1. Wanem ol samting inap stiaim tingting bilong man long wok bilong em olsem het bilong famili?

YU TING dispela tok “het” i makim wanem samting? Sampela man i larim kastam, kalsa, o famili bekraun bilong ol yet long stiaim pasin ol i mekim long meri na ol pikinini bilong ol. Tingim tok bilong Yanita, em wanpela sista i stap long Yurop, em i tok: “Long ples mi stap long en, ol man i gat strongpela tingting olsem ol meri ol i samting nating na ol man i mas tingim ol olsem ol wokmeri nating.” Na wanpela brata nem bilong em Luke, em i stap long Amerika i tok: “Sampela papa i skulim ol pikinini man bilong ol olsem ol i no ken putim yau long toktok bilong ol meri, tingting bilong ol meri i no bikpela samting.” Tasol ol dispela pasin i no kamapim klia pasin Jehova i laik ol man i mas mekim long meri bilong ol. (Skelim Mak 7:13.) Orait, olsem wanem man inap lain long mekim wok olsem gutpela het bilong famili?

2. Ol het bilong famili i mas save long wanem samting, na bilong wanem?

² Long i stap olsem gutpela het bilong famili, man i mas kliagut long wok Jehova i laik em i mas mekim. Na em i mas save tu long as na Jehova i kamapim wok bilong i stap olsem het, na moa yet, em i mas save long hau em i ken bihainim eksampel bilong Jehova na Jisas. Bilong wanem em i bikpela samting long man i mas save long dispela? Long wanem, Jehova i givim wok bos long ol het bilong famili, na em i laik ol i mas mekim gut dispela wok.—Luk 12:48b.

3. Yumi kisim wanem skul long 1 Korin 11:3 long wok bilong i stap olsem het?

³ Ritim 1 Korin 11:3. Dispela ves i stori long hau Jehova i oganaisim gut bikpela lain famili bilong em long heven na long graun. Tupela bikpela samting i insait long wok bilong i stap olsem het—namba na kot. Jehova em i “het,” o em i gat olgeta rait long mekim  wok bos, na olgeta pikinini bilong em, ol ensel na ol man wantaim, em bai skelim ol long hau ol i mekim wok bilong ol. (Rom 14:10; Efe. 3:14, 15) Jehova i givim namba long Jisas long mekim wok bos long kongrigesen, tasol Jehova bai skelim em long pasin em i mekim long yumi. (1 Kor. 15:27) Jehova i givim namba long man marit long bosim meri na ol pikinini bilong em, tasol Jehova na Jisas bai skelim em long pasin em i mekim long famili bilong em.—1 Pita 3:7.

4. Jehova na Jisas i gat namba long mekim wanem?

⁴ Jehova em i Het bilong bikpela lain famili bilong em long heven na long graun, olsem na em i gat namba long kamapim ol lo long pasin ol pikinini bilong em i mas mekim, na em i gat rait long tokim ol long bihainim ol dispela lo. (Ais. 33:22) Jisas em i het bilong kongrigesen Kristen, na em tu i gat namba long kamapim ol lo na tokim yumi long bihainim ol dispela lo.—Gal. 6:2; Kol. 1:18-20.

5. Het bilong famili Kristen i gat wanem namba, na em i mas mekim inap long wanem mak?

⁵ Het bilong famili Kristen i bihainim eksampel bilong Jehova na Jisas, na em i gat namba long mekim ol disisen bilong famili bilong em. (Rom 7:2; Efe. 6:4) Tasol wok bos bilong em i gat mak bilong en. Olsem, ol lo em i putim i mas i stret long ol stiatok i stap long Tok Bilong God. (Prov. 3:5, 6) Na het bilong famili i no gat rait long kamapim ol lo bilong ol lain em ol i no insait long famili bilong em. (Rom 14:4) Na tu, taim ol pikinini man na ol pikinini meri bilong em i kamap bikpela na i lusim haus, ol bai wok yet long rispektim em, tasol ol i no stap aninit moa long wok bilong em olsem het bilong ol.—Mat. 19:5.

6. Bilong wanem Jehova i kamapim pasin bilong mekim wok olsem het?

⁶ Jehova i laikim famili bilong em, olsem na em i kamapim pasin bilong mekim wok olsem het. Wok bilong i stap olsem het em presen i kam long Jehova. Pasin bilong mekim wok olsem het i helpim famili bilong Jehova long i stap bel isi, na mekim ol samting i ron gut. (1 Kor. 14:33, 40) Sapos God i no putim wok bilong stap olsem het, famili bilong Jehova i no inap mekim gut ol wok na ol i no inap stap amamas. Olsem, i no gat wanpela bai save long husat i mas mekim ol fainol disisen na husat i mas go pas long inapim ol dispela disisen.

7. Olsem Efesus 5:25, 28 i kamapim, yu ting em laik bilong Jehova olsem man i mas daunim meri?

⁷ God i putim ol man i stap olsem het bilong famili na dispela em i gutpela samting, tasol wai na planti meri long nau i pilim olsem man bilong ol i mekim nogut long ol na daunim ol? Dispela i kamap bikos planti man i sakim lo bilong God long sait bilong famili na ol i save bihainim ol kastam na pasin bilong ples bilong ol. Na tu, ol inap mekim nogut long meri bilong ol bilong inapim sampela laik bilong ol yet. Olsem, ating man marit inap kontrolim meri bilong em bambai em yet i ken pilim olsem em i samting tru o em i laik soim long ol narapela olsem em i man tru. Em inap ting olsem em i no inap fosim meri bilong em long laikim em, tasol em i ken mekim em i pret long em. Na em inap yusim dispela pasin bilong pret em meri i gat long kontrolim em. * Dispela kain tingting na pasin i tekewe ona na rispek em ol man i mas soim long ol meri, na dispela pasin i no stret wantaim laik bilong Jehova.—Ritim Efesus 5:25, 28.

8. Hau na man inap lain long stap gutpela het bilong famili?

⁸ Man inap lain long stap olsem gutpela het  bilong famili long rot bilong bihainim pasin bilong Jehova na Jisas long mekim wok olsem het. Bai yumi stori long 2-pela pasin em Jehova na Jisas i soim, na yumi bai luksave long hau het bilong famili i ken soim ol dispela pasin long meri na ol pikinini bilong em.

9. Olsem wanem Jehova i soim pasin daun?

⁹ Pasin daun. Jehova em Man i gat bikpela savetingting; tasol em i save harim tingting bilong ol wokman bilong em. (Stt. 18:23, 24, 32) Em i larim ol man i stap aninit long wok bos bilong em long kamapim tingting bilong ol. (1 Kin. 22:19-22) Jehova em i gutpela olgeta, tasol em i no ekspektim yumi long kamap gutpela olgeta. Em i save helpim ol man i no gutpela olgeta em ol i mekim wok bilong em long inapim wok bilong ol. (Sng. 113:6, 7) Baibel i tok Jehova em i “helpim” bilong yumi. (Sng. 27:9; Hib. 13:6) King Devit i tokaut stret olsem Jehova i mekim pasin daun na em i helpim em long inapim bikpela wok em i mekim.—2 Sml. 22:36.

10. Olsem wanem Jisas i soim pasin daun?

¹⁰ Tingim eksampel bilong Jisas. Maski em i Bikpela na Bosman bilong ol disaipel bilong em, em i wasim lek bilong ol. Wanem wanpela risen na Jehova i larim dispela stori i stap long Baibel? Em i laik skulim ol manmeri, dispela i makim tu ol het bilong famili, long pasin ol i mas bihainim. Jisas yet i tok: “Mi soim pasin long yupela, samting mi mekim long yupela, yupela tu i mas mekim.” (Jon 13:12-17) Maski Jisas i gat bikpela namba, em i no gat tingting olsem ol man i mas helpim em, nogat. Em i helpim ol narapela.—Mat. 20:28.

11. Ol het bilong famili inap kisim wanem skul long eksampel bilong Jehova na Jisas long mekim pasin daun?

¹¹ Skul yumi kisim. Het bilong famili inap soim pasin daun long planti rot. Olsem, em i no ken ting olsem meri na ol pikinini bilong em i mas gutpela olgeta. Em i save putim yau long tingting bilong meri na ol pikinini bilong em, maski tingting bilong ol i no wankain olsem tingting bilong em. Marley, em i save stap long Amerika, em i tok: “Sampela taim tingting bilong mi na tingting bilong man bilong mi i no wankain. Tasol mi pilim olsem em i save tingim mi na rispektim mi bikos em i save askim long tingting bilong mi na em i save skelim gut ol samting paslain long em i mekim disisen.” Na tu, man marit i gat pasin daun i save redi long mekim ol wok bilong haus, maski ol narapela long komiuniti  bilong em i tingim ol dispela wok olsem wok bilong ol meri. Sampela taim, dispela bai hatwok. Wai? Rachel em wanpela sista na em i tok: “Long ples mi kam long en, sapos wanpela man marit i helpim meri bilong em long wasim ol plet o klinim haus, ol neiba na ol wanblut bilong em bai ting olsem em i no man tru. Ol bai ting olsem em i no save kontrolim meri bilong em.” Sapos dispela tingting i stap long hap bilong yu, orait tingim olsem Jisas i bin wasim lek bilong ol disaipel bilong em, maski ol man i tingim dispela wok olsem wok bilong ol wokboi nating. Gutpela het bilong famili i no save tingting long kisim biknem, nogat, em i tingting long amamasim meri na ol pikinini bilong em. Man i mas mekim pasin daun, na tu, em i mas mekim wanem ol narapela pasin bilong i stap olsem gutpela het bilong famili?

12. Pasin laikim i kirapim Jehova na Jisas long mekim wanem?

¹² Pasin laikim. Pasin laikim i kirapim Jehova long mekim olgeta samting. (1 Jon 4:7, 8) Em i laikim yumi na em i strongim bilip bilong yumi long rot bilong Tok Bilong Em—em Baibel—na oganaisesen bilong em. Em i tokim yumi olsem em i laikim yumi na long dispela rot em i mekim isi bel na tingting bilong yumi. Na olsem wanem long ol samting bilong skin em yumi nidim? Jehova “i save givim yumi planti gutpela samting bilong mekim yumi amamas.” (1 Tim. 6:17) Taim yumi mekim ol popaia, em i save stretim yumi, tasol em i no save stop long laikim yumi. Pasin laikim i kirapim Jehova long givim Jisas olsem ofa bilong baim bek yumi. Na Jisas i laikim yumi tru, olsem na em i givim laip bilong em long helpim yumi. (Jon 3:16; 15:13) I no gat wanpela samting inap tekewe pasin bilong Jehova na Jisas long laikim tru ol lain i stap gut long tupela.—Jon 13:1; Rom 8:35, 38, 39.

13. Wai na em i bikpela samting long het bilong famili i mas soim pasin laikim long famili bilong em? (Lukim blok “ Nupela Man Marit, Hau Yu Ken Mekim Pasin We Bai Kirapim Meri Long Rispektim Yu?”)

¹³ Skul yumi kisim. Het bilong famili i mas larim pasin laikim i stiaim olgeta samting em i mekim. Wai na dispela em i bikpela samting? Aposel Jon i tok: “Man i no laikim brata [o famili]  bilong em we em i bin lukim, em i no inap laikim God em man em i no bin lukim.” (1 Jon 4:11, 20) Man husat i laikim famili bilong em na em i laik bihainim pasin bilong Jehova na Jisas, em bai givim ol samting em famili bilong em i nidim long sait bilong bilip, bel na tingting, na ol samting bilong skin. (1 Tim. 5:8) Em bai trenim na stretim ol pikinini bilong em. Na tu, em bai wok yet long lain long mekim ol disisen we i onarim Jehova na i helpim famili bilong em. Yumi ken skelim wan wan bilong ol dispela samting na lukim hau het bilong famili i ken bihainim pasin bilong Jehova na Jisas.

14. Olsem wanem het bilong famili inap givim ol samting famili i nidim long sait bilong bilip?

¹⁴ Givim ol samting em famili i nidim long sait bilong bilip. Jisas i bihainim pasin bilong Papa na em i mekim ol samting bilong strongim bilip bilong ol disaipel bilong em. (Mat. 5:3, 6; Mak 6:34) Olsem tasol, nambawan wok bilong het bilong famili em long lukautim famili bilong em long sait bilong bilip. (Lo 6:6-9) Em i mekim olsem taim em i strongim pasin bilong em na famili bilong em long ritim na stadi long Tok Bilong God, go long ol miting, autim gutnius, na strongim na holimpas pasin pren bilong ol wantaim Jehova.

15. Wanem wanpela rot em het bilong famili i ken soim olsem em i tingim famili long sait bilong bel na tingting?

¹⁵ Givim ol samting em famili i nidim long sait bilong bel na tingting. Jehova i tokaut klia olsem em i laikim tru Jisas. (Mat. 3:17) Jisas i kamapim ples klia olsem em i laikim ol disaipel bilong em long ol samting em i mekim, na tu, long toktok bilong em. Na tu, ol i soim olsem ol i laikim em. (Jon 15:9, 12, 13; 21:16) Het bilong famili i ken soim meri na ol pikinini bilong em olsem em i laikim ol long rot bilong ol samting em i mekim, olsem stadi long Baibel wantaim ol. Na tu, em i mas tokim ol olsem em i laikim ol na em i amamas long ol, na long taim i stret long mekim, em i ken tok amamas long ol long ai bilong ol narapela.—Prov. 31:28, 29.

16. (a) Het bilong famili i mas mekim wanem narapela samting tu? (b) Na hau em inap balensim gut ol samting?

¹⁶ Givim ol samting em famili i nidim long sait bilong skin. Jehova i givim ol samting ol Israel i nidim, na em i mekim olsem tu long taim ol i kisim panismen long pasin bikhet bilong ol. (Lo 2:7; 29:5) Long nau tu, em i save givim yumi ol samting yumi nidim. (Mat. 6:31-33; 7:11) Long wankain pasin, Jisas i bin givim kaikai long ol manmeri i bihainim em. (Mat. 14:17-20) Na em i tingim ol tu long sait bilong helt. (Mat. 4:24) Bilong amamasim Jehova, het bilong famili i mas givim ol samting em famili bilong em i nidim long sait bilong skin. Tasol em i mas balensim gut ol samting. Em i no ken bisi tumas long mekim wok mani bilong sapotim famili na em i no mekim gut wok bilong em long lukautim famili long sait bilong bilip na bel na tingting.

17. Olsem wanem Jehova na Jisas i stap gutpela eksampel long hau ol i trenim na stretim yumi?

¹⁷ Givim trening. Jehova i laik helpim yumi, olsem  na em i save trenim yumi na stretim yumi. (Hib. 12:7-9) Olsem Papa bilong em, long pasin laikim Jisas i trenim ol lain i stap aninit long wok bos bilong em. (Jon 15:14, 15) Em i givim ol tok bilong stretim ol, tasol em i mekim long gutpela pasin. (Mat. 20:24-28) Em i save olsem yumi no gutpela olgeta na planti taim yumi save mekim ol popaia.—Mat. 26:41.

18. Gutpela het bilong famili i mas save long wanem samting?

¹⁸ Het bilong famili husat i bihainim pasin bilong Jehova na Jisas, em i save olsem famili bilong em i no gutpela olgeta na sampela taim ol bai mekim ol popaia. Em i no save “belhat nogut tru” long meri bilong em o ol pikinini bilong em. (Kol. 3:19) Em i bihainim stiatok i stap long Galesia 6:1 na traim long stretim ol “long pasin isi,” na tingim olsem em tu i no gutpela olgeta. Olsem Jisas, em i luksave olsem nambawan gutpela rot bilong skulim ol em long stap olsem gutpela eksampel long ol.—1 Pita 2:21.

19-20. Taim het bilong famili i laik mekim ol disisen, hau em i ken bihainim pasin bilong Jehova na Jisas?

¹⁹ Mekim ol gutpela disisen. Jehova i save mekim ol disisen we i helpim ol narapela. Olsem, em i wokim ol samting i gat laip bikos em i laik bai yumi enjoim laip, na i no bikos em i tingting long helpim em yet, nogat. I no gat wanpela man inap fosim em long givim Pikinini bilong em olsem pe bilong baim bek yumi long ol sin bilong yumi. Long laik bilong God yet, em i mekim dispela ofa bilong helpim yumi. Jisas tu i mekim ol disisen we i helpim ol narapela. (Rom 15:3) Olsem, em i redi long lusim taim bilong em long malolo na bai em i ken skulim bikpela lain manmeri.—Mak 6:31-34.

²⁰ Gutpela het bilong famili i save olsem wanpela bikpela samting em i mas mekim em long mekim ol gutpela disisen bilong helpim famili bilong em, na em i tingim dispela olsem bikpela samting. Em i no save mekim ol disisen long laik bilong em yet o mekim ol disisen wantu tasol, nogat. Em i larim Jehova i trenim em long mekim ol gutpela disisen. * (Prov. 2:6, 7) Long dispela rot em bai tingting long helpim ol narapela, na em i no tingting long helpim em yet.—Fili. 2:4.

21. Bai yumi skelim wanem ol askim long neks atikol?

²¹ Jehova i givim ol het bilong famili wanpela wok i gat hatwok bilong en, na em bai skelim ol long hau ol i inapim dispela wok. Tasol sapos man marit i wok strong long bihainim eksampel bilong Jehova na Jisas, em bai kamap gutpela het bilong famili. Na sapos meri bilong em i inapim wok bilong em olsem meri marit, marit bilong ol bai stap amamas. Meri marit i mas holim wanem tingting long wok bilong man olsem het bilong famili? Na wanem ol hatwok meri i save bungim? Neks atikol bai bekim ol dispela askim.