1. ¿Imanotaj waquin olgucuna familianta rican?

OLGUCUNAPA maquincho familian caycan Biblia nirga, manami niycanchu olgu cashpan warminta y wamrancunata munashganno tratananpaj. Waquin olgucunaga taytancuna o marcancho tiyaj runacuna warmicunata imano tratashgannomi paycunapis warminta tratan. Europa naciunpita Yanita jutiyoj paniga cayno wilacun: “Noga tashgä marcachoga warmicunataga imayca ashmaytanomi ricapäcun”. Estados Unidos naciunpita Luke jutiyoj wawguinami nin: “Taytacuna wamranta yachachin warmicuna nishganga imapäpis mana sirvishganta, chayraycurna paycunata mana casunapaj”. Pero Jehová manami warmicunapita chayno yarpänanchita munanchu (Marcos 7:13 textuwan tincuchiy). ¿Imanotaj juc olgu yachacunman maquincho caycaj familianta shumaj pushananpaj y washänanpaj?

2. ¿Imacunamantaj familiacho olgu caj yarpachacunman y imanir?

² Juc olgu familianta shumaj pushananpäga puntata yarpänan imataj Jehová payta mandashganta, nircur imanir Jehová familianta camacächishganta y imatataj pay yachacunman Jehová y Jesús rurashganpita. ¿Imanirtaj tayta cajcuna chaycunaman yarpachacunman? Cayraycur: Jehovami familianta paypa maquinman churashga y chasquishgan cargucho shumaj arunantami payga munan (Luc. 12:48b).

3. 1 Corintios 11:3 textucho leishganchino, ¿imanotaj Jehová familianta camacächishga?

³ Leiriy 1 Corintios 11:3. Caycho ricanchi familianta Jehová imano camacächishganta. Chaymi lapan autoridäyojcuna quiquin Jehovata cuentata gonga maquincho caycajcunata imano tratashganpita. Quiquin Jehovami lapanpitapis más autoridäyoj, chaymi angelcunapis y runacunapis Payta cuentata gonga (Rom. 14:10; Efes. 3:14, 15). Jehovaga Jesuspa maquinmanmi congregaciuncunata churashga, chaymi Jesuspis cuentata gonga imano pushamashganchipita (1 Cor. 15:27). Jina Jehovaga tayta cajcunapa maquinmanmi churashga warminta y wamrancunata, chaymi paycunaga Jehovata y Jesusta cuentata gonga familianta imano ricashganpita (1 Ped. 3:7).

4. ¿Imatataj Jehovawan Jesús goycalämanchi?

⁴ Jehovapa maquincho caycan lapan cielucho cajcuna y Pachacho cajcunapis, chaymi payga mandamientuncunata gon y nishgannola ruracänanta munan (Is. 33:22). Jesuspa maquinchonami lapan congregaciuncuna caycan, chaymi paypis mandamientucuna gon y ruracänanta munan (Gál. 6:2; Col. 1:18-20).

5. ¿Imatataj casado olgucuna rurayta puedin, y pïcunalapätaj chay mandacushgancuna caycan?

⁵ Casado olgucunapis Jehová y Jesusnolami warminta y wamrancunata shumaj cuidananpaj imatapis niyta o imatapis rurananpaj mañacuyta puedin (Rom. 7:2; Efes. 6:4). Pero manami quiquilan munashgannochu ruranman, Jehová mandacushganta casucurmi imatapis ninman o mandacunman (Prov. 3:5, 6). Ima ruracänanpaj mandacushgancunapis familianlapämi canman (Rom. 14:4). Wamrancuna winarcur maquinpita aywacuptinga manami poderninchonachu caycan (Mat. 19:5).

6. ¿Imanirtaj Jehovaga familianta shumaj camacächishga?

⁶ Jehovaga familianta shumaj camacächishga paycunata alapa cuyashpanmi, chaymi lapanchipis shumaj cawacunchi (1 Cor. 14:33, 40). Chayno mana captinga lapanpis munashgantachi ruracunman y manachi ni pipis cushishgaga cawanmanchu. Juc pushacoj mana captinga manachi ima ruraytapis camäpacushwanchu ni imapis manachi ruracanmanchu.

7. Efesios 5:25, 28 textucunacho leishganchino, ¿warmiyoj cajcuna warminta imano tratanantataj Jehová munan?

⁷ Familian cushishga cawananpaj Jehová shumaj camacächishga captinga, ¿imanirtaj maychicaj warmicuna magar ushashga y maltratashga carcaycan? Chayga pasacun waquin olgucuna Jehová mandacushganta mana casucuptinmi; taytancuna mamanta imano mana ali tratashgannomi paycunapis warminta mana ali tratayta munapäcun. Waquinnami warmincunata magan o maltratar ushan ‘nogami wasïchoga mandaj cä’ nishpan; chaymi warmicuna runanta manchapaylapa rican y runan ima munashgalanta ruranpis. Pipis chayta rurarga, warmicunatami mana cajman churaycanman y mana ichiclapis respetaycanmanchu. * Caycuna pasananta Jehová mana ichiclapis munanchu (leiriy Efesios 5:25, 28).

8. ¿Pïcunapitataj tayta cajga yachacunman?

⁸ Tayta caj familianwan ali cacunanpäga Jehovapita y Jesuspitami yachacun. ¿Imanirtaj paycunapita yachacunman? Chayno captinga ¿imanotaj familiancho jucnin jucninpis cawapäcunga? Yachacurishun.

9. ¿Imanirtaj nishwan Jehovaga ñanpu shongu cashganta?

⁹ Ñanpu shongu cashwan. Lapanpitapis más yachaj caycarpis Jehovaga siervuncuna tapupashganta wiyanmi (Gén. 18:23, 24, 32). Maquincho caycajcuna imata rurananpaj nishgantapis payga casucunmi (1 Rey. 22:19-22). Juchaynaj caycarpis payga manami shuyaranchu imatapis mana pantaypa rurananchita. Siervuncunata yanapänanpämi listo caycan, chaynopa cushishga goyänanpaj (Sal. 113:6, 7). Chaymi Bibliacho David cayno nirgan: “Qamlami imaypis yanapamanki” (Sal. 27:9; Heb. 13:6). Davidga alejmi musyargan imaycatapis rurananpaj humilde cashpan yanapashganta (2 Sam. 22:36).

10. ¿Imanotaj Jesusga humilde cashga?

¹⁰ Jesús rurashganta ricärishun. Discipuluncunapa “yachachicojnin y Señornin” caycarpis, payga chaquincunatami maylapargan. Chay rurashganwanmi Jehovaga yachachimashcanchi olgu carpis warmi carpis ñanpu shongu canapaj. Jesús nirgan: “Noqata rikakamar qamkunapis rurapäkunaykipaqmi tsayno rurashqä” (Juan 13:12-17). Jesús alapa autoridäyoj caycarpis payga manami shuyararganchu waquincuna payta sirvinanta sinoga paymi waquincunata sirvirgan (Mat. 20:28).

11. ¿Imatataj yachacunman casado olgucuna Jehovapita y Jesuspita?

¹¹ ¿Imatataj yachacunchi? Juc casado olguga tucuynopami humilde canman. Puntataga manami warmin ni wamranpis imaycatapis mana pantaypa rurananta shuyaranmanchu, nircur imatapis manaraj decidirga puntataga familiantarämi tapucunman. Estados Unidos naciunpita, Marley jutiyoj paniga cayno wilacun: “Nogaga manami lapanchochu juc yarpayla  caycä runäwan, chayno captinpis payga alapa cuyapämashpanmi imatapis manaraj rurarga puntataga tapucamanraj”. Jinamanpis, juc humilde runaga wasicho warminta yanapänanpämi listo caycanman. Öraga capaz chayta rurayga aja canman. Rachel jutiyoj pani cayno wilacun: “Noga tashgächoga juc olgu maylapacuycajta o pichapacuycajta ricaycurga ‘warmi mandanan’ cashganta nipäcun”. Gam tiyashgayquicho chayno nipäcuptinga Jesús rurashganta yarpay; ashmaycunala chaquita maylaj caycaptinpis Jesusga apostulnincunapa chaquintami maylapargan. Familianwan ali cacoj runaga, manami runacunapa ricayninchochu ali ricashga cayta ashin, sinoga familianpachomi. Jinamanpis, ¿imano mastaj juc warmiyoj runa canman?

12. ¿Imatataj Jehová y Jesús ruran alapa cuyamashpanchi?

¹² Cuyacoj cashwan. Jehovaga alapa cuyacoj cashpanmi imaycatapis ruran (1 Juan 4:7, 8). Cuyamashpanchimi Palabran Bibliawan y pushacoj sirvejnincunawan yanapämanchi paypa amigun cananchipaj. Payga alapa cuyamashpanchimi cushishga sienticunanchipaj imaypis cuyamashganchita nimanchi. Y cawananchipäpis “paymi imaykatapis kamaripämantsi kushishqa kawanantsipaq” (1 Tim. 6:17). Juchalicushgapis cuyamashpanchimi payga corregimanchi. Churin Jesustapis salvamänanchipaj cachamorgan y Jesuspis alapa cuyamashpanchimi noganchiraycur wanurgan (Juan 3:16; 15:13). Jehovata y Jesusta mana cachaypa sirvishgaga paycunaga imaypis cuyaycämäshunmi (Juan 13:1; Rom. 8:35, 38, 39).

13. ¿Imanotaj juc warmiyoj olgu cuyacoj canman? (“ ¿Imatataj ruranman chaylaraj casacushga olgucuna warmin shongupita payta respetananpaj?” recuadrutapis ricay).

¹³ ¿Imatataj yachacunchi? Lapan casado olgucunaga, imaycata rurarga familianta cuyashpanmi ruranman, chayga alapa alimi, chaymi Bibliapis nin: “Diosta mana ricaycarga ¿imanöparaj ‘Diostami cuyä’  ninman runa-masintapis [o familiantapis] mana cuyaycarga?” (1 Juan 4:11, 20, TDI). Juc familianta cuyaj olguga, Jehová y Jesús rurashgannola rurayta munaj cajga familiantami yanapanga Jehovapa amigun cananpaj, cushishga sienticärinanpaj y lapan necesitashgantami gonga (1 Tim. 5:8). Wamrancunatapis shumaj yachachinga y shumaj anyapanga. Imatapis rurarga familianman yarpachacuycurmi ruranga y imano Jehovata cushichinanpaj cajman. Caycunata ichic masla tantiarcushun, y imanotaj tayta caj, Jehová y Jesús rurashgannola rurananpaj cajtapis.

14. ¿Imanotaj warmiyoj olgucuna warminta y wamrancunata yanapanman Jehovaman más yaracärinanpaj?

¹⁴ Warminta y wamrancunatami yanapanman Jehovata más reguinanpaj. Jesuspis Taytannolami discipuluncunata yanapargan Jehovaman más yaracunanpaj (Mat. 5:3, 6; Mar. 6:34). Chaynolami juc warmiyoj olgupis warminpis wamrancunapis Jehovata más sirvinanpaj yachachin (Deut. 6:6-9). Chaypäga paycunawan juntumi reuniuncunaman aywanman, Bibliata leinman, predicaj yargunman, chaynopa Jehovawan más amigo cananpaj.

15. ¿Imanotaj warmiyoj runa warminta y wamranta waylupanman?

¹⁵ Warminta y wamrancunatami waylupanman. Jehovaga mana pengacuypa Jesusta alapa cuyashganta nirgan (Mat. 3:17). Jesuspis discipuluncunata alapa cuyashgantami nirgan y imaycatami paycunaraycur rurargan, discipuluncunapis payta cuyashganta nipäcurgan (Juan 15:9, 12, 13; 21:16). Chaynola taytacunapis warminta y wamranta cuyashganta nipäcunman. Tayta carga, yachacuy warmiquita y wamrayquita alapa cuyashgayquita y valurashgayquita ninayquipaj, waquincunapa nawpancho niptiquipis alimi canga (Prov. 31:28, 29).

16. 1) ¿Ima mastataj olgucuna warminta y wamrancunata gonman? 2) Arunan captinpis, ¿imacho mastaj yanapanman warminta y wamrancunata?

¹⁶ Wasincho faltashgancunatami ricänan. Jehová israelitacunata lapan necesitashganta gorgan paycuna mana wiyacoj carcaycaptinpis (Deut. 2:7; 29:5). Canan wichanpis Jehovaga lapan necesitashganchitami gomanchi (Mat. 6:31-33; 7:11). Jesuspis discipuluncunata shumajmi cuidargan chaymi micuynincunapis gorgan (Mat. 4:24; 14:17-20). Chaynolami juc warmiyoj runapis Jehovapa shongunta cushichinanpäga warmin y wamran lapan necesitashganta gonan. Pero manami chayraycurchu aruylacho cacunman, sinoga Jehovaman más yaracunanpaj y cushishga cawananpäpis yanapanman.

17. ¿Imanotaj Jehová y Jesús shumaj yachachimanchi y anyapämanchi?

 ¹⁷ Shumaj yachachiy y anyapay. Jehovaga ali runa cananchita munarmi shumaj yachachimanchi y anyapämanchi (Heb. 12:7-9). Jesuspis Taytannola discipuluncunata shumaj yachachirgan y cuyacuywan anyapargan (Juan 15:14, 15). Payga manami permitirganchu discipuluncuna munashganta ruracunanta, jinan horami cuyacuywan anyapargan (Mat. 20:24-28). Payga musyanmi juchasapa cashganchita y öra öraga pantarinanchipaj cajta (Mat. 26:41).

18. ¿Imanotaj juc runa warminta y wamrancunata anyapanman?

¹⁸ Jehová y Jesús juchasapa cashganchita yarpashgannomi casado olgucunapis warmin y wamran pantariptenga juchasapa cashganta yarpan, y manami fiyupaga paycunawan rabiacunchu (Col. 3:19). Sinoga quiquinpis öra öraga pantarishganta yarparmi, Gálatas 6:1 texto nishganno ‘ali shimilanpa’ anyapan y Jesusnolami yachachin rurayninwan (1 Ped. 2:21).

19, 20. ¿Imanotaj juc olguga Jehová y Jesús rurashgannola imaycatapis ruranman?

¹⁹ Familiayquiraycur imaycatapis ruray. Jehovaga waquincunaparaycurmi imaycatapis ruran. Payga cawayta gomashcanchi y imaycatapis rurashga noganchi cushishga cawananchipaj. Churintapis noganchiraycurmi cachamushga yanapämänanchipaj. Jesuspis waquincunaraycurmi imaycatapis rurargan (Rom. 15:3). Juc cutichomi uticashga caycarpis achca runacunata yachachir galaycurgan (Mar. 6:31-34).

²⁰ Juc olgu familianpaj imatapis rurayta yarparga puntataga alirämi yarpachacunman y manami ali tucushpa raslaga quiquin munashganta ruranmanchu, sinoga Jehovapa yanapacuynintami ashinman. Chayno ruraptinga lapan familianwanmi ali cawacunga (Prov. 2:6, 7; Filip. 2:4). *

21. ¿Imatataj gatejnin caj yachacuycho yachacushun?

²¹ Warmiyoj olgucunaga warminwan y wamrancunawan ali capäcushganga manami facilchu, pero Jehovami cuentata mañanga imano ricashgantapis. Juc runa Jehová y Jesús rurashgannola ruraptinga ali majami canga. Y warmi cajpis Jehová mandacushganta cumpliptinga casado vidancho cushishgami cawanga. ¿Imatataj runayoj warmicuna ruranman Jehová mandacushganta casucunanpaj? Y ¿ima problemapataj pasan? Gatejnin caj yachacuycho chaycunapita yachacushun.