1. Nsene munazinyetukadi kuna kupapara mulikwali, mapuro musinke ga hepa kulipura?

VAKRISTE navenye kwa kara mepangero lyaJesus Kristusa, mupitisili gokusikilira mo. Nye nsene mukadi ana kwara, age kukara mepangero lyomugara gokudira kusikilira mo. Ano eyi kapi ayi kara ureru. Nsene munazinyetukadi kuna kugazadara kukwara munazinyetugara gongandi, ya wapa kulipura asi: ‘Yisinke yina kulikida nge asi munazinyetugara ogu nga kara mupangeli gomuwa gepata? Kukarera Jehova kuna kara sininke somulyo po meparu lyendi ndi? Nsene kapisi yimo, yisinke yina kuninkisa nge ni gazare asi age kuvhura nga ka vatere nge pampepo nsene ngatu likwara?’ Na yi wapa komunazinyetukadi a li pure hena asi: ‘Yikara musinke yimwe eyi na kara nayo eyi ngayi ka tu vatera mononkwara? Ame muntu gokulididimikira ntani ugavi ndi? Ame na kara nelikwatakano lyewa naJehova ndi?’ (Muud. 4:9, 12) Nsene mukadi a tura po matokoro gomawa komeho a kware, ngayi va tompoka mononkwara ntani ngava kara noruhafo.

2. Yisinke natu ka lironga mosirongwa esi?

² Vanavazinyetukadi wovanzi kwa tura po sihonena sosiwa sokulimburukwa vagara vawo. Ta tu va pandura sili! Tuna hafa mokukarera Jehova kumwe novakadi ava wovalimburukwi! Mosirongwa esi, tatu ka gwana malimbururo komapuro aga gatatu: (1) Maudigu musinke ava ligwanekere nago vakadi wokukwara? (2) Morwasinke mukadi na limburukwira mugara gwendi? (3) Yisinke nava lirongera ko vagara woVakriste novakadi vawo koulimburukwi waJesus naAbigayili ntani Mariya mukadaJosefa?

3. Morwasinke valikwali navenye ava ligwanekerere nomaudigu mononkwara?

³ Nonkwara kuna kara uhwi wokusikilira mo wokutunda kwaKarunga, nye vantu kapi va sikilira mo. (1 Joh. 1:8) Eyi yiyo nye Nonkango daKarunga adi rondwere ava vana kukwara asi ngava ligwanekera ‘nomaudigu gomouzuni ou.’ (1 Kol. 7:28) Ngesi ta tu ka zogera maudigu gamwe aga ava ligwanekere nago vakadi.

4. Morwasinke nampo mukadi na lizuvhira asi kapisi hepero kulimburukwa mugara gwendi?

⁴ Monkedi omu va mu rera mukadi poyiruwo yimwe kuvhura kumuninkisa a lizuvhe asi ayo ugova kulimburukwa mugara ngwendi. Munazinyetu Marisol ogu ga tunga moAmerika kwa tanta asi: “Oku na kulira, vakadi ngava va tantere nkenye apa asi va hepa kuhetakana novagara mwa nayinye. Ame na yi diva asi Jehova kwa gava upangeli kovagara ntani vakadi va hepa kulimburukwa koupangeli, nye vakadi nawo va hepa kuvafumadeka. Nye ayo kukarera nge udigu kulimburukwa mugara gwange morwa vantu kuuyunga asi kapisi hepero va yi rugane vakadi.”

5. Magano musinke gepuko va kara nago vagara vamwe kuhamena vakadi?

⁵ Vagara vamwe kutara vakadi asi awo kapi va kara nomulyo ngwendi vagara. Munazinyetu gomukadi Ivon ogu ga tunga moAmerika zokombindakano kwa tanta asi: “Vagara yiwo ava howo kulya ntani nakukwama vakadi. Ano vanonagona wovakadona kuvatara asi yiwo yatumbukira yokutereka nokuzeresa, nye kombinga zovamati, yininke nayinye kuyivaruganena vazinya vawo novampanza vawo. Vanonagona owo wovamati kuvatantera asi awo ‘vahompagona vemembo.’” Munazinyetu gomukadi Yingling ogu ga tunga moAsia kwa tanta asi: “Meraka lyetu mwa kara mbuuyungiso ezi asi kapisi hepero kovakadi va kare nonondunge ndi va kare noudivi. Sirugana sawo kuna kara sokurugana nayinye yemembo ntani kapi vava pulisira va gave magano kovagara vawo.” Nsene mugara kapi a likida eharo ntani kapi a tura pasirugana nompango domoBibeli, ayo kuvhura kukarera mukadendi udigu mokuhonena Jesus nokuhafesa Jehova.—Efe. 5:28, 29; 1 Pet. 3:7.

6. Yisinke va hepa kurugana vakadi yipo va nkondopeke elikwatakano lyawo naJehova?

⁶ Ngomu katu yi lirongere mosirongwa sa kapita, Jehova kuna kundindira ko kovanturagumbo va rere mapata gawo pokuvapa yihepwa yopanyama nokuvavatera pampepo nopamalizuvho. (1 Tim. 5:8) Nye nampili ngoso, vanavazinyetu wovakadi ava va kwara, va hepa kulitulira po siruwo sokuresa Bibeli nkenye ezuva nokugazadara ko ntani nokukanderera kwaJehova kutundilira komutjima. Eyi kuvhura kukara udigu morwa vakadi wokukwara kurugana unene, yipo nye kuvhura va lizuvhe asi kapi vana kara nosiruwo ndi nononkondo dokurugana yininke nayinye oyo, nye ayo ya kara nomulyo unene va litulire po siruwo sokuyirugana. Morwasinke? Morwa Jehova kuna hara nkenye gumwe a twikire kukara nelikwatakano kumwe nendi.—Yirug. 17:27.

7. Yisinke nayi vatera mukadi yipo a limburukwe nokufumadeka mugara gwendi?

⁷ Yimo, mukadi kuvhura kurugana unene yipo a limburukwe mugara gwendi ogu ga dira kusikilira mo. Nye nampili ngoso, ayo ngayi mu rerupira kusikisa mo situmbukira esi ga mu pa Jehova nsene a kwata egano nokutambura mapukururo gomoBibeli aga ga faturura konda zeyi na limburukwira mugara gwendi.

8. Kuliza noVaefeso 5:22-24, morwasinke mukadi goMukriste na limburukwira upangeli wamugara gwendi?

⁸ Mukadi goMukriste kulimburukwa mugara gwendi morwa eyi yiyo ana hepa ko Jehova kwendi. (Resa Vaefeso 5:22-24.) Age kwa huguvara  Jehova morwa ga yi diva asi Jehova kwa mu hara ntani nga mu vatera a rugane youhunga.—Deut. 6:24; 1 Joh. 5:3.

9. Yisinke a yi horoka apa mukadi goMukriste a fumadeke upangeli wamugara gwendi?

⁹ Uzuni kukorangeda vakadi va nyokere po kulimburukwa nompango daJehova nokutara ulimburukwi asi sininke sougova. Yosili, vantu ava ava korangeda magano ogo, kapi va diva Karunga gwetu geharo. Jehova kapi nga pa vana vendi ava ga hara nompango edi nadi dira kuvaretera uwa. Munazinyetu gomukadi ogu a kondjo paapa ga hulira yipo a sikise mo situmbukira esi ga mu pa Jehova sokulimburukwa mugara gwendi, kuvatera epata lyendi yipo li kare mombili. (Epis. 119:165) Pokuyirugana ngoso, nage namugara gwendi ntani novana vawo ngava gwanena mo uwa.

10. Yisinke natu lirongera ko kononkango daCarol?

¹⁰ Mukadi ogu a limburukwa mugara gwendi gokudira kusikilira mo kulikida asi age kwa hara Jehova ogu ga tulisa po upangeli ntani ga mu fumadeka. Carol ogu ga tunga moAmerika zokombindakano kwa tanta asi: “Nayi diva asi mugara gwange nga tura mapuko, nye eyi ngani rugana nsene ana tura mapuko, ngayi likida asi elikwatakano lyange naJehova mulyo kwange ndi hawe. Yipo nye, ame nkenye apa kukondja ni mu limburukwe morwa nina hara kuhafesa Guhyetu gemeguru.”

11. Yisinke a yi vatere munazinyetukadi Aneese yipo a kare nonkareso zokugusira po ntani yisinke natu lirongera ko kononkango dendi?

¹¹ Ayo kuvhura kukara udigu komukadi mokulimburukwa nokufumadeka mugara gwendi nsene a lizuvha asi mugara gwendi kapi ana kumupurakena ndi kapi ana kara nosinka kwendi. Nye tu tareni eyi a rugana munazinyetukadi Aneese apa ayi horoka eyi mononkwara dawo. Age kwa tanta asi: “Ame kuhetekera ko ni dire kuhanduka nokudiworoka asi natuvenye kulipuka. Nye sitambo sange kuna kara sokuligusira-gusira po ngwendi moomu a yi rugana Jehova. Apa ani gusire po vakwetu, ame kulizuvha mbili momutjima.” (Epis. 86:5) Nsene mukadi a kara nonkareso zokugusira po, ayo nga yi mu karera ureru kulimburukwa.

12. Yihonena musinke ya kara moBibeli?

¹² Vamwe kuvhura kulizuvha asi muntu ogu a limburukwa, kapi ga kara nononkondo. Nye ayo  kapisi usili. MoBibeli kwa kara mo yihonena youlimburukwi yoyinzi yavamwe ava va kere nouradi. Tu tareni eyi natu lirongera ko kwaJesus naAbigayili ntani naMariya.

13. Morwasinke Jesus a limburukwire upangeli woGuhwe? Faturura.

¹³ Jesus kapi a limburukwa upangeli woGuhwe yipo asi a kare nonondunge ndi ediwo. Eyi nga rongo kwa likidire asi age kwa kara noudivi. (Joh. 7:45, 46) Jehova ga yi divire asi Jesus kwa kara noudivi, ano eyi yiyo nye Jehova ga pulisilire Jesus a rugane kumwe nendi apa ga sitire yininke nayinye yepevhu neyi yemeguru. (Yis. 8:30; Heb. 1:2-4) Konyima zapa Jehova ga vhumbwire Jesus, age kwa mu pere “nonkondo nadinye demeguru, nedi depevhu.” (Mat. 28:18) Nampili ngomu Jesus ga kara nediwo lyenzi, nye age simpe kukwama mavyukiso goGuhwe. Morwasinke? Morwa age kwa hara oGuhwe.—Joh. 14:31.

14. Yisinke nava lirongera ko vagara (a) monkedi omu Jehova a tara vakadi? (b) kegano lya kara moYisewe egaununo 31?

¹⁴ Eyi nava lirongera ko vagara. Nampili ngomu Jehova ga pangera vakadi va limburukwe kovagara vawo, kapi ayi tanta asi vagara mulyo kupitakana vakadi. Nye age kwa yi likida asi vakadi nawo mulyo pokuvahorowora nawo kumwe novagara vamwe yipo ngava ka pangere kumwe naJesus. (Gar. 3:26-29) Jehova kwa yi likidire asi age ga huguvara Munwendi pokumupa nonkondo dokupangera. Mokulifana, mugara gonondunge ogu ga huguvara mukadendi, kupa ko mukadendi yitumbukira yimwe. Bibeli kwa tumbura yininke yimwe eyi a vhuru kurugana mukadi gonondunge. Pasihonena, age kuvhura kupakera mbili embo, kuranda nokuwapeka yininke yemembo, kuranda sirwa nokurugana ngesefa. (Resa Yisewe 31:15, 16, 18.) Age kapisi mupika, nye nage ga kara nononkondo dokupwagesa magano gendi. Mugara gwendi ga mu huguvara ntani kupurakena komagano gendi. (Resa Yisewe 31:11, 26, 27.) Apa mugara a tekura mukadendi monkedi ozo, nga yi muninkisa a mu limburukwe noureru.

15. Yisinke nava lirongera ko vakadi kosihonena saJesus?

¹⁵ Eyi nava lirongera ko vakadi. Nampili ngomu Jesus ga sikisire mo yininke yoyinzi, ayo kapi a yi mu ninkisa a dire kulimburukwa upangeli woGuhwe. (1 Kol. 15:28; Fil. 2:5, 6) Mokulifana, mukadi gonondunge kuhonena Jesus pokulimburukwa mugara gwendi. Age kukwatesa ko mugara gwendi morwa ga mu hara, nye unene po morwa ga hara Jehova nokumufumadeka.

16. Kuliza na-1 Samwere 25:2, 3, 23-28, maudigu musinke ga ligwanekerere nago Abigayili? (Tara efano lyopontunda.)

¹⁶ Mugara gwaAbigayili kwa kere Nabali. Age kwa kere mugara ogu ga lihere mwene nokulinenepeka ntani kapi ga kere norupandu. Nye nampili ngoso, eyi kapi ya ninkisire Abigayili a teze nonkwara dendi. Ngano Abigayili ga here kuhagekesa po nonkwara dendi, age ngano ga mwenene nokusiga Ndafita novantu vendi va ka dipage mugara gwendi. Nye Abigayili kapi ga yi rugene oyo. Mevango lyokuyirugana, age kwa rugene ko yuma yipo a popere mugara gwendi nepata lyendi. Gazara tupu uradi ou ga kere nawo Abigayili wokuza a ka gwanekere novakwayita 400 noku ka uyungisa Ndafita mokukohonona po udigu owo. Mevango lyokupa mugara gwendi usima koudona ou ga rugene, Abigayili kwa lipere mwene usima. (Resa 1 Samwere 25:2, 3, 23-28.) Ndafita ga yi dimbwilire asi Jehova yige ga tumine mukadi ogo gouradi a mu rondore mokudira kurugana nzo zonene.

17. Yisinke nava lirongera ko vagara kosihonena saNdafita naAbigayili?

¹⁷ Eyi nava lirongera ko vagara. Abigayili kwa kere mukadi gonondunge. Ano eyi kwa ninkisire Ndafita a purakene kweyi ga mu tanterere. Ngoyitundwamo, age kapi ga rugene udona ou ngano wa mu reterere yitundwamo yoyidona. Mokulifana, mugara gonondunge kupurakena  nokugazadara ko nawa komagano gamukadendi, komeho a ture po matokoro gomulyo. Morwa magano gamukadendi kuvhura ga mu vatere a nyokere kutura po matokoro gepuko.

18. Yisinke nava lirongera ko vakadi kosihonena saAbigayili?

¹⁸ Eyi nava lirongera ko vakadi. Mukadi ogu ga hara Jehova nokumufumadeka, kuvhura kuninkisa epata lyendi li gwanene mo uwa mosihonena sendi sosiwa nampili yi kare asi mugara gwendi kapi a karere Jehova ndi kapi a paruka kuliza nonompango domoBibeli. Age kapi a papara magano aga ga dira kuliza nonompango doBibeli yipo a teze po nonkwara dendi. Nye nsene a fumadeka nokulimburukwa mugara gwendi, kuvhura ngayi mu tumangede a lironge kuhamena Jehova. (1 Pet. 3:1, 2) Nye nampili yi kare asi mugara gwendi kapi ana kutura po marunduruko, Jehova nga yi mu hafesa pokumona omu mukadi ana kulimburukwa mugara gwendi.

19. Momaukaro musinke mukadi na nyoka kulimburukwa mugara gwendi?

¹⁹ Mukadi goMukriste kapi ta vhuru kukwatesa ko mugara gwendi nsene kuna ku mu pura a teze po noveta ndi nompango domoBibeli. Pasihonena, tu tante nye asi mugara gomuhapuli ta pura mukadendi goMbangi yipo a kumbagere ndi a vake ndi nampo a rugane yininke eyi a yi dili kuhafesa Jehova. Vakriste navenye kukwatera mo vakadi wokukwara, va hepa kulimburukwa po unene Jehova Karunga. Nsene munazinyetu gomukadi kuna kumupura a teze po nompango domoBibeli, ga hepa kunyoka nokufaturura konda zeyi na dilira kuyirugana, nye age ga hepa kufaturura monkedi zongwa.—Yirug. 5:29.

20. Ngapi omu twa yi diva asi Mariya kwa kere nelikwatakano lyenene naJehova?

²⁰ Mariya kwa kere nelikwatakano lyenene naJehova. Age ga divire nawa Matjangwa. Monzogera zawo kumwe naElisabeta zinyaJohanesa Mukuhwi, Mariya kwa temwininine Matjangwa gomoRuhebeli gokupitakana po 20. (Ruk. 1:46-55) Tu tareni eyi ya horokere. Nampili ngomu Mariya ga mu vandekerere Josefa, nye muengeli ogu Jehova ga tumine kapi ga monekerere Josefa. Muengeli ogo kwa uyungire pomuhowo naMariya nokumutantera asi nga hampuruka munona gomugara ogu nga kara MunwaKarunga. (Ruk. 1:26-33) Jehova ga divire nawa Mariya ntani ga yi divire asi age nga hara Munwendi  nokumupakera mbili. Ano Mariya kwa twikilire kukara nelikwatakano lyenene naJehova nampili konyima zapa Jesus ga fire nokumuvhumbura a ze meguru.—Yirug. 1:14.

21. Yisinke nava lirongera ko vagara kosihonena saMariya esi sa kara moBibeli?

²¹ Eyi nava lirongera ko vagara. Mugara gonondunge kuhafa nsene mukadendi ga diva nawa Matjangwa. Age kapi a yi muguvisa nokugazara asi ana hara kukara mupangeli gepata. Age ga yi diva asi nsene mukadendi a diva nawa Bibeli nonompango damo, age nga vatera epata lyendi. Nampili yi kare asi mukadi ga lironga unene kumupitakana mugara gwendi, aso kuna kara situmbukira somugara mokuvatera epata litwikire kukarera Jehova. Pasihonena, mokupitisira ukareli wepata ntani noyirugana yimwe yopampepo.—Efe. 6:4.

22. Yisinke nava lirongera ko vakadi kosihonena saMariya?

²² Eyi nava lirongera ko vakadi. Mukadi ga hepa kulimburukwa mugara gwendi, nye ga hepa kudiworoka asi ga kara nositumbukira samwene sokupameka epuro lyendi. (Gar. 6:5) Eyi kutanta asi ga hepa kulitulira po siruwo sokulironga pwa mwene nokugazadara ko. Ayo nga yi mu vatera a twikire kuhara Jehova nokumufumadeka ntani nokutwikira kulimburukwa mugara gwendi noruhafo.

23. Ngapi ulimburukwi wovakadi wokukwara au va vatere vene nomapata gawo ntani nombungakriste?

²³ Vakadi ava ava limburukwa vagara vawo morwa kwa hara Jehova, ngava gwana ruhafo rorunene kupitakana ava ava nyoka kutambura ewapaiko lyaJehova lyoupangeli. Vakadi ava ava limburukwa upangeli, kutulisa po hena sihonena sosiwa kovadinkantu wovagara nava wovakadi. Awo kuvatera mapata gawo ga kare mouumwe ntani nombungakriste. (Tit. 2:3-5) Naina sinzi sava va kara mombunga zaJehova kuna kara vakadi ava ava karere Jehova noulimburukwi. (Epis. 68:11) Natuvenye, yi kare asi vagara ndi vakadi, twa hepa kurugana ko yuma yipo mbungakriste zi kare noruhafo. Mosirongwa sokukwama ko, ngatu ka zogera omu nkenye gumwe gwetu na yi rugana oyo.