ARTIK POU ÉTIDYÉ 6
« Chèf fanm-an, a wonm-an »
« Chèf fanm-an, a wonm-an » (1 COR. 11:3).
KANTIK 13 Christ, notre modèle
KOUTWÉY ASOU SA NOU KÉ WÈ a
1. Ki késyon roun sò ki lé maryé divèt pozé so kò ?
TOUT krétyen anba otorité Jézi ki parfè. Mé, lò roun madanm krétyen ka maryé i ka mété so kò anba otorité roun wonm ki pa parfè. A pa tout tan sa ké fasil. Alòr si roun sò lé maryé ké roun frè, i divèt doumandé so kò : « Kouman mo savé ki sa frè-a ké sa roun bon chèf fanmi ? Ès i ka mété so sèrvis pou Jéova an prémyé annan so lavi ? Si a pa sa, ès mo pouvé pansé ki bagaj-ya ké chanjé apré nou maryé ? » I ké divèt doumandé so kò osi : « Ès mo gen bèl kalité ki ké fè tout bagaj byen maché annan nou maryaj ? Ès mo gen pasyans é ès mo kontan bay san konté ? Ès mo lanmityé ké Jéova fò ? » (Eccl. 4:9, 12). Si roun madanm ka pran bon désizyon anvan i maryé, so maryaj ké byen maché é i ké gen tchò kontan.
2. Ki késyon nou ké wè annan sa artik-a ?
2 Roun patché sò ka montré roun bèl èkzanp paské yé ka rèspèkté otorité yé mari. Yé ka mérité nou bat lanmen pou yé ! A roun plézi sèrvi Jéova òbò sa sò-ya ki fidèl. Annan sa artik-a, nou ké bay répons asou sa trwa késyon-yan : 1) Ki problèm roun madanm maryé pouvé jwenn ? 2) Poukisa roun madanm ka désidé rèspèkté otorité so mari ? 3) Kisa mouché ké madanm pouvé anprann asou prensip otorité-a gras a èkzanp Jézi, Abigayil ké Mari ?
KI PROBLÈM ROUN MADANM MARYÉ POUVÉ JWENN ?
3. Poukisa i pa gen pyès maryaj ki parfè ?
3 Maryaj-a sa roun kado parfè Bondjé bay nou. Mé moun-yan ki ka maryé, yé menm yé pa parfè (1 Jean 1:8). A pou sa Labib-a ka di ki yé « ké jwenn tribilasyon » (1 Cor. 7:28). Annou palé di problèm roun madanm maryé pouvé jwenn.
4. Kouman roun madanm pouvé rivé pansé ki i ka rabésé so kò si i ka rèspèkté otorité so mari ?
4 Pitèt akoz di fason i lévé, roun madanm pouvé pansé ki si i ka rèspèkté otorité so mari i ka rabésé so kò. Marisol, roun sò ki ka rété Ozétazini ka di : « Koté mo lévé, yé ka di madanm-yan toulong ki yé divèt égal égo ké wonm-yan annan tout zafè. Mo savé ki a Jéova ki bay wonm-yan otorité é ki madanm-yan divèt soumèt yé kò, mé mo savé osi ki madanm-yan ka mérité rèspè. Mé magré sa, sa pa fasil di kontinyé wè otorité-a kou Bondjé ka wè l’. »
5. Ki mové lidé roun ran wonm gen asou madanm-yan ?
5 Sa ki pouvé rivé osi, a ki roun madanm krétyen maryé ké roun wonm ki ka pansé ki madanm-yan pi bas pasé wonm-yan. Roun sò yé ka aplé Ivon ki ka rété Amérik di Sid ka di : « Annan nou kiltir, wonm-yan ka manjé an prémyé é apré sa, fanm-yan pouvé manjé. Dipi yé toupiti, tifi-ya divèt konnèt fè manjé ké nétwayé kaz-a. Pannan sa tan-an, a manman-an ké sò-ya ki ka sèrvi tibolonm-yan, é yé ka di yé ki a yé ki “rwa annan kaz-a”. » Roun sò yé ka aplé Yingling é ki ka rété an Azi, ka di pou sopa : « Annan mo lang, i gen roun dolo ki ka di ki madanm pa bézwen gen bon tèt ni konnèt fè gran bagaj. Yé divèt fè tout bagaj annan kaz-a é yé pa gen drwa di yé mari sa yé ka pansé. » Annan sa mantalité-ya i pa gen lanmou é yé pa ka alé ké prensip-ya ki annan Labib-a. Roun mari ki ka lésé sa mantalité-ya détenn asou li ka fè so madanm wè mizè, i pa ka imité Jézi é Jéova pa kontan sa i ka fè (Éph. 5:28, 29 ; 1 Pierre 3:7).
6. Kisa roun sò ki maryé divèt fè pou fè so lanmityé ké Jéova vin pi fò ?
6 Kou nou wè l’ annan prémyé artik-a, Jéova lé ki mari-ya idé yé fanmi vini pròch ké li, i lé yé idé yé santi yé kò an sékirité é bay yé sa yé bézwen pou viv (1 Tim. 5:8). Mé sò-ya ki maryé divèt pran tan pou li Labib-a é réfléchi asou l’ chak jou é osi pou priyè Jéova ké tout yé tchò. Sa pouvé rèd paské yé toujou gen bokou bagaj pou fè. Pitèt yé pouvé di ki yé pa gen ni tan ni fòrs pou étidyé ké priyè. Mé yé divèt pran tan pou fè sa. Poukisa ? Paské Jéova lé ki nou chak travay pou nou kontinyé gen roun bèl lanmityé ké li (Actes 17:27).
7. Kisa ki ké idé roun madanm rèspèkté otorité so mari ?
7 Roun madanm ké divèt, pitèt, fè bokou éfòr pou rèspèkté otorité roun mari ki pa parfè. Mé, si i ka konprann poukisa Jéova ka doumandé l’ rèspèkté otorité so mari é si i ka asèpté sa, sa ké pi fasil pou i fè sa Bondjé ka doumandé l’ fè.
POUKISA ROUN MADANM KA DÉSIDÉ RÈSPÈKTÉ OTORITÉ SO MARI ?
8. Dapré Éphésiens 5:22-24, poukisa roun madanm krétyen ka désidé rèspèkté otorité so mari ?
8 Roun madanm krétyen ka désidé rèspèkté otorité so mari paské a sa Jéova ka doumandé l’ fè (li Éphésiens 5:22-24). I ka fè so Papa ki annan syèl-a konfyans. I savé ki a lanmou ki ka fè li fè tousa i ka fè é ki tousa i ka doumandé l’ fè a pou so byen (Deut. 6:24 ; 1 Jean 5:3).
9. Kisa ki ka pasé lò roun sò ka rèspèkté otorité so mari ?
9 Monn-an lé ki madanm-yan pansé ki si yé ka rèspèkté otorité yé mari yé ka rabésé yé kò, é i pa ka ankourajé yé tchenbé kont di sa Jéova ka di. Asiré, sa-ya ki gen sa lidé-ya pa konnèt nou Bondjé ki plen ké lanmou. Jéova pa té ké janmen bay so tifi-ya i kontan tèlman roun koumannman ki té ké rabésé yé. Roun sò ki ka fè tousa i pouvé pou rèspèkté otorité so mari ka idé so fanmi viv annan lapè (Ps. 119:165). Tout moun ka trapé bénédiksyon gras a so bon konpòrtman : so mari, so pitit ké li menm.
10. Kisa sa Carol di ka anprann nou ?
10 Roun madanm ki ka rèspèkté otorité so mari, menm si i pa parfè, ka montré ki i kontan li é ki i ka rèspèkté Jéova ki mété prensip otorité-a. Carol, roun sò ki ka rété an Amérik di Sid ka di : « Détan, mo mari ka fè bagaj ki pa bon. Mé mo savé ki, fason mo ka réyaji lò i ka fè sa ka montré kouman mo lanmityé ké Jéova enpòrtan pou mo. A pou sa mo ka éséyé kontinyé rèspèkté so otorité paské mo lé fè mo Papa ki annan syèl-a plézi. »
11. Kisa ka idé roun sò yé ka aplé Aneese pardonnen so mari, é kisa so èkzanp ka anprann nou ?
11 Si roun madanm ka santi ki so mari pa ka tchenbé kont di sa i gen annan so tchò é di sa ki ka troumanté l’, sa ké pi difisil pou i kontinyé rèspèkté so otorité. Mé gadé kouman roun sò yé ka aplé Aneese ka réyaji lò sa ka rivé l’. I ka di : « Mo ka éséyé pa tchenbé mo mari asou mo tchò épi sonjé ki nou tout ka fè bagaj ki pa bon. Sa mo lé fè, a pardonnen san fòrsé kou Jéova ka fè l’. É lò mo ka pardonnen, mo ka viré gen lapè annan mo tchò » (Ps. 86:5). Si roun madanm toujou paré pou pardonnen, sa ké pi fasil pou i rèspèkté otorité so mari.
ÈKZANP SOUMISYON ANNAN LABIB-A
12. Ki èkzanp soumisyon nou ka jwenn annan Labib-a ?
12 Roun ran moun pitèt ka pansé ki lò to ka soumèt to kò, to fèb. Mé a pa sa menm. Annan Labib-a nou ka jwenn roun patché èkzanp moun ki asèpté rèspèkté otorité roun moun mé ki té fò toubonnman. Annou gadé kisa èkzanp Jézi, Abigayil ké Mari ka anprann nou.
13. Poukisa Jézi ka rèspèkté otorité Jéova ? Èspliké.
13 Jézi ka rèspèkté otorité Jéova, mé a pa paské i pa entélijan ni paské i pa konnèt fè gran kichoz. Fason i ansényé moun-yan té senp ké klè. I té divèt gen bokou entélijans pou fè sa (Jean 7:45, 46). Jéova té byen savé sa Jézi té konnèt fè ; a pou sa i pèrmèt li travay ké li pou fè tout bagaj, ki annan syèl-a ki asou latè-a (Prov. 8:30 ; Héb. 1:2-4). É lò Jéova résisité l’, i bay li ‘tout pouvwar annan syèl-a ké asou latè-a’ (Mat. 28:18). Mé menm si Jézi vayan toubonnman, i toujou ka lésé Jéova gidé li. Poukisa ? Paské i kontan so Papa (Jean 14:31).
14. Kisa mari-ya pouvé anprann a) asou fason Jéova ka wè madanm-yan b) ké sa ki ékri annan Proverbes 31 ?
14 Kisa mari-ya pouvé anprann. Si Jéova ka doumandé madanm-yan rèspèkté otorité yé mari, a pa paské i ka pansé ki yé pi bas ki wonm-yan. Nou savé sa paské i chwazi wonm kou fanm pou divini rwa òbò Jézi (Gal. 3:26-29). Jéova montré i té ka fè so Pitit konfyans lò i bay li bokou otorité. Menm fason-an, roun mari ka montré i gen sajès lò i ka bay so madanm otorité. Labib-a ka palé di roun fanm djòk. I ka di ki i pouvé jéré sa ki ka fèt annan kaz-a, é vandé ké achté téren (li Proverbes 31:15, 16, 18). I pa sa roun èsklav ki pa gen drwa di sa i ka pansé. So mari pito ka fè li konfyans é ka byen kouté sa i gen pou di (li Proverbes 31:11, 26, 27). Lò roun wonm gen sa kalité rèspè-a pou so madanm a roun plézi pou madanm-an rèspèkté so otorité.
Jézi ka rèspèkté otorité Jéova. Kisa roun madanm ki djòk pouvé anprann ké so èkzanp ? (gadé paragraf 15).
15. Kisa madanm-yan pouvé anprann ké èkzanp Jézi ?
15 Kisa madanm-yan pouvé anprann. Menm si Jézi fè gran bagaj, i pa ka pansé i ka rabésé so kò lò i ka rèspèkté otorité Jéova (1 Cor. 15:28 ; Phil. 2:5, 6). Menm fason-an, lò roun fanm djòk ki ka imité Jézi ka rèspèkté otorité so mari i pa ka pansé a roun mépri pou li. I ka soutni l’ paské i kontan l’, mé osi an prémyé paské i kontan é i ka rèspèkté Jéova.
Abigayil fè so moun mennen manjé pou David ké wonm-yan ki té ka maché ké li. Apré sa, i alé jwenn yé. I ka tonbé ajounou douvan David é i ka sipliyé l’ pa vanjé so kò pou i pa divini roun kriminèl (gadé paragraf 16).
16. Dapré 1 Samuel 25:3, 23-28, ki problèm Abigayil jwenn ? (gadé zimaj-a anlè prémyé paj-a).
16 Abigayil té maryé ké Nabal, roun wonm ki té ka gadé yenki pou so douvan lèstomak, ki té ka fè ròklò é ki té engra. Roun jou, David ké wonm-yan ki té ké li té lé tchwé l’. Abigayil té pouvé fronmen so bouch é lésé yé tchwé l’. Mé i pa té ka chaché fin ké so maryaj. I pito fè sa i té pouvé pou protéjé Nabal ké tout sa ki té ka rété an so kaz. A pa ti kouraj i té divèt gen pou alé dibout douvan 400 wonm ké yé zarm é pou alé palé pou David ké bokou rèspè pou fè l’ réfléchi. I jis doumandé pardon pou mové bagaj so mari té fè (li 1 Samuel 25:3, 23-28). David konprann lanmenm ki a té Jéova ki té sèrvi sa madanm-an ki té plen ké kouraj pou bay li bon konsèy é anpéché l’ fè roun gro bétiz.
17. Kisa mari-ya pouvé anprann ké sa ki rivé David ké Abigayil ?
17 Kisa mari-ya pouvé anprann. Abigayil té sa roun madanm ki té gen bokou sajès. David té byen gen rézon kouté konsèy i bay li. Sa anpéché l’ tchwé patché moun inosan. Menm fason-an, roun mari ka montré i gen sajès lò i ka tchenbé kont di sa so madanm ka pansé anvan i pran roun gran désizyon. Sa ké pitèt anpéché li pran roun mové désizyon.
18. Kisa madanm-yan pouvé anprann ké èkzanp Abigayil ?
18 Kisa madanm-yan pouvé anprann. Roun madanm ki kontan é ki ka rèspèkté Jéova pouvé sa roun bénédiksyon pou so fanmi menm si so mari pa Témwen Jéova ouben so lafwa vini fèb. I pa ké chaché fin ké so maryaj. Pasé i fè sa, i ké rèspèkté otorité so mari pou éséyé bay li anvi konnèt plis bagaj asou Jéova (1 Pierre 3:1, 2). É menm si i pa ka byen réyaji, sa i ka fè gen valò pou Jéova é i kontan wè kouman i fidèl.
19. Annan ki kalité sitiasyon roun madanm pa ké obéyi so mari ?
19 Mé roun madanm ki ka rèspèkté otorité so mari pa ké janmen asèpté dézobéyi roun lalwa ouben roun prensip ki annan Labib-a, menm si so mari ka pousé l’ fè sa. Annou pran sa sitiasyon-an. Roun mari ki pa Témwen ka doumandé so madanm manti, vòlò ouben fè rounòt bagaj Bondjé pa kontan. Tout krétyen-yan, é sò-ya ki maryé osi, divèt obéyi Jéova an prémyé. Si mari roun sò ka doumandé l’ fè roun bagaj ki ké fè l’ dézobéyi roun prensip ki annan Labib-a, i divèt réfizé é i divèt èspliké, franchman mé ké dousèr, poukisa i ka réfizé (Actes 5:29).
Gadé paragraf 20 b.
20. Kouman nou fè savé ki Mari té gen sopa lanmityé ké Jéova é ki sa lanmityé-a té fò ?
20 Mari té gen so pròp lanmityé ké Jéova é sa lanmityé-a té fò. Dapré sa nou ka wè, i té byen konnèt sa ki té ékri annan Paròl Bondjé-a. Roun jou, i té ka palé ké Élizabèt, manman Janbatis, i palé di pasé 20 pasaj annan Ékritir ébrayik-ya (Luc 1:46-55). É réfléchi asou sa osi : Menm si Mari té fiyansé ké Jozèf, a pa li zanj Jéova-a vini wè an prémyé. A pou Mari i palé an prémyé é i di li ki a li ki té ké mété Pitit Bondjé asou latè-a (Luc 1:26-33). Jéova té byen konnèt Mari é i té sir ki i té ké pran swen di so Pitit ké bokou lanmou. Kanta Mari, nou pouvé sir ki i kontinyé travay pou gen roun bèl lanmityé ké Jéova menm apré lanmò ké rézirèksyon Jézi (Actes 1:14).
21. Kisa mari-ya pouvé anprann ké sa Labib-a ka di asou Mari ?
21 Kisa mari-ya pouvé anprann. Roun mari ki gen sajès kontan lò so madanm byen konnèt Labib-a. I pa divèt faché ké li é pansé ki i lé divini chèf a so plas. I ka konprann ki, si so madanm byen konnèt Labib-a ké prensip-ya ki annan l’, i pouvé idé so fanmi. É menm si i pa fè gran lékòl kou so madanm, a li ki divèt òrganizé étid ké so fanmi é i divèt fè sa ki fo pou fanmi-a kontinyé adoré Jéova (Éph. 6:4).
Ki èkzanp Mari, manman Jézi, ka lésé pou madanm-yan annan zafè étidyé Labib-a ké réfléchi asou l’ ? c (gadé paragraf 22).
22. Kisa madanm-yan pouvé anprann ké èkzanp Mari ?
22 Kisa madanm-yan pouvé anprann. A pa paské roun madanm divèt rèspèkté otorité so mari ki i pa bézwen travay ankò asou so lanmityé ké Jéova (Gal. 6:5). I divèt pran tan pou étidyé Labib-a é réfléchi asou sa i ka anprann. Sa ké idé l’ kontinyé kontan ké rèspèkté Jéova é sa ké idé l’ pran plézi rèspèkté otorité so mari.
23. Lò roun madanm ka rèspèkté otorité so mari, ki bénédiksyon so fanmi, so asanblé ké li menm ka trapé ?
23 Madanm-yan ki ka rèspèkté otorité yé mari paské yé kontan Jéova gen plis tchò kontan pasé sa-ya ki pa lé asèpté prensip otorité-a ki annan Labib-a. Yé ka bay jennjan-yan, wonm kou fanm, roun bèl èkzanp. É gras a yé, i gen roun bon ti anbyans annan fanmi-a é annan asanblé-a (Tite 2:3-5). Jòdla, annan sèrvitèr Jéova-ya, i gen plis madanm pasé i gen wonm (Ps. 68:11). Mé, ki wonm ki fanm, nou tout gen roun plas enpòrtan annan asanblé-a. Artik ki ka vin dèyè-a ké montré nou kouman nou chak nou pouvé fè sa nou divèt fè annan asanblé-a.
KANTIK 131 « Ce que Dieu a uni »
a Jéova lé ki roun madanm maryé rèspèkté otorité so mari. Mé kisa sa lé di vréman ? Roun mari ké roun madanm pouvé anprann bokou bagaj asou zafè soumisyon-an gras a èkzanp Jézi ké èkzanp plizyèr madanm annan Labib-a.
