lapa la gagwe. Jehofa o ile a no dula a hlokomela Baisiraele le ge a be a ba otlile ka ge ba be ba sa mo kwe. (Doit. 2:7; 29:5) Le gona Jehofa o a re hlokomela lehono. (Mat. 6:31-33; 7:11) Jesu le yena o ile a hlokomela batho bao ba bego ba mo latela ka go ba nea dijo. (Mat. 14:17-20) Le gona, o ile a fodiša le balwetši. (Mat. 4:24) Ge monna a nyaka go thabiša Jehofa, o swanetše go hlokomela lapa la gagwe. Eupša go na le selo seo a sa swanelago go se dira. Ga se a swanela go fetša nako e ntši a le mošomong moo a se sa fetšago nako le ba lapa la gagwe le go ba thuša gore ba dule ba na le segwera se sebotse le Jehofa.
17. Jehofa le Jesu ba re ruta le go re phošolla bjang?
17 Monna o swanetše go ruta ba lapa la gagwe le go ba phošolla. Jehofa o a re ruta le go re phošolla ka gobane o nyaka gore dilo di re sepelele gabotse. (Baheb. 12:7-9) Ka ge Jesu e le hlogo ya phuthego, o ekiša Jehofa ka go re ruta ka tsela e lerato. (Joh. 15:14, 15) O re nea keletšo ka tsela e botho. (Mat. 20:24-28) Le gona o a kwešiša gore ka ge re belegwe re na le sebe, re tlo dula re dira diphošo.—Mat. 26:41.
18. Monna o swanetše go dula a gopola’ng?
18 Monna yo a ekišago Jehofa le Jesu o dula a gopola gore mosadi wa gagwe le bana ba gagwe ba tlo fela ba dira diphošo. Ge ba dirile diphošo ga a “ba [galefele] o šoro.” (Bakol. 3:19) Eupša o diriša keletšo yeo e lego go Bagalatia 6:1, gomme a leka go ba phošolla ka “moya wa boleta” a gopola gore le yena o fela a dira diphošo. O ekiša Jesu ka go ba beela mohlala, go e na le go dula a ba botša gore ba dire eng.—1 Pet. 2:21.
19-20. Monna a ka ekiša Jehofa le Jesu bjang ge a dira diphetho?
19 Monna o swanetše go dira diphetho a naganne le ka lapa la gagwe. Jehofa o dira diphetho tšeo di holago ba bangwe. Ka mohlala, le ge a be a sa gapeletšege go re bopa, o ile a re bopa e le gore re tle re thabele bophelo. Ga go na motho yo a mo gapeleditšego gore a romele Jesu gore a tle a re hwele. Eupša o dirile bjalo ka gobane a nyaka go re thuša. Jesu le yena o ile a dira diphetho tšeo di ilego tša hola batho ba bangwe. (Baroma 15:3) Ka mohlala, ge a be a lapile o ile a kgetha go se khutše e le gore a kgone go ruta lešaba la batho ka Modimo.—Mar. 6:31-34.
20 Monna o a tseba gore ga go bonolo go dira diphetho tšeo di tlago go hola lapa, ka baka leo o šoma ka thata gore a dire diphetho tše dibotse. Ga a laolwe ke maikwelo ge a dira diphetho. Go e na le moo, o dumelela Jehofa gore a mo hlahle ge a dira diphetho. * (Die. 2:6, 7) Ge a dira bjalo o bontšha gore o naganela ba lapa la gagwe e sego yena feela.—Bafil. 2:4.
21. Re tlo araba dipotšišo dife sehlogong se se latelago?
21 Jehofa o file banna bao e lego dihlogo tša malapa boikarabelo bjo bogolo. O nyaka gore ba dire sohle seo ba ka se kgonago go phetha boikarabelo bjoo. Ge monna a ekiša Jehofa le Jesu, o tlo ba hlogo ya lapa e botse. Le gona, ge mosadi le yena a phetha boikarabelo bja gagwe bja ka lapeng, lapa la bona e tlo ba leo le thabilego. Mosadi o swanetše go dira’ng go bontšha gore o hlompha bohlogo bja monna wa gagwe? Le gona ke dilo dife tšeo di ka dirago gore go be thata gore a hlomphe monna wa gagwe? Re tlo araba dipotšišo tše sehlogong se se latelago.
KOPELO 16 Retang Jah ka Baka la Morwa wa Gagwe
^ ser. 5 Ge monna a nyala, o ba hlogo ya lapa. Sehlogong se re tlo ithuta gore Jehofa o neile banna boikarabelo bofe, gore ke ka baka la eng a ba neile bjona le gore ba ka ekiša Jehofa le Jesu bjang ge ba phetha boikarabelo bjoo. Sehlogong se se latelago re tlo ithuta gore banna le basadi ba ka ithuta eng go Jesu le bathong ba bangwe ba ka Beibeleng. Sehlogong sa boraro re tlo ithuta gore bana babo rena ba ka phetha bjang boikarabelo bja bona ka phuthegong.
^ ser. 7 Dimubi tše dintši, ditori le dipuku tše dingwe, di bontšha gore ga se phošo ge monna a swara mosadi wa gagwe gampe e bile a mmetha. Seo se dira gore batho ba nagane gore ga se phošo ge monna a gatelela mosadi wa gagwe.
^ ser. 20 Gore o kwe kamoo o ka dirago diphetho tše dibotse, bala sehlogo seo se rego “Dira Diphetho Tšeo di Tumišago Modimo,” seo se lego ka go Morokami wa April 15, 2011, matl. 13-17.
