1. Малы куд-ог картъёс кышноосынызы но нылпиосынызы асьсэды умойтэм возё?

 ТӤ МАЛПАМЪЯ, кыӵе луыны кулэ семьялэн йырыз? Трос картъёс кышноосынызы но нылпиосынызы асьсэды возё озьы, кызьы ӵем дыръя асьсэды возизы картъёс семьяязы яке калыказы. Тани мар вера Европаысь Янита нимо сузэр: «Мынам шаерам кышномуртъёс шоры учко ляльчиос шоры кадь. Ваньзы малпало, озьы ик луыны кулэ шуыса». Нош тани мар вера Огазеяськем Штатъёсысь Люк нимо агай: «Куд-ог атайёс пиоссэс дышето, кышномуртлы номыр вератэк но шып пуконо шуыса». Но Иеговалэн малпамезъя, семьяослэн йыръёссы кышноосынызы но нылпиосынызы асьсэды чылкак мукет сямен возьыны кулэ. (Ӵошатэ Марклэсь 7:13.) Соку мар кароно, семьялы умой йыр луон понна?

2. Мае валано семьяослэн йыръёссылы но малы со туж кулэ?

² Семьялы умой йыр луон понна, пиосмуртлы валано, мае возьма солэсь Иегова, малы сётэмын йыр луон сярысь возет но малы дышетскыны луэ Иеговалэсь но Иисуслэсь. Туж кулэ тае валаны, малы ке шуоно Иегова картъёслы кивалтэт сётӥз. Соин ик со возьма, картъёс сое шонер кутозы шуыса (Лука 12:48б).

3. Мае ми тодӥськомы йыр луон сярысь возет пумысен, 1 Коринфъёслы 11:3 лыдӟыса?

³ Лыдӟе 1 Коринфъёслы 11:3. Та кылбурын гожтэмын йыр луон сярысь возет, кудӥзъя уло Инмарлэн семьяяз. Солэн семьяез пӧлы пыро инмысь но музъем вылысь ужась-тыршисьёсыз. Йыр луон возьматэ кивалтэмез но кылзӥськемез. Иегова ваньмызлы йыр луэ. Солэсь кылзӥсько вань нылпиосыз: инмысь но, музъем вылысь но (Рим. 14:12; Еф. 3:14, 15). Инмар Иисуслы кенешен кивалтыны право сётӥз.  Но Иисус инмысь Атаез азьын кыл кутэ со понна, кызьы со кенешен кивалтэ (1 Кор. 15:27). Озьы ик Иегова картъёслы семьяен кивалтыны право сётӥз. Но соос Инмар азьын но Иисус азьын кыл куто со понна, кызьы асьсэды кышноосынызы но нылпиосынызы возё (1 Пётр 3:7).

4. Кыӵе правозы вань Иеговалэн но Иисуслэн?

⁴ Иегова семьялэн йырыз луэ бере, солэн правоез вань инмысь но музъем вылысь нылпиосызлы курон-косонъёс пуктыны но чакланы, соос та курон-косонъёсъя уло-а, уг-а шуыса (Ис. 33:22). Нош Иисус быгатэ христиан кенешлы курон-косонъёс пуктыны но чакланы, христианъёс та курон-косонъёслэсь кылзӥсько-а, уг-а шуыса (Гал. 6:2; Кол. 1:18—20).

5. Мар карыны быгатэ семьялэн йырыз но мае со соку лыдэ басьтэ?

⁵ Картъёслы Иегова право сётӥз семьяенызы кивалтыны (Рим. 7:2; Еф. 6:4). Нош карт ачиз но кинлэсь ке кылзӥськыны кулэ. Кылсярысь, куке со семьяезлы курон-косонъёс пуктэ, солы Инмарлэсь возетъёссэ лыдэ басьтоно (Мад. 3:5, 6). Со сяна, семьялэн йырыз уг быгаты курон-косонъёс пуктыны соослы, кинъёс солэн семьяез пӧлы уг пыро (Рим. 14:4). Озьы ик семьялэн йырызлы валано, нылпиосыз будэмзы бере но дорысьтызы кошкемзы бере азьланяз но сое гажалозы шуыса. Но солы тодаз возёно, соку со соослы йыр уг луы ни шуыса (Матф. 19:5).

6. Малы Иегова йыр луон сярысь возет сётӥз?

⁶ Иегова йыр луон сярысь возет сётӥз, малы ке шуоно аслэсьтыз семьязэ яратэ. Со инмысь Атаймылэсь зэмос кузьым. Та возет юрттэ милемлы тупаса улыны (1 Кор. 14:33, 40). Йыр луон сярысь возет ӧй луысал ке, Иеговалэн семьяяз ваньмыз огыр-бугыр луысал но улон шумпотон ӧй вайысал. Кылсярысь, ялан малпано луысал: кинлы ужпум кутоно, нош кинлы та ужпумез быдэстоно?

7. Ефесъёслы 5:25, 28 лыдэ басьтоно ке, кызьы картъёс асьсэды кышноосынызы возьыны кулэ, Иеговалэн малпамезъя?

⁷ Йыр луон сярысь возет ваньмызлы пайда вайыны кулэ ке, соку малы трос кышномуртъёс курадӟо, куке картъёссы соосын асьсэды лек но соосты чакласа возё? Со озьы, малы ке шуоно тросэз пиосмуртъёс Иеговалэн курон-косонъёсызъя уг уло, нош калыксылэн сям-йылолъёссыя уло. Со сяна, кин ке но аслэсьтыз кышнозэ ултӥяса возе, малы ке шуоно возьматэмез потэ, со кужмо яке зэмос воргорон луэ шуыса. Сыӵе пиосмуртъёс малпало, дыр: «Со монэ уг яраты бере, соку мед мынэсьтым кышкалоз. Нош кышкаса улӥз ке, соку кылзӥськоз но» b. Иеговалэн малпамезъя, кышномуртъёсын астэ озьы возьыны уг яра. Солэн потэ, карт аслэсьтыз кышнозэ мед яратоз но мед гажалоз шуыса. (Лыдӟе Ефесъёслы 5:25, 28.)

8. Мар кароно, семьялы умой йыр луон понна?

⁸ Семьялы умой йыр луон понна, Иегова но Иисус сямен кивалтыны тыршоно. Ойдолэ эскеромы соослэсь кык сямъёссэс но малпаськомы, кызьы семьялэн йырыз та сямъёсты возьматыны быгатэ, семьяеныз кивалтыку?

9. Кызьы Иегова зӥбыт-востэм сямзэ возьматэ?

⁹ Зӥбыт-востэм сям. Иеговалэсь визьмогес нокин ӧвӧл ни. Озьы ке но со аслэсьтыз ужась-тыршисьёссэ кылзэ но соослэсь  малпанъёссэс лыдэ басьтэ (Ул.-выл. 18:23, 24, 32). Озьы ик Инмар соослэсь ӵектонъёссэс кылзэ (3 Экс. 22:19—22). Иегова тырбыдэс ке но, со уг возьма, ми но сыӵеесь ик луомы шуыса. Со интые, со зӥбыт-востэмен тырбыдэстэм адямиослы юрттэ солы оскымон луыны (Пс. 112:6, 7). Библия сое Юрттӥськись шуыса нима (Пс. 26:9; Евр. 13:6). Давид эксэй тодэ вал, со солы сётэм ужъёсты быдэстыны быгатӥз, малы ке шуоно Иегова зӥбыт-востэм сямзэ возьматӥз но солы юрттӥз (2 Экс. 22:36).

10. Кызьы Иисус зӥбыт-востэм сямзэ возьматӥз?

¹⁰ Нош табере эскеромы Иисуслэсь примерзэ. Иисус дышетскисьёсызлы дышетӥсь вал ке но, со соослэсь пыдъёссэс миськиз. Малы Иегова сюлмаськиз, та учыр Библиын гожтэмын мед луоз шуыса? Солэн потэ вал: семьяослэн йыръёссы но, мукетъёсыз но Иисуслэсь адӟем мед карозы, кудӥз дышетскисьёсызлы вераз: «Мон тӥледлы адӟем карон возьматӥ, Мон мар тӥледлы кари, тӥ но сое ик мед кароды шуыса» (Иоанн 13:12—17). Иисус киын туж бадӟым кивалтэт вал ке но, со ӧз возьма, мукетъёсыз солы ужалозы-тыршозы шуыса. Со интые, со ачиз адямиослы ужаз-тыршиз (Матф. 20:28).

11. Кызьы семьяослэн йыръёссы Иеговалэсь но Иисуслэсь зӥбыт-востэм сямзэс адӟем карыны быгато?

¹¹ Малы ми дышетскыны быгатӥськомы? Семьялэн йырыз зӥбыт-востэм ке, солэн трос луонлыкъёсыз вань та сямзэ возьматыны. Кылсярысь, со уг возьма, кышноез но нылпиосыз янгышатэк улозы шуыса. Соос соин соглаш уг луо ке но, со соосты кылзэ. Тани мар вера Огазеяськем Штатъёсысь Марли нимо сузэр: «Ми картэным ог-огенымы котьку ик соглаш ум луиське. Но мон адӟисько, со монэ дунъя но гажа шуыса, малы ке шуоно со монэ кылзэ но, ужпум кутыкуз, мынэсьтым малпанъёсме лыдэ басьтэ». Со сяна, карт, кудӥз Иисуслэсь зӥбыт-востэм сямзэ адӟем каре, корка котырысь ужъёсты но шумпотыса быдэсъя. Со ассэ озьы возе соку но, со палась адямиос малпало ке но, пиосмуртлы сыӵе ужъёсын выроно ӧвӧл шуыса. Куддыръя картъёслы асьсэды озьы возьыны капчи ик ӧвӧл. Малы? Рейчел нимо сузэр вера: «Вордӥськем палъёсам карт кышноезлы тусьты-пуньы миськыны яке утялскыны юрттӥз ке, бускельёсыз но  ӵыжы-выжыосыз вералозы, со пиосмуртлэн ужез ӧвӧл шуыса. Соослэн малпамзыя, сыӵе карт кышноез улын улэ». Тӥ палан улӥсь адямиос но озьы малпасько ке, эн вунэтэ: Иисус дышетскисьёсызлэсь пыдъёссэс миськиз, та ужез ляльчиос быдэсъязы ке но. Умой карт но атай нырысь ик сюлмаське кышноез но нылпиосыз сярысь, нош бускельёсызлэсь верамзэс со пеляз уг поны. Кыӵе сямо эшшо луоно на семьялэн йырызлы?

12. Кызьы Иегова но Иисус милемыз яратэмзэс возьмато?

¹² Яратон. Иегова ваньзэ лэсьтэ яратэменыз (1 Иоанн 4:7, 8). Библизэ сётыса но организацизэ кылдытыса, Иегова возьматӥз: солэн потэ, ми солэн эшъёсыз мед луомы шуыса. Со сяна, со оскытэ, милемыз яратэ шуыса. Озьы со ми сярысь сюлмаськемзэ возьматэ. Нош мар вераны луоз коньдонэн герӟаськем кулэяськонъёсмы сярысь? Иегова «асьмелы майбыр улон понна ваньзэ тырмыт» сётэ (1 Тим. 6:17). Ми янгышаськомы ке но, Инмар милемыз яратэмысь уг дугды но милемлы воштӥськыны юрттэ. Яратон солэсь мылкыдзэ ӝутӥз ми понна Пизэ сётыны. Нош Иисус милемлы яратонзэ возьматӥз, ми понна улонзэ сётыса (Иоанн 3:16; 15:13). Иегова но Иисус соослы оскымон адямиосты яратэмысь ноку уз дугдэ (Иоанн 13:1; Рим. 8:35, 38, 39).

13. Малы семьялэн йырыз кышноезлы но нылпиосызлы уж вылын возьматыны кулэ, соосты яратэ шуыса? (Учке « Мар кароно алигес кышнояськем пиосмуртлы, кышноез сое мед гажалоз шуыса?» рамкаез.)

¹³ Малы ми дышетскыны быгатӥськомы? Семьялэн йырызлы ваньзэ лэсьтоно яратэменыз. Малы со кулэ? Апостол Иоанн валэктэ: «Агай-вынзэ [яке семьязэ] адӟыса вылысь сое яратӥсьтэм мурт кызьы быгатоз Инмарез яратыны, кудзэ со уг адӟы?» (1 Иоанн 4:11, 20). Пиосмурт аслэсьтыз семьязэ яратэ ке, озьы ик Иеговалэсь но Иисуслэсь адӟем каремез потэ ке, со тыршоз, семьяезлэн Иеговаен умой кусыпъёсыз мед луозы шуыса, сое утёз но сюлмаськоз, улон понна ваньмыз кулэез мед луоз шуыса (1 Тим.  5:8). Озьы ик со нылпиоссэ дышетоз но нодъялоз. Со сяна, со дышетскоз сыӵе ужпумъёс кутыны, кудъёсыз Иеговаез данъялозы но семьяезлы пайда ваёзы. Нош табере ойдолэ пыр-почгес вераськомы со сярысь, кызьы семьяослэн йыръёссы Иеговалэсь но Иисуслэсь адӟем карыны быгато.

14. Мар кароно семьялэн йырызлы, кышноезлэн но нылпиосызлэн Инмарен умой кусыпъёссы мед луозы шуыса?

¹⁴ Тыршоно, семьяезлэн Иеговаен умой кусыпъёсыз мед луозы шуыса. Иисус аслаз Атаезлэсь адӟем кариз. Соин ик дышетскисьёсызлы юрттӥз осконзэс юнматыны (Матф. 5:3, 6; Марк 6:34). Озьы ик семьялэн йырыз но, нырысь ик тырше, семьяезлэн Иеговаен матысь кусыпъёсыз мед луозы шуыса (К. Зак. 6:6—9). Со понна, со кышноеныз но нылпиосыныз ӵош Библиез лыдӟе но эскере, кенешлэн пумиськонъёсаз ветлэ но ӟеч иворез тодытэ. Озьы со семьяезлы юрттэ Иеговаен юн эшъяськыны.

15. Кызьы семьялэн йырыз кышнозэ но нылпиоссэ утьыны быгатэ?

¹⁵ Семьязэ утёно. Иегова ваньмыз азьын вераз, Иисусэз яратэ шуыса (Матф. 3:17). Иисус кылъёсын но ужъёсын дышетскисьёсызлы возьматъяз, соосты яратэ шуыса. Озьы ик дышетскисьёсыз но веразы, сое ярато шуыса (Иоанн 15:9, 12, 13; 21:16). Семьялэн йырыз уж вылын возьматыны быгатэ, кышнозэ но нылпиоссэ яратэ шуыса, кылсярысь, соосын Библиез дышетыса. Со сяна, со семьяезлы вераны кулэ, со соосты яратэ но дунъя шуыса. Озьы ик тупась дыре кышнозэ но нылпиоссэ ушъяны кулэ (Мад. 31:28, 29).

16. Мар эшшо кароно на семьялэн йырызлы но мар сярысь солы тодаз возёно?

¹⁶ Сюлмаськоно, семьяезлэн улон понна ваньмыз кулэез мед луоз шуыса. Иегова Израиль калык сярысь сюлмаськиз соку но, куке соосты кылзӥськымтэзы понна кыл кутытӥз (К. Зак. 2:7; 29:5). Инмар милемлы но ваньзэ кулэзэ сётэ (Матф. 6:31—33; 7:11). Озьы ик Иисус но дышетскисьёссэ сюдӥз но бурмытъяз (Матф. 4:24; 14:17—20). Иеговаез шумпоттон понна, семьялэн йырыз сюлмаськыны кулэ, кышноезлэн но нылпиосызлэн ваньмыз кулэез мед луоз шуыса. Но солы тодаз возёно, ужезлы укыр трос саклык висъяно ӧвӧл шуыса. Семьялэн йырызлы нырысь ик сюлмаськоно, семьяезлэн Иеговаен матысь кусыпъёсыз мед луозы шуыса. Озьы ик кышнозэ но нылпиоссэ утьыны тыршоно.

17. Кызьы Иегова но Иисус милемыз дышето но тупатъяло?

¹⁷ Семьязэ дышетоно. Иегова милемыз дышетэ но тупатъя, малы ке шуоно милемлы юрттэмез потэ (Евр. 12:7—9). Атаезлэсь адӟем карыса, Иисус но дышетскисьёссэ яратыса дышетэ но кулэ дыръяз лякытэн тупатъя (Матф. 20:24—28; Иоанн 15:14, 15). Со  вала, ми тырбыдэстэмесь но куддыръя янгышаськомы шуыса (Матф. 26:41).

18. Мар сярысь вунэтоно ӧвӧл семьялэн йырызлы?

¹⁸ Иеговалэсь но Иисуслэсь адӟем карон понна, семьялэн йырызлы вунэтоно ӧвӧл, кышноез но нылпиосыз тырбыдэстэмесь шуыса. Со ассэ соосын «лекъяськыса-уродъяськыса» уг возьы (Кол. 3:19). Со интые, со уже кутэ визь-кенешез, кудӥз гожтэмын Галатъёслы 6:1, но тырше кышнозэ но нылпиоссэ «зӥбыт-востэм духен» тупатыны. Со тодэ, ачиз но тырбыдэс ӧвӧл шуыса. Иисус сямен, семьялэн йырыз вала, мукетъёссэ дышетон понна, аслыз адӟем карон возьматоно шуыса (1 Пётр 2:21).

19, 20. Кызьы, ужпум кутыкуз, семьялэн йырыз Иеговалэсь но Иисуслэсь адӟем карыны быгатэ?

¹⁹ Ужпумъёс кутоно, кудъёсыз мукетъёсызлы пайда ваёзы. Куке Иегова ужпумъёс кутэ, солэн потэ, мукетъёсызлы умой мед луоз шуыса. Кылсярысь, куке Инмар милемлы улон кузьмаз, со аслыз пайда ӧз утча. Солэн потэ вал, ми но улонлы шум мед потомы шуыса. Со сяна, аслэсьтыз Пизэ ми понна сётыны Иеговаез нокин кужмысь косыны уг быгаты вал. Со ачиз сыӵе курбон сётӥз, малы ке шуоно милемлы юрттэмез потэ вал. Иисус но кутӥз сыӵе ужпумъёс, кудъёсыз адямиослы пайда вайизы (Рим. 15:3). Кылсярысь, туж жадем дыръяз но со адямиосты Инмарлэн Эксэйлыкез сярысь дышетӥз (Марк 6:31—34).

²⁰ Умой карт яке атай тодэ, визьмо ужпум кутыны котьку ик капчи ӧвӧл но со понна туж тыршоно шуыса. Дыртыса но малпаськытэк со ужпумъёс уг куты. Со интые, со валаны тырше, мар возьма солэсь Иегова (Мад. 2:6, 7) c. Озьы семьялэн йырыз возьматоз, со аслыз пайда уг утча, нош мукетъёсыз сярысь малпаське шуыса.

21. Мае ми эскеромы вуоно статьяын?

²¹ Уж, кудзэ Иегова семьяослэн йыръёссылы сётӥз, капчи ӧвӧл. Соос Инмар азьын кыл куто со понна, кызьы та ужзэс быдэсто. Нош карт Иеговалэсь но Иисуслэсь вань кужмысьтыз адӟем карыны тыршиз ке, соку семьялы умой йыр луоз. Со дыре ик, семья шудо мед луоз шуыса, кышнолы но аслэсьтыз ужзэ быдэсъяно. Кызьы солы учконо йыр луон сярысь возет шоры? Малы та возет шоры шонер учкыны куддыръя секыт луэ? Та сярысь вераськоз вуоно статьяын.