1. Ginipai rengbe kadu na maapai kurii gu gene kumba amangapai ngbaha na diako gbiati awiriko?

GINIPAI padu na pagbia ayugoho foro? Kura akumba nambu sino atitase, sino mangaapai watadu wai i asono tipa si du na maapai kurii wai i amangapai na adiayo gbiati awiriyo. Oni bingo gupai wirinarani nga Yanita naraka Putu yo apehe, ri aya, “Rogo gu ba mi araka rogoho, aboro nabi adee ni agu aboro du na payo kusende ti akumba na i nabiyo ni akanga.” Na wirina du rimoko nga Luke naraka Amerika yo aya, “Kura abaagude nayugo gupai fu agu awiriyo nga aparanga nga, pai ho dee apehe du na nyanyakipaha te na si aidanga kumba naadega tuko kuti ai gupai dee agumbaha te.” Ono tie, Yekova aidanga gupai nga akumba naamangapai na adiayo ngba gu gene re te. (Oni ringbisinga ha na Marako 7:13.) Ono waigu tie rengbe kumba ka wirika wai kadu ni wene bariikporo?

2. Ginipai si aida bariikporo inihe, na tipagine?

² Tipa kadu ni wene bariikporo, si naida kumba rugutiko mbata na gupai Yekova aidaha beko. Si naida ko ini ndu gupai a, Yekova afu pagbia ti ni fu kura aboro kurii akurayo, na waigu rengbe ko ka wirika gu kpiapai aYekova na Yesu namoihe. Tipagine duhe ti ni ni nyanyakipa pai fu kumba tipa ko gbia gu inohe re? Bambiko Yekova ima fu bete pagbia fu abariikporo, na ko naida i mangisunge na ni wenengai.—Rk. 12:48b.

3. Ginipai ani awirikaha tipa pagbia rogo gupai du ni kekehe rogo 1 AKorindo 11:3?

³ Oni gedi 1 AKorindo 11:3. Gi veresi re nasakapa wai Yekova nambakadi gu gako aboro du ngbangbaturũ yo na aguyo du auru kpotosende no. Wa duhe nga Mbori nga rii aboro dunduko, ko na rengberengbe pagbia beko, vurube gi mbakadapai nga ga pagbia re, ko ima fu bete pagbia fu kura aboro na i nika karagapai akaraga fuko tipa wai i amangasunge na gayo pagbia. (Rom. 14:10; Ef.  3:14, 15) Yekova ima fu pagbia fu Yesu kurii dungurati, ono Yesu nika karagapai akaraga fu Yekova nibipa gu gene ko amangapai na ani ngbaha. (1 Kor. 15:27) Yekova ima fu pagbia a fu kumbakudee kurii diako na awiriko, ono ko nika karagapai akaraga fu aYekova na Yesu tipa wai ko amangapai na gako aborokporo.—1 Pet. 3:7.

4. Gini pagbia du aYekova na Yesu na ni?

⁴ Wa du Yekova nga Barii gu gako aborokporo du ngbangbaturũ yo na aguyo du auru kpotosende no, ko na pagbia beko ka maa andiko tipa wai si aida awiriko naamangaapai na ko na rengba ka sayo i pekefuo agu andiko re. (Yes. 33:22) Wa du Yesu ni barii gu dungurati nga ga aKristano, ko na kina rengo beko a ka maa andiko na ka sa aboro i pekefuoho.—Gara. 6:2; Koro. 1:18-20.

5. Gini pagbia du be gu bariikporo nga Kristano, na gini apai adunga ni na pagbia ka mangaha ya?

⁵ Wakina aYekova na Yesu, gu bariikporo nga Kristano na pagbia beni ka maa andiko fu gani aborokporo. (Rom. 7:2; Ef. 6:4) Ono tie, gani pagbia na kina ngbandaha ti ni. Ni kpiapai, si naida mburu gani arugute ru rii gu bangua arengo du vuru Fugo Mbori yo. (Snz. 3:5, 6) Na bariikporo na pagbia beni ka maa andiko fu agu aboro angianga gani aborokporo ya te. (Rom. 14:4) Berewe a, ho awirini asona ni na ki guari kporo, i nandu kindi kumbatayo kaa irisa ni, ono i adunga berewe tii gani pagbia te.—Mt. 19:5.

6. Tipagine du Yekova amangi gu mbakadapai ti ni nga ga pagbia?

⁶ Yekova amangi gu mbakadapai nga ga pagbia mbiko ko ima kpinyemu gako aborokporo. Gipai re nga gamahe beko. Pagbia nasaha taata fu ga Yekova aborokporo i naamangapai rogo zereda na ni tangaratangaraha. (1 Kor. 14:33, 40) Ka pa agu aboro du na pagbia beyo naadunga ziazia ya, ka ga Yekova aboro du ni unzugurounzuguro yo na ka i adunga na ngbarago ya. Ni kpiapai, ka boro iningo da si aida ni naamanga yangara adiaberã na da si aida ni ngbembatayo rogo mangapai kuti agu adiaberã re te.

7. Ginipai AEfeso 5:25, 28 apehe tipa wai Yekova aida akumba naamangapai na adiayo?

⁷ Ka si du nga si ni wenepai tipa bariikporo du na pagbia rogo kporo, tipagine dungu adee abi tiyo ti ni nga akumbayo namangapai na yo ngba gbegberẽ gene na kini zogo yo ngba gbegberẽ gene? Gipai re wo mbiko dungu akumba nambu pekafuo gu ga Yekova arugute du tipa ramukporo na kini sia ka pekafuo sino aboro watadu sino atitase. Agu akumba re ima rengba kaa mangapai na adiayo ngba gbegberẽ gene tipa ka sa ngbarago ti tiyo. Ni kpiapai, kumbakudee ima rengba kaa zoga diako ngba gbegberẽ gene tipa ka bi tiko nga ko nyakipa ko watadu ka yugoho fu kura aboro nga zezere boro nga ko te. Ko ima rengba kaa berã gupai nga, ka ko mangingo diako ngbaome ri kpinyemuko te, ono ko ima rengba ka sa ri tipa ri gunde tiko. Na ko ima rengba ka mangasunge na gi gunde re tipa kadu na maapai kuriri. * Ngbatunga gu bipai re gbiati mangapai na sa adee ka i gbianga gu irisa si aida i naagbiaha ya, na gipai re andunga sa kuti gupai Yekova akpinyemuhe te.—Oni gedi AEfeso 5:25, 28.

8. Waigu rengbe kumba ka wirika wai kadu ni wene bariikporo?

⁸ Kumba rengbe ka wirika wai kadu ni wene bariikporo ni wirika ko gu gene aYekova na Yesu amangapai na gayo pagbia ngbaha. Ani bingo  asino ue aYekova na Yesu ayuguhe, na ki bingo wai bariikporo narengbe ka yugo agu asino re ho ko amangapai ni na diako gbiati awiriko.

9. Waigu Yekova ayugo umbasitise?

⁹ Umbasitise. Yekova nga iratatamana kisusi aboro dunduko; wa vura duhe wo, ko nadega tuko adega kuti agu aberãpai nga ga gako amoyambu. (Bam. P. 18:23, 24, 32) Ko nambu agu aboro ambu du tii gako pagbia tipa i fu aberãpai. (1 Aba. 22:19-22) Yekova ni rengberengbe ko, ono ko abingo gupai nga si naida ani naamangapai awere ni rengberengbehe te. Kuba gure, ko naundo gu kpakpa aboro nairisoko tipa i du na diabese. (Tam. 113:6, 7) Ziazia Kekeapai nape gupai nga Yekova nga “mounda.” (Tam. 27:9; Eb. 13:6) Bakindo Davide ape gupai nga, ko adu na rengba ka nyasa gu bakere sunge ko amangihe mbiko Yekova adu na umbasitise na ki undo ko.—Tam. 54:4

10. Waigu Yesu ayugu umbasitise?

¹⁰ Oni bingo ga Yesu kpiapai. Wa si avura du nga ko angia Gbia fu gako abawiriki, ko azundu nduyo. Gine nga ndupai sa Yekova aidihe ti ni tipa i ke gipai re ku rogo Ziazia Kekeapai yo? Si adu tipa kadu ni kpipai fu aboro dunduko kodihe na abariikporo tipa i pekefuoho. Yesu nitiko aya: “Mi yugu pai fu roni, oni nimangi wa mangi mi fu roni.” (Yo. 13:12-17) Wa vura duhe nga Yesu adu na bakere pagbia beko, ko anaaidanga aboro nimangi pako te. Kuba gure, ko du nanaamanga pa aboro.—Mt. 20:28.

11. Ginipai rengbe bariikporo ka wirikaha tipa umbasitise ti gu kpiapai aYekova na Yesu amoihe?

¹¹ Gupai ani awirikaha. Bariikporo rengbe ka yugo umbasitise rogo dungu agene. Ni kpiapai, ko abingo ho nga si naida diako gbiati awiriko du ni rengberengbe yo te. Ko nadegatuko kuti agu aberãpai nga ga gako aborokporo zavura ho i adanga ni kuti gako ya. Marley naraka Amerika yo aya: “Mi na kumbami nidu adu ti kura aregbo na aberãpai ni bakiakia. Ono mi ima ino gupai nga mi na nyanyaki pare fuko na ko naasana re asana tipa gimi aberãpai na kini berẽkuriihe nyanyaki mbata fu manga ko diaberã.” Kurii gure, gu kumbakudee du na umbasitise namanga agu asunge nga ga kporo ka si vura du vurũ nga agu aboro du rogo gako dagbarago nabi gu sunge re nga ga adee du. Gipai re ima rengba kadu ni kpakarakpakaraha. Tipagine? Wirina du rimori nga Rachel aya: “Rogo gu ba mi aye rogoho, ka kumbakudee undo diako ti zunda asiani watadu  ti giriso kporo, gako amurakporo gbiati agume nikaa berã gupai nga ‘ndikidi kumba’ nga ko te. I nikaa berã gupai nga ko na pagbia kurii diako te.” Ka si du nga gi bipai re kina rogo gu rago mo araka rogoho, mo tingidi gupai nga zavura Yesu, ko azundu ndu gako abawiriki azunda nga gu sunge aboro anaabihe ni gu sunge nga ga akanga. Wene bariikporo aidanga ka sa kura boro i naabiko nga ko du na ome watadu du na nyanyakipa ko te. Ko na nyemu ka sa diako gbiati awiriko i du na ngbarago. Kupati gu nga ga du na umbasitise, gini kura sino berewe si aidaha tipa kadu ni wene bariikporo?

12. Ginipai nyemuse asa aYekova na Yesu i mangihe?

¹² Nyemuse. Nyemuse nga mburu agu apai dunduko Yekova amangaha. (1 Yo. 4:7, 8) Ko nayugo gupai nga ko ima kpinyemu rani na ko naida ani du ni abakureako ni fuko Fugoko gbiati gako riigbu furani. Ko naundo rani ani du ni bandabanda rani ni kido ko rani nga ko ima kpinyemu rani. Na ginipai tigaha du tipa gu gaani azingo nga ga borose? Yekova “nafu ahe fu rani u au ani ngi mbiko ho.” (1 Tim. 6:17) Ho ani amanga aingahe ni, ko naruga rani aruga ono ko ambunga kpinyemu rani te. Mbiko nyemuse, Yekova amangi gu mbakadapai nga ga motumo tumorii tipa rani. Na Yesu aima kpinyemu rani ni bakerehe gbe si ki sa ko ko fu ungako tipa rani. (Yo. 3:16; 15:13) Pai ho rengbe ka ká na aYekova na Yesu ti kpiyo nyemu agu aboro nanye ni ruruyo fuyo te.—Yo. 13:1; Rom. 8:35, 38, 39.

13. Tipagine duhe ti ni ni nyanyakipa pai tipa bariikporo yugu nyemuse fu gako aborokporo? (Oni bi gu sanduki a nga, “ Wai Rengbe Vovo Kumbakudee ka Gbia gu Irisa Nga ga Diako?”)

¹³ Agu apai ani wirikaha. Si naida nyemuse du ni mburu agu apai dunduko bariikporo amangaha. Tipagine duhe ti ni na nyanyakipaha gbe? Gu mokedi nangia Yoane akaragapai ki ya: ‘Gu ni adu nga nyemu gu wirinani [watadu gani aborokporo] ti ni bi ni yo ya, ka nyemu Mbori du nga ti ni ni abi nga ko ya te.’ (1 Yo. 4:11, 20) Gu kumba nakpinyemu gako aborokporo na naida ka wirika aYekova na Yesu nika undo gako aborokporo tipa i du na wene pagume na Yekova, ko nika sa gako aborokporo i du ni bandabanda yo na ko nikaa ngerafuo gayo azingo nga ga borose.  (1 Tim. 5:8) Ko naraba awiriko na kini ruguyo. Ko nikaa ndu kindi kumbatayo kaa wirika wai kaa manga agu adiaberã nika fu taarimo fu Yekova na ki ye na undo fu gako aborokporo. Ani sakingo pai awere tipa agu apai si aida abariikporo ni basasa mangihe na ki bingo wai rengbe abariikporo ka wirika aYekova na Yesu.

14. Wai du bariikporo aundo gani aborokporo i mbedi na Yekova?

¹⁴ Ni nangerafuo gu zingo nga ga toro du gani aborokporo na ni. Yesu ayugu gupai nga ko wakina Bako bambiko ko aaida ka undo apefuoko tipa i banda gayo idapase ni nyanyakihe. (Mt. 5:3, 6; Mk. 6:34) Wakina gure a, gupai du na nyanyakipaha fu bariikporo nga ka undo gako aborokporo tipa i mbedi na Yekova. (Pa Rug. 6:6-9) Ko namanga gipai re ni biko gupai nga, ko gbiati gako aborokporo nageda Fugo Mbori na kini wisigihe, kini ndu tipa adunguratise, kini tungusi wene pangbanga, na ki da ni wene abakurea Yekova na ki nye ni abakureako.

15. Waigu rengbe bariikporo ka sa gako aborokporo tipa i naabihe nga ko naberã payo aberã?

¹⁵ Ni natambua gani aborokporo. Yekova ape gupai fu Yesu ku bangiri aboro nga ko ima kpinyemuko. (Mt. 3:17) Yesu anaayugo gupai dedede nga ko anaakpinyemu aboro rogo agu apai yo ko anaamangaha gbiati gu ko anaagumbaha. Apefuoko agumba gupai fuko a nga i ima kpinyemuko. (Yo. 15:9, 12, 13; 21:16) Bariikporo rengbe ka yugoho fu diako gbiati awiriko nga ko ima kpinyemu yo rogo gako mangaapai yo wa gu nga, kaa wisigo Ziazia Kekeapai na yo. Si naida ko gumba gupai fuyo a nga, ko ima kpinyemu yo na i na nyanyaki payo fuko, na ho daha ada ni, si naida ko tambua yo atambua ku barabangiri kura aboro.—Snz. 31:28, 29.

16. Gini kuraapai si aida bariikporo mangihe, na ginipai si aida ko ne mangaha?

¹⁶ Ni nangerafuo gu zingo nga ga borose du gani aborokporo na ni. Yekova angerefuo agu azingo dunduko nangia ga aYisaraere zavura ho i anaagbia mbusa ni tipa gayo basasangba. (Pa Rug. 2:7; 29:5) Ko nangera angera areme a tipa agu apai du ani na zingoho. (Mt. 6:31-33; 7:11) Wakina gure a, Yesu arigi agu aboro naapekafuo ko. (Mt. 14:17-20) Ko ahusi gu dungu aboro a naadu na akaza. (Mt. 4:24) Tipa ka sa ngbarago ti Yekova, bariikporo du wa ka ni ngerefuo agu azingo nga ga borose du gani aborokporo na ni. Ono tie, si naida ni ne manga kurapai sa. Si aidanga ni naadia bakere regbo kisusi kina kuti sunge marã tipa ka songoda gani aborokporo si ki da nga regbo berewe be ni tipa kaa ngerafuo gu zingo nga ga toro du gani aborokporo na ni na kaa sungo na yo te.

17. Gini kpiapai aYekova na Yesu amaaha rogo wai i afu rabahe na kini rugu rani?

¹⁷ Ni nafu rabahe. Yekova na raba rani na kini rugu rani mbiko ko naida ka undo rani. (Eb. 12:7-9) Yesu adu wakina Bako, ko araba agu aboro du kutii gako pagbia rogo nyemuse yo. (Yo. 15:14, 15) Ko nafu nyanyaki rugute afu, ono ko a na  wenesino. (Mt. 20:24-28) Ko ima rugatiko na gupai nga ani nga kpakpa aboro, na ani ninaamanga aingahe amanga dedede.—Mt. 26:41.

18. Ginipai wene bariikporo atingidaha?

¹⁸ Gu bariikporo nawirika aYekova na Yesu, natingida gupai nga diani gbiati awirini nga rengberengbe aboro te. ‘Ngbaduni aíma nga fu’ diani gbiati awirini te. (Koro. 3:19) Kuba gure, ni namangapai kuti gu bangua rengo du ni kekehe rogo AGaratio 6:1 na ni naasada ka mangapai na yo “ni zera,” kini tingidi gupai nga ni a nga kina kpakpa boro. Wakina Yesu, ni naruga tini na gupai nga gani kpiapai nga gu wene gene rengbe ni ka yugopai na ni.—1 Pet. 2:21.

19-20. Ho bariikporo amanga diaberã ni, waigu rengbe ni kadu wa aYekova na Yesu?

¹⁹ Ni amanganga agu adiaberã nabi kina pa ti ni te. Yekova namanga agu adiaberã nafu undo fu kura aboro. Ni kpiapai, ko adiberã ka kusa unga, angianga ka gbia undo tipa tiko ya ono ko aaida ani gbia ngbarago ti raka. Boro ho namangi Yekova ngbaome tipa ko fu Wiriko ko kpi tipa gaani aingapai te. Ko amangi gupai re mbiko ko aaida ka undo rani. Yesu amangi agu adiaberã a naafu undo fu kura aboro. (Rom. 15:3) Ni kpiapai, ho ko adu ni na bakere mbugo, ko ayugupai fu bakere rimbasa aboro kuba gupai nga ka ongoda.—Mk. 6:31-34.

²⁰ Wene bariikporo ima rugatini na gupai nga, pai sa dagba agu apai yo du ni kpakarakpakaraha ka mangaha nga ka manga agu adiaberã nika undo gako aborokporo, na ko nabi gi tindiro re na nyanyakipaha gbe. Ko na banda tiko ti manga adiaberã zanga ndikidi ndupai watadu ka manga adiaberã nibipa wai du ko ti gu regbo re. Kuba gure, ko nambu Yekova ko yugu wai fuko rengbe ko ka manga wene adiaberã. * (Snz. 2:6, 7) Rogo gi gene re, ko nikaa berãpa wai rengbe ko ka undo kura aboro angianga kina tiko ya.—Frp. 2:4.

21. Ginipai ani nika sakapai tipaha rogo gu kekeapai ngbefuo gere?

²¹ Yekova ima fu nyanyaki sunge fu abariikporo. Ko naida i mangi gi sunge re wenengai. Ono ka kumbakudee mangi asadatise tipa ka pekafuo gu kpiapai aYekova na Yesu namoihe, ko nika duadu ni wene bariikporo. Na ka diakumba amanga gupai si aidaha beri rogo kporo, gayo rogatise nika du na ngbarago. Waigu si aida diakumba naabi gu pagbia du kumbari na ni nga ga du ni bariikporo, na gini kpakarapai ri narengbe ka gbia tiri na ni? Gu kekeapai ngbefuo gere nika karagapai kuti agu asanahe re.