1. Lè on sè bizwen mayé èvè on frè, asi ki kèsyon pou i réfléchi ?

TOUT sé krétyen-la ka touvé-yo anba otorité a Jézikris. Sé-y ki chèf a yotout é i pawfè. Men lè on krétyèn ka mayé, a moman-lasa, i ka touvé-y anba otorité a on misyé ki enpawfè. Sa pa toujou fasil ! Si i ni lidé mayé èvè on frè, fò i réfléchi asi sé kèsyon-lasa : « Ka ki ka montré-mwen kè frè-lasa ké dirijé fanmi an nou byen ? Ès i ka mèt Jéova prémyé douvan an vi a-y ? Ka ki ka montré-mwen kè apré mayé an nou, i ké édé-mwen rété bon bon zanmi èvè Jéova ? » Men fò sè-la pran tan ègzaminé-y limenm a-y, é fò i réfléchi asi sé kèsyon-lasa : « Ki kalité an ni ki ké fè mayé an nou touné won ? Ès an ni pasyans é ès an donan ? Ès an bon bon zanmi èvè Jéova ? » (Ékl. 4:9, 12). Si madanm-la ka pran dé bon désizyon dépi avan i mayé, mennaj a-y ké maché é toutmoun ké kontan an kaz-la.

2. Ka nou ké vwè adan awtik-lasa ?

² Adan òwganizasyon a Jéova, ni plizyè milyon sè ki mayé é yo ka rèspèkté otorité a mari a yo. Sé on bèl ègzanp pou nou. Yo mérité félisité ! Nou kontan nou ka sèvi Jéova akoté a sé madanm-lasa pas yo fidèl. Adan awtik-lasa nou ké réponn a 3 kèsyon : 1) Ki difikilté on madanm-mayé pé jwenn ? 2) Poukwa on madanm dakò pou rèspèkté otorité a mari a-y ? 3) Jézi, Abigayil é Mari, madanm a Jozèf, té ka touvé-yo anba otorité a ondòt moun. Men yo té ka rèspèkté otorité-lasa. Ka ègzanp a yo pé aprann sé krétyen-la é madanm a yo ?

3. Poukwa moun ki mayé ka jwenn pwoblèm ?

³ Mayé, sé on kado Jéova fè-nou, kifè, kado-lasa pawfè. Men sé sé moun-la ki ka mayé la ki enpawfè (1 Jan 1:8). Sé pousa, Pawòl a Bondyé té ja di kè moun ki mayé té’é  jwenn onlo difikilté (1 Kor. 7:28). An-nou vwè ki difikilté on madanm-mayé pé rivé a jwenn.

4. Fò sé madanm-la rèspèkté otorité a mari a-yo. Poukwa onlo madanm ni dimal a fè sa ?

⁴ Silon jan on madanm lévé, sa pé vréman rèd pou-y dè rèspèkté otorité a mari a-y. Mi sa Marisol, on sè ki ka viv o Zétazini ka di : « La an lévé la, yo toujou fè-nou konprann kè pa ni zafè a misyé pi fò ki madanm. Toutmoun a menm nivo-la. An sav kè Jéova mèt sé mari-la chèf an fanmi-la é kè sé madanm-la dwètèt rèspèkté otorité-lasa. Men an sav osi kè fò sé misyé-la rèspèkté-nou. Kifè, jousalè, an ni dimal a rèspèkté otorité a mari an mwen piskè lamajorité a moun ki alantou an mwen vé fan’an konprann kè an pa ni a fè sa. »

5. Poukwa sèwten misyé ka aji mal èvè madanm a yo ?

⁵ Sa pé rivé osi kè on madanm mayé èvè on misyé ki ka kwè kè sé madanm-la ni mwens valè ki sé misyé-la. Mi sa Ivon, on sè ki ka viv an Amérik di Sid ka di : « La an ka rété la, sé misyé-la ka manjé an prèmyé é apré sé sé madanm-la. Lè ou sé on jenntifi, yo ka aprann-vou kuit manjé é nétwayé kaz-la. Men lè ou sé on tigason, manman-w é sè a-w a sèwvis a-w é lamajorité a moun ka di-w kè sé-w ki “wa an kaz-la”. » Mi sa Yingling, on sè ki ka viv an Azi ka di : « La an ka rété la, ni on pwovèb ki ka fè-w konprann kè sé madanm-la pa bizwen savan piskè wòl a yo sé nétwayé kaz-la. É anplisdisa, yo pa ni dwa di mari a yo sa yo ka pansé. » Si on mari dakò èvè pwovèb-lasa, sa ké fè-y mal aji èvè madanm a-y. On mari ki ka suiv rézònman-lasa pa ka aji èvè lanmou é i pa’a fè sa Labib ka mandé. Kifè, i ka fè madanm a-y vwè bon mizè, i pa ka imité Jézi é i pa’a fè Jéova plézi nonplis (Éféz. 5:28, 29 ; 1 Pyè 3:7).

6. Ka on madanm-mayé pé fè pou vin pibon zanmi èvè Jéova ?

⁶ Kon nou vwè-y adan awtik a simenn pasé, Jéova vé kè sé mari-la ba fanmi a yo sa yo bizwen pou viv, é anplisdisa, i vé kè yo montré fanmi a yo kè yo enmé-yo. Men sa ki pi enpòwtan sé kè fò yo édé fanmi a yo vin bon bon zanmi èvè Jéova (1 Tim. 5:8). Men menmsi sé sè-la byen okipé, fò-yo pran on tan pou li Labib, fò-yo pran tan réfléchi anlè a-y osi é anplisdisa, fò-yo pran on tan pou priyé Jéova èvè tout tchè a yo. Sa pa oblijé fasil a fè ! Sé madanm-mayé la tèlman okipé kè yo pé ni lenprésyon kè yo pa ni tan oben kè yo pa ni fòs pou fè tout sé biten-lasa. Men sa enpòwtan toubònman kè yo fè sa. Poukwa nou ka di sa ? Paskè Jéova vé nou vin zanmi èvè-y é kè nou rété zanmi a-y (Akt 17:27).

7. Ka ki ké édé on madanm rèspèkté otorité a mari a-y ?

⁷ Nou ka tou konprann kè sa pé mandé on madanm-mayé fè onlo éfò pou rèspèkté otorité a mari a-y siwtou kè mari-la enpawfè. Adan Labib, yo ka di sé madanm-la kè fò-yo rèspèkté mari a yo é kè fò-yo kouté-y. Si on madanm ka konprann poukwa Jéova ka mandé-y fè sa é kè i dakò èvè sa, sa ké pi fasil pou-y dè rèspèkté otorité a mari a-y.

8. Dapré Éfézyen 5:22-24, poukwa on sè dakò pou rèspèkté otorité a mari a-y ?

⁸ On madanm dakò pou rèspèkté otorité a mari a-y pas sé sa Jéova ka mandé-y (li Éfézyen 5:22-24). I ka fè Pap’a-y ki  an syèl-la konfyans pas i sav kè i enmé-y é kè i pé’é jen mandé-y fè on biten ki pa bon pou-y (Dét. 6:24 ; 1 Jan 5:3).

9. Lè on sè ka rèspèkté otorité a mari a-y, ki rézilta sa ka bay ?

⁹ Jòdijou, adan mond-lasa, yo ka ankourajé sé madanm-la a pa rèspèkté prensip a Jéova. É lèwvwè on madanm ka rèspèkté otorité a mari a-y, sé on honté. Nou ka tou konprann kè moun ki ka rézonné konsa pa konnèt Bondyé an nou ki plen lanmou. Jéova pé’é jen ba fi a-y, kè i enmé onlo, on komandman ki ké fè-yo santi kè yo pa ni pon valè ! On sè ki ka fè éfò pou rèspèkté otorité a mari a-y kon Jéova ka mandé, ka travay pou ni lapé an fanmi a-y (Sòm 119:165). Sé on bénédisyon pou toutmoun an kaz-la : ki pou mari-la, ki pou-y, ki pou sé timoun-la.

10. Ka ègzanp a Carol ka aprann-nou ?

¹⁰ Sé Jéova ki ba sèwten moun on otorité. Kifè, on madanm-mayé ki ka rèspèkté otorité a mari a-y ka montré kè i enmé Jéova é kè i ka rèspèkté-y. Mi sa Carol, on sè ki ka viv an Amérik di Sid ka di : « An sav kè mari an mwen pé fè érè. Men an sav osi kè jan-la an ké réyaji la lè i ké fè sé érè-lasa ké montré si an bon bon zanmi èvè Jéova. Kifè, an ka fè tousa an pé pou an rèspèkté otorité a mari an mwen pas an vé fè Pap’an mwen ki an syèl-la plézi toubònman. »

11. Ka ki ka édé Aneese padonné mari a-y é ka sa ka aprann-nou ?

¹¹ Si on madanm ka vwè kè mari a-y pa’a tchenn kont dè sa i ka rèsanti é dè sa ki ka enkyété-y, i pé ni dimal a rèspèkté otorité a mari a-y. An-nou vwè kijan Aneese, on sè ki mayé, ka fè lè mari a-y ka fè-y sa. Mi sa i ka di : « Lè i ka fan’an sa, an ka éséyé pa fè kòlè. An ka sonjé kè noutout ka fè érè. An ka chèché a padonné mari an mwen dè-tou-kè, kon Jéova ka fè pou nou. É lè an ka fè sa, sa ka trankilizé lèspri an mwen » (Sòm 86:5). Si on madanm ka padonné mari a-y, sa ké pi fasil pou-y dè rèspèkté otorité a-y.

12. Ki ègzanp nou ka touvé an Bib-la ?

¹² Ni sèwten moun ki ka di kè lèwvwè on madanm ka rèspèkté otorité a mari  a-y, sé on madanm tèbè. Men a pa sa ditou-ditou ! Adan Labib, yo ka palé-nou dè sèwten moun ki té anba on otorité é ki té ka rèspèkté-y. É poutan, sé té dé moun ki té ni onlo kouraj ! Jistèman, an-nou vwè ka ègzanp a Jézi, ta Abigayil é ta Mari ka aprann-nou.

13. Poukwa Jézi dakò pou lésé Jéova gouvèné-y ? Bay on ti èsplikasyon.

¹³ Si Jézi ka rèspèkté otorité a Jéova, a pa paskè i pa asé entélijan oben kè 2 men a-y pòk. Lè i té ka anségné, yo té ka konprann tousa i té ka di, é sa té ka montré kè i té entélijan toubònman ! (Jan 7:45, 46). Jéova té sav byen kè Jézi sé té on zouti-filé é sé pousa i pèwmèt Jézi travay èvè-y lè i té ka kréyé tousa ki an syèl-la é tousa ki asi latè (Pwov. 8:30 ; Ébr. 1:2-4). É apré Jéova résisité Jézi, i ba-y « tout pouvwa an syèl-la é asi latè » (Mat. 28:18). Men menmsi Jézi sé on zouti-filé, i toujou ka mandé Pap’a-y konsèy. Poukwa i ka fè sa ? Pas i enmé Pap’a-y (Jan 14:31).

14. a) Lè sé mari-la ka vwè ki valè Jéova ka ba sé madanm-la, ka sa ka aprann-yo ? b) Lè sé mari-la ka li Pwovèb 31, ka sa ka aprann-yo ?

¹⁴ Ka sa ka aprann sé mari-la ? Jéova pa’a mandé sé madanm-la rèspèkté otorité a mari a yo pas sé madanm-la ni mwens valè ki sé misyé-la. Enki gadé : Jéova chwazi ki misyé ki madanm pou ay gouvèné an syèl-la èvè Jézi (Gal. 3:26-29). Jéova montré kè i ka fè Gason a-y konfyans pas i ba-y on gran otorité. Menmjan-la, on mari ki ni sajès ké lésé madanm a-y jéré sèwten biten. Labib ka montré ka on bon madanm pé fè. Pa ègzanp, i ka òwganizé travay-la ki ka fèt an kaz-la, i ka vann tè, i ka achté tè, é pou fè afè, kò a-y bon toubònman ! (li Pwovèb 31:15, 16, 18). I pa kon èsklav an kaz-la ki pa ni dwa di sa i ka pansé. Men okontrè, mari a-y ka fè-y konfyans é i ka kouté sa i ni a di (li Pwovèb 31:11, 26, 27). Lè on misyé ka aji konsa èvè madanm a-y, madanm a-y ka rèspèkté-y san pon pwoblèm.

15. Ka ègzanp a Jézi ka aprann sé madanm-mayé la ?

¹⁵ Ka sa ka aprann sé madanm-la ? Menmsi Jézi fè onlo biten ki té èstraòwdinè toubònman, sa pa té ka pozé-y pon pwoblèm dè rèspèkté otorité a Jéova (1 Kor. 15:28 ; Filip. 2:5, 6). Menmjan-la osi, on madanm ki kapab é ki ka suiv ègzanp a Jézi pé’é mèt an tèt a-y kè i ni mwens valè ki mari a-y pas i ka rèspèkté otorité a-y. I ké soutyenn mari a-y pas i enmé-y men i ké fè sa siwtou pas i enmé Jéova é pas i ka rèspèkté Jéova.

16. Dapré 1 Samiyèl 25:3, 23-28, douvan ki difikilté Abigayil touvé-y ? (gadé imaj-la ki anlè po a jounal-la).

¹⁶ Abigayil té mayé èvè on dénonmé Nabal. Sé té on nonm égoyis ki té ka akwè-y é ki té engra. Pétèt kè Abigayil té ja bon èvè misyé ! I té’é pé lésé David é sé boug a-y la tchouyé-y, men a pa sa i fè. Okontrè, i fè tousa i té pé pou pwotéjé mari a-y é fanmi a-y. Abigayil té ni onlo kouraj pas i ay palé ba David é 400 sòlda a-y pou di-yo kè sa yo té k’ay fè la pa bon. É i fè sa èvè onlo rèspé. I jous mandé David padon pou sé érè-la Nabal fè la (li 1 Samiyèl 25:3, 23-28). David rann-li kont kè Jéova té itilizé Abigayil pou ba-y on bon konsèy é pou anpéché-y fè on gwo péché.

17. Ka istwa a David é Abigayil ka aprann sé mari-la ?

¹⁷ Ka sa ka aprann sé mari-la ? Abigayil sé té on madanm ki té plen sajès. David  rann-li kont dè sa é i kouté konsèy a-y. Kifè, sé sa ki anpéché-y tchouyé enpé inosan. Menmjan-la osi, on mari ki ni sajès ké pran tan kouté sa madanm a-y ka di-y lè i ni on désizyon enpòwtan a pran. Pétèt kè si i kouté sa madanm a-y di-y, sa ké anpéché-y pran on mové désizyon.

18. Ka ègzanp a Abigayil ka aprann sé madanm-mayé la ?

¹⁸ Ka sa ka aprann sé madanm-la ? On madanm ki ka rèspèkté Jéova é ki enmé-y pé pwokiré fanmi a-y onlo bénédisyon menmsi mari a-y pa Témwen oben menmsi mari a-y pa’a suiv prensip a Jéova. I pé’é chèché on mwayen pou lagé misyé-la. Olyé dè sa, i ké rèspèkté otorité a mari a-y é i ké édé mari a-y aprann konnèt Jéova pibyen (1 Pyè 3:1, 2). Men menmsi mari a-y pa’a fè pon pa pou sèvi Jéova, Jéova ké fyèw dè sè-lasa pas i fidèl é pas i ka rèspèkté otorité a mari a-y.

19. A ki moman on madanm pé’é kouté mari a-y ?

¹⁹ Men a pa paskè on madanm ka rèspèkté otorité a mari a-y kè i ké lésé mari a-y fè-y fè on biten ki pa’a fè Jéova plézi. Pa ègzanp, imajiné kè mari a on sè ki pa Témwen ka mandé-y manti, volé oben fè on biten ki pa annakò èvè sa Labib ka di. Fò pa nou oubliyé kè fò tout sé krétyen-la rèspèkté otorité a Jéova an prèmyé. Kifè, menm lè on sè mayé, fò i suiv prensip-lasa osi. Si mari a on sè ka mandé-y fè on biten ki pa’a fè Jéova plézi, fò i di-y non. I ké èspliké-y franchman poukwa i pa’a fè sa men i ké palé ba-y jantiman (Akt 5:29).

20. Poukwa nou pé di kè Mari té bon bon zanmi èvè Jéova ?

²⁰ Mari té bon bon zanmi èvè Jéova. I té konnèt Lézékriti byen menm. On jou, Mari té ka palé èvè Élizabèt, manman a Jan Lèbatis é i palé dè sa ki maké adan Lansyen Tèstaman plis ki 20 fwa (Lik 1:46-55). É anplisdisa, gadé byen : menmsi Mari té ja fiyansé èvè Jozèf, sé owa Mari kè zanj-la vin an prèmyé. I palé ba Mari dirèktèman é i di-y kè sé-y ki ké mèt Gason a Bondyé si tè (Lik 1:26-33). Jéova té konnèt Mari byen. É sé pousa i té sèten kè i té’é enmé gason a-y é kè i té’é okipé dè Gason a-y byen. É sèten kè  Mari rété bon bon zanmi a Jéova menm apré Jézi mò é kè i résisité an syèl-la (Akt 1:14).

21. Ka ègzanp a Mari ka aprann sé mari-la ?

²¹ Ka sa ka aprann sé mari-la ? On mari ki plen sajès kontan toubònman lèwvwè madanm a-y konnèt Labib byen. I pa’a mèt an tèt a-y kè madanm-la ké pran volan-la an men a-y. I ka rann-li kont kè si madanm a-y konnèt sé prensip-la ki an Bib-la, sé on bon biten pou fanmi-la. Menmsi madanm a-y pi enstwi ki-y, sé-y ki dwètèt édé fanmi a-y adoré Jéova. Pa ègzanp, sé-y ki dwètèt òwganizé étid familyal la (Éféz. 6:4).

22. Ka ègzanp a Mari ka aprann sé madanm-mayé la ?

²² Ka sa ka aprann sé madanm-la ? Fò on madanm rèspèkté otorité a mari a-y. Men fò limenm dè koté a-y fè tousa i pé pou fwa a-y rété solid (Gal. 6:5). Sé pousa, fò i pran tan étidyé tousèl a-y é fò i pran on tan osi pou réfléchi asi sa i ka aprann. Konsa, i ké kontinyé enmé Jéova é i ké kontinyé rèspèkté-y. Anplisdisa, i ké rèspèkté otorité a mari a-y é i ké kontan fè sa.

23. On madanm ki ka rèspèkté otorité a mari a-y sé on bénédisyon pou madanm-la menm, pou fanmi a-y é pou lasanblé-la. An ki sans ?

²³ On madanm ki ka rèspèkté otorité a mari a-y pas i enmé Jéova ka pi kontan ki on madanm ki pa’a rèspèkté otorité-la Jéova mèt la. On madanm konsa sé on bèl ègzanp pou on jennboug é pou on jenn madanm. É anplisdisa, on sè konsa ka montré kè i enmé fanmi a-y é kè i enmé lasanblé-la. Sa ka mèt on bon anbyans ki an fanmi-la ki an lasanblé-la (Tit 2:3-5). Jòdijou, lamajorité a sèwvitè a Jéova ki fidèl sé dé madanm (Sòm 68:11). Ki ou sé on madanm, ki ou sé on misyé, noutout pé fè ansòt pou ni on bon anbyans adan lasanblé-la. Adan awtik-la ki ka vin la, nou ké vwè ka chakmoun adan lasanblé-la pé fè pou sa.