LONGO DIA 5
‘Klisto udi Fumu wa Yala Diagasue’
‘Klisto udi Fumu wa Yala Diagasue.’—1 KOL. 11:3.
LUNGIMBO 12 Jéhovah, Dieu magnifique
NDAGA JIDI MU LONGO EDI *
1. Ndaga jitshi jiajiya gutuma yala ha gukalegela mukaji’enji nu an’enji ndaga mu luholo luabola?
MBIMBI “ufumu” idi mukotelesa itshi mukunda nu aye? Mala avula ana kalegela akaji’awo nu an’awo ndaga ha gudivua nu mikhuala ya mu dimbo diawo, nga luholo ene akudile. Phangi wa mukhetu Yanita wana jinga gu Europe udi muzuela egi: “Ha fundo ngana jinga athu ana mona mukhetu gifua muthu wa githugu gutuama dia yala, ana gumuzula gifua muenya mudimo.” Phangi Luke wana jinga gu États-Unis udi muzuela egi: “Atata avula ana longesa an’awo a mala egi ndaga jiana zuela akhetu jiana khalago nu ndando, ishigo nu funu ha gutegelela ndaga ana zuela.” Uvi, Yehowa wana suanguluga ndo egi yala akalegele mukhetu ndaga mu luholo elu. (Fuanesa nu Mako 7:13.) Luholo lutshi yala wajiya gukhala mutuameji wabonga wa fami?
2. Itshi fumu wa fami adi naye gujiya nu mukunda natshi?
2 Hagula yala akhale mutuameji wabonga wa fami udi naye thomo gukotelesa ndaga Yehowa wana gumutoga. Udi naye gujiya nji mukunda natshi Yehowa ahanele athu ako ginemo gia gutuameza nu luholo ajiya gulandula gifezegeselo gia Yehowa nu Yesu. Mukunda natshi idi nu ndando egi yala ajiye ndaga eji? Handaga Yehowa waahanele ginemo gia gutuameza fami nu wana sha mutshima egi mbaatagenesa ginemo giene mu luholo luabonga.—Luka 12:48b.
LUHOLO YEHOWA WAKALEGELE NDAGA MUKUNDA NU UFUMU
3. Ha gutadila 1 Kolinto 11:3 itshi tualonguga mu ndaga yatadila utuameji?
3 Tanga 1 Kolinto 11:3. Verse eyi idi mumonesa luholo Yehowa wakalegele ndaga yatadila ufumu mukunda nu fami yenji ya mu dilu nu ya ha mavu. Yehowa udi nu Ufumu wagasue handaga udi “mutuameji.” Wazudile desizio dia guhana athu ginemo gia gutuameza athu ako. Uvi athu ene mbaashigo musuanguluisa Nzambi gila ashigo mutagenesa ginemo giawo mu luholo luabonga. (Lomo 14:10; Ef. 3:14, 15) Yehowa wahanele Yesu ginemo gia gutuameza hungu. Mbaashigo musuanguluga gila Yesu ashigo mutagenesa ginemo gienji muabonga. (1 Kol. 15:27) Yehowa wahanele nji yala ginemo gia gutuameza mukaji’enji nu an’enji. Gula yala gashigo mutagenesa muabongo ginemo gienji gia gubamba fami, Yehowa nu Yesu ajiyilego gusuanguluga n’enji.—1 Phet. 3:7.
4. Yehowa nu Yesu ana khala nu Ufumu wa gukalagala itshi?
4 Luholo Yehowa adi Fumu ya fami yenji ya mu dilu nu ya ha mavu, wana guashila mikhuala ha gujiya luholo ajiya gukalagala ndaga. Wana tshita nji egi atumagele mikhuala yene. (Yesh. 33:22) Luholo Yesu adi Fumu ya hungu dia Uklisto wana haga nji mikhuala nu wana tshita egi athu atumagele mikhuala yene.—Gal. 6:2; Kol. 1:18-20.
5. Ufumu utshi tata ana khala nawo mu fami nu luholo lutshi ufumu wene ushigo gifua wa Yehowa?
5 Ha gulandula gifezegeselo gia Yehowa nu Yesu phangi wa yala udi fumu ya fami, muene udi naye guzula ba desizio mukunda nu fami yenji. (Lomo 7:2; Ef. 6:4) Uvi, ufumu wenji ushigo gifua wa Yehowa. Ha gufezegesa, mikhuala yawo idi naye gudivua nu malongo a Biblia. (Ish. 3:5, 6) Fumu wa fami ashigo naye guhaga mikhuala gudi athu anyi ashigo enya fami yenji. (Lomo 14:4) Gila an’enji a mala nu a akhetu akula, akatuga gu inzo ana landula gunemesa shawo. Uvi ana khalago luko mu utuameji wenji.—Mat. 19:5.
MUKUNDA NATSHI YEHOWA WAHANELE ATHU AKO GINEMO GIA GUTUAMEZA?
6. Mukunda natshi Yehowa wana hana athu inemo ya gutuameza?
6 Yehowa watombele athu ako ha gutuameza handaga wana zumba fami yenji. Idi kado gana katuga gudi muene. Watshitshile ngenyi hagula fami yenji ikhale mu guhuima nu ituamezewe mu luholo luabonga. (1 Kol. 14:33, 40) Gila utuameji guagithugu fami ya Yehowa yajiyilego gukhala mu guhuima nu ndaga jia jiyilego guyila muabonga. Ha gufezegesa, gila Yehowa ahagelego athu ha gutuameza, gushigo nga muthu wajiya gujiya nanyi udi naye guzula desizio dia gisugishilo. Guajiyilego nji gukhala nga muthu wajiya guzula fundo dia thomo ha gutadila ba desizio ene.
7. Ha gutadila Efeso 5:25, 28, itshi Yehowa wana tshigina egi yala akalegele mukaji’enji?
7 Gila idi ndaga yabonga luholo Nzambi atombele yala ha gutuameza fami yenji, na mukunda natshi akhetu avula ana tangiza egi alumi’awo ana guakalegela ndaga nu khuta nu ana guatuameza mu luholo luabola? Handaga mala avula ana landula mikhuala ya mu dimbo diawo, ha fundo dia gutumagela mikhuala ya Yehowa yatadila fami. Ana kalegela akaji’awo ndaga mu luholo luabola ha gukamba phamba gubonga guawo. Ha gufezegesa mala ako ana shinjiga akaji’awo ha guanemesa ha gumonesa athu ako egi adi diago “mala.” Ajiya gutangiza egi ashigo naye gushinjiga akaji’awo ha guazumba, uvi adi naye gutshita ndaga hagula akhetu akhale guavila woma. Ngenyi ajiya guatuameza mu luholo luagasue atshigina. * Yala wana tangiza nu wana kalagala ndaga jia luholo elu udi diago muthu wabola. Ana hanago mukaji’enji ginemua nu ndaga eji ana kalagala jianago gudivua nu gutshigina gua Yehowa nga hazonda.—Tanga Efeso 5:25, 28.
LUHOLO LUTSHI YALA WAJIYA GUKHALA MUTUAMEJI WABONGA WA FAMI?
8. Luholo lutshi yala wajiya gutuameza fami yenji mu luholo luabonga?
8 Yala wajiya gukhala mutuameji wabonga wa fami, gila udi mulandula gifezegeselo gia Yehowa nu Yesu luholo ana kalegela Ufumu wawo. Tutadilenu makalegelo mbadi a monesele Yehowa nu Yesu nu luholo fumu wa fami wajiya gumonesela mukaji’enji nu an’enji makalegelo ene.
9. Luholo lutshi Yehowa wana monesa egi udi Nzambi wa gudibulumuisa?
9 Gudibulumuisa. Yehowa wakhala watema gubalega athu agasue. Uvi wana tegelela akombeledi enji muabonga. (Gis. 18:23, 24, 32) Wana hana athu enji njila ha guhana matangi awo. (1 Maf. 22:19-22) Yehowa udi watagana, uvi wanago gukamba egi tumukalegele ndaga gifua athu atagana. Ha gufezegesa, wana kuatesa athu ashigo atagana anyi ana tshita yagasue ha gumukombelela. (Ngi. 113:6, 7) Biblia yana monesa egi Yehowa udi “mukuateshi.” (Ngi. 27:9; Heb. 13:6) Fumu Davidi wajiyile egi wakhalele hehi ha gutagenesa ndaga jiagasue akhalele gumutoga, handaga Yehowa wamukuatesele nu wakhala Nzambi wa gudibulumuisa.—2 Sam. 22:36.
10. Luholo lutshi Yesu amonesele khadilo dia gudibulumuisa?
10 Henyaha, tutadilenu gifezegeselo gia Yesu. Yesu wakhalele Fumu, uvi wawevuele ikanzo ya alandudi enji. Mukunda natshi Yehowa atshiginyile egi lumene elu lusonegewe mu Biblia? Hagula mafumu a fami nu athu ako ajiya guzula malongo. Yesu wazuelele egi: ‘Ame ngamihana gifezegeselo hagula mutshite gifua luholo ngamikalegela.’ (Yone 13:12-17) Ikhale wakhalele Fumu akambelego egi athu amukalegele. Uvi muene wakhalele mukalegela athu.—Mat. 20:28.
Tata wajiya gumonesa khadilo dia guzumba nu dia gudibulumuisa, gula udi mukuatesa mukaji’enji ha gukalagala midimo ya monzo nu udi mukuatesa enya fami yenji ha gukhala nu ufuta wabonga nu Yehowa (Tala paragrafe 11, 13)
11. Luholo lutshi fumu ya fami wajiya gulandula gifezegeselo gia Yehowa nu Yesu mu ndaga yatadila gudibulumuisa?
11 Malongo tuajiya guzula. Fumu wa fami udi naye gumonesa gudibulumuisa mu ndaga jiagasue. Ha gufezegesa ashigo naye gukamba egi mukaji’enji nu an’enji amukalegele ndaga gifua athu atagana. Udi naye nji guategelela ngatshima ndaga adi muzuela jishigo gudivua nu matangi enji. Phangi Marley wana jinga gu États-Unis udi muzuela egi: “Matangua ako ame nu mulumi’ami tuana khalago matangi amoshi. Uvi ngana jiya egi ngana khala nu ndando gumeso enji nu wana gungunemesa, handaga gutuama dia guzula desizio wana hula matangi ami.” Luko yala udi nu gudibulumuisa wajiya gukalagala midimo ya monzo ngatshima enya mu dimbo diawo ana mona egi midimo yene idi mukunda nu akhetu. Ndaga eyi yajiya gukhala lamba. Mukunda natshi? Phangi Rachel udi muzuela egi: “Fundo ngakatugile gula yala wakuatesa mukaji’enji ha guwevua malonga nga gukomba inzo, athu ana jinga nawo hehi nu enya fami jiawo ana zuela egi yowu udi ‘diago yala?’ Ana tangiza egi gashigo watagana ha gutuameza mukaji’enji.” Gila fundo wana jinga athu ana khala nu matangi a luholo elu, ujimbilago egi Yesu wawevuele ikanzo ya alandudi enji, ngatshima athu akhalele guwumona gifua mudimo wa ahiga. Fumu wabonga wa fami anakambago egi athu ako amumone egi udi nu ndando yavula, uvi wana tshita yagasue hagula mukaji’enji nu an’enji akhale mu gusuanguluga. Gila tuakatula gudibulumuisa, khadilo ditshi diko dia ndando fumu wa fami wabonga wajiya gumonesa?
12. Guzumba guatumine Yehowa nu Yesu ha gutshita itshi?
12 Guzumba. Yehowa wana kalagala ndaga jiagasue nu guzumba. (1 Yone 4:7, 8) Wana gutudisa mu nyuma mu njila ya Mbimbi yenji Biblia nu mu njila ya ulondegi wenji. Wana kalagala ndaga jiana monesa egi wana gutuzumba. Itshi tuajiya guzuela mukunda nu ima yetu ya gujingila? Yehowa ‘wana gutuhana ima yagasue tudi nayo funu.’ (1 Tim. 6:17) Gila tuakalagala gubola Yehowa wana gutuvutula mu njila, wana landula nji gutuzumba. Guzumba guatumine Yehowa ha guhana mulambu mukunda nu esue. Yesu nji wana gutuzumba muavula gishina giene ahanele monyo wenji mukunda nu esue. (Yone 3:16; 15:13) Gushigo nga gima gimoshi giajiya gukanga Yehowa nu Yesu njila ya guzumba athu anyi ana sala ya gujinginyina gudi ene.—Yone 13:1; Lomo 8:35, 38, 39.
13. Mukunda natshi tata adi naye guzumba enya fami yenji? (Tala galuanda “ Luholo Lutshi Yala Wakatuga Guzula Mukhetu mu ulo Wajiya Gutshita egi Mukaji’enji Akhale Gumunemesa?”)
13 Malongo tuajiya guzula. Fumu wa fami udi naye gukalagala ndaga jiagasue nu guzumba. Mukunda natshi gutshita ngenyi gudi nu ndando? Mupostolo Yone wasonegele egi: ‘Muthu yonu ashigo muzumba phangi’enji [nga enya fami yenji] adi mumona muene, gajiyilego guzumba Nzambi yonu adi khenji amonele gale ndo.’ (1 Yone 4:11, 20) Yala wana zumba enya fami yenji nu wana tshigina gulandula gifezegeselo gia Yehowa nu Yesu, udi naye gukuatesa fami yenji hagukhala nu ufuta wakola nu Yehowa. Udi naye nji guazumba nu guahana ima adi nayo funu. (1 Tim. 5:8) Udi naye gulongesa an’enji nu guahana disipline gula akalagala gubola. Fumu wa fami udi naye gulandula guzula ba desizio adi munemesa Yehowa, anyi mbaabatela fami yenji gubonga. Tutadilenu ndaga mafumu a fami adi naye gutshita nu luholo ajiya gulandula gifezegeselo gia Yehowa nu Yesu.
NDAGA FUMU WA FAMI ADI NAYE GUKALAGALA
14. Luholo lutshi tata wajiya gukuatesa enya fami yenji ha gukhala nu ufuta wabonga nu Yehowa?
14 Tata udi naye gukuatesa enya fami yenji ha gukhala nu ufuta wabonga nu Yehowa. Yesu walanduile gifezegeselo gia Yehowa, handaga wakuatesele alandudi enji ha gulandula gukhala nu gutshigina guakola. (Mat. 5:3, 6; Mako 6:34) Luholo lumoshi nji fumu wa fami udi naye gukuatesa enya fami yenji ha guhaga ndaga jia mu nyuma ha fundo dia thomo. (Mikh. 6:6-9) Ha guyitshita udi naye guakuatesa ha gulonguga Biblia, ha guya mu gudibungisa gua mu hungu nu mu mudimo wa gulongesa. Udi naye nji guakuatesa ha gubamba ufuta wabonga nu Yehowa.
15. Luholo lutshi tata wajiya gumonesa egi wana zumba enya fami yenji?
15 Tata udi naye guzumba enya fami yenji. Yehowa wamonesele diago haphelo egi wana zumba Yesu. (Mat. 3:17) Yesu nji wamonesele egi wakhalele muzumba alandudi enji mu makalegelo enji nu mu ndaga jiakhalele muzuela muene. Gungima alandudi enji amuwambelele egi ana gumuzumba muavula. (Yone 15:9, 12, 13; 21:16) Yala wajiya gumonegesa egi wana zumba mukaji’enji nu an’enji mu makalegelo enji gifua gulonguga Biblia hamoshi nawo. Udi naye nji guawambela egi wana guazumba nu ana khala nu ndando gu meso enji. Wajiya nji guashimana gula athu ako adi hene.—Ish. 31:28, 29.
Tata udi naye guhana enya fami yenji ima ya gujingila adi nayo funu ha gusuanguluisa Yehowa (Tala paragrafe 16)
16. Ndaga itshi iko fumu wa fami adi naye gukalagala nu itshi ashigo naye gutshita?
16 Fumu wa fami udi naye guhana enya fami yenji ima adi nayo funu. Yehowa wakhalele muhana enya Isalele ima akhalele nayo funu, ikhale tangua amulumbugile. (Mikh. 2:7; 29:5) Wana gutuhana nji ima yagasue tuana khala nayo funu lusugu nu lusugu. (Mat. 6:31-33; 7:11) Luholo lumoshi nji Yesu wadishile athu akhalele gumulandula. (Mat. 14:17-20) Wasagele nji athu avula akhalele nu ukhashi. (Mat. 4:24) Tata udi naye gukuatesa enya fami yenji nu ima ya gujingila ha gusuanguluisa Yehowa. Uvi gudi nu ndaga ashigo naye gukalagala. Ashigo naye gubalegesa tangua dienji diagasue mukunda nu gukambela enya fami yenji ima ya gujingila. Uvi udi naye guhaga ndaga jia mu nyuma ha fundo dia thomo.
17. Gifezegeselo tshi Yehowa nu Yesu abembele mu ndaga yatadila guhana formasio nu guhana disipline gula tuakalagala gubola?
17 Guhana formasio. Yehowa wana gutuhana formasio nu wana gutuhana disipline gula tuatshita gubola, handaga wana tshigina gutukuatesa. (Heb. 12:7-9) Yesu wakhalele muhana alandudi enji formasio nu guzumba guagasue. (Yone 15:14, 15) Wakhalele nu gisemo, uvi wakhalele muwambela athu gubola guawo haphelo. (Mat. 20:24-28) Yesu wakotelesele egi tushigo athu atagana ngenyi tuajiya gukalagala gubola iphungu yavula.—Mat. 26:41.
18. Ndaga itshi tata ashigo naye gujimbila?
18 Tata udi mulandula gifezegeselo gia Yehowa nu Yesu udi naye gujiya egi enya fami yenji ashigo athu atagana. Ashigo naye gukalegela mukaji’enji nu an’enji ‘ndaga jiajiya guasagesa.’ (Kol. 3:19) Uvi, udi naye gukalegela longo didi mu Galatiya 6:1 nu guavutula munjila nu “guhuiminyina guagasue.” Udi naye gujiya egi ene nji ashigo athu atagana. Tata udi naye gulongesa an’enji mu makalegelo gifua luholo Yesu akalegele.—1 Phet. 2:21.
19-20. Gila tata udi mutshigina guzula desizio, luholo lutshi ajiya gulandula gifezegeselo gia Yehowa nu Yesu?
19 Guzula ba desizio mukunda nu gubonga gua athu agasue. Yehowa wana zula ba desizio ana batela athu ako gubonga. Ha gufezegesa, ha fugile muene ima akambelego gubonga guenji hakhenji. Uvi watshiginyile egi esue nji tusuanguluge nu monyo. Gushigo nga muthu wamushinjigile ha guhana Mun’enji mukunda nu esue. Wayikalegele mukunda nu gubonga guetu. Yesu nji wazudile desizio mukunda nu gubonga gua athu ako. (Lomo 15:3) Ha gufezegesa tangua wakhalele ya guhuila, ha fundo dia guhuluguga walongesele thundu ya athu.—Mako 6:31-34.
20 Tata wabonga wana jiya egi guzula ba desizio abonga mukunda nu fami yenji yana khalago yaleba. Wana zula ginemo gienji nu ndando yavula. Anago guzula ba desizio ashigo gudivua nu Biblia nga phushi phushi. Uvi, wana bemba egi Yehowa amukuatese ha guzula ba desizio abonga. * (Ish. 2:6, 7) Ngenyi wana monesa egi wana kamba gubonga gua athu ako ha fundo dia gukamba phamba gubonga guenji.—Fili. 2:4.
21. Itshi mbatuzuelela mu longo dialandula?
21 Yehowa wahanele fumu wa fami ginemo giakoma diago. Wana tshigina egi atagenese ginemo giene mu luholo luawaha. Gila tata udi mutshita yagasue ha gulandula gifezegeselo gia Yehowa nu Yesu mbawukhala mutuameji wabonga diago. Gila mukaji’enji udi mutagenesa ginemo gienji muabonga, mbaakhala nu gusuanguluga mu ulo wawo. Luholo lutshi mukhetu wajiya gutadila ufumu wa mulumi’enji? Malamba atshi ajiya gutagana nawo? Longo dialandula mbadihana mvutu gu mihu eyi.
LUNGIMBO 16 Louez Jéhovah et son Fils, l’Oint
^ par. 5 Gila yala wazula mukhetu mu ulo wanabua fumu wa fami. Mu longo edi, tuza mumona ginemo Yehowa wahanele athu ako nu gishina akalegele ngenyi. Tuza nji mumona malongo yala wajiya guzula mu gifezegeselo gia Yehowa nu Yesu. Mu longo dialandula mbatumona luholo yala nu mukhetu ajiya guzula malongo mu gifezegeselo gia Yesu nu mu ifezegeselo iko idi mu Biblia. Mu longo dia 7 mbatumona luholo aphangi a mala ajiya gutagenesa ginemo giawo mu hungu.
^ par. 7 Matangi a guzuela egi idi ndaga yabonga gula yala wawasa mukaji’enji nga udi gumukalegela ndaga mu luholo luabola, jidi ndaga jiana monesewa mu ba filme nu mu televizio. Athu avula ajiya gutangiza egi gula yala udi mumonesa mukaji’enji lamba ishigo mulonga.
^ par. 20 Ha gujiya ndaga jiavula jiatadila luholo luabonga lua guzula ba desizio, tala longo “Zula ba Desizio Adi Munemesa Nzambi,” mu Inzo Yaleha ya Mutaledi ya 15, Avril 2011, ya Français diyiji 13-17.
