1. San kan abi krakti tapu a fasi fa wan man e libi nanga en wefi nanga pikin?

SAN a wani taki dati wan man na a ede fu en osofamiri? A fasi fa son man kweki noso den sani di den leri na ini a kulturu fu den kan abi krakti tapu a fasi fa den e libi nanga den wefi nanga den pikin. Luku san Yanita, wan sisa di e libi na Europa e taki: „Pe mi e libi, sma e gro kon nanga a denki taki wan man na basi èn taki a frow na en bediende.” Wan brada di nen Luke èn di e libi na Amerkankondre e taki: „Son papa e leri den boi fu den taki wan frow no abi neks fu taki, a musu tan tiri.” Ma Yehovah no wani taki mansma musu libi so nanga a frow fu den (Luku Markus 7:13). Sobun, fa wan man kan leri fu de wan bun osofamiri-edeman?

2. San wan osofamiri-edeman musu sabi èn fu san ede?

² Fu man de wan bun osofamiri-edeman, wan man musu frustan fosi san Yehovah e fruwakti fu en. A musu kon frustan tu fu san ede Yehovah poti son sma leki edeman èn a musu kon sabi fa a kan teki na eksempre fu Yehovah nanga Yesus. Fu san ede wan man musu kon sabi den sani disi? Fu di na Yehovah gi masra a frantwortu leki ede fu na osofamiri èn a wani taki den tyari en na a yoisti fasi.​—Luk. 12:48b.

3. Soleki fa 1 Korentesma 11:3 e sori, dan san wan sma di abi a frantwortu fu de edeman musu hori na prakseri?

³ Leisi 1 Korentesma 11:3. A tekst disi e sori fa Yehovah seti en famiri na hemel èn na grontapu. Wan sma di de wan edeman musu hori tu prenspari sani na prakseri: A kisi frantwortu, ma a musu gi frantwortu tu. Yehovah „na a ede”, dati wani taki dati en na a moro Heiwan èn ala den pikin fu en, den engel nanga den libisma, musu gi frantwortu na en (Rom. 14:10; Ef. 3:14, 15). Yehovah poti Yesus leki ede  fu a Kresten gemeente, ma Yesus musu gi frantwortu na Yehovah fu a fasi fa a e tiri a gemeente (1 Kor. 15:27). Yehovah poti masra tu leki ede fu den wefi nanga den pikin. Ma a masra musu gi frantwortu na Yehovah èn na Yesus fu a fasi fa a e libi nanga en osofamiri.​—1 Petr. 3:7.

4. Sortu reti Yehovah nanga Yesus abi?

⁴ Fu di Yehovah na Ede fu en famiri na hemel èn na grontapu, meki a abi a reti fu poti wet gi den pikin fu en fu sori den fa den musu tyari densrefi. A abi a reti tu fu fruwakti taki den hori densrefi na den wet dati (Yes. 33:22). Leki ede fu a Kresten gemeente, Yesus abi a reti tu fu poti wet gi den sma fu a gemeente èn fu fruwakti fu den taki den hori den wet dati.​—Gal. 6:2; Kol. 1:18-20.

5. Sortu reti wan osofamiri-edeman abi, ma san a musu hori na prakseri?

⁵ Neleki Yehovah nanga Yesus, wan Kresten osofamiri-edeman abi a reti fu teki bosroiti gi en osofamiri (Rom. 7:2; Ef. 6:4). Disi no wani taki dati a mag du san a wani. Wan sani di a musu hori na prakseri, na taki a musu wroko nanga den gronprakseri na ini Gado Wortu (Odo 3:5, 6). Wan osofamiri-edeman no abi a reti fu poti wet gi sma di no de fu en osofamiri (Rom. 14:4). Èn te den pikin fu en kon bigi èn den gwe libi oso, den musu tan sori lespeki gi en, ma a no de den edeman moro.​—Mat. 19:5.

6. Fu san ede Yehovah poti sma leki edeman?

⁶ Yehovah ben poti sma leki edeman fu en famiri fu di a lobi den. Disi de leki wan kado di Yehovah gi en famiri. Na so freide kan de na den mindri èn sani kan waka soleki fa Yehovah wani (1 Kor. 14:33, 40). Efu Yehovah no ben taki krin suma ben kisi a frantwortu fu de edeman, dan sani no ben o waka bun na ini a famiri fu Yehovah èn den no ben o de koloku. Nowan sma ben o sabi suma abi a frantwortu fu teki bosroiti èn suma abi a frantwortu fu du san ben bosroiti.

7. Te yu e luku Efeisesma 5:25, 28, dan fa Yehovah ben wani taki masra musu libi nanga a wefi fu den?

⁷ Efu a de so wan bun sani taki Gado poti mansma leki edeman fu na osofamiri, dan fu san ede so furu umasma feni taki den masra e libi takru nanga den èn taki den e basi den? Disi de so fu di furu mansma no e hori densrefi na den wet fu Yehovah di e sori fa den musu libi nanga den osofamiri. Na presi fu dati den e du nomo san den gwenti na ini a kulturu fu den. Sonwan fu den e du ogri nanga den frow soso fu di dati e meki den firi moro bun. Son leisi wan masra e basi en wefi fu di dati e meki a firi taki en na a man noso fu di a wani sori trawan taki en na basi na ini na oso. Kande a man e prakseri taki a no man dwengi a frow fu lobi en, ma a kan tapu skreki gi en. Èn te a frow e frede en, dan a man du nanga en san a wani. * A denki disi e meki taki mansma no e lespeki umasma èn taki den no e gi den a grani di den musu kisi. Yehovah no lobi a sani disi kwetikweti.​—Leisi Efeisesma 5:25, 28.

8. Fa wan man kan leri fu de wan bun osofamiri-edeman?

⁸ Wan man kan leri fu de wan bun osofamiri-edeman te a e luku fa Yehovah nanga Yesus e tyari densrefi leki edeman. Wi o luku tu fasi fu Yehovah nanga Yesus di  kan yepi wan osofamiri-edeman fu libi bun nanga en frow nanga pikin.

9. Fa Yehovah e sori taki a abi sakafasi?

⁹ Sakafasi. Yehovah na a moro koni sma di de, toku a e arki san den futuboi fu en abi fu taki (Gen. 18:23, 24, 32). A e gi den na okasi srefi fu taki fa den e denki fu wan tori (1 Kow. 22:19-22). Yehovah srefi no e meki fowtu. Ma fu di wi na sondu libisma, meki a no e fruwakti moro fu wi leki san wi man du. Dati meki a e yepi den sma di e dini en fu teki bun bosroiti (Ps. 113:6, 7). Bijbel e taki srefi dati Yehovah na wan „yepiman” (Ps. 27:9; Hebr. 13:6). Kownu David ben taki dati na a sakafasi fu Yehovah ben meki taki a ben man du bigi sani.​—2 Sam. 22:36.

10. Fa Yesus sori sakafasi?

¹⁰ Kon meki wi luku na eksempre fu Yesus. Aladi den disipel fu en ben kari en Masra nanga Leriman, toku a wasi den futu fu den. Fu san ede Yehovah ben meki sma skrifi a tori disi na ini Bijbel? A no de fu taki dati a ben wani leri ala sma, sosrefi osofamiri-edeman, fu abi sakafasi. Yesus srefi ben taki: „Mi gi unu na eksempre, so taki unu kan du tu san mi du gi unu” (Yoh. 13:12-17). Aladi sma ben kari Yesus Masra nanga Leriman, toku a no ben fruwakti taki sma ben musu dini en. Na presi fu dati, en ben dini trawan.​—Mat. 20:28.

11. Fa wan osofamiri-edeman kan sori sakafasi soleki fa Yehovah nanga Yesus e du dati?

¹¹ San disi e leri wi. Difrenti fasi de fa wan osofamiri-edeman kan sori taki a abi sakafasi. Fu eksempre, a no o fruwakti tumusi furu fu en wefi nanga en pikin. Srefi te en osofamiri no e agri nanga en, a o arki san den abi fu taki. Marley, di e libi na ini Amerkankondre e taki: „Son leisi mi nanga mi masra no e agri nanga makandra. Ma mi sabi taki a e teri mi èn taki a e lespeki mi fu di a e aksi mi fa mi e denki èn a no e teki den sani di mi e taki leki lawlaw sani.” Boiti dati, wan man di abi sakafasi o de klariklari fu yepi nanga osowroko, awinsi sma na ini a libimakandra e si den sortu wroko dati leki umasma wroko. Son leisi dati no makriki. Fu san ede? Wan sisa di nen Rachel e taki: „Na ini a kontren pe mi kweki, birtisma nanga famiriman e si wan man di e yepi en frow fu wasi dotisani èn fu krin  na oso, leki wan wisiwasi man. Den e feni taki so wan man e meki a frow sidon tapu en ede.” Efu na so sma e denki tu na ini a kontren pe yu e libi, dan hori na prakseri taki Yesus ben wasi den futu fu den disipel fu en, aladi sma ben e si a wroko dati leki wan wroko di srafu ben musu du. Wan bun osofamiri-edeman no e broko en ede nanga san sma e prakseri fu en, ma a e sorgu taki a frow nanga den pikin fu en de koloku. Sortu tra moi fasi wan bun osofamiri-edeman musu abi boiti sakafasi?

12. San Yehovah nanga Yesus e du fu di den lobi wi?

¹² Lobi. Ala san Yehovah e du na fu di a lobi wi (1 Yoh. 4:7, 8). Na fu di a lobi wi èn fu di a wani taki wi de mati fu en, meki a gi wi en Wortu Bijbel nanga na organisâsi fu en. Fu di Yehovah e sori wi ibri tron baka taki a lobi wi, meki wi e firi koloku. Ma fa fu den sani di wi abi fanowdu fu tan na libi? „Ala sani di e gi wi prisiri, [Yehovah] e gi wi bogobogo” (1 Tim. 6:17). Te wi e meki fowtu, a e piri-ai gi wi, ma toku a e tan lobi wi. Na fu di Yehovah lobi wi, meki a pai a lusu-paiman gi wi. Yesus lobi wi so te, taki a gi en libi gi wi (Yoh. 3:16; 15:13). Noti kan tapu Yehovah nanga Yesus fu lobi den wan di e tan gi yesi na den.​—Yoh. 13:1; Rom. 8:35, 38, 39.

13. Fu san ede a prenspari taki wan osofamiri-edeman sori lobi gi en osofamiri? (Luku a faki „ Efu yu no trow so langa ete, dan san yu kan du fu meki yu frow lespeki yu?”)

¹³ San disi e leri wi. Ala san wan osofamiri-edeman e du, a musu du nanga lobi. Fu san ede dati de so prenspari? Na apostel Yohanes ben taki: „A sma di no lobi en brada [noso en osofamiri] di a man si, no man lobi Gado di a no man si” (1 Yoh. 4:11, 20). Wan man di lobi en osofamiri èn di wani de leki Yehovah nanga Yesus, o yepi en osofamiri fu de bun mati fu Yehovah, a o sori den taki a e broko en ede nanga den èn a o sorgu gi den (1 Tim. 5:8). A o gi den pikin fu en leri èn a o piri-ai gi den. A o tan du muiti fu kon sabi fa a kan teki bun bosroiti di e gi Yehovah grani èn di e tyari wini kon gi en  osofamiri. Meki wi go luku fa na eksempre fu Yehovah nanga Yesus kan yepi wan osofamiri-edeman na ini ala den tori disi.

14. Fa wan osofamiri-edeman kan yepi en osofamiri fu kon krosibei na Yehovah?

¹⁴ A musu yepi en osofamiri fu kon krosibei na Yehovah. Neleki en Papa, Yesus ben wani yepi den bakaman fu en fu abi wan tranga bribi (Mat. 5:3, 6; Mark. 6:34). Na so a de tu taki a moro prenspari sani gi wan osofamiri-edeman, na fu yepi en osofamiri fu kon krosibei na Yehovah (Deut. 6:6-9). Dati meki a e sorgu taki en nanga en osofamiri e leisi èn studeri Gado Wortu, taki den e go na den konmakandra, taki den e preiki a bun nyunsu, taki a e yepi den fu tron mati fu Yehovah èn taki den tan bun mati fu en tu.

15. Fa wan osofamiri-edeman kan sori en osofamiri taki a e broko en ede nanga den?

¹⁵ A musu sori en osofamiri taki a e broko en ede nanga den. Yehovah taigi Yesus taki a lobi en èn tra sma ben yere di a taki dati (Mat. 3:17). Na difrenti okasi Yesus taki èn du sani fu sori den bakaman fu en taki a lobi den. Èn den bakaman fu en ben sori en tu taki den lobi en (Yoh. 15:9, 12, 13; 21:16). Wan sani di wan osofamiri-edeman kan du fu sori en wefi nanga den pikin fu en taki a lobi den, na fu studeri Bijbel nanga den. A musu taigi den tu taki a lobi den èn taki a e warderi den. Te a fiti a kan du dati tu te den de nanga tra sma.​—Odo 31:28, 29.

16. San na ete wan sani di wan osofamiri-edeman musu du èn nanga san a musu luku bun?

¹⁶ A musu sorgu gi en osofamiri. Yehovah tan sorgu gi den Israelsma srefi te a ben strafu den fu di den ben trangayesi en (Deut. 2:7; 29:5). A e sorgu tu taki wi abi den sani di wi abi fanowdu na ini a ten disi (Mat. 6:31-33; 7:11). Na so a de tu taki Yesus ben gi den bakaman fu en nyanyan (Mat. 14:17-20). A ben dresi furu fu den di den ben siki (Mat. 4:24). Efu wan osofamiri-edeman wani taki Yehovah feni en bun, dan a musu sorgu gi en osofamiri. Ma toku a musu luku bun taki a no e poti so furu prakseri na a wroko fu en, taki a no abi nofo ten fu tranga a bribi fu en osofamiri èn fu sori den taki a e broko en ede nanga den.

17. Fa Yehovah nanga Yesus e gi leri èn fa den e piri-ai gi wi?

¹⁷ A musu gi en osofamiri leri. Yehovah e gi wi leri èn a e piri-ai gi wi fu di a wani yepi wi (Hebr. 12:7-9). Neleki en Papa, Yesus e gi den bakaman fu en leri na wan lobi-ati fasi (Yoh. 15:14, 15). A e piri-ai gi den, ma a e sori den switifasi tu (Mat. 20:24-28). A sabi taki den na sondusma èn taki den o meki fowtu.​—Mat. 26:41.

18. San wan bun osofamiri-edeman e hori na prakseri?

¹⁸ Wan osofamiri-edeman di e teki na eksempre  fu Yehovah nanga Yesus, e hori na prakseri taki en wefi nanga pikin e meki fowtu. A no e kisi „bita-ati” gi en wefi noso gi en pikin (Kol. 3:19). Na presi fu dati a e hori ensrefi na a gronprakseri di skrifi na Galasiasma 6:1 èn a e pruberi fu yepi den „na wan safri-ati fasi” aladi a e hori na prakseri taki en srefi e meki fowtu. Neleki Yesus, a e frustan taki a moro bun fasi fa a kan gi leri, na te en srefi na wan bun eksempre gi trawan.​—1 Petr. 2:21.

19-20. Fa wan osofamiri-edeman kan de leki Yehovah nanga Yesus te a musu teki bosroiti?

¹⁹ A no musu denki ensrefi nomo te a e teki bosroiti. Yehovah e teki bosroiti di de fu a bun fu wi. Fu eksempre, di a meki ala libisani, dan a no du dati fu en eigi bun, ma a du dati so taki wi kan firi taki a libi na wan prisiri sani. Nowan sma ben kan dwengi Yehovah fu meki en Manpikin pai gi den sondu fu wi. A du dati fu di a ben wani yepi wi. Yesus ben teki bosroiti tu fu a bun fu trawan (Rom. 15:3). Fu eksempre, Yesus ben gi wan bigi grupu sma leri aladi a ben weri èn a ben wani rostu.​—Mark. 6:31-34.

²⁰ Wan bun osofamiri-edeman sabi taki wan fu den moro muilek sani di a musu du, na fu teki koni bosroiti gi en osofamiri èn a e si a frantwortu dati leki wan seryusu sani. A e luku bun fu no teki bosroiti sondro fu hori en osofamiri na prakseri noso fu du sani soleki fa a firi na a momenti dati. Na presi fu dati a e meki Yehovah leri en fa a musu teki bun bosroiti (Odo 2:6, 7). * Disi o yepi en fu denki trawan èn fu no denki ensrefi nomo.​—Fil. 2:4.

21. San wi o luku na ini a tra artikel?

²¹ Yehovah gi osofamiri-edeman wan seryusu frantwortu èn a e fruwakti taki den e tyari a frantwortu dati na wan bun fasi. Efu wan masra e du muiti fu teki na eksempre fu Yehovah nanga Yesus, dan a o de wan bun osofamiri-edeman. Èn efu a wefi fu en e tyari a frantwortu fu en na wan bun fasi, dan den o abi wan koloku trowlibi. Fa wan wefi musu si a frantwortu di en masra abi leki osofamiri-edeman? San kan meki en muilek gi en fu tyari en frantwortu leki wefi? A tra artikel o piki den aksi dati.