1. Со шај те влијајнел упро адава сар јекх мурш понашинела пе пле ромњаја хем пле чхавенцар?

СО ЗНАЧИНЕЛА туке о лафи „поглаварство“? Несаве мурша дозволинена и традиција, и култура или ленгири фамилија те влијајнен ко ленгоро начин сар постапинена пле ромњаја хем пле чхавенцар. Јекх пхен тари Европа, и Анита, вакерела: „Коте со живинава, о мануша верујнена кај и џувли тани потеле таро мурш хем кај ваљани ки лате те дикхел пе сар јекх слугинка“. А јекх пхрал, о Лука кова со живинела ко САД, вакерела: „Несаве дада сикавена пумаре чхавен кај о џувља ваљани те дикхен пе, а на те шунен пе, кај ленгоро мислење нане важно“. Ама, о Јехова на мангела о рома те понашинен пе аѓаар пумаре ромњенцар. (Споредин Марко 7:13.) Тегани сар шај јекх мурш те овел јекх шукар фамилијарно поглавари?

2. Со ваљани јекх фамилијарно поглавари те џанел, хем соске?

² Те шај те овел шукар поглавари, јекх мурш ваљани те хаљол со родела лестар о Јехова те керел. Ов исто аѓаар, ваљани те џанел соске о Јехова поставинѓа о поглаварство хем сар шај те џал пало пример е Јеховаскоро хем е Исусескоро. Соске тано важно јекх мурш те џанел акала буќа? Адалеске со о Јехова е фамилијарно поглаваренге денѓа несаво авторитети хем очекујнела лендар те користинен ле ко шукар начин (Лука 12:48б).

3. Со сикљоваја башо поглаварство таро адава со пишинела ки Библија ко 1. Коринќаните 11:3?

³ Читин 1. Коринќаните 11:3. Акава стихо опишинела о начин сар о Јехова организиринѓа пле фамилија ко небо хем ки Пхув. Ко поглаварство тане вклучиме дуј важна буќа — о авторитети хем и одговорност. О Јехова  тано „о поглавари“ хем ле иси ле о најбаро авторитети. Адалеске са лескере чхаве, хем о ангелија хем о мануша, тане одговорна англи лесте (Рим. 14:10; Еф. 3:14, 15). О Јехова денѓа е Исусеске авторитети упро собрание, ама о Исус тано одговорно англо Јехова башо начин сар постапинела аменцар (1. Кор. 15:27). О Јехова исто аѓаар денѓа авторитети е ромеске упри ромни хем упро чхаве, ама о ром тано одговорно англо Јехова хем англо Исус башо начин сар постапинела пле фамилијаја (1. Пет. 3:7).

4. Саво авторитети иси е Јехова хем е Исусе?

⁴ Сар Најбаро поглавари, е Јехова иси ле авторитети те анел правилија башо адава сар ваљани лескере чхаве те понашинен пе, хем те казнинел адален со на икерена пе ко адала правилија (Иса. 33:22). Сар поглавари ко собрание, е Исусе да иси ле право те керел исто адава ко собрание (Гал. 6:2; Кол. 1:18-20).

5. Саво авторитети иси јекхе поглаваре ки пли фамилија, хем сар тано ограничимо лескоро авторитети?

⁵ Исто сар о Јехова хем о Исус, о поглавари тари јекх христијанско фамилија иси ле авторитети те анел одлуке баши пли фамилија (Рим. 7:2; Еф. 6:4). Ама лескоро авторитети тано ограничимо. На пример, лескере правилија ваљани те темелинен пе ко начелија со аракхљона ко е Девлескоро лафи (Изр. 3:5, 6). Хем јекх фамилијарно поглавари нане ле авторитети те анел правилија околенге со нане дело тари лескири фамилија (Рим. 14:4). Исто аѓаар, кеда лескере чхаве или чхаја бајрона хем на живинена више ко исто кхер, ола понадари да ка поштујнен ле, ама ов нане те овел више ленгоро поглавари (Мат. 19:5).

6. Соске о Јехова воспоставинѓа о поглаварство?

⁶ О Јехова воспоставинѓа о поглаварство адалеске со мангела пле фамилија. Адава тано поклон лестар. Адалеске со иси поглаварство, е Јеховаскири фамилија шај те функциониринел ко мирно начин хем те овел ла редо (1. Кор. 14:33, 40). Ако нане јасно касте иси авторитети, е Јеховаскири фамилија нане те овел организирими хем нане те овел бахтали. На пример, никој нане те џанел кој ваљани те анел конечна одлуке хем кој ваљани те керел адава со одлучинѓа пе.

7. Сар со пишинела ко Ефешаните 5:25, 28, сар мангела о Јехова те понашинен пе о рома пле ромњенцар?

⁷ Ако о поглаварство тано јекх шукар бути, тегани соске бут џувља авдиве осетинена пе кај тане малтретириме хем контролириме таро пумаро ром? Адава тано адалеске со бут мурша на мангена те шунен е Јеховаскере мерилија баши фамилија, наместо адава ола џана пало пумаре обичаија или традицие. Или понашинена пе лошно пумаре ромњенцар, те шај ола те осетинен пе шукар. На пример, јекх ром шај те доминиринел упри пли ромни те шај те осетинел пе по важно хем те докажинел е јаверенге кај ов тано „право мурш“. Ов шај мислинела кај нашти те чхивел ла силаја те мангел ле, ама шај те керел ој те дарал лестар. Хем ов шај те користинел и дар сар начин те контролиринел ла. * Скроз тано погрешно кеда јекх мурш размислинела хем постапинела ко асавко начин. Ов на поштујнела е ромња сар со ваљани хем адава тано спротивно таро адава со мангела о Јехова. (Читин Ефешаните 5:25, 28.)

8. Сар шај јекх мурш те сикљол те овел шукар поглавари?

⁸ Јекх мурш те шај те овел шукар поглавари ваљани те џал пало е Јеховаскоро пример хем е Исусескоро, аѓаар со ка сикљол лендар сар  те користинел пло авторитети. Те дикха дуј особине кола со сикавена лен о Јехова хем о Исус, хем те дикха сар јекх поглавари шај те сикавел акала особине пле ромњаке хем пле чхавенге.

9. Сар о Јехова сикавела понизност?

⁹ Понизност. О Јехова тано најмудро саринендар, сепак шунела пле слугенгере предлогија (1. Мој. 18:23, 24, 32). Ов дозволинела адаленге сој тане тело лескоро авторитети те ден предлогија (1. Цар. 22:19-22). О Јехова тано совршено, ама ов на очекујнела амен да те ова совршена. Наместо адава, ов поможинела е несовршено манушенге кола со служинена леске те овен успешна (Пс. 113:6, 7). Уствари, и Библија вакерела кај о Јехова тано адава со поможинела аменге (Пс. 27:9; Евр. 13:6). О цари о Давид вакерѓа кај ов шај сине те керел баре буќа само адалеске со о Јехова сине понизно хем поможинѓа леске (2. Сам. 22:36).

10. Сар о Исус сикавѓа понизност?

¹⁰ Те дикха е Исусескоро пример. Иако сине Господари хем Учители пле учениконге, ов тховѓа ленгере пре. Која тани јекх причина соске о Јехова мукхља те овел пишимо акава извештај ки Библија? Те шај е поглаваренге, а исто аѓаар сариненге, те дел пример кова со ваљани те слединел пе. О Исус вакерѓа: „Денѓум тумен пример, тумен да те керен аѓаар сар со керѓум ме“ (Јован 13:12-17). Иако сине ле баро авторитети, о Исус на очекујнѓа те служинен леске. Наместо адава, ов служинѓа е јаверенге (Мат. 20:28).

11. Со шај о фамилијарна поглаварија те сикљон баши понизност таро Јехова хем таро Исус?

¹¹ Поуке аменге. Јекх фамилијарно поглавари шај те сикавел понизност ко бут начинија. На пример, ов на очекујнела совршенство тари пли ромни хем пле чхаве. Ов шунела ленгоро мислење чак ако тано по различно таро лескоро. И Марлеј, која со живинела ко САД, вакерела: „Ме хем мо ром понекогаш иси амен различно мислење. Ама џанава кај ценинела ман хем поштујнела ман адалеске со пучела ман башо мло мислење, хем шукар размислинела башо адава англедер те анел несави одлука“. Освен адава, јекх понизно ром спремно тано те поможинел ко кхер, чак кеда о мануша коте со живинела дикхена ки адаја бути сар џувликани бути. Адава шај те овел бут пхаро. Соске? Јекх пхен која со викинела пе Рејчел вакерела:  „Адатхар котар со авава, ако јекх ром поможинела пле ромњаке те тховел о чаре или те чистинел кхере, лескере комшие хем и фамилија ка мислинен кај ов нане ’право мурш‘, хем кај нашти те контролиринел пле ромња“. Ако асавко стави иси е манушен коте со живинеа, ма бистре кај о Исус тховѓа о пре пле учениконгере, иако адаја бути керела ла сине јекх робо. Јекх шукар поглавари на мангела о јавера те мислинен баши лесте кај тано силно хем важно мануш. Наместо адава, ов мангела лескири ромни хем лескере чхаве те осетинен пе шукар хем бахтале. Освен и понизност, која јавер особина тани важно те шај те овел пе јекх шукар поглавари?

12. Со поттикнинела о мангипе е Јехова хем е Исусе те керен?

¹² Мангипе. Са со керела о Јехова, мотивиримо тано таро мангипе (1. Јов. 4:7, 8). Ов сикавела кај грижинела пе башо амаре духовна потребе адалеа со денѓа амен пло Лафи — и Библија — хем пли организација. Исто аѓаар, ов грижинела пе башо амаре емоционална потребе адалеа со уверинела амен кај мангела амен. А дали грижинела пе башо амаре материјална потребе? О Јехова дела амен са те шај те уживина (1. Тим. 6:17). Кеда грешинаја, ов исправинела амен, ама на чхинавела те мангел амен. Адалеске со мангела амен, о Јехова денѓа и откупнина аменге. Исто аѓаар, о Исус да бут мангела амен адалеске со денѓа пло живото баши аменде (Јован 3:16; 15:13). Ништо нашти те чхинавел о мангипе со иси е Јехова хем е Исусе спрема пле верна слуге (Јован 13:1; Рим. 8:35, 38, 39).

13. Соске тано важно јекх фамилијарно поглавари те сикавел мангипе пле фамилијаке? (Дикх и рамка „ Сар шај јекх ром кова сој нево ко брако те заслужинел поштовање тари пли ромни?“)

¹³ Поуке аменге. Са со керела јекх фамилијарно поглавари ваљани те овел мотивиримо таро мангипе. Соске адава тано добором важно? О апостол Јован вакерѓа: „Кој на мангела пле пхрале или пле фамилија касте со дикхела, нашти те мангел е Девле касте со на дикхела“ (1. Јов. 4:11, 20). Јекх ром кова со мангела пле фамилија хем со мангела те џал пало пример е Јеховаскоро хем е Исусескоро, ка грижинел пе  пле фамилијаке ко духовно, емоционално хем материјално поглед (1. Тим. 5:8). Ов ка сикавел хем ка воспитинел пле чхавен. Ов исто аѓаар, понадари да ка сикљол те анел одлуке со ка фалинен е Јехова хем ка овен корисна лескере фамилијаке. Акана ка кера лафи башо са акала буќа, хем ка дикха сар шај о фамилијарна поглаварија те џан пало е Јеховаскоро хем е Исусескоро пример.

14. Сар јекх фамилијарно поглавари грижинела пе башо пле фамилијакере духовна потребе?

¹⁴ Грижинела пе башо пле фамилијакере духовна потребе. О Исус сикавѓа кај тано сар пло Дад, адалеске со поможинѓа пле учениконге те овел лен зорали вера (Мат. 5:3, 6; Мар. 6:34). Исто аѓаар, и најважно бути јекхе фамилијарно поглавареске тани те поможинел пле фамилијаке те овел паше е Јеховаја (5. Мој. 6:6-9). Адава керела адалеа со ов хем лескири фамилија читинена хем проучинена е Девлескоро Лафи, џана ко состанокија, проповединена о шукар хабери хем овена шукар амала е Јеховаја.

15. Сар шај јекх фамилијарно поглавари те грижинел пе пле фамилијаке ко емоционално поглед?

¹⁵ Грижинела пе башо пле фамилијакере емоционална потребе. О Јехова англо јавера вакерѓа е Исусеске кај мангела ле (Мат. 3:17). О Исус често сикавѓа кај мангела пле ученикон хем лафенцар хем постапкенцар, а исто аѓаар ола да сикавѓе кај мангена ле (Јован 15:9, 12, 13; 21:16). О фамилијарно поглавари шај те сикавел кај мангела пле ромња хем пле чхавен адалеа со ка керел нешто баши ленде, сар на пример те проучинел и Библија ленцар. Ов исто аѓаар, ваљани те вакерел ленге кај мангела лен хем кај ценинела лен, хем ако соодветно те пофалинел лен англо јавера (Изр. 31:28, 29).

16. Со јавер ваљани те керел о фамилијарно поглавари, хем сар шај те овел урамнотежено?

¹⁶ Грижинела пе башо пле фамилијакере материјална потребе. О Јехова грижинела пе сине е Израелцонге башо ленгере основна потребе чак кеда сине казниме башо адава со на сине послушна (5. Мој. 2:7; 29:5). Ов исто аѓаар авдиве да грижинела пе башо амаре основна потребе (Мат. 6:31-33; 7:11). Слично сар о Јехова, о Исус да хранинѓа околен со слединена ле сине (Мат. 14:17-20). Ов исто аѓаар грижинела пе сине башо ленгоро састипе (Мат. 4:24). Те шај те угодинел е Јеховаске, јекх фамилијарно поглавари мора те грижинел пе башо пле фамилијакере материјална потребе. Ама, ваљани те овел урамнотежено. Ов на ваљани те трошинел добором време ки бути со ка нашти те грижинел пе пле фамилијаке ко духовно хем ко емоционално поглед.

17. Сар о Јехова хем о Исус сикавена амен хем воспитинена амен?

¹⁷ Сикавела пле фамилија. О Јехова сикавела амен хем воспитинела амен адалеске со мангела те поможинел аменге (Евр. 12:7-9). Слично сар о Јехова, о Исус љубезно сикавела  околен сој тане тело лескоро авторитети (Јован 15:14, 15). Ов дела строга советија, ама исто аѓаар тано љубезно (Мат. 20:24-28). Ов хаљола кај сием несовршена хем кај често грешинаја (Мат. 26:41).

18. Со на бистрела јекх шукар фамилијарно поглавари?

¹⁸ Јекх фамилијарно поглавари кова со џала пало е Јеховаскоро хем е Исусескоро пример на бистрела кај лескири ромни хем лескере чхаве тане несовршена. Ов на понашинела пе ленцар грубо (Кол. 3:19). Наместо адава, ов применинела о начело сој тано пишимо ко Галатите 6:1 аѓаар со трудинела пе те советинел лен ко љубезно начин, хем на бистрела кај ов да тано несовршено. Слично сар о Исус, ов хаљола кај о најшукар начин те сикавел пе некас тано пле примереа (1. Пет. 2:21).

19-20. Кеда јекх фамилијарно поглавари анела одлуке, сар шај те овел сар о Јехова хем о Исус?

¹⁹ Анела несебична одлуке. О Јехова анела одлуке сој тане башо е јаверенгоро шукарипе. На пример, ов одлучинѓа те створинел о живото, на баши пли корист него ов мангља амен те уживина ко живото. Никој нашти сине силаја те чхивел ле те дел пле чхаве те мерел башо амаре гревија. Ов спремно керѓа адава адалеске со мангела те поможинел амен. Исто аѓаар, о Исус да анѓа одлуке кола со поможинѓе е јаверенге (Рим. 15:3). На пример, кеда сине бут уморно ов сикавѓа буте манушен наместо те одморинел пе (Мар. 6:31-34).

²⁰ Јекх шукар фамилијарно поглавари џанела кај јекх таро најпхаре буќа тано те анел мудра одлуке баши пли фамилија, хем адаја одговорност тани бут важно леске. Ов избегинела те анел одлуке кола со само леске свиџинена пе хем сој тане спрема лескере чувствија. Наместо адава, ов дозволинела о Јехова те сикавел ле те анел шукар одлуке * (Изр. 2:6, 7). Ко асавко начин, ов ка поможинел е јаверенге, а на песке (Фил. 2:4).

21. Со ка дикха ки следно статија?

²¹ О Јехова денѓа е фамилијарно поглаваренге јекх пхари задача, хем лендар очекујнела те ден пестар са те шај те исполнинен ла. Ама, ако јекх ром трудинела пе те слединел о пример е Јеховаскоро хем е Исусескоро, ов ка овел јекх шукар фамилијарно поглавари. Хем ако и ромни керела пли улога, о брако ка овел бахтало. Сар ваљани и ромни те дикхел ко поглаварство, хем саве предизвикија шај те овен ла? И следно статија ка дел одговор ко акала пучиба.