1. Eheeni ekhanle yoovolowela moota mulopwana onaathokorora awe amwaariye ni anamwanaawe?

WA MOONELO anyu entaphulela eheeni okhala muru ni “muhooleli” a etthoko? Alopwana akina annahiya makhalelo, sookhovelela saya ni moota ahunwalaaya ovolowelaka moota anaakasoopaaya amaaraya ni anamwanaaya. Nwehe ele murokora mmoha onkhala w’Europa ohimmaawe yoowo oneeriwa Yanita, owo nre: “Atthu antxipale a muttetthe kinkhalaaka anahima weera athiyana apakeliwe weera yaavareleke muteko alopwana.” Munna mukina onkhala w’Estados Unidos enre: “Owo onnaaxuttiha anamwane weera asithiyana ayareliwe weera areeriheke elapo khoiyo otthara miruku saya, eyo tiiyo, miruku saya khasinvareleya muteko.” Mene Yehova khantthuna weera alopwana yaakasoope mooteene yoowo athiyana. (Munwehe tho Marko 7:13.) Muhooleli a vatthokoni onkela oxuttera hayi okhala ooreera murima?

2. Heeni muhooleli a etthoko ontthuneyaawe osuwela ni mwaha wa heeni?

² Mulopwana ontthuna okhala ooreera murima vatthokoni, ontthuneya wiiwexexa ele Yehova onwehereraawe wa yoowo, nave-tho onnatthuneya wiiwexexa mwaha wa heeni Yehova otikithenraawe nlamulo nookhala muhooleli. Ni onnatthuneya wiiwexexa etthu ontthuneyaawe opaka weera atakihe matakihero a Yehova ni Yesu. Mwaha wa heeni oraaya wootthuneya ahooleli a vatthokoni ontthuneyaaya wiiwexexa ipontu iya? Mwaha wooweera Yehova ohaavaha ohoolela nave owo onweherera weera awo ehooleleke nnene.—Luka 12:48b.

3. Vano 1 Akorinto 11:3, onnixuttiha eheeni voohima sa ohoolela?

³ Musome yoolepa ya 1 Akorinto 11:3. Yoolepa ela ennoonihera moota Yehova oreherenraawe wiirimu ni elapo ya vathi. Ohoolela onvoliihera itthu piili sootthuneya, ohoolela ni waakhula wa Yehova. Yehova “muru” naari muhooleli mutokweene.  Anamwane awe ootheene a wiirimu naari a elapo ya vathi, anoorowa waakhula ohoolo wawe. (Arom. 14:10; Aef. 3:14, 15) Yehova onvaha Yesu okhala muhooleli a miloko, mene owo onnitthuneya weera aakhule ohoolo wa Yehova moota onkosoopaawe miloko. (1 Akor. 15:27) Yehova onvaha tho mulopwana oothela ohoole vatthokoni nave-tho owo onkela waakhula wa Yehova ni Yesu moota onkosoopaawe etthokwaawe.—1 Ped. 3:7.

4. Yehova ni Yesu arinono otaphuwa woopaka eheeni?

⁴ Mwaha wookhala muhooleli a emusi awe ya wiirimu ni elapo ya vathi, Yehova ookhalano otaphuwa woovaha malamulo weera etthariweke ni anamwanaawe. (Yes. 33:22) Nave-tho Yesu mwaha wookhala muhooleli a miloko sa Akristu, ookhalano otaphuwa woovaha malamulo weera etthariweke.—Agal. 6:2; Akol. 1:18-20.

5. Ahooleli a etthoko arino olamula woopaka eheeni ni mwaha wa heeni nneeraahu olamula waya wookhalano mwiilaano?

⁵ Ntoko Yehova ni Yesu, muhooleli a vatthokoni ookhalano otaphuwa woopaka malamulo weera atthu a etthoko awe etthareke. (Arom. 7:2; Aef. 6:4) Mene olamulela wawe wookhalano mwiilaano. Mwa ntakihero, malamulo onivahaawe entthuneya envarihaneke ni masu a Muluku. (Mir. 3:5, 6) Ale anhoolela etthoko khanwera ovaha malamulo wa atthu ahikhanle a etthoko aya. (Arom. 14:4) Opwaha mwa yeeyo, anamwane aya yunnuwa vale enakhuma owannyaya, onnitthuneya waattittimiha asitithaya, mene khenvahiwa maamulo ni yaawo.—Math. 19:5.

6. Mwaha wa heeni Yehova onivanhaawe nlamulo na ohoolela?

⁶ Nlamulo na Yehova yoovaha yeeyo Yehova onivanhaawe mwaha wooweera owo onnanisivela. Ohoolela onneeriha emusi ya Yehova okhala ya mureettele ni yoorehereya. (1 Akor. 14:33, 40) Nahaakhanle nlamulo nno emusi ya Yehova yaakela okhala yohiiwanana ni khaavo eera akhaleke oohakalala. Mwa ntakihero, waahereke okhala wooxupa osuwela taani ompaka soothanla soomalihera ni weettela.

7. Moovarihana ni Aefeso 5:25, 28, Yehova ontthuna weera alopwana yaathokororeke hayi asaaraya?

⁷ Wakhala weera nlamulo noohoolela ti nooreera, heeni athiyana antxipale anoonaaya weera annihasuliwa ni asilopwana yaathenle? Eyo eneereya mwaha wooweera alopwana antxipale yaathenle khaaneettela nlamulo na Yehova voohima sa etthoko. Anthanla otthara makhalelo ni sookhovelela sa muttetthe ankhalaaya. Awo annaahasula asaaraya mwaha wa sootthuna sa murima. Mwa ntakihero, alopwana akina annaakhalela ehatxe asaaraya weera yoonihereke weera awo tanlamula. Apaale awo annuupuwela há: Miiva nkintthuneya waanyeserera aamwaaraka weera ekitthuneke mene entthuneya weera ekooveke. Mene owo pooti ovarela muteko owoopopiha weera aakhaleleke ehatxe amwaarawe. * Muupuwelo owo onnawootxeeliha athiyana ottittimihiwa ni okosoopiwa moovirikana ni ele Yehova onwehereraawe.—Mmusome Aefeso 5:25, 28.

8. Mulopwana onrowa oxuttera hayi okhala muhooleli a nnene vatthokoni vawe?

⁸ Mulopwana onookasoopa nnene etthoko awe, alikanxeraka matakihero a Yehova ni Yesu moota anlamulelaaya. Ninrowa woona makhalelo meeli a Yehova ni Yesu anooniheraaya  yaahoolelaka nave ninrowa woona moota muhooleli a vatthokoni okhanlaawe ootakiha mikhalelo iyo aahoolelaka amwaariye ni anamwanaawe.

9. Yehova onoonihera hayi wiiyeviha?

⁹ Wiiyeviha. Yehova mutthu oosuwelaxa a elapo yootheene, naamwi vareene hiiho owo onnaawiriyana akaporo awe. (Eph. 18:23, 24, 32) Ni onnaakhulela tho moonelo aya. (1 Mam. 22:19-22) Yehova toomalela, nto naamwi vareene hiiho owo khanniweherera hiyo weera nikhale oomalela, opwaha mwa yeeyo, owo onnaakhavihera akaporo awe ni omukokhorela ntoko owo ontthuna awe. (Nsal. 113:6, 7) Khahiyono siyo ene Biblya onimwiitthana awe Yehova “ekhavihero ahu.” (Nsal. 27:9; Aheb. 13:6) Mwene Davidi annisuwela weera aawera soothanleliwa sawe mwaha woowiiyeviha wa Yehova.—2 Sam. 22:36.

10. Yesu oonihenre hayi wiiyeviha?

¹⁰ Moone ntakihero na Yesu. Owo aari namaxuttiha ni pwiya a ooxuttera awe. Naamwi vareene hiiho owo aarapiha inaani saya. Mwaha wa heeni Yehova ahalaka ohela yoowereya ela mBiblyani? Moohihovela waari weera ale anhoolela etthoko ni atthu akina arino olamula, etthareke ntakihero nawe. Yesu enre: “Vekhaikhai kòhovahani ethonyero, wera sawasawa miyo kiwèrenlakani, siso nyuwo tho mwère.” (Yohani 13:12-17) Yesu aakhalanne olamula otokotoko owo khaaweherera orumeeliwa mene annaaarumeela akina.—Math. 20:28.

11. Ahooleli a vatthokoni anrowa otakiha hayi wiiyeviha wa Yehova ni Yesu?

¹¹ Ele ninxutteraahu. Muhooleli a etthoko onoowera wiiyeviha wa mikhalelo soovirikana. Mwa ntakihero, owo khanweherera wa amwaarawe ni anamwanaawe okhala oomalela. Naari atthu a etthoko awe ehaakhulelaka muupuwelo awe, mene owo onnawiiwelela. Marley, murokora onkhala w’Estados Unidos, ohimme ha: “Miyo ni aiyaka, ninnakhalano moonelo woovirikana, mene miyo kinnawera woona weera awo ennahela mwiitti ni ottittimiha muupuwelo aka. Awo anniwera wiiwa ele kinhimaaka ehinaakuveene opaka yoothanla.” Anamahoolela a etthoko ari oowiiyeviha, awo-tho annitthuneya okhavihera miteko sa vaate naamwi atthu a muttetthe ole ehimaka weera miteko iyo khasihiyono ti saalopwana. Vano ovara muteko moowiiyeviha pooti okhala wooxupa. Mwaha wa  heeni? Murokora mmoha oneeriwa Rachel ohimme ha: “Nipuro kinkhumaaka atthu omoona mulopwana arapihaka iparatho ni okwesa vaate annimuhovela aari mulopwana lopwana, awo anahima ha: ‘Ale khanwera waaruma amwaaraya.’” Muupuwelo owo weereyaka tho nipuro munkhalaanyu, muupuweleke weera Yesu aarapiha manaani a ooxutteraawe naamwi muteko ole waari waakaporo. Muhooleli a etthoko ooreera murima, khanpwattha itthu atthu akina enuulumaaya, owo ompwattha waakosoopa amwaarawe ni anamwanaawe. Mene wookhala mukhalelo mukina wootepa otthuneya wa muhooleli a vatthokoni ooreera murima ontthuneya awe otthara. Mukhalelo heeni?

12. Yehova ni Yesu anoonihera hayi weera annanisivela?

¹² Nsivelo. Itthu soothesene Yehova ompakaawe, ompaka ni nsivelo. (1 Yohani 4:7, 8) Owo onnooniheraka weera onnanisivela, anivahaka itthu sootthuneya sa omunepani, moorweela mwa masu awe—Biblya—ni mareherero awe. Nave-tho owo onnipaka itthu weera anihakalalihe ooniheraka weera onnanisivela. Ankha soohaawela sahu sa weerutthuni? Biblya onahima weera Yehova “onanivaha sothesene vowatta, wera nipuheno.” (1 Tim. 6:17) Namutthekela vale Yehova owo onnanlaka mene khanhiya onisivela. Mwaha wa nsivelo nenne naamweerihe onwiiha mwanawe weera anlivele. Yesu ohoonihera nsivelo avahereraka ekumi awe weera anivuluxe. (Yohani 3:16; 15:13) Khiyaavo etthu yeera emalihe nsivelo Yehova ni Yesu eraayano wa atthu ale oororomeleya.—Yohani 13:1; Arom. 8:35, 38, 39.

13. Heeni oraaya wootthuneya muhooleli a vatthokoni woonihera weera onnaasivela amwaariye ni anamwanaawe? (Moone tho ekwaadru, “ Moota heeni mulopwana othenle vaanaanoru onaasaasaawe nttittimiho wa mwaarawe?”)

¹³ Ele ninxutteraahu. Itthu sootheene muhooleli a etthoko onipaka awe ontthuneya ovarihana ni nsivelo. Mwaha wa heeni oraaya wootthuneya? Murummwa Yohani onnaakhula: “Ole onèra wi “Kinnamusivela Muluku”, koma onittana ni mukhw’awe, [naari etthoko awe], ori òwotha.” (1 Yohani 4:11, 20) Muhooleli a vatthokoni onaasivela amwaariye ni anamwanaawe,  ni onatthara ntakihero na Yehova ni Yesu, onnathokorora mukhalelo wa omunipani ni ohakalaliha etthoko awe. (1 Tim. 5:8) Owo onnaaxuttiha ni waalaka anamwanaawe. Owo tho onnapaka soothanla sinamusivela Yehova ni emusi awe. Vano ninrowa woona ele muhooleli a etthoko okhanlaawe oomulikanxa Yehova ni Yesu, avarelaka muteko ipontu iya.

14. Muhooleli a vatthokoni, onthokorora hayi sootthuneya sa omunepani sa amwaariye ni anaawe?

¹⁴ Othokorora sootthuneya sa omunepani sa etthoko. Attharaka ntakihero na Yehova, Yesu anneeteteela sootthuneya sa omunepani sa ooxuttera awe. (Math. 5:3, 6; Marko 6:34) Vamoharu, ahooleli a etthoko, aasuwela weera muritti mutokotoko araayano, othokorora mikhalelo soomunepani sa etthoko aya. (Ola. 6:6-9) Muhooleli a vatthokoni, onnapaka eyo ahitxompelaka osoma masu a Muluku ni atthu a etthoko awe, ohela mpuwa orowela mithukumano, olaleera mitthenka sooreera, ni waakhavihera atthu a etthoko awe okhala asinthamwene a Yehova.

15. Muhooleli a vatthokoni anaawere hayi waasaasera waahakalaliha amwaariye ni anaawe?

¹⁵ Waasaasera ohakalaliha etthoko awe. Yehova aahoonihera moota aamusivela awe mwanawe Yesu, annapaka eyo ohoolo wa atthu akina. (Math. 3:17) Tiyeeyo tho Yesu aawerenlaawe atthareli awe, owo aahoonihera eyo ni itthu aapaka awe ni itthu uulumaawe. Yookhumelela awe waari weera atthareli awe yannoonihera nsivelo mwa yoowo. (Yohani 15:9, 12, 13; 21:16) Muhooleli a vatthokoni onoowera weera onnaasivela amwaariye anaawe vatthoni, wa itthu onipakaawe. Mwa ntakihero, amusomaka Biblya vamoha. Owo onnoonihera waasivela amwaariye ni anamwanaawe, aattottopelaka waawereyaka ohoolo wa atthu akina.—Mir. 31:28, 29.

16. Etthu heeni ekina muhooleli a etthoko ontthuneyaawe opaka nave ontthuneya wiikasoopa ni eheeni?

¹⁶ Waasaasera itthu sa weerutthuni sa etthoko awe. Yehova annaasaasera itthu sa weerutthuni sa Ana Israeli, naamwi emaara ekina yahiiwelela ni waatthuneya ottharuxiwa. (Ola. 2:7; 29:5) Nave owo onnapaka emoha-moharu ni hiyo olelo va. (Math. 6:31-33; 7:11) Yesu tho aapaka eyo aatxihaka ooxuttera awe. (Math. 14:17-20) Nave-tho, annapwatthapwattha ekumi aya. (Math. 4:24) Muhooleli a vatthokoni ontthuna omuhakalaliha Yehova, ontthuneya othokorora sootthuneya sa weerutthuni sa amwaarawe ni anamwanaawe. Mene owo ontthuneya wiikasoopa weera avareke muteko eriyari neeriyari. Owo khantthuneya oyeeha ehuhu yintxipale omutekoni wawe ni ahittiwale othokorora itthu sootthuneya sa omunepani ni waahakalaliha amusi awe.

17. Yehova ni Yesu annixuttiha hayi ni onilaka?

¹⁷ Oxuttiha. Yehova onnanixuttiha ni onttharuxa uupuwelaka sootthuneya. (Aheb. 12:7-9)  Attharaka ntakihero naatiithi awe, Yesu onnaaxuttiha ale ari moolamuleloni mwawe ni nsivelo. (Yohani 15:14, 15) Owo khantxentxa txenta ni toosareya osivela. (Math. 20:24-28) Owo oosuwela weera hiyo atthu oohimalela. Ni murima ahu onnanipakiha opaka yoottheka.—Math. 26:41.

18. Eheeni muhooleli a vatthokoni ooreera murima ontthuneyaawe wuupuwelela?

¹⁸ Muhooleli a vatthokoni ontthara ntakihero na Yehova ni Yesu, toowiriyana ele atthu a etthoko awo enhimaaya. Owo onnuupuwelela weera atthu a etthoko awe “toohimalela” mwaha wa yeeyo, owo khananyoonyeriwa amwaariye naari anaawe. (Akol. 3:19) Opwaha mwa yeeyo owo onnatthara miruku siri va Agalata 6:1, ni onnaalaka atthu “ni munepa wopixa murima” uupuwelaka tho weera owo toohimalela. Hiiho ntoko Yesu onnasuwela weera, oxuttiha wa nnene ovaha ntakihero.—1 Ped. 2:21.

19-20. Muhooleli a vatthokoni, onkela omulikanxa hayi Yehova ni Yesu, aapakaka soothanla?

¹⁹ Opaka yoothanla eneera ekhavihere etthoko. Yehova onnapaka soothanla awuupuwelaka akina. Mwa ntakihero, owo oothanla oopattuxa ekumi khahiyo wiihakalaliha owo paahi, weera hiyo tho onisiveleke okhala ni okumi. Ni khaavo omunyeserenre ovaha ekumi ya mwanawe weera anivuluxe. Owo oopaka eyo uupuwelaka weera yaakela okhala etthu yooreera wa hiyo. (Arom. 15:3) Nave-tho, Yesu aapaka soothanla awuupuwelaka atthu akina. Mwa ntakihero, owo aaleva wiitthuuwa weera axuttihe muloko mutokotoko wa atthu.—Marko 6:31-34.

²⁰ Muhooleli a vatthokoni ooreera murima oosuwela weera, muritti mutokotoko oraaweno ori opaka soothanla sooreera sa etthoko awe. Mwaha wa yeeyo, khankuxera matheela owo khampaka soothanla sineera sihikhavihere etthoko awe. Opwaha mwa yeeyo, owo onnahiya weera Yehova amuxuttihe opaka soothanla sooreera. * (Mir. 2:6, 7) Nto ikwaha sootheene onnapaka soothanla weera akhavihere etthoko awe, ohiya sootthuna sawe.— Afil. 2:4.

21. Eheeni ninkelaahu oxuttera yoosoma enttharelana?

²¹ Yehova ohaavaha ahooleli a etthoko, muteko wootepa ovila, owo onweherera weera epakeke nnene yoothanleliwa eyo. Nto muhooleli a etthoko oniilipihera omulikanxa Yehova ni Yesu, onookhumelela nnene. Muthiyana apaka emparaawe, owo onookhalano etthoko yoohakalala. Athiyana yooneleke hayi ohoolela wa iyaya, maxupo heeni awo anvirihaaya? Yooxuttera enittharelana enimuuluma mwaheene yoowo.