1. Erhọ yen erọnvwọn evo ri se djobọte ẹro rẹ ọshare vwo ni ẹdia rẹ ọgbuyovwin?

DIE yen ota na “ọgbuyovwin” mudiaphiyọ kẹ wẹ? Eshare evo vwẹ uphẹn kẹ ẹkuruemu yẹrẹ obo re ruẹ vwẹ orua rẹ ayen nurhe nẹ o djobọte oborẹ ayen nene eya vẹ emọ rayen yerẹn wan. Vwo oniso rẹ oborẹ oniọvo aye Yanita rọ dia Europe tare, “Vwẹ asan re me dia, ihwo no nẹ eshare yovwin vrẹ eya, ọtiọyena kẹ ayen nẹ eya kueku.” Oniọvo Luke rọ dia United States da je ta: “Esẹ evo yono emọ rayen nẹ ayen se eta rẹ eya gbemu-u.” Ẹkẹvuọvo, Jihova guọnọre nẹ eshare vwẹ ẹro tiọyen vwo ni eya raye-en. (Ni Mak 7:13.) Kẹ mavọ yen ọshare sa vwọ dia omamọ rẹ ọgbuyovwin rẹ orua?

2. Die yen ofori nẹ ọgbuyovwin rẹ orua riẹn, kẹ diesorọ?

² Ofori nẹ ọshare riẹn oborẹ Jihova guọnọ mie ọ da guọnọ dia omamọ rẹ ọgbuyovwin. O ji fo nẹ ọ riẹn oboresorọ Jihova vwo ru ọrhuẹrẹphiyotọ tiọyena kugbe obo rọ sa vwọ vwẹrokere udje ri Jihova vẹ Jesu. Diesorọ o vwo fo nẹ ọ riẹn enana? Kidie Jihova vwẹ ẹgba evo vwọ kẹ igbuyovwin rẹ orua, ọ je guọnọ nẹ ayen reyọ vwo ruiruo vwẹ idjerhe ro shephiyọ.—Luk 12:48b.

3. Die yen avwanre yono vwo nẹ oborẹ 1 Kọrẹnt 11:3 ta kpahen ọgbuyovwin?

³ Se 1 Kọrẹnt 11:3. Ẹkpo ri Baibol nana dje oborẹ Jihova rhuẹrẹ orua rọyen ri te akpọ te odjuvwu phiyọ wan. Ẹdia rẹ ọgbuyovwin churobọ si erọnvwọn ivẹ—ohwo rọhẹ ẹdia na vwo ogangan, ọ je cha niyẹnrẹn rẹ obo rọ reyọ gangan na vwo ruiruo wan. Jihova yen “uyovwi” yẹrẹ ohwo ro vwo ẹgba ro me kpenu, ọtiọyena ihworakpọ  vẹ emekashe re dia emọ rọyen na cha niyẹnrẹn kẹ. (Rom 14:10; Ẹfe. 3:14, 15) Jihova vwẹ ẹgba kẹ Jesu nẹ o sun ukoko na, ẹkẹvuọvo Jesu cha niyẹnrẹn rẹ obo rọ vwẹrote ukoko na wan kẹ Jihova. (1 Kọr. 15:27) Jihova je vwẹ ẹgba kẹ ọshare nẹ o sun aye kugbe emọ rọyen, ẹkẹvuọvo ọ cha niyẹnrẹn rẹ obo rọ vwẹrote orua rọyen wan kẹ Jihova vẹ Jesu.—1 Pita 3:7.

4. Ẹgba vọ yen Jihova vẹ Jesu vwori?

⁴ Jihova yen Ọgbuyovwin rẹ orua rọyen ri te akpọ te odjuvwu, ọtiọyena o vwo ẹgba ro vwo jurhi rẹ oborẹ emọ rọyen che yeren akpọ wan, ji vwo imuẹro nẹ ayen yan nene. (Aiz. 33:22) Jesu rọ dia ọgbuyovwin rẹ ukoko na ji vwo ẹgba ro vwo jurhi ji vwo imuẹro nẹ a yan nene.—Gal. 6:2; Kọl. 1:18-20.

5. Ẹgba vọ yen ọgbuyovwin rẹ orua vwori, kẹ tivọ yen ọ bare?

⁵ Kerẹ Jihova vẹ Jesu, ọgbuyovwin rẹ orua vwo ẹgba ro vwo brorhiẹn kẹ orua rọyen. (Rom 7:2; Ẹfe. 6:4) Ẹkẹvuọvo, ẹgba rọyen basan. Kerẹ udje, ofori nẹ o mu orhiẹn-ebro rọyen kpahen Baibol na. (Isẹ 3:5, 6) Ọgbuyovwin rẹ orua vwo ẹgba ro vwo jurhi kẹ ihwo efa-a, jokpanẹ ihwo rẹ orua rọyen ọvo. (Rom 14:4) Emọ rọyen da ghwanre ji kpo ọrobọ rayen re, ayen che rhe muọghọ kẹ, ẹkẹvuọvo ayen rha hẹ otọ rẹ usuon rọye-en.—Mat. 19:5.

6. Diesorọ Jihova vwo ru ọrhuẹrẹphiyotọ rẹ ọgbuyovwin?

⁶ Jihova ru ọrhuẹrẹphiyotọ rẹ ọgbuyovwin fikirẹ ẹguọnọ ro vwo kpahen orua rọyen. Ọyen okẹ ro nẹ obọ rọyen rhe. Ọrhuẹrẹphiyotọ rẹ ọgbuyovwin nẹrhẹ ufuoma dia evunrẹ orua ri Jihova. (1 Kọr. 14:33, 40) Ọrhuẹrẹphiyotọ rẹ ọgbuyovwin rha herọ-ọ, orua ri Jihova rha dia yanghan yanghan, omavwerhovwẹn rha je kanrọ. Kerẹ udje, a rha riẹn ohwo ro che brorhiẹn rọ koba je riẹn ohwo ro fori nẹ ọ kobaro rere ihwo ejobi se vwo nene orhiẹn re bruru na-a.

7. Die yen Ẹfesọs 5:25, 28 ta kpahen oborẹ Jihova guọnọre nẹ eshare nene eya rayen yerin wan?

⁷ Ọrhuẹrẹphiyotọ rẹ ọgbuyovwin de yovwin, kẹ diesorọ eya buebun vwo roro nẹ eshare rayen shenyẹ je vwẹ oja re ayen? Kidie eshare buebun chukoku iwan ri Jihova ayen de nene ẹkuruemu rẹ asan rẹ ayen nurhe. Ayen se gboja kẹ eya na fikirẹ ojevwe romobọ rayen. Kerẹ udje, ọshare sa vwẹ oja re aye rọyen rere o vwo djephia nẹ ọyen “te ọshare.” O se roro nẹ ọyen cha sa gba aye na vwo vwo ẹguọnọ rọye-en, ẹkẹvuọvo ọ sa gba vwọ djoshọ rọyen. Ọ me reyọ oshọ tiọyena vwo suon. * Iroro vẹ uruemu tiọyena si ọghọ nẹ eya oma, ọ je vwọso oborẹ Jihova guọnọre.—Se Ẹfesọs 5:25, 28.

8. Mavọ yen ọshare sa vwọ dia omamọ rẹ ọgbuyovwin rẹ orua?

⁸ Ọshare sa dia omamọ rẹ ọgbuyovwin rẹ orua siẹrẹ ọ da vwẹrokere oborẹ Jihova vẹ Jesu reyọ ẹdia rẹ ọgbuyovwin rayen vwo ruiruo. Roro kpahen ivẹ usun rẹ iruemu rẹ Jihova vẹ Jesu djephia, wọ me je jokaphiyọ oborẹ ọgbuyovwin rẹ orua se vwo dje iruemu yena phia kẹ aye vẹ emọ rọyen.

9. Idjerhe vọ yen Jihova vwo djephia nẹ ọyen vwomakpotọ?

 ⁹ Omaevwokpotọ. Dede nẹ Jihova yen Ohwo rọ ma ghwanre, jẹ ọ je kerhọ rẹ iroroẹjẹ rẹ idibo rọyen. (Jẹn. 18:23, 24, 32) Ọ vwẹ uphẹn kẹ ihwo rehẹ otọ rẹ usuon rọyen nẹ ayen reyọ iroroẹjẹ vwọ phia. (1 Ivie 22:19-22) Jihova pha gbagba, ẹkẹvuọvo o rhẹro rẹ ogbagba mie avwanre-e. Ukperẹ ọtiọyen, ọ vwẹ ukẹcha kẹ avwanre. (Une 113:6, 7) Baibol na tobọ tanẹ Jihova ọyen “ọchuko.” (Une 27:9; Hib. 13:6) Ovie Devid tare nẹ ọyen se ruiruo ride rọyen gba kidie Jihova vwomakpotọ ji bicha ọyen.—2 Sam. 22:36.

10. Idjerhe vọ yen Jesu vwo djephia nẹ ọyen vwomakpotọ?

¹⁰ Roro kpahen udje ri Jesu. Dede nẹ ọyehẹ Ọrovwori kugbe Onini rẹ idibo rọyen, jẹ ọ je hworhẹ awọ rayen. Die yen iroro ọvo rọ sorọ rẹ Jihova vwọ nẹrhẹ ikuegbe nana dia Baibol na? Ọyen ọ vwọ dia udje kẹ ihwo eje, ọtiọyen ji te igbuyovwin rẹ orua. Jesu da ta: “Me kẹ ovwan oniru nure, rere ovwan ji ru rhe obo ri mi ru kẹ ovwan na.” (Jọn 13:12-17) Dede nẹ Jesu vwo ẹgba mamọ, jẹ o rhẹro rọyen nẹ ihwo efa ga ọye-en. Ukperẹ ọtiọyen, ọ ga ihwo efa.—Mat. 20:28.

11. Die yen ọgbuyovwin rẹ orua se yono vwo nẹ udje rẹ omaevwokpotọ ri Jihova vẹ Jesu?

¹¹ Oborẹ avwanre yonori. Ọgbuyovwin rẹ orua se djephia nẹ ọyen vwomakpotọ vwẹ idjerhe buebun. Kerẹ udje, o rhẹro ogbagba mie aye vẹ emọ rọye-en. Ọ kerhọ rẹ iroroẹjẹ rẹ aye kugbe emọ rọyen ọ da tobọ dianẹ ayen rhọnvwephiyọ ọrọye-en. Marley rọ dia United States da ta: “Ọkievo iroroẹjẹ me vwọ phia fẹnẹ ọ rẹ ọshare mẹ. Ẹkẹvuọvo mi no nẹ ọ vwẹ ẹro ọghanghanre vwo nẹ iroroẹjẹ mẹ, kidie ọ vwẹ iroro nọ vwẹ tavwen o ki brorhiẹn.” Vwọba, ọshare rọ vwomakpotọ vwo owenvwe ro vwo ruiruo rẹ uwevwin ọ da tobọ dianẹ e nẹ iruo yena kerẹ iruo rẹ eya vwẹ asan rọ dia. Ọyena sa dia egbabọse. Diesorọ? Oniọvo aye re se Rachel tare nẹ, “ọshare da vwẹ ukẹcha kẹ aye rọyen vwọ hworhẹ imize yẹrẹ hwerhe utuwevwin, ihwo re dia ekogho rayen vẹ ihwo rẹ orua rọyen che no  nẹ ‘o te ọshare-e.’ Ayen che no nẹ aye na yen suon.” Ihwo de vwo iroro tiọyen vwẹ ekogho ru wọ dia, karophiyọ nẹ Jesu hworhẹ awọ rẹ idibo rọyen, dede nẹ ọyena owian rẹ ọviẹn. Ọdavwẹ rẹ omamọ rẹ ọgbuyovwin rẹ orua, ọyen o vwo ru obo re cha vwerhen aye vẹ emọ rọyen oma, ọ dia o vwo titi oma rọye-en. Vwọ vrẹ omaevwokpotọ, uruemu ọghanghanre ọfa vọ yen ofori nẹ omamọ rẹ ọgbuyovwin rẹ orua vwo?

12. Die yen ẹguọnọ mu Jihova vẹ Jesu vwo ru?

¹² Ẹguọnọ. Ẹguọnọ yen mu Jihova vwo ruẹ kemu kemu ro ruẹ. (1 Jọn 4:7, 8) Ọ womarẹ Ota vẹ ukoko rọyen vwo djephia nẹ ọyen vwo ẹguọnọ avwanre, ọ je guọnọ nẹ avwanre dia igbeyan rọyen. Ọ nẹrhẹ ẹwẹn avwanre totọ womarẹ imuẹro rọ vwọ kẹ avwanre nẹ ọyen vwo ẹguọnọ avwanre. Kẹ ọdavwẹ rẹ ugboma vwo? Jihova “kẹ avwanre efe ro muẹ avwanre gele na.” (1 Tim. 6:17) Ọ kpairoro vrẹ avwanre siẹrẹ avwanre de ruchọ-ọ, ukperẹ ọtiọyen, ọ kpọ avwanre viẹ. Ẹguọnọ yen mu Jihova vwọ kẹ avwanre ọtanhirhe na. Jesu vwo ẹguọnọ avwanre te ẹdia rọ da vwẹ arhọ rọyen kpahotọ kẹ avwanre. (Jọn 3:16; 15:13) Emu vuọvo cha sa hẹriẹ otu re fuevun vwo nẹ ẹguọnọ ri Jihova vẹ Jesu-u.—Jọn 13:1; Rom 8:35, 38, 39.

13. Diesorọ ọ vwọ ghanre rẹ ọgbuyovwin rẹ orua vwo dje ẹguọnọ kẹ orua rọyen? (Ji ni ekpeti na “ Die Yen Ọshare rọ Ghwa Rọvwọn nu Obọ Che Ru Rere Aye Rọyen Se Vwo Muọghọ Kẹ?”)

¹³ Oborẹ avwanre yonori. Ofori nẹ ẹguọnọ mu ọgbuyovwin rẹ orua vwo ru kemu kemu ro ruẹ. Diesorọ ọyena vwọ ghanre? Ọyinkọn Jọn de si: “Ohwo rọ sa guọnọ oniọvo [yẹrẹ orua] rọye ro rhiẹ ẹro mrẹ-ẹ, komavọ o ru sa guọnọ Ọghẹnẹ re jẹ sa mrẹ.” (1 Jọn 4:11, 20) Ọshare ro vwo ẹguọnọ rẹ orua rọyen rọ je guọnọ vwẹrokere Jihova vẹ Jesu cha chọn orua na uko vwo sikẹre Jihova, nẹrhẹ ẹwẹn rẹ orua na totọ, je vwẹrote ọdavwẹ rẹ ugboma rayen. (1 Tim. 5:8) O che yono emọ rọyen je kpọ  ayen vi. Ọ je cha davwẹngba vwo brorhiẹn ro che brọghọ phiyọ Jihova oma, ro ji che fierere kẹ orua na ọkieje. E jẹ a ta ota kpahen ọvuọvo usun rẹ erọnvwọn yena rere a mrẹ oborẹ ọgbuyovwin rẹ orua sa vwọ vwẹrokere Jihova vẹ Jesu.

14. Mavọ yen ọgbuyovwin rẹ orua sa vwọ chọn orua rọyen uko vwo sikẹre Jihova?

¹⁴ Chọn orua rọyen uko vwo sikẹre Jihova. Jesu djerephia nẹ ọyen họhọ ọsẹ rọyen kidie ọ guọnọ chọn idibo rọyen uko vwo vwo esegbuyota rọ ghwotọ. (Mat. 5:3, 6; Mak 6:34) Vwẹ idjerhe vuọvo na, ọdavwẹ rẹsosuọ ro fori nẹ ọgbuyovwin rẹ orua vwo yen oborẹ orua rọyen se vwo sikẹre Jihova. (Urhi 6:6-9) O che ru ọnana womarẹ ayen vwo se ji yono Baibol na, kpo emẹvwa, ghwoghwo iyẹnrẹn esiri na, ji vwo omamọ rẹ oyerinkugbe vẹ Jihova ọkieje.

15. Ọrhọ yen idjerhe ọvo rẹ ọgbuyovwin rẹ orua sa vwọ nẹrhẹ ẹwẹn rẹ orua rọyen totọ?

¹⁵ Nẹrhẹ ẹwẹn rẹ orua rọyen totọ. Jihova vuẹ Jesu nẹ ọyen vwo ẹguọnọ rọyen vwẹ irharo rẹ ihwo efa. (Mat. 3:17) Jesu djerephia abọ buebun nẹ ọyen vwo ẹguọnọ rẹ idibo rọyen womarẹ obo rọ tare vẹ obo ro ruru. Idibo na je vuẹ Jesu nẹ ayen vwo ẹguọnọ rọyen. (Jọn 15:9, 12, 13; 21:16) Ọgbuyovwin rẹ orua se djephia kẹ aye vẹ emọ rọyen nẹ ọyen vwo ẹguọnọ rayen womarẹ obo ro ruẹ, kerẹ ọ vẹ ayen vwo yono Baibol na kuẹgbe. O ji fo nẹ ọ vuẹ ayen nẹ ọyen vwo ẹguọnọ rayen, ayen je pha ghanghanre kẹ, o mi ji jiri ayen vwẹ irharo rẹ ihwo efa, o de shephiyọ.—Isẹ 31:28, 29.

16. Die yen emu ọfa ro fori nẹ ọgbuyovwin rẹ orua ru, kẹ die yen ọ cha kẹnoma kẹ?

¹⁶ Vwẹrote ọdavwẹ rẹ ugboma rẹ orua rọyen. Jihova vwẹ oborẹ ihwo rẹ Izrẹl ghene guọnọ vwọ kẹ ayen, tobọ vwẹ ọke rọ vwọ vwẹ oja re ayen fikirẹ ijẹmienyo. (Urhi 2:7; 29:5) Ọ je vwẹ oborẹ avwanre ghene guọnọ nonẹna vwọ kẹ avwanre. (Mat. 6:31-33; 7:11) Jesu ghẹrẹ otu ri nenire. (Mat. 14:17-20) O ji sivwin otu buebun re muọga. (Mat. 4:24) Ofori nẹ ọgbuyovwin rẹ orua vwẹrote ọdavwẹ rẹ ugboma rẹ orua rọyen rere ivun rọyen sa vwọ vwerhen Jihova. Ẹkẹvuọvo, ọ cha kẹnoma kẹ orọnvwọn ọvo. E jẹ o muomaphiyọ iruo rọyen vwọ vrẹ oyerinkugbe rẹ orua rọyen vẹ Jihova kugbe ẹguọnọ ro fori nẹ o dje kẹ aye-en.

17. Mavọ yen Jihova vẹ Jesu vwẹ uyono vẹ ọghwọku phia wan?

¹⁷ Yono. Jihova yono je ghwọkuẹ avwanre kidie ọ guọnọ chọn avwanre uko. (Hib. 12:7-9) Kerẹ Ọsẹ rọyen, Jesu yono  otu rehẹ otọ usuon rọyen vwẹ idjerhe rẹ ẹguọnọ. (Jọn 15:14, 15) Ọ vwẹ ọghwọku ọgangan phia vwẹ idjerhe rẹ ẹguọnọ. (Mat. 20:24-28) Ọ riẹnre nẹ avwanre gbare-e, avwanre ji ruẹchọ.—Mat. 26:41.

18. Die yen omamọ rẹ ọgbuyovwin rẹ orua cha karophiyọ?

¹⁸ Ọgbuyovwin rẹ orua rọ vwẹrokere Jihova vẹ Jesu karophiyọ nẹ aye vẹ emọ rọyen gbare-e. Ọ “djaoma” kuẹ aye-en. (Kọl. 3:19) Ukperẹ ọtiọyen, ọ reyọ uchebro rọhẹ Galesha 6:1 vwo ruiruo, rọ vwọ chọn ayen uko “vwẹ erhi dẹndẹn” je karophiyọ nẹ ekpuyovwin rọyen gbare-e. Kerẹ Jesu, ofori nẹ ọ dia oniru vwọ kẹ orua na.—1 Pita 2:21.

19-20. Ọgbuyovwin rẹ orua de brorhiẹn, mavọ yen ọ sa vwọ vwẹrokere Jihova vẹ Jesu?

¹⁹ Brorhiẹn ro che fierere kẹ orua na. Jihova brorhiẹn ro fierere kẹ ihwo efa. Kerẹ udje, ọ dia fikirẹ oma rọyen ọ vwọ ma arhọ-ọ, ẹkẹvuọvo ọ ma avwanre rere a vwọ riavwerhen rẹ akpeyeren. Ohwo vuọvo rha sa gba nẹ ọ vwẹ Ọmọ rọyen kpahotọ kẹ imwemwu avwanre-e. O ru ọtiọyen kidie ọ guọnọ chọn avwanre uko. Jesu ji brorhiẹn ro fierere kẹ ihwo efa. (Rom 15:3) Kerẹ udje, ọke rẹ oma vwọ bẹn, o ji yono ihwo ghene, dede nẹ ofori nẹ o rovwoma.—Mak 6:31-34.

²⁰ Omamọ rẹ ọgbuyovwin rẹ orua riẹnre nẹ ọvo usun rẹ erọnvwọn re ma bẹn ro che ru yen o vwo brorhiẹn rẹ aghwanre vwọ kẹ orua rọyen, o ji nẹ oghwa yena ghanghanre. O muẹ orhiẹn brẹ-ẹ. Ukperẹ ọtiọyen, ọ vwẹ uphẹn kẹ Jihova nẹ o yono ọyen vwo bru omamọ rẹ orhiẹn. * (Isẹ 2:6, 7) Ọke yena, ko che roro kpahen obo ri che fierere kẹ ihwo efa ukperẹ oma rọyen.—Fil. 2:4.

21. Die yen a cha ta ota kpahen vwẹ uyono rọ cha na?

²¹ Jihova vwẹ oghwa rode vwọ kẹ igbuyovwin rẹ orua, ọ je cha nọ ayen orhiẹn kpahen oborẹ ayen ru te. Jẹ, ọshare da davwẹngba vwọ vwẹrokere udje ri Jihova vẹ Jesu, ọ cha dia omamọ rẹ ọgbuyovwin. Aye rọyen de ji ru ẹkẹn ro tere, omavwerhovwẹn cha dia orọnvwe na. Ẹro vọ yen ofori nẹ aye vwo ni ọshare rọyen kerẹ ọgbuyovwin rẹ orua na, kẹ, ebẹnbẹn vọ yen o se hirharoku? A cha kpahenphiyọ enọ yena vwẹ uyono rọ cha na.