1. Why nao samfala hasband no treatim gud waef and olketa pikinini?

WANEM nao iu tingim taem iu herem disfala toktok “hed blo famili”? Lo samfala kantri, hasband no treatim gud waef and pikinini bikos hem followim culture, kastom, or hao hem lukim dadi treatim mami blo hem. Yanita, wanfala sista lo Europe sei: “Lo kantri blo mi, olketa man ting daonem olketa woman and tingse olketa woman shud duim evri waka lo haos.” And Luke, wanfala brata lo United States sei: “Samfala dadi teachim olketa son blo olketa for tingse no eni samting wea olketa woman talem hem important, so olketa man no need for followim wanem olketa woman talem.” Bat Jehovah no laekem hasband for treatim waef and pikinini lo wei olsem. (Comparem Mark 7:13.) So hao nao man savve kamap gudfala hed blo famili?

2. Wanem nao hed blo famili mas savve, and why nao olsem?

² Sapos hasband laek for kamap gudfala hed blo famili, hem mas savve wanem Jehovah laekem hed blo famili for duim. And tu, hem mas savve why Jehovah markem hasband for hed blo famili, and hao hem savve followim example blo Jehovah and Jesus. Why nao hem important for olketa hasband savve lo olketa samting hia? Bikos Jehovah givim olketa hasband responsibility for hed blo famili, and Jehovah expectim olketa for lukaftarem gud famili blo olketa.​—Luke 12:48b.

3. Wanem nao iumi lanem lo 1 Corinth 11:3 abaotem hao Jehovah organizem famili blo hem?

³ Readim 1 Corinth 11:3. Disfala verse storyim hao Jehovah organizem famili blo hem lo heven and lo earth. Jehovah nao hed blo evriwan lo heven and earth. Olketa wea hem markem for hed blo narawan mas duim datfala waka followim hao hem laekem. (Rome 14:10; Eph. 3:14, 15)  Olsem example, Jehovah markem Jesus for hed blo kongregeson, bat hem expectim Jesus for lukaftarem gud olketa kongregeson. (1 Cor. 15:27) And Jehovah markem hasband for hed blo waef and pikinini, bat Jehovah and Jesus expectim hasband for treatim gud famili blo hem.​—1 Pet. 3:7.

4. Wanem nao Jehovah and Jesus garem raet for duim?

⁴ From Jehovah Hed blo evriwan lo heven and earth, hem garem raet for mekem olketa rul for olketa lo famili blo hem, and for mek sure olketa followim olketa rul hia. (Aesaea 33:22) And tu, from Jesus hed blo kongregeson, hem garem raet for mekem olketa rul and for mek sure iumi followim.​—Gal. 6:2; Col. 1:18-20.

5. Wanem nao hed blo famili garem raet for duim, bat wanem spialaen nao hem garem?

⁵ Olsem Jehovah and Jesus garem raet for disaedem samting for olketa wea stap anda lo tufala, hed blo famili garem raet for disaedem samting for famili blo hem. (Rome 7:2; Eph. 6:4) Nomata olsem, datwan garem spialaen. For example, hem shud disaedem samting followim olketa Bible principle. (Provebs 3:5, 6) Hed blo famili no garem raet for disaedem eni samting for olketa wea no insaed famili blo hem. (Rome 14:4) And tu, dadi no hed blo pikinini wea big finis and muv aot from haos, nomata olsem, pikinini bae gohed for respectim dadi.​—Matt. 19:5.

6. Why nao Jehovah markem samfala for hed blo olketa narawan?

⁶ Jehovah markem samfala for hed blo olketa narawan bikos hem lovem famili blo hem lo earth. Datfala arrangement mekem famili blo Jehovah for organize and stap gud. (1 Cor. 14:33, 40) Sapos Jehovah no mekem datfala arrangement, famili blo hem bae no hapi and evri samting bae olobaot. For example, sapos no eniwan hed lo famili, bae evriwan lo famili no savve hu nao shud disaedem samting, and hu nao shud organizem samting wea olketa disaedem.

7. Wanem nao Ephesus 5:25, 28 talem abaotem hao Jehovah laekem hasband for treatim waef blo hem?

⁷ Hem shud gud samting for hasband hem hed blo famili, bat staka waef sei hasband bossim and raf lo olketa. Why nao samfala hasband duim datwan? Diswan hem bikos olketa no followim standard blo Jehovah, bat followim kastom or culture blo olketa. Or maet wanfala hasband treatim nogud waef blo hem for showimaot lo waef and olketa narawan, hem nao boss lo famili blo hem. From hem savve bae hem hard for waef lovem hem, so hem tingse sapos waef fraet lo hem, bae hem isi nao for hem kontrolem waef blo hem. * Hem no stret for man garem datkaen tingting and for treatim woman lo nogud wei. Datwan no showimaot respect and againstim wanem Jehovah laekem.​—Readim Ephesus 5:25, 28.

8. Hao nao hasband savve kamap gudfala hed lo famili blo hem?

⁸ Hasband savve kamap gudfala hed blo famili taem hem followim example blo Jehovah and Jesus. Bae iumi storyim tufala gudfala wei blo Jehovah and Jesus.  Hasband savve lanem hao for showimaot tufala wei hia lo wanem hem duim lo waef and olketa pikinini.

9. Hao nao Jehovah showimaot hem hambol?

⁹ Hambol. Jehovah hem barava wise, bat hem laek for herem tingting blo olketa wea worshipim hem. (Jenesis 18:23, 24, 32) Hem hapi for herem idea blo olketa wea stap anda lo hem. (1 Ki. 22:19-22, NW) Jehovah hem perfect bat iumi no perfect, so hem helpem iumi for duim olketa samting wea hem laekem. (Sams 113:6, 7) And Bible sei Jehovah hem ‘gohed for helpem’ iumi. (Sams 27:9; Heb. 13:6) King David sei from Jehovah hambol and willing for helpem hem, datwan mekem hem fit for duim staka samting for Jehovah.​—Mektu Samuel 22:36.

10. Wanem nao Jesus duim wea showimaot hem hambol?

¹⁰ Tingim tu example blo Jesus. Nomata olketa disaepol stap anda lo Jesus, hem wasim feet blo olketa. Why nao Jehovah mek sure disfala story stap insaed Bible? Wanfala reason hem bikos Jesus showimaot gudfala example for olketa hed blo famili. Jesus sei: “Mi showim wei for iufala followim, mekem samting wea mi duim long iufala, iufala mas duim long narawan tu.” (John 13:12-17) Nomata Jesus hem Son blo God, hem hapi for duim waka for helpem olketa narawan.​—Matt. 20:28.

11. Wanem nao hed blo famili savve lanem from example blo Jehovah and Jesus abaotem wei for hambol?

¹¹ Wanem iumi lanem. Lo staka difren wei, hed blo famili savve showimaot hem hambol. For example, bae hem no expectim waef and olketa pikinini for perfect. Hem laek for herem tingting blo olketa, nomata hem difren from tingting blo hem. Marley, sista wea stap lo United States sei: “Samfala taem mi and hasband no garem sem tingting abaotem wanfala samting. Nomata olsem, hem hapi for herem tingting blo mi and hem ting raonem idea blo mi bifor hem mekem eni disison.” Nara wei hasband showimaot hem hambol, hem willing for kukim kaikai or klinim haos nomata olketa narawan tingse datwan hem waka blo woman. Bat why nao maet datwan hem no isi for wanfala hasband? Rachel, wanfala sista, sei: “Lo ples mi stap, sapos hasband helpem waef  for wasim pleit or klinim haos, bae olketa neiba and relative tok spoelem hem. Bae olketa sei waef nao bossim hem.” Sapos datwan hem wei blo pipol lo ples blo iu, tingim hao Jesus wasim feet blo olketa disaepol nomata pipol ting lo datwan olsem waka blo wanfala slave. Gudfala hasband bae laek for mekem waef and olketa pikinini for hapi, and hem bae no wari sapos olketa narawan ting daonem hem from hem duim datwan. So hem gud for hed blo famili for hambol. Bat wanem moa nara gudfala wei hem shud garem?

12. Wanem nao showimaot Jehovah and Jesus lovem iumi?

¹² Love. Evri samting wea Jehovah duim showimaot love. (1 John 4:7, 8) Hem givim iumi Bible and organization blo hem. Hem tingim feeling blo iumi and hem talem iumi hem lovem iumi. And hem provaedem olketa need blo iumi. Jehovah “givim iumi evri samting for iumi hapi.” (1 Tim. 6:17) Nomata iumi duim samting wea no stret, hem stretem iumi and gohed for lovem iumi. And tu, Jehovah provaedem datfala ransom sakrifaes. Jesus tu showimaot hem lovem iumi from hem willing for dae for iumi. (John 3:16; 15:13) No eni samting savve stopem Jehovah and Jesus for gohed lovem olketa wea faithful lo tufala.​—John 13:1; Rome 8:35, 38, 39.

13. Why nao hem important for hed blo famili showimaot love? (Lukim tu box “ Bihaen Man Hem Marit, Wanem Nao Hem Savve Duim for Waef Respectim Hem?”)

¹³ Wanem iumi lanem. Evri samting wea hed blo famili duim shud showimaot love. Why nao datwan barava important? Aposol John sei: “Sapos man no lovem brata bilong hem [or famili] wea hem savve lukim, hard tumas for hem lovem God wea hem no savve lukim.” (1 John 4:11, 20) So hasband wea lovem famili blo hem and laek for followim example blo Jehovah and Jesus bae helpem famili for fren gud witim Jehovah, tingim feeling blo olketa, and provaedem need blo  olketa. (1 Tim. 5:8) Dadi bae trainim and stretem olketa pikinini blo hem. Hem bae traem best for mekem olketa disison wea mekhae lo Jehovah and wea helpem famili blo hem. Distaem bae iumi storyim faevfala samting hia for lukim hao hed blo famili savve followim example blo Jehovah and Jesus.

14. Hao nao dadi savve helpem famili blo hem for fren gud witim Jehovah?

¹⁴ Helpem famili for fren gud witim Jehovah. Jesus followim example blo Dadi blo hem taem hem helpem olketa disaepol for garem strongfala faith. (Matt. 5:3, 6; Mark 6:34) So hem important tu for dadi helpem famili blo hem for fren gud witim Jehovah. (Diutronomi 6:6-9) Hem duim datwan taem hem mek sure hem and famili readim and studyim Bible, attendim olketa meeting, duim preaching waka, and gohed fren gud witim Jehovah.

15. Wanem nao wanfala wei dadi savve showimaot hem tingim feeling blo famili blo hem?

¹⁵ Tingim feeling blo famili. Jehovah talem Jesus hem lovem Jesus front lo olketa narawan. (Matt. 3:17) Jesus showimaot hem lovem olketa disaepol blo hem lo wanem hem talem and duim. Olketa disaepol tu talem Jesus olketa lovem hem. (John 15:9, 12, 13; 21:16) Hed blo famili savve duim olketa samting for showimaot hem lovem waef and olketa pikinini, olsem for studyim Bible witim olketa. Hem shud talem waef and olketa pikinini hem lovem and tinghae lo olketa, and no hol bak for showimaot datwan front lo olketa narawan.​—Provebs 31:28, 29.

16. Wanem nao nara samting dadi shud duim, and hao nao hem savve balance lo datwan?

¹⁶ Provaedem need blo famili. Jehovah mek sure olketa Israelite kasem wanem olketa needim, nomata olketa raraon lo wilderness for 40 year bikos olketa disobey. (Diutronomi 2:7; 29:5) And distaem, Jehovah provaedem wanem iumi needim. (Matt. 6:31-33; 7:11) Jesus tu givim kaikai lo pipol wea followim hem. (Matt. 14:17-20) And hem healim olketa wea sik. (Matt. 4:24) So Jehovah laekem dadi for provaedem need blo famili blo hem. Nomata olsem, hem mas balance. Dadi shud no busy tumas lo waka blo hem gogo hem no duim nao olketa spiritual samting witim famili and spendem taem witim olketa.

17. Hao nao Jehovah and Jesus trainim and stretem iumi?

¹⁷ Trainim olketa. Jehovah trainim and stretem iumi bikos hem laek for helpem iumi. (Heb. 12:7-9) Jesus followim example blo Dadi blo hem for trainim olketa disaepol. (John 15:14, 15) Nomata hem kaonselem olketa, hem duim lo kaenfala wei. (Matt. 20:24-28) Jesus savve iumi no  perfect and iumi savve mekem olketa mistek.​—Matt. 26:41.

18. Wanem nao gudfala hed blo famili bae luksavve lo hem?

¹⁸ Hed blo famili bae laek for followim example blo Jehovah and Jesus. Hem bae luksavve waef and olketa pikinini savve mekem mistek and hem mas “no barava kros” lo olketa. (Col. 3:19) Taem hem need for stretem eni famili member, hem “mas kaen” olsem principle lo Galatia 6:1 storyim. Dadi shud luksavve hem tu savve mekem mistek. Hem laek followim example blo Jesus, and luksavve best wei for trainim olketa pikinini hem for showimaot gudfala example.​—1 Pet. 2:21.

19-20. Hao nao dadi savve followim example blo Jehovah and Jesus taem hem mekem olketa disison?

¹⁹ Mekem olketa gudfala disison. Olketa disison blo Jehovah showimaot hem tingim olketa narawan. For example, Jehovah no wakem pipol bikos hem lonely, bat hem laekem olketa for garem chance for enjoyim laef. Nara samting, no eniwan forcem Jehovah for sendem kam Son blo hem for dae for iumi. Hem willing for duim datwan for finisim sin blo iumi olketa man. Olketa disison blo Jesus tu showimaot hem tingim pipol. (Rome 15:3) For example, nomata hem taed and laek for rest, hem disaed for gohed teachim pipol.​—Mark 6:31-34.

²⁰ Wanfala gud dadi savve hem important for mekem olketa gudfala disison for famili blo hem, bat hem luksavve datwan hem no isi samting. Bae hem no laek for kwiktaem disaedem samting or followim nomoa tingting blo hem. Bat bae hem laek for savve lo tingting blo Jehovah bifor hem mekem olketa disison. * (Provebs 2:6, 7) Dadi wea duim olsem showimaot hem tingim famili blo hem and no hemseleva.​—Phil. 2:4.

21. Wanem nao bae iumi storyim lo next study?

²¹ Jehovah givim bigfala responsibility lo hed blo famili, and Jehovah expectim hem for duim gud datwan. Sapos hasband traem best for followim example blo Jehovah and Jesus, bae hem kamap gudfala hed blo famili. And sapos waef duim gud waka blo hem, bae tufala evriwan hapi lo marit blo tufala. Why nao waef bae laek for stap anda lo hasband blo hem, and wanem nao olketa hard samting wea samfala waef mas deal witim? Bae iumi ansarem olketa kwestin hia lo next study.