1. So šaj te utičini ko odova sar jekh manuš ponašini pe pekle romnjaja hem pekle ćhavencar?

SO O lafi „poglavarstvo“ značini tuće? Disave manuša dozvolinena i kultura ja o način sar barilje, te utičini ko odova sar on ponašinena pe premali pi romni hem premalo pe ćhave. Zapazin so i Janita, i phen koja živini ki Evropa, phenela: „Akate kaj me živinava, o manuša mislinena so o murša tane považna ando romnja hem so ko romnja valjani te dikhel pe sar ko sluškinje.“ Hem o phral kova vićini pe Luka, kova živini ki Amerika, phenela: „Disave dada sikavena pe ćhaven so e romnjen valjani te dikhen, a na te šunen, so olengo mišljenje nane važno.“ Ama, o Jehova na mangela o roma ađahar te ponašinen pe pekle romnjencar (Uporedin e stihoja ando Marko 7:13). Tegani, sar šaj jekh rom te sikljol te ovel šukar poglavari?

2. So jekh poglavari mora te đanel hem sose?

² Te šaj te ovel šukar poglavari, jekh murš najangleder mora te haljol so o Jehova rodela olestar. Isto ađahar, ov valjani te đanel sose o Jehova disavenđe dinđa te oven poglavarija hem sar šaj ov te oponašini e Jehova hem e Isuse. Sose tano važno jekh murš te đanel sa odova? Odolese so o poglavarija ando Jehova dobinđe disavo autoritet hem ov očekujini olendar te koristinen le ko šukar način (Luka 12:48b).

3. So sikljovaja ando poglavarstvo kotar i 1. Korinćanima 11:3?

³ Čitin 1. Korinćanima 11:3. Akava stiho opisujini o način ko kova o Jehova organizujinđa pe porodica ko nebo hem ki phuv. O poglavarstvo uključini duj najvažna buća – o autoritet hem i odgovornost. O Jehova tano poglavari ja najbaro autoritet, hem sa olese ćhave, hem o anđelija hem o manuša, tane odgovorna anglo leste aso odova sar koristinena  po autoritet (Rimlj. 14:10; Ef. 3:14, 15). O Jehova dinđa e Isusese autoritet upri skupština hem o Isus tano odgovorno e Jehovase aso odova sar ponašini pe amencar (1. Kor. 15:27). Isto ađahar, o Jehova dinđa e romese autoritet upri pi romni hem upro pe ćhave, ama o rom tano odgovorno hem e Jehovase hem e Isusese aso odova sar ponašini pe pekle porodicaja (1. Petr. 3:7).

4. Kova autoritet isi len o Jehova hem o Isus?

⁴ O poglavari andi pi porodica ko nebo hem ki phuv, o Jehova, isi le autoritet te ćhivel pravilija pe ćhavenđe ando odova sar valjani te ponašinen pe. Isto ađahar, ov na ćhivela amen zorjeja te ićera odola pravilija, ama isi le pravo te ispravini amen ako na ićeraja amen ko odola pravilija (Is. 33:22). Hem sar poglavari andi hrišćansko skupština, o Isus isi le pravo te ćhivel pravilija hem te ispravini amen ako na ićeraja amen ko odola pravilija (Gal. 6:2; Kol. 1:18-20).

5. Kova autoritet o poglavari ki porodica isi le hem koja tani i granica ando oleso autoritet?

⁵ Sar o Jehova hem o Isus, hem o poglavari isi le autoritet te anel odluke asi pi porodica (Rimlj. 7:2; Ef. 6:4). Ama, oleso autoritet isi le granice. Na primer, olese pravilija valjani te temeljinen pe ko načelija ando e Devleso Lafi (Posl. 3:5, 6). Hem o poglavari nane le autoritet te ćhivel pravilija okolenđe kola nane deo andi olesi porodica (Rimlj. 14:4). Isto ađahar, ked olese ćhave hem ćhaja barjona hem ikljona ando ćher, on nastavinena te poštujinen le, ama ov više nane olengo poglavari (Mat. 19:5).

6. Sose o Jehova disavenđe dinđa te oven poglavarija?

⁶ O Jehova disavenđe dinđa te oven poglavarija sebepi so mangela pe porodica. Odova tano oleso poklon amenđe. Sebepi o poglavarstvo, ki e Jehovasi porodica šaj te ovel mir hem redo (1. Kor. 14:33, 40). Ked na bi đanela pe koj tano poglavari, e Jehovasi porodica na bi ovela organizujimi hem bahtali. Na primer, niko na bi đanela ko valjani te anel o konačna odluke hem ko valjani te pobrinini pe te ćerel pe odova soj tano odlučimo.

7. Premalo Efešanima 5:25, 28, sar o Jehova mangela o roma te ponašinen pe premalo pe romnja?

⁷ Ako o poglavarstvo tano diso šukar, tegani sose disave romnja osetinena pe so olenge roma okrutno ponašinena pe premalo lende hem so kontrolišinena len? Odova ovela sebepi so but roma na ićerena pe ko e Jehovase načelija asi porodica već ićerena pe ko običaija kola avena andi olengi kultura. Isto ađahar, šaj zlostavinena pe romnjen te bi zadovoljinena pe sebična želje. Na primer, o rom šaj te kontrolišini pe romnja sose mangela te ovel považno olatar ja te mothovi averenđe so ov tano gazda ko ćher. Ov šaj te mislini so našti te ćhivel la zorjeja te mangel le, ama šaj te ćhivel la te daral olestar. Hem odija dar šaj te koristini te bi kontrolišini la. * Odoleja sar razmislini hem sar ponašini pe, o rom na mothovi pe romnjaće i čast hem o poštovanje kova oj zaslužini, a odova tano suprotno ando odova so o Jehova rodela ando roma. (Čitin Efešanima 5:25, 28.)

8. Sar šaj o rom te sikljol te ovel šukar poglavari?

⁸ O rom šaj te sikljol te ovel šukar poglavari ađahar so ka oponašini e Jehova hem e Isuse ko odova sar on mothovena po poglavarstvo. Akana ka dikha samo duj osobine  kola o Jehova hem o Isus mothovena. Hem zapazin sar o poglavari šaj te mothovi odola osobine premali pi romni hem premalo pe ćhave.

9. Sar o Jehova mothovi soj tano ponizno?

⁹ Poniznost. Iako o Jehova tani najmudro osoba ko celo svemir, ov tano spremno te šunel so olese sluge mislinena (Post. 18:23, 24, 32). Ov dozvolinđa okolenđe upro kola isi le autoritet te den pe predlogija (1. Kralj. 22:19-22). Iako o Jehova tano savršeno, ov na očekujini amendar akana te ova savršena. Umesto odova, ov pomožini e nesavršeno manušenđe te oven uspešna đi služinena lese (Ps. 113:6, 7). U stvari, i Biblija čak phenela so o Jehova tano amaro „pomoćniko“ (Ps. 27:9; Jevr. 13:6). O kralj David đanđa so šajinđa te završini bari buti koja hine lese dindi samo sebepi e Jehovasi poniznost (2. Sam. 22:36).

10. Sar o Isus mothovđa poniznost?

¹⁰ Hajde te dikha e Isuseso primer. Iako hine Gospod hem Učitelj, ov thovđa pe učenikonenge pre. Sose o Jehova manglja akava izveštaj te ovel pisimo ki Biblija? Sebepi so manglja o poglavarija hem avera te dikhen oleso primer. Kokri o Isus phenđa: „Dinđum tumenđe primer hem tumen te ćeren ađahar sar so me ćerđum tumenđe“ (Jov. 13:12-17). Iako hine le baro autoritet, o Isus na očekujinđa avera te služinen lese. Umesto odova, ov služinđa averenđe (Mat. 20:28).

11. So o poglavari šaj te sikljol andi e Jehovasi hem e Isusesi poniznost?

¹¹ Pouke amenđe. O poglavari šaj te mothovi poniznost ko but načinija. Na primer, ov na očekujini andi pi romni hem ando pe ćhave te oven savršena. Ov spremno šunela olengo mišljenje iako podijekh puti olengo mišljenje na slažini pe odoleja so ov mislini. I Marli, koja živini ki Amerika, phenela: „Disavo puti, mo rom hem me nane amen isto mišljenje. Ama, osetinava so ov cenini man hem so poštujini man odolese so pućela aso mo mišljenje hem pažljivo razmislini odolestar angleder te anel i odluka.“ Uzo odova, o rom kova tano ponizno tano spremno te ćerel disave buća ko ćher iako o manuša šaj te phenen so odija tani e romnjaki buti. Odova šaj te ovel izazov. Sose? I phen, koja vićini pe Rejčel, phenela: „Uduri kaj bijandiljum,  ako o rom pomožini pe romnjaće te thovel o ćare ja te čistini o ćher, o komšije hem o rođakija ka phenen soj tano papučari. On ka mislinen so oj tani gazda ko ćher.“ Ako o manuša ko than kaj živineja ađahar razmislinena, na valjani te bistre so o Isus thovđa pe učenikonenge pre iako odija buti ćerđe o robija. Jekh šukar poglavari na brinini pe odolestar so avera ka phenen olestar. Olese tano važno, olesi romni hem olese ćhave te osetinen pe šukar. Uzi poniznost, koja aver osobina o šukar poglavari valjani te ovel le?

12. So o Jehova hem o Isus ćerena sebepi so mangena amen?

¹² Mangipe. Sa so o Jehova ćerela, ćerela ando mangipe (1. Jov. 4:7, 8). Ov mothovi so mangela amen ađahar so brinini pe aso amare duhovna potrebe prekalo po Lafi, i Biblija, hem prekali pi organizacija. Ov brinini pe aso amare emocionalna potrebe ađahar so uverini amen so mangela amen. Isto ađahar, o Jehova brinini pe hem aso amare fizička potrebe ađahar so „pherdo dela amen sa ko so uživinaja“ (1. Tim. 6:17). Ked grešinaja, ov ispravini amen hem ponodri mangela amen. Sebepi so mangela amen, o Jehova obezbedinđa amenđe i otkupno žrtva. A o Isus odobor manglja amen so hine spremno te del po đivdipe amenđe (Jov. 3:16; 15:13). Ništa našti te ćhinavi e Jehova hem e Isuse te mangen okolen kola tane verna olenđe (Jov. 13:1; Rimlj. 8:35, 38, 39).

13. Sose tano važno o poglavari te mothovi so mangela pe porodica? (Isto ađahar, dikh o okvir „ Sar šaj jekh manuš kova tek ženinđa pe te zaslužini pe romnjako poštovanje?“)

¹³ Pouke amenđe. Sa so o poglavari ćerela, valjani te ćerel ando mangipe. Sose tano odova odobor važno? O apostol Jovan phenela: „Ako neko na mangela pe phrale, [ja pe porodica] kas dikhela, našti te mangel e Devle, kas na dikhela“ (1. Jov. 4:11, 20). O manuš kova mangela pe porodica hem kova mangela te oponašini e Jehova hem e Isuse, ka brinini pe aso pe porodicake duhovna, emocionalna hem fizička potrebe (1. Tim.  5:8). Ov ka sikavi hem ka ispravini pe ćhaven. Isto ađahar, ov hem ponodri ka trudini pe te anel odluke kolencar ka mothovi so poštujini e Jehova hem sebepi kola olese porodicaće ka ovel šukar. Akana ka dikha, kola odgovornostija jekh poglavari isi le hem sar šaj te oponašini e Jehova hem e Isuse.

14. Sar o poglavari brinini pe aso pe porodicake duhovna potrebe?

¹⁴ Brinini pe aso pe porodicake duhovna potrebe. O Isus mothovđa soj tano sar po Dad, odolese so manglja te pomožini pe učenikonenđe hem ponodri te ovel len zorali vera (Mat. 5:3, 6; Mar. 6:34). Isto ađahar, e poglavarese tano najvažno te pomožini pe porodicaće te ovel paše e Jehovaja (Pon. zak. 6:6-9). Ov ćerela odova ađahar so zajedno pe porodicaja čitini hem proučini e Devleso Lafi, đala ko sastankija, propovedini i šukar vest hem pomožini pe porodicaće te ovel hem te aćhol paše e Jehovaja.

15. Sar o poglavari brinini pe aso pe porodicake emocionalna potrebe?

¹⁵ Brinini pe aso pe porodicake emocionalna potrebe. O Jehova anglo avera phenđa e Isusese so mangela le (Mat. 3:17). But putija, o Isus odoleja so ćerđa hem so vaćerđa mothovđa pe učenikonenđe so mangela len. Isto ađahar, hem olese učenikija phenđe lese so mangena le (Jov. 15:9, 12, 13; 21:16). O poglavari šaj te mothovi pe romnjaće hem pe ćhavenđe so mangela len odoleja so ćerela, sar soj tano na primer, ked proučini i Biblija olencar. Isto ađahar, ov valjani te phenel lenđe so mangela len hem soj tane važna olese hem ked odova tano ko than, te pohvalini len anglo avera (Posl. 31:28, 29).

16. So pana o poglavari mora te ćerel hem sose valjani te ovel oprezno?

¹⁶ Brinini pe aso pe porodicake fizička potrebe. Čak hem ked morandilo te kaznini e Izraelcen sebepi so hine neposlušna, o Jehova niked na ćhinavđa te brinini pe aso olenge osnovna potrebe (Pon. zak. 2:7; 29:5). Isto ađahar, hem avdije ov brinini pe aso amare osnovna potrebe (Mat. 6:31-33; 7:11). Isto ađahar, o Isus parvarđa bute manušen (Mat. 14:17-20). Uzo odova, ov saćarđa buten kola hine naborme (Mat. 4:24). Te šaj o Jehova te ovel zadovoljno oleja, o poglavari mora te brinini pe aso pe porodicake fizička potrebe. Ama, o poglavari valjani te ovel oprezno. Ov na valjani odobor te ćerel buti so nane le vreme te brinini pe aso pe porodicake duhovna hem emocionalna potrebe.

17. Sar o Jehova hem o Isus sikavena amen hem ispravinena amen?

¹⁷ Sikavi pe porodica. O Jehova sikavi amen hem ispravini amen sebepi amaro šukaripe (Jevr. 12:7-9). Sar po Dad, hem o Isus mangipaja sikavi okolen upro kola ov isi le autoritet (Jov. 15:14, 15). Ked dela savet, ov tano  ljubazno (Mat. 20:24-28). Ov haljola so hijam nesavršena hem so but putija šaj te ćera greške (Mat. 26:41).

18. So jekh šukar poglavari na bistrela?

¹⁸ O poglavari kova oponašini e Jehova hem e Isuse, na bistrela so olesi romni hem olese ćhave tane nesavršena. Ov na holjani upri pi romni hem upro pe ćhave (Kol. 3:19). Umesto odova, ov ićeri pe ko načelo ando Galatima 6:1 hem blago tano đi ispravini len. Ði ćerela odova ov na bistrela so hem ov tano nesavršeno. Sar o Isus, ov haljola so najšukar način te sikavi len tano ađahar so ka del len primer (1. Petr. 2:21).

19-20. Ked valjani te anel odluke, sar šaj o poglavari te oponašini e Jehova hem e Isuse?

¹⁹ Na anela odluke kola tane šukar samo olese. O Jehova anela odluke kola tane aso sarinengo šukaripe. Na primer, ov sa stvorinđa, na sebepi poklo, nego sose manglja amen te uživina ko đivdipe. Niko naštinđa te ćhivel le zorjeja te del pe Ćhave te šaj te oven oprostime amare grehija. Ov spremno ćerđa odija žrtva sebepi amaro šukaripe (Rimlj. 15:3). Hem o Isus hine spremno te anel odluke kola hine aso averengo šukaripe. Na primer, ked hine umorno, umesto te odmorini pe, ov sikavđa e manušen (Mar. 6:31-34).

²⁰ O šukar poglavari đanela so jekh andi najphari buti koja ov mora te ćerel tani te anel mudra odluke pe porodicaće. Ov ozbiljno dikhela ki odija odgovornost. Ov trudini pe te na anel odluke kola sviđinena pe samo olese ja sar avela olese. Umesto odova, ov dozvolini e Jehovase te sikavi le sar te anel šukar odluke * (Posl. 2:6, 7). Ko asavko način, ov ka mislini ko averengo šukaripe a na ko poklo (Fil. 2:4).

21. Sostar ka vaćera ko aver članko?

²¹ O poglavarija ando Jehova dobinđe jekh pharo zadatko hem on tane odgovorna anglo leste aso odova sar ćerena le. Ako o rom dela sa pestar te oponašini e Jehovaso hem e Isuseso primer, ov ka ovel šukar poglavari pe porodicaće. Ako hem i romni ćerela odova so rodela pe olatar, tegani on ka oven len bahtalo brako. Sar i romni valjani te dikhel ko poglavarstvo hem kola izazovija šaj te ovel la? O odgovorija ka dikha ko aver članko.