1. Nu maddesision i sister nu sinni nakuan i paki-atawanna, anni ira i iyavuna?

SI Jesu-Cristo i pakiyafuan na ngamin nga Cristiano. Perfekto yayya nga ulu. Ngem nu makitawa ngana i Cristiano nga babay, imperfekto ngana nga lalaki i uluna. Mariga yatun nu mittan. Yayya nga nu egga i tadday nga brother nga nononopanna nga paki-atawan, iyavuna nakuan ta baggina: ‘Ngatta makagì nga mabbalin yaw nga brother tu mapia nga ulu na familia? Prayoridadna kari i passerbi kani Jehova? Nu ari, anni ira i basehakku nga mabbalin lagapa yayya nga mapia nga ulu ta espiritual sonu magatawa kami ngana?’ Siempre, mawag gapa nga iyavu nakuan yaw na sister ta baggina: ‘Anni ira i kualidad ku nga makoffun ta pagatawa mi? Minappasensia anna minangngiyawa ngà kari? Maladda kari i relasiokku kani Jehova?’ (Ecl. 4:9, 12) Mabbalin tu magayayya i babay ta pagatawana depende ta desision ira nga kingnguana nigena nakitawa.

2. Anni i gigiammuattam taw nga artikulo?

² Makakkasta nga ehemplo i minillion ira nga Cristiano nga sister ta pakimoreda ta atawada. Makomendan ira megafu tatun anna kakayà tam nga makavulu danaw nga matalo nga babbay ta passerbi kani Jehova! Taw nga artikulo, tabbagattam danaw nga pakkiavu: (1) Anni ira i rason nu ngatta marigatan i atawa nga babay nga makimoray? (2) Ngatta sigga-paran nakuan i babay nga makimoray ta atawana? (3) Anni ira i magigiammu na atawa nga lalaki anna atawa nga babay ta pakimoray da Jesus, Abigail, anna Maria nga atawa ni Jose anna yena ni Jesus?

3. Ngatta makkaproblema i ngamin nga sigga-atawan?

³ Perfekto nga regalu na Dios i pagatawa, ngem imperfekto i totolay. (1 Juan 1:8) Yatutta dati nga kinagi na Uvovug na Dios nga mapeggan tu “neravvunan nga kavuru-vurungan nga duttal ta kaggaggaw” i sigga-atawan ira. (1 Cor. 7:28) Innattam i karuan nga meparubang ta atawa nga babbay.

4. Ngatta awayyana nga matageno na babay nga meyalinno yayya nu makimoray yayya ta atawana?

⁴ Nu mittan, marigatan i babay nga makimoray ta atawana megafu ta nikapadakalna. Awayyana nga matagenona nga mebaba onu meyalinno yayya nu kuanna yatun. Kunnaw i kagian ni Marisol nga taga-United States: “Ta diammi, kanayun nga mekagi ta babbay nga mawag tu pantay laman ira na lallaki ta ngamin nga gannug. Ammù nga niddan ni Jehova tu autoridad i attawa nga lallaki anna kayàna nga mattuppal nira i attawa nga babbay, ngem siempre merespeto nakuan gapa i babbay. Marigatan ngà nu mittan nga irespeto i autoridad na atawà megafu ta kakkagian na totolay nga ariakku mabba mawag nga kuan yatun.”

5. Anni ira i mali nga pagimamma na karuan nga lallaki ta babbay?

⁵ Marigatan gapa i babay nu nononopan na atawana nga ari kuruga importante i babbay kumpara ta lallaki. Kunnaw i kagian ni Sister Ivon nga taga-South America: “Ta diammi, mappollu nga kuman i lallaki. Memandu ta abbarabbing nga babbay nga mallutu anna mappakarenu. Ngem passerbian na yena anna na babbay nga ána i abbarabbing nga lallaki anna mekagi ta abbarabbing nga lallaki nga ira i ‘patul ta balay.’” Kunnaw gapa i kagian ni Sister Yingling nga taga-Asia: “Egga i akkagianan ta diammi nga ari nga mawag tu bright onu maabilidad i babbay. Ira laman i magangngua ta ngamin nga trabahu ta balay anna ariadda puede kagian i opiniodda ta atawada.” Nu ari nga ayatan na lalaki i atawana nga babay anna arianna nga kuan i kakkagian na Biblia, marigatan i atawana, arianna maparigan si Jesus, anna mapalussona si Jehova.​—Efe. 5:28, 29; 1 Ped. 3:7.

6. Anni i mawag nga kuan na atawa nga babbay tapenu mapaladda i personal nga relasiodda kani Jehova?

⁶ Nagigiammu tam ta nappasa nga artikulo nga ekspektan ni Jehova nga iyawa na Cristiano nga atawa nga lalaki i espiritual, emosional, anna i material nga pakawagan na familiana. (1 Tim. 5:8) Ngem mawag tu egga lagapa i tiempo na sigga-atawan ira nga sister tapenu kadaggaw nga bibbigan anna monag nga pannonopan i Biblia anna napafutuan nga makimallo kani Jehova. Ngem baka marigatan ira nga kuan yatun. Sobra gare i ka-busy na attawa nga babbay yatutta baka awan ngana tu tiempo anna sikadda. Ngem ngatta mawag nga kuadda yatun? Megafu ta kayà ni Jehova nga mapeggan anna mapattalupaddiattam ngamin i personal nga relasiottam nisa.​—King. 17:27.

7. Anni i kuan na atawa nga babay tapenu mas mabi nga metuppalna i annunganna?

⁷ Kurug tu mawag nga kuan na tadday nga atawa nga babay i ngamin nga mawayyana tapenu makimoray ta imperfekto nga atawana. Egga gapa ira i annungan nga niyawa ni Jehova nisa. Ngem mas mabina nga metuppal yatun nu malippawana anna umanugu yayya ta rason ira nga egga ta Biblia nu ngatta mawag nga makimoray yayya.

8. Segun ta Efeso 5:22-24, ngatta sigga-paran nakuan i Cristiano nga babay nga makimoray ta atawana?

⁸ Sigga-paran nakuan nga makimoray i Cristiano nga babay ta atawana megafu ta yatun i  ikikkiddaw ni Jehova nisa. (Bibbigan i Efeso 5:22-24.) Mattalo yayya kani Jehova megafu ta iddeddukanna yayya. Ammuna gapa nga pammakapiananna i ikikkiddaw ni Jehova nisa.​—Deut. 6:24; 1 Juan 5:3.

9. Anni i efektona nu makimoray i tadday nga sister ta atawana?

⁹ Influwensian na mundo i babbay nga ari tuttulan i estandarte ni Jehova anna nonopan nga meyalinno ira nu makimoray ira. Danuri mangngua tu kunnatun ay ariadda ammammu i minaggiddu nga Dios tam. Ari vuluvuga mangiyawa si Jehova tu bilin nga mangiyalinno ta meddu nga ánana nga babbay. Nu kuan na sister i adde na mawayyana tapenu kuan i papel nga nipeyannung nisa ni Jehova, mabbalin tu memammo i familiana. (Sal. 119:165) Fuera paga tatun, mabenefisiowan yayya, i atawana, anna i ánana.

10. Anni ira i magigiammu tam ta kinagi ni Carol?

¹⁰ Nu makimoray i babay ta imperfekto nga atawana, mepasinganna nga iddukan anna irespetona si Jehova nga nangiyunnug ta pakka-ulu. “Ammù nga makakua i atawà tu kamali ira,” kagian ni Carol nga taga-South America. “Ngem ammù gapa nga nu makuana danatun, masingan ta pattratù nisa nu kunnasi kadakal i pattagibalor ku ta relasiokku kani Jehova. Yayya nga kuakku lagapa i adde na mawayyà nga makimoray nisa megafu ta ammù nga yatun i mamagayayya ta nelangitan nga Yamà.”

11. Anni i nakoffun kani Sister Aneese tapenu mabbalin tu minammakoma, anna anni i magigiammu tam ta kinagina?

¹¹ Marigatan i babay nga irespeto i atawana anna makimoray nisa nu ari nga ikonsidera na atawana i mataga-tagenona anna i pakavurunganna ira. Kunnatun i naekspiriensa ni Sister Aneese. Ngem kunnaw i kuanna nu mesimmu yatun: “Ari nga mattaki i nono ku. Daddammakku nga makkamali ittam ngamin. Kayà ku i mabbalin tu minammakoma kagitta ni Jehova. Nu mamakoma ngà, metoli i memammo nga nono ku.” (Sal. 86:5) Nu minammakoma i atawa nga babay, mas mabi nisa i makimoray.

12. Anni ira nga ehemplo i mabibbig tam ta Biblia?

¹² Nonopan na karuan nga makafi i minakkimoray nga tolay. Ngem ari nga kurug yatun. Aru i ehemplo ta Biblia na totolay nga minakkimoray  ngem magutu. Innattam nu anni i magigiammu tam kani Jesus, Abigail, anna kani Maria.

13. Ngatta makimoray si Jesus kani Jehova?

¹³ Makimoray si Jesus kani Jehova ari tu megafu ta ari yayya nga ma-uto onu maabilidad. Kakuruganna, masingan ta simple anna manawag nga panuddu ni Jesus nga kuruga ma-uto yayya. (Juan 7:45, 46) Dakal gapa i pattalo ni Jehova ta abilidad ni Jesus, yayya nga nipamavulunna nga makipattrabahu si Jesus nisa turi ta pinaratuna i uniberso. (Prov. 8:30; Heb. 1:2-4) Kabalin nga napaginnolay si Jesus, nitalo ni Jehova nisa “ngamin i pakawayya ta langi anna ta utun na davvun.” (Mat. 28:18) Maski nu aru i abilidad ni Jesus, mattalo lagapa yayya ta uffun ni Jehova megafu ta iddukanna i Yamana.​—Juan 14:31.

14. Anni i magigiammu na atawa nga lalaki ta (a) pagimamma ni Jehova ta babbay? (b) Proverbio 31?

¹⁴ I magigiammu na atawa nga lalaki. Ari nga niyunnug ni Jehova i pakka-ulu megafu ta imammatanna i babbay nga mas alinno kumpara ta lallaki. Nipasingan yatun ni Jehova turi ta parehu nga pinilina i babbay anna i lallaki nga makipammaguray kani Jesus. (Gal. 3:26-29) Nipasingan ni Jehova nga mattalo yayya ta Anana turi ta niddanna yayya tu autoridad. Kunnatun gapa nakuan i kuan na masirib nga lalaki. Iddanna nakuan tu autoridad i atawana. Kagian na Biblia nga egga i abilidad na mapia nga atawa nga babay nga manangngal ta trabahu ta balay, maggatang anna mallaku tu davvun, anna mannegosio. (Bibbigan i Proverbio 31:15, 16, 18.) Ari yayya nga tadday nga doroban nga awan tu kepangngattanna nga makkagi tu opinionna. Mattalo i atawana nisa anna ginnanna i opinionna. (Bibbigan i Proverbio 31:11, 26, 27.) Nu kunnatun i pangirespeto na lalaki ta atawana, kakayà na babay i makimoray nisa.

15. Anni i magigiammu na attawa nga babbay kani Jesus?

¹⁵ I magigiammu na atawa nga babay. Maski nu aru i netuppal ni Jesus, arianna ninono nga meyalinno yayya nu makimoray kani Jehova. (1 Cor. 15:28; Fil. 2:5, 6) Parigan nakuan gapa na mapia nga atawa nga babay i ehemplo ni Jesus. Ariadda nakuan nga nonopan nga meyalinno ira nu makimoray ira ta atawada. Suportanna i atawana ari laman megafu ta iddukanna yayya, nu ari, megafu ta iddukan anna irespetona si Jehova.

16. Segun ta 1 Samuel 25:3, 23-28, anni ira nga problema i inarubang ni Abigail? (Innan i letratu ta vungun.)

¹⁶ Si Nabal i atawa ni Abigail. Makasarili yayya, opog, anna awan tu pabbala-balona. Nu kayà laman nakuan ni Abigail nga massina ira, pinamavulunanna nakuan si David anna i suddaluna ira nga patayan si Nabal. Ngem arianna nga kingngua yatun. Kingnguana lallagu i adde na mawayyana tapenu protektan si Nabal anna i interu nga tangabbalayadda. Nonopan nu kunnasi kagutu si Abigail turi ta minaranni yayya ta 400 nga konsu armas nga suddalu anna marespeto nga nipakiyuvovugna i problema kani David. Yayya paga lagu i nakippakoma megafu ta marake ira nga kingngua na atawana. (Bibbigan i 1 Samuel 25:3, 23-28.) Mangurug si David nga inusa ni Jehova yaw nga magutu nga babay nga manabarang nisa tapenu mafugaddan yayya nga makaliwa tu madammo.

17. Anni i magigiammu na atawa nga lalaki kani David anna Abigail?

¹⁷ I magigiammu na atawa nga lalaki. Masirib nga babay si Abigail. Pia ngana laman ta nagginna si David ta tabarangna. Megafu tatun, ari yayya nga nakaliwa ta daga. Kunnatun gapa i kuan na masirib nga lalaki. Pannonopanna tu mapia i opinion na atawana nigena maddesision. Makoffun i opinion na atawana  tapenu makangngua yayya tu masirib ira nga desision.

18. Anni i magigiammu na atawa nga babay kani Abigail?

¹⁸ I magigiammu na atawa nga babay. Nu iddukan anna irespeto na atawa nga babay si Jehova, makasta i efekto natun ta familiana. Maski nu ari masserbi i atawana kani Jehova onu tumuttul ta prinsipiona ira, ari yayya magaleg tu ari nebase-Biblia nga rason tapenu isina i atawana. Uffunanna lallagu i atawana nga maggigiammu meyannung kani Jehova gukaban na pangirespeto anna pakimorena ta nisa. (1 Ped. 3:1, 2) Maski nu ari nga mapaguyu i atawa nga lalaki, appresian lagapa ni Jehova i pabbalin na babay tu matalo ta Nisa gukaban na pakimorena ta atawana.

19. Anni ira nga situasion nga ari nga tuttulan na babay i atawana?

¹⁹ Maski nu minakkimoray i tadday nga Cristiano nga atawa nga babay, arianna suportan i atawana nu ikiddona nga arianna tuttulan i dorob onu prinsipio ira na Biblia. Angngariganna, baka doban yayya na ari Saksi nga atawana nga malladdug, makkoko, onu mangngua tu gannug nga ikalussaw ni Jehova. Ngem mawag tu pagolluan nga tuttulan na ngamin nga Cristiano si Jehova nga Dios, nelagum ngana i sigga-atawan ira nga sister. Nu ikiddaw na lalaki ta atawana nga sister nga laddakanna i prinsipio ira na Biblia, mawag tu determinadu nga panakitanna yatun anna masippo nga ipakanawagna nu ngatta manakina nga kuan yatun.​—King. 5:29.

20. Ngatta makagi tam nga madukko anna personal i relasion ni Maria kani Jehova?

²⁰ Madukko anna personal i relasion ni Maria kani Jehova. Kabisaduna gapa i Katurakan. Ta pakibbidana kani Elizabet, i yena ni Juan Bautista, maturu tu mami-20 nga egga i kinagina sa nga maggafu ta Hebreo nga Katurakan. (Luc. 1:46-55) Pannonopan yaw: Maski nu netratu ngana nga mekasal si Maria kani Jose, ari nga ollu nga nappasingan i anghel ni Jehova kani Jose. Ollu nga nappasingan i anghel kani Maria anna kinagina nisa nga ibussina i Ana na Dios. (Luc. 1:26-33) Ammammu tu mapia ni Jehova si Maria anna makkomfiansa yayya nga iddukan anna tangngallanna i Anana. Maski kabalin nga natay si Jesus  anna napaginnolay ta langi, nattalupaddian i makasta nga relasion ni Maria kani Jehova.​—King. 1:14.

21. Anni i magigiammu na atawa nga lalaki ta kagian na Biblia meyannung kani Maria?

²¹ I magigiammu na atawa nga lalaki. Magayayya i masirib nga atawa nga lalaki nu monag i pakannammu na atawana ta Biblia. Arianna mawanan tu komfiansa ta baggina megafu tatun anna arianna nonopan nga ikaya na atawana nga mabbalin tu ulu na familia. Malippawana nga dakal nga uffun ta familiada nu kabisadu na atawana i Biblia anna i prinsipiona ira. Maski paga nu mas atannang i ginigiammu na babay, responsibilidad lagapa na lalaki nga irolluan i familiana ta paddayaw kani Jehova, kasali ngana tatun i pangiyunnug ta family worship.​—Efe. 6:4.

22. Anni i magigiammu na atawa nga babay kani Maria?

²² I magigiammu na atawa nga babay. Kurug tu mawag nga makimoray i babay ta atawana, ngem yayya lagapa i responsable ta pamattalupaddian tu masikan ta pangurugna. (Gal. 6:5) Tapenu makuana yatun, mawag tu egga lagapa i iskediulna nga mappersonal study anna mannono tu mapia. Nu kuanna yatun, mapattalupaddianna i pangiddu anna pangirespetona kani Jehova anna magayayya yayya ta pakimorena ta atawana.

23. Kunnasi nga mabenefisiowan i atawa nga babay, i familiana, anna i kongregasion ta pakimorena?

²³ Mas magayayya anna kontentu danuri babbay nga makimoray ta atawada anne turi ira ta ari tumuttul ta unnug ni Jehova ta pakka-ulu. Kuadda yatun megafu ta ayada kani Jehova. Makasta ira nga ehemplo para ta kabataan nga lallaki anna babbay. Makoffun gapa ira tapenu mattalupaddian i aya anna imammo ta unag na familia anna ta kongregasion. (Tito 2:3-5) Ta tiempo tam, mas aru i babbay kumpara ta lallaki nga massesserbi kani Jehova. (Sal. 68:11) Sittam ngamin, lallaki man onu babbay, egga i importante nga papel tam ta kongregasion. Ta tumunug nga artikulo, gigiammuattam nu kunnasi nga metuppal na kataggi-tadday nittam yatun nga papel.