1. Mwihiyana ubuwelaga oteliwa ikohege ddi?

MAKIRISTAWU enohowela omwiwelelaga Yehova. Vano mwihiyana ateliwa, anobajha wiwelela onamasogolela wa mamune ali muthu ohilogomana. Podi okala ethu yorusa wiwelela. Bumwahaya murogola afuna oteliwa aabihege wikoha: ‘Dhithu baani anerana ddibila ola dhinoniha wihina anere okala namasogolela apama a emudhi? Anosogoliha mabasa omuzimuni mwigumini mwaaye? Akala kaneerana, enagithukulela wubuwela wihina anere okala namasogolela apama a emudhi natelana ddi?’ Teto oliye podi wikoha egi: ‘Dhikalelo baani ginnimina? Gili muthu ovilela ni ovaha? Gihikanna wanda wapama ni Yehova’ (Ecl. 4:9, 12) Enamuthukulele muhiyana ohagalala ateliwa dhithu othomiliye ahinateliwe.

2. Yohudhera ela nnone ddi?

² Matxikwi ni matxikwi aarogola enohoweleya watamalela. Aliwa tajhiha yapama yowawiwelela amamuniwa. Sohagalasa omulabela Yehova ni arogola ala ororomeleya. Yohudhera ela nnere woona dhowakula dha makoho mararu enaharela: (1) Makathamiho baavi enaafwanya ahiyana? (2) Mwahaya bwaddi mwihiyana agamwiwelela mamune? (3) Anamatela enahudhere ddi ni yotajhiha ya Yesu, Abigayili ni ya Mariya maye Yesu?

3. Mwahaya bwaddi wihikala matelo oologomana?

³ Matelo nvaho wologomana wa Mulugu, mbwenye athuya kilogomane. (1 João 1:8) Bumwahaya Madhu a Mulugu enowoga yegi: ale enatela enere okanna ‘makathamiho mwigumini.’  (1 Cor. 7:28) Wawone makathamiho mamodha enafwanya ahiyana.

4. Ethu enamuthukulele mwihiyana wonaga wi omwiwelela mamune onakala ninga kanna thima ddi?

⁴ Malabo mamodha, mwaha wa dhilemelelo mwihiyana podi wubuwelaga wi omwiwelela mamune onakala ninga kanna thima. Marisol, anakala elabo yo Estadu Unidu ohuwoga egi: “Murudda gibaliwimi ahiyana enovuruwanesa wi sapama oliganaga ni alobwana. Gihinona wihina Yehova dikumihile nlamulo na okalawo namasogolela a emudhi, teto omuthoma mwihiyana wihina amwiwelelege mamune. Naari dhigarive ndo anofwanelela orihiwa. Mbwenye malabo mamodha podi okala ethu yorusa okanna mubuwelo wapama wodhela muselu ola.”

5. Mubuwelo baani dhabure alobwana enniwana wodhela ahiyana?

⁵ Teto mwihiyana podi oteliwa ni mulobwana anubuwela wihina mwihiyana kanna thima. Murogola dhaala anithaniwa Ivon, anakala elabo yo Wafrika du Sul ohuwoga egi: Murudda wehu alobwana binabajha ojha, vano ahiyana okala oogomihera. Teto anahiyana binapiya ni binapara mabasa avaade, mbwenye anaalobwana ejheehaga opiyeliwa ni amayiwa obe ni arogoliwa. Obajha ehimiwa aliwa enahudhera wi aliwa ‘anamathonga a vaade.’ Murogola dhaala anithaniwa Yingling, anakala elabo yo Asiya ohuwoga egi: “Ni ewogelo yaga wihikala madhu enihina mwihiyana kanahowela okanna thotho newene ohudhera wapara mabasa. Mutholo waye fuwapara mabasa a vaade teto kanna ofuru wowoga dhithu anubuweliye ni mamune.” Mowukuula makalelo ala owubuwela kinoniha odhivela newene kiniwanana ni Bibliya. Mulobwana anna yubuwelo ndha onomuhosa mwariye, kanamwiwelela Yesu teto onomukuula Yehova. — Efé. 5:28, 29; 1 Ped. 3:7.

6. Mwihiyana afuna wunnuwiha wandana waye ni Yehova eeregena ddi?

⁶ Ninga nonilihu yohudhera evirile Yehova onajheha wihina alobwana esamalele epaddi yomuzimuni ya mubuwelo ni yomwilini ya emudhi yewa. (1 Tim. 5:8) Mbwenye, arogola eteliwe enohowela osayela mudhidhi wihina emwileri Bibliya, opendda ni olobela wa Yehova. Mbwenye podi okala ethu yorusa, mwihiyana podi opinyaminyeya vano wubuwelaga wihina kanna mudhidhi wohudhera ni olobela. Naari dhigari ndo sapama mwihiyana osayela mudhidhi womwileri Bibliya. Mwaha wa ddi? Mwaha Yehova anafuna wi kadda muthu akanne wandana wapama ni oliye. — At. 17:27.

7. Enaamukavihere mwihiyana okala owiwelela ddi?

⁷ Ebaribari wihina omwiwelela mulobwana ohulogomana kahi ethu yokweya. Mbwenye Bibliya anowoga mwaha bwaddi ekala ethu yapama mwihiyana okala owiwelela. Mwihiyana oonelamo ni arumedha dhithu ndha, enere okala yokweya werana epaddi anvahile Yehova.

8. Ninga munawogela Efésios 5:22-24, mwahaya bwaddi mwihiyana agathoma omwiwelela mamune?

⁸ Mwihiyana anothoma omwiwelela mamune mwaha wihina Yehova dinaloba. (Omwileri Efésios 5:22-24.) Oliye anamuroromela babe odhulu teto ohunona wihina Yehova anomudhivela ni ananfunela opama. — Deut. 6:24; 1 João 5:3.

9. Mwihiyana amurihaga mamune enapadduwa ddi?

⁹ Peeno athu enihina ahiyana kayawiwelelege malamulo a Yehova ni wihina omwiwelela mulobwana enoniha wihina mwihiyana kanna thima. Mbwenye athu enawoga madhu ala kimunonne Mulugu ehu odhivela. Yehova kaadha aruma anaaye wiwelelaga nlamulo  nnoniha wihina aliwa kinna thima. Mwihiyana anilibihera pamadhene wihina iwelele nlamulo nna anvahile Yehova, vaade vaye vinokala murenddele. (Sal. 119:165) Eyo enokavihera murala watene, mulobwana ahima vamodha ni mwihiyanaya.

10. Ninga awogile murogola Karol, nnahudheravo ddi?

¹⁰ Kinakweya omwiwelela mulobwana oothega. Mbwenye mwihiyana ohunona wihina akumihile nlamulo na okalawo namasogolela di Yehova. Teto iwelelaga anomoniha Yehova wihina anomudhivela ni anomuriha. Karol, anakala elabo yo Amerika du Sul anowoga egi: “Gihinona wihina mamunaga anoviriganiha. Teto makalelo ginamwakulimi enowoniha akala ginovaha thima wandana waaga ni Yehova obe naari. Bumwahaya miyo ginodidela okala owiwelela, mwaha wihina ginafuna gimuhagalase babi aaga odhulu Yehova.”

11. Enamukavihera ddi murogola dhaala anithaniwa Aneese okala olevelela, ki nnahudhera ddi?

¹¹ Malabo mamodha mwihiyana podi wubuwela wihina mamune kanavaha thima mubuwelo waye ni dhithu dhili mmurimani mwaaye. Bumwahaya podi omurusaga omuriha ni omwiwelela mamune. Mbwenye kabe noone ethu anerana murogola dhaala oteliwa anithaniwa Aneese. Oliye onowoga egi: “Miyo ginowilibihera wihina gihimukoyele ntxiga mamunaga. Kaginadduwala wihina atenihu nnoviriganiha. Yothoma yaga fulevelela ninga Yehova anileveleliye. Galevelela ginokanna murenddele mmubuweloni.” (Sal. 86:5) Mwihiyana anna ekalelo yolevelela enomukweyela wiwelela.

12. Dhopadduwa baani dhinafwanyeya mBibliyani?

¹² Athu amodha enubuwela wihina mwihiyana aniwelela kanaliba, mbwenye kahi ebaribari. MBibliyani muhulebiwa dhopadduwa dha athu yaali owiwelela, mbwenye yaali akopolo. Nnafuna none yopadduwa ya Yesu, ya Abigayili ni ya Mariya.

13. Enamuthukulela Yesu omwiwelela Yehova ddi? Kawogamo.

¹³ Yesu anomwiwelela Yehova. Eyo enatapulela wihina oliye kanna thotho ni kananda wapara mabasa yekaye? Naari! Kavo muthu ananda ohudhiha ni thotho vamodha ni makalelo  okweya ompitha Yehova. (João 7:45, 46) Teto Yesu ahinona wapara pama mabasa ofiyedha Yehova omweenya wihina amukavihere opaddusa dhithu dhili odhulu ni elabo ya vati. (Pro. 8:30; Heb. 1:2-4) Nuvenyihiwa muukwani Yehova ohunvaha owedha wihina athongege elabo ya odhulu ni elabo ya vati. (Mat. 28:18) Naarive agaali muthu athotho ni aaparaga pama mabasa oliye anosayelesa dhoholela dha Yehova. Mwaha wa ddi? Mwaha wihina anomudhivela babe. — João 14:31.

14. Alobwana enahudhera ddi a) wodhela makalelo Yehova anawoniye ahiyana? b) wodhela dhithu dhinafwanyeya va Provérbios 31?

¹⁴ Dhithu enahudhera alobwana. Yehova kanaloba ahiyana wihina yawiwelelege amamuniwa mwaha wihina aliwa kinna thima. Kabiha wubuwela, Yehova ahasakula alobwana vamodha ni ahiyana wihina yathongege vamodha ni Yesu. (Gál. 3:26-29) Yehova anowoniha wihina anomuroromela mwanaye mwaha wa onvaha mutholo. Emodhave, mulobwana a thotho anonvaha mutholo mwariye. Bibliya anowoga dhithu mwihiyana oteliwa anafwaneleliye werana. Motajhiha, oliye podi wasogolela mabasa enapariwa vaade, podi omwedda nyagoso teto ogula dhithu dhinahoweleya vaade. (Omwileri Provérbios 31:15, 16, 18.) Oliye kahi mudhaari ahinafwanelela owoga mubuwelo waye. Mamune anomuroromela ni anovuruwana dhithu dhinawogiye. (Omwileri Provérbios 31:11, 26, 27.) Mulobwana amweddihaga mwariye ni makalelo yala anerege omuriha.

15. Ahiyana enahudhera ddi ni yotajhiha ya Yesu?

¹⁵ Dhithu enahudhera ahiyana. Naarive Yesu agali muthu athotho ni anonne wapara pama mabasa, kanoona wihina omwiwelela Yehova enoniha wihina kanna thima. (1 Cor. 15:28; Fil. 2:5, 6) Emodhave, mwihiyana anamutajhiha Yesu kanona wihina amwiwelelaga mamune enoniha wi kanna thima. Ohiya mwaha wa omudhivela baahi, mbwenye mwaha wihina anomudhivela ni anomuriha Yehova.

16. Ninga munawogela 1 Samuel 25:3, 23-28, dhoweha baani dhanfwanya Abigayili? (Osugwe fotu ya vakapani.)

¹⁶ Abigayili ateliwe ni mulobwana dhaala ithaniwa Nabal. Aali muthu anrima, owithukula ni muthu ohitamalela. Naari dhigari ndo Abigayili kasayenle makalelo wihina amwalane ni mamune. Ahakale muthu mmodha, ere omwihiya Davidi vamodha ni alobwana aye yampe. Mbwenye oliye ahisayela makalelo wihina ambarele Nabal vamodha ni murala waye. Wabihe wubuwela oliba murima anna Abigayili wihina agumane ni alobwana ale 400 yaali owiwegeredhene wihina yawane koddo, ni makalelo apama asayeliye wi athapanye ni Davidi. Oliye ahivelela ofiyedha orumedha dhoviriganiha dha mamune. (Omwileri 1 Samuel 25:3, 23-28.) Davidi ahonelamo wihina Yehova amulabihedhe mwihiyana yole oliba murima wihina amukavihere. Yolaga ya Abigayili yahimukavihera Davidi ohurahila nikame.

17. Alobwana enahudhera ddi ni yopadduwa ya Davidi ni ya Abigayili?

¹⁷ Dhithu enahudhera alobwana. Abigayili ahikanna ekalelo yapama, teto Davidi ahoniha thotho mwaha wa ovuruwana yolaga ya Abigayili. Bumwahaya, oliye kafiyendhe orahila nikame. Emodhave, mulobwana afuna othoma ethu yunlubale anere olabihedha thotho amukohaga mwariye makalelo anoneliyemo muselu ole. Monelo wa mwariye podi omukavihera ohuthoma ethu yaadhena makathamiho.

18. Ahiyana enahudhera ddi ni yopadduwa ya Abigayili?

¹⁸ Dhithu enahudhera ahiyana. Naarive akala mwihiyana ateliwe ni mulobwana ahinamulabela Mulugu, amudhivela Yehova podi okavihera emudhi yaye. Oliye kanasayelege makalelo omwalana ni mamune. Mbwenye anere odidela omuriha ni omwiwelela. Makalelo ayo  podi omuthukulela mamune ohudhera wodhela Yehova. (1 Ped. 3:1, 2) Malabo mamodha mwihiyana podi wilibiheraga, mbwenye naari dhigari ndo mamune ahihudhere ebaribari. Yehova anohagalala vanlubale amoona mwihiyana akalaga oororomeleya ni amwiwelelaga mamune.

19. Ethu yamuthukulele mwihiyana ohimwiwelela mamune ddi?

¹⁹ Malabo mamodha, mulobwana ahinamulabela Yehova podi omuloba mwariye werana ethu enavirigana ni malamulo a mBibliyani. Podi omuloba wihina iiye, oote obe erena ethu-sithu enamuukula Yehova. Mudhidhi yoyo mwihiyana erena ethu baani? Wubuwele wihina makiristawu atene vamodha ni aleya oteliwa enasogoliha omwiwelela Yehova. Bumwahaya, mulobwana amuloba mwariye wihina erena ethu enaviriganiha malamulo a Bibliya, oliye anofwanelela okoodda ni owoga ni makalelo apama mbwenye ni oliba murima wihina kanerena ele amulobiliye. — Atos 5:29.

20. Nnone avi wihina Mariya ahikanna wandana wapama ni Yehova?

²⁰ Mariya ahikanna wandana wapama ni Yehova. Eyo enooneya mwaha wa enonelo anniyena ya mBibliyani. Adhowiliye othapanya ni Elizabeti maye Juwawu, Mariya ahivirisedha Dholebela dha Hebarayiko dila dhokwaranya 20. (Luc. 1:46-55) Vano kabiha wubuwela: Mariya era oveviwa ni Juze, vobajhavene mungero kamuthanyuwedhe Juze. Mbwenye awogile ni Mariya egi akale maye Yesu Mwana a Mulugu. (Luc. 1:26-33) Yehova ahimunona pamadhene Mariya, teto ahikanna ebaribari wihina ere omusamalela Mwanaye ni odhivela. Naarive Yesu agakwile ni agavenyihiwe muukwani, Mariya ahikannave wandana wapama ni Yehova. — Atos 1:14.

21. Alobwana enahudhera ddi ni Mariya?

²¹ Dhithu enahudhera alobwana. Mwihiyana anona pamadhene dholebela mulobwana athotho anohagalala vanlubale. Oliye kanubuwela wihina mwariye ohumpitha, ni kanagurumela mwariye anona pamadhene dholebela. Oliye ohunona wihina akanna mwihiyana anonne pamadhene dholebela dha mBibliyani anookavihera vanlubale murala. Ahiyana amodha ehihudhera wapitha alobwana. Naari  dhigari ndo mutholo wosogolela ohudhera wa emudhi vamodha ndhithu dhimodha bwa mulobwana. — Efé. 6:4.

22. Ahiyana enahudhera ddi ni Mariya?

²² Dhithu enahudhera ahiyana. Ebaribari wihina mwihiyana anofwanelela omwiwelela mamune. Mbwenye mwihiyana kamujhehege mamune baahi wihina amujhihege epaddi yomuzimuni. (Gál. 6:5) Bumwahaya esayelege mudhidhi wihina amuhudherege Bibliya ni apenddege. Eyo kinamukavihere omudhivela ni omuriha Yehova baahi, mbwenye enere omukavihera okala ohagalala amwiwelelaga mamune.

23. Mwihiyana akala owiwelela anawakela mareeliho baavi?

²³ Kadda mwihiyana amwiwelelaga mamune anowawakela mareeliho owinjhiva. Mwihiyana aniwelela nlamulo na Yehova na okalavo namasogolela nomukavihera okala ohagala wahiya ale ehiniwelela. Teto anere okala mweddelo wapama wa azombwe a mmulogoni. Ohiya eyo anere okavihera wihina mburo vinakaliye vikale odhivela, podi okala vamuralani obe mmulogoni. (Tito 2:3-5) Peeno ethanbwe winjhiva munikuruni mwa Anamona a Yehova ahiyana. (Sal. 68:11) Atenihu, alobwana ni ahiyana nihikanna mutholo munlubale mmulogoni. Ohudhera winaharela nnere woona mutholo onna kadda muthu ni makaleloya owakwaneliha.