1. Yiphi imibuzo udade ongakatshadi okumele azibuze yona?

WONKE amaKhristu angaphansi kwenhloko engelasono, uJesu Khristu. Kodwa nxa udadewethu angatshada, uyabe esengaphansi kwenhloko elesono. Lokhu akulula ngezinye izikhathi. Yikho nxa kulomzalwane athandana laye, kumele azibuze imibuzo le: ‘Kukhona yini okutshengisa ukuthi umzalwane lo uzakuba yinhloko yemuli enhle? Uyakuqakathekisa yini ukukhonza uJehova? Nxa engakuqakathekisi, kuyini okwenza ngicabange ukuthi uzangincedisa ekukhonzeni nxa sesitshadile?’ Eminye imibuzo udade ongakatshadi okumele azibuze yona yile: ‘Yibuphi ubuntu obuhle engilabo obuzasinceda nxa sesitshadile? Ngiyabekezela futhi ngiyaphana yini? Ubungane bami loJehova buqinile yini?’ (UmTshu. 4:9, 12) Nxa udade engenza izinqumo ezinhle engakatshadi, yena lomkakhe bazaphumelela futhi bathokoze emtshadweni wabo.

2. Sizaxoxa ngani esihlokweni lesi?

² Odadewethu abanengi bayazehlisa kubomkabo futhi siyazigqaja ngabo. Kumnandi ukukhonza uJehova ndawonye labodadewethu laba abathembekileyo. Esihlokweni lesi sizaphendula imibuzo emithathu elandelayo: (1) Yibuphi ubunzima amakhosikazi ahlangana labo? (2) Kungani inkosikazi izehlisa kumkayo? (3) Abatshadileyo bangafundani ngokuzehlisa esibonelweni sikaJesu lesika-Abhigeli lesikaMariya unina kaJesu?

3. Kungani kusiba lenhlupho emtshadweni?

³ Umtshado yisipho esipheleleyo esivela kuNkulunkulu, kodwa abantu bona kabaphelelanga, balesono. (1 Joh. 1:8) Yikho iBhayibhili lisithi abatshadileyo bazakuba “lenhlupho empilweni yabo.” (1 Khor. 7:28) Kasixoxeni ngobunye ubunzima inkosikazi engahlangana labo.

4. Kuyini okungenza inkosikazi icabange ukuthi ukuzithoba kumkayo kuyehlisa isithunzi?

⁴ Indlela inkosikazi eyakhuliswa ngayo ingenza ibone angani ukuzithoba kumkayo kuyehlisa isithunzi. UMarisol ohlala eMelika uthi: “Lapho engakhulela khona, abesifazana babehlala betshelwa ukuthi kumele balingane lamadoda kukho konke. Ngiyakwazi ukuthi uJehova ubeke indoda ukuthi ibe yinhloko. Kodwa kwezinye izikhathi kunzima ukuthi ngizehlise kumkami ngoba abantu bomhlaba lo bathi singazehlisi kubomkethu.”

5. Amanye amadoda awabona njani omkawo?

⁵ Kwesinye isikhathi inkosikazi ingabe itshade lendoda ecabanga ukuthi abesifazana kabaqakathekanga njengamadoda. Udade okuthiwa ngu-Ivon ohlala eSouth America uthi: “Endaweni yakithi amadoda yiwo aqalisa ukudla. Amankazana ayapheka futhi akline, abafana bona bayabe bezihlalele besenzelwa imisebenzi ngonina labodadewabo. Batshelwa ukuthi bayabusa lapha ekhaya.” Udade okuthiwa nguYingling ohlala e-Asia uthi: “NgesiChina kulesitsho esitshengisa ukuthi kakudingakali ukuthi abesifazana bakhaliphe kumbe ukuthi babe leziphiwo. Okwabo yikwenza imisebenzi yendlini futhi kabavunyelwa ukutshela omkabo lokho abakucabangayo.” Indoda ebona umkayo ngale indlela iyabe itshengisa ukuthi kayimthandi lokuthi kayikulaleli lokho okutshiwo liBhayibhili futhi iyabe isenza impilo yakhe ibenzima. Iyabe ingalingiseli uJesu njalo ekwenzayo kakumthokozisi uJehova.—Efe. 5:28, 29; 1 Phet. 3:7.

6. Amakhosikazi kumele enzeni ukuze aqinise ubungane bawo loJehova?

⁶ Esihlokweni esidlulileyo sifunde ukuthi uJehova ukhangelele ukuthi amadoda ancedise izimuli zawo ziqine ekukhonzeni, abe lendaba lazo futhi azinakekele ngezinto ezizidingayo. (1 Tim. 5:8) Lanxa amadoda kumele ancedise imuli zawo ekukhonzeni, amakhosikazi kufanele azinike isikhathi sokubala iLizwi likaNkulunkulu nsuku zonke lokucabangisisa ngalokho akubalayo kanye lesokuthandaza kuJehova ngenhliziyo yonke. Kodwa lokhu kungaba nzima ngoba amakhosikazi alemisebenzi eminengi okumele ayenze. Yikho angabona angani kawalasikhathi kumbe amandla okwenza izinto lezi. Lanxa kunjalo, kuqakathekile ukuthi azinike isikhathi sokuzenza ngoba uJehova ufuna ngamunye wethu abe ngumngane wakhe oseduze.—ImiSeb. 17:27.

7. Kuyini okunganceda inkosikazi ukuthi izehlise kumkayo?

⁷ Khona akulula ukuthi inkosikazi izehlise kumkayo njengoba elesono. Kodwa okuzayinceda yikuzwisisa lokwamukela izizatho eziseBhayibhilini zokuthi kungani kumele yenze njalo.

8. Ngokwalokho okutshiwo ku-Efesu 5:22-24, kungani kumele inkosikazi izehlise kumkayo?

⁸ Inkosikazi iyazehlisa kumkayo ngoba yikho uJehova akhangelele ukuthi ikwenze. (Bala u-Efesu 5:22-24.) Iyamthemba uYise  osezulwini ngoba iyakwazi ukuthi uyayithanda lokuthi ngeke acele ukuthi yenze into engasoze iyincede.—Dute. 6:24; 1 Joh. 5:3.

9. Kuzakwenzakalani nxa inkosikazi ingazehlisa kumkayo?

⁹ Abantu bomhlaba lo bakhuthaza abesifazana ukuthi bangalandeli lokho okutshiwo nguJehova lokuthi babone ukuzithoba kuyikuzehlisa isithunzi. Kodwa abantu abatsho njalo kabamazi uNkulunkulu wethu olothando. Phela uJehova ngeke anike amadodakazi akhe athandekayo umlayo ozawehlisa isithunzi. Inkosikazi esebenza nzima ukuthi ilalele uJehova ngokuzehlisa kumkayo yenza kube lokuthokoza lokuthula emulini.—Hubo. 119:165.

10. Sifundani kulokho okwatshiwo nguCarol?

¹⁰ Inkosikazi ezehlisa kumkayo olesono itshengisa ukuthi iyamthanda futhi iyamhlonipha uJehova, onguye owasungula ubunhloko. UCarol ohlala eSouth America uthi: “Ngiyakwazi ukuthi umkami uzawenza amaphutha. Ngiyakwazi lokuthi indlela engimphatha ngayo nxa ethe waphambanisa itshengisa indlela engibuqakathekisa ngayo ubungane bami loJehova. Yikho ngiyazama ukuthi ngihlale ngizehlisa kuye ngoba ngifuna ukuthokozisa uBaba osezulwini.”

11. Kuyini okunceda udadewethu okuthiwa ngu-Aneese ukuthi athethelele njalo sifundani kulokho akutshoyo?

¹¹ Kungaba nzima ukuthi inkosikazi ihloniphe umkayo futhi izehlise kuye nxa ibona angani kalandaba lendlela ezizwa ngayo lalokho okuyikhathazayo. Zwana ukuthi udadewethu okuthiwa ngu-Aneese wenzani nxa umkakhe angamphatha njalo. Uthi: “Ngiyazama ukuthi ngingambambeli isikhwili futhi ngiyazikhumbuza ukuthi sonke siyaphambanisa. Yikho ngiyamthethelela ngenhliziyo yonke ngilingisela uJehova. Ukwenza njalo kuyanginceda ukuthi ngihlaliseke.” (Hubo. 86:5) Kubalula ukuthi inkosikazi ethethelelayo izehlise kumkayo.

12. Yiziphi izibonelo esifunda ngazo eBhayibhilini?

¹² Abanye bacabanga ukuthi umuntu ozehlisayo ubuthakathaka. Kodwa la ngamanga  aluhlaza tshoko. EBhayibhilini kulezibonelo ezinengi zabantu ababezehlisa futhi belesibindi. Ake sixoxe ngesikufunda kuJesu, ku-Abhigeli lakuMariya.

13. (a) Kungani uJesu ezehlisa kuYise? (b) Isibonelo sikaJesu sitshengisa njani ukuthi umuntu ozehlisayo kabuthakathaka?

¹³ UJesu uyazehlisa kuJehova, kodwa lokhu kakutsho ukuthi kakhaliphanga kumbe ukuthi kenelisi ukwenza imisebenzi ayiphiweyo. Indlela elula lecacileyo ayefundisa ngayo iyatshengisa sibili ukuthi wayekhaliphile. (Joh. 7:45, 46) Kanti njalo uJehova uyakwazi ukuthi uJesu uyingcitshi kulokho akwenzayo, yikho wasebenza laye ngesikhathi edala izulu lomhlaba. (Zaga. 8:30; Heb. 1:2-4) Ngemva kokuvuswa kukaJesu, uJehova wamnika “amandla wonke ezulwini lasemhlabeni.” (Mat. 28:18) Lanxa uJesu eyenza kuhle imisebenzi ayinikiweyo, uthembela kuYise ngoba uyamthanda.—Joh. 14:31.

14. Amadoda afundani (a) endleleni uJehova abona ngayo abesifazana? (b) kulokho okutshiwo kuZaga isahluko 31?

¹⁴ Amadoda afundani? UJehova kazange athi abesifazana bazehlise kubomkabo ngoba ebabona bengaqakathekanga. Phela labo ubakhethile ukuthi bayebusa loJesu ezulwini. (Gal. 3:26-29) UJehova utshengise ukuthi uyayithemba iNdodana yakhe ngokuyinika amandla. Indoda ehlakaniphileyo layo kumele inike umkayo amandla athile emulini. IBhayibhili lithi inkosikazi ekhutheleyo iyakhangela yonke imisebenzi eyenziwa endlini, iyathenga futhi ithengise insimu njalo yenza ibhizimusi. (Bala iZaga 31:15, 16, 18.) Kayisisosigqili esingelamvumo yokutsho lokho esikucabangayo. Kodwa umkayo uyayithemba futhi uyayilalela nxa isitsho imibono yayo. (Bala iZaga 31:11, 26, 27.) Nxa indoda ingahlonipha umkayo ngale indlela, kuzaba lula ukuthi azehlise.

15. Amakhosikazi afundani kuJesu?

¹⁵ Amakhosikazi afundani? Lanxa uJesu wenza imisebenzi emangalisayo, kazange acabange ukuthi ukuzithoba kuJehova kumehlisa isithunzi. (1 Khor. 15:28; Flp. 2:5, 6) Lowesifazana olingisela uJesu kasoze abone angani ukuzithoba kumkakhe kumehlisa isithunzi. Uzamsekela ngenxa yokuthi uyamthanda. Kodwa isizatho esiqakatheke kakhulu esenza enze njalo yikuthi uyamthanda futhi uyamhlonipha uJehova.

16. Ngokwalokho okutshiwo ku-1 Samuyeli 25:3, 23-28, yibuphi ubunzima u-Abhigeli ayephakathi kwabo? (Khangela umfanekiso ongaphandle.)

¹⁶ U-Abhigeli wayethethwe yindoda okuthiwa nguNabhali. UNabhali wayeyindoda engelandaba labanye, ezigqajayo njalo engakuqakathekisiyo ekwenzelwayo. Aluba u-Abhigeli wayefuna umtshado uphele, wayezazithulela ayekele uDavida lamadoda ayelaye abulale umkakhe. Kodwa kazange enze njalo. Wenza konke okusemandleni akhe ukuthi avikele umkakhe labendlu yabo. Kwakudinga isibindi sibili ukuthi alande amadoda angu-400 ahlomileyo ukuze abonisane loDavida ngendlela elenhlonipho. Wayezimisele lokuthi axolisele umkakhe. (Bala u-1 Samuyeli 25:3, 23-28.) UDavida wananzelela ukuthi uJehova wayesebenzise owesifazana lo olesibindi ukuthi amcebise futhi lokhu kwamvimba ukuthi adale inkemenkeme yendaba.

17. Indaba kaDavida lo-Abhigeli iwafundisani amadoda?

¹⁷ Amadoda afundani? U-Abhigeli wayengowesifazana ohlakaniphileyo futhi uDavida wenza kuhle ngokumlalela. Lokhu kwamnceda ukuthi angabulali abantu abangonanga lutho. Lendoda ehlakaniphileyo  iyacabangisisa ngalokho okutshiwo ngumkayo ingakenzi isinqumo esiqakathekileyo. Phela kungenzeka akutshoyo kuyincede ingenzi isinqumo esibi.

18. Amakhosikazi afundani ku-Abhigeli?

¹⁸ Amakhosikazi afundani? Inkosikazi emthandayo uJehova futhi emhloniphayo ingayinceda imuli yayo. Lanxa umkayo engakhonzi uJehova kumbe engalandeli lokho akutshoyo, kayisoze idinge indlela zokuqeda umtshado. Kodwa izazama ukunceda umkayo ukuthi afunde ngoJehova ngokumhlonipha langokuzehlisa kuye. (1 Phet. 3:1, 2) Lanxa umkayo engasakhethanga ukukhonza uJehova, uJehova uzathokoza ngokuthi ithembekile kuye lokuthi iyazehlisa kumkayo.

19. Kunini lapho inkosikazi engeke ilalele khona umkayo?

¹⁹ Lanxa inkosikazi izehlisa kumkayo, kayisoze imlalele nxa eyicela ukuthi yenze okuthile okungavumelani lokutshiwo liBhayibhili. Ngokwesibonelo, kayisoze imlalele umkayo ongasiFakazi nxa emtshela ukuthi aqambe amanga, atshontshe kumbe enze okunye okungathandwa nguJehova. Izamchasisela ngomusa kodwa ingambhodi ukuthi kungani ingeke ikwenze lokho. Lokhu kungenxa yokuthi wonke amaKhristu, okugoqela labodade abatshadileyo, kumele alalele uNkulunkulu kulabantu.—ImiSeb. 5:29.

20. Sikwazi njani ukuthi uMariya wayengumngane kaJehova oseduze?

²⁰ UMariya wayengumngane kaJehova oseduze. Akuthandabuzwa ukuthi wayeyazi kuhle iMibhalo. Wathi exoxa lo-Elizabethi unina kaJohane uMbhabhathizi, wacupha eMibhalweni YesiHebheru okwezikhathi ezedlula 20. (Luk. 1:46-55) Okunye okutshengisa ukuthi uMariya wayelobungane obuseduze loJehova yikuthi ingilosi yaqala ngokutshela yena ukuthi uzabeletha iNdodana kaNkulunkulu. Kayizange ilande uJosefa lanxa wayesethembisane loMariya. (Luk. 1:26-33) UJehova wayemazi kuhle uMariya futhi wayeqiniseka ukuthi uzayithanda njalo ayinakekele iNdodana yakhe. Akuthandabuzwa  ukuthi uMariya laye waqhubeka engumngane kaJehova oseduze langemva kokufa lokuvuswa kukaJesu.—ImiSeb. 1:14.

21. Amadoda afundani kuMariya?

²¹ Amadoda afundani? Indoda ehlakaniphileyo iyathokoza nxa umkayo eyazi kuhle iMibhalo. Kayimcaphukeli icabanga ukuthi sefuna ukuyithathela ubunhloko. Iyakwazi ukuthi inkosikazi elazi kuhle iBhayibhili kanye lezimiso ezikulo ingayinceda imuli. Lanxa umkayo efundile kulayo, kulokhu kungumlandu wayo ukuthi ikhokhele ekukhonzeni kwemuli lakweminye imisebenzi yokukhonza.—Efe. 6:4.

22. Amakhosikazi afundani kuMariya?

²² Amakhosikazi afundani? Lanxa inkosikazi ikwazi ukuthi umkayo nguye okhokhelayo endabeni zokukhonza, kungumlandu wayo ukuthi iqinise ukholo lwayo. (Gal. 6:5) Yikho kumele izinike isikhathi sokutaditsha lesokucabangisisa. Lokhu kuzayinceda ukuthi ihlale imthanda uJehova futhi imhlonipha njalo kuzakuba lula lokuthi izehlise kumkayo.

23. Amakhosikazi azehlisayo ancedakala njani? Azinceda njani izimuli zawo kanye lebandla?

²³ Amakhosikazi atshengisa ukuthi ayamthanda uJehova ngokuzehlisa kubomkawo azathokoza kakhulu futhi asuthiseke kulalawo angalaleli lokho okutshiwo nguJehova ngobunhloko. Ayisibonelo esihle kumajaha lakwabesifazana abasesebatsha. Kanti njalo enza kube lothando lokuthula ebandleni. (Tit. 2:3-5) Lamuhla izinceku zikaJehova ezinengi ngabesifazana. (Hubo. 68:11, NWT) Kodwa sonke, kungelani lokuthi singabesilisa kumbe singabesifazana, singancedisa ukuthi kube lokuthokoza ebandleni. Esihlokweni esilandelayo sizaxoxa ngokuthi singakwenza njani lokho.