1. Ino njimiipusho nshi nankashi utana kweebwa njaeelete kuliipusha?

BENEKLISTU boonse balatanjililwa a Yesu Klistu, mutanjilili umaninite. Nacibi boobo, na Mwineklistu mwanakashi weebwa, ibaye utamaninite ngooba mutwi wakwe. Ano ici teshi cuubu. Aboobo nankashi ndyatoyeeya pamukwesu weenga wa mweeba, alyeelete kuliipusha ayi: ‘Ino nshiinshi nshentoobona mumukwesu uyu shitotondesha ayi inga waba mutwi wa mukwashi uli kabotu? Sa ngumuntu ubikila maano kushintu shakumushimu? Na taabikili bunene maano kushintu shakumushimu, ino nshiinshi shitotondesha ayi alaakuba mutwi wa mukwashi uli kabotu na tukeebane?’ Nacibi boobo, nankashi alakwe mwiine alyeelete kuliipusha ayi: ‘Ino njimibo nshi njeencite yeenga yatucafwa na tweebana? Sa ndakalika moyo akutondesha mushimu wabwaabi? Sa ndicite bushicibusa buyumu a Yehova?’ (Shiku. 4:9, 12) Kwaamba ayi akaswitilile akuba alusangalalo mucikwati cakwe, mwanakashi alyeelete kusala kabotu kaatana kweebwa.

2. Ino tutobandika nshi mumutwi uyu?

² Benankashi baanji balatondesha cakubonenaako cibotu abuumbi cakunyumfwila beebaabo. Aboobo tulyeelete kubalumba abuumbi! Tulakondwa abuumbi kusebensela pomwi abanakashi aba bashomeka! Mumutwi uyu tutobandika shikumbulo kumiipusho yotatwe: (1) Ino ngamapensho nshi ngeenga banakashi beebetwe bacana? (2) Ino nceebonshi banakashi beebetwe balasala kunyumfwila beebaabo? (3) Ino Beneklistu bali mucikwati inga beeya nshi pamakani akunyumfwila akulemeka butanjilishi kuswa kucakubonenaako cakwe Yesu, Abigelo, alimwi a Maliya mukaakwe Josefu uyo wakalinga mushali wakwe Yesu?

3. Ino nceebonshi mucikwati cili coonse mulaba mapensho?

³ Cikwati ncipo cimaninite kuswa kuli Lesa, sombi bantu bali mucikwati tabamaninite. (1 Joni 1:8) Nceceeco Baibo ncoyaambila ayi abo batoonjila mucikwati balaakucana “mapensho mubuumi bwabo.” (1 Koli. 7:28) Amuleke tubandike mapensho amwi mwanakashi weebetwe ngeenga weendaamo.

4. Ino nciinshi ceenga capa mwanakashi kulinyumfwa anga kunyumfwila beebaye nkuliboosha panshi?

⁴ Cimwi ciindi ceebo ca nkulilo, mwanakashi weebetwe inga kaabona anga kunyumfwila beebaye nkuliboosha panshi. Ba Marisol baku America bakaamba ayi: “Nkondakakulila, banakashi balaiishikwa ayi balyeelete kweelana abasankwa mushintu shoonse. Ndicishi kwaamba ayi Yehova ngowakabika musankwa kuba mutwi alimwi alisuni kwaamba ayi banakashi beebetwe banonyumfwila beebabo, nacibi boobo, banakashi abalo balyeelete kulemekwa. Ano mukwiinga bantu bamucishi balaamba shiboneka anga nsheelete kunyumfwila beebaangu, cilaba ciyumu kunyumfwila butanjilishi bwa beebaangu.”

5. Ino nshiinshi bamwi nshobaamba pabanakashi shipusene ashaamba Malembo?

⁵ Cimwi ciindi mwanakashi inga weebwa kumusankwa uyeeya ayi basankwa mbobayandika kwiinda banakashi. Nankashi waliina lya Ivon ukala ku South America wakaamba ayi: “Nebo kumisheesu basankwa mbobataanguna kulya banakashi kabatana. Baana banakashi baniini mbobasebensa ncito mbuli kuteleka akubotesha, lyalo bashali banakashi mbobasebensela baana basankwa alimwi balabalwiita ayi ‘bali anga mbaami bapa ŋanda.’” Nankashi waliina lya Yingling, ukala ku Asia, wakaamba ayi: “Mumushobo winemisheesu kuli mwaambi usansulula ayi banakashi tabeelete kuba amaano na lushibo lwakucita shintu shipusenepusene. Mukuli wakwe nkusebensa ncito shapa lubaansa alimwi taeelete kulwiita ibaye nshatoyeeya.” Musankwa utacite lusuno alimwi utakonkeli Baibo nshoyaamba, alapensha mukaakwe, alaalilwa kukonkela cakubonenaako cakwe Yesu, alimwi alakalasha Yehova.​—Efe. 5:28, 29; 1 Pit. 3:7.

6. Ino banakashi beebetwe balyeelete kucita nshi kwaamba ayi bayumye bushicibusa bwabo a Yehova?

⁶ Bweenka mbotwakeeya mumutwi wamana, Yehova alalangila Mwineklistu weebete kulama mukwashi wakwe lwakumushimu, kubacafwa kulinyumfwa kushitilishikwa akulamwa kabotu, alimwi akubalangweta shiyandika lwakumubili. (1 Timo. 5:8) Nacibi boobo, benankashi bali mucikwati balyeelete kuba amulongo wakubelenga Baibo bushiku abushiku akukutumana kuyeeyawo alimwi akupaila kuli Yehova kuswa panshi lya moyo. Sombi teshi cuubu. Banakashi bali mucikwati balaba ashakucita shiinji, aboobo inga kabayeeya ayi tabaciteewo ciindi ankusu shakucita nshetwaambawo. Nacibi boobo, kucita nshetwaambawo ncintu ciyandika abuumbi. Ino nceebonshi? Nceebo cakwaamba ayi Yehova alisuni ayi muntu womwi awomwi abe abushicibusa anguwe akutolelela kubuyumya.​—Mili. 17:27.

7. Ino nciinshi ceenga capa kwaamba ayi cibe cuubu mwanakashi kulemeka akunyumfwila beebaye?

⁷ Kwalo, mwanakashi alyeelete kusebensa cankusu kwaamba ayi acikoonshe kunyumfwila beebaye batamaninite. Nacibi boobo, inga camubeta cuubu na washiba kabotu akusumina Baibo ncoyaambila ayi alyeelete kulemeka akunyumfwila beebaye.

8. Kweelana a Bene Efeso 5:22-24, ino nceebonshi Mwineklistu weebetwe alasalawo kunyumfwila beebaye?

⁸ Mwineklistu weebetwe alasalawo kunyumfwila beebaye mukwiinga Yehova nshaasuni ayi acite. (Amubelenge Bene Efeso 5:22-24.) Alashoma Ishi wakwiculu mukwiinga alishi  kwaamba ayi alimusuni alimwi inga taamulwiiti kucita sheenga tashimucaafwi.​—Duto. 6:24; 1 Joni 5:3.

9. Ino nciinshi cicitika na mwanakashi weebetwe kaanyumfwila Yehova kwiinda mukulemeka beebaye?

⁹ Bantu bakucishi balayuminisha banakashi kutakonkela njiisho shakwe Yehova, alimwi balabalwiita ayi kunyumfwila musankwa nkuliboosha panshi. Nacibi boobo, cancine ncakwaamba ayi bantu bayuminisha miyeeyo iyi tabamushiiwo Lesa wesu shilusuno. Yehova inga taapi bana bakwe banakashi mbwaasuni abuumbi mulawo weenga wabapa kuboneka anga taaku mbobabete. Nankashi weelesha cankusu kukumanisha mukuli Yehova ngwakamupa alayuminisha luumuno mumukwashi wakwe. (Kulu. 119:165) Kucita boobo kulapa kwaamba ayi boonse mumukwashi bafubileemo.

10. Ino nshiinshi nsheenga tweeya kuswa kushakaamba ba Carol?

¹⁰ Mwanakashi weebetwe unyumfwila beebaye batamaninite, alatondesha ayi alisuni Yehova uyo wakabika bubaambo bwa mutwi wa mukwashi. Ba Carol bekala ku South America bakaamba ayi: “Ndicishi kwaamba ayi beebangu inga babisha, nacibi boobo, mboncita na babisha shilatondesha mbombona kuyandika kwa bushicibusa bwangu a Yehova. Aboobo ndeelesha kutolelela kunyumfwila mukwiinga ndisuni kusangalasha Ishiwesu wakwiculu.”

11. Ino nciinshi cicafwa nankashi Aneese kulekelela, alimwi ino nciinshi nceenga tweeya pamakani ngakaamba?

¹¹ Inga caba ciyumu mwanakashi kulemeka akunyumfwila beebaye na kaabona anga tababikili maano mbwaalinyumfwa akushimusukamika. Ano amunyumfwe nankashi weebetwe waliina lya Aneese mbwaacita na sha mushobo uyu shacitika. Wakaamba ayi: “Ndeelesha kuleya kubikila mfundilishi. Ndeebaluka kwaamba ayi soonse tulabisha. Nconsuni nkulekelela kuswa panshi lyamoyo, bweenka Yehova mbwaacita. Na ndacita boobo, ndalinyumfwa kukalikana mumoyo.” (Kulu. 86:5) Cilaba cuubu kumwanakashi kunyumfwila na kaacite mushimu wakulekelela.

12. Ino nshakubonenaako sha baani nsheenga tweeya kuswa mu Baibo?

¹² Bantu bamwi balayeeya ayi na muntu kaanyumfwila nkokwaamba ayi taacite nkusu. Sombi ubu mbubeshi bwa mwana munene. Baibo ilaamba shakubonenaako shiinji sha bantu bakalinga  kucite nkusu sombi bakalinga kunyumfwila. Amuyeeye nsheenga tweeya kuswa kucakubonenaako cakwe Yesu, Abigelo, alimwi a Maliya.

13. Ino nceebonshi Yesu alanyumfwila Yehova? Amusansulule.

¹³ Yesu wakalinga kunyumfwila Yehova, sombi taakalinga kucita boobo ceebo cakwaamba ayi taakalinga kucite maano na lushibo. Yesu wakalinga kucishi kwiisha munshila yuubu alimwi inyumfwika kabotu ceebo wakalinga musongo. (Joni 7:45, 46) Yehova wakalinga kucishi kwaamba ayi Yesu alicishi kusebensa kabotu, aboobo wakamusuminisha kusebensaakwe pomwi ndyaakalinga kulenga liculu acishi capanshi. (Tus. 8:30; Ebu. 1:2-4) Alimwi kuswabo ciindi Yesu ndyaakabushikwa, Yehova wakamupa ‘nkusu shoonse kwiculu apacishi capanshi.’ (Mate. 28:18) Nabi kwaamba ayi Yesu alicishi kabotu bwakusebensa ncito, alacinka manungo mubutanjilishi bwakwe Yehova. Ino nceebonshi? Nceebo cakwaamba ayi alisuni baIshi.​—Joni 14:31.

14. Ino nshiinshi nsheenga basankwa beebete beeya (a) kucakubonenaako cakwe Yehova mbwaabona banakashi? (b) kushaamba Tushimpi 31?

¹⁴ Nsheenga basankwa beebete beeya. Yehova taakwe kubika bubaambo bwakwaamba ayi mwanakashi anoonyumfwila beebaye ceebo cakwaamba ayi alabona ayi basankwa balindite banakashi. Alimwi watondesha cancine ici kwiinda mukwiilikaawo banakashi pakati kabaabo beshibakanookweendelesha a Yesu. (Gala. 3:26-29) Yehova wakatondesha ayi alashoma Mwanaakwe kwiinda mukumupa nkusu. Musankwa alakwe inga wapako mukaakwe nkusu shakucita shintu shimwi. Maswi akwe Lesa alaamba pancito shimwi shisebensa mwanakashi musongo. Alaamba ayi ngotanjilila ncito shapa lubaansa, aloola myuunda akwiilama, alimwi inga wacitako amakwebo. (Amubelenge Tushimpi 31:15, 16, 18.) Teshi musha utacite nkusu shakwaambawo. Sombi beebaye balamushoma alimwi akukutika ndyaatokwaamba mbwaatoyeeya. (Amubelenge Tushimpi 31:11, 26, 27.) Na musankwa kaatondesha nkumbu abulemu kumukaakwe, cilaakuba cuubu mwanakashi kumunyumfwila.

15. Ino banakashi beebetwe inga beeya nshi kucakubonenaako cakwe Yesu?

¹⁵ Nsheenga banakashi beebetwe beeya. Nabi kwaamba ayi Yesu wakacita shintu shiinji, taaboni kwaamba ayi kunyumfwila Yehova nkuliboosha panshi. (1 Koli. 15:28; Filip. 2:5, 6) Ubu bweenka mbocibete akumwanakashi musongo ukonkela cakubonenaako cakwe Yesu. Taaboni anga kunyumfwila beebaye nkuliboosha panshi. Alanyumfwila beebaye kuteshibo ceebo cakwaamba ayi alibasuni sombi ceebo cakwaamba alisuni Yehova alimwi alamulemeka.

16. Kweelana a 1 Samwelo 25:3, 23-28, ino ngamapensho nshi Abigelo ngaakalinga kucite? (Amubone cikope cili papeeji yakutaanguna.)

¹⁶ Abigelo wakalinga kweebetwe kuli Nabali. Musankwa uyu wakalinga muntu ulisuni, ulibonesha, alimwi utaluumbi. Nacibi boobo, nicakalinga kwaamba ayi Abigelo wakalinga kusuni kumanisha cikwati cakwe, naakwiinga wakalekabo ayi Defedi abashilumamba bakwe bamucaaye ibaye. Muciindi cakucita boobo, Abigelo wakacitawo comwi kwaamba ayi ashitilishe Nabali amukwashi wabo unene. Ano amuyeeyebo kutaloonda nkwakalinga kuyandika kwaamba ayi acikoonshe kwiimikana kunembo lya bashilumamba bali 400, lyalo akucikonsha kubandika a Defedi mubulemu. Alimwi wakalyaaba akwaamba ayi bape nguwe mulandu wakacita beebaye. (Amubelenge 1 Samwelo 25:3, 23-28.) Defedi wakeshiba ayi Yehova ngowalengesha kwaamba ayi mwanakashi utaloondi uyu ese amulwiite maswi akapa kwaamba ayi ataciti cilubo cinene.

17. Ino basankwa beebete inga beeya nshi pamakani akwe Defedi a Abigelo?

¹⁷ Nsheenga basankwa beebete beeya. Abigelo wakalinga mwanakashi musongo. Defedi wakatondesha busongo kwiinda mukumunyumfwila. Aboobo ici cakapa kwaamba ayi aleye mulandu wakutila bulowa. Musankwa  weebete alakwe inga watondesha busongo kwiinda mukuyeeyawo cakubikila maano pa muyeeyo waamba mukaakwe, kaatana kusala cakucita ciyandika. Mpashi muyeeyo wakwe inga wapa kwaamba ayi ibaye asale kabotu.

18. Ino banakashi beebetwe inga beeya nshi kucabonenaako cakwe Abigelo?

¹⁸ Nsheenga banakashi beebetwe beeya. Mwanakashi weebetwe usuni Yehova alimwi umulemeka, inga wacafwa mukwashi wakwe nabi kwaamba ayi beebaye teshi Bakamboni nabi na tabakonkeli njiisho shakwe Yehova. Taeeleshi kulangoola nshila njeenga wamanishilamo cikwati cakwe. Sombi alalemeka beebaye akubanyumfwila alimwi ici inga capa kwaamba ayi beebaye basune kwiiya pali Yehova. (1 Pit. 3:1, 2) Nabi kwaamba ayi beebaye tabakwe kusalawo kwiiya cancine, Yehova alaakusangalala ceebo cakwaamba ayi atoonyumfwila beebaye.

19. Ino ndilili ndyeenga mwanakashi weebetwe wakaka kunyumfwila beebaye?

¹⁹ Nacibi boobo, Mwineklistu weebetwe inga taasumini na beebaye bamulwiita kucita cintu citeendelani anjiisho shamu Baibo. Kucakubonenaako, atuyeeye ayi musankwa uteshi Kamboni walwiita mukaakwe Kamboni kwaamba ayi aambe shakubeca, kwiipa, na kucita cintu cimwi ceenga cakalasha Yehova. Beneklistu boonse kwiilikaawo abenankashi beebetwe, balyeelete kutaanguna kunyumfwila Yehova Lesa. Aboobo na nankashi bamulwiita kucita cintu citeendelani anjiisho shamu Baibo, alyeelete kukaka, alimwi alyeelete kuyuma akusansulula ncaakakila.​—Mili. 5:29.

20. Ino tulishi buyani ayi Maliya wakalinga kucite bushicibusa buyumu a Yehova?

²⁰ Maliya wakalinga kucite bushicibusa buyumu a Yehova. Alimwi cilyeelete wakalinga kwaashi kabotu Malembo. Ndyaakalinga kubandika a Lisabeti, banyina Joni Mubombeki, Maliya wakaamba Malembo amuci Ebulu mankanda eendilila 20. (Luka 1:46-55) Alimwi amuyeeye paceeci: Nabi kwaamba ayi Maliya wakalinga wakobekelwa kuli Josefu, munjelo wakwe Yehova taakwe kutaanguna kubonekela kuli Josefu. Wakataanguna kululama Maliya akumulwiita ayi alaakushala Mwanaakwe Lesa. (Luka 1:26-33) Yehova wakalinga kumushi kabotu abuumbi Maliya alimwi wakalinga kushomete kwaamba ayi alaakutondesha lusuno akumulama kabotu Mwanaakwe. Alimwi ncakutatoonsha kwaamba ayi Maliya wakatolelela kuba abushicibusa bubotu  a Yehova, Yesu ndyaakafwa akubushikwa kuya kwiculu.​—Mili. 1:14.

21. Ino basankwa beebete inga beeya nshi pamakani amu Baibo aamba pali Maliya?

²¹ Nsheenga basankwa beebete beeya. Musankwa musongo alakondwa na mukaakwe alyeeshi kabotu Malembo. Taalinyumfwi cibiibi akutalika kuyeeya ayi mpashi mukaakwe alisuni kuba mutwi wa mukwashi. Alishi kwaamba ayi na mwanakashi kaashi kabotu Malembo anjiisho shamu Baibo, nkokwaamba ayi inga wacafwa mukwashi. Nacibi boobo, nabi kwaamba ayi mukaakwe wakeeya kwiinda nguwe, musankwa ngoocite mukuli wakutanjilila mukulambila kwamukwashi alimwi amushintu shimwi shakumushimu.​—Efe. 6:4.

22. Ino banakashi beebetwe inga beeya nshi kucabonenaako cakwe Maliya?

²² Nsheenga banakashi beebetwe beeya. Mwanakashi alyeelete kunyumfwila beebaye. Nacibi boobo, alyeelete kunoocita sheenga shayumya lushomo lwakwe. (Gala. 6:5) Aboobo alyeelete kuba aciindi ncaeelete kwiiya Baibo akukutumana kuyeeyawo. Kucita boobo kulaakumucafwa kutolelela kusuna akulemeka Yehova alimwi akucana lusangalalo mukunyumfwila beebaye.

23. Ino mbubotu nshi banakashi beebetwe banyumfwila mbobacana, alimwi ici cilacafwa buyani mukwashi alibungano?

²³ Banakashi batolelela kunyumfwila beebaabo ceebo calusuno lwabo pali Yehova, balaba alusangalalo lwancinencine alimwi balakalika moyo kwiinda baabo bakaka kukonkela bubaambo bwakwe Yehova. Alimwi nshakubonenaako shibotu kubasankwa abanakashi bacanike. Alimwi balapa kwaamba ayi mumukwashi amulibungano mube lusuno aluumuno. (Taitasi 2:3-5) Munshiku shino, pabasebenshi bakwe Yehova bashomeka, baanji mbanakashi. (Kulu. 68:11) Aboobo soonse, basankwa na banakashi, tulicite lubasu luyandika mulibungano. Mumutwi utokonkelaawo tulaakubandika nsheenga womwi awomwi wacita kwaamba ayi akumanishe lubasu lwakwe.