Перейти к основным материалам

Перейти к содержанию

5 АХУРГӔНӔН СТАТЬЯ

«Алли нӕлгоймагӕн дӕр ӕ хецау ӕй Киристе»

«Алли нӕлгоймагӕн дӕр ӕ хецау ӕй Киристе»

«Алли нӕлгоймагӕн дӕр ӕ хецау ӕй Киристе» (1 КОР. 11:3).

12 ЗАР ’Стур Хуцау Йеговӕ

РАЗДЗУРД *

1. Берӕ нӕлгоймӕгтӕ сӕ бийнонтӕн куд фӕуунцӕ ӕма цӕмӕн?

БИЙНОНТИ хестӕр цӕхуӕн гъӕуама уа? Берӕ нӕлгоймӕгтӕ сӕ бийнойнӕгти гъуди нӕ фӕннимайунцӕ, уомӕн ӕма сӕхуӕдтӕ ци бийнонти исирӕзтӕнцӕ, уоми дӕр уотӕ адтӕй, удта сӕ адӕни ӕгъдау дӕр уотӕ ӕй. Европӕй еу хуӕрӕ Янитӕ загъта: «Ӕз кӕми цӕрун, уоми хӕдзари силгоймаг цагъарӕй уӕлдай нӕй. Ӕма сӕмӕ еугурӕйдӕр гъе уӕхӕн цӕстӕй кӕсунцӕ». Еугонд Штаттӕй ӕнсувӕр Люк ба зӕгъуй: «Еуӕй-еу нӕлгоймӕгтӕ сӕ фурттӕн уотӕ фӕззӕгъунцӕ, силгоймаг, дан, гъӕуама ӕ бунат зона, ӕма ’й ку неке фӕрса, уӕд ӕ цъухбӕл хуӕца». Фал Йегови нӕ фӕндуй, цӕмӕй нӕлгоймаг ӕ бийнойнагмӕ уӕхӕн цӕстӕй кӕса. (Рабарӕ Марки 7:13.) Мадта лӕгтӕн сӕ бон ци ӕй кӕнун, цӕмӕй хуарз бийнонти хестӕртӕ уонцӕ?

2. Нӕлгоймаг ци гъӕуама балӕдӕра ӕма цӕмӕн?

2 Цӕмӕй нӕлгоймаг ӕ бийнонтӕн хуарз хестӕр исуа, уой туххӕй гъӕуама фиццагидӕр балӕдӕра, Йеговӕ си ци агоруй, уой, удта ин фулдӕр бартӕ лӕвӕрд цӕмӕн ӕрцудӕй, уой дӕр. Уомӕй уӕлдай ма гъӕуама Йеговӕй ӕма Йесойӕй дӕр ахур кӕна. Е ӕхсидзгӕ цӕмӕн ӕй? Уомӕн ӕма Йегови уотӕ фӕндуй, цӕмӕй нӕлгоймӕгтӕ раст пайда кӕнонцӕ, ци бартӕ син лӕвӕрд ӕрцудӕй, уонӕй (Лук. 12:48б).

ЙЕГОВӔ Ӕ БИЙНОНТӔН ЦӔХУӔН ӔГЪДАУ ӔРФЕДАР КОДТА?

3. 1 Коринфӕгтӕмӕ 11:3 куд финст ӕй, уомӕ гӕсгӕ Йеговӕ ӕ бийнонтӕн цӕхуӕн ӕгъдау ӕрфедар кодта?

3 Бакӕсӕ 1 Коринфӕгтӕмӕ 11:3. Аци стихи финст ӕй, Йеговӕ уӕлӕрвти ӕма зӕнхӕбӕл ӕ бийнонтӕн цӕхуӕн ӕгъдау ӕрфедар кодта, е. Йеговӕ ӕй хецау, ӕма еугур бартӕ дӕр уой къохти ’нцӕ. Е ӕ сувӕллӕнттӕн, гъома изӕдтӕн дӕр ӕма адӕнӕн дӕр равардта цӕхуӕндӕр бартӕ. Фал сӕ бартӕй куд пайда кӕнунцӕ, уой туххӕй ба дзуапп дӕттунцӕ Йегови рази (Ром. 14:10; Еф. 3:14, 15). Йеговӕ Йесой исӕвардта ӕмбурди хестӕрӕй. Фал Йесо ӕ бартӕй куд пайда кӕнуй, уой туххӕй ба дзуапп дӕттуй Йегови рази (1 Кор. 15:27). Нӕлгоймаги ба Йеговӕ исӕвардта бийнонти хестӕрӕй, фал нӕлгоймаг ӕ бийнойнагӕн ӕма ӕ сувӕллӕнттӕн куд ӕй, уой туххӕй дзуапп дӕттуй Йегови рази дӕр ӕма Йесой рази дӕр (1 Пет. 3:7).

4. Йеговӕ ӕма Йесойӕн цӕхуӕн барӕ ес?

4 Ӕгас бартӕ дӕр Йегови къохти ке ’нцӕ, уомӕ гӕсгӕ ӕ бон ӕй ӕ сувӕллӕнттӕн закъӕнттӕ ӕвӕрун ӕма сӕ куд ӕнхӕст кӕнунцӕ, уомӕ ӕ цӕстӕ дарун (Ис. 33:22). Йесо ба ӕй ӕмбурди хестӕр. Ӕма уой бон дӕр ӕй закъӕнттӕ ӕвӕрун ӕма сӕ куд ӕнхӕст кӕнӕн, уомӕ кӕсун (Гал. 6:2; Кол. 1:18–20).

5. Бийнонти хестӕрӕн цӕхуӕн бартӕ ес ӕма сӕ ӕнӕкӕрон исхонӕн ес?

5 Бийнонти хестӕрӕн дӕр Йегови ӕма Йесой хузӕн ес барӕ, цӕмӕй ӕ бийнонти унаффитӕ хӕсса (Ром. 7:2; Еф. 6:4). Фал ӕ бартӕ ӕнӕкӕрон нӕ ’нцӕ. Зӕгъӕн, ци унаффитӕ рахӕссуй, етӕ гъӕуама Хуцауи Дзурдмӕ гӕсгӕ уонцӕ (Ӕмб. 3:5, 6). Удта ин уӕхӕн барӕ дӕр нӕййес, цӕмӕй ӕ бийнонтӕй ка нӕй, уонӕн унаффӕ кӕна (Ром. 14:4). Уомӕ уӕлдай ма ӕ сувӕллӕнттӕй ка исустур ӕй ӕма хецӕнӕй ка цӕруй, уонӕбӕл дӕр ӕ барӕ нӕбал цӕуй. Фал ӕй етӕ уӕддӕр гъӕуама нимайонцӕ (Матф. 19:5).

ЙЕГОВӔ КӔМӔНДӔРТИ БАРТӔ ЦӔМӔН РАВАРДТА?

6. Йеговӕ кӕмӕндӕрти бартӕ цӕмӕн равардта?

6 Йеговӕ кӕмӕндӕрти бартӕ равардта, ӕ бийнонти ке уарзуй ӕма син сӕ хуарзбӕл ке тухсуй, уой туххӕй. Уой фӕрци ӕ бийнонти астӕу ес фарнӕ ӕма си алцидӕр ӕй уагӕ ӕма ӕгъдаубӕл (1 Кор. 14:33, 40). Ӕнӕ уомӕй амондгун н’ адтайанӕ, уомӕн ӕма ’й нӕ зудтайанӕ, цӕхуӕндӕр гъуддӕгти фӕдбӕл унаффӕ ка гъӕуама рахӕсса ӕма еци гъуддӕгтӕ кӕронмӕ ка гъӕуама искӕна, уой.

7. Ефесӕгтӕмӕ 5:25, 28 куд финст ӕй, уомӕ гӕсгӕ Йегови куд фӕндуй, цӕмӕй нӕлгоймӕгтӕ сӕ уоститӕн уонцӕ?

7 Йеговӕ силгоймаги сӕргъи нӕлгоймаги ке исӕвардта, е кӕд раст ӕй, уӕд уотӕ берӕ силгоймӕгтӕ сӕ лӕгтӕй ӕфхуӕрд цӕмӕн ӕййафунцӕ? Гъуддаг уой медӕги ӕй, ӕма еци нӕлгоймӕгтӕ, Йеговӕ куд зӕгъуй, уотӕ архайуни бӕсти бунӕттон ӕгъдӕуттӕмӕ гӕсгӕ архайунцӕ. Еуӕй-еу нӕлгоймӕгтӕ сӕ уостити ӕфхуӕргӕ ке фӕккӕнунцӕ, уомӕй сӕхемӕ лӕгдӕр фӕккӕсунцӕ *. Уотӕ дӕр ма фӕссагъӕс кӕнунцӕ: «Кӕд мӕ нӕ уарзуй, уӕд ми уӕддӕр тӕрсгӕ кӕнӕд». Фал Йеговӕ силгоймӕгти ӕфхуӕруни барӕ некӕмӕн равардта. Уой фӕндуй, цӕмӕй лӕгтӕ сӕ уостити уарзонцӕ ӕма сӕ нимайонцӕ. (Бакӕсӕ Ефесӕгтӕмӕ 5:25, 28.)

НӔЛГОЙМАГ ХУАРЗ БИЙНОНТИ ХЕСТӔР ЦӔЙ ФӔРЦИ УОДЗӔЙ?

8. Нӕлгоймагӕн ӕ бон ци ӕй кӕнун, цӕмӕй хуарз бийнонти хестӕр уа?

8 Нӕлгоймаг хуарз бийнонти хестӕр уодзӕй, ӕ бартӕй Йеговӕ ӕма Киристей хузӕн ку пайда кӕна, уӕд. Ӕркӕсӕн Йеговӕ ӕма Йесой менеугутӕй дууемӕ ӕма радзорӕн, бийнонти хестӕрти бон куд ӕй еци менеугутӕ ӕвдесун, уобӕл.

9. Йеговӕ сӕрниллӕг ке ӕй, е цӕмӕй бӕрӕг ӕй?

9 Сӕрниллӕгдзийнадӕ. Йеговӕй зундгиндӕр Дун-дуйней неке ес, фал уӕддӕр ӕ лӕггадгӕнгути гъудимӕ байгъосуй (Райд. 18:23, 24, 32). Ести унаффӕ ку фӕххӕссуй, уӕд уонӕн дӕр дзурди барӕ раттуй (1 Пад. 22:19–22). Йеговӕ алцӕмӕйдӕр ӕнхӕст ӕй, фал махӕй ба ӕнхӕстдзийнадӕ нӕ агоруй. Ӕнхус дӕр ма нин кӕнуй, цӕмӕй ӕнтӕстгун уӕн (Пс. 113:6, 7). Библий Йегови туххӕй финст ӕй, «е ӕй ӕнхусгӕнӕг», зӕгъгӕ (Пс. 27:9; Дзиуит. 13:6). Паддзах Давид дӕр ӕй лӕдӕрдтӕй, Йеговӕ ин ӕ барӕ ци устур гъуддӕгтӕ бакодта, уонӕй ӕрмӕстдӕр Йегови сӕрниллӕгдзийнади фӕрци ке исхайгин ӕй (2 Сам. 22:36).

10. Киристе куд бавдиста, сӕрниллӕг ке адтӕй, уой?

10 Йесо дӕр сӕрниллӕг адтӕй. Кӕд хецау ӕма ахургӕнӕг адтӕй, уӕддӕр ӕ ахуркӕнуйнӕгтӕн сӕ къӕхтӕ нихснадта. Цума Йеговӕ аци хабар Библий цӕмӕн ниффинсун кодта? Цӕмӕй бийнонти хестӕртӕ дӕр, удта иннетӕ дӕр Йесой фӕнзонцӕ. Йесо ӕхуӕдӕг загъта: «Ӕз уин бавдистон, куд гъӕуама кӕнайтӕ, уой, цӕмӕй уин ӕз куд бакодтон, уотӕ кӕнайтӕ сумах дӕр» (Иоан. 13:12–17). Кӕд Йесомӕ устур бартӕ адтӕй, уӕддӕр уомӕ не ’нгъӕлмӕ кастӕй, цӕмӕй ин иннетӕ лӕггадӕ кӕнонцӕ, фал ӕхуӕдӕг иннетӕн лӕггадӕ кодта (Матф. 20:28).

Бийнонти хестӕр сӕрниллӕг ке ӕй ӕма ӕ бийнонти ке уарзуй, уой бавдесдзӕй, хӕдзари куститӕ ӕ сӕрмӕ ку хӕсса ӕма ӕ бийнонти ӕууӕндундзийнадӕ ку федар кӕна, уӕд (кӕсӕ 11 ӕма 13 абзацтӕ)

11. Йеговӕ ӕма Йесо куд сӕрниллӕг ӕнцӕ, уомӕй сӕ бийнонти хестӕрти бон куд ӕй фӕнзун?

11 Цӕбӕл ахур кӕнӕн. Бийнонти хестӕр сӕрниллӕг ке ӕй, уой ӕ бон куд ӕй бавдесун? Зӕгъӕн, ӕ бийнойнагӕй ӕма ӕ сувӕллӕнттӕй ӕнхӕстдзийнадӕ ку нӕ агора. Е син сӕ гъудимӕ алкӕддӕр байгъосдзӕй, ӕ хӕццӕ арази ку нӕ уонцӕ, уӕдта сӕмӕ мӕстгун нӕ кӕндзӕй. Хуӕрӕ Марли цӕруй Еугонд Штатти ӕма уотӕ зӕгъуй: «Мӕ сӕрихецауи хӕццӕ алкӕд еу хузи нӕ фӕгъгъуди кӕнӕн. Фал ӕй зонун, ке мин аргъ кӕнуй ӕма мӕ ке нимайуй, уой. Ести унаффӕ рахӕссуни размӕ мӕ алкӕддӕр бафӕрсуй, ци гъуди кӕнун, уобӕл, ӕма ин ци фӕззӕгъун, уобӕл лӕмбунӕг расагъӕс кӕнуй». Уомӕй уӕлдай ма сӕрниллӕг сӕрихецау хӕдзари куститӕ дӕр фӕккӕнуй, кӕд, кӕми цӕруй, уоми етӕ силгоймаги куститӕбӕл нимад ӕнцӕ, уӕддӕр. Е алкӕд ӕнцон нӕ фӕууй. Цӕмӕннӕ? Хуӕрӕ Рейчел загъта: «Ӕз кӕми цӕрун, уоми лӕг къостӕ ӕхснунмӕ кенӕ ӕфснайунмӕ ку ӕнхус кӕна, уӕд хеуӕнттӕ ӕма синхӕнттӕ зӕгъдзӕнцӕ, айӕ циуавӕр лӕг ӕй, зӕгъгӕ. Уотӕ сӕмӕ кӕсдзӕй, ӕма уоси ӕ сӕрбӕл исбадун кодта». Кӕд сумахмӕ дӕр адӕн уотӕ гъуди кӕнунцӕ, уӕд ма иронх кӕнӕ, Киристе ӕ апостолтӕн сӕ къӕхтӕ ке нихснадта, кӕд е цагъари куст адтӕй, уӕддӕр. Хуарз бийнонти хестӕр, ӕ бийнойнагӕн ӕма ӕ сувӕллӕнттӕн куд хуӕздӕр уа, уобӕл сагъӕс кӕнуй, иннетӕ си ци зӕгъдзӕнцӕ, уобӕл нӕ, фал. Бийнонти хестӕрмӕ ма сӕрниллӕгдзийнадӕй уӕлдай цӕхуӕн менеуӕг гъӕуама уа?

12. Йеговӕ ӕма нӕ Йесо ке уарзунцӕ, е цӕмӕй бӕрӕг ӕй?

12 Уарзондзийнадӕ. Йеговӕн ӕ уарзондзийнадӕ ӕ алли гъуддагӕй дӕр зиннуй (1 Иоан. 4:7, 8). Ке нӕ уарзуй ӕма ’й уотӕ ке фӕндуй, цӕмӕй е ’мбӕлттӕ уӕн, е бӕрӕг ӕй, ӕ Дзурд Библи нин ке равардта ӕма нӕ ӕ организацимӕ ке ӕрбакодта, уомӕй. Йеговӕ нин ӕй зӕгъгӕ дӕр кӕнуй, хъазар ин ке ан, уой. Ӕнӕмӕнгӕй нӕ ци гъӕуй царди, уомӕй дӕр нӕ цох нӕ уадзуй. Библи зӕгъуй, «цийнӕдзийнадӕ нин цидӕриддӕр хӕссуй, уой нин рӕдауӕй» ке дӕттуй (1 Тим. 6:17). Ку фӕррӕдуйӕн, уӕд нин зунд байамонуй, фал нӕ уой туххӕй минкъийдӕр уарзун нӕ райдайуй. Йеговӕ нӕ берӕ ке уарзуй, уомӕ гӕсгӕ ӕ Фурти нивонди ӕрхаста. Йесо дӕр нӕ берӕ уарзуй, е ба ӕ цард мах туххӕй нӕ бавгъау кодта (Иоан. 3:16; 15:13). Йеговӕ ӕма Йесобӕл еузӕрдон ку уӕн, уӕд нӕ сӕ уарзондзийнадӕй неке ӕма неци рахецӕн кӕндзӕй (Иоан. 13:1; Ром. 8:35, 38, 39).

13. Бийнонти хестӕр ӕ бийнонти ке уарзуй, уой гъуддагӕй цӕмӕн гъӕуама ӕвдеса? (Кӕсӕ ма рамкӕ « Бийнонтӕ ка искодта, еци нӕлгоймагӕн ӕ бон ци ӕй кӕнун, цӕмӕй ӕй ӕ бийнойнаг нимайа?».)

13 Цӕбӕл ахур кӕнӕн. Нӕлгоймаг ӕ бийнонти ке уарзуй, е гъӕуама ӕ алли гъуддагӕй дӕр зинна. Е ӕхсидзгӕ цӕмӕн ӕй? Апостол Иоанн загъта: «Ке уинуй, еци ӕнсувӕри [кенӕ бийнонти] ка нӕ уарзуй, уомӕн ӕ бон куд ӕй, ке нӕ уинуй, еци Хуцауи уарзун?» (1 Иоан. 4:11, 20). Ӕ бийнонти ка уарзуй, удта Йеговӕ ӕма Йесой фӕнзун ке фӕндуй, уӕхӕн лӕг ӕ бийнонти ӕууӕндундзийнадӕ федар кӕндзӕй ӕма син лӕдӕрун кӕндзӕй, ке сӕ уарзуй, уой, удта сӕ дардзӕй (1 Тим. 5:8). Ӕ сувӕллӕнтти дӕр ахур кӕндзӕй ӕма син зунд амондзӕй. Удта ма архайӕдзӕй, цӕмӕй ци унаффитӕ рахӕссуй, етӕ Йеговӕн кадӕ хӕссонцӕ ӕма ӕ бийнонтӕн дӕр пайда уонцӕ. Нуртӕккӕ еци гъуддӕгтӕй алкӕцимӕдӕр ӕркӕсдзиан ӕма базондзиан, бийнонти хестӕртӕн сӕ бон куд ӕй Йеговӕ ӕма Киристей фӕнзун.

БИЙНОНТИ ХЕСТӔРБӔЛ ЦӔХУӔН ИХӔСТӔ ЕС?

14. Бийнонти хестӕри бон куд ӕй ӕ бийнонти ӕууӕндундзийнадӕ федар кӕнун?

14 Гъӕуама ӕ бийнонтӕн ӕнхус кӕна, цӕмӕй се ’ууӕндундзийнадӕ федар уа. Йесо ӕ Фиди фӕнзта, ӕма ӕ фӕдбӕлдзӕугутӕн ӕнхус кодта, цӕмӕй се ’ууӕндундзийнадӕ федардӕр кодтайдӕ (Матф. 5:3, 6; Мар. 6:34). Ӕма бийнонти хестӕр дӕр фиццагидӕр гъӕуама сагъӕс кӕна ӕ бийнонти ӕууӕндундзийнадӕбӕл (Дук. з. 6:6–9). Гъӕуама ӕ гъос дара, цӕмӕй ӕ бийнонтӕ Библи кӕсонцӕ, ӕртасонцӕ ’й, ӕмбурдтӕмӕ цӕуонцӕ, хуарз хабар игъосун кӕнонцӕ ӕма Йеговӕмӕ хӕстӕгдӕр кӕнонцӕ, удта еци гъуддӕгтӕ гъӕуама ӕхуӕдӕг дӕр кӕна.

15. Бийнонти хестӕри бон ци ӕй кӕнун, цӕмӕй ӕй ӕ бийнонтӕ лӕдӕронцӕ, ке сӕ уарзуй, уой?

15 Гъӕуама ӕ бийнонтӕн дзора, ке сӕ уарзуй, уой. Йеговӕ Йесойӕн фӕззӕгъидӕ, ке ӕй уарзуй, уой (Матф. 3:17). Йесо дӕр ӕ фӕдбӕлдзӕугутӕн дзоридӕ, ке сӕ уарзуй, уой, удта ’й гъуддагӕй дӕр ӕвдиста. Ӕма ’й етӕ дӕр уарзтонцӕ (Иоан. 15:9, 12, 13; 21:16). Бийнонти хестӕр ӕ бийнонти ке уарзуй, уой ӕвдесдзӕй, зӕгъӕн, ӕ бийнонти хӕццӕ Библи ку ӕртаса, уӕд. Гъӕуама син дзора, ке сӕ уарзуй ӕма ин хъазар ке ’нцӕ, уой, уавӕр ку амона, уӕдта сӕ иннети рази ӕстаугӕ дӕр ракӕна (Ӕмб. 31:28, 29).

Бийнонти хестӕр косгӕ ку кӕна ӕма ӕ бийнонтӕ ку дара, уӕд си Йегови зӕрдӕ рохс кӕндзӕй (кӕсӕ 16 абзац)

16. Бийнонти хестӕр ма никкидӕр ци гъӕуама кӕна, фал ӕ зӕрдӕбӕл ци гъӕуама дара?

16 Гъӕуама ӕ бийнонтӕ дара. Йеговӕ израилӕгти цох нӕ уагъта, ӕнӕмӕнгӕй сӕ ци гъудӕй, уонӕй, ӕ дзурдмӕ ин ке нӕ игъустонцӕ, уой туххӕй сӕ ку бафхуӕридӕ, уӕддӕр (Дук. з. 2:7; 29:5). Ӕма абони махбӕл дӕр тухсуй (Матф. 6:31–33; 7:11). Йесо дӕр хуӕруйнаг лӕвардта, ӕ фӕдбӕл ка цудӕй, уонӕн, удта сӕ сӕ незтӕй дӕр дзӕбӕх кодта (Матф. 4:24; 14:17–20). Бийнонти хестӕр дӕр ӕ бийнонтӕбӕл ку тухса, уӕд си Йегови зӕрдӕ рохс кӕндзӕй. Фал гъӕуама еу гъуддаг ма иронх кӕна: ӕ кустбӕл ӕгӕр берӕ рӕстӕг ку цӕуа, уӕд ин ӕ бийнонтӕн рӕстӕг нӕбал изайдзӕй.

17. Йеговӕ ӕма Киристе нӕ куд ахур кӕнунцӕ ӕма нин зунд куд амонунцӕ?

17 Гъӕуама ӕ бийнонтӕн разамунд дӕтта ӕма син зунд амона. Йеговӕ нӕ ахур кӕнуй ӕма нин зунд амонуй, уомӕн ӕма ’й фӕндуй, цӕмӕй амондгун уӕн (Дзиуит. 12:7–9). Йесо дӕр ӕ Фиди хузӕн, ӕ дӕлбарӕ ка ӕй, уони ахур кӕнуй, ку багъӕуй, удта сӕ фӕлмӕнӕй бараст кӕнуй (Иоан. 15:14, 15; Матф. 20:24–28). Зонуй ӕй, ӕнӕнхӕст ке ан ӕма арӕх ке рарӕдуйӕн (Матф. 26:41).

18. Хуарз бийнонти хестӕр ӕ зӕрдӕбӕл ци фӕддаруй?

18 Йеговӕ ӕма Йесой ка фӕнзуй, уӕхӕн бийнонти хестӕр ӕй ӕ зӕрдӕбӕл фӕддаруй, ӕ бийнонтӕ ӕнӕнхӕст ке ’нцӕ, уой. Ӕ бийнойнаги ӕма ӕ сувӕллӕнтти хӕццӕ карзӕй некӕд фӕдздзоруй (Кол. 3:19). Е фӕййархайуй Галатӕгтӕмӕ 6:1 финст дзурдтӕмӕ гӕсгӕ, ӕма ку багъӕуй, уӕд сӕ фӕлмӕнӕй бараст кӕнуй. Иронх си нӕй, ӕхуӕдӕг дӕр ӕнӕнхӕст ке ӕй, е. Йесой хузӕн е дӕр ӕ бийнонтӕн фӕнзуйнаг гъӕуама уа, цӕмӕй сӕ естӕбӕл исахур кӕна (1 Пет. 2:21).

19, 20. Бийнонти хестӕри унаффитӕ хӕссун ку фӕгъгъӕуй, уӕд ӕ бон куд ӕй Йеговӕ ӕма Йесой фӕнзун?

19 Унаффӕ хӕсгӕй гъӕуама ӕ бийнонтӕбӕл сагъӕс кӕна. Йеговӕ ести унаффӕ ку фӕххӕссуй, уӕд алкӕддӕр фӕссагъӕс кӕнуй, иннетӕн куд хуӕздӕр уодзӕй, уобӕл. Зӕгъӕн, адӕни уой туххӕй не сфӕлдиста, цӕмӕй ин ести пайда хӕссонцӕ, фал цӕмӕй етӕ дӕр цардбӕл цийнӕ кӕнонцӕ. Удта ӕ Фурти дӕр зӕнхӕмӕ, адӕнбӕл ке тухстӕй, уой туххӕй рарвиста. Йесо дӕр фиццагидӕр иннетӕбӕл сагъӕс кодта (Ром. 15:3). Зӕгъӕн, еухатт ӕй бауолӕфун фӕндадтӕй, фал имӕ адӕн ку ӕрбацудӕнцӕ, уӕд син ӕртӕрегъӕд кодта ӕма сӕ ахур кӕнун райдӕдта (Мар. 6:31–34).

20 Хуарз бийнонти хестӕр ӕй лӕдӕруй, ӕ бийнонти туххӕй дзуапп ке дӕттуй, уой ӕма раст унаффитӕ хӕссун ӕнцон ке нӕй. Уомӕ гӕсгӕ еци гъуддагмӕ уӕлӕнгай цӕстӕй нӕ кӕсуй. Ӕ сӕри ци фӕммедӕг уй, уомӕ гӕсгӕ унаффитӕ нӕ фӕххӕссуй. Уой фӕндуй, цӕмӕй ӕй Йеговӕ исахур кӕна раст унаффитӕ хӕссун (Ӕмб. 2:6, 7) *. Ӕма гъе уӕд фиццагидӕр иннетӕбӕл сагъӕс кӕндзӕй, ӕхебӕл нӕ, фал (Фил. 2:4).

21. Иннӕ статьяй дзурд цӕбӕл цӕудзӕй?

21 Йеговӕ бийнонти хестӕрӕн ӕ барӕ ци ихӕстӕ бакодта, етӕ ӕнцонӕнхӕстгӕнӕн нӕ ’нцӕ, ӕма сӕ куд ӕнхӕст кӕнуй, уой туххӕй дзуапп дӕттуй Йегови рази. Фал Йеговӕ ӕма Йесой ку фӕнза, уӕд ӕ бийнонтӕн уодзӕй хуарз хестӕр. Ӕма ӕ бийнойнаг дӕр ӕ ихӕстӕ хуарз ку ӕнхӕст кӕна, уӕд уодзӕнцӕ амондгун. Уосӕ ӕ сӕрихецаумӕ ци цӕстӕй гъӕуама кӕса ӕма цӕхуӕн зиндзийнӕдтӕбӕл исӕмбӕлуй? Аци фарстатӕбӕл дзуапп базондзиан иннӕ статьяй.

16 ЗАР Йеговӕн искадӕ кӕнӕ е ’вӕрд Паддзахи туххӕй

^ 5 абз. Нӕлгоймаг уосӕ ку ракоруй, уӕд исуй бийнонти хестӕр. Аци статьяй базондзиан, Йеговӕ нӕлгоймӕгтӕн цӕхуӕн бартӕ равардта ӕма син сӕ цӕмӕн равардта, уой. Удта ма ӕркӕсдзиан, бийнонти хестӕртӕ Йеговӕй ӕма Йесойӕй цӕбӕл ахур кӕнунцӕ, уомӕ. Дуккаг статьяй ба дзурд цӕудзӕй, нӕлгоймӕгтӕ дӕр ӕма силгоймӕгтӕ дӕр Йесойӕй, удта ма Библий ци еузӕрдон лӕггадгӕнгути туххӕй финст ес, уонӕй цӕбӕл ахур кӕнунцӕ, уобӕл. Ӕртиккаг статьяй ба радзордзиан, ӕнсуӕвӕртӕ куд гъӕуама пайда кӕнонцӕ, ӕмбурди син ци бартӕ лӕвӕрд ес, уонӕй.

^ 7 абз. Еуӕй-еухатт киноти, шоути кенӕ ходӕгтӕ кӕми февдесунцӕ, еци телепередачити уӕхӕн гъуди фӕууй, ӕма лӕг ӕ уоси ку ӕфхуӕра, уӕд уоми дессагӕй неци ес. Уомӕ гӕсгӕ беретӕ сӕхуӕдтӕ дӕр уотӕ гъуди кӕнун райдайунцӕ.

^ 20 абз. Хуарз унаффитӕ хӕссӕн куд ес, уой туххӕй фулдӕр базонӕн ес 2011 анзи 15 апрели уагъд «Гъӕуайгӕнӕн мӕсуг»-и, 13–17 фӕрстӕ (урус.).