1. Nemene la itre hnying nyine troa mekun hnene la trejine föe ka ajane troa faipoipo?

 IESU KERISO la he ne la itre Keresiano, nge ketre atr ka pexeje nyidrë. Ngo ame la ketre trejine föe a faipoipo, angeice ha drengethenge la föi angeic ka tha pexeje kö. Celë hi matre, tru la itre jol hnei nyidroti hna troa cile kow. Haawe, maine ketre trejine föe a ajane troa faipoipo, loi e tro angeic a pane hnying ka hape: ‘Hapeu la trejin celë, tro kö angeic elanyi a ketre he ne fami ka lolo? Angeice kö a wangatrune la huliwa i Iehova? Maine tha eje kö, nemene la ka amamane laka, tro angeic elanyi a saze, thupene la nyio a faipoipo?’ Loi e tro fe angeic a hnying ka hape: ‘Hetrenyi kö theng la itre thiina ka troa acatren elanyi la faipoipo i nyio? Atreine kö ni troa xomihni me ham? Hapeu, catrecatre kö la aqane imelekeung me Iehova?’ (Ate cai. 4:9, 12) Eje hi, maine tro la föe a axecië mekune hnyawa qëmekene troa faipoipo, tro ha madrine la faipoipo i angeic.

2. Nemene la itre hnying hna troa sa ngöne la tane mekun celë?

² Alanyimu la itre föe ka metrötrën me drengethenge la itre föi angatr. Celë hi matre, loi e tro sa qaja aloinyi angatr! Easa madrine troa ce nyihlue i Iehova me angatr. Tro la tane mekun celë a sa la köni hnying celë: (1) Nemene la itre jol hna troa cile kow hnene la föe ka faipoipo? (2) Pine nemene matre kola drengethenge la trahmany hnene la föe? (3) Nemene la itre ini hna xom hnene la itre trefën qa ngöne la tulu i Iesu, me Abigaila, me Maria göne la aqane troa metrötr me idrengethenge?

3. Pine nemene matre pëkö faipoipo ka pexej?

³ Ame la faipoipo, ketre ahnahna ka lolo qaathei Akötresie. Ngo tha ka pexeje kö la itre atr ka faipoipo. (1 Ioane  1:8) Celë hi matre, öni Tusi Hmitrötr, tro angatr a “ixelë me itre akötr.” (1 Kor. 7:28) Tro sa pane ce wang la itre jol hna cile kow hnene la itre föe ka faipoipo.

4. Pine nemene matre itre xaa föe a mekun laka, nyine hmahmane la troa drengethenge la itre trahmany?

⁴ Ame la itre xaa föe, hna ini angatr ka hape, nyine hmahmane la troa drengethenge la itre trahmany. Öni Marisol qa Etazini: “Ame ngöne la nöjeng, hna majemine qaja kowe la itre föe ka hape, loi e troa ceitu me itre trahmany ngöne la nöjei götran asë. Ngo atre hi ni laka, Iehova la ka acile la trahmany matre troa he ne la fami. Nge Nyidrëti a ajane tro la itre föe a hetre hni ne ipië. Loi e tro la itre föe a wangatrune la hnëqa cili. Ngo eje hi laka, ame itre xaa ijin, tha ka hmaloi kö troa metrötrëne la götrane cili.”

5. Tune kaa la aqane goeëne la itre föe hnene la itre trahmany?

⁵ Ame la itre xaa trejine föe, hnei angatr hna faipoipo memine la ketre trahmany ka wangacone la itre föe. Öni Ivon, ketre trejine föe qa Amérique du Sud: “Ame ngöne la nöjeng, itre trahmany la ka pane xen nge pine pë hë la itre föe. Ketre, kola canga inine la itre jajiny troa kuci xen me nyidrawa uma. Nge hnëqa ne la itre thin me itre xa troa elë la trepe xen kowe la itre nekötrahmanyi ke, angatr la ‘itre joxu.’ ” Öni Yingling, ketre trejine föe qa Asie: “Ame ngöne la qene hlapang, hetre hnaewekë ka qaja ka hape, tha nyipiewekë kö tro la föe a inamacan, loi e tro pe angeic a atreine kuca la huliwa e kuhu hnalapa, nge tha tro kö angeic a hane qeje mekun kowe la föi angeic.” Itre aqane ujë lai ne la atr ka pë hni nge ka isazikeu memine la itre trepene meköti Iehova. Ame la itre trahmanyi ka ujë tun, tha angatre kö lai a nyitipu Iesu, angatre pe a akötrëne la itre föe i angatr. E cili, tha tro hë Iehova a kepe angatr.—Efe. 5:28, 29; 1 Pet. 3:7.

6. Nemene la nyine troa kuca hnene la trejine föe ka faipoipo matre troa acatrene la aqane imelekeu i angeic me Iehova?

⁶ Ame ngöne la tane mekun hnapan, Iehova a ajane tro la itre trahmanyi a huliwa thatraqane la fami, me xatua angatr troa acatrene la lapaune i angatr. (1 Tim. 5:8) Ngo nyipiewekë tro la itre trejine föe ka faipoipo a xomi ijin troa e me lapa mekun la Tusi Hmitrötr, me catre thith koi Iehova. Tha ka hmaloi kö ke, tru catre hnei jol, matre pëkö traem me trengecatr troa ini tus me thith. Ngo ame pe, ka nyipiewekë catr. Pine nemen? Pine laka, Iehova a ajane tro sa isa acatrene la aqane imelekeu së me Nyidrë.—Itre hu. 17:27.

7. Nemene la ka troa xatuane la itre föe troa eatrëne la hnëqa i angatr?

⁷ Eje hi, tha ka pexeje kö la itre trahmany, matre nyipiewekë tro la itre föe a nue trengecatr matre troa metrötrë angatr. Ngo maine tro la itre föe a trotrohnine la kepin matre Iehova a upi angatr troa metrötrëne la itre trahmany, tro ha hmaloi koi angatr troa eatrëne la hnëqa i angatr.

8. Thenge la Efeso 5:22-24, pine nemene matre itre trejine föe a metrötrëne la itre föi angatr?

⁸ Itre trejine föe a metrötrëne la itre föi angatr ke, celë hi aja i Iehova. (E jë la Efeso 5:22-24.) Angatr a mejiune kowe la Keme së e hnengödrai. Atre hi angatr laka, Nyidrëti a hnimi angatr, nge atre hi Nyidrëti la ka loi koi angatr.—Deu. 6:24; 1 Ioane 5:3.

9. Nemene la thangan e tro la föe a drengethenge la trahmany?

⁹ Ame ngöne la fen enehila, kola qaja  kowe la itre föe ka hape, nyine hmahmane la troa drengethenge me metrötrëne la itre föi angatr. Ngo tha celë kö la mekuna i Iehova. Ame la itre ka sajuëne la itre mekun cili ke, thatre kö angatre la Akötresi së ka tru ihnim. Eje hi, tha tro kö Iehova a acile la ketre wathebo ka troa thaipiëne la itre föe ke, itre nekö hnimina i Nyidrëti angatr. Ame la trejine föe ka nue trengecatr matre troa eatrëne la hnëqa i angeic qaathei Iehova ke, angeic a thele tro la fami angeic a tingeting. (Sal. 119:165) Maine tro la föe a drengethenge la trahmany, tro ha hetre thangane ka loi koi angeic, kowe la föi angeic, me kowe la itre nekö i nyidro.

10. Nemene la ini hne së hna xom qa ngöne la hna melën hnei Carol?

¹⁰ Ame la föe ka metrötrëne la föi angeic ke, angeic a amamane la ihnimi angeic koi nyidrë, ngacama tha ka pexeje kö nyidrë. Ketre, angeic a metrötrë Iehova, Atre acile la wathebo celë. Öni Carol qa Amérique du Sud: “Ame itre xaa ijin, kola tria hnene la föeng. Ngo eni palahi a thele troa loi thiina me amamane laka, sisitria catre kö la aqane imelekeung me Iehova. Eni a ajane troa amadrinë Iehova, celë hi matre eni a metrötrëne la föeng.”

11. Nemene la ka xatua Aneese troa nue la ngazo ne la föi angeic, nge nemene la ini koi së?

¹¹ Maine tha wangatrune kö la trahmany, la itre mekun me itre aliene hni ne la föe i angeic, tro ha jol kowe la föe troa metrötrë angeic. Hane hi la hna kuca hnei Aneese. Öni angeic: “Tha hnenge kö hna elëhni kowe la föeng ke, itre atr ka tria asë hi së. Eni pe a thele troa nue la ngazo i nyidrë, tune la aqane kuca i Iehova. E cili, kola tingeting me lolo la hning.” (Sal. 86:5) Eje hi, maine tro la föe a nue la ngazo ne la trahmany, tro ha hmaloi koi angeic troa metrötrëne la föi angeic.

12. Nemene la itre tulu ne idrengethenge e hnine la Tusi Hmitrötr?

¹² Itre xan a mekun laka, loi e troa wajahuje la itre ka idrengethenge me metrötr. Ngo tha eje kö lai. Nyimutre la itre tulu e hnine la Tusi Hmitrötr ka amamane laka, hnei angatr hna idrengethenge ngo hnei  angatre fe hna catr, tui Iesu me Abigaila me Maria.

13. Pine nemene matre hnei Iesu hna drengethenge Iehova?

¹³ Hnei Iesu hna drengethenge Iehova, ngo tha hnene kö laka, pëkö inamacane i nyidrë. Eje hi, e kola canga trotrohnine hnene la itre atr la itre ini qaathei Iesu ke, hnene laka ka inamacane nyidrë. (Ioane 7:45, 46) Ketre, atre hi Iehova la itre hna atreine kuca hnei Iesu, matre hnei Nyidrëti hna aijijë Iesu troa ce xupe me Nyidrë la nöjei ewekë e cailo fen asë. (Ite edomë 8:30; Heb. 1:2-4) Ame la kola amele Iesu hmaca, hnei Iehova hna nue Iesu “troa musi hune la nöjei ewekë e hnengödrai me e celë fen.” (Mat. 28:18) Ngacama tru la atreine Iesu, ngo hnei nyidrëti palahi hna mejiune koi Iehova. Pine nemen? Pine laka, tru la ihnimi nyidrëti koi Iehova.—Ioane 14:31.

14. Nemene la ini hna xom hnene la itre trahmany qa ngöne (a) la aqane goeëne Iehova la itre föe? (b) la hna qaja ngöne Ite Edomë 31?

¹⁴ Ini kowe la itre trahmany. Ame la Iehova a upe la itre föe troa metrötrëne la itre trahmany ke, tha hnene kö laka, sisitria kö la trahmanyi hune la föe. Eje hi, hnei Iehova fe hna iëne la itre föe matre troa ce musi me Iesu. (Gal. 3:26-29) Ketre, hnei Iehova hna hamë hnëqa ka tru koi Iesu. Kolo hi lai a amamane laka, Nyidrëti a mejiune koi Iesu. Ketre tune fe la itre trahmany, loi e tro angatr a inamacan me hamë hnëqa kowe la itre föe i angatr. Öni Tusi Hmitrötr ka hape, ame la föe ka loi thiina, angeic a nyidrawane la hnalapa me itö hnepadro me salemë xen. (E jë la Ite Edomë 31:15, 16, 18.) Eje hi, ame la itre föe, tha itre hlue kö angatr, matre ijiji angatre fe troa hane qeje mekun. Nge loi e tro la itre trahmany a mejiune kowe la itre föe i angatr me drenge la mekuna i angatr. (E jë la Ite Edomë 31:11, 26, 27.) Maine tro la trahmanyi a wangatrune la föe i angeic, tro ha hmaloi kowe la föe troa metrötrë angeic.

15. Nemene la ini hna xom hnene la itre föe qa ngöne la tulu i Iesu?

¹⁵ Ini kowe la itre föe. Ngacama nyimutre la itre ewekë hna kuca hnei Iesu, ngo tha hnei nyidrëti kö hna mekun laka, kola thaipië nyidrë e tro nyidrëti a drengethenge Iehova. (1 Kor. 15:28; Fil. 2:5, 6) Ketre tune fe, kola nyitipu Iesu hnene la föe ka loi thiina. Tha angeice kö a mekun laka, kola thaipië angeic e tro angeic a metrötrën la föi angeic. Angeice pe a sajuën me hnime la föi angeic ke, tru la ihnimi angeic koi Iehova.

16. Thenge la 1 Samuela 25:3, 23-28, nemene la itre jole hna cile kowe hnei Abigaila? (Wange ju la icetrön.)

¹⁶ Ame Nabala, föi Abigaila, tre, ketre trahmanyi ka pi tru nge pëkö hni ne ole i angeic. Ame la ketre ijin, hnei Dravita me itre sooce i nyidrë hna thele troa humuthi Nabala. Maine ju, tro Abigaila a lapa thaup me nue angatr troa humuthi Nabala, matre nyipun la faipoipo i nyidro. Ngo hnei angeic hna thel troa thupëne la mele i Nabala me itre atrene la hnalapa i angeic. Pane mekune jë la aqane catre i Abigaila la angeic a cile qëmekene la 400 lao sooc, me ithanata me Dravita cememine la hni ka metrötr. Hnei angeic hna thu asë la itre ngazo i Nabala. (E jë la 1 Samuela 25:3, 23-28.) Canga trotrohnine hi Dravita laka, Iehova la ka upi Abigaila troa hamë eamo me sewe nyidrë troa kuca la ketre ewekë ka ngazo.

17. Nemene la ini hna xom hnene la itre trahmany qa ngöne la tulu i Dravita me Abigaila?

¹⁷ Ini kowe la itre trahmany. Abigaila la  ketre föe ka inamacan. Eloine pe, hnei Dravita hna drei Abigaila, matre tha hnei nyidrëti kö hna humuthe la ketre atr. Ketre tune fe, ame la trahmany ka inamacan, angeic a pane drenge la mekuna ne la föe i angeic qëmekene troa axecië mekun. Nge celë hi ka troa xatua angeic troa xomi mekun ka loi.

18. Nemene la ini hna xom hnene la itre föe qa ngöne la tulu i Abigaila?

¹⁸ Ini kowe la itre föe. Maine tro la föe a hnim me metrötrë Iehova, tro lai a hetre thangane kowe la fami, ngacama tha ka hmi kö la föi angeic. Ketre, tha angeice kö a thele jëne troa seihnacil. Angeice pe a metrötrën me drengethenge la föi angeic matre thue aja i nyidrë troa hane atre Iehova. (1 Pet. 3:1, 2) Nge ngacama tha öhne kö nyidrë la itre thiina ka lolo i angeic, ngo ame Iehova, Nyidrëti a wangatrune me madrine la aqane mele nyipici angeic.

19. Eu la ijine tha tro kö la föe a drenge la föi angeic?

¹⁹ Ketre, tha tro kö la föe a kuca la ketre ewekë ka isazikeu memine la itre trepene meköti Iehova, ngacama kola iele angeic hnene la föi angeic. Pane mekune jë laka, kola upe la ketre trejine föe hnene la föi angeic ka tha hmi kö troa thoi, maine atrekënö, maine kuca la ketre ewekë hna methinën hnei Iehova. Ame easë itre Keresiano, tune fe la itre trejine föe ka faipoipo, easa pane drengethenge Iehova. Celë hi matre, loi e tro angeic a qaja cememine la menyik la kepin matre angeic a thipën.—Itre hu. 5:29.

20. Pine nemene matre kola qaja ka hape, ka catre la aqane imelekeu i Maria me Iehova?

²⁰ Ame Maria, ka catre la aqane imelekeu i angeic me Iehova. Ketre, atre hnyawa hi angeic la Itre Hna Cinyihan. Ame lo angeic a porotrik me Elisabeth, thine i Ioane Bapataiso, traqa koi 20 lao qaja angeic la Itre Hna Cinyihan qene Heberu. (Luka 1:46-55) Ketre, kola troa faipoipo hnei Maria me Iosefa. Ame pe, tha hnene kö la angela hna pane mama koi Iosefa. Hnei angeice pe hna pane mama koi Maria me qaja ka hape, tro angeic a hnahone la Nekö i Akötresie. (Luka 1:26-33)  Nyipici, atrepengöi Maria hnyawa hi hnei Iehova. Xecie koi Nyidrëti laka, tro Maria a hnim me thupëne hnyawa la Nekö i Nyidrë. Ketre, hnei Maria palahi hna acatrene la aqane imelekeu i angeic me Iehova, thupene la Iesu a mec me ngöne la kola amele nyidrëti hmaca.—Itre hu. 1:14.

21. Nemene la ini hna xom hnene la itre trahmany qa ngöne la tulu i Maria?

²¹ Ini kowe la itre trahmany. Ame la trahmany ka inamacan, loi e tro angeic a madrin e tro la föe i angeic a atre la Itre Hna Cinyihan. Tha tro kö angeic a mekun laka, föe i angeic a ajane troa hane he ne fami. Tro pe angeic a trotrohnine laka, tro lai a hetre thangane ka loi kowe la fami. Nge ngacama tha tru kö la hna atre hnene la trahmany, ngo hnëqa i angeic troa eköthe la hmi ne la fami, me acatrene la lapaune i angatr.—Efe. 6:4.

22. Nemene la ini hna xom hnene la itre föe qa ngöne la tulu i Maria?

²² Ini kowe la itre föe. Eje hi laka, itre föe a drengethenge la itre föi angatr. Ngo ame pe, nyipiewekë tro angatr a sipu acatrene la aqane imelekeu i angatr me Iehova. (Gal. 6:5) Loi e tro la itre föe a xomi ijine matre troa e me lapa mekun la itre ini qa hnine la Tusi Hmitrötr. Celë hi lai ka troa acatrene la ihnim me metrötre i angeic koi Iehova, me hamë madrine i angeic troa metrötrëne la föi angeic.

23. Nemene la thangane kowe la fami me ekalesia e tro la föe a drengethenge la föi angeic?

²³ Eje hi, tru catre kö la madrinene la itre föe ka hnimi Iehova me drengethenge la itre föi angatr, hune la itre ka tha metrötrëne kö la itre föi angatr. Angatr a amamai tulu kowe la itre nekötrahmanyi me itre neköjajiny. Ketre, jëne la aqane ujë i angatr, kola hetre tingeting ngöne la fami me ngöne la ekalesia. (Tito 2:3-5) Ame enehila, alanyimu la itre föe ka nyihlue i Iehova. (Sal. 68:11) Ngo isa hetre hnëqa së e hnine la ekalesia, itre trahmanyi me itre föe. Ame ngöne la ketre tane mekun, tro pë hë sa ce wang la isa hnëqa së.