1. Come che arquanti òmini i impara a tratar le so fameie?

COSSA che te pensi che vol dir esser el paron dela fameia? Arquanti òmini i trata la so fameia de acordo con quel che lori i ga imparà casa o con quel che le persone dela so cultura le fà. Par esémpio, varda cossa che Yanita, una sorela dela Europa, la ga dito: “Ndove mi son de star, le persone le ze sicure che le done le ze manco importante che i òmini e che le ze nasseste sol par laorar par i altri.” El fradel Luke, dei Stati Unidi, el ga dito: “Arquanti genitori i insegna ai so fioi che le done le ghe toca taser e che quel che lore le parla no l’è mia importante.” Ma Geovà no’l vol mia che i òmini i trate le done cossita. (Vedi anca Marco 7:13.) Alora, cossa che el omo el ga de far par esser un bon paron de fameia?

2. (a) Cossa che un paron de fameia el ga de far? (b) Parché che l’è importante i paroni de fameia capir questo?

² Cossa che un bon paron de fameia el ga de far? Prima, el ga de capir cossa che Geovà el vol che lu el fae e parché che Geovà el ga scoliesto un paron par tender dela fameia. El ga anca de imparar a far compagno a Geovà e a Gesù. Parché che l’è importante i paroni de fameia capir tuto questo? Parché Geovà el ga dato autorità al omo e lu el speta che el sàpia doperarla ben. — Luc. 12:48b.

3. De acordo con 1 Corinti 11:3, cossa che Geovà el ga fato par organisar la so fameia?

³ Ledi 1 Corinti 11:3. * Questo versìcolo el ne insegna come Geovà el ga organisà la so fameia nel cielo e nela Tera. Anca ne insegna che, quando Geovà el dà autorità a qualchedun, lu  el speta che ghe renda conto. Par esémpio, Geovà l’è quel che el ga de pi autorità. Alora, lu el speta che tuti i so fioi, nel cielo e nela Tera, i ghe renda conto. (Rom. 14:10; Efe. 3:14, 15) Geovà el ga dato autorità a Gesù par tender dele congregassion. Alora, anca Gesù el ga de rénderghe conto a Dio sora come che le trata. (1 Cor. 15:27) Geovà anca el ga dato autorità al omo sora la so fameia e lu el ga de rénderghe conto a Geovà e a Gesù par la maniera che lu la trata. — 1 Pie. 3:7.

4. Geovà e Gesù i ga autorità par far cossa?

⁴ Geovà l’è el Paron de tuto. Alora, lu el ga la autorità par dir come le robe le ghe toca esser fate e spetar che i so fioi i lo obedisse. (Isa. 33:22) E Gesù el ga la autorità par dir come le robe le ga de suceder nela congregassion parché lu l’è el so paron. — Gàl. 6:2; Col. 1:18-20.

5. (a) Che autorità un paron de fameia el ga? (b) Parché che i paroni de fameia no i ga autorità par far tuto quel che lori i vol?

⁵ Cossita come Geovà e Gesù, el paron de fameia el ga autorità par dir cossa la so fameia la ga de far. (Rom. 7:2; Efe. 6:4) Ma el paron de fameia no’l ga mia la autorità par far tuto come lu el vol. Par esémpio, quel che lu el domanda ala so fameia el ga de esser de acordo cola Parola de Dio. (Pro. 3:5, 6) Un paron de fameia no’l ga de comandar le persone che no le ze dela so fameia. (Rom. 14:4) E quando un fiol el va via de casa, el ga de seitar a rispetar so pare, ma adesso no l’è pi soto la so autorità. — Mat. 19:5.

6. Parché che Geovà el ga dato autorità ai altri?

⁶ Geovà el ga dato autorità ai altri parché lu el ama i so servi. Cossita, la so fameia la pol viver in pace, felice e tuto l’è fato dela maniera giusta. (1 Cor. 14:33, 40) Se Geovà no’l gavesse organisà le robe cossita, saria fadiga saver chi che ndaria far le robe e come che le saria fate.

7. De acordo con Efesi 5:25, 28, come Geovà el vol che i òmini i trate le done?

⁷ Se Geovà el ga dato la autorità ai òmini par amor, parché che ghen’è tante done che le sofre? Questo sucede parché tanti òmini no i ghe bada quel che Geovà el insegna e i va drio de quel che i ga imparà casa o dela so cultura. Arquanti i trata mal le so done parché i pensa sol in lori stessi. Par esémpio, arquanti òmini i se sente ben de saver che i ze lori che i comanda casa. Fursi qualchedun el pol pensar cossita: ‘Mi no posso mia far che la me sposa la me ame, ma posso farla gaver paura de mi.’ E lu el pol doperar questa paura par comandar tuto quel che la so dona la fà. * Quando i òmini i fà cossita, le done no le ze tratade dela maniera giusta, e no le ga el onor e el rispeto che lore le mèrita. L’è sicuro che Geovà no’l vol che le done le sìpie tratade cossita. — Ledi Efesi 5:25, * 28. *

8. Come che un omo el pol imparar a esser un brao paron de fameia?

⁸ Come che un omo el pol esser un bon paron de fameia? Lu el pol imparar a far questo fando sforso de doperar la so autorità come Geovà e Gesù. Prima, ndemo veder due qualità che Geovà e Gesù i mostra quando i  dopera le so autorità. Dopo, ndaremo veder come i paroni de fameia i pol far compagno a lori.

9. Come che Geovà el mostra umiltà?

⁹ Umiltà. Geovà l’è la Persona che la ga de pi saver che tute le altre. Ma ancora cossita, lu el assa che i so servi i parle quel che i pensa e lu li scolta. (Gén. 18:23, 24, 32; 1 Rè 22:19-22) Geovà l’è perfeto, ma no’l speta questo dei so servi. Invesse, lu li giuta a far el meio che i pol par servirlo. (Sal. 113:6, 7) Par quela che la Bìblia la dise che Geovà l’è ‘quel che el ne giuta’. (Sal. 27:9; Ebr. 13:6) Par esémpio, el rè Davi el ga capio che lu l’è stato bon de far un grando laoro sol par causa dela umiltà de Geovà. — 2 Sam. 22:36.

10. Come che Gesù el ga mostrà umiltà?

¹⁰ Vedi el esémpio de Gesù. Anca se el fusse Istrutor e Signor dei so dissìpoli, lu el ga lavà i pié de lori. Parché che Geovà el ga volesto meter questo nela Bìblia? Par i paroni de fameia e i altri imparar del so esémpio e far compagno a lu. Gesù el ga dito: “Parché mi ve go dato el esémpio, cossita valtri podé far compagno a mi.” (Gioani 13:12-17) Anca che Gesù el gavesse tanta autorità, lu el servia ai altri invesse de spetar esser servio. — Mat. 20:28.

11. Come che un paron de fameia el pol esser ùmile compagno a Geovà e a Gesù?

¹¹ Cossa che noantri imparemo? Un paron de fameia el pol mostrar che lu l’è ùmile de diverse maniere. Par esémpio, lu no’l speta che la so sposa e i so fioi i fae tuto perfeto. Anca quando lori no i ze de acordo con qualcossa che lu el ga parlà, lu li scolta. Marley, che la ze de star nei Stati Unidi, la dise: “Anca quando mi e me omo no semo intesi, lu el vol saver quel che mi penso e el rispeta quel che mi parlo. Quando lu el va far una dessision, sempre el pensa in quel che mi digo.” El paron de fameia anca el mostra umiltà quando el giuta nei mistieri casa, anca se, nela so cultura, le persone no le fà questo. Parché che pol esser fadiga mostrar umiltà? Una sorela, che la ga nome Rachel, la ga dito: “Ndove mi son nassesta, se un omo el giuta la dona a lavar i piati e netar la casa, i visigni e i parenti i ga dubi se lu l’è pròpio omo. Lori i pensa che lu no l’è mia bon de comandar  la so dona.” Se tanti i pensa cossita ndove te sì de star, ricòrdate che Gesù el ga lavà i pié dei dissìpoli, anca se questo fusse un laoro fato par schiavi. Un bon paron de fameia el se preocupa cola felicità dela so sposa e dei so fioi, e nò con quel che i altri i pensa. Ma che altra qualità la ze tanto importante par un paron de fameia?

12. Come che Geovà e Gesù i mostra che i ne ama?

¹² Amor. Tuto quel che Geovà el fà l’è con amor. (1 Gio. 4:7, 8) Lu el mostra che el ne ama parché el ne dà tuto quel che ghemo de bisogno par esser so amighi. Par esémpio, lu el ne dà la Bìblia e la so organisassion. Lu anca el ne assa sicuri che el ne tende e che el ne ama. E Geovà anca el ne dà quel che ghemo de bisogno par viver. La Bìblia la dise che lu “el dà a noantri tante robe che le ne fà contenti”. (1 Tim. 6:17) Quando noantri sbaliemo, lu el ne dise quel che ghemo de cambiar, ma no’l assa de amarne. E par causa del so grando amor, lu el ga dato el so Fiol par morir par noantri. Anca Gesù el ga mostrà che el ne ama quando el ga dato la so vita par salvarne. (Gioani 3:16; 15:13) Geovà e Gesù i ndarà amar par sempre quei che i seita leai a lori. — Gioani 13:1; Rom. 8:35, 38, 39.

13. Parché che un paron de fameia el ga de mostrar che el ama la so fameia? (Vedi anca el quadro “ Come che un omo pena maridà el pol gaver el rispeto dela so sposa?”)

¹³ Cossa che noantri imparemo? Tuto quel che el paron de fameia el fà ga de esser con amor. Parché? El apòstolo Gioani el ga dito: “Quel che no’l ama el so fradel [o la so fameia], che el ga visto, no’l pol mia amar a Dio, che no lo ga mia visto.” (1 Gio. 4:11, 20) Come che un paron de fameia el mostra che el ama la so fameia e che el fà compagno a Geovà e a Gesù? Lu el ga de giutarli a gaver una forte fede in Geovà, assarli sicuri che lu li tende e li ama e lu el ga de darghe quel che i ga de bisogno par viver. (1 Tim. 5:8) Lu el insegna i so fioi e el ghe mostra quel che i ga de cambiar. Lu anca el fà scólie che le dà  onor a Geovà e che le ze el meio par la so fameia. Adesso, ndemo veder come che i paroni de fameia i pol far compagno a Geovà e a Gesù in cada una de queste robe.

14. Come che un omo el giuta la so fameia a gaver una forte fede?

¹⁴ El giuta la fameia a gaver una forte fede in Geovà. Gesù el ga fato compagno a so Pare quando el giutea i so seghidori a gaver una forte fede. (Mat. 5:3, 6; Mar. 6:34) Anca i paroni de fameia i sa che la roba pi importante che i ga de far l’è giutar la so fameia a gaver una forte fede. (Deu. 6:6-9) El paron de fameia el fà questo quando lu e quei dela so fameia i lede e i stùdia la Parola de Dio, i va ale riunion, i predica le bone notìssie e i fà pi forte la so amicìssia con Geovà.

15. Come che el paron el pol assar la so fameia sicura che lu la ama e che la tende?

¹⁵ El ga de assar la fameia sicura che lu la tende e la ama. Geovà el ga parlà a Gesù che lo amea tanto, anca davanti dei altri. (Mat. 3:17) Gesù anca el ga mostrà che el amea i so seghidori par meso de quel che el fea e de quel che el parlea. Alora, anca i so seghidori i mostrea amor par lu. (Gioani 15:9, 12, 13; 21:16) Anca un paron de fameia el mostra el so amor par la sposa e i so fioi par meso de quel che el fà e de quel che el parla. Par esémpio, lu el stùdia la Bìblia con lori e el ghe mostra che li ama e che lori i ga tanto valor par lu. — Pro. 31:28, 29.

16. (a) Cossa che un paron de fameia el ga de far? (b) Ma cossa che lu el ga de star atento par no far?

¹⁶ El tende de quel che la sposa e i fioi i ga de bisogno par viver. Geovà sempre el ga dato quel che i israeliti i gavea de bisogno, anca quando el ghe ga tocà castigarli parché no i ga mia obedio. (Deu. 2:7; 29:5) E anca ancoi, Geovà el ne dà quel che ghemo de bisogno. (Mat. 6:31-33; 7:11) Anca Gesù el ga dato de magnar ai so seghidori e el se ga preocupà cola salute de lori. (Mat. 14:17-20; 4:24) Alora, el paron de fameia, che el vol obedir a Geovà, el ga de tender de quel che la so sposa e i so fioi i ga de bisogno par viver. Ma el ga anca de star atento par no laorar massa e no gaver pi tempo par la so fameia e par giutarla a gaver una forte fede.

17. Come che Geovà e Gesù i ne insegna?

¹⁷ El insegna e el dà consili ala so fameia. Quando Geovà el ne insegna e el ne mostra quel che ghemo de cambiar, lu el fà quel che l’è meio par noantri. (Ebr. 12:7-9) Compagno a so Pare, Gesù el insegna de maniera amorosa a quei che i ze soto la so autorità. (Gioani 15:14, 15) E quando lu el ga de dar un consìlio a qualchedun, lu l’è firme, ma bondoso. (Mat. 20:24-28) E lu el sa che semo imperfeti  e che dele volte sbaliemo. — Mat. 26:41.

18. Cossa che un brao paron de fameia el capisse?

¹⁸ El paron de fameia che el fà come Geovà e Gesù, el capisse che la so fameia no la ze mia perfeta. Alora, lu no’l resta cativo cola so sposa e i so fioi parché lu li capisse. (Col. 3:19) Quando lu el ga de dar un consìlio, lu el fà con amor de acordo con Gàlati 6:1 e el se ricorda che anca lu el sbàlia. Cossita come Gesù, lu el sa che la meio maniera de insegnar la ze par meso del so esémpio. — 1 Pie. 2:21.

19-20. Come che un paron el pol far come Geovà e Gesù quando el fà scólie par la so fameia?

¹⁹ El scòlie far quel che l’è meio par la fameia. Quando Geovà el fà qualcossa, lu pensa in quel che l’è meio par i altri. Par esémpio, Geovà el ne ga dato la vita par noantri viver felici. E par causa del pecato el ga dato la vita del so Fiol. Lu no’l ga fato questo par forsa, ma parché el volea el meio par noantri. Anca Gesù el ga scoliesto far quel che l’è meio par i altri. (Rom. 15:3) Par esémpio, una volta lu l’era canso, ma anca cossita, lu el ga scoliesto insegnar le persone. — Mar. 6:31-34.

²⁰ El bon paron de fameia che l’è brao el sa che l’è tanto importante far bone scólie par la so fameia. Lu el pensa ben vanti de far una scólia e no’l fà la prima roba che ghe vien in testa o sol de acordo con quel che lu el sente. Invesse, lu el va in serca del aiuto de Geovà par far bone scólie. * (Pro. 2:6, 7) Cossita, lu sempre el pensa in quel che l’è meio par la fameia e nò par lu stesso. — Fil. 2:4.

21. Cossa che ndaremo veder nel pròssimo stùdio?

²¹ Geovà el ga dato al omo la autorità par tender dela fameia e el speta che el fae el meio che el pol. Ma par farlo ben, el paron el ga de far compagno a Geovà e a Gesù. E se la dona la ghe giuta el so omo, lori i gavarà una fameia felice. Cossa che la sposa la ga de pensar sora la autorità del so sposo? Che dificoltà ela la infronta? Ndaremo studiar sora questo nel pròssimo stùdio.