1. Ino iaby ty raha mety hisy vokany amy fandaisani-lahilahy raiky ty valy amin’anany?

INO ty avy an-tsainao voalohany laha vo maharè hoe “fahefà”? Manao akory, ohatsy, ty fahefàni-loham-pianakavia? Lasa ty lilin-draza, ty fomban-tany, na ty fianakaviany ro mikomandy ty lahilahy sisany amy ze fomba tokony handaisany ty valy amin’anany. Henteo moa raha nivolanini-ranabavy Yanita baka Eropy any toy: “Mieritseritsy ty olo aminay atoy hoe ambany ty ampela sady manahaky mpiasa io.” Zao koa ty nivolanini-Luke, rahalahy a Etazinỳ any: “Misy lahilahy sisany mampianatsy ty anakilahiny hoe tsy voatery hojanjiny ty ampela lafa mivola, satria tsy misy dikany ty raha volanin-drozy.” Fe tsy manahaky ani-zay ty teani-Jehovah hataoni-lahilahy amy ty valiny. (Ampitovizo amy Marka 7:13.) Ka manao akory zany ty tokony hataoni-loham-pianakavia?

2. Ino ty tokony ho haini-loham-pianakavia, le ino ty antony?

² Tokony ho haini-loham-pianakavia tse hoe ino ty teani-Jehovah hataony. Tokony ho hainy koa hoe manino Jehovah ro nanome fahefà ho an’olo sisany, le akory ty azony anahafa ani-Jehovah noho Jesosy. Tena tokony hahay ani-raha reo ty lahilahy, satria voafetra ty fahefà nameani-Jehovah ho ani-loham-pianakavia sady teany hampiasan-drozy soa.—Lioka 12:48b.

3. Ino ty ianarantsika mikasiky fahefà laha hentea ty 1 Korintianina 11:3?

³ Vakio 1 Korintianina 11:3. Atoroni-andininy io hoe akory ty nandaminani-Jehovah ty fianakaviany an-danitsy any noho an-tany etoy. Ie ty lohani-fianakavia io, ka ie zany ro mana ty  fahefà fara tampony. Nizara fahefà Jehovah lafa nandahatsy ty fianakaviany iaby, fe mbo hataony ankety rozy amy ze fomba hampiasan-drozy ty fahefàn-drozy. (Rom. 14:10; Efes. 3:14, 15) Nameani-Jehovah fahefà amy fiangona Jesosy, fe tsy maintsy maneky ty fahefàni-Jehovah avao ie. Henteani-Jehovah soa ty fomba andaisany antsika. (1 Kor. 15:27) Nameani-Jehovah fahefà amy valy amin’anany koa ty lahilahy, fe mbo hodinini-Jehovah noho Jesosy ie amy ze fomba andaisany ani-trano raiky aminy reo.​—1 Pet. 3:7.

4. Mana fahefà hanao ino Jehovah noho Jesosy?

⁴ Jehovah ro lohani-fianakaviany an-danitsy any noho an-tany etoy. Afaky mamoro fitsipiky mikasiky ze teany hataoni-anany zany ie, sady azony atao ze hahavy an-drozy hanoriky ani-raha rey. (Isa. 33:22) Afaky manao manahaky ani-zay amy fiangona koa Jesosy, azy lohani-fiangona iny.​—Gal. 6:2; Kol. 1:18-20.

5. Mana fahefà hanao ino ty loham-pianakavia kristiana, le zisiky aia ty fetrany?

⁵ Manahaky ani-Jehovah noho Jesosy koa ty loham-pianakavia kristiana. Mana ty fahefàny ie satria ie ro manapa-kevitsy ho ani-fianakaviany. (Rom. 7:2; Efes. 6:4) Fe misy fetrany fahefàny zay. Tokony hataony mifanaraky amy torolalani-Baiboly, ohatsy, ty fitsipiky apetrakiny. (Ohab. 3:5, 6) Tsy mana zo hametraky fitsipiky ho an’olo hafa tsy trano raiky aminy koa ie. (Rom. 14:4) Mbo manaja azy avao, ohatsy, ty anany ndre fa be ka fa tsy an-trano ao. Fe fa tsy ambany fahefàny sasy rozy amy zay.​—Mat. 19:5.

6. Manino Jehovah ro nanome fahefà olo hafa?

⁶ Ty fitiavani-Jehovah ty fianakaviany ro nahavy azy nizarazara fahefà. Fanomeza baka aminy raha io. Lasa milamy soa iaby koa ty fianakaviani-Jehovah vokatsini-zay. (1 Kor. 14:33, 40) Laha tsy nazava hoe ia ty mana fahefà, le ho nikoronta ty fianakaviani-Jehovah sady tsy ho nifalifaly. Tsy ho nihay, ohatsy, hoe ia ty tokony hanapa-kevitsy farany, le ia ty hanatanteraky ani-fanapahan-kevitsy rezay.

7. Laha hentea ty Efesianina 5:25, 28, teani-Jehovah hanjakazaka amin’ampela va ty lahilahy?

⁷ Laha tena mahasoa ty fianakavia vatany ty fananani-lahilahy fahefà, manino ro maro ty ampela mahatsapa hoe manerisery noho mamehifehy azy ty valiny? Mahatsapa ani-zay rozy satria maro ty lahilahy tsy manaraky ty fitsipikini-Jehovah mikasiky fianakavia, fa aleon-drozy manaraky lilin-draza na fomban’olo an-tanà eo. Na mety hoe ze hahafalifaly ty vatany avao ro ataony. Misy lahilahy sisany, ohatsy, manjakazaka amy valiny. Teany ho hitan’olo hoe “tena lahilahy” ie fa tsy tindrin’ampela. Mieritseritsy ie hoe tsy azony foroseva ho tea azy valiny le ataony ze hahavy ani-ampela iny hatahotsy azy. Lafa matahotsy ahy ie hoasany le hanaraky ze volaniko. * Tena diso hevitsy ty lahilahy manao manahaky ani-zay. Manao raha mifanohitsy amy ty raha teani-Jehovah ie satria tsy manaja ampela.​—Vakio Efesianina 5:25, 28.

8. Ino ty azoni-lahilahy atao laha teany ty hahay hitariky ty fianakaviany?

⁸ Afaky hahay hitariky ty fianakaviany ty lahilahy raiky laha manahaky ani-Jehovah noho Jesosy lafa mampiasa ty fahefàny. Diniho moa toetsy roe ananani-Jehovah noho Jesosy retoa, le henteo hoe  akory ty azoni-loham-pianakavia ampisehoa ani-toetsy reo amy ty valiny noho ty anany.

9. Akory ty ampisehoani-Jehovah hoe miambany ie?

⁹ Fiambanea. Tsy misy olo hendry mandilatsy ani-Jehovah, fe ie mijanjy ty hevitsini-mpanompony avao. (Gen. 18:23, 24, 32) Nengany hivola ty hevitsiny ty olo ambany fahefàny. (1 Mpanj. 22:19-22) Lavorary Jehovah fe tsy mitamà antsika hanao raha tsy ho vitantsika ie satria tsika olombelo tsy lavorary. Ampeany koa aza tsika mba hahavita hanompo azy soa. (Sal. 113:6, 7) Kaihini-Baiboly hoe “mpanampy” mihintsy aza ie. (Sal. 27:9; Heb. 13:6) Nieky Davida Mpanjaka hoe tsy ho nahavita ani-asa soa nataony rey ie laha tsy niambany Jehovah.​—2 Sam. 22:36.

10. Akory ty nampisehoani-Jesosy hoe niambany ie?

¹⁰ Diniho koa Jesosy. Ndre Tompo noho Mpampianatsy aza ie le nanasa ty tombokini-mpianatsiny rey. Manino raha zay ro nampanoratini-Jehovah tamy Baiboly ao? Mba ho modely horihintsika iaby, anatini-zay ty loham-pianakavia. Nivola mihintsy aza Jesosy hoe: “Modely ro nameako anareo, mba hanaovanareo manahaky ze nataoko taminareo.” (Jaona 13:12-17) Tsy nitamà hotompoe Jesosy ndre nana fahefà anabo. Ie koa aza ro nanompo ty olo hafa.​—Mat. 20:28.

11. Akory ty hampisehoani-loham-pianakavia hoe miambany manahaky ani-Jehovah noho Jesosy ie?

¹¹ Fianara ho antsika. Maro ty fomba azoni-loham-pianakavia ampisehoa hoe miambany ie. Tsy tamaniny hanao raha tsy ho vitan-drozy, ohatsy, ty valy amin’anany. Janjininy koa rozy lafa mivola, ndre tsy mitovy hevitsy aminy aza. Zao ty nivolanini-Marley, mipetraky a Etazinỳ any: “Tsy mitovy hevitsy zahay morovaly kindraiky. Fe haiko hoe tena teany aho sady hajàny, satria anontaneany tse ty hevitsiko bakeo dinihiny soa, zay ie vo manapa-kevitsy.” Ankoatsini-zay, manao raha an-trano ao koa ty lahilahy miambany, ndre asan’ampela ty fahitan’olo ani-zay. Tsy mora raha zay. Fa manino? Nivola ranabavy mana anara Rachel zay hoe: “Laha misy lahilahy manampy ty valiny manasa finga na mamafa trano ty aminay atoy, le ataon’olo hoe ‘sary ampela.’ Tindrin’ampela ie hoasan-drozy.” Laha ho zay koa ty ataon’olo aminareo any, le tiarovo hoe  nanasa ty tombokini-mpianatsiny rey Jesosy, kanefa andevo ro eritseretin’olo hoe tokony hanao ani-zay. Tsy ty fahitan’olo azy ro vatan-draha amy ty loham-pianakavia be fitiava fa ze hahasambatsy ty valy amin’anany. Tena mila miambany vatany ty loham-pianakavia. Ino koa ty toetsy hafa mila ananany?

12. Nahavy ani-Jehovah noho Jesosy hanao ino ty fitiava?

¹² Fitiava. Fitiava avao ro mahavy ani-Jehovah hanao raha. (1 Jaona 4:7, 8) Tea antsika ie sady ta hinama amintsika ka nameany antsika ty Safàny noho ty fandaminany. Ataony koa ze hahavy antsika hahatsapa hoe voakarakara, ka ameany toky tsika hoe teany vatany. Ka manao akory ty raha ilàni-vatantsika? Maro biby ty raha ameani-Jehovah mba hahafalifaly antsika. (1 Tim. 6:17) Anariny koa tsika laha manao hadisoa, fe tsy mieny ie fa tea antsika avao. Mbo fitiava koa ro nahavy azy nanome vilim-panavota ho antsika. Ndre Jesosy koa tena tea antsika kanao nanome ty ainy ho antsika. (Jaona 3:16; 15:13) Tsy misy raha afaky misaka ani-Jehovah noho Jesosy tsy ho tea ani-ze tsy mivaliky amin-drozy mihintsy.​—Jaona 13:1; Rom. 8:35, 38, 39.

13. Manino ty loham-pianakavia ro tena mila mampiseho fitiava amy fianakaviany? (Henteo koa ty efajoro hoe “ Ino ty Azoni-Lahilahy Nanambaly vo Tsiela Atao mba Hahavy ty Valiny Hanaja Azy?”)

¹³ Fianara ho antsika. Tokony ho fitiava avao ro hahavy ty loham-pianakavia hanao raha. Manino rozy ro tena mila manao ani-zay? Zao ty navalini-apostoly Jaona: “Ze tsy tea ty rahalahiny [na fianakaviany] hitany maso, le tsy afaky ho tea a Ndranahary azy tsy hitany iny.” (1 Jaona 4:11, 20) Laha tea ty fianakaviany ty lahilahy raiky sady ta hanahaky ani-Jehovah noho Jesosy, le hampeany ty fianakaviany hifandramby soa amy Jehovah. Hataony koa ze hahavy ani-fianakaviany reo hahatsapa hoe tea an-drozy ie sady mikarakara an-drozy. (1 Tim. 5:8) Hampiofana noho hananatsy ty anany ie. Hiezaky avao koa ie mba handramby fanapahan-kevitsy manome voninahitsy  ani-Jehovah noho mahasoa ty fianakaviany. Ndao hodinihintsika kiraidraiky raha iaby rezay, bakeo hohenteantsika hoe ino ty azoni-loham-pianakavia atao mba hanahafa ani-Jehovah noho Jesosy.

14. Ino ty ataoni-loham-pianakavia mba hahavy ty trano raiky aminy hifandramby soa amy Jehovah?

¹⁴ Manampy ty fianakaviany hifandramby soa amy Jehovah. Nanahaky ani-Babany Jesosy satria tea nanampy olo hana finoa matanjaky. (Mat. 5:3, 6; Mar. 6:34) Ho zay koa ty ataoni-loham-pianakavia. Ze raha hanampy ty trano raiky aminy hifandramby soa amy Jehovah ro ataony voaloha lista. (Deot. 6:6-9) Ataony azo antoky hoe samby mamaky noho mianatsy ty Safà-Ndranahary rozy trano raiky, sady manatriky fivoria noho mitory ty vaovao soa. Ataony azo antoky koa hoe minama amy Jehovah rozy sady tsy miala aminy mihintsy.

15. Ino ty azoni-loham-pianakavia atao mba hanampea ty fianakaviany hahatsapa hoe teany rozy?

¹⁵ Manampy ty fianakaviany hahatsapa hoe teany rozy. Nivolanini-Jehovah tamason’olo maro hoe teany Jesosy. (Mat. 3:17) Natoroni-Jesosy matetiky hoe teany ty mpanori-dia azy, ndre tamy raha nivolaniny zay ndre tamy raha nataony. Nivola koa mpanori-dia azy rey hoe tea azy. (Jaona 15:9, 12, 13; 21:16) Afaky atoroni-loham-pianakavia amy ty raha ataony koa hoe teany ty valiny noho ty anany. Manao ani-zay, ohatsy, ie lafa miaraky mianatsy Baiboly amin-drozy. Tokony hovolaniny amin-drozy koa hoe teany rozy sady tena tsy foiny. Laha mety aza, tokony hidera an-drozy ie lafa misy olo eo.​—Ohab. 31:28, 29.

16. Ino koa ty tokony hataoni-loham-pianakavia, le ino ty tokony ho tandremany?

¹⁶ Manome ze raha ilàni-fianakaviany andavanandro. Nikarakarani-Jehovah soa avao Israelita reo ndre tamy rozy fa nisaziny rey aza. (Deot. 2:7; 29:5) Ameani-Jehovah antsika koa ze raha tena ilàntsika henanizao. (Mat. 6:31-33; 7:11) Ho zay koa ty nataoni-Jesosy tamy mpanori-dia azy rey. Nameany hany rozy. (Mat. 14:17-20) Maro biby ty olo nitahany. (Mat. 4:24) Laha ta hanao raha hahafalifaly a Ndranahary ty loham-pianakavia le mila manome ze raha tena ilàni-fianakaviany. Fe misy raha mila tandremany koa. Tsy tokony hataony, ohatsy, ty asa raiky laha tsy hahavitany manampy ty fianakaviany hifandramby soa amy Jehovah, na hisaka azy tsy de hampiseho fitiava amy fianakaviany.

17. Akory ty ataoni-Jehovah noho Jesosy lafa mampianatsy noho mananatsy antsika?

¹⁷ Mananatsy. Mampiofana noho mananatsy antsika Jehovah satria ta hanampy antsika. (Heb. 12:7-9) Nanahaky ani-Babany koa Jesosy ka nibe fitiava lafa nampiofana ty olo tambany fahefàny. (Jaona 15:14, 15) Nanome  torohevitsy henjankenja ie fe nisoa fanahy avao. (Mat. 20:24-28) Hainy fa tsy lavorary tsika ka manalinaly ta hanao hadisoa matetiky.​—Mat. 26:41.

18. Ino ty raha soa ho tiaroni-loham-pianakavia?

¹⁸ Manahaky ani-Jehovah noho Jesosy ty loham-pianakavia laha mahatiaro hoe tsy lavorary ty valy amin’anany. Tsy “meloky marè” amin-drozy, ohatsy, ie. (Kol. 3:19) Orihiny ty torolala amy Galatianina 6:1 ao le miezaky ie manity an-drozy moramora, sady tiaroviny fa ndre ie koa tsy lavorary. Miezaky manome modely manahaky ty nataoni-Jesosy ie, satria hainy fa zay ty fomba fampianara farani-soa.​—1 Pet. 2:21.

19-20. Akory ty hampisehoani-loham-pianakavia hoe manahaky ani-Jehovah noho Jesosy ie lafa manapa-kevitsy?

¹⁹ Tsy tea tena lafa manapa-kevitsy. Mahasoa ty olo hafa avao ty fanapahan-kevitsini-Jehovah. Namoro rahamananay, ohatsy, ie. Tsy hoe hahasoa azy ty nanaovany ani-zay, fa teany hisy tsika sady teany ho falifaly. Tsy nisy koa niforosè azy hanome ty Anakilahiny ho maty ho antsika. Fe nataony raha zay mba hahasoa antsika. Nila ze hahasoa ty olo hafa avao koa Jesosy lafa nanapa-kevitsy. (Rom. 15:3) Ndre fa nivozaky, ohatsy, ie le mbo nampianatsy vahoaky maro avao fa tsy mba nitofa.​—Mar. 6:31-34.

²⁰ Mieky ty loham-pianakavia be fitiava hoe tena sarotsy ty mandramby fanapahan-kevitsy hahasoa ty fianakaviany, ka imaneany soa andraikitsiny zay. Mitandrina ie mba tsy handesim-po na hanao bodongero lafa manapa-kevitsy, fa engany Jehovah hanampy azy. * (Ohab. 2:6, 7) Laha manao ani-zay ie le mila ze hahasoa ty hafa fa tsy ze hahasoa ty vatany avao.—Fil. 2:4.

21. Ino ty hodinihintsika amy lahatsoratsy manaraky?

²¹ Sarotsy biby ty andraikitsy nankinini-Jehovah amy loham-pianakavia, fe mitamà ie hoe hataon-drozy soa andraikitsy io. Laha miezaky manahaky ani-Jehovah noho Jesosy ty lahilahy manambaly, le hahavita soa ani-andraikitsiny io. Laha manao soa ty andraikitsiny koa ty ampela, le ho sambatsy ty tokantranon-drozy. Ka akory zany ty tokony ho fahità ty ampela ty andraikitsini-valiny amy maha loham-pianakavia azy? Le manino raha zay ro mety ho sarotsy aminy? Hamaly ani-reo ty lahatsoratsy manaraky.