1. Kiko por influensiá e manera ku un hende hòmber ta mira outoridat?

KIKO ta bin na bo mente ora bo tende e palabra outoridat? Tradishon, kultura i e manera ku un hende hòmber a lanta mayoria di biaha ta influensiá kon e ta trata su esposa i yunan. Yanita, un ruman na Europa, a bisa: “Kaminda mi ta biba, hende ta mira hende muhé inferior na hende hòmber, i komo esklabo. E idea ei ta fuertemente ankrá.” Luke, un ruman ku ta biba na Merka, a bisa: “Algun tata ta siña nan yu hòmbernan ku hende muhé no tin nada di bisa i ku nan opinion no ta konta.” Sinembargo, Yehova no ke pa hende hòmber usa nan outoridat asina. (Kompará ku Marko 7:13.) Pero, kon anto un hende hòmber por siña pa ta un bon kabes di famia?

2. Kiko un kabes di famia mester sa, i dikon?

² Un hende hòmber ku ke ta un bon kabes di famia mester komprondé promé kiko Yehova ta ferwagt di dje. E mester sa tambe dikon Yehova a duna algun persona outoridat riba otro, i kon e por imitá e ehèmpel ku Yehova i Hesus a pone. Dikon ta importante pa un hende hòmber sa tur esei? Pasobra Yehova ta ferwagt p’e usa e outoridat ku el a haña komo kabes di famia bon.—Luk. 12:48b.

3. Di akuerdo ku 1 Korintionan 11:3, kon Yehova a organisá su famia?

³ Lesa 1 Korintionan 11:3. E versíkulo akí ta deskribí e manera ku Yehova a organisá su famia den shelu i riba tera. Debí ku e ta “e kabes,” e tin tur outoridat. Anto el a disidí di duna otronan un grado di outoridat, sinembargo nan tin ku dun’é kuenta i rason pa e manera ku nan ta usa nan outoridat. (Rom. 14:10; Efe. 3:14, 15) Yehova a duna Hesus outoridat riba e kongregashon, pero Hesus  tin ku duna kuenta i rason na Yehova pa e manera ku e ta trata nos. (1 Kor. 15:27) Anto, Yehova tambe a duna hende hòmber outoridat riba su esposa i yunan. Pero, un esposo tin ku duna kuenta i rason na tantu Yehova komo Hesus pa e manera ku e ta trata su famia.—1 Ped. 3:7.

4. Ki derecho Yehova i Hesus tin?

⁴ Komo ku Yehova ta Kabes di su famia universal, e tin derecho di pone regla pa su yunan i hasi sigur ku nan ta obedesé nan. (Isa. 33:22) Komo ku Hesus ta kabes di e kongregashon, e tambe tin derecho di pone regla i hasi sigur ku ta kumpli ku nan.—Gal. 6:2; Kol. 1:18-20.

5. Kiko e outoridat di un kabes di famia ta enserá, i ki límite su outoridat tin?

⁵ Meskos ku Yehova i Hesus, un kabes di famia tin derecho di pone regla pa su famia. (Rom. 7:2; Efe. 6:4) Pero, su outoridat tin límite. Su reglanan mester ta basá riba prinsipio di Beibel. (Pro. 3:5, 6) Anto, e no tin derecho di pone regla pa hende ku no ta forma parti di su famia. (Rom. 14:4) Ora su yunan bira grandi i bai biba riba nan mes, nan ta keda respet’é, ma nan no ta bou di su outoridat mas.—Mat. 19:5.

6. Dikon Yehova a duna algun persona outoridat?

⁶ E echo ku Yehova a duna algun persona outoridat ta demostrá kuantu e ta stima su famia. E areglo ei, ta un regalo ku el a duna nos. Danki na e areglo ei, den Yehova su famia tin pas i tur kos ta kana na un manera ordená. (1 Kor. 14:33, 40) Si niun hende no sa bon kla ken tin outoridat, Yehova su famia lo bira desorganisá i infelis. Niun hende lo no sa ken tin ku tuma e desishon final i ken tin ku kumpli kuné.

7. Segun Efesionan 5:25 i 28, kon Yehova ke pa hende hòmber trata nan esposa?

⁷ Si e areglo di outoridat ta asina bon, dikon hopi hende muhé ta sinti ku nan esposo ta trata nan kruel i ta dominá nan? Esei ta pasobra hopi hende hòmber ta opta pa no sigui e prinsipionan ku Yehova a pone pa famia i ta skohe pa sigui kustumber- i tradishonnan lokal. Tambe nan ta trata nan esposa malu djis pa nan sinti nan mes bon. Por ehèmpel, un esposo kisas ta dominá su esposa pa mustra ku ta é ta manda i pa mustra otro hende ku ta hòmber e ta. Kisas e ta pensa: ‘Mi no por fòrsa mi kasá stima mi, pero a lo ménos mi por lag’é haña miedu di mi. Anto usa esei pa domin’é òf kontrol’é.’ * E tipo di pensamentu i komportashon ei ta kompletamente kontrali di loke Yehova Dios ke. Un esposo ku ta pensa i trata su esposa asina no ta dun’é e rèspèt ku e meresé.—Lesa Efesionan 5:25, 28.

8. Kon un hende hòmber por siña pa ta un bon kabes di famia?

⁸ Si un hende hòmber ke siña pa ta un bon kabes di famia, e mester imitá e manera ku Yehova i Hesus ta usa nan outoridat. Laga nos ban wak dos di nan kualidatnan i mira kon un kabes di famia por imitá nan.

9. Kon Yehova ta demostrá humildat?

 ⁹ Humildat. Apesar ku Yehova ta e Persona di mas sabí den henter universo, tòg e ta skucha opinion di su sirbidónan. (Gén. 18:23, 24, 32) El a permití esnan ku ta bou di su outoridat dun’é sugerensia. (1 Rei. 22:19-22) Aunke Yehova ta perfekto, e no ta ferwagt perfekshon for di nos. Al kontrario, e ta yuda su sirbidónan imperfekto sirbié mas mihó ku nan por. (Sal. 113:6, 7) De echo, Beibel ta deskribí Yehova komo un “ayudante.” (Sal. 27:9; Heb. 13:6) Rei David a rekonosé ku tur loke el a logra tabata danki na Yehova su humildat i yudansa.—Sal. 54:4.

10. Kon Hesus a demostrá humildat?

¹⁰ Wak e ehèmpel di Hesus. Aunke e tabata Señor i Maestro di su disipelnan, el a laba nan pia. Dikon Yehova a laga skirbi e relato ei den Beibel? Pasobra e tabata ke duna tur hende, inkluso kabes di famia, un ehèmpel pa sigui. Hesus mes a bisa: “Mi a duna boso un ehèmpel, pa boso tambe hasi manera mi a hasi ku boso.” (Huan 13:12-17) Aunke Hesus tabatin hopi outoridat, e no a spera ku otro hende lo a sirbié. Mas bien, é a sirbi nan.—Mat. 20:28.

11. Kiko kabesnan di famia por siña for di e manera ku Yehova i Hesus ta demostrá humildat?

¹¹ Loke nos por siña. Un kabes di famia por demostrá humildat den vários manera. Por ehèmpel, e no ta spera ku su esposa i yunan ta perfekto. Asta ora nan no ta di akuerdo ku su punto di bista, e ta dispuesto pa skucha nan. Marley, un ruman muhé ku ta biba na Merka, a bisa: “No ta tur biaha ami ku mi esposo ta di akuerdo ku otro. Pero, mi sa ku e ta balorá i respetá mi pasobra promé ku e tuma un desishon e ta puntra mi mi opinion i ta tene kuenta kuné.” Un esposo humilde lo ta dispuesto tambe pa hasi trabou di kas asta si hende kaminda e ta biba ta pensa ku e trabounan ei ta di hende muhé. Pero esei no ta fásil. Dikon? Un ruman ku yama Rachel a bisa: “Den mi kultura, si un esposo ta yuda su esposa laba tayó òf limpia kas, bisiña- i famianan lo pensa ku e no ta ègt ‘un hòmber.’ Anto nan lo pensa ku su esposa ta manda riba dje.” Si kaminda  bo ta biba hende ta pensa asina, ta bon pa bo keda kòrda ku Hesus a laba pia di su disipelnan, aunke hende a mira esei komo trabou di esklabo. Un bon kabes di famia, no ta preokupá su kabes kon otro hende ta mir’é; mas bien, e ta preokupá ku bienestar di su esposa i yunan. Banda di humildat, ki otro kualidat importante un bon kabes di famia mester tin?

12. Kon Yehova i Hesus ta demostrá ku nan stima nos?

¹² Amor. Tur loke Yehova ta hasi, e ta hasi debí na amor. (1 Huan 4:7, 8) Yehova ta demostrá ku e ta stima nos debí ku e ta perkurá pa nos nesesidatnan spiritual pa medio di su Palabra, Beibel, i su organisashon. Tambe e ta perkurá pa nos nesesidat emoshonal i ta laga nos sa ku e ta stima nos. E ta satisfasé nos nesesidatnan material i “ta duna nos tur e kosnan ku nos ta disfrutá di dje.” (1 Tim. 6:17) Anto ora nos kometé un eror e ta korigí nos, pero e no ta stòp di stima nos. Debí ku Yehova ta stima nos asina tantu, el a perkurá e reskate pa nos. I Hesus ta stima nos asina tantu ku el a duna su bida pa nos. (Huan 3:16; 15:13) Nada no por kibra e amor ku Yehova i Hesus tin pa esnan ku ta leal na nan.—Huan 13:1; Rom. 8:35, 38, 39.

13. Dikon ta importante pa un kabes di famia demostrá ku e ta stima su famia? (Wak tambe e kuadro “ Kon un Hende Hòmber Resien Kasá Por Gana Rèspèt di Su Esposa?”)

¹³ Loke nos por siña. Tur loke un kabes di famia ta hasi mester ta debí na amor. Dikon esei ta asina importante? Apòstel Huan ta kontestá ku “esun ku no ta stima su ruman [òf su famia], ku e ta mira, no por stima Dios, ku e no ta mira.” (1 Huan 4:11, 20) Un hende hòmber ku ta stima su famia i ku ke imitá Yehova i Hesus lo perkurá pa su famia su nesesidat spiritual, emoshonal i material. (1 Tim. 5:8) Lo e sòru di eduká i disipliná su yunan. Tambe lo e sigui siña tuma desishon ku ta hasi Yehova kontentu i ku ta  benefisiá su famia. Awor, laga nos wak kon un kabes di famia por imitá Yehova i Hesus den tur e kosnan ei.

14. Kon un kabes di famia ta perkurá pa nesesidat spiritual di su famia?

¹⁴ Perkurá pa nesesidat spiritual di su famia. Meskos ku Yehova, Hesus a hasi sigur ku esnan bou di su kuido tabata spiritualmente bon alimentá. (Mat. 5:3, 6; Mar. 6:34) Asina tambe, e kos di mas importante pa un kabes di famia hasi ta di perkurá pa e nesesidat spiritual di su famia. (Deu. 6:6-9) Kon e ta hasi esei? Hasiendo sigur ku su famia ta lesa i studia Dios su Palabra, asistí na reunion, prediká e bon notisia i bira i keda bon amigu di Yehova.

15. Den ki manera un kabes di famia por perkurá pa nesesidat emoshonal di su famia?

¹⁵ Perkurá pa nesesidat emoshonal di su famia. Yehova no tabatin bèrgwensa di bisa públikamente kuantu e tabata stima Hesus. (Mat. 3:17) Hesus tampoko no tabatin bèrgwensa di bisa i demostrá su siguidónan ku e tabata stima nan. Anto nan, na nan turno, a bis’é ku nan tabata stim’é. (Huan 15:9, 12, 13; 21:16) Un kabes di famia por demostrá ku e ta stima su esposa i yunan ku su echonan, por ehèmpel, studiando Beibel ku nan. E mester bisa nan tambe ku e ta stima i balorá nan. Anto ora ta apropiá, e por elogiá nan dilanti otro hende.—Pro. 31:28, 29.

16. Kiko mas un kabes di famia mester hasi, i kiko e tin ku tene kuidou kuné?

¹⁶ Perkurá pa nesesidat material di su famia. Yehova a perkurá pa e nesesidat básiko di e israelitanan asta ora e tabata disipliná nan pa nan desobedensia. (Deu. 2:7; 29:5) Awe tambe e ta perkurá pa nos nesesidatnan básiko. (Mat. 6:31-33; 7:11) Di mes manera, Hesus a alimentá su siguidónan. (Mat. 14:17-20) El a asta kura esnan ku tabata malu. (Mat. 4:24) Pues pa un kabes di famia agradá Yehova, e mester perkurá pa e nesesidat material di su famia. Pero, e mester tene kuidou ku algu sí. E no mester dediká asina tantu tempu na trabou ku e ta neglishá e nesesidat spiritual i emoshonal di su famia.

17. Kon Yehova i Hesus ta eduká i disipliná nos?

¹⁷ Perkurá edukashon. Yehova ta eduká i disipliná nos pasobra e ke pa kos bai bon ku nos. (Heb. 12:7-9) Meskos ku su Tata, Hesus a eduká esnan bou di su outoridat ku amor. (Huan 15:14, 15) E tabata firme pero bondadoso. (Mat. 20:24-28) E ta komprondé ku nos ta imperfekto i tin tendensia di faya.—Mat. 26:41.

18. Kiko un bon kabes di famia tin ku kòrda?

 ¹⁸ Un kabes di famia ku ta imitá Yehova i Hesus tin ku kòrda ku su esposa i yunan ta imperfekto. Pues, lo e no bira fadá ku nan. (Kol. 3:19) Na lugá di esei, e ta purba di apliká e prinsipio ku tin na Galationan 6:1. E ta purba di reahustá nan “ku suavedat,” kòrdando ku e mes tambe ta imperfekto. Meskos ku Hesus, lo e realisá ku e mihó manera pa e siña su famia ta ku su mes ehèmpel.—1 Ped. 2:21.

19-20. Kon un kabes di famia por imitá Yehova i Hesus ora e tin ku tuma desishon?

¹⁹ Tuma desishon ku ta bon pa su famia. Yehova ta tuma desishon ku ta benefisiá otro persona. Por ehèmpel, el a disidí di krea bida no pa benefisiá su mes, sino pasobra e tabata ke pa nos disfrutá di bida. Niun hende no a oblig’é manda su Yu pa muri pa nos pikánan. Yehova a hasi esei pasobra e tabata ke yuda nos. Hesus tambe a tuma desishon ku a benefisiá otro hende. (Rom. 15:3) Por ehèmpel, un dia, el a keda sin sosegá p’e por a siña un multitut di hende.—Mar. 6:31-34.

²⁰ Un bon kabes di famia ta realisá ku un di e responsabilidatnan di mas difísil ku e tin ta di tuma desishon ku ta benefisiá su famia, i e ta tuma esei masha na serio. E ta evitá di tuma desishon djis pasobra é ta haña ta bon òf ku ta basá solamente riba su beis. Na lugá di esei, e ta laga Yehova siñ’é kon pa tuma bon desishon. * (Pro. 2:6, 7) Di e manera ei, semper e ta wak loke ta mihó pa su famia i no pa su mes.—Flp. 2:4.

21. Kiko nos lo trata den e siguiente artíkulo?

²¹ Ta bèrdat ku Yehova Dios a duna kabesnan di famia un tarea difísil. Anto ku nan tin ku dun’é kuenta i rason pa e manera ku nan ta kumpli kuné. Pero, si un esposo hasi su esfuerso pa sigui e ehèmpel ku Yehova i Hesus a pone, lo e ta un bon kabes di famia. I si su esposa hasi su parti, nan matrimonio lo ta felis. Kon un esposa tin ku mira su esposo su responsabilidat komo kabes di famia? Anto ki reto un esposa por hañ’é kuné? E siguiente artíkulo lo kontestá e preguntanan ei.