1. Gila phangi wa mukhetu wazula desizio dia guzudiwa mu ulo mihu itshi ajiya gudihula?

AKLISTO agasue ana tuamezewa gudi Yesu Klisto yago udi mutuameji watagana. Uvi, gila phangi wa mukhetu wazudiwa mu ulo wana tuamezewa gudi muthu yonu ashigo watagana. Yana khalago ndaga yaleba. Phangi wa mukhetu udi mutshigina guzudiwa mu ulo wajiya gudihula mihu eyi: ‘Itshi idi mumonesa egi phangi muene wa yala mbawukhala fumu wabonga wa fami? Wana zula ndaga jia mu nyuma nu ndando yavula mu monyo wenji ba? Mbawungukuatesa ha gulandula gukhala nu ufuta wabonga nu Yehowa?’ Muene phangi wa mukhetu gukhanda yenji udi naye gudihula egi: ‘Makalegelo atshi mbangumonesa mu ulo wetu? Ngana khala nu khadilo dia guhana nu dia guhuiminyina ba? Ngakhala nu ufuta wakola nu Yehowa ba?’ (Mulo. 4:9, 12) Gila phangi wa mukhetu wazula desizio diabonga gutuama dia guzudiwa mu ulo, mbayimukuatesa ha gukhala nu gusuanguluga mu ulo.

2. Itshi tuza muzuelela mu longo edi?

² Aphangi a akhetu avula ana hana gifezegeselo giabonga handaga ana tumagela alumi’awo. Tudi diago guashimana! Tuana suanguluga gukalegela Yehowa hamoshi nu aphangi’etu akhetu awa agujinginyina. Mu longo edi tuza muheta mvutu gu mihu eyi thathu: (1) Ndaga jitshi jia lamba aphangi akhetu ana tagana najio? (2) Mukunda natshi aphangi a akhetu adi naye gunemesa alumi’awo? (3) Malongo atshi aphangi a mala nu akaji’awo ajiya guzula mu gifezegeselo gia Yesu, Abigayile nu Mariya, mama wa Yesu mu ndaga yatadila gunemesa?

3. Mukunda natshi aphangi a mala nu a akhetu ana tagana nu malamba mu ulo wawo?

³ Ulo udi kado gatana gana katuga gudi Nzambi. Uvi, athu ana gudizula mu ulo akhalago atagana. (1 Yone 1:8) Hene, Biblia yana zuela egi athu adi gudizula mu ulo mbaatagana nu “malamba.” (1 Kol. 7:28) Tutadilenu malamba phangi wa mukhetu ajiya gutagana nawo.

4. Mukunda natshi akhetu ako ana mona egi idi lamba ha gunemesa alumi’awo?

⁴ Matangua ako ha gutadila fundo phangi wa mukhetu akudile, wajiya gutangiza egi ajiyilego gunemesa mulumi’enji. Phangi Marisol wana jinga gu États-Unis udi muzuela egi: “Fundo ngakudile akhetu ana zuela egi adi naye gukhala luholo lumoshi nu mala mu ndaga jiagasue. Ngana jiya egi Yehowa wahanele mala ufumu, wana tshigina egi akhetu atumagele alumi’awo. Wana tshigina nji egi akhetu anemesewe. Uvi, tangua diagasue yana khalago yaleba ha gutumagela ufumu wa mulumi’ami.”

5. Matangi atshi abola mala ako ana khala nawo mukunda nu akhetu?

⁵ Phangi wa mukhetu wajiya nji guzudiwa mu ulo gudi yala wana tangiza egi akhetu ana khalago nu ndando gutuama dia mala. Phangi Ivon wana jinga gu Amérique du Sud udi muzuela egi: “Mu dimbo dietu yala wana dia thomo, mukhetu wana dia gungima. Ana a akhetu ana telega ima ya gudia, akombi inzo. Uvi ana a mala ana nengenena mama nu aphangi’awo a akhetu a ahagela ima ya gudia. Ana a mala ana zuela egi esue tudi ‘mafumu mu inzo eyi.’” Phangi wa mukhetu Yingling wana jinga gu Asie udi muzuela egi: “Mu zuelelo dietu athu ana zuela egi mukhetu gashigo naye gukhala nu ndunge nga watema. Ginemo gienji gidi gukalagala midimo yagasue ya monzo. Ashigo naye nji guhana matangi gila mulumi’enji udi muzula desizio.” Yala wana landula makalegelo awa anago gumonesa guzumba nu ashigo gudivua nu ndaga Biblia yana zuela, wana haga lujingu lua mukaji’enji mu lamba. Ana suanguluisago Yehowa nu ana landulago makalegelo a Yesu.—Ef. 5:28, 29; 1 Phet. 3:7.

6. Itshi aphangi akhetu adi naye gutshita ha gukolesa ufuta wawo nu Yehowa?

⁶ Gifua luholo tuayimonyi mu longo dia balega, Yehowa wana tshigina egi aphangi a mala akuatese enya fami jiawo ha gukhala nu nyuma yabonga nu guahana ima ya gujingila adi nawo funu. (1 Tim. 5:8) Uvi, aphangi a akhetu azudiwe gale mu ulo, adi naye gukamba tangua dia gutanga Biblia lusugu nu lusugu nu gutangigiza ndaga adi mulonguga. Adi naye nji guzula tangua dia gukombelela Yehowa. Yajiya gukhala lamba ha gukalagala ngenyi. Aphangi a akhetu ana khala nu midimo yavula, ngenyi ajiya gutangiza egi ajiyilego guheta tangua nu ngolo jia gukalagala ndaga jiene. Uvi, idi nu ndando ha guyikalagala. Mukunda natshi? Handaga Yehowa wana tshigina egi mukut’etu agasue tukhale nu ufuta wakola nenji.—Makal. 17:27.

7. Itshi yajiya gukuatesa mukhetu ha gutagenesa ginemo gia muhuile Yehowa?

⁷ Idi yadiago egi mukhetu wajiya gukalagala ngolo ha gunemesa mulumi’enji yonu ashigo muthu watagana. Uvi, mbayikhala yaleba ha gutagenesa ginemo gia muhuile Yehowa, gila wakotelesa muabonga nu watshigina ndaga Biblia yana zuela mu ndaga yatadila gunemesa nu gutumagela mulumi’enji.

8. Luholo Efeso 5:22-24 idi guyimonesa, mukunda natshi aphangi a akhetu adi naye gunemesa alumi’awo?

⁸ Aphangi a akhetu adi naye gunemesa alumi’awo handaga Yehowa wana guatoga ha gutshita ngenyi. (Tanga Efeso 5:22-24.) Phangi wa mukhetu wana tshita ngenyi, wana shila  Tata wenji wa mu dilu mutshima, wana jiya nji egi wana gumuzumba, ndaga ana gumutoga ha gutshita jidi mukunda nu gubonga guenji.—Mikh. 6:24; 1 Yone 5:3.

9. Gubonga gutshi phangi wa mukhetu ajiya guheta gila udi munemesa mulumi’enji?

⁹ Mavu awa a Satana ana tuma akhetu ha gutuna gunemesa mikhuala ya Yehowa nu ha gutuna gunemesa alumi’awo. Yadiago, athu ana tshita ndaga eji ana jiyago Nzambi wetu wa guzumba. Yehowa ajiyilego gutoga an’enji a akhetu ha gukalagala ndaga jiajiya guasegulula. Phangi wa mukhetu wana tshita ngolo ha gutumagela mukhuala wa Yehowa watadila gunemesa mulumi’enji, wana kuatesa fami yenji ha gukhala mu guhuima. (Ngi. 119:165) Gutshita ngenyi guana batela athu agasue gubonga mukatshi dia fami.

10. Malongo atshi tuajiya guzula mu gifezegeselo gia phangi Carol?

¹⁰ Mukhetu wana nemesa mulumi’enji wana monesa egi wana zumba nu wana tumagela Yehowa. Handaga Yehowa wahanele yala ginemo gia gutuameza fami. Phangi Carol wana jinga gu Amérique du Sud udi muzuela egi: “Ngana jiya egi matangua ako mulumi’ami wajiya gujimbila. Ngana jiya nji egi ndaga ngana tshita mutangua diene jiajiya gumonesa gila ngana zula ufuta wami nu Yehowa nu ndando nga ndo. Hene ngana tshita yagasue ha gunemesa mulumi’ami handaga ngana tshigina gusuanguluisa Tata wami wa mu dilu.”

11. Itshi yana kuatesa phangi Aneese ha gutotesela athu ako gubola nu malongo atshi tuajiya guzula mu gifezegeselo gienji?

¹¹ Yajiya gukhala lamba hagula mukhetu anemese mulumi’enji gila udi mumona egi mulumi’enji anago guzula matangi enji nu ndando nga anago gudisagesa mukunda nu muene. Uvi, tuzuelelenu ndaga phangi wa mukhetu Aneese ana kalagala gila ndaga ya luholo elu yabua. Phangi muene udi muzuela egi: “Ngana tshita yagasue ha gutuna guvua khabu. Handaga ngana jiya egi mukut’etu agasue tuana jimbila. Felela diami diana khala dia gutotesela athu ako gubola, gifua luholo Yehowa wana kalagala. Tangua ngana totesela athu gubola, ngana heta guhuima gua matangi.” (Ngi. 86:5) Gila mukhetu udi mutotesela athu ako, yana khala yaleba gudi muene ha gunemesa mulumi’enji.

12. Ifezegeselo itshi idi mu Biblia?

¹² Athu ako ajiya gutangiza egi gila anemesa muthu ajiya gumumona egi udi muthu wa phamba. Uvi, ishigo ngenyi. Biblia idi nu ifezegeselo yavula ya athu akhalele nu gikhesa anyi akhalele munemesa athu ako. Tutadilenu malongo tuajiya guzula mu gifezegeselo gia Yesu, Abigayile nu Mariya.

13. Mukunda natshi Yesu ana nemesa Yehowa? Kotelesa.

¹³ Yesu wana nemesa Yehowa. Uvi, ishigo mumonesa egi Yesu ana khalago nu ndunge nga gutema. Ndaga jiakhalele mulonga muene jia khalele jialeba, athu akhalele gujikotelesa muabonga. Ndaga eyi idi diago mumonesa egi wakhalele watema lume. (Yone 7:45, 46) Yehowa wajiyile egi Yesu wana khala nu ndunge jiavula, hene amuhanele luendu lua gukalagala nenji hamoshi mudimo wa gufuga ima. (Ish. 8:30; Heb. 1:2-4) Tangua Yehowa afuzumuile Yesu, wa muhanele ‘ngolo jiagasue mu dilu nu ha mavu.’ (Mat. 28:18) Ngatshima Yesu wakhalele diago watema, wakhalele mukamba utuameji wa Yehowa mu ndaga jiagasue. Mukunda natshi? Handaga wana zumba Sh’enji.—Yone 14:31.

14. Longo ditshi mala ajiya guzula (a) mu luholo Yehowa wana tadila akhetu? (b) ha gutadila ndaga jidi mu Ishima 31?

¹⁴ Malongo mala ajiya guzula. Luholo Yehowa atombele yala ha gukhala fumu wa fami, ishigo mumonesa egi wana zula yala nu ndando yavula gubalega mukhetu. Yehowa wana monesa egi wana zula akhetu nu ndando handaga mukatshi dia athu ana tomba muene ha guhinyina nu Yesu akhetu nji adi mukatshi. (Gal. 3:26-29) Yehowa wamonesele egi wana hagela Mun’enji mutshima, hene amuhanele ufumu. Luholo lumoshi nji yala watema udi naye gushila mukaji’enji mutshima. Biblia idi mumonesa ndaga mukhetu watema ana kalagala. Ha gufezegesa, wana tuameza midimo ya monzo, wana sumba mavu nu wana kuna mbuto, wajiya nji gukalagala mungenda. (Tanga Ishima 31:15, 16, 18.) Mukhetu gashigo muhiga yonu ajiyilego guhana matangi gila yala udi muzula desizio. Uvi, mulumi’enji udi naye gumushila mutshima nu gumutegelela tangua adi muhana matangi enji. (Tanga Ishima 31:11, 26, 27.) Gila yala udi mukalagala ndaga jia luholo elu, mukaji’enji mbawukhala nu gusuanguluga ha gumutumagela.

15. Longo ditshi akhetu ajiya guzula mu gifezegeselo gia Yesu?

¹⁵ Malongo akhetu ajiya guzula. Ngatshima Yesu wakhalele mutshita ndaga jia gushimana, wakhalele munemesa Yehowa mu ndaga jiagasue. (1 Kol. 15:28; Fili. 2:5, 6) Luholo lumoshi nji mukhetu watema wana landula gifezegeselo gia Yesu, udi naye gutumagela mulumi’enji mu ndaga jiagasue. Ashigo naye gukuatesa mulumi’enji handaga wana gumuzumba. Uvi, udi naye gukalagala ngenyi handaga wana zumba thomo Yehowa nu wana gumunemesa.

16. Ha gutadila 1 Samuele 25:3, 23-28, malamba atshi Abigayile ataganele nawo? (Tala gifuanesa holu dia gizula.)

¹⁶ Abigayile wakhalele mukajia Nabale. Mulumi’enji wakhalele mukamba phamba gubonga guenji hakhenji, muenya lulendo, akhalelego nji nu khadilo dia guhana mersi. Ikhale ngenyi, Abigayile akambelego gushiya ulo wenji. Ha gufezegesa abembelego egi Davidi nu athu enji aze ashiye mulumi’enji. Uvi, wakambele luholo lua gubamba Nabale nu enya inzo yenji. Tangiza gale gikhesa gia monesele Abigayile ha gumagana gutuama dia masuta 400 nu luholo anemesele Davidi tangua akhalele muzuelela ndaga yene. Ikhale ishigo muene wakalegele gubola, watogele Davidi ha gutotesela mulumi’enji. (Tanga 1 Samuele 25:3, 23-28.)  Davidi wakotelesele egi Yehowa wakalegele mukhetu yowu wa gikhesa ha gumuhana malongo hagula akalagalago gubola guakoma.

17. Longo ditshi mala ajiya guzula mu lumene lua Davidi nu Abigayile?

¹⁷ Malongo mala ajiya guzula. Abigayile wakhalele mukhetu watema diago. Idi yadiago egi Davidi wavuile malongo Abigayile amuhanele. Gishina giene, atunyile gushiya enya inzo ya Nabale. Luholo lumoshi nji yala watema udi naye gutegelela mukaji’enji tangua adi muzula ba desizio a ndando. Matangi a mukaji’enji ajiya gumukuatesa ha gutuna guzula ba desizio abola.

18. Longo ditshi aphangi akhetu ajiya guzula mu gifezegeselo gia Abigayile?

¹⁸ Malongo akhetu ajiya guzula. Mukhetu wana zumba Yehowa nu wana gumunemesa wajiya gubatela fami yenji gubonga, ngatshima mulumi’enji anago gukombelela Yehowa nu anago gujinga mu gudivua nu mikhuala ya Biblia. Ashigo naye gukamba luholo lua gushiya ulo wenji. Uvi, gila udi munemesa mulumi’enji nu udi gumutumagela mbawumukuatesa ha gulonguga ndaga jiatadila Yehowa. (1 Phet. 3:1, 2) Ngatshima mulumi’enji wazula desizio dia gutuna gulonguga Biblia, Yehowa mbawukhala nu gusuanguluga gila mukhetu udi mutumagela mulumi’enji nu udi musala ya gujinginyina gudi Yehowa.

19. Mu ndaga jia luholo lutshi phangi wa mukhetu ajiya gutuna gutumagela mulumi’enji?

¹⁹ Idi yadiago egi phangi wa mukhetu udi naye gunemesa mulumi’enji. Uvi, ashigo naye gutshigina gila mulumi’enji wamutoga ha gushiya mikhuala ya Biblia. Ha gufezegesa, tangiza egi phangi mumoshi wa mukhetu mulumi’enji ashigo Temue wa Yehowa, yala muene wamutoga ha gumba mambo, ha gukuya, nga wa mutuma ha gukalagala ndaga jiko jishigo gudivua nu Biblia. Aklisto agasue, ikhale aphangi akhetu anyi azudiwe gale mu ulo adi naye thomo gutumagela Yehowa Nzambi. Gila atoga phangi mumoshi wa mukhetu ha gushiya mikhuala ya Biblia udi naye gutuna. Udi naye guwambela mulumi’enji nu gisemo giagasue gishina adi mutuna gukalagala ndaga adi gumutoga.—Makal. 5:29.

20. Luholo lutshi tudi mujiya egi Mariya wakhalele nu ufuta wakola nu Yehowa?

²⁰ Mariya wakhalele nu ufuta wakola nu  Yehowa. Idi yadiago egi wakhalele mujiya Biblia muaboga diago. Tangua akhalele muta maga nu Elizabete, mama wa Yone Mubatiji, Mariya watangele verse gubalega 20 jia gitshinyi gia Biblia giasonegewe mu zuelelo dia Hebelu (Écritures hébraïques). (Luka 1:46-55) Tutadilenu ndaga eyi: Mariya wakhalele wasogewa gale gudi Yozefe, ikhale ngenyi muanjelo wa Yehowa wayilego thomo mumonega gudi Yozefe. Uvi, wayile thomo gudi Mariya nu wamuwambelele gamba mbawuvuala Muna Nzambi. (Luka 1:26-33) Yehowa wakhalele mujiya Mariya muaboga. Washile mutshima egi mbawuzumba Mun’enji nu mbawumubamba. Idi yadiago egi Mariya walanduile gukhala nu ufuta wakola nu Yehowa, ikhale tangua Yesu afuile nu afuzumugile ha guya mu dilu.—Makal. 1:14.

21. Longo ditshi aphangi a mala ajiya guzula mu lumene lua Mariya ludi mu Biblia?

²¹ Malongo mala ajiya guzula. Yala watema udi naye gusuanguluga gila mukaji’enji udi mujiya Biblia muaboga. Ashigo naye guvua woma nga gutangiza egi mukhetu udi mutshigina gubua fumu wa fami. Udi naye gukotelesa egi gila mukaji’enji udi mujiya Biblia nu malongo enji muaboga wajiya gukuatesa fami. Ngatshima mukhetu wa longugile muavula gubalega yala, udi naye gujiya egi mulumi’enji udi naye gutuameza gukombelela gua mu fami nga ndaga jiko jia mu nyuma.—Ef. 6:4.

22. Longo ditshi aphangi a akhetu ajiya guzula mu gifezegesela gia Mariya?

²² Malongo akhetu ajiya guzula. Mukhetu udi naye gutumagela mulumi’enji. Uvi muene hakhenji udi naye gutshita ngolo ha gukolesa gutshigina guenji. (Gal. 6:5) Ha guyitshita, udi naye gukamba tangua dia gutshita gulonguga guenji hakhenji nu gutangigiza ndaga adi mulonguga. Gutshita ngenyi, mbagumukuatesa ha gubamba guzumba guenji, ha gunemesa Yehowa nu ha gutumagela mulumi’enji.

23. Gubonga gutshi akhetu ana tumagela alumi’awo ana heta? Luholo lutshi ana kuatesa fami jiawo nu hungu?

²³ Akhetu ana nemesa alumi’awo ana monesa egi ana zumba Yehowa nu mbaakhala nu gusuanguluga guavula gubalega akhetu ana tuna gutumagela mikhuala ya Yehowa. Ana khala gifezegeselo giawaha mukunda nu mavuala a mala nu a akhetu. Ana monesa guzumba, ana kamba nji gubamba guhuima mu fami nu mu hungu. (Tito 2:3-5) Mangino, aphangi a akhetu avula adi mukatshi dia athu ana kombelela Yehowa nu gujinginyina guagasue. (Ngi. 68:11) Mukut’etu agasue tudi nu ndaga ya ndando ya gukalagala mu hungu. Mu longo dia landula mbatumona luholo muthu wagasue ajiya gukalagala ndaga yene.