1. Binḇesrar ḇekara fa fyarḇuk kuker manḇesrar oso, rosai kyara pyum kaku ya?

YESUS Kristus iso ḇeḇebukor ḇenapes kaku ro snonggaku Kristen syakam. Ḇape, fyor bin Kristen oso fyarḇuk kwar ido, ḇeḇebukor ḇe iniso snon ḇenapes ḇa. Rarirya, fyorno ido samswen kaku ḇe i fa ikunem ḇe eḇe snon ya. Inja, fyor bin Kristen oso kyarauser fa fyarḇuk kuker mambesrar oso ido, kyara pyum fakfuken nane: ’Rosai ḇefasnaiḇair na iso snonswa ḇepyum dirya? Ima fyakapon roi Yahwe imarisen na ke? Ifrur rarirya ḇa ido, na fyaduru pyum wis ḇepyum kina nuḇedi rofyor nufarḇuk kwar ke?’ Oso wer ido, myambir pyum kaku manggundi kako kuker kyara fakfuken nane, ’Rari-rari ḇepyum yena na nafrur farḇakḇuk nuḇedi neaski syadi ke? Yaḇe kaḇaḇaḇ ma yafasnai snemura ke? Yaḇe bati fanam kuker Yahwe I ke?’ (Pkh. 4:9, 12) Rofyor bin oso kyinfir srow fyor fyarḇuk ḇaim, na farḇakḇuk ḇyena neaski syadi.

2. Rosai nari kawos ro farkarkor ine?

² Imbesrar riyuta koḇesya sfasnai sikunem faro eḇe snon sya. Sima sfasnai nyan ḇepyum kaku! Komarisen kofarmyan kayam kuker bin ḇesoasuser sine. Ro farkarkor ine, nari kawos fakfuken rikyor nane: (1) Samswen risai monda binswa sya sismai na? (2) Rosai ḇefnai fa binswa Kristen simarisen sikunem faro swa sesya? (3) Yesus, Abigail, ma Maria, Yusuf swari sfasnai nyan ḇepyum kuker sikunem faro ḇeḇebukor si sya, ma rosai snonswa ma binswa Kristen sfarkor fa sfasnai roi ine?

3. Rosai ḇefnai fa farḇakḇuk oso ḇaḇeri ḇemnis ya?

³ Farḇakḇuk ima hadiah ḇemnis kaku ro Allah. Ḇape, kokame konapes ḇa. (1 Yoh. 1:8) Iso ḇefnai fa Refo ḇyuk  swarapepen ḇe snonggaku ḇefarḇuk sya snar nari sismai samswen nabore. (1 Kor. 7:28) Mgorama kawos samswen riḇeso imbude binswa oso ismai na.

4. Rosai ḇefnai fa binswa oso imbude kyara smamkyof i fyor ikunem faro eḇe snon ya?

⁴ Fyorno ido, imbude binswa oso kyara smam kyof i fyor ikunem faro eḇe snon ya. Imbude kyara rarirya snar nyan iḇa roya. Marisol, imḇesrar oso ḇeḇarek ro Amerika Serikat, doḇe, ”Ro moḇ yaḇa rona, bin sikofen ḇesi fandun fa simnis kuker snon sya ro roi nakam. Ayama yafawi Yahwe fyasos kwar snar ḇeḇebukor faro binswa sya iso snonswa sesya, rarirya sikunem faro si. Ḇape, mamam ro dunya imnis rarirya ḇa, inja fyorno ido samswen ḇe aya fa yakunem pdef ḇe snonswa yedi.”

5. Mamam ḇesasar risai snon riḇeso sya sna na?

⁵ Bin sia wer imbude sfarḇuk kuker snon ḇemam bin sima golongan ḇero baḇ sirya. Ivon, imbesrar oso ḇeḇarek ro Amerika Serikat, doḇe, ”Ro moḇ nggoḇedi, snonsya siso ḇeyan ḇepon kaku, insape binsya sanan ro ḇarpur. Inai binsya siso ḇefanfnaw ma ḇefrur saranden, boi roma snonsya na snari ma sradi siso ḇefarmyan i. Roma snonsya soḇe sima ’raja ro rum’.” Imbesrar oso ḇenir Yingling, ḇyarek ro Asia, doḇe, ”Ro wos ayedi, wos peper oso isya ḇekurfasnai bin sya fandun kaku ḇa fa sepande ma sḇekir. Fararur sena iso suf fararur ḇero rum yadori na, ma sipok fa sikofenḇair awer kakara sena faro snoswa sesya.” Mamam ḇeradirya nfasnai saswar ya ḇa ma namnis ḇa kuker Refo ya. Rofyor snonswa oso nya mamam ḇerarirya ido, iso Yesus nyan ḇyena ḇa, ma ifrur Yahwe imarisen ḇa. Oso wer ido, swari nari ismai aski ḇa kako.​—Ef. 5:28, 29; 1 Ptr. 3:7.

6. Rosai fandun kaku fa binswa sya sifrur insama sḇebati fanam kuker Yahwe I pdef?

⁶ Imnis ḇeḇeyap kwar ro farkarkor ḇepon ya, Yahwe imarisen insama snonswa Kristen sya sfamfon fandandun ro ras-ras na ma smam pyum fandandun rur kina sesya ma roi kina sesya sḇaḇir na. (1 Tim. 5:8) Rariryano, binswa Kristen sya fandun kaku fa sbuk swaf ro rasras fa siwasya Allah wos Ḇyena ma skarauser na kuker senadi sor kaku ḇe Yahwe I. Imbude roi ine syamswene snar sfararur fakmak. Imbude skara sna swaf ma samambraḇ noḇa fa sifrur roi anna. Ḇape, fandun kaku fa sifrur roi anna kam. Rosai ḇefnai ya? Snar Yahwe imarisen manfamyan ḇyesya oser-oser sḇebati fanam kuker I.​—Kis. 17:27.

7. Moḇsa bin swa oso na napyan syadi ḇe i fa ifrur fararur ḇyena rai?

⁷ Bin oso imbude ḇyesewar kaku fa ikunem faro swari snar ifawi swari inapes ḇa. Moḇsa binswa oso na napyan syadi ḇe i fa ifrur fararur Yahwe byuk faro i na? Fandun kaku fa ifawi pyum ma imarisen iso wos ḇero Refo kuker rosai ḇefnai fa ikunem faro eḇe snon ya.

8. Imnis raris ḇeḇefasnai ro Efesus 5:22-24, rosai ḇefnai fa binswa Kristen oso imarisen ikunem faro eḇe snon ya?

⁸ Rosai ḇefnai fa binswa Kristen oso imarisen ikunem faro eḇe snon ya? Snar iso Yahwe dor faro i na. (Wasya Efesus 5:22-24.) Ikyar faro Kmari ro nanggi. Ifawi Yahwe iswar i, ma ikyar kaku Yahwe parenta Ḇyena kam ḇyuk na inema faro payamyum ḇyena.​—Ul. 6:24; 1 Yoh. 5:3.

9. Rosai binswa Kristen oso ismai ya fyor ikunem faro eḇe snon ya?

 ⁹ Snonggaku ḇeḇor soḇe bin sya sikunem faro snon sya awer snar roi ani nafrur smamkyof bin sya. Mamam ḇeradine nafrur snonggaku ḇeḇor simewer isouser Allah sasoser Ḇyena faro ḇeḇebukor sya. Snonggaku ḇena mamam ḇerarirya smambir Allah ḇesaswar koḇedi ḇa. Ro Yahwe mamam Ḇyedi, bin Kristen sya siso inai bin iswar kaku. Inja, Yahwe na ipok byuk parenta ḇefrur smamkyof si ḇa. Rofyor imbesrar oso ḇyesewar kaku fa isouser faro Yahwe kuker ikunem faro snonswa Ḇyedi, kina ḇyesya nari skainpyum syadi. (Mz. 119:165) I ma swari, kuker roma suḇesya kako seaski syadi.

10. Rosai na kofarkor ro imbesrar Carol kankarem ḇyena?

¹⁰ Rofyor binswa oso ikunem faro swari ḇenapes ḇa ya, fyasnai kaku ima iswar ma ḇyesyowi Yahwe I, ḇefrur fasasos faro ḇeḇebukor ya. Carol, ḇeḇarek ro Amerika Selatan, ikofen ḇo doḇe, ”Yafawi swa yedi inapes ḇa ma na ifrur sasar. Ḇape, yafawi kako yaḇesyowi ḇaḇebati ayena kuker Yahwe, nari yapok yakofen mamyai i ḇa rofyor ifrur sasar. Inja, Yaḇesewar fa yakunem faro swa yedi ḇesya kwar snar yamarisen yafrur Kma yedi ro nanggi imarisen.”

11. Rosai ḇefnoḇek srar Aneese insama imarisen ḇyuk maf, ma rosai kofarkor ro wos ḇyena?

¹¹ Binswa oso ḇyaḇir swari fyorno ido kyarausero sneḇaḇir ma kakara ḇyena ḇa. Nafrur samswen ḇe i fa ḇyesyowi swari ma ikunem faro i. Mampan rosai srar Aneese ifrur fyor ḇyaḇir rarirya. Ikofen ḇo doḇe, ”Yaḇesewar fa yasawen snedosam yena. Yaswarepen kokame ras nono kofrur sasar. Yamarisen yabuk maf kuker sne ḇesiper, raris Yahwe I. Rofyor yabuk maf ido, yaḇaḇir sne yedi iknon syadi.” (Mz. 86:5) Kakuḇae, rofyor binswa oso ḇyuk maf kuker sne ḇesiper ido, na napyan ḇe i fa ikunem faro swari.

12. Fawar risai kosmai ro Refo ya?

¹² Imbude snonggaku ono sisya sḇaḇir simyarenuser faro snonggaku ḇesesya  ido fyasnai ima snonggaku ḇepik ḇa. Ḇape, inema kakara ḇesasar dirya. Ro Refo, fawar nabor naisya ḇefasnaiḇair snonggaku ḇemyarenuser sine, sima snonggaku ḇesambraḇ sirya ḇoi sima sipik ḇaḇeri. Ḇeḇeso ro fandu si sisoine Yesus, Abigail, ma Maria. Mgorama kawos nyan ḇepyum sfasnai na.

13. Rosai ḇefnai fa Yesus iḇe ikunem faro Yahwe I?

¹³ Yesus ikunem faro Yahwe I. Ḇape, ikunem snar ḇyepande kufḇa ḇaido ḇyekir ḇa ke? Aroḇa. Yesus ima fyarkor snonggaku sya kuker nyan ḇepyandam ḇoi ifrur na fa nasnaibos. Ine nfasnaiḇair Yesus ḇyepande fafayaḇa. (Yoh. 7:45, 46) Yesus i kako dakḇekir kaku. Iso ḇewar fa Yahwe ḇye Yesus i fa ḇye manḇekir ro fararur, rofyor ifrur farsyos ḇeba ine. (Ams. 8:30; Ibr. 1:2-4) Ma rofyor Yesus ḇyeḇeḇawes kaḇer ramnai, Yahwe ḇyuk ḇe i ”papoik nakam ro boiyaswa ma supswan ine”. (Mat. 28:18) Kaku, Yesus ima ḇyepande ma ḇyekir bose, ḇoi ikunem pdef faro Yahwe ma dor farkankin ro I. Rosai ḇefnai ya? Snar iswar Kmari.​—Yoh. 14:31.

14. Rosai snonswa sya sfarkor ro (a) nyan Yahwe myam bin sya? (b) mnuk-mnuk ḇero Amsal 31?

¹⁴ Farkarkor faro snonswa sya. Yahwe dor ro binswa sya fa simyarenuser faro swa sesya ima kyara ḇa bin sya sikaki syadi ḇa ro snon sya. Ine nfasnaiḇair kaku, Yahwe kyinfir snon ma bin sya fa sḇepoik fnoḇek Yesus i. (Gal. 3:26-29) Yahwe fyasnai kakakyar ḇyena faro Yesus i kuker ḇyuk papoik ḇe i. Rarirya kako, snonswa ḇefawinanem nari imgak ḇaḇeri fa ḇyuk papoik ḇe swari. Refo ikofenḇair roi ḇerarirya na binswa ḇekir oso iso ḇefrur na. Imnis ra, myamwarek fararur ḇero rum yadori, roi skoḇesna ma ḇeyuf fararur ḇero yaf na, ma farḇaḇyan na. (Wasya Amsal 31:15, 16, 18.) Ima manfyan risya ḇa ḇepok fa ḇebuk kakara ḇyena ḇa. Swari ikyar faro i ma iḇe ryower kakara ḇyena. (Wasya Amsal 31:11, 26, 27.) Rofyor snonswa oso ifrur pyum swari rarirya ido, nari swari imarisen ikunem faro i.

15. Rosai binswa sfarkor ro Yesus nyan fyasnai na?

¹⁵ Farkarkor faro binswa sya. Yesus ifrur roi ḇeba nabore. Mboi ikunem pdef faro Yahwe kuker kyara ḇa Yahwe myamkyof i. (1 Kor. 15:28; Flp. 2:5, 6) Bin oso imbude nya ḇaḇekir nabore. Mboi iso Yesus nyan ḇyena, nari ikunem pdef faro eḇe snon ya kuker kyara ḇa na swari myamkyof i. Imarisen isonem eḇe snon ya snar iswar eḇe snon ya. Imbape ḇepon kaku ya, ifrur roi ani snar iswar ma ḇyesyowi Yahwe I.

16. Ro 1 Samuel 25:3, 23-28, samswen risai monda Abigail ismai ya? (Mam sonin ḇero ḇarpon.)

¹⁶ Abigail fyarḇuk kuker snon ḇeniro Naḇal. Swari anine ima fyandun manggundi, darareri, ma ifawi ikofen kasumasa ḇa. Abigail kyara kada swari ifrur rarirya ido iburi kwar, kuker myam ḇo Daud ma ḇefnoḇek i sya smun bos Nabal. Ḇape, Abigail ifrur rarirya ḇa. Mboi, ḇyesewar kaku kaku fa kyadaunwarek Nabal i ma snonggaku ḇesya ḇero rum yadori sya. Kwarapan, makakak ḇa Abigail fyasnai na. Rya fyanam Daud i, snon ri 400 ḇeyuf romamun sya, ma Abigail ḇyesewar fa dawos asuser pyum famfaḇri anna kuker Daud. Syadi wer imḇe kyamar fadwer sasar swari ḇyena. (Wasya 1 Samuel 25:3, 23-28.) Daud ḇyaḇir kaku Yahwe iso ḇebuk bin ḇemgak ḇa ine fa byuk anun swarapepen ḇe i ma idwarek i fa ifrur sasar ḇeba ya ḇa.

17. Rosai snonswa sya sfarkor ro farfyar Daud ma Abigail su?

 ¹⁷ Farkarkor faro snonswa sya. Abigail iso bin ḇefawinanem dirya. Snar Daud ryower Abigail anun byuk na, inja dun snemuk ḇepyum kaku ma myun snonggaku ḇesasar ḇa sya ḇa. Rarirya kako, snonswa ḇefawinanem sya nari skarauser pyum kaku siswasi kakara sena resari fyor sifrur snemuk ḇefandun kaku. Imbude kakara ro binswa ḇyedi na nafnoḇek i fa dun snemuk ḇesasar ḇa.

18. Rosai binswa sfarkor ro Abigail nyan ḇyena?

¹⁸ Farkarkor faro binswa sya. Rofyor binswa iswar ma ḇyesyowi Yahwe I, nari kina ḇyesya kam sismai payamyum ya, syadi wer fyor swari ima isyom faro Yahwe I ḇa ḇaido wis ḇyena kuker Yahwe nsambraḇ ḇa. Syewar nyan ḇa fa ifrur farḇakḇuk ḇyena namuk. Ḇape, na fyasnai syowi pdef faro swari ma ikunem faro i insama nadif swari ifa dakfarkor fa ifawi Yahwe I. (1 Ptr. 3:1, 2) Imbape rofyor swari imewer kaku fa isyom faro Yahwe ido, Yahwe ḇyesyowi kaku roi binswa ifrur kwarna fa ikunem faro swari ma isouser faro Yahwe.

19. Ro fafisu risai binswa Kristen oso nari iso marisen ro swari ḇyena ḇa?

¹⁹ Binswa Kristen oso ḇekunem faro swari rariryano, nari ipok isonem swari fyor swari dor i fa ḇyeyuk sasoser ma wos farkankin ro Refo ya. Imnis raris, rofyor swari ḇesyom Yahwe I ḇa dor ifa danggar, kyaraw, ḇaido ifrur roi ḇese Yahwe imarisen ḇa na. Imbesrar ani na pyampum ma fyasnaibos kuker pyum kaku roi ḇefnai fa imewer ifrur roi anna. Rosai ḇefnai ya? Snar snonggaku Kristen koine kam, isoine imbesrar ḇefarḇuk kwar sya, fandun kaku fa sisouser faro Allah Yahwe I syadiburo roi siswasi sikofen na.​—Kis. 5:29.

20. Rosai ḇefasnai kaku Maria ḇyebati fanam kuker Yahwe I?

²⁰ Maria ḇyebati fanam kuker Yahwe I. Rodiso neḇefasnai kaku? Ro Refo ya, nfasnaiḇair Maria ifawi pyum kaku Allah wos Ḇyena. Imnis raris, rofyor Maria dawos yoḇ Elisabet i, Yohanes Pembaptis snari, Maria dap syap-syap Ibrani  nasyadi ro rarwan ri 20. (Luk. 1:46-55) Oso wer ido, kwarapan roi ine: Rofyor Yahwe malaikat ḇyedi imarisen ikofenḇair Maria nari ḇyeaḇen Allah romawa Ḇyedi, malaikat ani ryama isrow ḇepon ḇa Maria snon iḇe nya i, iso Yusuf i. Ḇape, malaikat ani ryama isrow ḇepon ḇeri kuker Maria i. (Luk. 1:26-33) Kaku, Yahwe myambir kaku Maria i ma ikyar kaku Maria nari iswar kaku ma fyaduru pyum Romawa Ḇyedi. Ḇarpur mura, rofyor Yesus imar kwar ma ḇyeḇeḇawes ḇe nanggi, Maria ḇyebati pdef kuker Yahwe I.​—Kis. 1:14.

21. Rosai snonswa sya sfarkor ro Maria fawar ḇyena ḇeḇefas ro Refo ya?

²¹ Farkarkor faro snonswa sya. Snonswa oso ḇefawinanem nari imarisen rofyor eḇe bin ya ifawi pyum roi ḇero Refo ya. Kyara ḇa nari swari iso ḇesyadi ro i. Fyawi rofyor swari ifawi pyum kaku wos farkin ro Refo ido, kina ḇyesi nari sna payamyum nabore. Rariso fyor binswa ya fyarkor ro farkarkor ḇekaki ḇo swari ima aroḇa? Snonswa ya na iso ḇembran fararur ḇyena fa fyarkin kina ḇyesya ro nadi ro kina ma fananjur ḇesena.​—Ef. 6:4.

22. Rosai binswa sfarkor ro Maria nyan ḇepyum ḇyena?

²² Farkarkor faro binswa sya. Binswa Kristen oso ifawi swari iso ḇena fakamamar fa fyarkin kina ḇyesi ro nadi na. Rariryano, binswa ya fandun kaku fa iswarepen snar manggundi iso ḇefaduru kakyar ḇyena fa nsambraḇ pdef. (Gal. 6:5) Inja, fandun kaku fa nya oras fa ifrur farkarkor manggun ḇyedi ma kyarauser na. Ifrur rarirya ido, na fyasnai saswar ma syowi ḇyena pdef faro Yahwe I ma ikunem pdef faro swari kuker marisen.

23. Rofyor binswa oso ikunem faro swari, rosai payamyum ismai na?

²³ Binswa ḇekunem pdef faro swa sesya snar iswar Yahwe I nari ismai aski syadi buro snonggaku ḇemewer ḇesouser fasasos Yahwe ifrur faro ḇeḇebukor sya. Binswa ḇesouser ido, fyasnai nyan ḇepyum ḇe roma inai babo sya. Si kako sifrur kina ma sidang yadori ḇyeaski. (Tit. 2:3-5) Baboine, ḇar ḇeba ro Yahwe manfamyan ḇesouser Ḇyesya siso bin sirya. (Mz. 68:11) Ḇape kokame, snon ma bin, kona fararur ḇefandun kaku ro sidang yadori. Ro farkarkor ḇeuser ya, nari kawos moḇsa kombran pyum fararur koḇena.